1.Jinnota li, fl-aħħar snin, l-UE tat prova ta’ livell għoli ta’ reżiljenza hekk kif affrontat xokkijiet kbar, fost fatturi oħra, grazzi għal rispons politiku kkoordinat li involva lill-istituzzjonijiet kollha tal-UE, u li kien jinkludi approċċ flessibbli għall-użu ta’ strumenti disponibbli u dawk ġodda; ifakkar ukoll li l-promozzjoni tat-tkabbir sostenibbli fit-tul tfisser il-promozzjoni ta’ bilanċ bejn politiki fiskali responsabbli, riformi strutturali u investimenti li flimkien iżidu l-effiċjenza, il-produttività, l-impjiegi u l-prosperità, u tinvolvi wkoll it-tisħiħ tal-kompetittività, it-trawwim tas-suq uniku, l-iżvilupp ta’ politiki ta’ tkabbir ekonomiku u r-reviżjoni tal-qafas regolatorju biex jiġu attirati l-investimenti; jisħaq fuq il-ħtieġa fundamentali għal tkabbir ekonomiku sostenibbli, inklużiv u kompetittiv;

2.Jinnota li l-koordinazzjoni tal-politika ekonomika hija fundamentalment meħtieġa għal unjoni ekonomika u monetarja ta’ suċċess; ifakkar li s-Semestru Ewropew huwa l-qafas stabbilit sew għall-koordinazzjoni tal-politiki fiskali, ekonomiċi, tal-impjiegi u soċjali madwar l-UE, f’konformità mat-Trattati, filwaqt li jirrispetta l-kompetenzi nazzjonali definiti;

3.Jinnota l-impenn tal-Kummissjoni li tiżgura li s-Semestru Ewropew jixpruna l-koordinazzjoni tal-politika għall-kompetittività, is-sostenibbiltà u l-ġustizzja soċjali, kif ukoll l-integrazzjoni tal-Għanijiet ta’ Żvilupp Sostenibbli tan-NU u l-pilastru Ewropew tad-drittijiet soċjali; jinnota li l-Patt Ekoloġiku Ewropew jibqa’ riżultat ewlieni għall-Kummissjoni;

4.Jenfasizza l-fatt li politika industrijali integrata, kkoordinata u orizzontali hija vitali biex jiżdiedu l-investimenti fil-kapaċità tal-innovazzjoni tal-UE, filwaqt li jiġu xprunati l-kompetittività u l-integrità tas-suq uniku;

5.Jenfasizza li l-investimenti pubbliċi u privati huma kruċjali għall-kapaċità tal-UE li tlaħħaq mal-isfidi eżistenti, inklużi l-iżvilupp tal-kapaċità tal-innovazzjoni tal-UE u l-implimentazzjoni tat-tranżizzjoni ekoloġika u dik diġitali ġusti, u li huma se jżidu r-reżiljenza, il-kompetittività fit-tul u l-awtonomija strateġika miftuħa tal-UE; jiġbed l-attenzjoni għall-ħtieġa ta’ investimenti strateġiċi fl-interkonnessjonijiet tal-enerġija, l-enerġiji b’livell baxx ta’ emissjonijiet tal-karbonju (bħall-enerġiji rinnovabbli) u l-effiċjenza enerġetika biex, fost affarijiet oħra, (i) l-UE ssir indipendenti mill-fjuwils fossili importati u jiġu pprevenuti l-effetti inflazzjonarji possibbli tad-dipendenza minnhom, (ii) jiġu mmodernizzati s-sistemi tal-produzzjoni u (iii) tiġi promossa l-koeżjoni soċjali; ifakkar li l-materjalizzazzjoni tar-riskji fiżiċi relatati mat-tibdil fil-klima jista’ jaffettwa b’mod qawwi l-finanzi pubbliċi, kif muri mill-għargħar f’Valenzja f’Ottubru 2024 u ċ-ċiklun f’Mayotte f’Diċembru 2024; jistieden lill-Istati Membri jagħmlu l-investimenti meħtieġa biex itejbu l-mitigazzjoni tat-tibdil fil-klima u l-adattament għalih kif ukoll isaħħu r-reżiljenza tal-ekonomija tal-UE;

6.Jistieden lill-Kummissjoni toħroġ b’inizjattivi, abbażi tad-Dikjarazzjoni ta’ Budapest; biex tagħmel l-Unjoni aktar kompetittiva, produttiva, innovattiva u sostenibbli, billi tibni fuq il-koeżjoni ekonomika, soċjali u territorjali u tiżgura l-konverġenza u kundizzjonijiet ekwi kemm kemm fl-UE kif ukoll globalment; jinnota l-iżvilupp ta’ għodda ġdida għall-koordinazzjoni tal-kompetittività; jistenna li l-Kummissjoni tiċċara kif din l-għodda se tinteraġixxi mas-Semestru Ewropew; jenfasizza kemm hu importanti li jiġu appoġġjati l-intrapriżi mikro, żgħar u ta’ daqs medju bħala muturi ewlenin tat-tkabbir ekonomiku u l-impjiegi fl-UE;

7.Jisħaq fuq il-ħtieġa li titrawwem ekosistema intraprenditorjali dinamika li tappoġġja lill-innovaturi, filwaqt li tirrikonoxxi r-rwol kritiku tagħhom bħala forza li tmexxi l-kompetittività globali, ir-reżiljenza ekonomika, il-ħolqien tal-impjiegi u l-awtonomija strateġika miftuħa;

8.Jilqa’ r-rakkomandazzjonijiet tal-Kummissjoni rigward il-politika ekonomika taż-żona tal-euro, li jħeġġu lill-Istati Membri jsaħħu l-kompetittività u jrawmu l-produttività permezz ta’ aċċess imtejjeb għall-finanzjament għan-negozji, piżijiet amministrattivi mnaqqsa, u investiment pubbliku u privat fl-oqsma tal-prijoritajiet komuni tal-UE, li jinkludu (i) tranżizzjoni ekoloġika u diġitali ġusta, (ii) reżiljenza soċjali u ekonomika inkluż il-pilastru Ewropew tad-drittijiet soċjali, (iii) is-sigurtà tal-enerġija, u (iv) l-akkumulazzjoni ta’ kapaċitajiet ta’ difiża;

9.Jilqa’ r-rakkomandazzjoni tal-Kummissjoni li, meta jkunu qed jiddefinixxu l-istrateġiji fiskali, l-Istati Membri taż-żona tal-euro għandhom jimmiraw li jtejbu l-kwalità u l-effiċjenza tan-nefqa pubblika u tad-dħul pubbliku, li huma essenzjali biex jiżguraw is-sostenibbiltà tal-finanzi pubbliċi, filwaqt li jnaqqsu kemm jista’ jkun l-impatti detrimentali minn fuq it-tkabbir ekonomiku; jenfasizza li dan jista’ jinkiseb billi, fost affarijiet oħra, tiżdied il-koordinazzjoni Ewropea u jitnaqqsu l-evitar tat-taxxa u l-evażjoni tat-taxxa; jilqa’ l-konklużjoni tar-Rapport Draghi li huwa meħtieġ tnaqqis ikkoordinat tat-tassazzjoni fuq l-introjtu tal-ħaddiema għall-ħaddiema b’introjtu baxx sa medju biex tiġi promossa l-kompetittività tal-UE; ifakkar fil-kompetenza tal-Istati Membri fil-politika tat-tassazzjoni; jistieden lill-Istati Membri jidderieġu mill-ġdid il-piż tat-taxxa mill-introjtu għal bażijiet tat-taxxa inqas distorsivi;

10.Jenfasizza l-ħtieġa li jinħolqu buffers fiskali biex jiġu indirizzati l-isfidi tas-sostenibbiltà fiskali, filwaqt li jiġu żgurati riżorsi suffiċjenti għall-investiment u biex jiġu ffaċċjati x-xokkijiet u l-kriżijiet futuri potenzjali; jisħaq fuq l-importanza li jiġi promoss it-tkabbir kompetittiv, sostenibbli u inklużiv fl-appoġġ għall-istabbiltà u r-reżiljenza fiskali fit-tul;

11.Jesprimi tħassib li, skont it-tbassir ekonomiku tal-Ħarifa 2024, maħruġ mill-Kummissjoni, il-PDG tal-UE mistenni jikber b’0,9 % (0,8 % fiż-żona tal-euro) fl-2024, b’1,5 % (1,3 % fiż-żona tal-euro) fl-2025 u b’1,8 % (1,6 % fiż-żona tal-euro) fl-2026; ifakkar li dawn iċ-ċifri jirriflettu rkupru gradwali, iżda wkoll espansjoni ekonomika limitata meta mqabbla ma’ ċikli ekonomiċi preċedenti; jinnota li għad hemm inċertezza kbira fil-prospetti ekonomiċi għall-UE, b’riskji li x’aktarx jaffettwaw b’mod negattiv it-tkabbir ekonomiku;

12.Jinnota li l-proporzjon tad-dejn pubbliku huwa proġettat li jiżdied għal 83,0 % fl-UE u għal 89,6 % fiż-żona tal-euro fl-2025 u għal 83,4 % fl-UE u 90 % fiż-żona tal-euro fl-2026, meta d-distakk fl-output se jkun prattikament ingħalaq kemm fl-UE kif ukoll fiż-żona tal-euro, u li dan huwa ogħla mil-livelli tal-2024 (82,4 % għall-EU u 89,1 % għaż-żona tal-euro);

13.Ifakkar li l-iżviluppi fil-proporzjonijiet tad-dejn pubbliku jvarjaw minn pajjiż għall-ieħor; jirrimarka li l-inċertezza politika u r-riskji ġeopolitiċi jistgħu jikkontribwixxu b’mod sinifikanti biex jiżdiedu l-kostijiet tat-teħid b’self fis-swieq finanzjarji għall-Istati Membri; jinnota li l-livelli ta’ dejn mhux sostenibbli jistgħu jimminaw l-istabbiltà ekonomika u jnaqqsu r-reżiljenza ekonomika tal-Istati Membri u l-kapaċità tagħhom li jirrispondu għall-kriżijiet; jenfasizza li fl-2024 u l-2025, 11-il Stat Membru taż-żona tal-euro huma mistennija jkollhom proporzjonijiet tad-dejn ogħla mill-valur referenzjarju tat-Trattat ta’ 60 %, u 5 se jibqgħu ogħla minn 100 %;

14.Jinnota li, skont it-tbassir ekonomiku tal-Ħarifa 2024 tal-Kummissjoni, id-defiċit tal-gvern estiż fl-UE u fiż-żona tal-euro mistenni jonqos għal 3,1 % u 3 % tal-PDG, rispettivament, fl-2024, u li jkompli jonqos għal 3 % u 2,9 % tal-PDG fl-2025, u għal 2,9 % u 2,8 % tal-PDG fl-2026; jenfasizza li 10 Stati Membri tal-UE mistennija jkollhom defiċit ogħla mill-valur referenzjarju tat-Trattat ta’ 3 % tal-PDG fl-2024; jindika li dan in-numru se jibqa’ stabbli fl-2025, u li huwa mbassar li fl-2026 il-biċċa l-kbira tal-Istati Membri se jkollhom pożizzjonijiet baġitarji aktar dgħajfa minn dawk li kellhom qabel il-pandemija (2019), u 9 minnhom se jkun għad għandhom defiċit ta’ aktar minn 3 %;

15.Jinnota li tmien Stati Membri għandhom defiċits eċċessivi; ifakkar li l-Kunsill ħa azzjoni ta’ rimedju u jistieden lill-Istati Membri kkonċernati jieħdu passi biex inaqqsu d-defiċit eċċessiv filwaqt li jnaqqsu kemm jista’ jkun l-impatt soċjoekonomiku; ifakkar fl-importanza tal-konsistenza fl-applikazzjoni tal-proċedura ta’ defiċit eċċessiv għall-Istati Membri;

16.Jinnota li, skont it-tbassir ekonomiku tal-Ħarifa 2024 tal-Kummissjoni, l-inflazzjoni hija pproġettata li se tonqos minn 2,6 % fl-2024 għal 2,4 % fl-2025 u 2 % fl-2026 fl-UE, u minn 2,4 % fl-2024 għal 2,1 % fl-2025 u 1,9 % fl-2026 fiż-żona tal-euro; ifakkar li minkejja li dan it-tnaqqis huwa żvilupp pożittiv, l-inflazzjoni sottostanti għadha relattivament għolja, u dan jindika pressjonijiet inflazzjonarji persistenti; jinnota li l-politika fiskali, filwaqt li tissalvagwardja s-sostenibbiltà fiskali, tista’ tappoġġja l-politika monetarja biex tnaqqas l-inflazzjoni u għandha tipprovdi biżżejjed spazju għal investimenti addizzjonali u tappoġġja t-tkabbir fit-tul;

17.Jinnota li l-Kummissjoni ma setgħetx tippreżenta l-Istħarriġ Annwali dwar it-Tkabbir Sostenibbli, ir-Rapport dwar il-Mekkaniżmu ta’ Twissija, l-abbozz ta’ rakkomandazzjoni għaż-żona tal-euro u l-abbozz ta’ rapport konġunt dwar l-impjiegi fl-istess ħin;

18.Josserva li, skont ir-Rapport dwar il-Mekkaniżmu ta’ Twissija tal-2025 maħruġ mill-Kummissjoni, fl-2025 se jiġu mħejjija analiżijiet fil-fond għad-disa’ pajjiżi li nstabu li kienu qed iġarrbu żbilanċi jew żbilanċi eċċessivi fl-2024, filwaqt li analiżi fil-fond oħra għandha ssir għal Stat Membru ieħor, peress li qed juri riskji partikolari ta’ żbilanċi li għadhom kif tfaċċaw;

19.Jissottolinja li l-akkomodazzjoni hija interkonnessa direttament mal-iżbilanċi makroekonomiċi fiż-żona tal-euro, b’implikazzjonijiet dannużi għar-reżiljenza ekonomika, id-dinamiżmu u l-progress soċjali u għall-mobbiltà reġjonali u intra-UE; jinsab imħasseb li f’xi Stati Membri, il-prezzijiet tad-djar x’aktarx li jiżdiedu u jistgħu jsiru diffiċli biex jitrażżnu fin-nuqqas ta’ strateġija olistika;

20.Ifakkar li r-riforma għandha l-għan li tagħmel il-qafas aktar sempliċi, aktar trasparenti u aktar effettiv, b’sjieda nazzjonali akbar u infurzar aħjar, filwaqt li tiddistingwi bejn l-Istati Membri abbażi tal-punti tat-tluq individwali tagħhom, u dan jirrappreżenta pass ’il quddiem biex jintemm l-approċċ “wieħed tajjeb għal kulħadd” fid-dawl tal-kunsiderazzjonijiet tas-sostenibbiltà fiskali speċifiċi għall-pajjiż inkorporati fil-perkors tan-nefqa netta; ifakkar, barra minn hekk, li r-riforma għandha l-għan li ssaħħaħ is-sostenibbiltà fiskali permezz ta’ aġġustamenti gradwali u mfassla apposta, ikkomplementati b’riformi u investimenti, u li tippromwovi politiki fiskali kontroċikliċi;

21.Jirrikonoxxi li r-regoli fiskali l-ġodda jipprovdu flessibbiltà u inċentivi akbar b’rabta mal-investimenti u r-riformi nazzjonali meħtieġa biex jiġu indirizzati l-isfidi ekonomiċi, soċjali u ġeopolitiċi li magħhom qed tħabbat wiċċha l-UE; jirrikonoxxi l-fatt li r-riżorsi finanzjarji u l-kontribuzzjonijiet mill-baġits nazzjonali jvarjaw minn Stat Membru għall-ieħor; jilqa’ l-fatt li l-indikatur tan-nefqa netta jeskludi l-kofinanzjament nazzjonali kollu fil-programmi ffinanzjati mill-UE, filwaqt li jipprovdi aktar spazju fiskali biex l-Istati Membri jinvestu fil-prijoritajiet komuni tal-UE, kif stabbilit fir-Regolament (UE) 2024/1263, u b’hekk jgħin biex jissaħħu s-sinerġiji bejn il-baġit tal-UE u l-baġits nazzjonali, u b’hekk titnaqqas il-frammentazzjoni u tiżdied l-effiċjenza ġenerali tal-infiq pubbliku f’xi oqsma, bħad-difiża;

22.Jenfasizza li l-analiżi tas-sostenibbiltà tad-dejn (DSA) għandha rwol ewlieni fir-regoli fiskali riformati tal-UE; huwa tal-fehma li r-rwol diskrezzjonali tal-Kummissjoni fl-analiżi tas-sostenibbiltà tad-dejn jirrikjedi li l-valutazzjonijiet rilevanti jkunu għalkollox trasparenti, prevedibbli, replikabbli u stabbli; jistieden lill-Kummissjoni tindirizza t-titjibiet metodoloġiċi possibbli, bħall-valutazzjoni tal-effetti konsegwenzjali bejn l-Istati Membri, u tinforma kif xieraq lill-Parlament f’dan ir-rigward;

23.Jinnota l-applikazzjoni inkonsistenti min-naħa tal-Kummissjoni tal-qafas tar-regoli fiskali fil-passat, u l-konformità mhux uniformi tal-Istati Membri mar-regoli; jisħaq li huwa essenzjali li l-qafas il-ġdid jiżgura t-trattament ugwali tal-Istati Membri; jafferma li qafas ta’ suċċess jiddependi ħafna mill-implimentazzjoni xierqa, trasparenti u effettiva tiegħu mill-bidu nett, filwaqt li jitqiesu l-punti tat-tluq tal-Istati Membri u l-isfidi individwali li huma jiffaċċjaw; jieħu nota tal-bidliet introdotti fil-qafas il-ġdid biex tittejjeb il-kredibbiltà tar-reġim tas-sanzjonijiet finanzjarji;

24.Jinkoraġġixxi lill-Istati Membri jallinjaw id-definizzjoni teknika tal-indikatur operattiv nazzjonali tagħhom mal-indikatur tan-nefqa netta primarja Ewropea;

25.Jenfasizza r-rwol tal-Parlament u tal-awtoritajiet fiskali indipendenti fil-qafas ta’ governanza ekonomika tal-UE; jissottolinja s-setgħa diskrezzjonali tal-Kummissjoni fl-iżvilupp tal-pjanijiet fiskali-strutturali fuq terminu medju; jenfasizza l-ħtieġa li l-Parlament u l-Bord Fiskali Ewropew iwettqu skrutinju akbar tal-Kummissjoni, kif previst fir-Regolament (UE) 2024/1263, u li jkun hemm żieda fil-fluss ta’ informazzjoni lejn il-Parlament biex dan ikun jista’ jwettaq sorveljanza effettiva;

26.Jinnota li mhux l-Istati Membri kollha setgħu jissottomettu fil-ħin il-pjanijiet fiskali-strutturali nazzjonali fuq terminu medju u l-abbozzi tal-pjanijiet baġitarji tagħhom; jinnota li, bħala riżultat tal-elezzjonijiet ġenerali u l-formazzjoni ta’ gvernijiet ġodda, ħames Stati Membri għadhom ma ppreżentawx il-pjanijiet fiskali-strutturali nazzjonali tagħhom fuq terminu medju u żewġ Stati Membri għadhom ma ppreżentawx l-abbozzi ta’ pjan baġitarju tagħhom, filwaqt li Stat Membru wieħed ma ppreżentax l-abbozz ta’ pjan baġitarju tiegħu għal raġunijiet oħra mhux speċifikati; jistieden lil dawn l-Istati Membri jippreżentaw il-pjanijiet rilevanti mill-aktar fis possibbli; jissottolinja li l-preżentazzjoni f’waqtha ta’ dawn il-pjanijiet hija prekundizzjoni għall-implimentazzjoni effettiva u l-kredibbiltà tar-regoli l-ġodda; jafferma mill-ġdid l-importanza tal-preżentazzjoni f’waqtha tal-abbozzi ta’ pjan baġitarju biex l-impenji deskritti fil-pjanijiet fiskali jissarrfu f’politiki konkreti wara li jkunu ġew approvati l-pjanijiet fiskali-strutturali nazzjonali fuq terminu medju;

27.Ifakkar li r-riformi u l-investimenti deskritti fil-pjanijiet fiskali-strutturali nazzjonali fuq terminu medju għandhom ikunu allinjati mal-prijoritajiet komuni tal-UE kif stabbiliti fir-Regolament (UE) 2024/1263; jenfasizza li, taħt il-qafas il-ġdid, il-Kummissjoni għandha toqgħod partikolarment attenta għal dawn il-prijoritajiet meta tkun qed tivvaluta l-pjanijiet fiskali-strutturali nazzjonali fuq terminu medju;

28.Jirrikonoxxi l-fatt li 21 mit-22 pjan fiskali-strutturali nazzjonali fuq terminu medju li ġew rieżaminati s’issa rċevew evalwazzjoni pożittiva; jinnota li l-qafas il-ġdid jippermetti lill-Istati Membri jużaw assunzjonijiet li huma differenti mill-analiżi tas-sostenibbiltà tad-dejn tal-Kummissjoni jekk dawn id-differenzi jiġu spjegati u debitament ġustifikati b’mod trasparenti u huma bbażati fuq argumenti ekonomiċi sodi fid-djalogu tekniku mal-Istati Membri; josserva, madankollu, li fil-pjanijiet ippreżentati minn ħames Stati Membri, il-Kummissjoni sabet inkonsistenzi u devjazzjonijiet mill-qafas tal-analiżi tas-sostenibbiltà tad-dejn mhux ġustifikati biżżejjed f’dak li jirrigwarda s-suppożizzjonijiet makroekonomiċi relatati mal-PDG potenzjali u/jew mad-deflatur tal-PDG; jenfasizza li tali devjazzjonijiet u riskji ta’ backloading jistgħu potenzjalment jheddu s-sostenibbiltà fiskali futura; jinnota li fil-pjanijiet ippreżentati minn tliet Stati Membri, il-Kummissjoni tirrikonoxxi konċentrazzjoni ta’ aġġustament fiskali lejn tmiem il-perjodu; jistieden lill-Kummissjoni tiżgura li kwalunkwe konċentrazzjoni bħal din tal-aġġustament tissodisfa r-rekwiżiti spjegati fir-regolament u jistedinha tipprevjeni l-politiki proċikliċi;

29.Jieħu nota tal-fatt li seba’ Stati Membri biss talbu opinjoni mill-istituzzjoni fiskali indipendenti rilevanti tagħhom, u dan jipprovdi dimensjoni ta’ skrutinju addizzjonali importanti; jinnota b’kawtela li xi istituzzjonijiet fiskali indipendenti taw opinjoni negattiva dwar il-pjan fiskali nazzjonali tal-Istat Membru tagħhom; jenfasizza li disa’ Stati Membri ma ssodisfawx l-obbligu tagħhom li jwettqu konsultazzjonijiet politiċi mas-soċjetà ċivili, mas-sħab soċjali, mal-awtoritajiet reġjonali u ma’ partijiet ikkonċernati rilevanti oħra qabel ma ppreżentaw il-pjanijiet nazzjonali tagħhom; jesprimi dispjaċir ukoll għall-fatt li diversi Stati Membri ma involvewx lill-parlamenti nazzjonali tagħhom fil-proċess ta’ approvazzjoni għall-pjanijiet u ma rrappurtawx jekk kinux saru l-konsultazzjonijiet meħtieġa mal-parlamenti nazzjonali kif stabbilit fil-qafas il-ġdid;

30.Josserva li ħames Stati Membri talbu estensjoni tal-perjodu ta’ aġġustament; jenfasizza li kwalunkwe estensjoni bħal din għandha tkun ibbażata fuq sett ta’ impenji ta’ investiment u ta’ riforma li, meħuda flimkien, itejbu t-tkabbir u r-reżiljenza potenzjali tal-ekonomija, jappoġġaw is-sostenibbiltà fiskali, jindirizzaw il-prijoritajiet komuni tal-UE u r-rakkomandazzjonijiet speċifika għall-pajjiż rilevanti u jkunu ġew ivvalutati bħala li jissodisfaw il-kundizzjonijiet deskritti fir-regolament għal tali estensjoni; jinnota li r-riformi u l-investimenti użati biex jiġġustifikaw din l-estensjoni jiddependu konsiderevolment minn riformi diġà approvati fl-ambitu tal-Faċilità għall-Irkupru u r-Reżiljenza; jenfasizza l-importanza u l-ħtieġa ta’ riformi u investimenti li jikkontribwixxu b’mod pożittiv għat-tkabbir potenzjali tal-PDG tal-Istati Membri; jistieden lill-Kummissjoni tevalwa b’mod effettiv ex post l-impatt tal-investimenti u r-riformi miftiehma f’dawk li huma appoġġ għas-sostenibbiltà fiskali, it-tisħiħ tal-potenzjal tat-tkabbir tal-ekonomija, l-indirizzar tal-prijoritajiet komuni tal-UE u r-rakkomandazzjonijiet speċifiċi għall-pajjiż u l-iżgurar tal-livell meħtieġ ta’ investiment pubbliku ffinanzjat fil-livell nazzjonali;

31.Jinnota l-valutazzjoni tal-Kummissjoni li, minn 17-il abbozz ta’ pjan baġitarju ppreżentat, tmienja biss huma f’konformità mar-rakkomandazzjonijiet fiskali li joħorġu mill-pjan fiskali-strutturali nazzjonali fuq terminu medju; jiddispjaċih għall-fatt li 7 pjanijiet ġew ivvalutati bħala li mhumiex għalkollox konformi mar-rakkomandazzjonijiet, 1 bħala mhux konformi u 1 bħala f’riskju li ma jkunx konformi mar-rakkomandazzjonijiet; jinsab imħasseb li sitt Stati Membri ppreżentaw abbozzi ta’ pjanijiet baġitarji bi tkabbir fin-nefqa annwali jew kumulattiva ’l fuq mil-limiti preskritti tagħhom;

32.Jinnota l-projezzjoni tal-Kummissjoni li l-implimentazzjoni tal-qafas rivedut ta’ governanza mistennija twassal għal tnaqqis tal-bilanċ strutturali primarju għaż-żona tal-euro kollha kemm hi ta’ 0,5 % tal-PDG fl-2024 u ta’ 0,25 % tal-PDG fl-2025; jinnota l-valutazzjoni tal-Kummissjoni li dan huwa konformi mal-proċess tat-tisħiħ tas-sostenibbiltà fiskali u jappoġġja l-proċess diżinflazzjonarju li għaddej bħalissa peress li l-inċertezza ekonomika għadha għolja; jinnota li t-tkabbir tal-PDG se jkompli jappoġġja l-konsolidazzjoni fiskali fl-UE kollha; jitlob li jkun hemm politiki fiskali li jirrestawraw l-istabbiltà filwaqt li jippromwovu l-innovazzjoni, il-kompetittività industrijali u t-tkabbir ekonomiku fit-tul; jisħaq fuq il-ħtieġa li jinħoloq spazju fiskali addizzjonali biex jiġu indirizzati b’mod determinat l-isfidi futuri u l-kriżijiet potenzjali filwaqt li jiġi ppreservat livell suffiċjenti ta’ investiment biex jiġu appoġġjati u mrawma t-tkabbir sostenibbli u inklużiv, l-industrijalizzazzjoni u l-prosperità għal kulħadd;

33.Iqis li l-implimentazzjoni effettiva tar-regoli fiskali, għalkemm meħtieġa, fiha nfisha mhijiex suffiċjenti biex tinkiseb l-aħjar pożizzjoni fiskali f’kull ħin u biex jiġi żgurat standard tal-għajxien għoli għall-Ewropej kollha; jinnota li l-pożizzjoni fiskali għadha proġettata li tkun bil-wisq differenti minn Stat Membru għall-ieħor fl-2025; jistieden lill-Kummissjoni tesplora ideat għal mekkaniżmu li jgħin biex jiġi żgurat li l-pożizzjoni ċiklika tal-UE kollha kemm hi tkun xierqa għall-prospetti makroekonomiċi f’kull ħin;

34.Ifakkar li, skont il-Kummissjoni, il-pressjoni fiskali fl-2025 se tkun parzjalment ikkumpensata minn kemm kemm ta’ espansjoni fl-investiment, iffinanzjat kemm mill-baġits nazzjonali kif ukoll mill-għotjiet tal-Faċilità għall-Irkupru u r-Reżiljenza u fondi oħra tal-UE; jenfasizza r-rwol tal-Faċilità għall-Irkupru u r-Reżiljenza fl-indirizzar tal-ħtiġijiet ta’ investiment tal-UE, filwaqt li jinnota li se tiskadi sa tmiem l-2026, li jista’ jwassal għal tnaqqis fl-investiment pubbliku fil-prijoritajiet Ewropej komuni;

35.Jistieden lill-Kummissjoni tibda diskussjonijiet dwar l-indirizzar tad-diskrepanza sinifikanti fl-investiment fl-UE u tnaqqas il-kostijiet tat-teħid b’self, issaħħaħ l-istabbiltà finanzjarja u tippermetti investimenti strateġiċi f’konformità mal-objettivi tal-UE u għall-forniment ta’ beni pubbliċi Ewropej, bħall-kapaċitajiet ta’ difiża biex jiġu ssodisfati l-ħtiġijiet f’kuntest ta’ theddid u sfidi għas-sigurtà li qed jikbru; jitlob li jsir użu sħiħ mill-kisbiet fl-effiċjenza li jistgħu jirriżultaw mill-forniment ta’ beni pubbliċi Ewropej fuq skala tal-UE permezz tal-koordinazzjoni effettiva tal-prijoritajiet ta’ investiment fost l-Istati Membri; jemmen li dan il-qafas, fejn xieraq, għandu jissaħħaħ permezz ta’ strumenti u għodod ta’ investiment fil-livell tal-UE mfassla biex inaqqsu kemm jista’ jkun il-kost għall-kontribwenti tal-UE u jimmassimizzaw l-effiċjenza fil-forniment ta’ beni pubbliċi Ewropej;

36.Ifakkar li kwalunkwe finanzjament mill-UE irid ikun akkumpanjat minn kontrolli robusti li jiżguraw it-trasparenza, l-obbligu ta’ rendikont u l-użu effiċjenti tal-fondi, sabiex jiġu evitati ż-żidiet mhux ġustifikati fl-infiq pubbliku;

37.Jinkoraġġixxi lill-Istati Membri jippromwovu l-infiq fl-investiment li jipproduċi rata pożittiva ta’ redditu; jirrikonoxxi l-valutazzjoni li saret mir-rapport Draghi li madwar erbgħa minn kull ħames investimenti produttivi se jitwettqu mis-settur privat fl-UE, filwaqt li l-investiment pubbliku wkoll se jkollu rwol katalist; jilqa’ l-inizjattiva tal-Kummissjoni li tipproponi fond għall-kompetittività fl-ambitu tal-qafas finanzjarju pluriennali l-ġdid u jistedinha tagħmel użu sħiħ mill-garanziji finanzjarji biex tingrana l-investiment privat; jisħaq li l-Istati Membri jeħtiġilhom iżidu l-isforzi tagħhom, b’mod partikolari l-isforzi baġitarji, biex jaċċelleraw l-innovazzjoni, id-diġitalizzazzjoni, l-edukazzjoni, it-taħriġ u d-dekarbonizzazzjoni, isaħħu l-kompetittività Ewropea u jnaqqsu d-dipendenzi;

38.Jinnota li s-sehem ta’ rakkomandazzjonijiet speċifiċi għall-pajjiż “implimentati bis-sħiħ” naqas minn 18,1 % (fil-perjodu bejn l-2011 u l-2018) għal 13,9 % (fil-perjodu bejn l-2019 u l-2023); ifakkar li l-implimentazzjoni tar-rakkomandazzjonijiet speċifiċi għall-pajjiż, inkluż fir-rigward tal-effiċjenza tal-infiq pubbliku, hija parti ewlenija mill-iżgurar tas-sostenibbiltà fiskali u mill-indirizzar tal-iżbilanċi makroekonomiċi; huwa favur l-implimentazzjoni aktar effiċjenti tar-rakkomandazzjonijiet speċifiċi għall-pajjiż u r-riformi rilevanti; jitlob li jiġu esplorati modi kif jiżdied is-sehem tar-rakkomandazzjonijiet speċifiċi għall-pajjiż “implimentati bis-sħiħ”; jistieden lill-Kummissjoni torbot ir-rakkomandazzjonijiet speċifiċi għall-pajjiż aktar mill-qrib mar-rapporti tal-pajjiżi rispettivi; jitlob li jiġu evalwati l-impatt tar-riformi u l-progress lejn it-tnaqqis tad-diskrepanzi identifikati fl-investiment; jappella għal trasparenza akbar fit-tħejjija tar-rakkomandazzjonijiet speċifiċi għall-pajjiż;

39.Itenni, f’dan ir-rigward, li r-rakkomandazzjonijiet speċifiċi għall-pajjiż għandhom jissaħħu billi ssir enfasi fuq sett limitat ta’ sfidi, b’mod partikolari l-isfidi strutturali speċifiċi tal-Istati Membri u l-prijoritajiet komuni tal-UE, bil-ħsieb li jiġi promoss tkabbir ekonomiku sod u inklużiv, jissaħħu l-kompetittività u l-istabbiltà makroekonomika, jiġu promossi t-tranżizzjoni ekoloġika u dik diġitali u tiġi żgurata l-ekwità soċjali u interġenerazzjonali;

40.Ifakkar fl-impenn tal-Istati Membri li, fil-pjanijiet fiskali nazzjonali tagħhom, jindirizzaw ir-rakkomandazzjonijiet speċifiċi għall-pajjiż rilevanti kemm fid-dimensjoni ekonomika tagħhom kif ukoll f’dik soċjali, kif espress fl-ambitu tas-Semestru Ewropew; jinnota li l-Kummissjoni, fil-pjanijiet fiskali nazzjonali, sabet rakkomandazzjonijiet speċifiċi għall-pajjiż mhux indirizzati;

41.Jenfasizza l-importanza tar-rakkomandazzjonijiet speċifiċi għall-pajjiż fl-indirizzar determinat tal-muturi fuq terminu twil li jixprunaw is-sostenibbiltà fiskali, inklużi s-sostenibbiltà u l-forniment xieraq tas-sistemi tal-pensjonijiet pubbliċi, is-sistemi tal-kura tas-saħħa u tal-kura fit-tul quddiem l-isfidi demografiċi bħall-popolazzjonijiet li qed jixjieħu, u l-preparatezza għal żviluppi negattivi, inklużi riskji fiżiċi relatati mat-tibdil fil-klima; jisħaq fuq ir-rilevanza tar-rakkomandazzjonijiet speċifiċi għall-pajjiż fl-indirizzar tal-istabbiltà tas-suq tal-akkomodazzjoni sabiex jikkontribwixxu għar-reżiljenza ekonomika tal-UE;

42.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.