1.Jilqa’ r-rwol tal-BĊE fis-salvagwardja tal-istabbiltà monetarja u finanzjarja, li hija prekundizzjoni meħtieġa għat-tkabbir u l-istabbiltà ekonomika; jissottolinja li l-BĊE huwa l-istituzzjoni responsabbli għaż-żamma tal-istabbiltà tal-prezzijiet fiż-żona tal-euro f’dan ir-rigward; jinnota li “mingħajr preġudizzju għall-għan ta’ stabbiltà fil-prezzijiet, is-SEBĊ għandha tappoġġa l-linja ta’ politika ekonomika ġenerali fl-Unjoni”, kif stabbilit fl-Artikolu 127 tat-TFUE;

2.Jissottolinja li l-indipendenza statutorja tal-BĊE, kif stabbilita fit-Trattati, hija prerekwiżit biex iwettaq il-mandat tiegħu, li huwa li jżomm l-istabbiltà tal-prezzijiet fiż-żona tal-euro u b’hekk jikkontribwixxi għat-tkabbir ekonomiku, il-kompetittività u l-ħolqien tal-impjiegi;

3.Jenfasizza l-importanza tal-indipendenza politika tal-BĊE, li m’għandhiex tintmiss; jisħaq li din l-indipendenza tirrikjedi li l-BĊE min-naħa tiegħu joqgħod lura milli jieħu azzjonijiet politiċi; jilqa’ l-kooperazzjoni istituzzjonali, u b’hekk jisħaq fuq l-importanza tal-livell korrispondenti ta’ obbligu ta’ rendikont lejn il-Parlament Ewropew;

4.Jistieden lill-BĊE u lill-Parlament Ewropew jagħmlu użu sħiħ mill-arranġamenti ta’ obbligu ta’ rendikont u trasparenza u, fejn possibbli, ikomplu jsaħħu dawn l-arranġamenti, mingħajr preġudizzju għall-indipendenza tal-BĊE;

5.Jirrikonoxxi l-isforzi tal-BĊE biex ireġġa’ lura l-inflazzjoni għal livelli proporzjonati mal-mira tiegħu ta’ 2 % fuq terminu medju;

6.Jisħaq li kemm il-politika monetarja tal-BĊE, li jwettaq il-mandat tiegħu, kif ukoll il-politiki fiskali, għandhom jaħdmu flimkien sabiex jgħinu liċ-ċittadini u lill-unitajiet domestiċi Ewropej, kif ukoll lin-negozji ż-żgħar;

7.Jieħu nota tad-disparitajiet bejn l-Istati Membri fir-rigward tal-livelli ta’ inflazzjoni ogħla jew anqas mill-mira tal-BĊE ta’ 2 %; jenfasizza li l-inflazzjoni tnaqqas il-kapaċità tal-akkwist tal-introjti fissi, it-tfaddil u l-pensjonijiet u li tfixkel il-funzjoni tas-sinjalar tal-prezzijiet, li tiżgura allokazzjoni effiċjenti tar-riżorsi, u b’hekk għandha impatt negattiv fuq l-istabbiltà ekonomika;

8.Jisħaq li l-inflazzjoni skattat “kriżi tal-għoli tal-ħajja” għaċ-ċittadini tal-UE; jenfasizza għalhekk li huwa imperattiv li l-inflazzjoni titnaqqas għar-rata fil-mira tagħha ta’ 2 %; jinnota li livelli għoljin ta’ inflazzjoni jolqtu b’mod sproporzjonat lill-unitajiet domestiċi b’introjtu aktar baxx, li jonfqu proporzjon akbar tal-baġit tagħhom fuq dak li għandhom bżonn; jisħaq li t-treġġigħ lura tal-inflazzjoni globali għal-livelli fil-mira tagħhom huwa għalhekk importanti wkoll sabiex tinżamm il-koeżjoni soċjali;

9.Jesprimi dispjaċir li l-inflazzjoni bażi xorta għadha għolja fiż-żona tal-euro (2,7 % f’Diċembru 2024), fejn tliet Stati Membri taż-żona tal-euro irrapportaw rati ta’ inflazzjoni bażi taħt it-2 % f’Diċembru 2024; ifakkar li din is-sitwazzjoni tiġġenera inċertezza ekonomika, tiskoraġġixxi t-tfaddil u żżid l-ispejjeż tal-għajxien taċ-ċittadini, u b’hekk taffettwa b’mod partikolari lil dawk b’introjtu fiss u limitat;

10.Jisħaq li ż-żamma tar-rati tal-imgħax għoljin wisq tista’ tagħmel ħsara lit-tkabbir ekonomiku; jistieden lill-BĊE ma jbaxxix ir-rati tal-imgħax malajr wisq, minħabba r-riskju li l-livelli tal-inflazzjoni jistgħu jerġgħu jibdew jiżdiedu filwaqt li l-inflazzjoni diġà hija ogħla minn 2 %; jenfasizza r-rwol ewlieni li għandhom l-aspettattivi dwar l-inflazzjoni u li volatilità żejda fir-rati tal-inflazzjoni tista’ ġġib magħha distorsjoni f’dawn l-aspettattivi; jistieden lill-BĊE jivvaluta l-impatt tal-bidliet fir-rati tal-imgħax fuq setturi ekonomiċi differenti, fosthom setturi b’intensità għolja ta’ kapital;

11.Jirrikonoxxi li d-deċiżjonijiet dwar il-politika monetarja meħuda mill-Kunsill Governattiv tal-BĊE sa mill-kriżi ta’ inflazzjoni, li rriżultat miż-żieda fil-prezzijiet tal-enerġija, poġġew l-inflazzjoni fuq perkors li huwa kompatibbli mal-ksib tal-għan tal-istabbiltà tal-prezzijiet, filwaqt li ġie evitat deterjorament serju fl-attività ekonomika jew fl-impjiegi;

12.Ifakkar li l-Eurosistema kienet mibnija fuq il-prinċipju tad-dominanza monetarja u li unjoni ekonomika u monetarja, għaldaqstant, tirrikjedi politiki fiskali sodi fl-Istati Membri sabiex tkun tista’ tirrispondi għax-xokkijiet esterni; ifakkar fil-ħtieġa ta’ implimentazzjoni xierqa tal-qafas fiskali l-ġdid biex tiġi żgurata l-kredibbiltà tal-politiki fiskali fil-livell tal-unjoni ekonomika u monetarja; jinnota li spazju fiskali biżżejjed jippermetti wkoll lill-Istati Membri jirrispondu għax-xokkijiet esterni; jinnota l-flessibbiltà pprovduta mir-regoli fiskali l-ġodda f’dan ir-rigward; jirrimarka li l-Istati Membri jistgħu jsaħħu r-reżiljenza tagħhom għal xokkijiet esterni permezz ta’ miżuri fiskali kif ukoll permezz ta’ riformi li jsaħħu t-tkabbir;

13.Ifakkar li politiki fiskali prudenti mill-Istati Membri jistgħu jikkomplementaw l-isforzi tal-BĊE biex iżomm l-inflazzjoni baxxa u b’dan il-mod jipproteġi l-introjti; jenfasizza li l-indirizzar tad-defiċit pubbliku u l-livelli tad-dejn eċċessivi huwa kruċjali biex tinżamm ekonomija stabbli, biex jinżamm it-tkabbir sostenibbli u biex ikun hemm spazju ta’ politika disponibbli għall-gvernijiet ħalli jirrispondu għal xokkijiet negattivi; jinnota f’dan ir-rigward is-sejbiet riċenti tar-Rieżami tal-Istabbiltà Finanzjarja dwar livelli għoljin ta’ dejn nazzjonali;

14.Jinnota li l-politiki monetarji tal-BĊE mmirati lejn it-twettiq tal-mandat primarju tiegħu huma soġġetti għal valutazzjoni tal-proporzjonalità; jinnota li l-valutazzjoni tal-proporzjonalità tqis l-impatt tal-miżuri tal-politika monetarja fuq l-ekonomija usa’ u fuq il-linji politiċi ekonomiċi;

15.Jilqa’ b’sodisfazzjon kbir il-fatt li l-inflazzjoni globali naqset mill-ogħla livell tagħha ta’ 10,6 % f’Ottubru 2022 għal 2,4 % f’Diċembru 2024;

16.Jilqa’ t-tnaqqis fl-inflazzjoni bażi mill-ogħla livell tagħha ta’ 7,6 % f’Marzu 2023 għal 2,7 % f’Diċembru 2024, iżda jesprimi t-tħassib tiegħu dwar il-livell storikament u b’mod persistenti għoli tagħha; jinnota bi tħassib li inflazzjoni bażi għolja tista’ tissarraf f’ċifri ogħla ta’ inflazzjoni globali;

17.Jinnota li l-BĊE ħa aktar minn tliet snin biex jikseb livell ta’ inflazzjoni li huwa proporzjonat mal-livell fil-mira tiegħu ta’ 2 %; ifakkar, f’dan ir-rigward, fil-valutazzjoni mhux korretta tal-BĊE li l-inflazzjoni kienet mistennija li tkun biss tranżitorja;

18.Jisħaq li x-xokkijiet fil-provvista, li primarjament joriġinaw minn sorsi esterni, kienu fost l-ixprunaturi ewlenin taż-żieda fl-inflazzjoni; jirrikonoxxi li l-politika monetarja għandha effett aktar dirett fuq il-livelli tal-inflazzjoni meta tirriżulta primarjament minn fatturi ta’ domanda aktar milli minn fatturi ta’ provvista;

19.Jilqa’ l-isforzi tal-BĊE biex jaġġorna regolarment il-mudelli tiegħu; jistieden lill-BĊE biex ikompli jirrevedi u jtejjeb il-mudelli tiegħu u r-rwol tagħhom fit-tfassil tal-politika tiegħu fid-dawl tal-prestazzjoni insuffiċjenti tal-mudelli f’dawn l-aħħar snin, b’mod partikolari biex jiddistingwi aħjar bejn sorsi ta’ inflazzjoni xprunati mid-domanda u dawk min-naħa tal-provvista; jisħaq li x-xokkijiet ekonomiċi fil-provvista jistgħu jirriżultaw minn bosta sorsi, fost oħrajn minn avvenimenti ġeopolitiċi, diżastri relatati mal-klima jew dawk naturali u attakki ċibernetiċi;

20.Jisħaq li l-inklużjoni ta’ akkomodazzjoni okkupata mis-sid (OOH) fl-Indiċi Armonizzat tal-Prezzijiet għall-Konsumatur (HICP) hija mixtieqa kemm għal raġunijiet ta’ rappreżentattività kif ukoll ta’ komparabbiltà bejn il-pajjiżi fiż-żona tal-euro; jappella għal aċċellerazzjoni tal-pjan direzzjonali sabiex jiġi żgurat li d-data tal-OOH tiġi inkluża malajr fl-HICP; jilqa’ l-impenn tal-Kunsill Governattiv tal-BĊE li jqis ukoll, kemm fil-valutazzjonijiet tal-politika monetarja tiegħu kif ukoll fid-deċiżjonijiet tiegħu dwarha, il-miżuri ta’ inflazzjoni disponibbli fir-rigward tal-indiċi tal-OOH awtonomu trimestrali;

21.Jappoġġja d-deċiżjoni tal-BĊE li jnaqqas il-programmi tiegħu ta’ xiri ta’ assi, sabiex jilħaq bilanċ bejn il-kundizzjonijiet tal-likwidità tas-suq u l-livelli ta’ inflazzjoni, fid-dawl tal-likwidità eċċessiva fis-suq u tal-livelli mnaqqsa ta’ inflazzjoni; jilqa’ l-fatt li l-portafoll tal-assi taħt il-programmi ta’ xiri tal-BĊE ilu fuq trajettorja ta’ tnaqqis mill-2023;

22.Jissottolinja li l-imgħax fuq il-parteċipazzjonijiet ta’ riżervi bankarji mill-banek kummerċjali fl-2023 irriżultaw li l-Eurosistema ħallset imgħax ta’ EUR 120 biljun lil istituzzjonijiet ta’ kreditu li jammontaw għal 0,8 % tal-PDG taż-żona tal-euro; iqis li dan huwa sussidju sinifikanti għas-settur bankarju; jitlob lill-BĊE jtaffi din il-kwistjoni;

23.Jisħaq li l-programmi ta’ xiri tal-BĊE huma politiki mhux konvenzjonali li huma applikabbli biss fi żminijiet ta’ kriżi li, jekk ma jiġux implimentati b’attenzjoni, jirriskjaw li jiksru l-projbizzjoni fuq il-finanzjament monetarju skont l-Artikolu 123(1) tat-TFUE; jistieden lill-BĊE jkompli jimmonitorja t-tnaqqis gradwali tal-karta tal-bilanċ tiegħu, jillimita l-effetti potenzjali destabbilizzanti fit-tul fiż-żona tal-euro, filwaqt li jimmonitorja t-tkabbir u l-kompetittività tal-ekonomija tal-UE; jistieden lill-BĊE jikkondividi għarfien dwar l-impatt tal-programmi ta’ xiri fuq il-funzjonament tas-swieq finanzjarji, inkluż l-impatt fuq il-fondi providenti u l-kooperazzjoni tal-assigurazzjoni tal-pensjonijiet;

24.Jisħaq li trażmissjoni uniformi tal-politika monetarja hija vitali għall-kisba tal-mandat tal-BĊE li jżomm l-istabbiltà tal-prezzijiet; jissottolinja li d-diverġenza eċċessiva fir-rendimenti sovrani tagħmel il-kundizzjonijiet tal-kreditu inkonsistenti mat-trażmissjoni uniformi tal-politika monetarja u tagħmel it-tnaqqis tad-dejn pubbliku estremament diffiċli; jinnota l-istabbiliment tal-Istrument għall-Protezzjoni tat-Trażmissjoni (TPI) f’Lulju 2022 bħala għodda biex tappoġġja b’mod effettiv it-trażmissjoni tal-politika monetarja;

25.Jisħaq li rati tal-imgħax differenti fiż-żona tal-euro huma – fin-nuqqas ta’ kwalunkwe disturb finanzjarju serju – ġeneralment ir-riżultat ta’ primjums tar-riskju differenti fuq il-bonds tal-gvern li jirriflettu, fost fatturi oħra, approċċi differenti ta’ politika fiskali; jinnota li l-interventi tat-TPI jistgħu jaħbu sfidi fiskali sottostanti; jisħaq li t-TPI għandu jintuża skont il-kundizzjonijiet stabbiliti mill-BĊE biss biex jindirizza l-istress tas-suq finanzjarju mhux relatat mal-prinċipji fundamentali ekonomiċi; jistieden lill-Istati Membri jwettqu politiki fiskali responsabbli u jiżguraw livelli ta’ dejn sostenibbli biex b’hekk jiżguraw ir-reżiljenza tagħhom kontra xokkijiet attwali u futuri;

26.Jinnota l-progress tal-BĊE fil-proġett tal-euro diġitali, u jilqa’ d-djalogu kontinwu tiegħu mal-Parlament; jenfasizza li kwalunkwe euro diġitali għandu jġib miegħu valur miżjud ċar għaċ-ċittadini Ewropej, bħal awtonomija strateġika msaħħa tal-pagamenti, livell ogħla ta’ kompetizzjoni fis-suq tal-pagamenti bl-imnut, il-potenzjal li titrawwem l-innovazzjoni fil-pagamenti u l-finanzi, inklużjoni finanzjarja mtejba u d-disponibbiltà ta’ sistema offline ta’ backup ta’ pagamenti; jistieden lill-BĊE juri b’mod ċar dawn il-benefiċċji qabel ma l-koleġiżlaturi tal-UE jiddeċiedu jekk jintroduċux jew le euro diġitali li jilħaq il-bilanċ it-tajjeb, fost oħrajn, bejn iż-żamma ta’ limiti, it-tħassib dwar il-privatezza, il-kompetizzjoni ma’ soluzzjonijiet ta’ pagament privat u l-faċilità tal-użu f’kuntest ta’ negozju;

27.Jappella sabiex kwalunkwe deċiżjoni biex jinħareġ l-euro diġitali ma għandhiex tittieħed esklużivament mill-Kunsill Governattiv tal-BĊE; iqis, minflok, li d-deċiżjoni dwar jekk għandux jiġi introdott euro diġitali hija fl-aħħar mill-aħħar deċiżjoni politika li trid tittieħed mill-koleġiżlaturi tal-UE, minħabba l-impatt potenzjali profond ta’ tali deċiżjoni fuq firxa wiesgħa ta’ oqsma tal-UE, inklużi l-privatezza, il-protezzjoni tal-konsumatur, l-istabbiltà finanzjarja, il-politika finanzjarja u oqsma oħra li jmorru lil hinn mill-mandat strett tal-politika monetarja;

28.Iqis li l-euro diġitali jista’ jkun storja ta’ suċċess biss jekk jipprovdi valur miżjud tanġibbli għaċ-ċittadini Ewropej li jistgħu jifhmu; jinnota li, bħalissa, ħafna ċittadini Ewropej jew ma semgħux dwar il-proġett tal-euro diġitali jew għadhom xettiċi dwaru;

29.Itenni li l-flus kontanti għandhom jibqgħu disponibbli u aċċessibbli fuq skala wiesgħa f’kull ħin sabiex tiġi żgurata pluralità ta’ mezzi ta’ pagament; f’dak il-kuntest, jilqa’ l-proposta għal regolament dwar l-użu tal-flus kontanti tal-euro bħala valuta legali;

30.Jisħaq fuq il-ħtieġa ta’ mudell ta’ kumpens ibbażat fuq il-kost għas-settur bankarju, li għandu l-kompitu li jimplimenta b’mod prattiku l-proġett tal-euro diġitali; ifakkar li l-mudell ta’ kumpens irid jiggarantixxi euro mingħajr ħlas għall-utenti tiegħu;

31.Jistieden lill-BĊE jqis kif xieraq it-tħassib dwar l-istabbiltà finanzjarja u l-bidliet potenzjali fl-istruttura tas-settur finanzjarju li jirriżultaw mill-introduzzjoni tal-euro diġitali; ifakkar fl-importanza li jinżammu limiti sabiex ma jinħolqux riskji addizzjonali għall-karti tal-bilanċ tal-banek, b’mod speċjali matul żminijiet ta’ kriżi;

32.Jistieden lill-BĊE jipprijoritizza salvagwardji robusti tal-privatezza, filwaqt li jistabbilihom bħala sistema monetarja awrea għall-privatezza għal munita diġitali tal-bank ċentrali (CBDC), sabiex jiżgura l-fiduċja pubblika u jindirizza t-tħassib taċ-ċittadini rigward il-protezzjoni u l-awtonomija tad-data;

33.Jisħaq li l-għanijiet sekondarji tal-UE huma indeterminati kif speċifikat bħalissa mit-Trattati; jinnota li n-natura ta’ appoġġ tal-għanijiet sekondarji tal-BĊE tikkomplementa l-mandat primarju tiegħu; skont it-Trattati, l-għan tal-UE huwa li tippromwovi l-paċi, il-valuri tagħha kif ukoll il-benesseri tal-popli tagħha, filwaqt li toħloq tkabbir ekonomiku bilanċjat u stabbiltà tal-prezzijiet, ekonomija soċjali tas-suq kompetittiva ħafna, intiża li twassal għal-livell massimu ta’ impjieg u progress soċjali, u livell għoli ta’ protezzjoni u ta’ titjib tal-kwalità tal-ambjent;

34.Ifakkar li, mingħajr preġudizzju għall-mandat primarju tal-BĊE, it-Trattati jirrikjedu li l-BĊE jappoġġja l-linji politiċi ekonomiċi ġenerali tal-Unjoni; jistieden lill-BĊE jaderixxi mal-mandat tiegħu meta jinterpreta jew jaġixxi fuq l-għanijiet sekondarji tiegħu; jisħaq li l-qbiż ta’ dan il-mandat jaffettwa l-indipendenza politika tal-BĊE; iqis li ż-żamma tal-istabbiltà tal-prezzijiet u ta’ kundizzjonijiet makroekonomiċi stabbli tista’ twassal għall-ħolqien tal-kundizzjonijiet it-tajba għall-implimentazzjoni tal-għanijiet tal-linji politiċi ekonomiċi ġenerali tal-UE;

35.Jisħaq li l-għanijiet sekondarji tal-BĊE jintlaħqu l-aħjar meta jopera f’ambjent makroekonomiku stabbli, ibbażat fuq livelli ta’ prezzijiet prevedibbli, li jinkoraġġixxi l-investiment; jistieden lill-BĊE jinkludi kapitolu speċifiku fir-rapport annwali tiegħu li jispjega kif interpreta u implimenta l-għanijiet sekondarji tiegħu;

36.Jisħaq li l-BĊE għandu jipprevjeni distorsjonijiet fil-funzjoni tas-sinjalar tal-prezzijiet minħabba li din il-funzjoni tiżgura allokazzjoni effiċjenti tar-riżorsi; jistieden lill-BĊE jivvaluta aktar sa liema punt it-tibdil fil-klima jaffettwa l-kapaċità tiegħu li jżomm l-istabbiltà tal-prezzijiet;

37.Jistieden lill-BĊE jirrispetta l-approċċ tan-newtralità tas-suq fl-operazzjonijiet monetarji tiegħu, filwaqt li jinnota li l-BĊE jirrikonoxxi li n-newtralità tas-suq hija għodda operattiva, aktar milli rekwiżit legali;

38.Jinnota li l-azzjonijiet tal-BĊE biex jiddekarbonizza l-parteċipazzjonijiet ta’ bonds korporattivi tiegħu ma segwewx approċċ strettament newtrali għas-suq;

39.Jistieden lill-BĊE jirrevedi l-politiki tiegħu biex jiżgura li dawn il-miżuri jippromwovu l-kompetittività tal-UE filwaqt li tali azzjonijiet ma għandhom bl-ebda mod jipperikolaw l-għan ewlieni tal-BĊE;

40.Jistieden lill-BĊE juża l-għodod disponibbli kollha tiegħu biex jiżgura li l-banek jieħdu r-riskji finanzjarji u esterni kollha bis-serjetà, inklużi riskji klimatiċi u ġeopolitiċi; jilqa’ l-attivitajiet tal-BĊE biex ikompli jsaħħaħ l-għodod u l-kapaċitajiet ta’ valutazzjoni tar-riskju tal-Eurosistema sabiex jiġu inklużi aħjar ir-riskji relatati mal-klima u mal-ambjent, b’mod partikolari peress li t-tibdil fil-klima u l-fenomeni estremi tat-temp jistgħu jwasslu għal volatilità akbar tal-prezzijiet, b’mod speċjali fis-settur agroalimentari; jistieden lill-BĊE jkompli l-ħidma tiegħu fuq it-testijiet tal-istress tar-riskju klimatiku żviluppati biex tiġi vvalutata r-reżiljenza tal-banek u l-korporazzjonijiet fil-konfront tar-riskju tat-tranżizzjoni klimatika;

41.Jinnota l-Pjan dwar il-klima u n-natura 2024-2025; jistieden lill-BĊE jabbozza Pjan dwar il-Ġeopolitika 2025-2030 sabiex jifhem aħjar l-implikazzjonijiet tal-gwerra u l-kunflitt fuq l-istabbiltà tal-prezzijiet u jittratta s-sorsi potenzjali kollha ta’ xokkijiet esterni b’mod ugwali;

42.Jissottolinja li rwol internazzjonali msaħħaħ tal-euro jwassal għal rati tal-imgħax aktar baxxi fiż-żona tal-euro, għal żieda fl-istatus għall-UE fix-xena internazzjonali u għal stabbiltà makroekonomika mtejba; ifakkar li t-tisħiħ tar-rwol internazzjonali tal-euro jikkontribwixxi għat-tisħiħ tal-awtonomija strateġika tal-UE;

43.Jistieden lill-BĊE jinvestiga t-tisħiħ tar-rwol internazzjonali tal-euro bl-għan li jżid l-attraenza tiegħu bħala munita ta’ riżerva u jappoġġja bidliet immexxija mis-suq f’din id-direzzjoni; jinnota li t-tlestija tal-unjoni ekonomika u monetarja tista’ trawwem ir-rwol internazzjonali tal-euro;

44.Jinnota l-appoġġ tal-BĊE għall-istabbiliment ta’ skema Ewropea kompluta ta’ assigurazzjoni tad-depożiti; jirrikonoxxi li l-kondiviżjoni tar-riskju u t-tnaqqis tar-riskju huma interkonnessi;

45.Jilqa’ l-attenzjoni li l-BĊE jagħti lir-riskji ta’ attakki ċibernetiċi; jistieden lill-BĊE jiżgura s-sikurezza u s-sigurtà tas-sistema monetarja għall-utenti tagħha, b’mod speċjali fid-dawl tal-iżviluppi ġeopolitiċi li għaddejjin bħalissa;

46.Iqis li l-istabbiltà finanzjarja hija prerekwiżit għal politika monetarja effettiva u sistema finanzjarja reżiljenti; jilqa’ l-finalizzazzjoni tal-qafas Basel III u l-implimentazzjoni tiegħu mill-1 ta’ Jannar 2025, peress li dan għandu l-potenzjal li jsaħħaħ ir-reżiljenza tas-settur bankarju f’dan ir-rigward; jinnota, madankollu, id-dewmien fl-implimentazzjoni u n-nuqqas ta’ ċarezza rigward l-implimentazzjoni ta’ ċertu għadd ta’ ġuriż dizzjonijiet oħra, li qed jirriżultaw f’kundizzjonijiet mhux ekwi fil-livell globali;

47.Jirrikonoxxi t-tħassib tal-BĊE rigward iż-żieda tas-settur bankarju parallel u r-riskju li jista’ joħloq għall-istabbiltà finanzjarja;

48.Iħeġġeġ il-kollaborazzjoni mal-Istati Membri u l-banek ċentrali nazzjonali dwar programmi ta’ litteriżmu finanzjarju biex l-individwi u n-negozji jingħataw is-setgħa li jieħdu deċiżjonijiet finanzjarji infurmati;

49.Jiddispjaċih li żewġ membri biss tal-Bord Eżekuttiv u tal-Kunsill Governattiv tal-BĊE huma nisa; itenni li n-nomini għall-Bord Eżekuttiv għandhom ikunu bbilanċjati bejn il-ġeneri, b’listi mqassra ppreżentati lill-Parlament; iħeġġeġ lill-Istati Membri taż-żona tal-euro jsaħħu l-prinċipji tal-ugwaljanza bejn il-ġeneri fil-proċeduri tal-ħatra tagħhom, sabiex iż-żewġ ġeneri jkollhom opportunitajiet indaqs li jservu bħala gvernaturi tal-banek ċentrali nazzjonali rispettiv tagħhom;

50.Itenni li l-ħatriet tal-BĊE għandhom ikunu bbażati fuq proċessi oġġettivi ta’ valutazzjoni tal-mertu u tal-kapaċità;

51.Jappoġġja l-għan tal-BĊE li jżid ir-rappreżentanza tan-nisa billi jħeġġeġ lin-nisa javvanzaw f’dan il-qasam; għalhekk jilqa’ inizjattivi bħall-Borża ta’ Studju tal-BĊE għan-Nisa fl-Ekonomija;

52.Jenfasizza li l-aħħar Rieżami tal-Istabbiltà Finanzjarja maħruġ mill-BĊE f’Novembru 2024 iqajjem tħassib dwar il-possibbiltà ta’ prezz artifiċjali tal-assi relatat mal-IA minħabba l-konċentrazzjoni fost ftit ditti benefiċjarji kbar tal-IA;

53.Jappella għat-tisħiħ ulterjuri tal-qafas intern tal-BĊE dwar l-iżvelar ta’ informazzjoni protetta, ħalli dan isir konformi mad-Direttiva tal-UE dwar il-Protezzjoni tal-Informaturi;

54.Jistieden lis-SEBĊ tkompli u ssaħħaħ id-djalogi tagħha mal-parlamenti nazzjonali, li jemmen li jsaħħu l-leġittimità u l-politiki tas-SEBĊ;

55.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni u lill-Bank Ċentrali Ewropew.