1.Iqis li l-Kummissjoni u l-Kunsill għandhom isaħħu l-isforzi tagħhom biex jimplimentaw l-EPSR, bi qbil mal-pjan ta’ azzjoni ta’ Marzu 2021 u d-Dikjarazzjoni ta’ La Hulpe, biex jintlaħqu l-miri ewlenin tal-2030; jistieden lill-Kummissjoni tiżgura li l-JER 2026 janalizza l-implimentazzjoni tal-prinċipji kollha tal-EPSR bi qbil mar-Regolament (UE) 2024/1263 u jinkludi analiżi tad-dimensjoni soċjali tal-pjanijiet fiskali strutturali nazzjonali fuq terminu medju relatati mar-reżiljenza soċjali, inkluż l-EPSR; jilqa’, f’dan ir-rigward, it-tħabbira ta’ Pjan ta’ Azzjoni ġdid dwar l-implimentazzjoni tal-EPSR von der Leyen, U., “Europe’s Choice, Political Guidelines for the Next European Commission 2024-2029”, 18 ta’ Lulju 2024. għall-2025 biex jingħata impetu ġdid lill-progress soċjali; jilqa’ l-fatt li kważi l-Istati Membri kollha mistennija jżidu l-investiment pubbliku fl-2025, u dan huwa meħtieġ biex jiġi żgurat aċċess għal servizzi pubbliċi ta’ kwalità u biex jintlaħqu l-għanijiet tal-EPSR; ifakkar li l-Istati Membri jistgħu jimmobilizzaw l-RRF, fl-ambitu definit mir-Regolament (UE) 2021/241 Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, p. 17, ELI: http://data.europa.eu/eli/reg/2021/241/oj)., sal-31 ta’ Diċembru 2026, favur politiki għal tkabbir sostenibbli u inklużiv u għall-ġenerazzjoni li jmiss;

2.Jisħaq fuq l-importanza li jintużaw it-Tabella ta’ Valutazzjoni Soċjali u l-Qafas ta’ Konverġenza Soċjali biex jiġu identifikati r-riskji u biex jiġi segwit il-progress fit-tnaqqis tal-inugwaljanzi, fit-tisħiħ tas-sistemi ta’ protezzjoni soċjali u fil-promozzjoni ta’ kundizzjonijiet tax-xogħol deċenti u miżuri ta’ sostenn għall-ħaddiema biex jimmaniġġjaw it-tranżizzjonijiet; jisħaq li, f’dan ir-rigward, jeħtieġ li tiġi żgurata Ewropa sostenibbli, ġusta u inklużiva fejn id-drittijiet soċjali jiġu protetti u ssalvagwardjati bis-sħiħ fl-istess livell bħal-libertajiet ekonomiċi; ifakkar li ċ-ċittadini tal-UE jidentifikaw Ewropa soċjali bħala waħda mill-prijoritajiet tagħhom;

3.Jiddispjaċih dwar in-nuqqas ta’ data u ta’ analiżi dwar l-inugwaljanza u l-konċentrazzjoni tal-ġid fl-UE, peress li dan huwa wieħed mid-determinanti ewlenin tal-faqar; jirrimarka li, skont il-Kontijiet Distributtivi dwar il-Ġid, jiġifieri sett ta’ data żviluppat mis-Sistema Ewropea ta’ Banek Ċentrali, fir-raba’ trimestru tal-2023 is-sehem ta’ ġid miżmum mill-10 % tal-persuni l-aktar sinjuri kien ta’ 56 %, filwaqt li n-nofs t’isfel kellu biss 5 %;

4.Jilqa’ l-inklużjoni ta’ analiżi dwar il-kontribut pożittiv tal-SDGs u l-istrateġiji Ewropej dwar l-ugwaljanza fil-JER 2025 u jistieden lill-Kummissjoni tiżgura li l-JER 2026 jinkludi kemm taqsima li tanalizza l-progress lejn l-SDGs relatati mal-impjiegi u l-politika soċjali, kif ukoll oħra dwar il-progress lejn l-eliminazzjoni tad-diskriminazzjoni soċjali u tax-xogħol f’konformità mal-Istrateġija dwar l-Ugwaljanza bejn il-Ġeneri 2020-2025, il-Pjan ta’ Azzjoni tal-UE għall-Ġlieda Kontra r-Razziżmu 2020-2025, il-Qafas Strateġiku tal-UE għar-Rom għall-ugwaljanza, għall-inklużjoni u għall-parteċipazzjoni 2020-2030, l-Istrateġija dwar l-Ugwaljanza tal-LGBTIQ 2020-2025, u l-Istrateġija dwar id-drittijiet tal-persuni b’diżabbiltà 2021-2030;

5.Jistieden lill-Istati Membri jimplimentaw il-linji gwida aġġornati dwar l-impjiegi, b’enfasi fuq l-edukazzjoni u t-taħriġ għal kulħadd, it-teknoloġiji l-ġodda bħall-IA u l-inizjattivi ta’ politika reċenti dwar ix-xogħol fuq il-pjattaformi, l-akkomodazzjoni affordabbli u deċenti u l-indirizzar tan-nuqqas ta’ ħaddiema u ta’ ħiliet, bl-għan li jsaħħu t-teħid tad-deċiżjonijiet demokratiku;

6.Itenni l-importanza li jsir investiment fl-iżvilupp tal-ħiliet tal-forza tax-xogħol u fit-taħriġ okkupazzjonali u li jiġu żgurati impjiegi ta’ kwalità, b’enfasi fuq id-dritt tal-individwu għat-taħriġ u t-tagħlim tul il-ħajja; iħeġġeġ lill-Istati Membri jfasslu miżuri ta’ titjib u tiġdid tal-ħiliet f’kollaborazzjoni mal-partijiet ikkonċernati lokali, inklużi l-korpi edukattivi u ta’ taħriġ u s-sħab soċjali, sabiex isaħħu r-rabta bejn is-sistemi tal-edukazzjoni u t-taħriġ u s-suq tax-xogħol u jiġu antiċipati l-ħtiġijiet tas-suq tax-xogħol; jilqa’ l-fatt li l-prospettivi ta’ impjieg għall-gradwati reċenti fl-ambitu tal-edukazzjoni u t-taħriġ vokazzjonali (VET) qed ikomplu jitjiebu madwar l-UE; jinsab imħasseb dwar it-tnaqqis fil-prestazzjoni edukattiva taż-żgħażagħ, b’mod partikolari fir-rigward tal-ħiliet bażiċi; jilqa’, f’dan ir-rigward, it-tħabbira ta’ Pjan ta’ Azzjoni dwar il-Ħiliet Bażiċi u Pjan Strateġiku għall-Edukazzjoni STEM; jistieden lill-Istati Membri jinvestu fi programmi biex jgħammru lill-istudenti bil-ħiliet bażiċi, diġitali u trażversali meħtieġa għad-dinja tax-xogħol u d-diġitalizzazzjoni tagħha kif ukoll biex jgħinuhom jikkontribwixxu b’mod sinifikanti għas-soċjetà; ifakkar fir-rwol importanti li l-Fond Ewropew ta’ Aġġustament għall-Globalizzazzjoni għall-Ħaddiema Ssensjati jista’ jkollu fl-appoġġ u t-tiġdid tal-ħiliet tal-ħaddiema li ngħataw is-sensja b’riżultat ta’ avvenimenti ta’ ristrutturar kbar;

7.Jilqa’ t-tħabbira ta’ pjan direzzjonali għal impjiegi ta’ kwalità biex tiġi żgurata tranżizzjoni ġusta għal kulħadd; jistieden lill-Kummissjoni tinkludi f’dan il-pjan direzzjonali kunsiderazzjonijiet rigward miżuri marbuta mal-użu tal-IA u l-ġestjoni algoritmika fid-dinja tax-xogħol ħalli jiġu sfruttati teknoloġiji ġodda biex jittejbu l-kundizzjonijiet tax-xogħol u l-produttività filwaqt li jiġu rrispettati d-drittijiet tal-ħaddiema u l-bilanċ bejn ix-xogħol u l-ħajja privata kif rikonoxxuti fil-JER Proposta tal-Kummissjoni tas-17 ta’ Diċembru 2024 għal rapport konġunt dwar l-impjiegi mill-Kummissjoni u mill-Kunsill (COM(2024)0701).;

8.Jisħaq li r-rispons għan-nuqqasijiet ta’ ħaddiema fl-Unjoni Ewropea jinvolvi wkoll it-titjib u l-iffaċilitar tal-mobbiltà tal-ħaddiema fl-Unjoni; jistieden lill-Istati Membri jsaħħu u jiffaċilitaw ir-rikonoxximent tal-ħiliet u l-kwalifiki fl-Unjoni, inklużi dawk taċ-ċittadini ta’ pajjiżi terzi; jistieden lill-Kummissjoni tanalizza l-effikaċja tal-pjattaforma tas-Servizzi Ewropej tax-Xogħol (EURES) bil-ħsieb ta’ reviżjoni potenzjali tal-operat tagħha;

9.Jinnota li l-għadd ta’ persuni li jitilqu kmieni mill-edukazzjoni u t-taħriġ, persuni b’livelli aktar baxxi ta’ edukazzjoni, żgħażagħ barra mill-edukazzjoni, impjieg jew taħriġ (NEETs) u fosthom il-gruppi vulnerabbli, inklużi r-Rom, in-nisa, l-anzjani, il-persuni bi kwalifiki baxxi u medji, il-persuni b’diżabbiltà u l-persuni li ġejjin minn kuntest ta’ migrazzjoni jew ta’ minoranza, skont il-kuntest speċifiku għall-pajjiż, għadu għoli f’diversi Stati Membri, minkejja tendenza ’l isfel fl-Unjoni Ewropea; jistieden lill-Istati Membri jsaħħu l-Garanzija għaż-Żgħażagħ kif iddikjarat fil-Prinċipju 4 tal-EPSR, sabiex jappoġġjaw liż-żgħażagħ fil-bżonn matul l-iżvilupp personali u professjonali tagħhom; itenni r-rwol ċentrali tal-VET fl-għoti tal-għarfien, il-ħiliet u l-kompetenzi meħtieġa għaż-żgħażagħ li jidħlu fis-suq tax-xogħol; jenfasizza l-ħtieġa li jsir investiment fil-kwalità u l-attraenza tal-VET permezz tal-Fond Soċjali Ewropew Plus (FSE+); ifakkar, għalhekk, fil-ħtieġa li din is-sitwazzjoni tiġi indirizzata u li jitfasslu soluzzjonijiet biex iż-żgħażagħ jibqgħu fl-edukazzjoni, fit-taħriġ jew fl-impjieg, kif ukoll fl-importanza li jiġi żgurat l-aċċess tagħhom għal traineeships u apprendistati, biex ikunu jistgħu jiksbu l-ewwel esperjenza tax-xogħol tagħhom u biex tiġi ffaċilitata t-tranżizzjoni tagħhom mill-edukazzjoni għall-impjieg kif ukoll biex jinħolqu l-kundizzjonijiet tax-xogħol li jippermettu lil forza tax-xogħol li qed tixjieħ tibqa’ fis-suq tax-xogħol;

10.Iqis li, għalkemm kien hemm titjib, il-persuni b’diżabbiltà, speċjalment in-nisa b’diżabbiltà, għadhom jiffaċċjaw ostakli sinifikanti fis-suq tax-xogħol, u li għalhekk hemm ħtieġa ta’ taħriġ vokazzjonali u diġitali, filwaqt li tiġi promossa l-inklużjoni tal-persuni b’diżabbiltà, jiġu indirizzati l-forza tax-xogħol inattiva u l-gruppi b’livell baxx ta’ parteċipazzjoni fis-suq tax-xogħol, inklużi n-nisa, iż-żgħażagħ, il-ħaddiema anzjani u l-persuni b’mard kroniku; jistieden lill-Kummissjoni taġġorna l-Istrateġija tal-UE dwar id-Diżabbiltà b’azzjonijiet u inizjattivi ewlenin ġodda mill-2025 ’il quddiem, bħal Garanzija Ewropea għall-Impjieg u l-Ħiliet tal-Persuni b’Diżabbiltà u l-kondiviżjoni tal-aħjar prattiki bħall-kard tad-diżabbiltà, b’mod partikolari biex jiġu indirizzati l-inklużjoni soċjali u l-għajxien indipendenti għall-persuni b’diżabbiltà, filwaqt li jiġi żgurat ukoll l-aċċess tagħhom għal edukazzjoni, taħriġ u impjiegi ta’ kwalità permezz ta’ gwida dwar iż-żamma tal-allowances għad-diżabbiltà;

11.Jesprimi tħassib li r-Rom għadhom jiffaċċjaw ostakli sinifikanti għall-impjieg, bi preġudizzji persistenti li jillimitaw il-prospetti tagħhom; jinnota li l-qafas strateġiku tal-UE għar-Rom għall-ugwaljanza, għall-inklużjoni u għall-parteċipazzjoni jenfasizza nuqqas ta’ progress fl-aċċess għall-impjiegi u sehem jikber ta’ żgħażagħ Rom barra mill-edukazzjoni, impjieg jew taħriġ; jenfasizza l-għan tal-qafas li jnaqqas bin-nofs id-differenza fl-impjiegi bejn ir-Rom u l-popolazzjoni ġenerali u li jiżgura li mill-inqas 60 % tar-Rom ikunu f’xogħol imħallas sal-2030; iħeġġeġ lill-Istati Membri jadottaw approċċ integrat u ffukat fuq l-ugwaljanza, u jiżguraw li l-politiki u s-servizzi pubbliċi jilħqu b’mod effettiv lir-Rom kollha, inklużi dawk f’żoni rurali remoti;

12.Jisħaq fuq il-ħtieġa li tingħata attenzjoni lill-aspetti soċjali u ambjentali tal-kompetittività, filwaqt li tiġi enfasizzata l-ħtieġa tal-investimenti fl-edukazzjoni u t-taħriġ għal kulħadd biex jiġi żgurat aċċess universali għal programmi ta’ taħriġ professjonali u edukazzjoni pubblika ta’ kwalità għolja, kif ukoll prattiki sostenibbli biex jitrawwem it-tkabbir inklużiv; jissottolinja li s-sħab soċjali għandu jkollhom rwol ewlieni fl-identifikazzjoni u l-indirizzar tal-ħtiġijiet tal-ħiliet madwar l-UE;

13.Jistieden lill-Kummissjoni u lill-Istati Membri jinkludu rakkomandazzjonijiet speċifiċi dwar l-affordabbiltà tal-akkomodazzjoni fis-Semestru Ewropew u jippromwovu l-investimenti fl-akkomodazzjoni; iħeġġeġ lill-Istati Membri jiżguraw li l-investimenti fl-akkomodazzjoni jappoġġjaw soluzzjonijiet ta’ akkomodazzjoni ta’ kwalità fit-tul li fil-fatt ikunu affordabbli għall-unitajiet domestiċi b’introjtu baxx u medju, filwaqt li jenfasizzaw li l-investimenti fl-akkomodazzjoni soċjali u affordabbli huma kruċjali sabiex tiġi żgurata u tittejjeb il-kwalità tal-ħajja għal kulħadd; jisħaq fuq il-ħtieġa ta’ użu aħjar tal-fondi tal-UE, bħal permezz tal-istrumenti finanzjarji tal-Bank Ewropew tal-Investiment, b’mod partikolari biex jiġu appoġġjati investimenti biex tiżdied l-effiċjenza enerġetika tal-bini; jistieden lill-Kummissjoni u lill-Istati Membri jieħdu azzjoni deċiżiva biex jipprovdu valutazzjoni tal-politiki, il-fondi u l-konġestjonijiet tal-UE li għandha tiffaċilita l-kostruzzjoni, il-konverżjoni u r-rinnovazzjoni ta’ akkomodazzjoni aċċessibbli, affordabbli u effiċjenti fl-użu tal-enerġija, inkluża l-akkomodazzjoni soċjali, li tissodisfa l-ħtiġijiet taż-żgħażagħ, tal-persuni b’mobbiltà mnaqqsa, tal-gruppi b’introjtu baxx u medju, tal-familji f’riskju u tal-persuni f’sitwazzjonijiet aktar vulnerabbli, filwaqt li s-sidien tal-proprjetà u dawk li jfittxu aċċess għas-sjieda tal-proprjetà jiġu protetti minn tnaqqis ulterjuri fil-provvista;

14.Jilqa’ l-Pjan Ewropew għal Akkomodazzjoni Affordabbli mħabbar biex jappoġġja lill-Istati Membri fl-indirizzar tal-kriżi tal-akkomodazzjoni u ż-żieda qawwija fil-prezzijiet tal-kirjiet; jistieden lill-Kummissjoni tivvaluta u tippubblika liema ostakli potenzjali għar-regoli dwar l-għajnuna mill-Istat jaffettwaw l-aċċessibbiltà għall-akkomodazzjoni; ifakkar li l-Fond Soċjali għall-Klima għandu l-għan li jipprovdi għajnuna finanzjarja lill-Istati Membri mill-2026 biex jappoġġjaw lill-unitajiet domestiċi vulnerabbli, b’mod partikolari b’miżuri u investimenti maħsuba biex iżidu l-effiċjenza enerġetika tal-bini, id-dekarbonizzazzjoni tat-tisħin u t-tkessiħ tal-bini u l-integrazzjoni fil-bini tal-ġenerazzjoni u l-ħżin tal-enerġija rinnovabbli;

15.Iqis li l-problema ta’ persuni mingħajr dar hija problema soċjali drammatika fl-UE; jappella għal definizzjoni waħda tal-kundizzjoni ta’ persuni mingħajr dar fl-UE, li tippermetti l-paragun u l-valutazzjoni sistematiċi tal-firxa tal-kundizzjoni ta’ persuni mingħajr dar fl-Istati Membri differenti tal-UE; jistieden lill-Kummissjoni tfassal strateġija u taħdem biex, sal-2030, tintemm il-kundizzjoni ta’ persuni mingħajr dar fl-UE billi jiġi promoss aċċess għal akkomodazzjoni affordabbli u deċenti kif ukoll aċċess għal servizzi soċjali ta’ kwalità; iħeġġeġ lill-Istati Membri jużaw aħjar l-istrumenti disponibbli tal-UE, inkluż l-FSE+, f’tali ambitu Opinjoni tal-Kumitat Ekonomiku u Soċjali Ewropew tat-13 ta’ Diċembru 2023 dwar “Lejn qafas tal-UE għal strateġiji nazzjonali għall-persuni mingħajr dar ibbażati fuq il-prinċipju ta’ ‘L-Akkomodazzjoni l-Ewwel’” (ĠU C, C/2024/1567, 5.3.2024, ELI: http://data.europa.eu/eli/C/2024/1567/oj).;

16.Jistieden lill-Istati Membri jfasslu strateġiji nazzjonali għall-problema ta’ persuni mingħajr dar; jilqa’ l-intenzjoni li titressaq rakkomandazzjoni tal-Kunsill dwar il-kundizzjoni ta’ persuni mingħajr dar Opinjoni tal-Kumitat Ekonomiku u Soċjali Ewropew tat-13 ta’ Diċembru 2023 dwar “Lejn qafas tal-UE għal strateġiji nazzjonali għall-persuni mingħajr dar ibbażati fuq il-prinċipju ta’ ‘L-Akkomodazzjoni l-Ewwel’”.; iħeġġeġ lill-Kummissjoni tkompli żżid l-ambizzjoni tal-Pjattaforma Ewropea għall-Ġlieda Kontra l-Kundizzjoni ta’ Persuni Mingħajr Dar;

17.Iqis li azzjoni tal-UE hija meħtieġa b’mod urġenti biex jiġu indirizzati l-livelli persistentement għoljin ta’ faqar u esklużjoni soċjali fl-UE, b’mod partikolari fost it-tfal, iż-żgħażagħ u l-persuni akbar fl-età, il-persuni b’diżabbiltà, l-individwi li ma twildux fl-UE, il-persuni LGBTI u l-komunitajiet Rom; jenfasizza li l-aċċess għal servizzi soċjali ta’ kwalità għandu jingħata prijorità u jenħtieġ li jiżgura s-sigurtà tal-enerġija għall-unitajiet domestiċi vulnerabbli; jistieden lill-Kummissjoni tadotta l-ewwel Strateġija tal-UE Kontra l-Faqar;

18.Ifakkar fl-objettiv tal-Unjoni li ssir tranżizzjoni mill-kura istituzzjonali għall-kura komunitarja jew f’familja; jistieden lill-Kummissjoni tressaq pjan ta’ azzjoni dwar id-deistituzzjonalizzazzjoni; jisħaq li dan il-pjan ta’ azzjoni għandu jkopri l-gruppi kollha li għadhom jgħixu fl-istituzzjonijiet, inklużi t-tfal, il-persuni b’diżabbiltà, il-persuni bi problemi ta’ saħħa mentali, il-persuni mingħajr dar u l-anzjani; jistieden lill-Istati Membri jagħmlu użu sħiħ mill-fondi tal-FSE+ kif ukoll minn fondi Ewropej u nazzjonali rilevanti oħra sabiex jiffinalizzaw il-proċess ta’ deistituzzjonalizzazzjoni ħalli jiġi żgurat li kull ċittadin tal-UE jista’ jgħix f’ambjent familjari jew komunitarju;

19.Jistieden lill-Kummissjoni tippreżenta pjan ta’ azzjoni Ewropew għas-saħħa mentali, bi qbil mar-rakkomandazzjonijiet reċenti tagħha Komunikazzjoni tal-Kummissjoni tas-7 ta’ Ġunju 2023 dwar approċċ komprensiv lejn is-saħħa mentali (COM(2023)0298).; jistieden lill-Istati Membri jsaħħu l-aċċess għas-servizzi tas-saħħa mentali u l-programmi ta’ appoġġ emozzjonali għal kulħadd, b’mod partikolari t-tfal, iż-żgħażagħ u l-anzjani; jitlob li l-indikaturi tat-Tabella ta’ Valutazzjoni Soċjali jintużaw aħjar biex jiġi indirizzat l-impatt tal-kundizzjonijiet tax-xogħol prekarji u tal-inċertezza rigward is-saħħa mentali;

20.Jistieden lill-Kummissjoni tindirizza s-solitudni billi tippromwovi strateġija olistika tal-UE dwar is-solitudni u l-aċċess għall-kura professjonali; jitlob ukoll li din l-istrateġija tal-UE tindirizza l-impatt soċjoekonomiku tas-solitudni fuq il-produttività u l-benesseri billi jiġu ttrattati kwistjonijiet bħall-iżolament rurali; iħeġġeġ lill-Istati Membri jkomplu jimplimentaw ir-rakkomandazzjoni tal-Kunsill dwar l-aċċess għal kura fit-tul, affordabbli u ta’ kwalità bil-ħsieb li jiġi żgurat aċċess għal kura ta’ kwalità filwaqt li jiġu żgurati kundizzjonijiet tax-xogħol deċenti għall-ħaddiema fis-settur tal-kura, kif ukoll għall-carers informali;

21.Jirrikonoxxi li 44 miljun Ewropew spiss jaġixxu bħala fornituri informali tal-kura fit-tul, u li l-maġġoranza tagħhom huma nisa Kummissjoni Ewropea: Direttorat Ġenerali tal-Impjiegi, l-Affarijiet Soċjali u l-Inklużjoni, Long-term care report – Trends, challenges and opportunities in an ageing society. Volume I, Uffiċċju tal-Pubblikazzjonijiet, 2021, https://data.europa.eu/doi/10.2767/677726.;

22.Jirrikonoxxi r-rwol uniku tal-carers fis-soċjetà, u filwaqt li d-definizzjoni ta’ care workers mhijiex armonizzata madwar l-UE, is-settur tal-kura fit-tul jimpjega 6,4 miljun ruħ madwar l-UE;

23.Jinsab imħasseb li, fl-2023, 94,6 miljun ruħ fl-UE kienu għadhom f’riskju ta’ faqar jew esklużjoni soċjali; jisħaq li, mingħajr bidla fundamentali fl-approċċ għall-ġlieda kontra l-faqar, l-Unjoni Ewropea u l-Istati Membri tagħha mhux se jilħqu l-objettivi tagħhom għat-tnaqqis tal-faqar; jemmen li t-tħabbira tal-ewwel Strateġija tal-UE Kontra l-Faqar hija pass fid-direzzjoni t-tajba lejn it-treġġigħ lura tat-tendenza, iżda trid tipprovdi approċċ komprensiv biex jiġu indirizzati l-aspetti multidimensjonali tal-faqar u l-esklużjoni soċjali b’azzjonijiet konkreti u implimentazzjoni u monitoraġġ rigorużi; jitlob li din l-istrateġija tinkludi lil dawk kollha li jesperjenzaw il-faqar u l-esklużjoni soċjali, l-ewwel u qabel kollox dawk l-aktar żvantaġġjati, iżda anki miżuri speċifiċi għal gruppi differenti bħall-persuni li jesperjenzaw faqar fost dawk li jaħdmu, il-persuni mingħajr dar, il-persuni b’diżabbiltà, il-familji b’ġenitur wieħed u fuq kollox it-tfal, sabiex iċ-ċiklu tal-faqar jinkiser b’mod sostenibbli; jisħaq li t-traspożizzjoni tad-Direttiva dwar Pagi Minimi se tkun kruċjali għall-prevenzjoni u l-ġlieda kontra r-riskji tal-faqar fost il-ħaddiema, filwaqt li ssaħħaħ l-inċentivi għax-xogħol u jilqa’ l-fatt li diversi Stati Membri emendaw jew qed jippjanaw li jemendaw l-oqfsa tal-paga minima tagħhom; jinsab imħasseb dwar iż-żieda ta’ forom mhux standard ta’ impjieg fejn huwa aktar probabbli li l-ħaddiema jiffaċċjaw il-faqar fost dawk li jaħdmu u jsibu ruħhom mingħajr protezzjonijiet legali adegwati;

24.Itenni t-talba tiegħu lill-Kummissjoni biex timmonitorja bir-reqqa l-implimentazzjoni tal-Garanzija għat-Tfal fl-Istati Membri kollha bħala parti mis-Semestru Ewropew u r-rakkomandazzjonijiet speċifiċi għall-pajjiż; itenni t-talba tiegħu għal żieda fil-finanzjament tal-Garanzija Ewropea għat-Tfal b’baġit iddedikat ta’ mill-inqas EUR 20 biljun u biex l-Istati Membri kollha jallokaw mill-inqas 5 % tal-fondi tal-FSE+ tagħhom għall-ġlieda kontra l-faqar fost it-tfal u għall-promozzjoni tal-benesseri tat-tfal; iqis li r-rakkomandazzjonijiet speċifiċi għall-pajjiż għandhom jirriflettu l-konformità baġitarja tal-Istati Membri mal-allokazzjoni minima meħtieġa għall-indirizzar tal-faqar fost it-tfal stabbilit fir-Regolament FSE+ L-Artikolu 7(3) tar-Regolament (UE) 2021/1057 tal-Parlament Ewropew u tal-Kunsill tal-24 ta’ Ġunju 2021 li jistabbilixxi l-Fond Soċjali Ewropew Plus (FSE+) (ĠU L 231, 30.6.2021, p. 21, ELI: http://data.europa.eu/eli/reg/2021/1057/oj).; jistieden lill-Kummissjoni tipprovdi baġit ambizzjuż għall-Garanzija għat-Tfal fil-QFP li jmiss sabiex twieġeb għall-isfida li qed tikber tal-faqar fost it-tfal u l-esklużjoni soċjali tat-tfal;

25.Jinsab imħasseb dwar politiki nazzjonali li joħolqu lakuni fil-kopertura tas-saħħa, li jżidu l-inugwaljanzi kemm fi ħdan l-Istati Membri kif ukoll bejniethom; iwissi li dan jimmina wkoll l-implimentazzjoni tal-prinċipju 16 tal-EPSR u tal-SDG 3.8 dwar il-kopertura tas-saħħa universali, kif ukoll l-objettiv ġenerali tal-EPSR li jippromwovi l-konverġenza soċjali ’l fuq fl-UE, filwaqt li ħadd ma jitħalla jibqa’ lura; jemmen li l-indikaturi użati fit-Tabella ta’ Valutazzjoni Soċjali ma jipprovdux fehim komprensiv tal-affordabbiltà tal-kura tas-saħħa;

26.Jissottolinja li l-impjegaturi jeħtieġ li jrawmu rabtiet interġenerazzjonali mal-kumpaniji u tagħlim interġenerazzjonali bejn il-ħaddiema żgħażagħ u anzjani, u viċi versa; jissottolinja li forza tax-xogħol li qed tixjieħ tista’ tgħin lil negozju jiżviluppa prodotti u servizzi ġodda biex jadatta għall-ħtiġijiet ta’ soċjetà li qed tixjieħ b’mod aktar kreattiv u produttiv; jappella, ukoll, għall-ħolqien ta’ inċentivi li jħeġġu l-volontarjat u l-mentoraġġ biex jixprunaw it-trasferiment tal-għarfien bejn il-ġenerazzjonijiet;

27.Iwissi li, skont rapporti tal-Bank Ċentrali Ewropew, il-pagi reali għadhom taħt il-livell tagħhom ta’ qabel il-pandemija, filwaqt li l-produttività għadha bejn wieħed u ieħor l-istess; jaqbel li dan joħloq lok għal irkupru mhux inflazzjonarju fil-pagi reali u jwissi li jekk il-pagi reali ma jirkuprawx, dan iżid ir-riskju ta’ dgħufija ekonomika fit-tul, u sussegwentement jista’ jikkawża effetti ċikatriċi u jkompli jdgħajjef il-produttività fiż-żona tal-euro meta mqabbla ma’ partijiet oħra tad-dinja; jemmen li l-infurzar aħjar tal-pagi minimi u t-tisħiħ tal-kopertura tan-negozjar kollettiv jista’ jkollhom effett ta’ benefiċċju fuq il-livelli ta’ inugwaljanza fil-pagi, b’mod partikolari billi tingħata għajnuna lill-ħaddiema l-aktar vulnerabbli fil-qiegħ tad-distribuzzjoni tal-pagi, li qed jiġu esklużi dejjem aktar;

28.Jitlob lill-Istati Membri jiżguraw kundizzjonijiet tax-xogħol deċenti, li jinkludu fost l-oħrajn pagi deċenti, aċċess għall-protezzjoni soċjali, opportunitajiet ta’ tagħlim tul il-ħajja, saħħa u sikurezza okkupazzjonali, bilanċ tajjeb bejn ix-xogħol u l-ħajja privata u d-dritt għall-iskonnessjoni, ħin tax-xogħol raġonevoli, rappreżentanza tal-ħaddiema, demokrazija fuq il-post tax-xogħol u ftehimiet kollettivi; iħeġġeġ lill-Istati Membri jrawmu d-demokrazija fuq il-post tax-xogħol, id-djalogu soċjali u n-negozjar kollettiv, jipproteġu d-drittijiet tal-ħaddiema, b’mod partikolari fil-kuntest tat-tranżizzjoni ekoloġika u diġitali, u jiżguraw paga ugwali għal xogħol ugwali bejn in-nisa u l-irġiel, itejbu t-trasparenza fil-pagi u jindirizzaw l-inugwaljanza abbażi tal-ġeneru biex inaqqsu d-differenza fil-pagi bejn il-ġeneri fl-UE;

29.Ifakkar fl-importanza li jittejjeb l-aċċess tal-persuni li jaħdmu għal rashom għall-protezzjoni soċjali u jistieden lill-Kummissjoni timmonitorja l-pjanijiet nazzjonali tal-Istati Membri għall-implimentazzjoni tar-Rakkomandazzjoni tal-Kunsill tat-8 ta’ Novembru 2019 dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom ĠU C 387, 15.11.2019, p. 1. bħala parti mir-rakkomandazzjonijiet speċifiċi għall-pajjiż; ifakkar, f’dan ir-rigward, peress li r-rata ta’ professjonisti li jaħdmu għal rashom fis-setturi kulturali u kreattivi hija aktar mid-doppju milli fil-popolazzjoni ġenerali, fit-13-il inizjattiva stabbiliti fir-rispons tal-Kummissjoni tal-21 ta’ Frar 2024 għar-riżoluzzjoni tal-Parlament Ewropew tal-21 ta’ Novembru 2023 dwar qafas tal-UE għas-sitwazzjoni soċjali u professjonali tal-artisti u tal-ħaddiema fis-setturi kulturali u kreattivi Riżoluzzjoni tal-Parlament Ewropew tal-21 ta’ Novembru 2023 li tinkludi rakkomandazzjonijiet lill-Kummissjoni dwar qafas tal-UE għas-sitwazzjoni soċjali u professjonali tal-artisti u tal-ħaddiema fis-setturi kulturali u kreattivi (ĠU C, C/2024/4208, 24.7.2024, ELI: http://data.europa.eu/eli/C/2024/4208/oj). u jistieden lill-Kummissjoni tibda timplimentahom f’kooperazzjoni mal-Istati Membri;

30.Jappella għall-implimentazzjoni ta’ politiki li jippromwovu l-bilanċ bejn ix-xogħol u l-ħajja privata u d-dritt għall-iskonnessjoni, bl-għan li tittejjeb il-kwalità tal-ħajja għall-familji u l-ħaddiema kollha, biex tiġi żgurata l-implimentazzjoni tad-Direttiva dwar il-Bilanċ bejn ix-Xogħol u l-Ħajja Privata Id-Direttiva (UE) 2019/1158 tal-Parlament Ewropew u tal-Kunsill tal-20 ta’ Ġunju 2019 dwar il-bilanċ bejn ix-xogħol u l-ħajja privata għall-ġenituri u għall-persuni li jindukraw u li tħassar id-Direttiva tal-Kunsill 2010/18/UE (ĠU L 188, 12.7.2019, p. 79, ELI: http://data.europa.eu/eli/dir/2019/1158/oj). u tal-Istrateġija Ewropea għall-Kura; jistieden lill-Kummissjoni tressaq proposta biex tindirizza t-telexogħol u d-dritt għall-iskonnessjoni, kif ukoll proposta għall-ħolqien ta’ kard Ewropea għat-tipi kollha ta’ familji kbar u pjan ta’ azzjoni Ewropew għall-ġenituri waħedhom, li toffri vantaġġi edukattivi u soċjali; jappella, finalment, għal inizjattivi biex tiġi miġġielda l-esklużjoni mill-forza tax-xogħol bħala konsegwenza ta’ perjodi itwal ta’ liv minħabba mard, biex il-post tax-xogħol jiġi adattat u biex jiġu promossi kundizzjonijiet tax-xogħol flessibbli u jitfasslu strateġiji li jappoġġjaw ir-ritorn tal-ħaddiema wara assenzi aktar fit-tul;

31.Jitlob li l-isfidi demografiċi jingħataw prijorità fil-politika ta’ koeżjoni tal-UE u li tittieħed azzjoni konkreta fil-livell tal-UE u f’dak nazzjonali; jistieden lill-Kummissjoni tiddikjara “Sena Ewropea tad-Demografija” u tagħti prijorità lit-tfassil tal-komunikazzjoni tal-Kummissjoni dwar l-isfruttar tat-talenti fir-reġjuni tal-Ewropa u l-“Mekkaniżmu ta’ Spinta tat-Talent” sabiex tippromwovi l-koeżjoni soċjali u żżid il-finanzjament għaż-żoni rurali u ultraperiferiċi u għar-reġjuni b’rata għolja ta’ depopolazzjoni, filwaqt li tappoġġja l-ħolqien ta’ impjiegi ta’ kwalità, is-servizzi pubbliċi, il-proġetti ta’ żvilupp lokali u l-infrastruttura bażika li jiffavorixxu d-“dritt li wieħed jibqa’ fit-territorju”, speċjalment fil-każ taż-żgħażagħ; jenfasizza l-importanza li jiġu introdotti miżuri speċifiċi biex jiġu indirizzati l-inugwaljanzi reġjonali fl-edukazzjoni u t-taħriġ, filwaqt li jiġi żgurat aċċess ugwali għal edukazzjoni ta’ kwalità għolja u affordabbli għal kulħadd;

32.Jinsab imħasseb li, minkejja t-titjib li sar, diversi gruppi tal-popolazzjoni għadhom sottorappreżentati b’mod sinifikanti fis-suq tax-xogħol tal-UE, inklużi n-nisa, l-anzjani, il-persuni bi kwalifiki baxxi u medji, il-persuni b’diżabbiltà u l-persuni li ġejjin minn kuntest ta’ migrazzjoni jew minoranza; iwissi li l-inugwaljanzi fl-edukazzjoni żdiedu ħafna, u dan ikompli jaggrava l-vulnerabbiltajiet tal-istudenti li ġejjin minn kuntesti żvantaġġjati jew ta’ migrazzjoni; jirrimarka li, skont il-JER, il-persuni li ġejjin minn kuntesti ta’ migrazzjoni jew ta’ minoranza jistgħu jibbenefikaw b’mod sinifikanti minn miżuri mmirati sabiex jiġu indirizzati l-ispariġġi fil-ħiliet, tittejjeb il-profiċjenza lingwistika u tiġi miġġielda d-diskriminazzjoni; jisħaq fuq l-importanza li jissaħħu l-isforzi fl-implimentazzjoni tal-Pjan ta’ Azzjoni 2021-27 dwar l-Integrazzjoni u l-Inklużjoni, li jipprovdi qafas ta’ politika komuni biex jappoġġja lill-Istati Membri fit-tfassil ta’ politiki nazzjonali dwar l-integrazzjoni tal-migranti;

33.Jistieden lill-Kummissjoni u lill-Kunsill jagħtu prijorità lit-tnaqqis tal-piżijiet amministrattivi bl-għan tas-simplifikazzjoni filwaqt li jirrispettaw l-istandards soċjali u tax-xogħol; jemmen li appoġġ aħjar għall-SMEs u għall-imprendituri eżistenti u potenzjali jtejjeb il-kompetittività u s-sostenibbiltà fit-tul tal-UE, jagħti spinta lill-innovazzjoni u joħloq impjiegi ta’ kwalità; jinnota li l-SMEs u l-professjonisti li jaħdmu għal rashom fis-setturi kollha huma essenzjali għat-tkabbir ekonomiku tal-UE u, għaldaqstant, għall-finanzjament tal-politiki soċjali; iħeġġeġ l-implimentazzjoni ta’ rakkomandazzjonijiet speċifiċi biex jittejjeb is-suq uniku; jieħu nota tal-pubblikazzjoni mill-Kummissjoni tal-“Boxxla għall-Kompetittività” fid-29 ta’ Jannar 2025 Komunikazzjoni tal-Kummissjoni tad-29 ta’ Jannar 2025 bit-titolu “Boxxla għall-Kompetittività tal-UE” (COM(2025)0030).;

34.Jistieden lill-Kummissjoni twettaq kontrolli tal-kompetittività fuq kull proposta leġiżlattiva ġdida, filwaqt li tqis l-impatt ġenerali tal-leġiżlazzjoni tal-UE fuq il-kumpaniji, kif ukoll fuq politiki u programmi oħra tal-UE;

35.Iqis li l-ekonomija soċjali hija komponent essenzjali tal-ekonomija soċjali tas-suq tal-UE u xprun għall-implimentazzjoni tal-EPSR u l-miri tiegħu, li spiss tipprovdi impjieg lil gruppi vulnerabbli u esklużi; jistieden lill-Kummissjoni u lill-Istati Membri jsaħħu l-appoġġ tagħhom għall intrapriżi kollha tal-ekonomija soċjali iżda speċjalment għal dawk mingħajr skop ta’ qligħ, kif enfasizzat fil-Pjan ta’ Azzjoni dwar l-Ekonomija Soċjali 2021 u fil-Pjan direzzjonali ta’ Liège għall-Ekonomija Soċjali, sabiex jippromwovu xogħol ta’ kwalità, deċenti u inklużiv u l-ekonomija ċirkolari, ħalli l-Istati Membri jiġu mħeġġa jiffaċilitaw l-aċċess għall-fondi u jtejbu l-viżibbiltà tal-atturi tal-ekonomija soċjali; jitlob lill-Kummissjoni tesplora mekkaniżmi innovattivi ta’ finanzjament biex tappoġġja l-iżvilupp tal-ekonomija soċjali fl-Ewropa Riżoluzzjoni tas-6 ta’ Lulju 2022 dwar il-pjan ta’ azzjoni tal-UE għall-ekonomija soċjali (ĠU C 47, 7.2.2023, p. 171). u biex trawwem ambjent tan-negozju dinamiku u inklużiv;

36.Jemmen li, f’din is-sena ta’ tranżizzjoni, bl-implimentazzjoni tar-regoli riveduti dwar il-governanza ekonomika, l-Istati Membri għandhom jallinjaw ir-responsabbiltà fiskali mat-tkabbir u l-impjieg sostenibbli u inklużivi; jinnota li l-involviment tas-sħab soċjali, inkluż fl-iżvilupp tal-pjanijiet strutturali fiskali fuq terminu medju, għandu jissaħħaħ biex jikkontribwixxi għall-għanijiet tal-qafas il-ġdid tal-governanza ekonomika;

37.Jilqa’ l-fatt li l-pjanijiet strutturali fiskali nazzjonali fuq terminu medju, skont il-qafas il-ġdid ta’ governanza ekonomika, għandhom jinkludu r-riformi u l-investimenti li jirrispondu għall-isfidi ewlenin identifikati fil-kuntest tas-Semestru Ewropew u għandhom ukoll jiżguraw is-sostenibbiltà tad-dejn filwaqt li jinvestu strateġikament fil-prinċipji tal-EPSR bl-għan li titrawwem konverġenza soċjali ’l fuq;

38.Jinsab imħasseb li l-konformità mar-rakkomandazzjonijiet speċifiċi għall-pajjiż (CSRs) għadha baxxa; itenni l-appell tiegħu, għalhekk, għal implimentazzjoni effettiva tas-CSRs mill-Istati Membri sabiex jippromwovu l-kura tas-saħħa u sistemi tal-pensjoni sostenibbli, bi qbil mal-prinċipji 15 u 16 tal-EPSR, u l-prosperità fit-tul għaċ-ċittadini kollha, filwaqt li titqies il-vulnerabbiltà ta’ dawk il-ħaddiema li l-karrieri tagħhom huma interrotti, intermittenti u soġġetti għal tranżizzjonijiet professjonali; jinsisti li l-Kummissjoni għandha ssaħħaħ id-djalogi tagħha mal-Istati Membri dwar l-implimentazzjoni tar-rakkomandazzjonijiet eżistenti u tal-Linji gwida dwar l-Impjiegi kif ukoll dwar l-azzjoni politika attwali jew futura biex jiġu indirizzati l-isfidi identifikati;

39.Jilqa’ l-istabbiliment ta’ qafas biex jiġu identifikati r-riskji għall-konverġenza soċjali fis-Semestru Ewropew, li l-Parlament kien talab bil-qawwa; ifakkar li, skont dan il-qafas, il-Kummissjoni tivvaluta r-riskji għall-konverġenza soċjali ’l fuq fl-Istati Membri u timmonitorja l-progress fl-implimentazzjoni tal-EPSR abbażi tat-Tabella ta’ Valutazzjoni Soċjali u tal-prinċipji tal-Qafas ta’ Konverġenza Soċjali; jilqa’ l-fatt li l-JER 2025 jipprovdi analiżi speċifika għall-pajjiż ibbażata fuq il-prinċipji tal-Qafas ta’ Konverġenza Soċjali; jistieden lill-Kummissjoni tkompli tiżviluppa għodod innovattivi ta’ analiżi kwantitattiva u kwalitattiva skont dan il-qafas il-ġdid sabiex isir l-aħjar użu minnu fiċ-ċikli futuri tas-Semestru Ewropew;

40.Jilqa’ l-fatt li l-ewwel analiżi bbażata fuq il-prinċipji tal-Qafas ta’ Konverġenza Soċjali tindika konverġenza ’l fuq fis-suq tax-xogħol fl-2023 Proposta tal-Kummissjoni tas-17 ta’ Diċembru 2024 għal rapport konġunt dwar l-impjiegi mill-Kummissjoni u mill-Kunsill (COM(2024)0701).; jinnota bi tħassib li l-eżiti tal-impjiegi ta’ gruppi sottorappreżentati għad iridu jitjiebu u li r-riskji għall-konverġenza ’l fuq jippersistu fil-livell Ewropew fir-rigward tal-iżvilupp tal-ħiliet, mill-edukazzjoni bikrija sat-tagħlim tul il-ħajja, u l-eżiti soċjali tar-rati ta’ riskju ta’ faqar u ta’ esklużjoni soċjali; jistieden lill-Kummissjoni tanalizza aktar dawn ir-riskji għall-konverġenza soċjali ’l fuq fit-tieni stadju tal-analiżi u tiddiskuti mal-Istati Membri kkonċernati l-miżuri meħuda jew previsti biex jiġu indirizzati dawn ir-riskji;

41.Jirrikonoxxi l-kriżi tal-għoli tal-ħajja, li żiedet il-piż fuq l-unitajiet domestiċi, u ż-żieda fil-kost tal-akkomodazzjoni li, flimkien mal-kostijiet għoljin tal-enerġija, tikkontribwixxi għal livelli għoljin ta’ faqar enerġetiku madwar l-UE; jistieden, għalhekk, lill-Kummissjoni u lill-Istati Membri jindirizzaw b’mod komprensiv il-kawżi ewlenin ta’ din il-kriżi billi jipprijoritizzaw il-politiki li jippromwovu r-reżiljenza ekonomika, il-koeżjoni soċjali u l-iżvilupp sostenibbli;

42.Iwissi dwar ir-riskji soċjali li jirriżultaw mill-kriżi fis-settur awtomobilistiku, li qed jiffaċċja pressjoni bla preċedent kemm minn fatturi esterni kif ukoll minn fatturi interni; jistieden lill-Kummissjoni tagħti attenzjoni lil dan is-settur u ssaħħaħ id-djalogu soċjali u l-parteċipazzjoni tal-ħaddiema fil-proċessi ta’ tranżizzjoni; jisħaq fuq il-ħtieġa urġenti ta’ rispons ikkoordinat tal-UE permezz ta’ task force ta’ emerġenza tat-trade unions u tal-impjegaturi biex twieġeb għall-kriżi attwali;

43.Jistieden lill-Kummissjoni timmonitorja d-data dwar ir-ristrutturar u l-impatt tiegħu fuq l-impjiegi, pereżempju billi tuża l-Monitoraġġ Ewropew tar-Ristrutturar, tiffaċilita miżuri b’appoġġ għar-ristrutturar u t-tranżizzjonijiet fis-suq tax-xogħol, u tikkunsidra li tenfasizza miżuri nazzjonali li jappoġġjaw mod soċjalment responsabbli ta’ ristrutturar fis-Semestru Ewropew;

44.Jinsab imħasseb dwar ir-reviżjoni mill-Kummissjoni tat-Tabella ta’ Valutazzjoni tal-Proċedura ta’ Żbilanċ Makroekonomiku (MIP), b’mod partikolari t-tnaqqis fl-indikaturi tal-impjiegi u dawk soċjali, li huma kruċjali biex tiġi vvalutata s-sitwazzjoni soċjali u tas-suq tax-xogħol fl-Istati Membri; jiddispjaċih dwar il-fatt li l-qgħad fost iż-żgħażagħ m’għadux jitqies bħala indikatur ewlieni, minkejja r-rilevanza tiegħu fl-identifikazzjoni u l-indirizzar ta’ sfidi speċifiċi tas-suq tax-xogħol u fl-adozzjoni ta’ politiki pubbliċi adegwati; jisħaq li l-indikaturi tal-istandards soċjali għandhom jingħataw kunsiderazzjoni akbar fil-proċess tat-teħid tad-deċiżjonijiet; jiddispjaċih dwar il-fatt li l-Kummissjoni ma kkonsultatx kif xieraq lill-Parlament u jfakkar lill-Kummissjoni fl-obbligu tagħha li tikkoopera mill-qrib mal-Parlament, mal-Kunsill u mas-sħab soċjali qabel ma tfassal it-tabella ta’ valutazzjoni tal-MIP u s-sett ta’ indikaturi makroekonomiċi u makrofinanzjarji għall-Istati Membri; jisħaq li l-implimentazzjoni tal-prinċipji tal-EPSR trid tkun parti mit-tabella ta’ valutazzjoni tal-MIP;

45.Iqis li l-koeżjoni territorjali u soċjali hija komponent essenzjali tal-aġenda tal-kompetittività, u leġiżlazzjoni bħall-Istrument Ewropew għal Appoġġ Temporanju biex Jittaffew ir-Riskji ta’ Qgħad f’Emerġenza (SURE) għadha eżempju pożittiv biex tispira inizjattivi futuri tal-UE;

46.Iqis li l-Kummissjoni u l-Istati Membri għandhom jiżguraw li l-politiki fiskali fl-ambitu tas-Semestru Ewropew jappoġġjaw investimenti allinjati mal-EPSR, b’mod partikolari f’oqsma bħall-akkomodazzjoni deċenti u affordabbli, il-kura tas-saħħa ta’ kwalità, l-edukazzjoni, u s-sistemi ta’ protezzjoni soċjali, peress li dawn huma kritiċi għall-koeżjoni soċjali u s-sostenibbiltà ekonomika fit-tul u biex jiġu indirizzati l-isfidi identifikati permezz tal-indikaturi soċjali;

47.Jisħaq fuq il-ħtieġa li jiġu indirizzati l-isfidi ewlenin identifikati fit-Tabella ta’ Valutazzjoni Soċjali bħala “kritiċi” u “li għandhom jiġu osservati”, inklużi t-tfal f’riskju ta’ faqar jew esklużjoni soċjali, id-differenza bejn il-ġeneri fl-impjiegi, il-piż eċċessiv tal-kost tal-akkomodazzjoni, il-kura tat-tfal, il-kura fit-tul, id-differenza fl-impjiegi għall-persuni b’diżabbiltà, l-impatt tat-trasferimenti soċjali fuq it-tnaqqis tal-faqar, u l-ħiliet diġitali bażiċi Proposta tal-Kummissjoni tas-17 ta’ Diċembru 2024 għal rapport konġunt dwar l-impjiegi mill-Kummissjoni u mill-Kunsill (COM(2024)0701).;

48.Jisħaq fuq l-impatti negattivi li l-kriżi tal-għoli tal-ħajja kellha fuq il-persuni b’diżabbiltà;

49.Iħeġġeġ lill-Istati Membri jqisu politiki robusti li jiżguraw pagi ġusti u jtejbu l-kundizzjonijiet tax-xogħol, b’mod partikolari għall-ħaddiema b’introjtu baxx u prekarji;

50.Jisħaq fuq il-ħtieġa ta’ data f’waqtha u armonizzata dwar il-politiki soċjali biex jittejbu t-tfassil tal-politika bbażat fuq l-evidenza u l-investimenti soċjali mmirati; jitlob li jsir titjib fit-Tabella ta’ Valutazzjoni Soċjali sabiex jiġu koperti l-20 prinċipju tal-EPSR permezz tal-introduzzjoni ta’ indikaturi rilevanti li jirriflettu t-tendenzi u l-kawżi tal-inugwaljanza, bħall-impjiegi ta’ kwalità, id-distribuzzjoni tal-ġid, il-pensjonijiet adegwati, ir-rata ta’ persuni mingħajr dar, is-saħħa mentali u l-qgħad; ifakkar li l-indikatur tar-riskju tal-faqar jew tal-esklużjoni soċjali (AROPE) jonqos milli jiżvela l-kawżi tal-inugwaljanza kumplessa; jistieden lill-Kummissjoni u lill-Istati Membri jiżviluppaw qafas Ewropew għall-ġbir tad-data dwar is-servizzi soċjali biex jimmonitorjaw l-investiment fis-servizzi soċjali u l-kopertura tagħhom;

51.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.