(3)I gcomhréir leis na Tosaíochtaí Comhpháirtíochta, tá an tAontas Eorpach agus an Éigipt tiomanta cuntasacht, an smacht reachta, lánurraim do chearta an duine, saoirsí bunúsacha, cur chun cinn an daonlathais, an comhionannas inscne agus comhdheiseanna mar chearta bunreachtúla a saoránach uile a áirithiú. Cuireann na gealltanais sin leis an gcomhpháirtíocht a chur chun cinn agus le forbairt inbhuanaithe shóisialta agus eacnamaíoch, dea-rialachas agus cobhsaíocht shocheacnamaíoch na hÉigipte. Leis an rannpháirtíocht mhéadaithe agus chuiditheach idir an tAontas agus an Éigipt le linn na tréimhse deiridh, cuireadh tús le hidirphlé níos fónta maidir le saincheisteanna a bhaineann le cearta an duine. Leis an bhFochoiste um Ábhair Pholaitiúla, Cearta an Duine agus an Daonlathas, Saincheisteanna Idirnáisiúnta agus Réigiúnacha i mí na Nollag 2022, agus leis an gCoiste Comhlachais i mí Bealtaine 2023, soláthraíodh ardáin institiúideacha chun tuairimí a mhalartú maidir le réimse saincheisteanna a bhaineann le cearta an duine, ar mhaith leis an Aontas leanúint díobh agus cur leo. Beidh tionchar dearfach ag an bhfeabhas seasta sa todhchaí ar staid chearta an duine agus ar chearta na mban agus ar chearta bunúsacha mar gheall ar bheartas gníomhach, comhleanúnach agus réamghníomhach sa réimse sin san Éigipt, amhail na cearta chun tuairimí a nochtadh, an ceart chun saoirse comhlachais agus chun comhthionóil shíochánta, lena dtabharfar isteach moratóir ar phionós an bháis, lena ndéanfar céastóireacht agus fuadach forfheidhmithe a chomhrac agus lena bhfeabhsófar na coinníollacha príosúin, ar an gcaidreamh idir an tAontas agus an Éigipt.

(5)Aithníonn an tAontas go bhfuil ról nach beag ag an Éigipt maidir le slándáil agus cobhsaíocht réigiúnach, agus tá leas mór aige éagobhsaíocht eacnamaíoch ghearrthéarmach a chosc sa tír sin a bhféadfadh iarmhairtí níos leithne a bheith aici agus a d’fhéadfadh dul chun tairbhe d’iomaitheoirí geopholaitiúla. Tá an sceimhlitheoireacht, an choireacht eagraithe, an bhréagaisnéis, amhail gáinneáil ar dhaoine agus imirce neamhrialta, agus coinbhleachtaí agus an ghéarleanúint ar dhaoine ar de mhionlaigh reiligiúnacha iad, ina mbagairtí coiteanna ár slándáil agus ar chreat sóisialta na náisiún ar an dá thaobh den Mheánmhuir. Ar an gcuma chéanna, tá an fuinneamh ar cheann de na dúshláin is práinní a gcaithfidh tíortha dul i ngleic leo ar dhá thaobh na Meánmhara. Ní hé amháin go bhféadfaí, mar gheall ar an gcomhar Fuinnimh idir an tAontas Eorpach agus an Éigipt sa Mheánmhuir Thoir, rathúnas eacnamaíoch a chothú sa réigiún, ach, chomh maith leis sin, d’fhéadfaí slándáil fuinnimh an Aontais Eorpaigh a neartú trí sholáthairtí fuinnimh a éagsúlú agus trí chomhar réigiúnach a spreagadh. I dtaca leis sin de, trí Fhóram Gáis na Meánmhara Thoir, cothaítear comhar réigiúnach dearfach. Ar an gcaoi sin, tá sé de leas coiteann ag an Aontas agus ag an Éigipt comhar a neartú mar a léirítear sna Tosaíochtaí Comhpháirtíochta, agus an dlí idirnáisiúnta á chomhlíonadh go hiomlán, lena n-áirítear Dlí Idirnáisiúnta na Mara, cearta an duine agus an dlí daonnúil idirnáisiúnta, chomh maith le leasanna coiteanna a chur chun cinn agus aghaidh a thabhairt ar dhúshláin choiteanna.

(6)ag meabhrú gurb amhlaidh, mar gheall ar na dúshláin gheopholaitiúla dhomhanda agus réigiúnacha atá ann, amhail an ghéarchéim dhaonnúil in Gaza, de bharr iarmhairtí na n-ionsaithe sceimhlitheoireachta a rinne Hamas ar fud Iosrael an 7 Deireadh Fómhair 2023, an teannas atá ag dul i ngéire i gCorn na hAfraice agus sábháilteacht na loingseoireachta sa Mhuir Rua agus i gCanáil Suez, mar aon leis an mbrú imirce ón gcoinbhleacht sa tSúdáin, an éiginnteacht sa tSúdáin, an éagobhsaíocht sa tSiria, freagrachtaí na hÉigipte, mar thír óstach, dídean a thabhairt do líon mór dídeanaithe agus imirceach agus tábhacht straitéiseach na hÉigipte mar an tír is mó sa réigiún agus mar chrann taca na cobhsaíochta agus na slándála sa Mheánoirthear mar a ritheann, atá comhpháirtíocht Straitéiseach agus Chuimsitheach á tabhairt i gcrích ag an Aontas leis an Éigipt mar a leagtar amach sa Dearbhú Comhpháirteach.

(7)Is é is cuspóir don Chomhpháirtíocht Straitéiseach Chuimsitheach leis an Éigipt an caidreamh polaitiúil idir an tAontas agus an Éigipt a ardú i dtreo comhpháirtíocht straitéiseach agus é a chur ar a cumas don Éigipt a príomhról a chomhlíonadh maidir le cobhsaíocht a chothú sa réigiún, sa Mheánoirthear agus san Afraic Thuaidh. Is é is aidhm don chomhpháirtíocht rannchuidiú le hathléimneacht mhaicreacnamaíoch na hÉigipte agus cur chun feidhme athchóirithe socheacnamaíocha uaillmhianacha a chumasú ar bhealach lena gcomhlánaítear agus lena dtreisítear an próiseas athchóirithe dá bhforáiltear faoi chlár CAI don Éigipt. Mar a leagtar amach sa Dearbhú Comhpháirteach, tabharfaidh an chomhpháirtíocht aghaidh ar shraith leathan beart beartais atá braislithe ar fud sé cholún idirghabhála, is iad sin: caidreamh polaitiúil; cobhsaíocht eacnamaíoch; infheistíocht agus trádáil; imirce neamhrialta agus soghluaisteacht i ndáil le cearta an duine; comhar sa tslándáil agus i bhforfheidhmiú an dlí; déimeagrafaíocht agus caipiteal daonna. Ba cheart an Chomhpháirtíocht Straitéiseach agus Chuimsitheach sin a fhorbairt i gcomhréir le tionscnaimh ar leibhéal an Aontais agus ar leibhéal na mBallstát amhail Global Gateway agus Plean Mattei don Afraic.

(8)Mar bhonn taca leis an gcomhpháirtíocht, tá pacáiste airgeadais EUR 7,4 billiún a chuimsíonn tacaíocht ghearrthéarmach agus níos fadtéarmaí don chlár oibre um athchóiriú macraifhioscach agus socheacnamaíoch is gá, chomh maith le méideanna méadaithe atá ar fáil chun tacú le hinfheistíochtaí san Éigipt agus tacaíocht spriocdhírithe chun na tosaíochtaí straitéiseacha éagsúla a chur chun feidhme, go háirithe ó thaobh na himirce neamhrialta agus an fhuinnimh in-athnuaite. Cuid den phacáiste tacaíochta is ea an pacáiste cúnaimh macrairgeadais ón Aontas is fiú suas le EUR 5 bhilliún d’iasachtaí lamháltais, ina bhfuil dhá oibríocht cúnaimh macrairgeadais, oibríocht ghearrthéarmach le haghaidh suas le EUR 1 bhilliún agus oibríocht rialta níos meántéarmaí le haghaidh suas le EUR 4 bhilliún, ionstraimí airgeadais, amhail ráthaíochtaí agus ionstraimí cumaisc, a bhfuil sé d’aidhm acu infheistíochtaí poiblí agus príobháideacha a shlógadh chun leasa bhunáite na nÉigipteach agus é mar chuspóir acu siúd infheistíochtaí substaintiúla nua a ghiniúint. Comhlánófar é sin le cláir chun tacú le tosaíochtaí sonracha faoin gComhpháirtíocht Straitéiseach agus Chuimsitheach trí thionscadail aonair agus trí chúnamh teicniúil arna gcur chun feidhme faoin Ionstraim um Chomharsanacht, Forbairt agus Comhar Idirnáisiúnta.

__________________

2 Arna bhunú le Rialachán (AE) 2021/947 ó Pharlaimint na hEorpa agus ón gComhairle an 9 Meitheamh 2021 lena mbunaítear an Ionstraim um Chomharsanacht, Forbairt agus Comhar Idirnáisiúnta - An Eoraip Dhomhanda, lena leasaítear agus lena n-aisghairtear Cinneadh Uimh. 466/2014/AE agus lena n-aisghairtear Rialachán (AE) 2017/1601 agus Rialachán (CE, Euratom) Uimh. 480/2009 ón gComhairle (IO L 209, 14.6.2021, lch. 1)

(9)Tá dúshláin mhóra ag baint le staid mhacraifhioscach na hÉigipte agus tá meath substaintiúil tagtha uirthi le roinnt míonna anuas, ós rud é gur éirigh brúnna seachtracha níos déine agus go bhfuil méadú breise tagtha ar an bhfiachas poiblí, agus tá rioscaí substaintiúla ar an taobh thíos don ionchas eacnamaíoch fós ann. Mar thoradh ar iarmhairtí chogadh na Rúise in aghaidh na hÚcráine agus an teannas geopholaitiúil agus na coinbhleachtaí sa Mheánoirthear, tá eis-sreafaí caipitil fada agus fáltais airgeadra eachtraigh níos ísle ann, go háirithe mar gheall ar ioncam ón turasóireacht, fáltais Chanáil Shuais agus an táirgeadh gáis a bheith ag dul i léig go mór agus mar gheall ar easpa muiníne i measc infheisteoirí eachtracha. Tá sé sin thar a bheith dúshlánach i bhfianaise staid fhioscach dheacair na hÉigipte, arb é is príomhthréith di easnaimh fhioscacha leanúnacha agus cóimheasa fiachais le OTI atá ag dul i méid. D’ainneoin an chomhthéacs sheachtraigh dheacair sin, bhí an Éigipt in ann athchóirithe a chur chun feidhme in 2024, amhail rátaí malairte a aontú agus dul chun cinn a dhéanamh i leith an beartas airgeadaíochta a dhéanamh níos doichte, chun cuidiú leis an gcobhsaíocht mhaicreacnamaíoch a chaomhnú.

(12)Chuaigh an Éigipt i dteagmháil an athuair le CAI go luath in 2024 agus tháinig sí ar chomhaontú ar leibhéal na foirne an 6 Márta 2024 maidir le clár athchóirithe de Shaoráid Fhadaithe Chistiúcháin ar scála suas le USD 8 mbilliún. Rinneadh an chaibidlíocht, ar leibhéal na saineolaithe, ar an gceathrú hathbhreithniú ar chlár athchóirithe eacnamaíoch na hÉigipte a thabhairt i gcrích i Nollaig 2024. Tá sé d’aidhm ag an gclár nua aghaidh a thabhairt ar na réimsí seo a leanas: (1) solúbthacht inchreidte sa ráta malairte, 2) géarú inbhuanaithe ar an mbeartas airgeadaíochta, 3) comhdhlúthú fioscach chun inbhuanaitheacht fiachais a chaomhnú, 4) creat nua chun smacht a choinneáil ar chaiteachas ar bhonneagar, 5) leibhéil leormhaithe caiteachais shóisialta a sholáthar chun grúpaí leochaileacha a chosaint ar an ardú ar an gcostas maireachtála agus ar chostas an fhuinnimh, agus 6) an Beartas Úinéireachta Stáit agus athchóirithe a chur chun feidhme chun cothrom na Féinne a bhaint amach trí fhorbairt na hearnála príobháidí sa gheilleagar a chur chun cinn. In éineacht le síniú an chomhaontaithe ar leibhéal na foirne, d’achtaigh an Éigipt solúbthacht maidir leis an ráta malairte freisin, agus d’ardaigh sí príomhráta beartais an bhainc ceannais go mór le 600 bonnphointe, i gcomhréir le tosaíochtaí chlár CAI.

(16)Ós rud é go bhfuil bearna iarmharach mhór fós sa mhaoiniú seachtrach a mhéid a bhaineann le comhordú íocaíochtaí na hÉigipte, ar bearna í atá go mór os cionn na n-acmhainní a sholáthraíonn CAI agus institiúidí iltaobhacha agus comhpháirtithe réigiúnacha eile, meastar, sna himthosca eisceachtúla atá faoi láthair ann, gur freagairt iomchuí ar iarraidh na hÉigipte ar thacaíocht don chobhsú eacnamaíoch, i gcomhar le clár CAI, atá sa chúnamh macrairgeadais ón Aontas don Éigipt. An pacáiste cúnaimh macrairgeadais ón Aontas, lena n-áirítear cúnamh macrairgeadais suas le EUR 4 bhilliún faoin togra seo, thacódh sé le cobhsú eacnamaíoch agus le clár um athchóiriú struchtúrach na hÉigipte, agus na hacmhainní a cuireadh ar fáil faoi shocrú airgeadais CAI á bhforlíonadh.

(19)Ba cheart don Choimisiún a áirithiú go mbeidh an cúnamh macrairgeadais ón Aontas i gcomhréir, ó thaobh dlí agus substainte de, leis na príomhphrionsabail, príomhchuspóirí agus príomhbhearta a bhaineann le réimsí éagsúla na gníomhaíochta seachtraí agus le beartais ábhartha eile de chuid an Aontais, lena n-áirítear iad sin a bhaineann leis an daonlathas, le cearta an duine agus leis an smacht reachta, i gcomhréir le hAirteagal 2 den Chomhaontú Comhlachais idir AE agus an Éigipt.

(22)Ba cheart go leanfadh an cúnamh macrairgeadais de bheith ina ionstraim eacnamaíoch. Ba cheart, áfach, chun go dtabharfadh an tAontas cúnamh macrairgeadais don Éigipt, go leanfadh an tír de bheith ag déanamh céimeanna nithiúla, inchreidte agus follasacha i dtreo sásraí daonlathacha éifeachtacha a urramú agus a neartú - lena n-áirítear córas parlaiminteach ilpháirtí - chomh maith leis an smacht reachta, agus i dtreo urraim do chearta an duine a ráthú. Ina theannta sin, ba cheart go ndéanfadh cuspóirí sonracha an Aontais ó thaobh cúnamh macrairgeadais de, éifeachtúlacht, trédhearcacht agus cuntasacht na gcóras bainistíochta airgeadais phoiblí san Éigipt a neartú, mar aon le rialachas na hearnála airgeadais san Éigipt a neartú agus maoirseacht a dhéanamh ina leith agus ba cheart athchóirithe struchtúracha atá dírithe ar fhás inbhuanaithe cuimsitheach, cruthú fostaíochta cuibhiúla agus comhdhlúthú fioscach a chur chun cinn. Ba cheart don Choimisiún agus don tSeirbhís Eorpach Gníomhaíochta Seachtraí araon faireachán rialta a dhéanamh ar chomhlíonadh an réamhchoinníll agus ar bhaint amach na gcuspóirí sonracha.

(23)Tá sé ríthábhachtach a chur i bhfios go láidir nach mór don Éigipt an réamhchoinníoll eacnamaíoch is gá maidir le hincháilitheacht a chomhlíonadh. Tá a sócmhainneacht agus a cobhsaíocht airgeadais léirithe ag an Éigipt, nithe atá fíoraithe ag an gCoimisiún. Chun a áirithiú, áfach, go gcosnófar, ar bhealach éifeachtúil, leasanna airgeadais sin an Aontais atá nasctha leis an gcúnamh macrairgeadais ón Aontas, ba cheart don Éigipt bearta iomchuí a dhéanamh a bhaineann le calaois, éilliú agus aon neamhrialtachtaí eile i dtaca leis an gcúnamh a chosc agus a chomhrac. Ina theannta sin, ba cheart forálacha a bheith i gcomhaontú iasachta atá le tabhairt i gcrích idir an Coimisiún agus údaráis na hÉigipte lena n-údaraítear don Oifig Eorpach Frith-Chalaoise (OLAF) imscrúduithe a dhéanamh, lena n-áirítear seiceálacha agus cigireachtaí ar an láthair, i gcomhréir leis na forálacha agus na nósanna imeachta a leagtar síos i Rialachán (AE, Euratom) Uimh. 883/2013 ó Pharlaimint na hEorpa agus ón gComhairle3 agus Rialachán (Euratom, CE) Uimh. 2185/964 ón gComhairle, don Choimisiún agus don Chúirt Iniúchóirí iniúchtaí a dhéanamh agus d’Oifig an Ionchúisitheora Phoiblí Eorpaigh a hinniúlachtaí a fheidhmiú maidir le cúnamh macrairgeadais ón Aontas a sholáthar le linn a tréimhse infhaighteachta agus ina dhiaidh sin.

__________________

3 Rialachán (AE, Euratom) Uimh. 883/2013 ó Pharlaimint na hEorpa agus ón gComhairle an 11 Meán Fómhair 2013 maidir le himscrúduithe arna ndéanamh ag an Oifig Eorpach Frith-Chalaoise (OLAF) agus lena n-aisghairtear Rialachán (CE) Uimh. 1073/1999 ó Pharlaimint na hEorpa agus ón gComhairle agus Rialachán (Euratom) Uimh. 1074/1999 ón gComhairle (IO L 248, 18.9.2013, lch. 1).

4 Rialachán (Euratom, CE) Uimh. 2185/96 ón gComhairle an 11 Samhain 1996 maidir le seiceálacha agus cigireachtaí ar an láthair a dhéanann an Coimisiún chun leasanna airgeadais na gComhphobal Eorpach a chosaint i gcoinne na calaoise agus neamhrialtachtaí eile (IO L 292, 15.11.1996, lch. 2).

(26)Is é an Coimisiún ar cheart dó an cúnamh macrairgeadais ón Aontas a bhainistiú. Chun a áirithiú go mbeidh Parlaimint na hEorpa agus an Chomhairle ábalta cur chun feidhme an Chinnidh seo a leanúint, ba cheart don Choimisiún iad a chur ar an eolas go tráthrialta, trí bhíthin tuarascáil bhliantúil, faoi aon dul chun cinn a dhéanfar i dtaca leis an gcúnamh agus maidir le sásraí daonlathacha éifeachtacha a urramú, de réir na réamhchoinníollacha dá dtagraítear sa Cinneadh seo, agus na doiciméid ábhartha a sholáthar dóibh.

(28)Ba cheart an cúnamh macrairgeadais ón Aontas a bheith faoi réir athchóirithe inbhuanaithe ar an mbeartas eacnamaíoch agus coinníollacha maidir leis an daonlathas, an smacht reachta agus cearta an duine, a bheidh le leagan síos i Meabhrán Tuisceana. Chun coinníollacha aonfhoirmeacha a áirithiú i dtaca leis an gcur chun feidhme agus ar chúiseanna a bhaineann leis an éifeachtúlacht, ba cheart a thabhairt de chumhacht don Choimisiún na coinníollacha sin a chaibidliú le húdaráis na hÉigipte faoi mhaoirseacht choiste ionadaithe na mBallstát i gcomhréir le Rialachán (AE) Uimh. 182/2011. Faoin Rialachán sin, ba cheart feidhm a bheith leis an nós imeachta comhairliúcháin, mar riail ghinearálta, i ngach cás seachas na cásanna dá bhforáiltear sa Rialachán sin. I bhfianaise go bhféadfadh tionchar tábhachtach a bheith ag cúnamh atá níos mó ná EUR 90 milliún, is iomchuí an nós imeachta scrúdúcháin a úsáid le haghaidh oibríochtaí atá os cionn na tairsí sin. I bhfianaise mhéid an chúnaimh macrairgeadais ón Aontas don Éigipt, ba cheart feidhm a bheith ag an nós imeachta scrúdúcháin maidir le glacadh an Mheabhráin Tuisceana, agus maidir le haon chás ina ndéanfaí an cúnamh a laghdú, a chur ar fionraí nó a chur ar ceal.

1.Cuirfidh an tAontas cúnamh macrairgeadais, a bheidh ina iasachtaí lamháltais, EUR 4 bhilliún ar a mhéid ar fáil don Éigipt (‘an cúnamh macrairgeadais ón Aontas’), d’fhonn tacú le cobhsaíocht shocheacnamaíoch na hÉigipte agus le clár substainteach um athchóiriú struchtúrach, mar aon lena freagracht éifeachtaí na himirce neamhrialta a mhaolú agus sreabha imirce a bhainistiú. Tá scaoileadh chúnamh macrairgeadais an Aontais faoi réir formheas a fháil ó Pharlaimint na hEorpa agus ón gComhairle le haghaidh bhuiséad an Aontais le haghaidh na bliana ábhartha. Rannchuideoidh an cúnamh le riachtanais chomhardú íocaíochtaí na hÉigipte mar a shainaithnítear i gclár an Chiste Airgeadaíochta Idirnáisiúnta a chumhdach.

1.Beidh mar réamhchoinníoll chun an cúnamh macrairgeadais ón Aontas a thabhairt don Éigipt go leanfadh an tír de bheith ag déanamh céimeanna nithiúla agus inchreidte i dtreo sásraí daonlathacha éifeachtacha a urramú agus a neartú – lena n-áirítear córas parlaiminteach ilpháirtí – chomh maith leis an smacht reachta, agus go leanfadh sí d’iarrachtaí a dhéanamh chun a ráthú go n-urramófar cearta an duine.

2.Déanfaidh seirbhísí an Choimisiúin agus an tSeirbhís Eorpach Gníomhaíochta Seachtraí faireachán ar chomhlíonadh an réamhchoinníll sin le linn shaolré an chúnaimh macrairgeadais ón Aontas agus tabharfaidh siad tuarascáil, go rialta agus i scríbhinn, do Pharlaimint na hEorpa agus don Chomhairle ar chomhlíonadh na gcoinníollacha beartais eacnamaíoch agus airgeadais a leagtar amach sa Mheabhrán Tuisceana.

1.I gcomhréir leis an nós imeachta scrúdúcháin dá dtagraítear in Airteagal 7(2), comhaontóidh an Coimisiún i gcomhar le húdaráis na hÉigipte coinníollacha dea-shainithe airgeadais agus coinníollacha dea-shainithe beartais eacnamaíoch, lena ndíreofar ar athchóirithe struchtúracha, amhail an t-athchóiriú nua ar an Nós Imeachta Coiriúil, agus airgeadas poiblí fónta, coinníollacha a mbeidh an cúnamh macrairgeadais ón Aontas faoina réir, agus a leagfar síos i Meabhrán Tuisceana (‘an Meabhrán Tuisceana’) ina mbeidh creat ama chun na hathchóirithe sin a bhaint amach. Beidh na coinníollacha airgeadais agus na coinníollacha beartais eacnamaíoch a leagfar síos sa Mheabhrán Tuisceana i gcomhréir leis na comhaontuithe nó na comhthuiscintí dá dtagraítear in Airteagal 1(3), lena n-áirítear an coigeartú maicreacnamaíoch agus na cláir um athchóiriú struchtúrach arna gcur chun feidhme ag an Éigipt le tacaíocht ó CAI.

2.Beidh sé d’aidhm ag na coinníollacha beartais eacnamaíoch agus airgeadais dá dtagraítear i mír 1, go háirithe, éifeachtúlacht, trédhearcacht agus cuntasacht na gcóras bainistíochta airgeadais phoiblí san Éigipt a fheabhsú, lena n-áirítear i dtaca leis an gcúnamh macrairgeadais ón Aontas a úsáid. Nuair a bheidh bearta beartais á gceapadh, tabharfar aird chuí freisin ar an dul chun cinn i leith oscailt fhrithpháirteach an mhargaidh, lena n-áirítear i gcomhair FBManna, ar fhorbairt trádála riailbhunaithe agus cothroime, ar an bhforbairt inbhuanaithe, ar dhea-rialachas agus ar thosaíochtaí eile i gcomhthéacs bheartas seachtrach an Aontais. Déanfaidh an Coimisiún faireachán go tráthrialta ar an dul chun cinn atá á dhéanamh maidir leis na cuspóirí sin a bhaint amach.

(c)na coinníollacha beartais eacnamaíoch, na coinníollacha airgeadais, agus coinníollacha an daonlathais, an smacht reachta agus chearta an duine, a comhaontaíodh sa Mheabhrán Tuisceana a chur chun feidhme go sásúil.

4.I gcás nach gcomhlíontar na coinníollacha dá dtagraítear i mír 3, déanfaidh an Coimisiún eisíoc an chúnaimh macrairgeadais ón Aontas a chur ar fionraí go sealadach nó a chur ar ceal. Sna cásanna sin, cuirfidh sé in iúl do Pharlaimint na hEorpa agus don Chomhairle gan mhoill na cúiseanna a bhí aige leis an bhfionraí nó leis an gcealú.

1.Chun tacaíocht faoin gcúnamh macrairgeadais i bhfoirm iasachtaí a mhaoiniú, tabharfar de chumhacht don Choimisiún, thar ceann an Aontais, na cistí is gá a fháil ar iasacht ar na margaí caipitil nó ó institiúidí airgeadais i gcomhréir le hAirteagal 223 de Rialacháin (AE, Euratom) 2024/2509.

2.Déanfaidh an Coimisiún comhaontú iasachta leis an Éigipt maidir leis an méid dá dtagraítear in Airteagal 1. Leagfar síos téarmaí mionsonraithe na tacaíochta faoin gcúnamh macrairgeadais i bhfoirm iasachtaí i gcomhaontú iasachta i gcomhréir le hAirteagal 223 den Rialachán Airgeadais, a bheidh le tabhairt i gcrích idir an Coimisiún agus údaráis na hÉigipte. Leagfar síos sa chomhaontú iasachta an tréimhse infhaighteachta agus téarmaí mionsonraithe na tacaíochta faoin gcúnamh macrairgeadais i bhfoirm iasachtaí, lena n-áirítear iasachtaí i ndáil leis na córais rialaithe inmheánaigh. Aisíocfaidh an Éigipt an iasacht, a dheonófar ar théarmaí a fhágfaidh go bhféadfar í a aisíoc thar thréimhse fhada, lena n-áirítear, tar éis fógra foirmiúil a thabhairt do Pharlaimint na hEorpa agus don Chomhairle, tréimhse chairde fhéideartha. 35 bliana a bheidh i ré uasta na n-iasachtaí. Cuirfidh an Coimisiún Parlaimint na hEorpa agus an Chomhairle ar an eolas faoi fhorbairtí i dtaca leis na hoibríochtaí dá dtagraítear i mír 3.

1.Cuirfear an cúnamh macrairgeadais ón Aontas chun feidhme i gcomhréir le Rialachán (AE, Euratom) Uimh. 2024/2509 ó Pharlaimint na hEorpa agus ón gComhairle7.

_________________

7 Rialachán (AE, Euratom) 2024/2509 ó Pharlaimint na hEorpa agus ón gComhairle an 23 Meán Fómhair 2024 maidir leis na rialacha airgeadais is infheidhme maidir le buiséad ginearálta an Aontais (IO L, 2024/2509, 26.9.2024, ELI: http://data.europa.eu/eli/reg/2024/2509/oj).

(b)déanfar staid eacnamaíoch agus ionchais eacnamaíocha na hÉigipte a mheasúnú, mar aon leis an dul chun cinn arna dhéanamh i leith na bearta beartais dá dtagraítear in Airteagal 2 agus in Airteagal 3(1) a chur chun feidhme;

(c)sonrófar an nasc idir athchóirithe na hÉigipte ar an mbeartas eacnamaíoch faoin Meabhrán Tuisceana, a feidhmíocht fhioscach, agus scaoileadh an chúnaimh macrairgeadais ón Aontas, agus na céimeanna arna nglacadh i leith sásraí daonlathacha, i leith an smachta reachta agus i leith chearta an duine á leagan amach ag an am céanna.