1.Jaqbel mal-Kummissjoni li l-kundizzjonijiet stabbiliti fl-Artikolu 4(2), il-punt (c), tar-Regolament dwar il-FEG ġew issodisfati u li l-Belġju huwa intitolat għal kontribuzzjoni finanzjarja ta’ EUR 704 135 skont dak ir-Regolament, li tirrappreżenta 60 % tal-kost totali ta’ EUR 1 173 559, li jinkludi n-nefqa għal servizzi personalizzati ta’ EUR 1 126 559 u n-nefqa għall-attivitajiet ta’ tħejjija, ġestjoni, informazzjoni u pubbliċità, kontroll u rapportar ta’ EUR 47 000;

2.Jinnota li l-awtoritajiet Belġjani ppreżentaw l-applikazzjoni fid-19 ta’ Lulju 2024, u li, wara li l-Belġju pprovda informazzjoni addizzjonali, il-Kummissjoni ffinalizzat il-valutazzjoni tagħha fil-5 ta’ Novembru 2024 u nnotifikatha lill-Parlament fl-istess jum;

3.Jinnota li l-applikazzjoni tirrigwarda 567 ħaddiem li ngħataw is-sensja fil-kumpanija Sappi Lanaken u 114-il ħaddiem li ngħataw is-sensja fil-kumpanija Purmo Group Belgium; jinnota wkoll li b’kollox 632 ħaddiem se jkunu benefiċjarji fil-mira, li huma kważi esklużivament irġiel;

4.Jissottolinja li s-swieq tax-xogħol ta’ Lanaken u ta’ Zonhoven jinsabu fi żvantaġġ meta mqabbla ma’ Limburg kumplessivament jew mal-Flanders bi proporzjon tal-popolazzjoni li taħdem meta mqabbla mal-impjiegi disponibbli ferm aktar baxx milli f’Limburg kumplessivament jew fil-Flanders; jenfasizza li l-għadd ta’ impjiegi industrijali disponibbli f’Limburg naqas bi 15 % fl-2023;

5.Jirrimarka li l-profili tal-ħaddiema ssensjati, li terz minnhom għandhom l-età ta’ 55 sena jew aktar u 30 % minnhom għandhom livell baxx ta’ edukazzjoni, jissarrfu f’ostakli serji fuq is-suq tax-xogħol; jisħaq li filwaqt li titqies ix-xejra ’l isfel fil-postijiet tax-xogħol vakanti u d-distribuzzjoni ġeografika tagħha, il-ħaddiema se jeħtieġu appoġġ addizzjonali mfassal apposta għalihom biex jgħinhom jirnexxu fit-tranżizzjoni lejn impjieg;

6.Ifakkar li l-awtoritajiet Belġjani għandhom jirrikonoxxu l-oriġini u jiżguraw il-viżibbiltà tal-finanzjament tal-Unjoni u jenfasizzaw il-valur miżjud tal-Unjoni tal-intervent, billi jipprovdu informazzjoni koerenti, effettiva u mmirata lejn udjenzi multipli, inkluża informazzjoni mmirata lejn il-benefiċjarji, l-awtoritajiet lokali u reġjonali, is-sħab soċjali, il-media u l-pubbliku;

7.Iqis li hija responsabbiltà soċjali tal-Unjoni u tal-Istati Membri li jipprovdu lill-ħaddiema affettwati bil-possibbiltà li jiksbu l-kwalifiki meħtieġa għal impjieg futur, meta jitqies li t-tranżizzjoni diġitali u dik ekoloġika qed ikollhom impatt sinifikanti fuq is-setturi tagħhom filwaqt li jwasslu għal tnaqqis fid-domanda; jilqa’ l-fatt li l-pakkett ikkoordinat ta’ servizzi personalizzati tfassal mill-Belġju b’konsultazzjoni mal-benefiċjarji fil-mira, mar-rappreżentanti u mas-sħab soċjali tagħhom;

8.Jisħaq li l-appoġġ ipprovdut mill-FEG jeħtieġ li jiġi inkorporat fi strateġija akbar għall-ħaddiema affettwati u għar-reġjun, fil-livelli politiċi kollha, inkluż permezz tal-appoġġ ta’ strumenti ta’ finanzjament rilevanti tal-Unjoni, bl-għan li jiġi żgurat li ħadd ma jitħalla jibqa’ lura fit-tranżizzjonijiet diġitali u klimatiċi;

9.Ifakkar li s-servizzi personalizzati li jridu jiġu pprovduti lill-ħaddiema jikkonsistu mill-azzjonijiet li ġejjin: konsulent għall-intervent soċjali, gwida, konsulenza, u orjentazzjoni vokazzjonali, appoġġ attiv għat-tiftix ta’ impjieg, taħriġ, taħriġ mill-ġdid u taħriġ vokazzjonali, inkluż taħriġ fil-ħiliet diġitali, kif ukoll taħriġ fuq il-post tax-xogħol;

10.Jinnota li l-Belġju beda joffri servizzi personalizzati lill-benefiċjarji fil-mira fis-26 ta’ Diċembru 2023 u li għalhekk, il-perjodu ta’ eliġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni ta’ finanzjament;

11.Jinnota li l-Belġju beda jġarrab nefqa amministrattiva biex jimplimenta l-FEG fl-20 ta’ Novembru 2023 u li għalhekk, tali nefqa għandha tkun eliġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni ta’ finanzjament;

12.Jisħaq li l-awtoritajiet Belġjani kkonfermaw li l-prinċipji tat-trattament ugwali u tan-nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

13.Itenni li l-assistenza mill-FEG ma tridx tissostitwixxi azzjonijiet li huma r-responsabbiltà tal-kumpaniji, skont il-liġi nazzjonali jew il-ftehimiet kollettivi, jew kwalunkwe allowance jew dritt tal-ħaddiema ssensjati, biex tiġi żgurata l-addizzjonalità sħiħa tal-allokazzjoni; ifakkar li l-Istati Membri li japplikaw għal appoġġ ta’ finanzjament mill-FEG jeħtiġilhom jiżguraw li jkun hemm konformità mar-rekwiżiti stabbiliti fil-liġi nazzjonali u tal-Unjoni dwar is-sensji kollettivi u li l-kumpanija kkonċernata tkun ipprovdiet għall-ħaddiema tagħha kif xieraq;

14.Jistieden lill-awtoritajiet Belġjani u lill-Istati Membri l-oħra jieħdu l-miżuri preventivi b’mod proattiv sabiex jadattaw l-industriji għall-globalizzazzjoni u l-bidliet teknoloġiċi u ambjentali u jipproteġu lill-ħaddiema milli jitilfu l-impjiegi tagħhom u minn impatti negattivi oħra tal-globalizzazzjoni;

15.Japprova d-deċiżjoni annessa ma’ din ir-riżoluzzjoni;

16.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

17.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.