P10_TA(2024)0072Il-11-il sena mill-okkupazzjoni tar-Repubblika Awtonoma tal-Krimea u tal-belt ta’ Sevastopol mill-Federazzjoni Russa u s-sitwazzjoni li qed tiddeterjora tad-drittijiet tal-bniedem fil-Krimea okkupata, b’mod partikolari l-każijiet ta’ Iryna Danylovych, Tofik Abdulhaziiev u Amet SuleymanovRiżoluzzjoni tal-Parlament Ewropew tad-19 ta' Diċembru 2024 dwar il-11-il sena mill-okkupazzjoni tar-Repubblika Awtonoma tal-Krimea u tal-belt ta’ Sevastopol mill-Federazzjoni Russa u s-sitwazzjoni li qed tiddeterjora tad-drittijiet tal-bniedem fil-Krimea okkupata, b’mod partikolari l-każijiet ta’ Iryna Danylovych, Tofik Abdulhaziiev u Amet Suleymanov (2024/2992(RSP))Il-Parlament Ewropew,

–wara li kkunsidra l-Artikolu 150(5) u l-Artikolu 136(4) tar-Regoli ta’ Proċedura tiegħu,

A.billi sa minn Frar 2014, il-Krimea ġiet okkupata b’mod temporanju, u annessa illegalment, mir-Russja, wara referendum illegali u internazzjonalment mhux rikonoxxut;

B.billi l-persuni mill-Krimea għadhom qed iġarrbu ksur serju tad-drittijiet tal-bniedem, lieva illegali għall-armata Russa, passaportizzazzjoni u Russifikazzjoni furzati, detenzjonijiet arbitrarji, ta’ spiss abbażi ta’ akkużi ta’ terroriżmu foloz, għajbien furzat, tortura, qtil ekstraġudizzjarju, in-nuqqas tal-libertà tal-opinjoni, tal-assemblea, tal-assoċjazzjoni u tar-reliġjon;

C.billi l-awtoritajiet okkupanti Russi qed jimmiraw b’mod partikolari lit-Tatari tal-Krimea, lill-Ukreni etniċi u lill-minoranzi etniċi, u rrisistemaw sa 800 000 Russu biex b’hekk infurzaw bidla fil-kompożizzjoni demografika tal-Krimea fuq linji etniċi b’mod neokolonjali, li jikkostitwixxi delitt tal-gwerra skont id-dritt internazzjonali;

D.billi hemm aktar minn 200 priġunier politiku mill-Krimea fil-faċilitajiet ta’ detenzjoni Russi, fosthom 133 Tatar tal-Krimea u 67 priġunier politiku bi problemi ta’ saħħa gravi li jeħtieġu assistenza;

E.billi l-ġurnalista u difensur tad-drittijiet tal-bniedem mill-Krimea Iryna Danylovych ġiet maħtufa fl-2022, ġiet akkużata li kellha splussivi fil-pussess tagħha u ġiet ikkundannata għal 6 snin u 11-il xahar ħabs; billi l-attivist f’NGO Tofik Abdulhaziiev ġie arrestat fl-2019 u ġie kkundannat għal 12-il sena f’ħabs b’sigurtà massima fuq akkużi foloz, u sa mill-2023 qed jinżamm f’ħabs xi 2 700 km bogħod mill-Krimea; billi l-ġurnalist ċittadin Amet Suleymanov ġie kkundannat għal 12-il sena ħabs fl-2021;

F.billi ħafna persuni mill-Krimea għadhom qed jiġu persegwitati, fosthom: Emil Kurbedinov, Server Mustafayev, Emir-Usein Kuku, Lutfiye Zudiyeva, Kulamet Ibraimov, Abdureshit Dzhepparov, Edem Semedlyaev, Rustem Kyamilev, Oleksandr Sizikov, Halyna Dovhopola, Ruslan Abdurakhmanov, Rustem Huhuryk u Lilia Hemedzhy;

1.Itenni l-kundanna tiegħu tal-okkupazzjoni illegali tar-Repubblika Awtonoma tal-Krimea u tal-belt ta’ Sevastopol mir-Russja;

2.Jikkundanna l-immirar kontinwu mir-Russja tal-Ukreni etniċi u l-persekuzzjoni sistematika tat-Tatari tal-Krimea indiġeni, bl-għan li teradika l-identità, il-patrimonju u l-kultura tagħhom, aġir li, għat-Tatari tal-Krimea, jevoka d-deportazzjonijiet ġenoċidali tal-1944; iqis li l-futur tal-Krimea huwa marbut mar-rikonoxximent tagħha bħala l-art twelid storika tat-Tatari tal-Krimea;

3.Jikkundanna l-persekuzzjoni tal-ġurnalisti, tal-attivisti tas-soċjetà ċivili u tad-difensuri tad-drittijiet tal-bniedem u d-deportazzjoni taċ-ċivili fosthom priġunieri politiċi mill-Krimea lejn istituzzjonijiet penitenzjarji madwar ir-Russja, kontra d-dritt internazzjonali;

4.Jitlob ir-rilaxx immedjat u mingħajr kundizzjonijiet ta’ Iryna Danylovych, Tofik Abdulhaziiev u Amet Suleymanov u ta’ priġunieri politiċi oħrajn; jappella biex tingħata kura medika immedjatament; jiddenunzja l-infurzar ta’ verdetti kontra individwi morda serjament, li jikkostitwixxi ksur sfaċċat tal-istandards internazzjonali tad-drittijiet tal-bniedem; jistieden lill-Kumitat Internazzjonali tas-Salib l-Aħmar u lin-NU jistabbilixxu fejn jinsabu d-detenuti ċivili mill-Krimea;

5.Jistieden lill-komunità internazzjonali tkompli bil-politika tagħha tan-nonrikonoxximent tal-annessjoni illegali tal-Krimea; jappoġġja l-isforzi għat-tmiem tal-okkupazzjoni tagħha, bħall-Pjattaforma tal-Krimea; jappella għat-tisħiħ tas-sanzjonijiet kontra individwi u entitajiet ġuridiċi involuti fl-annessjoni illegali;

6.Jagħti istruzzjonijiet lill-President tiegħu biex tgħaddi din ir-riżoluzzjoni lill-VP/RGħ, lill-istituzzjonijiet rilevanti tal-UE u lill-awtoritajiet Russi u Ukreni.