A.billi, fil-31 ta’ Marzu 2017, Syngenta Crop Protection NV/SA, ibbażata fil-Belġju, f’isem Syngenta Crop Protection AG, ibbażata fl-Iżvizzera, bagħtet applikazzjoni lill-awtorità kompetenti nazzjonali tal-Ġermanja għat-tqegħid fis-suq ta’ ikel, ta’ ingredjenti tal-ikel u ta’ għalf li fihom il-qoton ġenetikament modifikat COT102 (minn hawn ’il quddiem “il-qoton ġenetikament modifikat”), li jikkonsistu minnu jew li jkunu prodotti minnu, f’konformità mal-Artikoli 5 u 17 tar-Regolament (KE) Nru 1829/2003 (“l-applikazzjoni”). billi l-applikazzjoni kopriet ukoll it-tqegħid fis-suq ta’ prodotti li fihom il-qoton ġenetikament modifikat, jew li jikkonsistu minn tali qoton, għal użi oħra għajr l-ikel u l-għalf, bl-eċċezzjoni tal-kultivazzjoni;

B.billi, fl-10 ta’ Mejju 2023, l-EFSA adottat opinjoni favorevoli, li ġiet ippubblikata fis-26 ta’ Ġunju 2023, li tikkonkludi li l-qoton ĠM huwa sikur daqs il-komparatur mhux ĠM tiegħu u l-varjetajiet ta’ qoton mhux ĠM ittestjati fir-rigward tal-effetti potenzjali fuq is-saħħa tal-bniedem u tal-annimali u l-ambjent;

C.billi l-qoton ĠM fih ġeni li jipproduċu proteini insettiċidi (“tossini Bt”) u ġene markatur tar-reżistenza għall-antibijotiċi (“ARMG”);

D.billi ż-żejt taż-żerriegħa tal-qoton jista’ jintuża fil-produzzjoni ta’ varjetà wiesgħa ta’ prodotti tal-ikel bħal dressings, mayonnaise, prodotti fini tal-forn, pejsts taċ-ċikkulata u ċ-ċips; billi l-konsum tad-dqiq taż-żerriegħa tal-qoton huwa l-aktar mod probabbli li bih il-bnedmin jistgħu jiġu esposti għaż-żewġ proteini li jirriżultaw mill-modifika ġenetika; billi l-qoton jintuża b’mod komuni fl-għalf tal-annimali fil-forma ta’ żrieragħ u dqiq li ma tkunx tneħħitilhom l-għabra;

Kwistjonijiet pendenti dwar it-tossini Bt

E.billi t-tossiċità tat-tossini Bt ġiet ivvalutata abbażi ta’ studji dwar l-għalf, bl-użu biss ta’ proteini tal-Bt iżolati prodotti mill-batterji; billi ma tantx tista’ tiġi attribwita wisq relevanza għat-testijiet tossikoloġiċi mwettqa bil-proteini waħedhom, minħabba l-fatt li t-tossini Bt fl-għelejjel ĠM, bħall-qamħirrun, il-qoton u l-fażola tas-sojja, huma intrinsikament aktar tossiċi minn tossini Bt iżolati; billi dan huwa minħabba li l-inibituri tal-proteażi (PI), preżenti fit-tessut tal-pjanti, jistgħu jżidu t-tossiċità tat-tossini Bt billi jdewmu d-degradazzjoni tagħhom; billi dan il-fenomenu ntwera f’għadd ta’ studji xjentifiċi, inkluż wieħed imwettaq għal Monsanto li wera li anke l-preżenza ta’ livelli estremament baxxi ta’ PI saħħet it-tossiċità tat-tossini Bt b’sa 20 darba aktar MacIntosh, S.C., Kishore, G.M., Perlak, F.J., Marrone, P.G., Stone, T.B., Sims, S.R., Fuchs, R.L., “Potentiation of Bacillus thuringiensis insecticidal activity by serine protease inhibitors”, Journal of Agricultural and Food Chemistry, 1990.38, 4, pp. 1145-1152, https://pubs.acs.org/doi/abs/10.1021/jf00094a051.;

F.billi din it-tossiċità akbar ma titqiesx fil-valutazzjonijiet tar-riskju tal-EFSA, minkejja li hija rilevanti għall-pjanti Bt kollha approvati għall-importazzjoni jew għall-kultivazzjoni fl-Unjoni; billi r-riskji għall-bnedmin u għall-annimali li jikkonsmaw ikel u għalf li fih tossini Bt u li jirriżultaw minn din it-tossiċità akbar minħabba l-interazzjoni bejn it-tossini PI u Bt ma jistgħux, għalhekk, jiġu esklużi;

G.billi għadd ta’ studji juru li ġew osservati effetti sekondarji li jistgħu jaffettwaw is-sistema immunitarja wara esponiment għal tossini Bt u li xi tossini Bt jista’ jkollhom proprjetajiet aġġuvanti Għal rieżami, ara Rubio-Infante, N., Moreno-Fierros, L., “An overview of the safety and biological effects of Bacillus thuringiensis Cry toxins in mammals”, Journal of Applied Toxicology, Mejju 2016, 36(36.5), p. 630-648, https://onlinelibrary.wiley.com/doi/full/10.1002/jat.3252., li jfisser li jistgħu jżidu l-allerġeniċità ta’ proteini oħra li jiġu f’kuntatt magħhom;

Għelejjel Bt: effetti fuq organiżmi li mhumiex fil-mira

H.billi, għall-kuntrarju tal-użu ta’ insettiċidi, meta l-esponiment ikun fiż-żmien tal-bexx u għal żmien limitat wara, l-użu ta’ għelejjel Bt ĠM iwassal għal esponiment kontinwu tal-organiżmi fil-mira u ta’ dawk li mhumiex fil-mira għat-tossini Bt;

I.billi s-suppożizzjoni li t-tossini Bt juru modalità ta’ azzjoni waħda speċifika għall-mira ma tistax tibqa’ titqies bħala korretta u l-effetti fuq l-organiżmi li mhumiex fil-mira ma jistgħux jiġu esklużi Ara, pereżempju, Hilbeck, A., Otto, M., “Specificity and combinatorial effects of Bacillus thuringiensis Cry toxins in the context of GMO environmental risk assessment”, Frontiers in Environmental Science 2015, 3:71, https://doi.org/10.3389/fenvs.2015.00071.;

J.billi ġie rrappurtat li għadd dejjem akbar tal-organiżmi li mhumiex fil-mira qed jiġu affettwati b’ħafna modi; billi studju reċenti Hilbeck, A., Defarge, N., Lebrecht, T., Bøhn, T., ‘Insecticidal Bt crops. EFSA’s risk assessment approach for GM Bt plants fails by design”, RAGES, 2020, p. 4, https://www.testbiotech.org/wp-content/uploads/2023/12/RAGES_report-Insecticidal-Bt-plants.pdf. jsemmi 39 pubblikazzjoni rieżaminati bejn il-pari li jirrappurtaw effetti negattivi sinifikanti tat-tossini Bt fuq ħafna speċijiet “barra mill-firxa”;

Tnaqqis tad-dipendenza fuq l-għalf importat

K.billi waħda mit-tagħlimiet mill-kriżi tal-COVID-19 u l-gwerra li għadha għaddejja fl-Ukrajna hija l-ħtieġa li l-Unjoni ttemm id-dipendenzi fuq xi materjali kritiċi; billi fl-ittra ta’ missjoni lill-Kummissarju nnominat Christophe Hansen, il-President tal-Kummissjoni Ursula von der Leyen titolbu jħares lejn modi kif jitnaqqsu l-importazzjonijiet ta’ komoditajiet kritiċi https://commission.europa.eu/document/2c64e540-c07a-4376-a1da-368d289f4afe_en;

Inklużjoni ta’ ġeni markaturi tar-reżistenza għall-antibijotiċi (ARMG)

L.billi l-qoton ĠM jipproduċi l-proteina APH4, li tintuża bħala ARMG u li tiddiżattiva l-attività tal-antibijotiku igromiċina B;

M.billi l-Artikolu 4(2) tad-Direttiva 2001/18/KE tal-Parlament Ewropew u tal-Kunsill Id-Direttiva 2001/18/KE tal-Parlament Ewropew u tal-Kunsill tat-12 ta’ Marzu 2001 dwar ir-rilaxx intenzjonat fl-ambjent ta’ organiżmi modifikati ġenetikament u li tħassar id-Direttiva tal-Kunsill 90/220/KEE (ĠU L 106, 17.4.2001, p. 1, ELI: http://data.europa.eu/eli/dir/2001/18/oj). jirrikjedi li “GMOs li jkun fihom ġeni li għandhom reżistenza għall-antibijotiċi bl-użu ta’ trattament mediku jew veterinarju jittieħdu in konsiderazzjoni meta [titwettaq] stima ta’ riskju ambjentali, bl-idea li [jiġu identifikati] u ftit ftit [eliminati] dawk l-indikaturi ta’ reżistenza antibijotika fil-GMOs li jistgħu jkolhom effetti ħżiena fuq is-saħħa u l-ambjent” u jiffissa skadenza sal-2004 li warajha m’għandhomx jitpoġġew aktar fis-suq tal-Unjoni;

N.billi r-Regolament ta’ Implimentazzjoni tal-Kummissjoni (UE) Nru 503/2013 Ir-Regolament ta’ Implimentazzjoni tal-Kummissjoni (UE) Nru 503/2013 tat- 3 ta’ April 2013 dwar applikazzjonijiet għal awtorizzazzjoni ta’ ikel u għalf ġenetikament modifikat skont ir-Regolament (KE) Nru 1829/2003 tal-Parlament Ewropew u tal-Kunsill u li jemendaw ir-Regolamenti (KE) Nru 641/2004 u (KE) Nru 1981/2006 (ĠU L 157, 8.6.2013, p. 1, ELI: http://data.europa.eu/eli/reg_impl/2013/503/oj?locale=mt). jiddikjara li “issa huwa possibbli li jkunu żviluppati OĠM mingħajr l-użu ta’ ARMGs” u li “l-applikant għandu għalhekk jimmira li jiżviluppa OMĠ mingħajr l-użu ta’ ARMGs”;

O.billi diversi Stati Membri qajmu kummenti kritiċi dwar l-użu tal-ARMGs, inkluż li, fid-dawl tal-kriżi attwali li tikkonċerna r-reżistenza għall-antibijotiċi, ikun għaqli li jiġi implimentat il-prinċipju ta’ prekawzjoni, speċjalment fil-każ preżenti fejn l-applikazzjoni tal-ARMG hija kompletament mhux meħtieġa u t-tneħħija tal-ARMG mill-ġenoma tal-pjanti hija possibbli; billi awtorità kompetenti ta’ Stat Membru wieħed tat l-awtorizzazzjoni opinjoni sfavorevoli bbażata fuq il-preżenza tal-ARMG fil-ġenoma tal-qoton ĠM;

P.billi l-Aġenzija Ewropea għall-Mediċini kkonfermat li ma hemm l-ebda prodott li fih l-igromiċina B awtorizzat għal użi terapewtiċi, profilattiċi jew kwalunkwe użu mediku ieħor fil-bnedmin jew fl-annimali fl-Istati Membri u ma hemm l-ebda awtorizzazzjoni ċentrali għall-użu mill-bniedem jew veterinarju għal prodotti mediċinali li fihom l-igromiċina B11; billi l-opinjoni tal-EFSA tiddikjara li “l-Bord dwar l-OĠM iqis li l-valutazzjoni tar-riskju jista’ jkollha bżonn tiġi aġġornata f’każ li l-prodotti li fihom l-igromiċina B jew sottostrati oħra tal-enzima APH4 jiksbu approvazzjoni futura tas-suq fl-UE”; billi, madankollu, l-igromiċina B tintuża fi prodotti veterinarji li jinbiegħu barra mill-Unjoni;

Q.billi l-Parlament, mill-inqas f’okkażjoni waħda preċedenti, oġġezzjona għall-importazzjoni ta’ għelejjel ĠM li kien fihom ARMGs Riżoluzzjoni tal-Parlament Ewropew tal-11 ta’ Novembru 2020 dwar l-abbozz ta’ deċiżjoni ta’ implimentazzjoni tal-Kummissjoni li tawtorizza t-tqegħid fis-suq ta’ prodotti li jkun fihom il-qamħirrum ġenetikament modifikat MON 87427 × MON 87460 × MON 89034 x MIR162 x NK603, ikunu jikkonsistu minnu jew li jkunu magħmulin minnu, u l-qamħirrum ġenetikament modifikat li jgħaqqad tnejn, tlieta jew erbgħa mill-avvenimenti MON 87427, MON 87460, MON 89034, MIR162 u NK603, skont ir-Regolament (KE) Nru 1829/2003 tal-Parlament Ewropew u tal-Kunsill (ĠU C 415, 13.10.2021, p. 15).;

R.billi r-reżistenza għall-antimikrobiċi toħloq theddida għas-saħħa globali, għas-sigurtà tal-ikel, u għall-kisba tal-Għanijiet ta’ Żvilupp Sostenibbli għall-2030, u billi l-infezzjonijiet reżistenti għall-mediċini ma għandhomx fruntieri https://www.who.int/campaigns/world-amr-awareness-week/2024/amr-is-invisible-i-am-not;

Kummenti tal-awtorità kompetenti tal-Istat Membru u tal-partijiet ikkonċernati

S.billi l-Istati Membri ppreżentaw ħafna kummenti kritiċi lill-EFSA matul il-perjodu ta’ konsultazzjoni ta’ tliet xhur https://efsa.onlinelibrary.wiley.com/action/downloadSupplement?doi=10.2903%2Fj.efsa.2023.8031&file=efs28031-sup-0008-Annex8.pdf. inkluż li l-kultivazzjoni tal-qoton ĠM f’għelieqi agrikoli għandha titqies bħala kontaminazzjoni intenzjonata tal-ambjenti naturali b’ġeni ta’ reżistenza għall-antibijotiċi, kif ukoll li l-informazzjoni pprovduta dwar il-karatterizzazzjoni molekulari, il-kompożizzjoni u t-tossikoloġija hija insuffiċjenti u għalhekk il-konklużjonijiet tal-EFSA dwar l-ekwivalenza tal-qoton ĠM mal-qoton konvenzjonali f’termini ta’ sikurezza tal-ikel u tal-għalf huma prematuri;

T.billi r-Regolament (KE) Nru 1829/2003 jiddikjara li l-ikel jew l-għalf ĠM ma jridx ikollu effetti negattivi fuq is-saħħa tal-bniedem, is-saħħa tal-annimali jew l-ambjent, u jirrikjedi li l-Kummissjoni tqis kwalunkwe dispożizzjoni rilevanti fid-dritt tal-Unjoni u fatturi leġittimi oħra rilevanti għall-kwistjoni taħt kunsiderazzjoni meta tkun qed tabbozza d-deċiżjoni tagħha; billi tali fatturi leġittimi għandhom jinkludu l-impenji tal-Unjoni biex tindirizza r-reżistenza għall-antimikrobiċi;

Proċess deċiżjonali mhux demokratiku

U.billi, fit-tmien leġiżlatura tiegħu, il-Parlament adotta total ta’ 36 riżoluzzjoni li joġġezzjonaw għall-introduzzjoni fis-suq ta’ OĠM għall-ikel u għall-għalf (33 riżoluzzjoni) u għall-kultivazzjoni ta’ OĠM fl-Unjoni (tliet riżoluzzjonijiet); billi, fid-disa’ leġiżlatura tiegħu, il-Parlament adotta 38 oġġezzjoni għall-introduzzjoni fis-suq ta’ OĠM;

V.billi minkejja r-rikonoxximent tagħha stess tan-nuqqasijiet demokratiċi, in-nuqqas ta’ appoġġ mill-Istati Membri u l-oġġezzjonijiet tal-Parlament, il-Kummissjoni qed tkompli tawtorizza l-OĠM;

W.billi ma hija meħtieġa ebda bidla fil-liġi biex il-Kummissjoni tkun tista’ ma tawtorizzax l-OĠM meta ma jkunx hemm maġġoranza kwalifikata ta’ Stati Membri favur fil-Kumitat ta’ Appell Il-Kummissjoni “tista’”, u mhux “għandha”, tmexxi bl-awtorizzazzjoni jekk ma jkun hemm l-ebda maġġoranza kwalifikata ta’ Stati Membri favur fil-Kumitat ta’ Appell, skont l-Artikolu 6(3) tar-Regolament (UE) Nru 182/2011.;

X.billi l-votazzjoni fit-8 ta’ Lulju 2024 tal-Kumitat Permanenti dwar il-Pjanti, l-Annimali, l-Ikel u l-Għalf imsemmi fl-Artikolu 35 tar-Regolament (KE) Nru 1829/2003 ma tat l-ebda opinjoni, li jfisser li l-awtorizzazzjoni ma kinitx appoġġjata minn maġġoranza kwalifikata tal-Istati Membri; billi anki l-votazzjoni tat-3 ta’ Settembru 2024 tal-Kumitat ta’ Appell ma tat ebda opinjoni;