–wara li kkunsidra l-proposta tal-Kummissjoni tat-19 ta’ Frar 2025 għall-ħatra ta’ Slavka Eley bħala Membru tal-Bord Uniku ta’ Riżoluzzjoni (C10‑0031/2025),
–wara li kkunsidra l-Artikolu 56(6) tar-Regolament (UE) Nru 806/2014 tal-Parlament Ewropew u tal-Kunsill tal-15 ta’ Lulju 2014 li jistabbilixxi regoli uniformi u proċedura uniformi għar-riżoluzzjoni tal-istituzzjonijiet ta’ kreditu u ċerti ditti tal-investiment fil-qafas ta’ Mekkaniżmu Uniku ta’ Riżoluzzjoni u Fond Uniku għar-Riżoluzzjoni u li jemenda r-Regolament (UE) Nru 1093/2010 ĠU L 225, 30.7.2014, p. 1, ELI: http://data.europa.eu/eli/reg/2014/806/oj.,
–wara li kkunsidra r-riżoluzzjoni tiegħu tal-14 ta’ Marzu 2019 dwar il-bilanċ bejn is-sessi fin-nomini fis-settur tal-affarijiet ekonomiċi u monetarji tal-UE Testi adottati, P8_TA(2019)0211.,
–wara li kkunsidra r-riżoluzzjoni tiegħu tas-16 ta’ Jannar 2020 dwar l-istituzzjonijiet u l-korpi tal-Unjoni Ekonomika u Monetarja: il-prevenzjoni tal-kunflitti ta’ interess wara l-impjieg fis-servizz pubbliku Testi adottati, P9_TA(2020)0017.,
–wara li kkunsidra l-Artikolu 135 tar-Regoli ta’ Proċedura tiegħu,
–wara li kkunsidra r-rapport tal-Kumitat għall-Affarijiet Ekonomiċi u Monetarji (A10-0025/2025),
A.billi l-Artikolu 56(4) tar-Regolament (UE) Nru 806/2014 jipprevedi li l-membri tal-Bord Uniku ta’ Riżoluzzjoni msemmi fl-Artikolu 43(1), il-punt (b), ta’ dak ir-Regolament għandhom jinħatru fuq il-bażi tal-mertu, il-ħiliet, l-għarfien dwar kwistjonijiet bankarji u finanzjarji, u tal-esperjenza rilevanti għas-superviżjoni u r-regolamentazzjoni finanzjarji kif ukoll ir-riżoluzzjoni tal-banek;
B.billi l-Parlament huwa impenjat li jiżgura bilanċ bejn il-ġeneri fl-ogħla pożizzjonijiet fil-qasam tas-servizzi bankarji u finanzjarji; billi l-istituzzjonijiet u l-korpi kollha nazzjonali u tal-Unjoni għandhom jimplimentaw miżuri konkreti biex jiżguraw bilanċ bejn il-ġeneri;
C.billi, f’konformità mal-Artikolu 56(6) tar-Regolament (UE) Nru 806/2014, fil-15 ta’ Jannar 2025 il-Kummissjoni adottat lista mqassra għall-kariga ta’ Membru tal-Bord Uniku ta’ Riżoluzzjoni;
D.billi, f’konformità mal-Artikolu 56(6) tar-Regolament (UE) Nru 806/2014, il-Kummissjoni pprovdiet il-lista mqassra lill-Parlament;
E.billi, fid-19 ta’ Frar 2025, il-Kummissjoni adottat proposta biex Slavka Eley tinħatar bħala Membru tal-Bord Uniku ta’ Riżoluzzjoni u bagħtet dik il-proposta lill-Parlament;
F.billi l-Kumitat għall-Affarijiet Ekonomiċi u Monetarji imbagħad ipproċeda bl-evalwazzjoni tal-kredenzjali tal-kandidata proposta għall-funzjonijiet ta’ Membru tal-Bord Uniku ta’ Riżoluzzjoni, b’mod partikolari fid-dawl tar-rekwiżiti msemmija fl-Artikolu 56(4) tar-Regolament (UE) Nru 806/2014;
G.billi, fit-3 ta’ Marzu 2025, il-Kumitat għall-Affarijiet Ekonomiċi u Monetarji kellu seduta ta’ smigħ ma’ Slavka Eley, li fiha hija għamlet stqarrija preliminari u mbagħad wieġbet il-mistoqsijiet li saru mill-membri tal-Kumitat;