P10_TA(2025)0036Id-demokrazija u d-drittijiet tal-bniedem fit-Tajlandja, b’mod partikolari d-delitt ta’ offiża kontra l-Kuruna u d-deportazzjoni tar-rifuġjati UjguriRiżoluzzjoni tal-Parlament Ewropew tat-13 ta' Marzu 2025 dwar id-demokrazija u d-drittijiet tal-bniedem fit-Tajlandja, b’mod partikolari l-każijiet tal-liġi dwar id-delitt ta’ offiża kontra l-Kuruna u d-deportazzjoni tar-rifuġjati Ujguri (2025/2594(RSP))Il-Parlament Ewropew,

–wara li kkunsidra l-Artikolu 150(5) u l-Artikolu 136(4) tar-Regoli ta’ Proċedura tiegħu,

A.billi fis-27 ta’ Frar 2025, l-awtoritajiet Tajlandiżi kisru d-dritt internazzjonali billi ddeportaw mill-anqas 40 rifuġjat Ujgur lejn iċ-Ċina, fejn qed jirriskjaw detenzjoni arbitrarja, tortura u ksur serju tad-drittijiet tal-bniedem; billi pajjiżi sikuri oħra kienu offrew risistemazzjoni tar-rifuġjati Ujguri;

B.billi qabel id-deportazzjoni tagħhom, dawn l-individwi kienu detenuti f’ċentri tal-immigrazzjoni Tajlandiżi għal aktar minn għaxar snin, fejn mill-anqas ħames Ujguri, inklużi minorenni, allegatament mietu minħabba kundizzjonijiet inumani;

C.billi d-dispożizzjonijiet tal-liġi dwar id-delitt ta’ offiża kontra l-Kuruna tat-Tajlandja, skont l-Artikolu 112 tal-Kodiċi Kriminali tagħha, huma fost l-aktar stretti fid-dinja u mhumiex konformi mal-obbligi tat-Tajlandja skont l-ICCPR;

D.billi, mill-2020 ’l hawn, aktar minn 1 960 attivist favur id-demokrazija, difensuri tad-drittijiet tal-bniedem u ġurnalisti, inklużi aktar minn 280 minorenni, ġew akkużati jew ikkundannati minħabba l-opinjonijiet tagħhom skont liġijiet repressivi li jrażżnu l-libertà tal-espressjoni, inklużi l-liġi dwar id-delitt ta’ offiża kontra l-Kuruna, l-Att dwar is-Sedizzjoni, l-Att dwar l-Assemblea Pubblika u l-Att dwar ir-Reati tal-Informatika; billi attivisti prominenti, inklużi Arnon Nampa, Mongkhon Thirakhot u Anchan Preelert, ġew ikkundannati għal sentenzi ta’ ħabs twal b’mod sproporzjonat minħabba kritika paċifika tal-monarkija, b’xi wħud minnhom li qed jiffaċċjaw sa 50 sena ħabs;

E.billi l-Qorti Kostituzzjonali xoljiet l-akbar partit u 44 mill-Membri Parlamentari tagħha ġew akkużati li pproponew emendi għal-liġi dwar id-delitt ta’ offiża kontra l-Kuruna, u qed jiffaċċjaw projbizzjonijiet li jieħdu sehem fil-politika possibbilment għal ħajjithom kollha; billi diversi Membri Parlamentari, inklużi Piyarat Chongthep, Rakchanok Srinok u Chonthicha Jangrew, qed jiġu mħarrka għall-attivitajiet u għad-dikjarazzjonijiet politiċi tagħhom;

1.Jikkundanna d-deportazzjoni tar-rifuġjati Ujguri lejn iċ-Ċina; jistieden lill-awtoritajiet Tajlandiżi jwaqqfu minnufih kwalunkwe ritorn furzat ieħor ta’ rifuġjati, ta’ persuni li jfittxu l-ażil u ta’ dissidenti politiċi lejn pajjiżi fejn ħajjithom tinsab fil-periklu;

2.Iħeġġeġ lill-Gvern Tajlandiż jagħti lill-UNHCR aċċess mingħajr restrizzjonijiet għall-persuni Ujguri detenuti kollha li qed ifittxu l-ażil u jipprovdi informazzjoni trasparenti dwar l-istatus tagħhom;

3.Jistieden liċ-Ċina tirrispetta d-drittijiet fundamentali tal-Ujguri deportati, tiżgura t-trasparenza dwar fejn jinsabu, tagħti aċċess għalihom lill-UNHCR u teħles lil dawk detenuti;

4.Jistieden lit-Tajlandja tirratifika l-Konvenzjoni dwar l-Istatus tar-Rifuġjati tal-1951 u l-Protokoll tagħha tal-1967 u timplimenta sistema ta’ ażil trasparenti, ġusta u umana;

5.Jisħaq li t-Tajlandja hija sieħeb importanti tal-UE; iħeġġeġ lit-Tajlandja ssaħħaħ l-istituzzjonijiet tagħha f’konformità mal-prinċipji demokratiċi u mal-istandards internazzjonali dwar id-drittijiet tal-bniedem; jistieden lill-gvern jemenda jew iħassar l-Artikolu 112 u liġijiet repressivi oħra biex jiggarantixxi d-dritt għal-libertà tal-espressjoni, għal-libertà ta’ għaqda paċifika u għal-libertà ta’ parteċipazzjoni politika;

6.Jesiġi li tingħata amnestija lill-Membri Parlamentari u lill-attivisti kollha mħarrka jew miżmuma l-ħabs skont id-dispożizzjonijiet tal-liġi dwar id-delitt ta’ offiża kontra l-Kuruna u liġijiet repressivi oħra;

7.Jistieden lill-Kummissjoni tuża’ n-negozjati tal-FTA biex tagħmel pressjoni fuq it-Tajlandja bil-għan li tirriforma l-liġijiet repressivi, b’mod partikolari dawk tal-liġi dwar id-delitt ta’ offiża kontra l-Kuruna, teħles lill-priġunieri politiċi, twaqqaf id-deportazzjoni tar-rifuġjati Ujguri u tirratifika l-konvenzjonijiet ewlenin kollha tal-ILO; jistieden lill-Istati Membri jissospendu t-trattati ta’ estradizzjoni mar-Repubblika tal-Poplu taċ-Ċina;

8.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni u lill-awtoritajiet Tajlandiżi u Ċiniżi.