1.Jaqbel mal-Kummissjoni li l-kundizzjonijiet stabbiliti fl-Artikolu 4(2), il-punt (a), tar-Regolament dwar il-FEG huma ssodisfati u li l-Belġju huwa intitolat għal kontribuzzjoni finanzjarja ta’ EUR 7 999 015 skont dak ir-Regolament, somma li tirrappreżenta 85 % tal-kost totali ta’ EUR 9 410 607, liema kost jinkludi n-nefqa għal servizzi personalizzati ta’ EUR 9 034 607 u n-nefqa għall-attivitajiet ta’ tħejjija, ġestjoni, informazzjoni u riklamar, kontroll u rapportar ta’ EUR 376 000;

2.Jinnota li l-awtoritajiet Belġjani ressqu l-applikazzjoni fid-29 ta’ Ottubru 2024 u li, wara li l-Belġju ta informazzjoni addizzjonali, il-Kummissjoni ffinalizzat il-valutazzjoni tagħha fis-26 ta’ Marzu 2025 u nnotifikatha lill-Parlament fl-istess jum;

3.Jinnota li l-applikazzjoni hija relatata ma’ 2 411-il ħaddiem li ngħataw is-sensja fil-kumpanija Van Hool; jinnota wkoll li b’kollox 2 397 ħaddiem se jkunu benefiċjarji fil-mira;

4.Jissottolinja li s-settur industrijali bħalissa sejjer lura fil-Belġju skont il-Federazzjoni tal-Intrapriżi Belġjani (VBO); jinnota li s-settur industrijali tradizzjonalment żvolġa rwol importanti f’Lier u huwa għalhekk li t-tnaqqis industrijali qed ikollu impatt sinifikanti fuq is-suq tax-xogħol ta’ Lier; jenfasizza li l-għadd ta’ impjiegi industrijali disponibbli f’Lier naqas bi 13 % fl-2023;

5.Jirrimarka li terz tal-profili tal-ħaddiema ssensjati għandhom 50 sena jew aktar u 80 % għandhom edukazzjoni sekondarja jew anqas u ħiliet skaduti; jisħaq li meta titqies ix-xejra ta’ tnaqqis fil-postijiet tax-xogħol vakanti u d-distribuzzjoni ġeografika tagħhom, il-ħaddiema se jkollhom bżonn assistenza mmirata li tiffoka fuq it-titjib tal-ħiliet u t-taħriġ mill-ġdid biex iżidu l-possibbiltajiet tagħhom li jirritornaw għax-xogħol; iqis li hija responsabbiltà soċjali tal-Unjoni u tal-Istati Membri li jipprovdu lill-ħaddiema affettwati l-possibbiltà li jiksbu l-kwalifiki meħtieġa għal impjieg futur;

6.Jilqa’ l-fatt li s-servizzi personalizzati li se jiġu pprovduti lill-ħaddiema jikkonsistu mill-azzjonijiet li ġejjin: konsulent għall-intervent soċjali u r-reġistrazzjoni tal-ħaddiema, ir-rikollokament, l-appoġġ għat-tiftix ta’ impjieg u l-kollokament f’impjieg, il-gwida vokazzjonali, it-taħriġ mill-ġdid u t-taħriġ vokazzjonali, kif ukoll it-taħriġ fuq il-post tax-xogħol; jenfasizza b’mod speċjali s-servizzi relatati ma’ appoġġ immirat u valutazzjoni personali, kif ukoll taħriġ fl-ICT li jikkontribwixxi għat-titjib tal-ħiliet meħtieġa fl-era industrijali diġitali;

7.Jinnota li l-Belġju beda joffri servizzi personalizzati lill-benefiċjarji fil-mira fit-22 ta’ April 2024 u li, għalhekk, il-perjodu ta’ eleġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni ta’ finanzjament;

8.Jinnota li l-Belġju beda jġarrab nefqa amministrattiva biex jimplimenta l-FEG fl-14 ta’ Marzu 2024 u li, għalhekk, tali nefqa għandha tkun eleġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni ta’ finanzjament;

9.Jisħaq li l-awtoritajiet Belġjani kkonfermaw li l-prinċipji tat-trattament ugwali u tan-nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

10.Ifakkar li l-awtoritajiet Belġjani għandhom jiżguraw li l-ugwaljanza bejn l-irġiel u n-nisa u l-integrazzjoni tal-perspettiva tal-ġeneru jkunu parti integrali tal-implimentazzjoni u jiġu promossi matul il-perjodu ta’ implimentazzjoni;

11.Itenni li l-assistenza mill-FEG ma tridx tissostitwixxi azzjonijiet li huma r-responsabbiltà tal-kumpaniji, bis-saħħa tal-liġi nazzjonali jew tal-ftehimiet kollettivi;

12.Ifakkar li l-awtoritajiet Belġjani għandhom jirrikonoxxu l-oriġini u jiżguraw il-viżibbiltà tal-finanzjament tal-Unjoni u jenfasizzaw il-valur miżjud tal-Unjoni tal-intervent, billi jipprovdu informazzjoni koerenti, effettiva u mmirata lejn udjenzi multipli, inkluża informazzjoni mmirata lejn il-benefiċjarji, l-awtoritajiet lokali u reġjonali, is-sħab soċjali, il-media u l-pubbliku;

13.Japprova d-deċiżjoni annessa ma’ din ir-riżoluzzjoni;

14.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

15.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.