1.Jilqa’ u jappoġġja bil-qawwa t-tħabbira tal-President von der Leyen fil-Linji Gwida Politiċi għall-Kummissjoni li Jmiss (2024-2029) dwar il-preżentazzjoni ta’ Strateġija Ewropea għar-Reżiljenza tal-Ilma li tindirizza l-effiċjenza, l-iskarsezza u t-tniġġis tal-ilma kif ukoll ir-riskji relatati mal-ilma, kif ukoll ir-rikonoxximent li l-ilma huwa riżorsa indispensabbli li qiegħda tkun dejjem aktar taħt stress mit-tibdil fil-klima u d-domandi dejjem akbar;

2.Jemmen li, waqt l-implimentazzjoni tal-leġiżlazzjoni, il-kompetittività ekonomika għandha titqies f’konformità mal-Boxxla għall-Kompetittività; jappella għall-implimentazzjoni tal-leġiżlazzjoni ambjentali tal-UE sabiex tinbena Ewropa reżiljenti u kompetittiva, jittaffa u jsir adattament għat-tibdil fil-klima, jitwaqqaf it-telf tal-bijodiversità, jiġi evitat it-tniġġis, tiġi żgurata s-sigurtà tal-ikel, jiġu limitati l-użu tar-riżorsi u l-ħela, u jsir sforz lejn użu effiċjenti tar-riżorsi, inkluż tal-ilma, filwaqt li jitqiesu l-prinċipju ta’ prekawzjoni, il-prinċipju ta’ kontroll tas-sors u l-prinċipju ta’ min iniġġes iħallas; jenfasizza l-fatt li d-disponibbiltà tal-ilma għandha impatt fuq il-kwantità, il-kwalità, il-varjetà, u d-disponibbiltà staġjonali tal-ikel li jista’ jiġi prodott;

3.Jappella lill-UE tintegra l-impenji tagħha għad-Djalogu ta’ Baku dwar l-Ilma tal-COP29 għall-Azzjoni Klimatika u l-Konferenza dwar l-Ilma 2023 tan-NU fid-dimensjoni internazzjonali tal-Istrateġija;

4.Jisħaq fuq il-ħtieġa urġenti li jittejbu r-reżiljenza u l-ġestjoni tal-ilma, sabiex jiġu żgurati provvisti sostenibbli tal-ilma ħelu għan-nies, l-ekonomija u l-ambjent; jenfasizza li l-Istrateġija Ewropea għar-Reżiljenza tal-Ilma għandha tiġi żviluppata f’koordinazzjoni mal-Patt Ewropew dwar l-Oċeani, filwaqt li jiġi żgurat approċċ koeżiv u integrat għall-ġestjoni tar-riżorsi tal-ilma ħelu u tal-oċeani, jiġu indirizzati l-isfidi interkonnessi, tissaħħaħ il-kompetittività u tiġi promossa l-ġestjoni sostenibbli tal-ilma fl-ambjenti interni u tal-baħar, filwaqt li jiġi żgurat approċċ olistiku “mis-sors għall-baħar”;

5.Jinsisti fuq il-ħtieġa ta’ Strateġija Ewropea għar-Reżiljenza tal-Ilma komprensiva u olistika li tintegra l-aspetti tal-kwalità, il-kwantità, is-sigurtà, l-infrastruttura, it-teknoloġija u l-ġestjoni tal-ilma u tinkludi r-restawr taċ-ċiklu tal-ilma bħala element ewlieni, peress li tirfed l-attivitajiet ekonomiċi, tiżgura d-disponibbiltà tar-riżorsi u tikkontribwixxi għar-regolamentazzjoni tal-klima;

6.Jisħaq fuq l-importanza tal-provvista tal-ilma, b’mod partikolari l-ilma tax-xorb, kif ukoll is-sigurtà tal-provvista tal-ilma; jirrimarka li l-proġetti kollha ta’ restawr ambjentali għandhom iqisu l-aspetti tas-sigurtà tal-ilma, filwaqt li jipprijoritizzaw soluzzjonijiet li mhux biss jipprovdu benefiċċji ambjentali, iżda jiggarantixxu wkoll il-provvista u l-ġestjoni effiċjenti tal-ilma; jenfasizza, barra minn hekk, li l-miżuri ta’ restawr ekoloġiku għandhom jitwettqu f’sinerġija mal-iżvilupp tal-potenzjal tal-enerġija rinnovabbli tal-UE u ma għandux ikollhom impatt fuq ir-reżiljenza ġenerali tal-enerġija;

7.Jirrakkomanda li fl-istrateġija jiġu inklużi l-lagi u ħabitats oħra dipendenti mill-ilma ħelu, flimkien ma’ xmajjar, l-ilmijiet ta’ tranżizzjoni, u l-ilma ta’ taħt l-art, bħala komponenti essenzjali tal-isforzi tal-UE għar-reżiljenza tal-ilma;

8.Jisħaq fuq l-ħtieġa urġenti li jittejbu s-sistemi għat-twissija tal-kriżijiet fir-rigward ta’ inċidenti b’ilma tqil, kif ukoll biex jittejbu l-miżuri ta’ prevenzjoni;

9.Jistieden lill-Kummissjoni tippreżenta pjan Ewropew ta’ adattament għall-klima, inklużi proposti u azzjonijiet leġiżlattivi konkreti, b’mod partikolari fir-rigward tar-reżiljenza tal-infrastruttura, il-ġestjoni tal-ilma u soluzzjonijiet ibbażati fuq in-natura, filwaqt li tipprijoritizza l-protezzjoni ta’ komunitajiet vulnerabbli, biex l-UE ssir aktar reżiljenti u tmexxi bl-eżempju;

10.Itenni li l-aċċess għall-ilma tax-xorb nadif u sikur u għas-sanità huwa dritt tal-bniedem; jenfasizza li dan id-dritt irid jiġi żgurat b’mod inekwivoku, fejn kulħadd ikollu aċċess għal servizzi tal-ilma affordabbli u ta’ kwalità tajba, inklużi dawk li jgħixu fuq gżejjer u f’reġjuni ultraperiferiċi;

11.Jisħaq li ħadd, kemm f’postijiet pubbliċi jew fi stabbilimenti privati, ma għandu jiġi mċaħħad l-aċċess għal ilma fornut minn network ta’ distribuzzjoni maħsub għall-konsum mill-bniedem, fejn disponibbli;

12.Jinnota li l-attivitajiet industrijali u l-produzzjoni agrikola jirrikjedu l-ilma biex jipproduċu l-prodotti finali tagħhom jew biex jappoġġjaw l-attivitajiet ta’ produzzjoni, bl-ammont ta’ ilma użat ivarja skont it-tip ta’ attività; jenfasizza l-fatt li l-iżgurar tal-kompetittività u l-awtonomija strateġika tal-Ewropa jirrikjedi soċjetà intelliġenti fl-użu tal-ilma fejn it-teknoloġija u d-data jsaħħu ekonomija ċirkolari, filwaqt li jrawmu prattiki sostenibbli u effiċjenti fl-użu tal-ilma; jistieden lill-atturi rilevanti kollha jaċċelleraw it-tranżizzjoni lejn industrija ċirkolari u agrikoltura effiċjenti fl-użu tal-ilma billi jippromwovu u jinvestu f’soluzzjonijiet innovattivi, bħal għodod u teknoloġiji diġitali, irkupru tar-riżorsi, il-produzzjoni ta’ enerġija rinnovabbli, infrastruttura, soluzzjonijiet ibbażati fuq in-natura u għodod ta’ governanza inklużivi;

13.Iħeġġeġ lill-Kummissjoni tintegra d-dimensjoni tal-ilma fil-politiki interni u esterni tal-UE permezz ta’ approċċ transsettorjali sabiex tiżgura li r-reżiljenza, is-sostenibbiltà u s-sigurtà tal-ilma jkunu integrati fin-nisġa tal-politiki Ewropej; jistieden lill-Kummissjoni, b’mod partikolari, twettaq valutazzjoni relatata mal-ilma ta’ kwalunkwe miżura regolatorja, inkluż dik relatata moal-enerġija, bħala parti mill-valutazzjoni tal-impatt soċjoekonomiku u ambjentali; jenfasizza li l-valutazzjoni ta’ kif kull politika tal-UE, u l-proġetti u l-infrastruttura kollha ffinanzjati mill-fondi tal-UE, jista’ jkollhom impatt fuq ir-riżorsi tal-ilma f’termini ta’ kwantità, kwalità u aċċessibbiltà tiżgura li r-reżiljenza tal-ilma tkun pedament tal-formulazzjoni u l-implimentazzjoni tal-politika, u b’hekk il-paradigma tiġi ttrasferita mit-trattament tal-ilma bħala riżorsa infinita għar-rikonoxximent tal-valur intrinsiku tiegħu għall-umanità u l-pajsaġġ ekoloġiku u soċjoekonomiku tal-UE u l-kompetittività tagħha;

14.Jisħaq li l-użu effiċjenti tal-ilma huwa essenzjali għall-preservazzjoni tar-riżorsi tal-ilma tal-UE u li l-effiċjenza fl-użu tal-ilma għandha tkun objettiv ewlieni tal-UE; jappella, f’dan ir-rigward, għal tnaqqis konsegwenzjali fid-domanda għall-ilma, inkluż billi jiġu indirizzati l-livelli eċċessivi ta’ tnixxija, isir investiment fir-riċerka u fis-soluzzjonijiet innovattivi, jiġu mmodernizzati l-proċessi industrijali u ta’ produzzjoni, tittejjeb l-infrastruttura tal-ilma, jiġu ġestiti r-riżorsi tal-ilma u d-domanda massima b’mod sostenibbli, jiġu prijoritizzati l-użi u jiġi żgurat li effiċjenza ogħla fl-użu tal-ilma tirriżulta fi tnaqqis fil-konsum ġenerali tal-ilma ħelu kif ukoll f’żieda fid-disponibbiltà tal-ilma f’żoni taħt stress tal-ilma fil-livelli lokali u reġjonali; jemmen li ż-żoni affettwati min-nixfa fit-tul u d-deżertifikazzjoni għandhom jingħataw prijorità;

15.Jappella għal qafas leġiżlattiv li jistabbilixxi miri settorjali għall-effiċjenza fl-użu tal-ilma u l-estrazzjoni tal-ilma, abbażi ta’ valutazzjonijiet aġġornati tad-disponibbiltà tal-ilma u r-riskji klimatiċi, inkluż approċċ għall-valutazzjoni tal-ilma li jqis is-servizzi tal-ekosistema u s-sostenibbiltà fit-tul, u li jkopri l-użi kollha tal-ilma, inklużi l-industrija, l-enerġija, l-agrikoltura, l-istituzzjonijiet pubbliċi u l-unitajiet domestiċi; jissottolinja l-fatt li dawn il-miri għandhom ikunu ambizzjużi iżda adattabbli, filwaqt li jitqiesu ċ-ċirkostanzi speċifiċi u l-progress li diġà sar minn kull Stat Membru biex jiġu żgurati sforzi kontinwi lejn il-kisbiet fl-effiċjenza fir-reġjuni kollha; jisħaq fuq l-importanza ta’ prattiki effiċjenti u uniformi ta’ ġbir ta’ data madwar l-Istati Membri u s-setturi kollha, inkluż permezz tal-użu ta’ teknoloġiji innovattivi, li jinkludu punti ta’ ġbir ta’ data f’ħin reali għal aktar trasparenza dwar il-konsum tal-ilma; jenfasizza l-ħtieġa li titwettaq valutazzjoni xierqa tal-impatti ambjentali u soċjoekonomiċi tal-użu tal-ilma; jisħaq li l-importanza strateġika tal-produzzjoni tal-ikel ma tridx tiġi kompromessa; jenfasizza li x-xjenza, ir-riċerka u t-teknoloġija huma importanti għall-effiċjenza fl-użu tal-ilma u għall-użu tal-ilma kif ukoll għall-ekonomija ċirkolari f’dan ir-rigward; jappella għall-ħolqien u għall-promozzjoni ta’ sistemi ta’ irrigazzjoni intelliġenti ġodda u ta’ prestazzjoni għolja, għaż-żamma tal-ilma tax-xita u għall-użu ta’ ilma mill-ġdid, kif ukoll għal sistemi ta’ irrigazzjoni effiċjenti fl-użu tal-ilma;

16.Itenni l-ħtieġa li tiġi żviluppata metodoloġija komuni tal-UE biex jiġu stabbiliti miri għall-effiċjenza fl-użu tal-ilma u għall-estrazzjoni tal-ilma biex jiġi żgurat l-użu sostenibbli tar-riżorsi disponibbli tal-ilma rinnovabbli f’qafas ta’ ġestjoni integrat għar-riżorsi tal-ilma li jqis kif xieraq ir-rabtiet lil hinn mis-settur tal-ilma permezz tar-rabta ilma-enerġija-ikel-ekosistemi, u b’hekk dawk li jieħdu d-deċiżjonijiet u l-atturi ekonomiċi jkunu jistgħu jippjanaw l-investiment meħtieġ biex jiżguraw is-sigurtà tal-provvista tal-ilma b’mod dejjem aktar sostenibbli, filwaqt li jitqiesu kif xieraq il-karatteristiċi tal-korpi tal-ilma kkonċernati;

17.Jappella għall-kollaborazzjoni mill-qrib dwar l-ippjanar integrat tal-enerġija u tar-riżorsi tal-ilma u t-teknoloġiji relatati fis-setturi kollha fil-livell nazzjonali, reġjonali u lokali, kif ukoll bejn il-partijiet ikkonċernati kollha, sabiex jiġu stabbiliti mekkaniżmi biex tiġi żgurata l-koerenza tal-politika fis-setturi tal-ilma u l-enerġija;

18.Jistieden lill-Kummissjoni tressaq politika komprensiva dwar il-ġestjoni sostenibbli tal-ilma għall-industrija bbażata fuq it-tnaqqis, l-irkupru, l-użu mill-ġdid u r-riċiklaġġ, inkluża enfasi fuq l-użu ta’ teknoloġiji effiċjenti fl-użu tal-ilma u ċirkolari, ir-riċiklaġġ tal-ilma, strateġiji għat-tnaqqis tas-sustanzi niġġiesa u l-promozzjoni ta’ sistemi b’ċirkwit magħluq;

19.Ifakkar li t-theddida dejjem akbar tal-iskarsezza tal-ilma qed tipperikola l-industriji u l-proġetti li huma essenzjali biex tiġi xprunata l-kompetittività tal-Ewropa, inklużi s-semikondutturi, iċ-ċentri tad-data, l-idroġenu rinnovabbli u l-produzzjoni tal-batteriji tal-vetturi elettriċi; jinnota li dawn l-industriji se jkunu qed jiffaċċjaw pressjoni dejjem akbar biex inaqqsu l-impatt ambjentali tagħhom u jtejbu l-effiċjenza tar-riżorsi tal-ilma, inkluż kemm l-użu dirett kif ukoll indirett tal-ilma; jistieden lill-Istati Membri jappoġġjaw lill-industriji li jużaw ħafna ilma fit-twaqqif ta’ pjanijiet ta’ effiċjenza fl-użu tal-ilma li għandhom l-għan li jiffrankaw, jużaw mill-ġdid u jirriċiklaw l-ilma, il-prevenzjoni tat-tniġġis tal-ilma u l-implimentazzjoni ta’ teknoloġiji effiċjenti fl-użu tal-ilma; jistieden lill-Kummissjoni Ewropea tinkorpora strateġiji komprensivi ta’ ġestjoni tal-ilma fil-politiki industrijali rilevanti tal-UE u fil-perkorsi ta’ tranżizzjoni speċifiċi għas-settur, b’enfasi partikolari fuq setturi strateġiċi li jużaw ħafna ilma;

20.Jisħaq li l-għarfien, id-data, ir-riċerka u t-teknoloġija huma importanti għall-użu effiċjenti tal-ilma; jappella biex jingħata appoġġ finanzjarju u tekniku adegwat lill-Istati Membri biex jimplimentaw miżuri effiċjenti ta’ ġestjoni tal-ilma, inkluż permezz ta’ teknoloġiji innovattivi u moderni;

21.Jilqa’ r-rakkomandazzjonijiet tar-rapport finali tad-Djalogu Strateġiku dwar il-futur tal-agrikoltura tal-UE li jissottolinja li l-prattiki tal-biedja sostenibbli u l-mudelli kummerċjali ġodda jeħtieġ li jiżdiedu biex jiġi promoss użu aktar effiċjenti tar-riżorsi naturali, speċjalment l-ilma;

22.Jappella għat-tranżizzjoni lejn mudell tal-biedja aktar sostenibbli u kompetittiv, megħjun mill-implimentazzjoni ta’ prattiki sostenibbli u soluzzjonijiet innovattivi li jippromwovu l-bijodiversità, inaqqsu l-inputs kimiċi u jippermettu li r-riżorsi tal-ilma jiġu ġestiti b’mod effiċjenti, inklużi soluzzjonijiet ibbażati fuq in-natura, il-ġestjoni riġenerattiva, it-teknoloġiji intelliġenti ta’ tisqija bi preċiżjoni, is-sistemi ta’ monitoraġġ diġitali, il-metodi ta’ trattament avvanzati u n-networks intelliġenti tad-distribuzzjoni tal-ilma, l-ottimizzazzjoni tal-konsum u l-prevenzjoni tat-tnaqqis tar-riżorsi tal-ilma, u li jgħinu biex tiġi żgurata produttività kontinwa filwaqt li jippermettu lill-agrikoltura tnaqqas it-tniġġis, tuża l-pestiċidi u l-fertilizzanti b’mod effiċjenti, ittejjeb iċ-ċiklu idroloġiku, ittejjeb ir-riforniment tal-ilma ta’ taħt l-art u tadatta għal użu aktar baxx tal-ilma; iqis li s-soluzzjonijiet teknoloġiċi jistgħu jinkludu wkoll miżuri li jistgħu jżidu l-assorbiment, l-infiltrazzjoni u ż-żamma tal-ilma fis-sistemi agrikoli, li huma importanti fost żieda fl-okkorrenzi kemm ta’ nixfa kif ukoll ta’ xita qawwija;

23.Jirrimarka li soluzzjonijiet u prattiki ta’ irrigazzjoni innovattivi jistgħu jtejbu l-effiċjenza tal-ilma fl-agrikoltura, billi jiksbu vantaġġ ekonomiku filwaqt li jnaqqsu wkoll il-piż ambjentali; jinnota li l-bdiewa ġeneralment ma għandhomx mezzi u inċentivi biżżejjed biex ikunu jafu dwar l-użu tal-ilma mill-għelejjel, l-applikazzjonijiet reali tal-irrigazzjoni, ir-risponsi ta’ rendiment tal-għelejjel għal prattiki differenti ta’ ġestjoni tal-ilma, u għalhekk il-livelli attwali tal-effiċjenza tal-ilma fl-azjendi agrikoli; jistieden lill-Kummissjoni u lill-Istati Membri jinċentivaw l-użu u l-appoġġ taż-żamma tas-soluzzjonijiet ta’ irrigazzjoni innovattivi bħat-tisqija bil-qatra li jippermettu ġestjoni attiva tal-livelli tal-ilma u l-użu effiċjenti tar-riżorsi tal-ilma, kif ukoll jippromwovu skambju kontinwu ta’ għarfien sabiex il-partijiet ikkonċernati rilevanti kollha jkunu jistgħu jaqsmu responsabbiltà akbar tul il-katina kollha tal-provvista tal-ilma;

24.Ifakkar li l-użu ta’ nutrijenti bħan-nitrat u l-fosfat huwa essenzjali għall-produzzjoni tal-ikel, peress li din l-attività ma tkunx possibbli mingħajr l-użu tagħhom; jirrakkomanda kunsiderazzjoni aħjar taċ-ċiklu tan-nutrijenti fil-produzzjoni agrikola u l-isfruttament tal-valur fl-ilma mormi urban; jappella għal aktar riċerka dwar l-użu effettiv tan-nutrijenti u l-iżvilupp ta’ teknoloġiji għall-irkupru tan-nutrijenti, sabiex titnaqqas id-dipendenza tal-Unjoni fuq materja prima importata; jirrikonoxxi l-potenzjal għoli għall-irkupru tan-nutrijenti mill-ilma u jistieden lill-Istati Membri jappoġġjaw lis-settur agrikolu biex jottimizzaw il-konsum tan-nutrijenti tagħhom inkluż bl-użu ta’ riżorsi (nitrati u fosforu) irkuprati mill-impjanti tat-trattament tal-ilma mormi; jistieden lill-Kummissjoni tipproponi pjan ta’ azzjoni għall-ġestjoni integrata tan-nutrijenti sabiex tindirizza b’mod effettiv it-telf ta’ inputs agrikoli prezzjużi, ir-riċiklaġġ tan-nutrijenti, it-tniġġis minn nutrijenti u l-ineffiċjenzi fiċ-ċiklu tan-nutrijenti; jappella għall-irkupru xieraq u sikur tal-fosforu minn sorsi organiċi u għall-inċentivar tal-investimenti fl-irkupru tiegħu u l-ġestjoni ċirkolari tan-nutrijenti f’konformità mal-pubblikazzjoni tal-JRC tal-Kummissjoni1a Rapport tal-JRC dwar ix-Xjenza għall-Politika tal-Kummissjoni Ewropea, “Technical proposals for the safe use of processed manure above the threshold established for Nitrate Vulnerable Zones by the Nitrates Directive (91/676/EEC)” (Proposti tekniċi għall-użu sikur ta’ demel ipproċessat ’il fuq mil-limitu stabbilit għaż-Żoni Vulnerabbli għan-Nitrati mid-Direttiva dwar in-Nitrati (91/676/KEE)), 2020.;

25.Jisħaq li d-Direttiva attwali dwar in-Nitrati għandha tiġi riveduta, peress li d-dispożizzjonijiet skaduti jippromwovu l-użu ta’ fertilizzanti artifiċjali aktar milli d-demel organiku; jappella biex isir rieżami urġenti tad-Direttiva dwar in-Nitrati qabel ma tintemm din is-sena, u li ssir ir-reviżjoni tagħha biex tiġi promossa l-ġestjoni ċirkolari tan-nutrijenti;

26.Jenfasizza, f’konformità mar-rapport finali tad-Djalogu Strateġiku dwar il-futur tal-agrikoltura fl-UE, il-ħtieġa li tiġi appoġġjata t-tranżizzjoni għal varjetajiet ta’ għelejjel u żrieragħ adattati għar-reġjun u l-bidla għal għelejjel differenti, b’anqas ilma meħtieġ u reżistenza akbar għan-nixfa, kif ukoll il-ħtieġa li tiġi appoġġjata l-adozzjoni ta’ prattiki xierqa ta’ ġestjoni tal-ħamrija; iqis il-ħtieġa għal appoġġ aktar b’saħħtu għar-riċerka xjentifika u għall-iżvilupp teknoloġiku relatat mat-tnissil ta’ speċijiet ġodda, biex il-produzzjoni u l-provvista tal-prodotti tal-ikel ikunu jistgħu jiġu diversifikati u tittejjeb il-kwalità tagħhom, filwaqt li jgħolli l-livell ta’ protezzjoni għas-saħħa tal-bniedem u għall-ambjent; jinnota l-potenzjal tal-varjetajiet tal-pjanti li huma aktar reżistenti għall-istress tal-ilma u għall-pesti u li jista’ jkollhom rwol fit-tnaqqis tal-użu tal-ilma u li jistgħu jnaqqsu l-impronta ambjentali tal-għelejjel;

27.Jappella għal appoġġ finanzjarju u tekniku għall-bdiewa u għall-komunitajiet rurali, b’mod partikolari f’żoni taħt stress tal-ilma, biex jiġu mgħejuna biex jadottaw prattiki sostenibbli tal-ġestjoni tal-art li jtejbu l-kwalità tal-ħamrija u tal-ilma, jikkontribwixxu għall-bijodiversità u jimmitigaw it-tibdil fil-klima; jenfasizza l-ħtieġa li tingħata attenzjoni speċjali lir-reġjuni li huma partikolarment vulnerabbli għad-degradazzjoni tal-ħamrija u l-iskarsezza tal-ilma;

28.Jirrikonoxxi l-isforzi sinifikanti li twettqu mill-bdiewa biex itejbu l-kwalità tal-ilma u jenfasizza l-ħtieġa ta’ perjodu ta’ żmien xieraq li jippermetti li l-effetti ta’ dawn il-miżuri jiġu vvalutati bir-reqqa;

29.Jindika s-suċċess tas-Sħubija Ewropea għall-Innovazzjoni Grupp Fokali tal-Agroforestrija EIP-AGRI u jappella għall-kontinwazzjoni tal-iskambju tal-għarfien, l-għarfien espert u t-tagħlim bejn il-pari permezz tan-Network tal-Politika Agrikola Komuni (PAK) tal-UE;

30.Jinnota r-rabtiet bejn l-assorbiment tal-karbonju u d-disponibbiltà tal-ilma, u jappella għall-koerenza bejn l-istrateġija għar-reżiljenza tal-ilma u l-iskemi tal-kultivazzjoni karbonika;

31.Itenni li r-Regolament dwar l-Użu mill-Ġdid tal-Ilma għandu l-għan li jnaqqas il-pressjoni fuq il-korpi tal-ilma billi jistabbilixxi dispożizzjonijiet dwar l-użu mill-ġdid tal-ilma wara li trattament xieraq jestendi ċ-ċiklu tal-ħajja tiegħu, u b’hekk jippreżerva r-riżorsi tal-ilma; jenfasizza madankollu li l-ostakli regolatorji, finanzjarji u teknoloġiċi, inkluża l-kompetittività ekonomika tal-ilma mormi rkuprat, l-ippjanar tal-ġestjoni tar-riskju u l-kondiviżjoni tar-responsabbiltajiet, jikkontribwixxu għall-adozzjoni bil-mod tal-użu mill-ġdid tal-ilma rkuprat għall-agrikoltura; jistieden, għalhekk, lill-Kummissjoni u lill-Istati Membri jadottaw politiki ta’ appoġġ, kemm fil-livell tal-UE kif ukoll fil-livell lokali, li jinċentivaw il-prattiki tal-użu mill-ġdid tal-ilma, filwaqt li titqies l-importanza tal-adattament tat-trattament tal-ilma mormi u r-rekwiżiti tal-kwalità għall-użu maħsub tal-ilma; jinnota li l-ilma mormi ttrattat isib ukoll applikazzjonijiet siewja f’diversi proċessi industrijali u kuntesti urbani, u dan jikkontribwixxi għat-tnaqqis tal-pressjoni fuq ir-riżorsi tal-ilma ħelu u l-konservazzjoni tal-ilma tax-xorb; jistieden, għalhekk, lill-Kummissjoni tivvaluta estensjoni possibbli tal-kamp ta’ applikazzjoni tar-Regolament dwar l-Użu mill-Ġdid tal-Ilma sabiex tistabbilixxi standards għall-użu mill-ġdid sikur tal-ilma għal skopijiet industrijali u urbani;

32.Jistieden lill-Kummissjoni u lill-Istati Membri jispeċifikaw sistemi ta’ inċentivi regolatorji u finanzjarji għall-użu mill-ġdid tal-ilma mormi ttrattat f’setturi li jużaw l-ilma b’mod intensiv u jipprovdu finanzjament speċifiku għall-bini ta’ infrastruttura li tgħaqqad l-impjanti tat-trattament tal-ilma mormi u n-networks ta’ distribuzzjoni tal-ilma raffinat; iħeġġeġ approċċ issimplifikat fil-leġiżlazzjoni tal-UE biex jitneħħew l-ostakli amministrattivi u jiġi promoss ir-riċiklaġġ tal-ilma sikur u effiċjenti madwar l-Istati Membri; jistieden lill-Istati Membri jistabbilixxu pjanijiet nazzjonali għall-użu mill-ġdid u l-iffrankar tal-ilma biex jinċentivaw il-kooperazzjoni transsettorjali fil-ġestjoni tal-ilma;

33.Itenni li l-ilma użat mill-ġdid jista’ jtaffi l-estrazzjoni mix-xmajjar, mil-lagi u mill-ilma ta’ taħt l-art għall-agrikoltura bl-irrigazzjoni; jissottolinja l-fatt li l-ilma użat mill-ġdid jista’ jikkontribwixxi għaż-żamma tal-flussi bażi u l-livelli minimi tal-ilma matul perjodi niexfa;

34.Jenfasizza l-potenzjal tas-settur tal-bini li jiffranka l-ilma, pereżempju bl-għajnuna ta’ sistemi ta’ kejl separat intelliġenti, sistemi effiċjenti ta’ ilma griż, l-użu mill-ġdid tal-ilma mormi domestiku jew il-ħsad tal-ilma tax-xita; jenfasizza li r-rendiment tal-bini fl-użu tal-enerġija jista’ jissaħħaħ bl-effiċjenza fl-ilma, billi jitnaqqsu l-emissjonijiet ta’ gassijiet serra; jistieden lill-Istati Membri u lill-awtoritajiet lokali jinċentivaw karatteristiċi li jiffrankaw l-ilma f’binjiet ġodda; jenfasizza, f’dan ir-rigward, li l-prattiki effiċjenti fl-ilma għandhom jiġu kkunsidrati fl-ippjanar urban; jenfasizza l-fatt li l-ħsad tal-ilma tax-xita kif ukoll l-użu u l-użu mill-ġdid tal-ilma b’mod effiċjenti jistgħu jtejbu l-adattament għat-tibdil fil-klima fil-bliet;

35.Jappella għat-tranżizzjoni, fl-industrija u fis-setturi tal-enerġija u diġitali, biex jiġu ottimizzati l-effiċjenza tat-tkessiħ u l-metodi ta’ tkessiħ alternattivi li huma inqas dipendenti fuq l-ilma, sabiex jiġi żgurat iffrankar sinifikanti tal-ilma f’dawn is-setturi;

36.Jirrimarka li filwaqt li l-unitajiet domestiċi jirrappreżentaw 10 % tal-konsum globali tal-ilma fl-UE, hija meħtieġa wkoll azzjoni biex tittejjeb l-effiċjenza fl-ilma domestiku; jinnota li soluzzjonijiet teknoloġiċi li jiffrankaw l-ilma huma faċilment disponibbli u waħedhom jistgħu jnaqqsu l-konsum tal-ilma fl-unitajiet domestiċi mingħajr ma jikkompromettu l-kumdità jew ikunu jirrikjedu investiment għoli; jistieden lill-Istati Membri jappoġġjaw il-konsumaturi waqt li jagħmlu t-tranżizzjoni għal dawn it-teknoloġiji u jsaħħu l-għarfien tal-konsumaturi dwar il-konsum tal-ilma u t-titjib potenzjali fl-effiċjenza billi l-effiċjenza fl-ilma domestiku tiġi ankrata fil-politiki dwar l-ilma, il-bini u l-konsumatur madwar l-UE kollha;

37.Jinnota li f’xi Stati Membri r-rati ta’ tnixxija mill-pajpijiet huma għoljin u li dan iżid is-sehem totali tal-konsum ta’ ilma domestiku; jilqa’ d-dispożizzjonijiet tad-Direttiva l-ġdida dwar l-Ilma tax-Xorb dwar ir-rati ta’ tnixxija u l-ħidma li għaddejja tal-Kummissjoni biex tevalwa dawk ir-rati u tistabbilixxi valuri ta’ limitu li se jixprunaw azzjoni fl-Istati Membri kkonċernati; jistieden lill-Istati Membri jindirizzaw b’mod urġenti t-tnixxija fin-networks tal-provvista tal-ilma u jimplimentaw bis-sħiħ ir-rekwiżiti ta’ monitoraġġ u rappurtar tad-Direttiva dwar l-Ilma tax-Xorb, ħalli l-Kummissjoni tkun tista’ tistabbilixxi valur ta’ limitu għat-tnixxija sa Jannar 2028; jenfasizza li hemm bżonn li n-networks ta’ irrigazzjoni urbana sostenibbli jiġu modernizzati, biex jitrażżnu t-tnixxijiet u titnaqqas l-impronta tal-ilma tagħhom; jistieden lill-Istati Membri jinformaw lill-pubbliku b’mod regolari dwar l-effiċjenza u l-effettività tal-provvisti tal-ilma tagħhom;

38.Jirrimarka li l-organizzazzjonijiet tas-settur pubbliku jipprovdu potenzjal sinifikanti mhux sfruttat għall-iffrankar tal-ilma minħabba d-daqs tagħhom jew in-natura tagħhom bħala organizzazzjonijiet pubbliċi; jemmen li s-settur pubbliku għandu jaġixxi bħala mudell għal setturi oħra;

39.Jistieden lill-Kummissjoni u lill-Istati Membri jippromwovu informazzjoni aċċessibbli faċilment u bla ħlas, taħriġ, programmi konsultattivi u kampanji ta’ informazzjoni mmirati lejn is-sensibilizzazzjoni tal-pubbliku għall-ġestjoni sostenibbli tar-riżorsi tal-ilma;

40.Jirrakomanda li aspetti ta’ effiċjenza fl-użu tal-ilma, bħal tnaqqis fit-telf tal-ilma u l-użu mill-ġdid tal-ilma, jiġu integrati fir-reviżjoni li jmiss tal-qafas dwar l-akkwist pubbliku;

41.Jissottolinja l-fatt li l-qafas ta’ politika eżistenti tal-UE dwar l-ilma huwa mfassal biex jindirizza l-ġestjoni effettiva tar-riżorsi tal-ilma u l-protezzjoni u r-restawr tal-ekosistemi tal-ilma ħelu u tal-baħar, iżda li l-implimentazzjoni u l-infurzar ħżiena tiegħu, in-nuqqas ta’ finanzjament u l-assenza ta’ analiżijiet xierqa tal-kostijiet-benefiċċji tal-miżuri jimminaw l-effettività tiegħu;

42.Jistieden lill-Kummissjoni u lill-Istati Membri jimplimentaw u jinfurzaw il-leġiżlazzjoni attwali, b’mod partikolari d-Direttiva Qafas dwar l-Ilma u d-direttivi “sekondarji” tagħha (id-Direttiva dwar l-Ilma ta’ Taħt l-Art u d-Direttiva dwar l-Istandards tal-Kwalità Ambjentali), b’enfasi partikolari fuq it-tisħiħ tal-mekkaniżmi ta’ monitoraġġ u rappurtar biex jiġi żgurat li l-Istati Membri kollha jimplimentaw b’mod konsistenti l-miżuri meħtieġa għall-protezzjoni tal-ilma; ifakkar li huwa meħtieġ finanzjament suffiċjenti biex jiġu implimentati dawn l-atti;

43.Jenfasizza li t-tniġġis kimiku tal-ilma tal-wiċċ u tal-ilma ta’ taħt l-art joħloq theddida għall-ambjent akkwatiku, b’effetti bħal tossiċità akuta u kronika f’organiżmi akkwatiċi, akkumulazzjoni ta’ sustanzi niġġiesa fl-ekosistema u telf tal-ħabitats u tal-bijodiversità, kif ukoll theddida għas-saħħa tal-bniedem;

44.Jappella għall-istabbiliment ta’ standards ta’ kwalità komprensivi fl-UE kollha għall-PFAS fl-ilma ta’ taħt l-art u fl-ilma tal-wiċċ; jenfasizza li l-aġġornamenti rispettivi tad-direttivi rilevanti huma essenzjali għas-salvagwardja tal-kwalità tal-ilma u għall-kisba ta’ status kimiku tajjeb għall-korpi tal-ilma kif mitlub fl-ambitu tad-Direttiva Qafas dwar l-Ilma;

45.Jinsisti li l-użi essenzjali tal-PFAS, f’setturi kritiċi, bħal fl-apparat mediku, fil-farmaċewtiċi u l-prodotti meħtieġa għat-tranżizzjoni doppja lejn ekonomija newtrali għall-klima u diġitali, mhumiex fil-periklu fil-kuntest tal-proposti leġiżlattivi u mhux leġiżlattivi futuri; jistieden lill-Kummissjoni tipproponi li telimina gradwalment is-sustanzi kimiċi dejjiema (PFAS) – billi tibda mill-oġġetti tal-konsumatur – marbuta ma’ effetti ta’ ħsara għas-saħħa tal-bniedem u għall-ambjent, abbażi ta’ evidenza xjentifika, filwaqt li tippermetti l-użu tagħhom fejn ma jkun hemm ebda alternattiva sikura; jissottolinja l-ħtieġa li jiżdiedu l-investimenti u li jitħaffu r-riċerka u l-iżvilupp ta’ alternattivi ekwivalenti u sikuri;;

46.Jistieden lill-Kummissjoni tipproponi limiti aġġornati fuq il-PFAS fl-ilma tax-xorb, filwaqt li tqis l-aħħar għarfien xjentifiku;

47.Jenfasizza l-urġenza li jiġi indirizzat, l-ewwel nett fis-sors, u mmonitorjat b’mod effettiv it-tniġġis mill-farmaċewtiċi, il-bisfenoli, il-ġeni ta’ reżistenza antimikrobika, is-sustanzi niġġiesa organiċi persistenti u sustanzi niġġiesa eżistenti u emerġenti oħra biex dan jiġi allinjat mal-ambizzjoni ta’ tniġġis żero tal-UE u l-għan li jinkiseb status kimiku tajjeb għall-korpi kollha tal-ilma;

48.Jistieden lill-Kummissjoni tagħlaq il-lakuni b’finanzjament imsaħħaħ u l-infurzar tal-liġijiet attwali, u l-integrazzjoni tal-prinċipji tal-ekonomija ċirkolari biex it-tniġġis jiġi mmitigat fis-sors tiegħu u jiġu salvagwardjati l-ekosistemi tal-ilma għall-ġenerazzjonijiet futuri; jissottolinja l-fatt li l-batterji reżistenti għall-antibijotiċi u ċerti sustanzi niġġiesa emerġenti għadhom indirizzati b’mod insuffiċjenti, u dan jeħtieġ aktar innovazzjoni u investiment; jenfasizza l-ħtieġa li s-setturi kollha japplikaw proċessi ta’ produzzjoni sostenibbli u prattiki ċirkolari, filwaqt li b’mod proattiv jipprevjenu lis-sustanzi niġġiesa milli jidħlu fis-sistemi tal-ilma;

49.Ifakkar li l-mikroplastiċi jistgħu jidħlu fis-sorsi tal-ilma tax-xorb f’għadd ta’ modi: minn tnixxija mill-wiċċ (pereżempju, wara eventi ta’ xita), għal effluwent ta’ ilma mormi (kemm ittrattat kif ukoll mhux ittrattat), fajd tad-drenaġġ kombinat, effluwent industrijali, skart tal-plastik degradat u depożizzjoni atmosferika; jistieden lill-Kummissjoni tressaq, f’konformità mar-rekwiżiti tad-Direttiva dwar l-Ilma tax-Xorb, valutazzjoni tar-riskju sħiħa tal-mikroplastiċi fl-ilma tax-xorb, filwaqt li taħdem kontinwament fuq metodi ta’ kampjunar u analitiċi affidabbli u robusti sabiex tindirizza b’mod xieraq it-theddida potenzjali ta’ din is-sustanza niġġiesa emerġenti għas-sorsi tal-ilma maħsuba għall-konsum mill-bniedem;

50.Jenfasizza l-ħtieġa li jittejbu l-monitoraġġ u r-regolamentazzjoni tat-tniġġis mill-plastik fl-ambjenti tal-ilma ħelu u tal-baħar, b’attenzjoni partikolari għall-mikroplastiċi u l-plastik li jintuża darba biss; iħeġġeġ lill-Kummissjoni tivvaluta l-mekkaniżmi attwali ta’ infurzar u tqis miżuri ulterjuri biex tipproteġi l-kwalità tal-ilma;

51.Jistieden lill-partijiet ikkonċernati jiżviluppaw materjali li jiġu f’kuntatt mal-ilma sikuri, jissostitwixxu l-BPA u bisfenoli oħra u jiżguraw il-konformità mar-Regolament (KE) Nru 1935/2004 dwar materjali u oġġetti maħsuba biex jiġu f’kuntatt mal-ikel Ir-Regolament (KE) Nru 1935/2004 tal-Parlament Ewropew u tal-Kunsill tas-27 ta’ Ottubru 2004 dwar materjali u oġġetti maħsuba biex jiġu f’kuntatt mal-ikel u li jħassar id-Direttivi 80/590/KEE u 89/109/KEE (ĠU L 338, 13.11.2004, p. 4 ELI: http://data.europa.eu/eli/reg/2004/1935/oj). u d-dispożizzjonijiet adottati dan l-aħħar fir-rigward tal-użu ta’ BPA u bisfenoli u derivattivi oħra tal-bisfenoli (ir-Regolament tal-Kummissjoni (UE) 2024/3190);

52.Ifakkar li d-Direttiva riveduta dwar it-Trattament tal-Ilma Mormi Urban, fis-seħħ mill-1 ta’ Jannar 2025, timponi obbligi ġodda fir-rigward tal-purifikazzjoni tal-ilma, li tirrikjedi li l-produtturi farmaċewtiċi u kożmetiċi jkopru mill-anqas 80 % tal-ispejjeż għat-tneħħija ta’ mikrosustanzi niġġiesa mill-ilma mormi, bil-għan li jitnaqqsu s-sustanzi ta’ ħsara għall-ambjent; jinnota l-eżistenza ta’ ċifri u valutazzjonijiet differenti fir-rigward tal-impatt li dan ikollu fuq is-settur farmaċewtiku u, konsegwentement, fuq id-disponibbiltà u l-affordabbiltà tal-mediċini, u għalhekk jistieden lill-Kummissjoni twettaq valutazzjoni ġdida u komprensiva tal-impatt fuq dan is-settur;

53.Jappella għal appoġġ akbar tal-UE għall-awtoritajiet lokali għall-immodernizzar tal-impjanti tat-trattament tal-ilma mormi urban u l-promozzjoni tal-użu mill-ġdid tal-ilma, biex jallinjaw mal-ambizzjoni ta’ tniġġis żero tal-UE, filwaqt li jiġi żgurat li l-ġestjoni tal-ilma mormi muniċipali tikkontribwixxi b’mod effettiv għal stat kimiku u ekoloġiku tajjeb tal-ilma;

54.Jappella għal aktar monitoraġġ tar-residwi tal-pestiċidi fil-korpi tal-ilma u infurzar tar-regolamenti dwar l-applikazzjoni tal-pestiċidi biex jittaffa l-impatt tagħhom fuq il-kwalità tal-ilma; jisħaq fuq il-ħtieġa ta’ aktar finanzjament biex il-bdiewa jiġu appoġġjati fl-adozzjoni ta’ prattiki tal-biedja b’input baxx u organiċi li jnaqqsu d-dipendenza fuq pestiċidi u fertilizzanti kimiċi, kif ukoll li jiġu pprovduti taħriġ xieraq u servizzi ta’ konsulenza indipendenti lill-bdiewa u lil operaturi oħra dwar l-użu, l-effettività u t-tossiċità tal-pestiċidi, kif ukoll dwar l-aħjar prattika;

55.Jinsisti fuq l-integrazzjoni tal-prinċipji tal-ekonomija ċirkolari biex jitnaqqas l-użu ta’ sustanzi kimiċi perikolużi fil-proċessi industrijali; jisħaq fuq il-ħtieġa ta’ finanzjament addizzjonali biex jiġu appoġġjati l-industriji fit-tranżizzjoni għal teknoloġiji nodfa li jimminimizzaw it-tniġġis tal-ilma L-Aġenzija Ewropea għall-Ambjent, “Industrial pollutant releases to water in Europe” (Ir-rilaxx ta’ inkwinanti industrijali fl-ilma fl-Ewropa), is-sit web tal-Aġenzija Ewropea għall-Ambjent, 30 ta’ Mejju 2024, https://www.eea.europa.eu/en/analysis/indicators/industrial-pollutant-releases-to-water.;

56.Jirrikonoxxi r-rwol tal-ħama ttrattat bħala sors lokali u ċirkolari ta’ fertilizzant, li jikkontribwixxi għas-saħħa tal-ħamrija, ir-riċiklaġġ tan-nutrijenti u d-dipendenza mnaqqsa mill-fertilizzanti sintetiċi; jenfasizza kemm hu importanti li jiġi pprevenut id-dħul ta’ PFAS, metalli tqal, mikroplastiċi, u sustanzi oħra ta’ ħsara fin-networks tad-drenaġġ biex ikun jista’ jsir użu sikur u sostenibbli ta’ ħama tad-drenaġġ ta’ kwalità għolja fl-agrikoltura;

57.Jistieden lill-Kummissjoni tinkludi ħarsa ġenerali tal-miżuri f’anness għas-Sistema ta’ Twissija Bikrija u ta’ Rispons, bi skeda ta’ żmien biex jintlaħqu l-objettivi inkwistjoni;

58.Jappella sabiex issir il-verifika tal-adattament għat-tibdil fil-klima tal-atti leġiżlattivi u mhux leġiżlattivi ġodda kollha tal-UE sabiex tiġi żgurata l-integrazzjoni tal-adattament għat-tibdil fil-klima fil-pjanijiet settorjali u l-miżuri ta’ politika li jaffettwaw l-użu tal-ilma u tal-art; jenfasizza, f’dan ir-rigward, il-ħtieġa ta’ ambizzjoni klimatika akbar bħala parti mill-ġlieda kontra t-tibdil fil-klima, filwaqt li jħeġġeġ lill-Istati Membri jiżguraw li l-miżuri kollha ta’ adattament għat-tibdil fil-klima li jaffettwaw l-użu tal-ilma jikkontribwixxu għal reżiljenza tal-ilma mtejba fit-tul; jistieden lill-Kummissjoni tqis bis-sħiħ il-kundizzjonijiet ġeografiċi u ambjentali fl-Istati Membri, kif ukoll is-sitwazzjoni speċifika tal-gżejjer, tar-reġjuni ultraperiferiċi u ta’ żoni oħra ta’ vulnerabbiltà kbira, bħaż-żoni milquta mid-deżertifikazzjoni, meta tadotta proposti leġiżlattivi u mhux leġiżlattivi ġodda; jitlob lill-Kummissjoni tippreżenta pjan direzzjonali għall-miżuri ta’ politika leġiżlattivi u mhux leġiżlattivi attwali u li għaddejjin inklużi miri u rekwiżiti ta’ monitoraġġ li jaffettwaw l-użu tal-ilma u tal-art;

59.Jenfasizza l-ħtieġa ta’ miżuri ta’ adattament għat-tibdil fil-klima mfassla apposta għar-reġjun tal-Mediterran, li jiffaċċja sfidi uniċi bħal nixfiet fit-tul u intrużjoni tal-melħ fir-riżorsi tal-ilma ħelu;

60.Jisħaq fuq l-isfidi speċifiċi li jiffaċċjaw iż-żoni insulari minħabba l-iskarsezza tal-ilma tax-xorb u jappella għal miżuri li għandhom l-għan li jipproteġu r-riżorsi tal-ilma tal-gżejjer, inkluż it-titjib tal-infrastruttura tal-ġbir u l-ħżin tal-ilma tax-xita, l-implimentazzjoni ta’ sorsi alternattivi tal-ilma, filwaqt li jittejbu s-sistemi ta’ monitoraġġ u ġestjoni tar-riżorsi tal-ilma; barra minn hekk, jistieden lill-Istati Membri jqisu aħjar ir-reġjuni muntanjużi fil-pjanijiet ta’ adattament nazzjonali sabiex jindirizzaw l-isfidi speċifiċi tal-ġestjoni tal-ilma fiż-żoni muntanjużi;

61.Itenni li s-soluzzjonijiet ta’ mitigazzjoni u adattament għat-tibdil fil-klima ma għandhomx ikunu akkost tad-degradazzjoni tal-ekosistema u għandhom jevitaw li jżidu d-domanda għal attivitajiet intensivi fl-użu tal-ilma u tal-enerġija, u minflok għandhom jagħtu prijorità lill-innovazzjoni u teknoloġiji effiċjenti fl-enerġija u l-ilma bħala parti mill-mixja lejn ekonomija aktar effiċjenti fir-riżorsi, filwaqt li jiżguraw aċċess ekwu għall-ilma għal kulħadd; jirrimarka li, sabiex ikunu effettivi, is-soluzzjonijiet għall-mitigazzjoni tat-tibdil fil-klima u l-adattament għalih għandhom jitfasslu skont iċ-ċirkostanzi nazzjonali, filwaqt li jissaħħu l-kompetittività u l-produttività fuq perjodu ta’ żmien qasir u twil; jirrimarka l-possibbiltajiet ta’ sinerġiji, f’dan ir-rigward, mal-produzzjoni innovattiva tal-enerġija bħall-fotovoltajċi u l-bijogass, peress li tista’ tikkontribwixxi wkoll biex jiżdied l-introjtu agrikolu;

62.Jirrikonoxxi l-importanza li jiġi rriżervat l-ilma għan-natura u l-ħtieġa li jinżammu ekosistemi tal-ilma ħelu b’saħħithom, għall-funzjonament tajjeb taċ-ċiklu tal-ilma, għall-attivitajiet tal-bniedem u għall-mitigazzjoni tal-impatti tan-nixfiet u tal-iskarsezza tal-ilma; jissottolinja, fil-kuntest tar-restawr tal-ekosistemi tal-ilma ħelu u l-funzjonijiet naturali tax-xmajjar, l-importanza li jitneħħew “ostakli obsoleti”, jiġifieri ostakli artifiċjali li ma għadhomx jissodisfaw l-iskop oriġinali tagħhom jew li ma għadhomx meħtieġa, kull fejn jeżistu opportunitajiet bħal dawn, abbażi tal-għarfien u l-esperjenza attwali; jappella għall-istabbiliment ta’ programmi speċifiċi għat-tindif u l-konservazzjoni tal-kanali tax-xmajjar, billi jiġi żgurat fluss minimu u titnaqqas l-akkumulazzjoni ta’ radam u sedimenti li jistgħu jaffettwaw il-kapaċità tal-ħżin u d-distribuzzjoni tal-ilma;

63.Jinsisti li, hekk kif l-impatt tat-tibdil fil-klima qed isir aktar persistenti, il-ġestjoni tal-għargħar u tan-nixfiet trid tintegra bis-sħiħ ir-riskji li jinħolqu, inkluż billi jitqiesu x-xejriet tat-temp li qed jinbidlu, bħal żieda fit-tendenzi tax-xita li jwasslu għal eċċess ta’ ilma; huwa konvint li taħlita ta’ monitoraġġ u ġbir ta’ data, preparatezza, rispons għall-emerġenza u u għall-irkupru li jqisu l-prinċipju ta’ “bini mill-ġdid aħjar” L-Uffiċċju tan-Nazzjonijiet Uniti għat-Tnaqqis tar-Riskju tad-Diżastri, Build Back Better in recovery, rehabilitation and reconstruction (Bini mill-ġdid aħjar fl-irkupru, ir-riabilitazzjoni u r-rikostruzzjoni), UNISDR, Ġinevra, 2019. minn naħa waħda, u l-adattament tal-attivitajiet soċjetali u ekonomiċi min-naħa l-oħra, huma essenzjali biex titnaqqas il-vulnerabbiltà u tiżdied ir-reżiljenza, speċjalment fid-dawl tal-fatt li l-aspett kwantitattiv tal-ilma qed isir aktar prominenti; jenfasizza, f’dan ir-rigward, il-ħtieġa li jkun hemm soluzzjonijiet ibbażati fuq in-natura u infrastruttura reżiljenti għall-klima li jqisu fl-iżvilupp tagħhom l-impatt ta’ eventi klimatiċi estremi biex tiġi żgurata l-vijabbiltà tagħhom fil-każ ta’ eventi klimatiċi estremi;

64.Ifakkar li fl-2007, id-Direttiva Qafas dwar l-Ilma ġiet issupplimentata bid-Direttiva 2007/60/KE dwar il-valutazzjoni u l-ġestjoni tar-riskji ta’ għargħar li għandha l-għan li tistabbilixxi qafas biex jitnaqqsu l-konsegwenzi negattivi tal-għargħar fuq is-saħħa tal-bniedem, l-ambjent, il-wirt kulturali u l-attività ekonomika; jinnota li l-kompatibbiltà reċiproka taż-żewġ direttivi tinkiseb permezz ta’ pjanijiet ta’ ġestjoni tar-riskju u pjanijiet ta’ ġestjoni tal-għargħar fil-baċin tax-xmara bħala l-komponenti ta’ sistema integrata ta’ ġestjoni tal-ilma li fiha hija kruċjali l-koordinazzjoni; ifakkar li l-prevenzjoni tal-għargħar hija marbuta mill-qrib ma’ spazji ħodor urbani, strateġiji għall-protezzjoni tal-ħamrija u investiment fin-networks tad-drenaġġ;

65.Jenfasizza li l-preparatezza għall-iskarsezza tal-ilma u n-nixfa tista’ tittejjeb b’mod sinifikanti fl-UE, meta jitqies li f’diversi Stati Membri Il-Kummissjoni Ewropea: Direttorat Ġenerali għall-Affarijiet Marittimi u s-Sajd et al. Stock-taking analysis and outlook of drought policies, planning and management in EU Member States – Final Report (Analiżi ta’ rendikont u prospettiva tal-politiki, l-ippjanar u l-ġestjoni tan-nixfiet fl-Istati Membri tal-UE – Rapport Finali), Uffiċċju tal-Pubblikazzjonijiet tal-Unjoni Ewropea, 2023. mhuwa stabbilit l-ebda pjan għall-ġestjoni tan-nixfiet; jistieden lill-Istati Membri u, meta jkun applikabbli, lill-awtoritajiet reġjonali u lokali kompetenti, jiżviluppaw pjanijiet ta’ ġestjoni tan-nixfiet, b’mod partikolari bil-ħsieb li jiżguraw il-provvista tal-ilma tax-xorb, jiżguraw il-produzzjoni tal-ikel u jintegraw sistemi diġitalizzati ta’ monitoraġġ, kontroll u twissija bikrija sabiex jiġu appoġġjati deċiżjonijiet effettivi u bbażati fuq id-data dwar miżuri ta’ protezzjoni, rispons u komunikazzjoni b’oqsma ta’ responsabbiltà definiti b’mod ċar; jirrimarka l-ħtieġa li jiġu introdotti dispożizzjonijiet fil-livell tal-UE fir-rigward tal-pjanijiet għall-ġestjoni tan-nixfa, simili għal dawk dwar il-pjanijiet għall-ġestjoni tal-għargħar;

66.Jinsisti, fid-dawl tal-ħafna eventi klimatiċi, bħall-għargħar, in-nixfiet u ċ-ċikluni, li reċentement laqtu lill-Ewropa, fuq l-importanza li l-UE jkollha mekkaniżmu robust biex tirreaġixxi għal kriżijiet bħal dawn, li jkun jinkludi sistemi ta’ twissija u ta’ assistenza lill-popolazzjoni ċivili; jirrimarka li l-monitoraġġ diġitali, il-wiri adegwat pubbliku tad-data rilevanti u s-sistemi ta’ twissija bikrija huma essenzjali biex jiġu żviluppati pjanijiet effettivi għall-ġestjoni tan-nixfiet u l-għargħar fil-livell tal-Istati Membri; jenfasizza wkoll l-importanza li jintużaw bis-sħiħ l-għodod disponibbli tal-UE bħat-tbassir tal-għargħar tas-Sistema Ewropea ta’ Sensibilizzazzjoni dwar l-Għargħar u s-Sistema Globali ta’ Sensibilizzazzjoni dwar l-Għargħar, u l-għodda tal-Monitoraġġ tal-Għargħar Globali, bħala parti mis-Servizz ta’ Ġestjoni ta’ Emerġenzi ta’ Copernicus;

67.Jisħaq fuq l-importanza li l-Mekkaniżmu tal-Unjoni għall-Protezzjoni Ċivili jgħin lill-pajjiżi milquta minn diżastri relatati mal-ilma bħall-għargħar u n-nixfiet; jappella għal aktar finanzjament biex il-Mekkaniżmu tal-Unjoni għall-Protezzjoni Ċivili jingħata riżorsi suffiċjenti u aġġornati biex tiżdied il-preparatezza u jittejjeb it-tisħiħ tal-kapaċitajiet;

68.Jistieden lill-Kummissjoni u lill-Istati Membri jtejbu l-preparatezza taċ-ċittadini fil-każ ta’ diżastri jew kriżijiet relatati mal-ilma; jisħaq fuq l-importanza ta’ kampanji ta’ informazzjoni u eżerċizzji ta’ dimostrazzjoni fil-faċilitajiet tal-edukazzjoni, fl-amministrazzjonijiet pubbliċi u fin-negozji biex tinbena “kultura ta’ preparatezza” għaċ-ċittadini;

69.Jistieden lill-Istati Membri jġeddu u jaġġornaw b’mod sistematiku l-infrastruttura tal-ilma tagħhom, inklużi l-infrastruttura tal-ilma tax-xorb u tas-sanità, kif ukoll l-infrastruttura li tirregola l-flussi tax-xmajjar, u jinvestu f’soluzzjonijiet innovattivi bbażati fuq prattika tajba, jagħmlu s-sistemi tal-ilma aktar reżiljenti għat-tibdil fil-klima, jiżguraw provvista stabbli tal-ilma tax-xorb, jippermettu d-detezzjoni bikrija tat-telfiet u jnaqqsu t-tnixxijiet u l-ħela tal-ilma, filwaqt li jottimizzaw is-sistemi tat-trasport u tal-ħżin tal-ilma; jenfasizza l-fatt li l-finanzjament għal infrastruttura tal-ilma innovattiva mhuwiex biżżejjed meta mqabbel mal-ħtiġijiet ta’ investiment madwar l-UE; jappella, f’dan ir-rigward, għal finanzjament iddedikat, fil-livell nazzjonali, reġjonali jew tal-UE, biex jiġi żgurat finanzjament adegwat għall-iżvilupp, il-manutenzjoni u l-modernizzazzjoni ta’ infrastruttura reżiljenti għall-ilma, biex jitrawmu soluzzjonijiet u teknoloġiji innovattivi u tiġi żgurata s-sostenibbiltà fit-tul ta’ dik l-infrastruttura tal-ilma;

70.Jesprimi dispjaċir minħabba l-fatt li, minkejja t-theddida li d-deżertifikazzjoni toħloq għall-kwalità u d-disponibbiltà tal-ilma, għall-fertilità tal-ħamrija u għall-produzzjoni tal-ikel, u minkejja l-fatt li 13-il Stat Membru ddikjaraw lilhom infushom affettwati mid-deżertifikazzjoni fil-kuntest tal-Konvenzjoni tan-Nazzjonijiet Uniti dwar il-Ġlieda kontra d-Deżertifikazzjoni, il-Kummissjoni mhix qed tindirizza d-deżertifikazzjoni b’mod effettiv u effiċjenti; iħeġġeġ lill-Kummissjoni, għalhekk, f’konformità mal-konklużjonijiet tal-Kunsill tal-14 ta’ Ottubru 2024 dwar id-deżertifikazzjoni, id-degradazzjoni tal-art u n-nixfa, tippreżenta pjan ta’ azzjoni integrat għall-UE kollha għall-ġlieda kontra d-deżertifikazzjoni, id-degradazzjoni tal-art u n-nixfa, bl-għan li tinbena reżiljenza għan-nixfa u tinkiseb in-newtralità tad-degradazzjoni tal-art fl-UE sal-2030, abbażi ta’ valutazzjoni tal-impatt sħiħa;

71.Jinsisti li s-settur agrikolu jiġi appoġġjat aktar fl-implimentazzjoni ta’ teknoloġiji ġodda biex titnaqqas id-domanda għall-ilma, filwaqt li fl-istess ħin jiżdied l-aċċess għall-ilma, inkluż billi jiġu appoġġjati ż-żamma tal-ilma u r-riforniment tal-ilma ta’ taħt l-art; jappella biex ir-riżultati tar-riċerka, pereżempju dwar id-desalinizzazzjoni tal-ilma baħar, ikunu aċċessibbli u li jiġi ffaċilitat l-użu ta’ soluzzjonijiet innovattivi tad-desalinizzazzjoni; jistieden lill-Istati Membri joħolqu riżervi naturali tal-ilma bbażati fuq valutazzjonijiet aġġornati tar-riskji klimatiċi biex jipproteġu l-provvisti kritiċi tal-ilma u l-baċiri idrografiċi tagħhom, u filwaqt li jqisu l-impatt ambjentali u soċjoekonomiku tal-iżvilupp ta’ tali riżervi; jirrimarka li tali riżervi naturali tal-ilma jikkomplementaw ir-rekwiżit tad-Direttiva Qafas dwar l-Ilma li l-Istati Membri jidentifikaw korpi tal-ilma użati għall-estrazzjoni tal-ilma tax-xorb, filwaqt li jiżguraw li jilħqu l-objettivi stabbiliti fl-Artikolu 4 tad-Direttiva Qafas dwar l-Ilma u tad-Direttiva dwar l-Ilma tax-Xorb, u jiżguraw il-protezzjoni meħtieġa tagħhom; jinnota li tali riżervi naturali tal-ilma diġà jeżistu f’forom differenti f’diversi Stati Membri; jenfasizza li għandha tingħata għajnuna lill-Istati Membri jew lill-gvernijiet lokali jew reġjonali biex jiġu megħjuna jiżviluppaw riżervi naturali tal-ilma;

72.Jinnota l-potenzjal tal-infrastruttura taż-żamma bħala eżempju ta’ sistemi ta’ ġenerazzjoni tal-ilma maħluqa bl-użu tal-aħjar tekniki disponibbli u kosteffettivi li għandhom l-inqas impatt ambjentali, inkluż permezz tal-użu mill-ġdid tal-ilma mormi jew il-ġbir tal-ilma tax-xita, sabiex jitnaqqsu r-riskji ta’ nixfiet u għargħar, tiżdied is-sigurtà tal-ilma u jitrawmu ċ-ċirkolarità, ir-reklamazzjoni u l-użu mill-ġdid tal-ilma; jemmen li l-faċilitajiet taż-żamma tal-ilma jistgħu jkunu għodod utli dment li dawn ikunu awtorizzati mill-awtoritajiet lokali jew reġjonali taħt kundizzjonijiet ċari, inkluża l-kapaċità tal-ilma lokali ta’ taħt l-art li jsostni tali attivitajiet u l-impenn tal-bdiewa li jaċċedu għar-riżorsa tal-ilma biex jadattaw il-prattiki tagħhom għal prattiki aktar sostenibbli b’mod partikolari f’termini tal-ħtiġijiet tal-ilma u tal-kwalità tal-ilma; jistieden lill-Kummissjoni tuża l-għodod disponibbli tagħha, inkluż l-appoġġ finanzjarju, biex tissimplifika dan l-approċċ fost l-Istati Membri;

73.Jiddeplora l-estrazzjoni illegali jew intenzjonata tal-ilma, li x’aktarx tikkawża ħsara sostanzjali lill-korpi tal-ilma; jitlob li jiġu applikati miżuri dissważivi b’saħħithom, inkluż permezz tal-liġi kriminali, biex jiġi protett l-istatus ekoloġiku jew il-potenzjal ekoloġiku tal-korpi tal-ilma tal-wiċċ jew tal-istatus kwantitattiv tal-korpi tal-ilma ta’ taħt l-art; jinnota li huwa meħtieġ appoġġ addizzjonali għat-taħriġ u t-trasferiment tal-għarfien għall-kapaċitajiet nazzjonali ta’ infurzar;

74.Jinnota r-rwol trażversali importanti tas-soluzzjonijiet ibbażati fuq in-natura fl-indirizzar tal-isfidi tal-kriżi planetarja tripla u r-restawr taċ-ċiklu naturali tal-ilma; jistieden lill-Kummissjoni u lill-Istati Membri jagħtu prijorità, filwaqt li jqisu l-impatti ambjentali u soċjoekonomiċi, lill-implimentazzjoni ta’ soluzzjonijiet ibbażati fuq in-natura għar-reżiljenza tal-ilma fl-azzjonijiet u r-rakkomandazzjonijiet ta’ politika tagħhom, bħat-tixrib mill-ġdid tal-artijiet mistagħdra u tat-torbieri biex tiżdied id-disponibbiltà tal-ilma ta’ taħt l-art u t-tira tal-madwar, ir-restawr u l-protezzjoni tal-pjanuri tal-għargħar, il-miżuri naturali għaż-żamma tal-ilma, ir-riveġetazzjoni bħala ostaklu kontra l-għargħar, u l-konservazzjoni tal-ilma tax-xita, sabiex tissaħħaħ id-disponibbiltà tal-ilma, jittaffew ir-riskji tat-tibdil fil-klima u tiġi appoġġjata r-reżiljenza fit-tul għall-komunitajiet, in-negozji u l-produzzjoni tal-ikel; filwaqt li jissottolinja li, minbarra s-soluzzjonijiet ibbażati fuq in-natura, l-investimenti komplementari fis-soluzzjonijiet tal-inġinerija jibqgħu meħtieġa biex jiġu żgurati l-adattament b’suċċess għat-tibdil fil-klima u r-reżiljenza tal-ilma fit-tul;

75.Jirrimarka li s-soluzzjonijiet ibbażati fuq in-natura u l-miżuri għaż-żamma tal-ilma naturali għandhom il-potenzjal li jirrestawraw il-livelli tal-ilma ta’ taħt l-art u li jappoġġjaw il-flussi ekoloġiċi filwaqt li jnaqqsu r-riskji relatati mal-ilma mill-iskarsezza tal-ilma, l-għargħar u n-nixfiet; jinnota li fil-ġestjoni tal-għargħar, is-soluzzjonijiet ibbażati fuq in-natura normalment ma jistgħux jissostitwixxu bis-sħiħ is-soluzzjonijiet eżistenti u jaf ma jkunux effettivi għall-biċċa l-kbira tal-eventi estremi; jirrimarka, madankollu, li s-soluzzjonijiet ibbażati fuq in-natura jistgħu jtejbu l-effettivitià u l-ħajja operabbli tal-infrastruttura griża billi jżidu l-kapaċità tal-assorbiment tal-ilma, inaqqsu l-veloċità tal-ilma u jirregolaw il-flussi qawwija; itenni, f’dan ir-rigward, li l-effettività tas-soluzzjonijiet ibbażati fuq in-natura hija speċifika għall-kuntest u trid tiġi adattata għas-sitwazzjoni lokali; jenfasizza f’dan ir-rigward li “soluzzjoni waħda tajba għal kulħadd” ma teżistix;

76.Jenfasizza li hemm bżonn jingħata appoġġ finanzjarju għal metodi u soluzzjonijiet innovattivi sostenibbli, filwaqt li jitqiesu aktar is-sħubijiet pubbliċi-privati;

77.Jenfasizza, fil-kuntest tal-adattament għat-tibdil fil-klima, l-importanza ta’ ħamrija f’saħħitha biex jiġu żgurati s-sigurtà u ċ-ċirkolarità tal-ilma; jenfasizza li ż-żamma naturali tal-ilma tal-ħamrija trid tittejjeb permezz ta’ miżuri biex tissaħħaħ is-saħħa tal-ħamrija, jiġi minimizzat it-telf tal-karbonju, kif ukoll azzjonijiet fil-livell tal-korp tal-ilma, bħall-istabbilizzazzjoni tax-xtut tax-xmajjar, inkluż permezz tan-naturalizzazzjoni mill-ġdid, u r-restawr tal-kapaċitajiet ta’ żamma tal-akwiferi;

78.Jinnota li miżuri ta’ ġestjoni tal-foresti mfassla bir-reqqa jistgħu jtejbu s-saħħa tal-baċiri tal-ilma, jirregolaw il-fluss tal-ilma u jnaqqsu n-nixfa u l-istress mill-għargħar, minħabba r-rwol essenzjali tas-siġar u l-foresti fir-regolamentazzjoni taċ-ċiklu tal-ilma, permezz tal-kapaċità tagħhom li jippurifikaw l-ilma, iżidu d-disponibbiltà tar-riżorsi tal-ilma u jtejbu ż-żamma tat-tira; jipproponi li dan jiġi kkunsidrat kif xieraq meta l-Kummissjoni, f’kooperazzjoni mal-Istati Membri, tiżviluppa l-għanijiet tal-Unjoni dwar ir-reżiljenza għad-diżastri u li tiġi kkunsidrata fl-iżvilupp u l-irfinar tal-ġestjoni tar-riskju ta’ diżastri u l-ippjanar ta’ kontinġenza; jenfasizza l-ħtieġa, f’dan ir-rigward, għal aktar riċerka, ġbir ta’ data, innovazzjoni u finanzjament biex jiġu appoġġjati l-maniġers tal-art fil-prevenzjoni tal-impatti ta’ fatturi ta’ stress ambjentali bħan-nixfa, l-għargħar u l-funzjoni li qed tonqos tal-baċiri tal-iskular;

79.Jirrikonoxxi li ż-żoni urbani huma dejjem aktar vulnerabbli għal riskji klimatiċi relatati mal-ilma bħall-għargħar, in-nuqqas ta’ ilma u l-istress mis-sħana; jappella għall-integrazzjoni tal-ippjanar tar-reżiljenza tal-ilma urban fl-istrateġiji ta’ adattament għat-tibdil fil-klima, inkluż l-investiment f’soqfa ekoloġiċi, fl-infrastruttura permeabbli, fil-ġbir tal-ilma tax-xita u f’sistemi għaż-żamma tal-ilma tal-maltemp, kif ukoll f’miżuri mmirati biex iżidu l-ispazji ħodor u blu fiż-żoni urbani, sabiex jittaffew l-impatti estremi tat-temp u jitnaqqsu r-riskji għall-ħajja tal-bniedem u għall-proprjetà; jappella wkoll għaż-żamma tal-passaġġi fuq l-ilma urbani fil-blietu l-aċċess mill-ġdid għalihom;

80.Jenfasizza li s-Sistema ta’ Twissija Bikrija u ta’ Rispons għandha tiżgura finanzjament adegwat minn sorsi pubbliċi u privati sabiex tappoġġja l-modernizzazzjoni, l-aġġornament, l-adattament u l-manutenzjoni ta’ infrastruttura tal-ilma reżiljenti, ġestjoni sostenibbli tal-ilma, ġbir tad-data, riċerka, monitoraġġ effettiv, diġitalizzazzjoni, titjib tal-ħiliet, soluzzjonijiet ibbażati fuq in-natura, l-iżvilupp u l-adozzjoni ta’ teknoloġiji effiċjenti fl-użu tal-ilma, kif ukoll biex tiġi ggarantita s-sostenibbiltà ambjentali u soċjoekonomika f’konformità mal-objettivi stabbiliti mill-Boxxla l-Ġdida għall-Kompetittività Ewropea;

81.Jistieden lill-Kummissjoni toħloq fond separat u ddedikat għar-reżiljenza tal-ilma fi ħdan il-qafas finanzjarju pluriennali li jmiss; jemmen li għandhom jiġu stabbiliti wkoll mekkaniżmi finanzjarji speċifiċi fil-Fond Ewropew għall-Iżvilupp Reġjonali u fil-Fond ta’ Koeżjoni biex jiġu appoġġjati teknoloġiji intelliġenti fl-ilma u fl-investiment fl-ilma; jemmen bil-qawwa li, fil-frattemp, l-ilma għandu jingħata prijorità fl-oqfsa eżistenti ta’ finanzjament, inkluż il-Fond ta’ Koeżjoni; jenfasizza li l-mekkaniżmi ta’ finanzjament tal-UE jridu jinkorporaw kunsiderazzjonijiet tal-ekwità soċjali u tal-affordabbiltà, b’mod partikolari fil-kuntest tas-servizzi tal-forniment tal-ilma lill-popolazzjoni, filwaqt li jiġi żgurat l-appoġġ lill-Istati Membri u liċ-ċittadini b’restrizzjonijiet finanzjarji akbar u realtajiet speċifiċi, waqt li jissodisfaw l-obbligi tal-ġestjoni tal-ilma; jenfasizza l-importanza li jiġu aġġustati l-finanzjament, is-sussidji u l-flussi ta’ finanzjament eżistenti relatati mal-ġestjoni tal-ilma u użu tal-art relatat ieħor, filwaqt li jersqu lil hinn minn soluzzjonijiet ta’ inġinerija sorpassati lejn soluzzjonijiet innovattivi, kif ukoll soluzzjonijiet ibbażati fuq in-natura jew taħlita ta’ dawn;

82.Jitlob finanzjament immirat, permezz ta’ Orizzont Ewropa u EIP-AGRI, għal provi fuq il-post dwar ir-relazzjonijiet tal-ilma ta’ sistemi differenti ta’ kultivazzjoni; jappella għar-rikonoxximent tar-rwol tan-nisa fil-politiki tal-ilma u biex jiġi identifikat finanzjament speċifiku biex jiġi promoss l-aċċess tagħhom għall-agrikoltura;

83.Ifakkar li n-nuqqas ta’ finanzjament iddedikat għall-ilma jew miri ta’ finanzjament vinkolanti fi ħdan il-qafas finanzjarju pluriennali attwali jillimita l-kapaċità tal-UE li tidderieġi investimenti mmirati lejn miżuri essenzjali ta’ reżiljenza tal-ilma, inkluża l-modernizzazzjoni tal-infrastruttura, l-innovazzjoni, il-miżuri għall-adattament għat-tibdil fil-klima u l-implimentazzjoni ta’ soluzzjonijiet ibbażati fuq in-natura, u b’hekk, il-kapaċità kompetittiva tagħha, peress li n-nuqqas ta’ bilanċ tal-ilma joħloq piż addizzjonali għall-ekonomija tar-reġjuni; jinnota li b’mod partikolari r-reġjuni ultraperiferiċi u muntanjużi u l-gżejjer fl-UE qed jitħabtu biex jaċċedu għall-finanzjament jew għas-sħubijiet pubbliċi-privati ħalli jappoġġjaw l-investimenti lokali jew reġjonali fil-ġestjoni u l-infrastruttura tal-ilma;

84.Jisħaq fuq ir-rwol importanti tal-Bank Ewropew tal-Investiment fil-finanzjament tal-ilma; jenfasizza l-fatt li l-Bank Ewropew tal-Investiment qed jinvesti b’mod attiv u jappoġġja s-settur tal-ilma; jenfasizza li l-UE għandha tikkollabora mal-Bank Ewropew tal-Investiment biex tikkondividi l-aħjar prattiki u jistieden, barra minn hekk, lill-Bank Ewropew tal-Investiment u lil istituzzjonijiet finanzjarji oħra jsaħħu r-rwol tagħhom fil-finanzjament ta’ infrastruttura tal-ilma innovattiva u reżiljenti, infrastruttura mtejba tas-sanità u tal-ilma tax-xorb, id-diġitalizzazzjoni, kif ukoll jappoġġjaw proġetti mmirati lejn it-tnaqqis tar-riskju ta’ għargħar, il-prevenzjoni tal-erożjoni u r-rivitalizzazzjoni tal-mogħdijiet tal-ilma, billi jiffaċilitaw kundizzjonijiet favorevoli għall-investiment fl-ilma;

85.Iħeġġeġ lill-Kummissjoni tesplora u tippromwovi mekkaniżmi ta’ finanzjament innovattivi, inklużi pagamenti għas-servizzi tal-ekosistema u bonds ekoloġiċi, filwaqt li jiġu żgurati ċ-ċarezza u s-salvagwardji regolatorji biex jiġu pprevenuti d-distorsjonijiet tas-suq; jistieden lill-Bank Ewropew tal-Investiment u istituzzjonijiet finanzjarji oħra jagħtu prijorità lil self u krediti b’imgħax baxx għall-Istati Membri u għall-awtoritajiet reġjonali u lokali li jwettqu proġetti ta’ restawr fuq skala kbira, b’dispożizzjonijiet speċifiċi biex jiġu appoġġjati r-reġjuni ekonomikament żvantaġġati;

86.Jenfasizza l-importanza ta’ sħubijiet pubbliċi-privati bħala sors ta’ finanzjament għall-investiment fl-ilma; jistieden lill-Kummissjoni tinċentiva l-investimenti privati fis-settur tal-ilma billi toħloq qafas regolatorju ta’ appoġġ li jista’ jinkludi opportunitajiet ta’ finanzjament konġunt u sħubijiet pubbliċi-privati sabiex tiġi xprunata l-innovazzjoni, jittejbu l-infrastrutturi u jiġu żgurati soluzzjonijiet sostenibbli għall-ġestjoni tal-ilma madwar l-Istati Membri; jissottolinja, madankollu, li l-involviment tal-investiment privat fis-settur tal-ilma tal-UE ma jridx jimmina l-istatus tal-ilma bħala ben pubbliku u servizz pubbliku, u li r-reżiljenza fit-tul tas-settur, kif ukoll il-prinċpji tal-aċċessibbiltà, l-affordabbiltà u s-sostenibbiltà jridu jiġu garantiti;

87.Jistieden lill-Istati Membri jadottaw oqfsa ta’ governanza li jiddefinixxu b’mod ċar ir-rwoli u r-responsabbiltajiet tal-partijiet ikkonċernati fl-ippjanar, fil-finanzjament, u fl-implimentazzjoni ta’ soluzzjonijiet ibbażati fuq in-natura; jemmen li dawn l-oqfsa għandhom jintegraw il-finanzjament minn diversi sorsi, inklużi l-kontributi filantropiċi u s-sħubijiet tas-settur privat, filwaqt li jiġi żgurat l-aċċess ekwu għar-riżorsi għal proġetti fuq skala żgħira, b’mod partikolari dawk ġestiti fil-livelli lokali jew reġjonali;

88.Iħeġġeġ lill-Kummissjoni Ewropea u lill-Istati Membri biex fil-baġits tagħhom jindirizzaw aspetti tal-ilma u jtejbu l-governanza fir-reġjuni li jużaw fondi tal-EU;

89.Jissottolinja li hemm bżonn tingħata assistenza finanzjarja u teknika mmirata lejn il-muniċipalitajiet biex tiġi ffaċilitata l-konformità mal-leġiżlazzjoni relatata mal-ilma;

90.Iħeġġeġ lill-Istati Membri jaċċeleraw l-għoti tal-awtorizzazzjonijiet għal proġetti tal-infrastruttura tal-ilma reżiljenti sostenibbli u innovattivi biex jiffaċilitaw l-implimentazzjoni rapida tagħhom fid-dawl tal-isfidi urġenti;

91.Jinnota li l-applikazzjoni tal-prinċipju tal-irkupru tal-kostijiet fir-rigward tas-servizzi tal-ilma, li jipprevedi li l-utenti kollha tal-ilma jipparteċipaw finanzjarjament b’mod effettiv u proporzjonat fl-irkupru tal-kostijiet tas-servizzi tal-illma, għadha baxxa jekk mhux ineżistenti f’bosta Stati Membri; jistieden lill-Istati Membri u lill-awtoritajiet reġjonali tagħhom jimplimentaw politiki adegwati ta’ pprezzar tal-ilma u japplikaw aħjar il-prinċipju tal-irkupru tal-kostijiet kemm għall-kostijiet ambjentali kif ukoll għal dawk tar-riżorsi f’konformità mad-Direttiva Qafas dwar l-Ilma; jistieden lill-Istati Membri jqisu ċ-ċikli ta’ investiment fit-tul meta jimplimentaw il-prinċipju tal-irkupru tal-kostijiet u jiżguraw li finanzjament suffiċjenti jkun disponibbli għall-investiment (mill-ġdid) meħtieġ;

92.Jisħaq fuq l-importanza li jiġi żgurat li l-ipprezzar tal-ilma jappoġġja s-sigurtà tal-ilma fit-tul billi jiġu riflessi l-kostijiet ekonomiċi, ambjentali u tar-riżorsi tal-użu tal-ilma; iħeġġeġ lill-Istati Membri u lill-awtoritajiet reġjonali u lokali kompetenti jiżguraw li l-ipprezzar tal-ilma jkun ekonomikament sostenibbli, soċjalment ġust u jippromwovi l-użu effiċjenti tal-ilma, u li jirrifletti d-disponibbiltà tal-ilma fi Stati Membri u reġjuni differenti, b’mod partikolari f’reġjuni taħt stress tal-ilma, filwaqt li tiġi ssalvagwardjata l-affordabbiltà għall-unitajiet domestiċi u n-negozji ż-żgħar; jistieden lill-Istati Membri u lill-awtoritajiet reġjonali u lokali kompetenti jiżguraw prezzijiet tal-ilma trasparenti u jqajmu sensibilizzazzjoni dwar il-valur tas-servizzi tal-ilma;

93.Jirrimarka li l-awtoritajiet nazzjonali kompetenti tal-ilma se jkollhom rwol ċentrali fl-implimentazzjoni ta’ impjanti ġodda għall-ġestjoni u l-konservazzjoni tal-ilma fil-livell tal-Istati Membri; jistieden, għalhekk, lill-Istati Membri jżidu mil-lat finanzjarju u tekniku l-kapaċità ta’ dawk l-awtoritajiet kompetenti li jkollhom rwol abilitanti u konsultattiv aktar sinifikanti fl-infrastruttura sostenibbi u valida għall-futur tal-ġestjoni u tal-ħżin tal-ilma; jemmen li l-fondi tal-UE, bħall-Fond għal Tranżizzjoni Ġusta, għandhom jintużaw biex jgħinu aktar lill-Istati Membri u lill-aġenziji tal-ilma fl-implimentazzjoni;

94.Jenfasizza l-potenzjal u l-ħtieġa għad-diġitalizzazzjoni u l-IA fit-titjib tal-ġestjoni u l-monitoraġġ tal-infrastruttura tal-korpi tal-ilma u tal-ilma, kif ukoll fir-rapportar u fl-iżgurar tal-komparabbiltà tad-data li tirrifletti l-kundizzjonijiet differenti tal-fluss ġeografiku;

95.Jistieden lill-Kummissjoni, lill-Istati Membri u lill-fornituri tal-ilma jintegraw it-trasparenza u d-diġitalizzazzjoni bħala prinċipji fundamentali fil-ġestjoni tal-ilma u jtejbu l-użu tad-data dwar il-ġestjoni u l-kejl, bil-għan li jissaħħu l-monitoraġġ, il-valutazzjoni, l-obbligu ta’ rendikont u t-teħid ta’ deċiżjonijiet, filwaqt li jottimizzaw u jissimplifikaw l-obbligi tar-rapportar; jitlob li t-teknoloġiji tal-ilma diġitalment abilitati jiffaċilitaw il-monitoraġġ u r-rapportar mill-bogħod dwar il-kwalità tal-ilma, it-tnixxijiet, l-użu u r-riżorsi; jappella għal titjib fl-effiċjenza fl-użu tal-fondi pubbliċi u fl-infiq pubbliku f’dan il-qasam; jirrikonoxxi li l-applikazzjoni mifruxa ta’ teknoloġiji diġitali innovattivi jeħtieġ li tkun akkumpanjata mit-taħriġ fil-ħiliet diġitali;

96.Jenfasizza l-ħtieġa li jiġu promossi d-diġitalizzazzjoni u s-soluzzjonijiet iċċentrati fuq id-data fil-bini ta’ soċjetà intelliġenti fl-użu tal-ilma; jisħaq fuq il-ħtieġa li jiġu żviluppati soluzzjonijiet diġitali għall-monitoraġġ tal-konsum tal-ilma u l-ottimizzazzjoni tal-użu tar-riżorsi tal-ilma fis-setturi kollha; jistieden lill-Kummissjoni, f’kooperazzjoni mal-Istati Membri, tipprovdi appoġġ finanzjarju għall-implimentazzjoni ta’ sistemi intelliġenti tal-ġestjoni tal-ilma, b’enfasi fuq il-ħtiġijiet tal-azjendi żgħar u ta’ daqs medju (SMEs);

97.Jirrimarka li s-sistemi tal-ilma, inklużi s-sistemi tat-trattament u d-distribuzzjoni tal-ilma, jitqiesu waħda mill-infrastrutturi kritiċi u mill-pilastri tas-sigurtà tan-nazzjon, u għalhekk essenzjali għall-awtonomija strateġika tal-UE, u jirrikjedu żieda fil-protezzjoni u l-kapaċità tal-utilitajiet li jidentifikaw theddid u attakki fiżiċi u ċibernetiċi, jirrispondu għalihom, u jirkupraw minnhom; jinnota li livell ogħla ta’ diġitalizzazzjoni jġib miegħu vulnerabbiltajiet ġodda; jinnota li, f’każ ta’ theddid jew attakk, l-operaturi tas-sistemi tal-ilma jistgħu jitilfu l-kapaċità tagħhom li jikkontrollaw il-fluss u l-kwalità tal-ilma jew jitilfu l-kapaċità li jitraċċaw l-istatus reali tas-sistema tal-ilma; jinsisti li l-valutazzjonijiet tal-vulnerabbiltà u pjan ta’ rispons f’każ ta’ emerġenza għandhom ikunu parti integrali tas-sistema tal-ġestjoni tal-ilma f’kull Stat Membru; iħeġġeġ il-promozzjoni tal-kondiviżjoni tal-informazzjoni dwar it-theddid għaċ-ċibersigurtà u l-proċeduri biex jiġu skambjati l-aħjar prattiki fost l-operaturi, kif ukoll li tiġi stabbilita kultura taċ-ċibersigurtà permezz ta’ miżuri tekniċi tas-sigurtà, il-bini tal-kompetenza u l-ħolqien tas-sensibilizzazzjoni u l-komunikazzjoni dwarha; jiġbed l-attenzjoni għall-miżuri u d-dispożizzjonijiet fid-Direttiva NIS2 u d-Direttiva dwar ir-Reżiljenza tal-Entitajiet Kritiċi li jistgħu jgħinu jimmitigaw dawn ir-riskji tas-sigurtà; jinsisti li l-Kummissjoni għandha tieħu t-tmexxija f’idejha fir-rinfurzar tal-formati ta’ koordinazzjoni fil-livell tal-UE u tipproponi għodod effettivi għall-istrateġija li jmiss għal unjoni tal-preparatezza bil-għan li tiġi żgurata preparatezza f’waqtha biex jiġu indirizzati r-riskji ambjentali u mhux ambjentali fil-korpi tal-ilma, li qed jheddu s-sigurtà ġenerali tal-UE;

98.Jistieden lill-Kummissjoni u lill-Istati Membri jżidu l-involviment tan-nisa fid-deċiżjonijiet dwar ir-reżiljenza tal-ilma; jappella għall-adozzjoni ta’ approċċ metodoloġiku li jqis b’mod effettiv il-ħtiġijiet relatati mal-ġeneru fl-implimentazzjoni ta’ proġetti tal-provvista tal-ilma, permezz tal-implimentazzjoni ta’ monitoraġġ, rapportar, u traċċar li jużaw għodod u indikaturi diżaggregati skont il-ġeneru;

99.Jinnota li data aħjar u analiżi aħjar tad-data huma kruċjali għat-teħid ta’ deċiżjonijiet ibbażat fuq l-evidenza u għall-identifikazzjoni rapida ta’ bidliet żgħar fil-kwalità tal-ilma li jistgħu jippreżentaw theddida għall-korpi tal-ilma, flimkien mal-evalwazzjoni tal-aħjar prattiki u l-identifikazzjoni tal-miżuri l-aktar kosteffettivi u li jħallu impatt;

100.Jenfasizza li hija meħtieġa data mtejba, affidabbli u interoperabbli dwar il-provvista, id-domanda, id-distribuzzjoni, l-aċċessibbiltà u l-użu tal-ilma u li hemm bżonn li jiġu stabbiliti punti tad-data; iħeġġeġ lill-Kummissjoni Ewropea u lill-Istati Membri jsaħħu l-ġbir tad-data u jtejbu l-interoperabbiltà tad-data fil-livelli kollha biex jiġu appoġġjati l-implimentazzjoni tal-leġiżlazzjoni attwali dwar l-ilma, kif ukoll biex jiġu ffaċilitati l-ekonomija ċirkolari u l-istrateġiji ta’ simbjożi industrijali intelliġenti fl-użu tal-ilma; jenfasizza li d-data u l-IA jistgħu jintużaw għall-immudellar tal-konsum tal-ilma u tal-enerġija kif ukoll għall-kapaċitajiet tal-użu mill-ġdid u tar-riċiklaġġ;

101.Jistieden lill-Kummissjoni tirrikonoxxi aħjar ir-rwol fundamentali tas-settur tal-ilma biex tissaħħaħ il-kompetittività tal-UE billi jitrawmu r-riċerka u l-innovazzjoni u jiġu promossi l-intraprenditorija u t-talent; jenfasizza, f’dan ir-rigward, l-importanza li tiġi intensifikata l-innovazzjoni fis-settur tal-ilma; jirrimarka li ċ-ċentru Ewropew ta’ innovazzjoni għat-trasformazzjoni industrijali u l-emissjonijiet, li nħoloq bħala parti mid-Direttiva 2010/75/EU, jista’ jaqdi rwol f’dan ir-rigward, peress li jevalwa l-prestazzjoni ambjentali tat-teknoloġiji industrijali u jiġbor informazzjoni dwar tekniki ambjentali industrijali innovattivi; jirrimarka, barra minn hekk, is-sħubijiet eżistenti bħas-Sħubija Water4All, programm ta’ finanzjament għar-riċerka xjentifika;

102.Jemmen li hemm bżonn li jinbnew u jitrawmu pjattaformi b’diversi partijiet ikkonċernati biex tiġi promossa l-adozzjoni tal-innovazzjoni fil-livelli kollha, lokali u nazzjonali; jirrakkomanda li dawn il-pjattaformi jkunu jinvolvu firxa wiesgħa ta’ parteċipanti – is-setturi pubbliċi u privati, u l-assoċjazzjonijiet tas-soċjetà ċivili – biex tinbena koalizzjoni ta’ sħab biex iġibu l-bidla; jappoġġja bil-qawwa l-promozzjoni tal-kondiviżjoni tal-għarfien dwar kif it-teknoloġiji diġitali tal-ilma jistgħu jappoġġjaw l-implimentazzjoni tal-leġiżlazzjoni eżistenti tal-UE dwar l-ilma, kif ukoll it-tisħiħ tal-kapaċitajiet fil-livelli lokali, reġjonali u nazzjonali; jistieden lill-Kummissjoni u lill-Istati Membri jespandu l-ħiliet diġitali u l-programmi ta’ riċerka u żvilupp (R&Ż) li jimmiraw l-ilma, inkluż permezz tal-kollaborazzjoni mal-universitajiet, maċ-ċentri tar-riċerka u mal-SMEs;

103.Jirrikonoxxi r-rwol kritiku taċ-ċentri tad-data fl-ekonomija diġitali; jinnota bi tħassib li l-espansjoni rapida tat-teknoloġija tista’ twassal għal żieda sostanzjali fid-domanda tal-IA għar-riżorsi tal-ilma assoċjati mal-operazzjonijiet tagħhom u li dan jista’ jimmina l-benefiċċji ambjentali li li l-IA twiegħed li twassal, bħall-ottimizzazzjoni tar-riżorsi u t-tnaqqis tal-emissjonijiet tal-karbonju, u jenfasizza li hemm bżonn jiġu integrati miżuri ta’ effiċjenza fl-użu tal-ilma fit-tfassil u l-operazzjoni tagħhom; iħeġġeġ lill-Kummissjoni tindirizza l-użu tar-riżorsi tal-ilma permezz tat-teknoloġiji tal-informazzjoni u tal-komunikazzjoni (ICT) u, b’mod partikolari, permezz tal-IA u taċ-ċentri tad-data fis-Sistema ta’ Twissija Bikrija u ta’ Rispons tagħha, b’mod partikolari billi tħeġġeġ liċ-ċentri tad-data jużaw l-ilma ttrattat mill-ġdid u tippromwovi d-disinn ta’ ċipep u komponenti aktar effiċjenti biex titnaqqas il-ħtieġa għat-tkessiħ; jirrakkomanda li l-Istati Membri jagħtu prijorità lill-istrateġiji għar-reżiljenza tal-ilma li jindirizzaw l-isfidi speċifiċi li jinħolqu miċ-ċentri tad-data biex tiġi żgurata s-sostenibbiltà kemm tal-aġenda diġitali kif ukoll ta’ dik ambjentali;

104.Ifakkar li d-desalinazzjoni tal-ilma baħar hija l-proċess li permezz tiegħu jitneħħa l-melħ mill-baħar jew l-ilma salmastru biex dan ikun jista’ jintuża għal firxa ta’ skopijiet “adegwati għall-użu”, inkluż ix-xorb, u li din hija għalhekk soluzzjoni teknoloġika importanti għall-għajxien tan-nies; jinnota li, fl-istess ħin, id-desalinazzjoni hija proċess intensiv fl-użu tal-enerġija u idealment għandu jsir permezz tal-enerġija rinnovabbli, meta dan ikun possibbli, sabiex jitnaqqsu l-impatti ambjentali; itenni li d-desalinazzjoni tipproduċi prodott sekondarju, is-salmura (soluzzjoni ta’ melħ ikkonċentrata), li jrid jintrema kif suppost biex jiġu evitati impatti negattivi fuq l-ambjent tal-baħar; iqis, għalhekk, li d-desalinazzjoni bbażata fuq l-osmosi inversa jew it-teknoloġiji termali għandha tiġi applikata jekk għażliet oħra aktar ambjentalment sostenibbli ma jkunux disponibbli jew ma jkunux jistgħu jiġu implimentati, b’mod partikolari f’żoni remoti u fil-gżejjer; jenfasizza, f’dan ir-rigward, il-ħidma li għaddejja bħalissa rigward soluzzjonijiet teknoloġiċi ġodda, bħaċ-ċelloli tad-desalinazzjoni mikrobjali, li toffri alternattiva ambjentalment sostenibbli u innovattiva għall-metodi tad-desalinazzjoni tradizzjonali, b’mod partikolari biex jiġu pprovduti ilma nadif u trattament tal-ilma mormi lil postijiet żgħar u iżolati mingħajr elettriku;

105.Jisħaq fuq il-ħtieġa ta’ aktar finanzjament u riċerka u żvilupp għal teknoloġiji bħal tekniki innovattivi ta’ desalinizzazzjoni sabiex jiżdiedu l-effiċjenza, is-sostenibbiltà u l-espansjoni ta’ tali teknoloġiji; jitlob li ssir riċerka dwar il-possibbiltajiet tal-użu ta’ teknoloġiji bħal dawn fl-agrikoltura biex jiġu diversifikati l-punti tal-provvista tal-ilma u għalhekk titnaqqas il-vulnerabbiltà tas-settur għall-istress idriku;

106.Jinnota li fl-aħħar deċennju, kien hemm ħafna skoperti xjentifiċi biex it-trattament tal-ilma jsir aktar intelliġenti u aktar ċirkolari fejn dawn is-soluzzjonijiet joffru opportunitajiet biex jintużaw is-soluzzjonijiet diġitali, l-IA u t-telerilevament ħalli l-ilma jintuża b’mod aktar effiċjenti u billi l-ilma mormi ttrattat jintuża mill-ġdid għall-irrigazzjoni u l-irkupru tal-enerġija u n-nutrijenti mill-ilma mormi;

107.Jistieden lill-Kummissjoni u lill-Istati Membri jindirizzaw l-ostakli regolatorji fis-suq uniku biex jiffaċilitaw l-iżvilupp, it-tkabbir u t-tqegħid fis-suq ta’ bijoteknoloġija innovattiva u soluzzjonijiet tal-bijomanifattura u l-promozzjoni ta’ manifattura aktar nadifa u ċ-ċirkolarità;

108.Jappella għall-finanzjament, l-iżvilupp u l-awtorizzazzjoni ta’ soluzzjonijiet innovattivi għall-protezzjoni u l-fertilizzazzjoni tal-għelejjel, inklużi aġenti ta’ kontroll bijoloġiku u sustanzi attivi b’impatt aktar baxx fuq l-ambjent, li huma meħtieġa għal tranżizzjoni ġusta lejn sistemi agrikoli aktar sostenibbli;

109.Jitlob li jiġu stabbiliti programmi speċifiċi għat-tindif u l-konservazzjoni tal-kanali tax-xmajjar, billi jiġi żgurat fluss adegwat u titnaqqas l-akkumulazzjoni ta’ radam u sedimenti li jistgħu jaffettwaw il-kapaċità tal-ħżin u d-distribuzzjoni tal-ilma;

110.Jenfasizza li hemm bżonn Sistema ta’ Twissija Bikrija u ta’ Rispons komprensiva li trawwem il-kooperazzjoni transfruntiera, ġbir u rapportar ta’ data akar uniformi, il-kondiviżjoni tal-aħjar prattiki bejn l-atturi lokali, reġjonali u nazzjonali, filwaqt li tiżgura ġestjoni sostenibbli tal-ilma u distribuzzjoni ekwa tar-riżorsi fost l-Istati Membri, u tipprevjeni l-mogħdija tal-isfidi relatati mal-ilma bħall-iskarsezza u r-riskju ta’ għargħar lil Stati Membri oħra;

111.Jenfasizza li t-tibdil fil-klima jirrappreżenta theddida ewlenija għar-riżorsi tal-ilma u l-ekosistemi akwatiċi; jinnota li l-għargħar u l-iskarsezza tal-ilma jikkompromettu s-sigurtà tal-ikel u tal-ilma u s-saħħa tal-popolazzjoni ġenerali, li fl-aħħar mill-aħħar jaffettwaw il-koeżjoni u l-istabbiltà soċjali; jirrikonoxxi li r-reżiljenza tal-ilma hija kruċjali biex jiġu pprevenuti u indirizzati l-kriżijiet attwali u futuri relatati mas-saħħa, l-ikel, l-enerġija u s-sigurtà; jenfasizza li r-reżiljenza tal-ilma tippromwovi kooperazzjoni transkonfinali fil-qasam tal-ilma, isservi ta’ katalist għall-paċi u s-sigurtà, peress li l-pajjiżi huma marbuta ma’ xulxin permezz ta’ xmajjar kondiviżi u riżorsi tal-ilma ta’ taħt l-art;

112.Jitlob kooperazzjoni transfruntiera akbar bejn l-Istati Membri fil-ġestjoni tal-baċiri tax-xmajjar u l-akwiferi tal-ilma ta’ taħt l-art kondiviżi u fil-ġbir u l-iskambju effettivi ta’ data dwar il-kwalità tal-ilma, il-livelli tat-tniġġis u l-livelli tal-ilma; jirrakkomanda li jiġu stabbiliti ċentri ta’ kooperazzjoni reġjonali biex tiġi kkoordinata l-implimentazzjoni tal-istrateġiji konġunti għar-reżiljenza tal-ilma filwaqt li jitqiesu l-isfidi relatati mat-tibdil fil-klima, dawk soċjali u dawk ekonomiċi f’kull territorju;

113.Jappella għal kooperazzjoni internazzjonali msaħħa, inkluż fil-livell tal-baċiri tax-xmajjar, biex tiġi indirizzata l-kriżi tal-ilma li qed tikber, jiġi żgurat ilma nadif u ta’ kwalità għolja, tiġi promossa l-ġestjoni sostenibbli tal-ilma u jiġu implimentati diversi teknoloġiji innovattivi tal-ilma inklużi soluzzjonijiet ibbażati fuq in-natura; jitlob li l-kooperazzjoni bejn il-fruntieri tiġi ankrata fil-livelli operattivi, tattiċi u strateġiċi;

114.Jitlob li jiġu stabbiliti proġetti transfruntiera fl-ambitu ta’ Interreg u fondi oħra tal-UE biex tittejjeb il-kooperazzjoni reġjonali fil-ġestjoni tar-riżorsi tal-ilma, b’enfasi partikolari fuq il-garanzija tad-distribuzzjoni ġusta tal-ilma bejn is-setturi u l-Istati Membri;

115.Jenfasizza li hemm bżonn jissaħħu l-kapaċitajiet ta’ monitoraġġ tal-UE permezz tad-diġitalizzazzjoni u t-teknoloġiji moderni, inklużi sorveljanza bis-satellita u traċċar tat-tniġġis f’ħin reali, li huma essenzjali għall-prevenzjoni u l-ġlieda kontra t-tniġġis transfruntier;

116.Iħeġġeġ lill-Kummissjoni timplimenta rwol diplomatiku speċifiku ddedikat għas-soluzzjoni tal-kunflitti relatati mal-ilma, għall-promozzjoni tal-kooperazzjoni tal-ilma, u għall-protezzjoni tas-sorsi u s-sistemi tal-ilma, b’mod partikolari waqt kunflitti armati u f’kuntesti transfruntiera;

117.Iħeġġeġ lill-UE tmexxi l-isforzi internazzjonali biex jiġu protetti u restawrati l-ekosistemi tal-ilma f’konformità mal-SDG 6 dwar l-ilma nadif u s-sanitazzjoni;

118.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.