1.ag cur sonrú i nDréachtbhuiséad leasaitheach Uimh. 5/2024 mar a thíolaic an Coimisiún é;

2.á chur in iúl gur geal léi na riachtanais mhéadaithe íocaíochta do Chiste Forbraíochta Réigiúnaí na hEorpa (CFRE), mar aon leis na riachtanais don Chomhbheartas Talmhaíochta san Aistriú Domhanda (DEC 11/24), mar chomhartha go bhfuil dlús á chur le cur chun feidhme an chláir tar éis tús mall, ar cúis imní é, sa tréimhse 2021-2027;

3.á chur in iúl gur geal léi a thabhairt dá haire go raibh tionchar dearfach ag athruithe ar na rialacha a thug an tArdán um Theicneolaíochtaí Straitéiseacha don Eoraip (STEP) isteach - le réamh-mhaoiniú eisceachtúil agus cómhaoiniú deonach 100 % - ar chur chun feidhme CFRE, rud a chiallaíonn go bhfuil airgead á chaitheamh ag na Ballstáit ar chuspóirí STEP; á mheas, thairis sin, gur cheart go gcabhródh méadú ar íocaíochtaí in 2024 leis an mbrú ar íocaíochtaí a mhaolú idir 2025 agus 2027;

4.ag tabhairt dá haire go gcumhdaítear na riachtanais mhéadaithe íocaíochta beagnach go hiomlán le hioncam ó fhíneálacha agus ó phionóis, go háirithe an fhíneáil iomaíochta EUR 2,4 billiún a forchuireadh ar Google as sáruithe in aghaidh trustaí;

5.á athdhearbhú go bhfuil gá le hioncam inbhuanaithe do bhuiséad an Aontais, atá faoi bhrú mór chun freagairt ar ghéarchéimeanna éagsúla le blianta beaga anuas; á chur in iúl gur saoth léi, dá bhrí sin, nach bhfuil dul chun cinn déanta sa Chomhairle maidir le hathchóiriú a dhéanamh ar an gcóras acmhainní dílse i gcomhréir leis an treochlár sa Chomhaontú Idirinstitiúideach; ag meabhrú a seasaimh chun tacú leis na tograí leasaithe ón gCoimisiún agus ag tathant ar an gComhairle agus ar na Ballstáit na tograí sin a ghlacadh go pras chun na hacmhainní dílse atá ar fáil do bhuiséad an Aontais a mhéadú; ag meabhrú a seasaimh sheanbhunaithe gur cheart fíneálacha agus táillí a úsáid mar ioncam forlíontach do bhuiséad an Aontais;

6.á chur in iúl gur geal léi go n-áirítear línte buiséid ioncaim agus caiteachais don Sásra Comhair le haghaidh Iasachtaí don Úcráin; á chur i bhfios go láidir a thábhachtaí atá tacaíocht airgeadais leanúnach don Úcráin i gcomhthéacs nach leor ó thaobh riachtanas de an maoiniú faoi Shaoráid na hÚcráine agus faoi na socruithe cúnaimh macrairgeadais (MFA) atá ann cheana;

7.á mheabhrú go ndéanfar iasachtaí breise cúnaimh mhacrairgeadais a fhrithghealladh le lamháltas an bhuiséid agus á iarraidh an athuair ar an gCoimisiún sonraí a sholáthar don údarás buiséadach maidir le comhiomlánú na ndliteanas don lamháltas atá ag brath ar oibríochtaí trína bhfaightear agus trína dtugtar iasachtaí; ag dréim leis go soáthróidh an Coimisiún an fhaisnéis uile do Pharlaimint na hEorpa agus don Chomhairle de réir a ráitis atá i gceangal le Rialachán (AE) 2024/2773 ó Pharlaimint na hEorpa agus ón gComhairle; Rialachán (AE) 2024/2773 ó Pharlaimint na hEorpa agus ón gComhairle an 24 Deireadh Fómhair 2024 lena mbunaítear an Sásra Comhair le haghaidh Iasachtaí don Úcráin agus lena soláthraítear cúnamh macrairgeadais eisceachtúil don Úcráin (IO L, 2024/2773, 28.10.2024, ELI: http://data.europa.eu/eli/reg/2024/2773/oj).

8.ag tabhairt dá haire gurb ann do choigeartú tuarastail níos airde ná buiséadaithe do 2024, a bhfuil tionchar aige ar luach saothair agus ar phinsin araon, agus líon níos airde ná mar a bhí tuartha de phinsinéirí nua in 2024, rud a mhéadóidh tuilleadh costais phinsin; á chur in iúl gur geal léi gur cumhdaíodh beagnach gach costas breise ar fud na n-institiúidí trí ath-imlonnuithe inmheánacha agus, dá bhrí sin, go bhfuil dul i muinín na hIonstraime Corrlaigh Aonair faoi smacht;

9.á chur i bhfios go láidir go ndéanann an coigeartú tuarastail difear freisin do ghníomhaireachtaí díláraithe, a bhí ag streachailt leis an mboilsciú os cionn an díbhoilsceora 2 % trína méadaíonn a mbuiséid bhliantúla agus go háirithe a mhéid arb ionann costais foirne agus oibriúcháin agus cuid mhór dá n-eisíocaíochtaí; á chur in iúl gur geal léi go mbeidh méadú 1,7 % ar ranníocaíocht an Aontais ag gníomhaireachtaí nach raibh in ann na hacmhainní a aimsiú trí ath-imlonnuithe; á athdhearbhú gur gá tuilleadh machnaimh a dhéanamh ar an gcaoi a gcaitear le buiséid na ngníomhaireachtaí díláraithe faoi láthair mar chuid d’ullmhúcháin an Choimisiúin do CAI tar éis 2027;

10.ag tabhairt dá haire gur mhéadaigh ar leithreasuithe do Ghníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais (eu-LISA) chun costais mhéadaitheacha a chumhdach, cé gur cúis bhuartha di an laghdú comhfhreagrach ar leithreasuithe do Ghníomhaireacht an Aontais Eorpaigh um Thearmann (EUAA); á chur in iúl gur geal léi gur treisíodh EUAA mar chuid den athbhreithniú meántéarma ar CAI chun a chur ar a chumas cúraimí nua a chur i gcrích i ndáil le cur chun feidhme an Chomhshocraithe maidir le hImirce agus Tearmann; á iarraidh ar an gCoimisiún oibriú go dlúth leis an dá ghníomhaireacht chun a áirithiú go mbeidh siad in ann a gcúraimí a dhéanamh ina n‑iomláine agus na leithreasuithe breise a shanntar dóibh a ionsú;

11.á chur in iúl gur geal léi na leithreasuithe breise do Ghníomhaireacht an Aontais Eorpaigh um Oiliúint i bhForfheidhmiú an Dlí (CEPOL) in 2024 tar éis chibirionsaí mhí an Mheithimh 2024 ar an ngníomhaireacht; á áitiú gur gá ceachtanna a fhoghlaim agus tacaíocht theicniúil bhreise a chur ar fáil do ghníomhaireachtaí agus institiúidí eile ag an tSeirbhís Chibearshlándála d’eintitis an Aontais (CERT-EU), i bhfianaise na bagartha airde cibearshlándála agus chun a áirithiú nach gcuirfidh ionsaí eile aon ghníomhaireacht ná institiúid de chuid an Aontais i mbaol;

12.á chur i bhfios go láidir a thábhachtaí atá an tÚdarás nuabhunaithe um Fhrithsciúradh Airgid sa chreat athbhreithnithe maidir le frithsciúradh airgid ar leibhéal an Aontais; á chur in iúl gur cúis mhór bhuartha di, dá bhrí sin, na moilleanna sa chéim bhunaithe, go háirithe maidir le hearcaíocht;

13.á chur in iúl gur geal léi, agus an Rialachán Airgeadais athmhúnlaithe i bhfeidhm anois, gur féidir ioncam diúltach a áireamh sa bhuiséad chun ús cúiteach a íoc i gcásanna cúirte caillte; ag tabhairt dá haire go bhfuil méid beacht an úis sin á bhunú ag an gCoimisiún faoi láthair agus á iarraidh ar an gCoimisiún an fhaisnéis sin a chur ar fáil don údarás buiséadach a luaithe is féidir in 2025;

14.ag formheas an tseasaimh ón gComhairle ar dhréachtbhuiséad leasaitheach Uimh. 5/2024;

15.á threorú dá hUachtarán a dhearbhú go bhfuil Buiséad Leasaitheach Uimh. 5/2024 glactha go cinntitheach agus socrú a dhéanamh maidir lena fhoilsiú in Iris Oifigiúil an Aontais Eorpaigh;

16.á threorú dá hUachtarán an rún seo a chur ar aghaidh chuig an gComhairle, chuig an gCoimisiún agus chuig na parlaimintí náisiúnta.