1.Jesprimi l-akbar solidarjetà tiegħu mal-vittmi kollha, mal-familji tagħhom u mal-individwi kollha affettwati mill-għargħar distruttiv fl-Italja, fis-Slovenja, fl-Awstrija, fil-Greċja u fi Franza kif ukoll mal-awtoritajiet nazzjonali, reġjonali u lokali involuti fl-isforzi tas-sokkors;

2.Jilqa’ d-deċiżjoni bħala forma tanġibbli u viżibbli tas-solidarjetà tal-Unjoni maċ-ċittadini tagħha u mar-reġjuni fiż-żoni affettwati fl-Italja, fis-Slovenja, fl-Awstrija, fil-Greċja u fi Franza;

3.Itenni l-importanza li l-benefiċċji tanġibbli pprovduti permezz tal-Fond ta’ Solidarjetà tal-Unjoni Ewropea (FSUE) jiġu kkomunikati lill-pubbliku, sabiex ukoll tkompli tikber is-sensibilizzazzjoni taċ-ċittadini dwar l-għodod u l-programmi tal-Unjoni;

4.Jenfasizza l-għadd dejjem jikber ta’ diżastri naturali severi u distruttivi fl-Ewropa u jistieden lill-Istati Membri u lill-Kummissjoni jinvestu aktar f’miżuri ta’ mitigazzjoni tat-tibdil tal-klima u adattament għalih biex jiġu evitati t-telf ta’ ħajjiet u t-telf ekonomiku; iqis li l-baġit tal-FSUE jew l-ekwivalenti tiegħu għandu jiġi estiż fid-dawl tal-proposta li jmiss tal-Kummissjoni dwar il-Qafas Finanzjarju Pluriennali l-ġdid u tan-negozjati interistituzzjonali sussegwenti; iħeġġeġ lill-Kummissjoni żżid il-baġit tar-Riżerva ta’ Solidarjetà Ewropea u tiżgura li l-ammont globali tal-finanzjament u l-modalitajiet tal-allokazzjoni jiżguraw effettività ottimali tal-FSUE;

5.Jisħaq li, minħabba t-tibdil fil-klima, ir-reġjuni insulari u kostali huma partikolarment vulnerabbli għad-diżastri naturali; jirrikonoxxi li fenomeni bħal terremoti, għargħar, żbroffi vulkaniċi, u nixfiet - li jaffettwaw ukoll il-lagi u x-xmajjar - jirrappreżentaw theddida dejjem akbar għal ħafna reġjuni Ewropej, b’mod partikolari dawk fil-Mediterran; jistaqsi jekk il-FSUE huwiex allinjat b’mod adegwat mal-ħtiġijiet ta’ emerġenza relatati mal-adattament għat-tibdil fil-klima f’dawn it-territorji partikolarment fraġli; jemmen, għalhekk, li r-reġjuni insulari u kostali għandhom jirċievu finanzjament adegwat fil-qafas tal-FSUE biex jindirizzaw il-vulnerabbiltajiet speċifiċi tagħhom;

6.Jisħaq li l-FSUE huwa biss strument kurattiv u li l-Unjoni għandha wkoll tkompli tindirizza l-adattament għat-tibdil fil-klima u l-mitigazzjoni tiegħu billi tappoġġja l-politiki Ewropej u nazzjonali għall-prevenzjoni tad-diżastri naturali; jissottolinja li r-Rapport Nru 1/2024 tal-EEA “Valutazzjoni tar-Riskju Klimatiku fl-Ewropa” wissa li l-blokk mhuwiex ippreparat għall-effetti tat-tibdil fil-klima u jisħaq fuq il-ħtieġa għal azzjoni biex jiġi evitat li r-riskji klimatiċi identifikati jilħqu livelli kritiċi; jistieden lill-Istati Membri u lill-Kummissjoni jwettqu l-kontribut tagħhom biex jintlaħqu l-objettivi miftiehma fis-Summit ta’ Pariġi dwar il-Klima; ifakkar fil-ħtieġa ta’ sinerġiji effettivi ma’ politiki u programmi oħra tal-Unjoni u jissottolinja li l-Istati Membri għandhom jagħmlu l-aħjar użu mill-opportunitajiet ta’ finanzjament, b’mod partikolari mill-Fond Ewropew għall-Iżvilupp Reġjonali, mill-Fond Soċjali Ewropew +, mill-Fond Ewropew għall-Affarijiet Marittimi, is-Sajd u l-Akkwakultura, mill-Fond ta’ Koeżjoni u mill-programmi tal-iżvilupp rurali; jisħaq ukoll fuq il-ħtieġa ta’ miżuri preventivi, mhux biss biex tiġi mitigata l-ħsara fil-futur iżda anki biex jiġi evitat li l-kundizzjonijiet ta’ riskju jaggravaw wara eventi katastrofiċi, bħal nirien fil-foresti, uqigħ tal-art jew l-inxif ta’ lagi u xmajjar; jissottolinja l-importanza ta’ flessibbiltà adegwata bejn il-programmi differenti; jissottolinja li assistenza mogħtija fl-ambitu tal-FSUE ma għandhiex tkun għad-detriment tal-finanzjament tal-Unjoni riċevut mill-Istati Membri fl-ambitu ta’ programmi jew politiki oħra tal-Unjoni; ifakkar li l-Istati Membri jistgħu jagħtu għajnuna mill-Istat, f’konformità mar-regoli applikabbli tal-Unjoni, b’mod partikolari għan-negozji agrikoli li jkunu sofrew danni minħabba diżastri naturali;

7.Ifakkar fl-importanza ta’ valutazzjoni rapida u solida tal-ħsarat li tqis kif xieraq ir-riperkussjonijiet ekonomiċi u jitlob li jsiru aktar sforzi operazzjonali sabiex jitnaqqas iż-żmien medju għar-rilaxx ta’ avvanzi, filwaqt li jiġi żgurat li l-baġit tal-Unjoni jkun protett; jistieden lill-Kummissjoni tkompli tissimplifika l-proċedura u tqassar iż-żmien meħtieġ għall-ipproċessar tal-applikazzjonijiet għall-mobilizzazzjoni tal-FSUE, taċċelera l-ħinijiet ta’ rispons u tiżgura li l-fondi jilħqu lir-reġjuni affettwati fil-pront peress li d-diżastri naturali jikkawżaw ħsara sinifikanti li tfixkel il-ħajja ta’ kuljum u l-ekonomiji lokali; jisħaq fuq il-ħtieġa ta’ flessibbiltà raġonevoli meta l-pajjiżi riċevituri jiffaċċjaw dewmien u sfidi ġustifikabbli biex japplikaw u jużaw il-finanzjament allokat; jistieden lill-Istati Membri jqisu li l-popolazzjonijiet vulnerabbli jiġu affettwati b’mod partikolari mid-diżastri naturali minħabba fatturi soċjoekonomiċi li jkomplu jfixklu l-kapaċità tagħhom li jirkupraw;

8.Jisħaq fuq il-ħtieġa urġenti li tiġi rilaxxata assistenza finanzjarja immedjata permezz tal-FSUE biex jiġi żgurat li l-appoġġ ikun jista’ jilħaq lir-reġjuni affettwati fi żmien xieraq;

9.Japprova d-deċiżjoni annessa ma’ din ir-riżoluzzjoni;

10.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

11.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.