A.de bhrí, an 5 Iúil 2024, gur tharchuir Rannán Coiriúil V den Chúirt Dúiche do Vársá-Śródmieście sa Pholainn iarraidh ar dhíolúine pharlaiminteach Adam Bielan a tharscaoileadh, ar Feisire de Pharlaimint na hEorpa arna thoghadh sa Pholainn é, a chuir páirtí príobháideach faoina bráid ar fhorais ráitis áirithe a rinne Adam Bielan le linn agallamh raidió a craoladh an 10 Márta 2023; de bhrí, i gcomhréir le Riail 9(1) de na Rialacha Nós Imeachta, nach mór ‘d’údarás inniúil Ballstáit’ aon iarraidh ar dhíolúine a tharscaoileadh a thíolacadh agus, i gcomhréir le Riail 9(12), gur cheart do na húdaráis bhreithiúnacha í a tharchur, agus nach ionann an dá choincheap; de bhrí, i gcásanna ina dtugtar díotáil phríobháideach faoi dhlí na Polainne, ar cásanna iad nach bhfuil ionchúisitheoir poiblí rannpháirteach iontu, gurb í an chúirt an t-údarás atá inniúil chun iarraidh ó pháirtí príobháideach ar dhíolúine a tharscaoileadh a tharchur;

B.de bhrí go ndearnadh an iarraidh ar dhíolúine a tharscaoileadh i ndáil le himeachtaí coiriúla arna dtionscnamh i gcoinne Adam Bielan maidir le clúmhilleadh, ar cion é faoi Airteagal 212(1) agus (2) de Chód Coiriúil na Polainne;

C.de bhrí go ndearna Adam Bielan na ráitis chlúmhillteacha líomhnaithe le linn agallamh le haghaidh cláir ag an stáisiún raidió RMF FM, a craoladh sa Pholainn an 10 Márta 2023, i ndáil le hoibriú agus bainistiú Ionad Náisiúnta na Polainne um Thaighde agus Forbairt, ar gníomhaireacht feidhmiúcháin é d’Aireacht Eolaíochta agus Ardoideachais na Polainne; de bhrí go ndéanann an tAire Cistí Forbraíochta agus Beartais Réigiúnaigh maoirseacht ar an ngníomhaireacht agus go bhfuil sé ar cheann dá príomhchúraimí cistiú poiblí a leithdháileadh ar thionscadail;

D.de bhrí, de réir an bhille phríobháidigh um dhíotáil, go líomhnaítear go ndearna Adam Bielan na ráitis chlúmhillteacha agus é mar aidhm aige dochar a dhéanamh don chlú poiblí atá ar bheirt aonair agus ar chuideachta, a bhfuil a gceanncheathrú i Vársá, agus gur dócha go gcaillfear an iontaoibh riachtanach atá ag daoine astu chun a róil faoi seach a chomhlíonadh agus a ngníomhaíochtaí faoi seach a dhéanamh, agus iad a chlúmhilleadh trí mhodh ollchumarsáide, cion a d’fhéadfaí a ionchúiseamh go príobháideach faoi Airteagal 212(4) de Chód Coiriúil na Polainne;

E.de bhrí gurb é is cuspóir do dhíolúine pharlaiminteach ná Parlaimint na hEorpa agus a Feisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus ar gníomhaíochtaí iad nach féidir a scaradh ó na dualgais sin;

F.de bhrí gur toghadh Adam Bielan chuig Parlaimint na hEorpa sna toghcháin Eorpacha in 2019 agus go raibh sé ina Fheisire de Pharlaimint na hEorpa tráth an chiona líomhnaithe;

G.de bhrí go bhforáiltear in Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh nach bhfuil ‘Feisirí Pharlaimint na hEorpa inchurtha faoi aon saghas fiosrúcháin, coinneála ná imeachtaí dlíthiúla i leith tuairimí a thug siad nó vótaí a chaith siad ag comhlíonadh a ndualgas dóibh;

H.de bhrí go bhféadfaidh ráiteas ó Fheisire lasmuigh den Pharlaimint a bheith ina thuairim arna cur in iúl i gcomhlíonadh a dhualgas nó a dualgas, de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh, i gcás ina bhfuil measúnú suibiachtúil ann a bhfuil baint dhíreach agus fhollasach aige le comhlíonadh dhualgais pharlaiminteacha an Fheisire sin; de bhrí nach mór, dá bhrí sin, cibé acu is amhlaidh nó nach amhlaidh an cás a chinneadh de réir chineál agus inneachar an ráitis;

I.de bhrí, sa chomhthéacs sin, ag féachaint do na himthosca a thuairiscítear san iarraidh ar dhíolúine a tharscaoileadh, do chomhthéacs agus d’inneachar na ráiteas clúmhillteach líomhnaithe arna ndéanamh ag Adam Bielan, gur cosúil nach ann do nasc díreach agus soiléir idir na ráitis sin agus a shainordú mar Fheisire de Pharlaimint na hEorpa;

J.de bhrí nach ionann na gníomhartha líomhnaithe, dá bhrí sin, agus tuairim arna tabhairt nó vóta arna chaitheamh ag Adam Bielan i gcomhlíonadh a dhualgas de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

K.de bhrí, de bhun Airteagal 9, an chéad mhír, pointe (a), de Phrótacal Uimh. 7 ar Phribhléidí agus Díolúintí an Aontais Eorpaigh, go dteachtfaidh Feisirí de Pharlaimint na hEorpa ar an gcríoch náisiúnta féin na díolúintí a thugtar do chomhaltaí pharlaimint a dtíre féin;

L.de bhrí, de réir Airteagal 105(2) agus (5) de Bhunreacht na Polainne, ón lá a fhógraítear torthaí na dtoghchán go dtí an lá a rachaidh a shainordú nó a sainordú in éag, nach gcuirfear Feisire faoi chuntasacht choiriúil gan toiliú ón Sejm (teach íochtarach parlaiminte) agus nach gcoinneofar ná nach ngabhfar é nó í gan toiliú ón Sejm, ach amháin i gcásanna inar gabhadh é/í le linn cion a dhéanamh agus inar gá é nó í a choinneáil nó á coinneáil chun conair cheart imeachtaí a áirithiú;

M.de bhrí, sa chás seo, nár aimsigh an Pharlaimint aon fhianaise ar fumus persecutionis, is é sin le rá gnéithe fíorasacha a léiríonn gurb é an rún atá leis na himeachtaí dlíthiúla i dtrácht ná an bonn a bhaint de ghníomhaíocht pholaitiúil an Fheisire ina cháil mar Fheisire de Pharlaimint na hEorpa;

N.de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;;