A.billi, fl-14 ta’ Frar 2023, Bayer Agriculture BV, ibbażata fil-Belġju, ippreżentat f’isem il-kumpanija Bayer CropScience LP, ibbażata fl-Istati Uniti, applikazzjoni lill-awtorità kompetenti nazzjonali tan-Netherlands għall-introduzzjoni fis-suq ta’ ikel, ta’ ingredjenti tal-ikel u ta’ għalf li fihom, li jikkonsistu minn, jew li huma prodotti mill-qamħirrum ġenetikament modifikat MON 94804 (il-“qamħirrum ĠM”), f’konformità mal-Artikoli 5 u 17 tar-Regolament (KE) Nru 1829/2003 (“l-applikazzjoni”);

B.billi l-applikazzjoni kienet tikkonċerna wkoll l-introduzzjoni fis-suq ta’ prodotti li fihom jew li jikkonsistu mill-qamħirrum ĠM għal użi oħra għajr l-ikel u l-għalf, bl-eċċezzjoni tal-kultivazzjoni;

C.billi, fit-13 ta’ Marzu 2024, l-EFSA adottat opinjoni favorevoli, li ġiet ippubblikata fis-26 ta’ April 2024, li tikkonkludi li l-qamħirrum ĠM huwa sikur daqs il-kontroparti konvenzjonali tiegħu u l-varjetajiet ta’ qamħirrum mhux ĠM ittestjati fir-rigward tal-effetti potenzjali fuq is-saħħa tal-bniedem u tal-annimali u l-ambjent;

D.billi l-qamħirrum ĠM ġie ġenetikament modifikat biex jipproduċi miRNA artifiċjali maħsub biex irażżan b’mod selettiv żewġ ġeni fi ħdan familja ta’ ġeni akbar involuta fir-rotta bijosintetika tal-aċidu gibberelliku, u b’hekk jitnaqqas l-għoli tal-pjanta;

Kwistjonijiet pendenti dwar l-effetti tal-miRNA artifiċjali

E.billi l-introduzzjoni tal-miRNA artifiċjali mhux biss tinterferixxi mal-ġeni fil-mira, iżda tinvolvi wkoll funzjonijiet regolatorji oħra; billi l-miRNA jgħaddi minn ipproċessar ulterjuri fil-pjanta, u b’hekk jinteraġixxi ma’ enzimi tal-pjanti speċifiċi; billi l-effetti tiegħu f’ħafna każijiet mhumiex ristretti għall-ġene fil-mira, iżda spiss jinvolvu kaskati metaboliċi ta’ diversi mijiet ta’ funzjonijiet oħra tal-ġeni;

F.billi l-applikant jippreżenta data insuffiċjenti u mhux kompluta dwar l-interazzjonijiet bejn il-miRNA artifiċjali, il-prodotti li jirriżultaw minn proċessi ulterjuri fiċ-ċelloli, il-persistenza ta’ dawn il-molekuli fiċ-ċelloli u l-interferenza tagħhom f’networks regolatorji oħra;

G.billi biex jiġi konkluż li l-miRNAs ma jippreżentawx riskju ta’ tossiċità għall-bnedmin u l-annimali, l-EFSA tassumi li l-miRNA artifiċjali jiġi degradat malajr; billi, madankollu, diversi studji, inkluż dak li jikkwotaw bħala bażi għal dik l-affermazzjoni Dávalos, A., Henriques, R., Latasa, M. J., Laparra, M., & Coca, M. (2019). Literature review of baseline information on non-coding RNA (ncRNA) to support the risk assessment of ncRNA-based genetically modified plants for food and feed (Rieżami tal-letteratura tal-informazzjoni tal-linja bażi dwar l-RNA mhux kodifikanti (ncRNA) biex tiġi appoġġjata l-valutazzjoni tar-riskju ta’ pjanti ġenetikament modifikati bbażati fuq l-ncRNA għall-ikel u l-għalf.) EFSA Supporting Publications, 16(8), EN-1688. https://doi.org/10.2903/sp.efsa.2019.EN-1688., jirrapportaw li, bl-appoġġ ta’ mekkaniżmi speċifiċi, il-miRNA jista’ jittieħed mill-imsaren;

Kwistjonijiet pendenti dwar l-effetti tal-livell imnaqqas tal-gibberellini

H.billi, kif enfasizzat mill-esperti mill-Istati Membri L-Anness 8 tal-Opinjoni Xjentifika tal-Bord tal-EFSA dwar l-Organiżmi Ġenetikament Modifikati bit-titolu “Assessment of genetically modified maize MON 94804 for food and feed uses, under Regulation (EC) No 1829/2003 (application GMFF-2022-10651)”, EFSA Journal, 2024;22(4):8714, https://doi.org/10.2903/j.efsa.2024.8714., il-gibberellini huma regolaturi ewlenin ta’ diversi proċessi fiżjoloġiċi fil-pjanti;

I.billi minbarra l-istatura tal-pjanti, il-gibberellini jirregolaw ukoll il-ġerminazzjoni u l-fjoritura, għandhom rwol fir-regolamentazzjoni tat-tolleranza tal-istress u huma parti minn crosstalk regolatorju kumpless ma’ ormoni oħra tal-pjanti f’diversi rotot ta’ sinjalazzjoni, eż. proċessi fiżjoloġiċi li jaffettwaw il-kompożizzjoni tal-pjanti; billi l-gibberellini huma involuti wkoll fir-rispons immunitarju tal-pjanti għall-patoġeni;

J.billi l-biċċa l-kbira tal-impatti fuq dawn il-proċessi differenti ma ġewx esplorati mill-applikant, minbarra l-effetti potenzjali fuq il-ġerminazzjoni, il-fjoritura u l-piż tal-ħabba;

K.billi l-espressjoni ġenika u l-impatt tagħha fuq il-produzzjoni tal-gibberellini bijoattivi u l-impatt metaboliku ġew investigati biss f’kundizzjonijiet fuq il-post mingħajr ebda fattur ta’ stress partikolari, filwaqt li huwa magħruf li l-aċidu gibberelliku huwa involut f’ħafna reazzjonijiet ta’ stress bijotiku u abijotiku;

Tnaqqis tad-dipendenza fuq l-għalf importat

L.billi waħda mit-tagħlimiet mill-kriżi tal-COVID-19 u mill-gwerra li għadha għaddejja fl-Ukrajna hija l-ħtieġa li l-Unjoni ttemm id-dipendenzi fuq xi materjali kritiċi; billi fl-ittra ta’ missjoni lill-Kummissarju nnominat Christophe Hansen, il-President tal-Kummissjoni Ursula von der Leyen titolbu jħares lejn modi kif jitnaqqsu l-importazzjonijiet ta’ komoditajiet kritiċi https://commission.europa.eu/document/2c64e540-c07a-4376-a1da-368d289f4afe_mt;

Kummenti tal-awtorità kompetenti tal-Istat Membru u tal-partijiet ikkonċernati

M.billi l-Istati Membri ppreżentaw ħafna kummenti kritiċi lill-EFSA matul il-perjodu ta’ konsultazzjoni ta’ tliet xhur https://efsa.onlinelibrary.wiley.com/action/downloadSupplement?doi=10.2903%2Fj.‌efsa.2024.8714&file=efs28714-sup-0008-Annex8.pdf., b’mod partikolari li l-gibberellini huma regolaturi ewlenin ta’ diversi proċessi fiżjoloġiċi fil-pjanti, b’mod partikolari dawk relatati ma’ fatturi ta’ stress bijotiċi u abijotiċi, u li d-data pprovduta mill-applikant mhijiex kompluta fil-valutazzjoni tal-impatt potenzjali ta’ livelli mnaqqsa tal-gibberellini fuq dawn il-proċessi kollha, u li l-varjetà fil-provi fuq il-post hija insuffiċjenti; billi l-Istati Membri kkritikaw ukoll in-nuqqas ta’ data dwar ir-riskji maħluqa minn stabbiltà possibbli fit-tul tal-miRNA artifiċjali fil-pjanta, jew mill-fatt li parti mhux negliġibbli tad-DNA modifikat hija suxxettibbli li tittieħed mill-imsaren tal-annimali jew tal-bnedmin kif ukoll mill-fatt li d-data pprovduta ma tagħtix prova li t-trasferiment tal-ġeni mill-pjanti għall-batterji huwa improbabbli;

N.billi r-Regolament (KE) Nru 1829/2003 jiddikjara li l-ikel jew l-għalf ĠM ma jridx ikollu effetti negattivi fuq is-saħħa tal-bniedem, is-saħħa tal-annimali jew l-ambjent, u jeżiġi li l-Kummissjoni tqis kwalunkwe dispożizzjoni rilevanti fid-dritt tal-Unjoni u fatturi leġittimi oħra rilevanti għall-kwistjoni taħt kunsiderazzjoni meta tkun qed tabbozza d-deċiżjoni tagħha;

Proċess deċiżjonali mhux demokratiku

O.billi, fit-tmien leġiżlatura tiegħu, il-Parlament adotta total ta’ 36 riżoluzzjoni li joġġezzjonaw għall-introduzzjoni fis-suq ta’ OĠM għall-ikel u l-għalf (33 riżoluzzjoni) u għall-kultivazzjoni ta’ OĠM fl-Unjoni (tliet riżoluzzjonijiet); billi, fid-disa’ leġiżlatura tiegħu, il-Parlament adotta 38 oġġezzjoni għall-introduzzjoni ta’ OĠM fis-suq;

P.billi minkejja r-rikonoxximent tagħha stess tan-nuqqasijiet demokratiċi, in-nuqqas ta’ appoġġ mill-Istati Membri u l-oġġezzjonijiet tal-Parlament, il-Kummissjoni qed tkompli tawtorizza l-OĠM;

Q.billi ma hija meħtieġa ebda bidla fil-liġi biex il-Kummissjoni tkun tista’ ma tawtorizzax l-OĠM meta ma jkunx hemm maġġoranza kwalifikata ta’ Stati Membri favur fil-Kumitat ta’ Appell Il-Kummissjoni “tista’”, u mhux “għandha”, tmexxi bl-awtorizzazzjoni jekk ma jkun hemm l-ebda maġġoranza kwalifikata ta’ Stati Membri favur fil-Kumitat ta’ Appell, skont l-Artikolu 6(3) tar-Regolament (UE) Nru 182/2011.;

R.billi l-votazzjoni fis-17 ta’ Settembru 2024 tal-Kumitat Permanenti dwar il-Pjanti, l-Annimali, l-Ikel u l-Għalf imsemmi fl-Artikolu 35 tar-Regolament (KE) Nru 1829/2003 ma tat l-ebda opinjoni, li jfisser li l-awtorizzazzjoni ma kinitx appoġġjata minn maġġoranza kwalifikata tal-Istati Membri;