1.á áitiú gur príomhghnéithe den bheartas comhtháthaithe iad fócas réigiúnach agus áitiúil, cur chuige áitbhunaithe agus pleanáil straitéiseach an bheartais, chomh maith lena shamhail dhíláraithe chlársceidealaithe agus cur chun feidhme bunaithe ar phrionsabal na comhpháirtíochta le cur chun feidhme neartaithe an chóid iompair Eorpaigh, rannpháirtíocht gníomhaithe eacnamaíocha agus ghníomhaithe na sochaí sibhialta, agus ar rialachas il-leibhéil, agus go gcinneann siad a éifeachtacht; á chur in iúl go bhfuil sí lánchinnte de gur cheart leanúint den tsamhail sin den bheartas comhtháthaithe i ngach réigiún agus gur cheart í a dhoimhniú i gcás inar féidir mar phríomhionstraim fhadtéarmach infheistíochta an Aontais chun éagothromaíochtaí a laghdú, chun comhtháthú eacnamaíoch, sóisialta agus críochach a áirithiú, chun fás inbhuanaithe réigiúnach agus áitiúil a spreagadh i gcomhréir le straitéisí an Aontais agus chun an comhshaol a chosaint, agus mar phríomh-rannchuiditheoir le hiomaíochas an Aontais agus leis an aistriú cóir, chomh maith le cuidiú le dul i ngleic leis na dúshláin nua atá romhainn;

2.á iarraidh go ndéanfaí deighilt shoiléir idir an beartas comhtháthaithe agus ionstraimí eile, chun forluí agus iomaíocht idir ionstraimí an Aontais a sheachaint, comhlántacht na n-idirghabhálacha éagsúla a áirithiú agus infheictheacht agus inléiteacht thacaíocht an Aontais a mhéadú; ag tabhairt dá haire sa chomhthéacs sin go bhfuil cistí STA dírithe ar an bhforbairt eacnamaíoch agus ar an bhfás eacnamaíoch, gan díriú go sonrach ar chomhtháthú eacnamaíoch, sóisialta agus críochach idir réigiúin; á chur in iúl gur cúis bhuartha di pleananna an Choimisiúin cur chuige feidhmíochtbhunaithe a chur i bhfeidhm maidir le Cistí Struchtúracha agus Infheistíochta na hEorpa (CSIE); á aithint sí gur féidir le sásraí feidhmíochtbhunaithe a bheith ríthábhachtach chun an beartas a dhéanamh níos éifeachtúla agus níos dírithe ar thorthaí, ach ag tabhairt rabhaidh i gcoinne an tsamhail a fhorchur ar an dóigh chéanna do gach cás agus á chur in iúl go bhfuil amhras mór uirthi faoi smaointe chun eisíocaíocht CSIE a nascadh le spriocanna athchóirithe atá sainithe go lárnach a chomhlíonadh, go háirithe mura dtagann na spriocanna athchóirithe faoi raon inniúlachta an leibhéil réigiúnaigh;

3.á chur in iúl go bhfuil sí i gcoinne aon chineál athchóirithe um lárú ón mbarr anuas ar chláir chistiúcháin an Aontais, lena n-áirítear na cinn sin atá faoi bhainistíocht chomhroinnte, amhail an beartas comhtháthaithe agus an comhbheartas talmhaíochta, agus á mholadh go ndéanfaí an chinnteoireacht a dhílárú níos mó ar an leibhéal áitiúil agus réigiúnach; á iarraidh go mbeadh na húdaráis áitiúla agus réigiúnacha agus gníomhaithe eacnamaíocha agus na sochaí sibhialta rannpháirteach ar bhealach feabhsaithe ag gach céim de chláir bainistíochta comhroinnte an Aontais, ó ullmhú agus clársceidealú go cur chun feidhme, seachadadh agus meastóireacht, agus é á chur san áireamh nach féidir forbairt eacnamaíoch agus shóisialta na réigiún agus comhtháthú críochach idir réigiúin a bhaint amach ach amháin ar bhonn dea-chomhair idir na gníomhaithe uile;

4.ag cur béim ar an bhfíoras go bhfuil ról ríthábhachtach ag an gCiste Eorpach Talmhaíochta um Fhorbairt Tuaithe (CETFT), i dteannta cistí beartais comhtháthaithe, chun tacú le ceantair thuaithe; á chur i bhfáth nach mór dearadh CETFT a ailíniú le rialacha chistí an bheartais comhtháthaithe chun borradh a chur faoi shineirgí agus chun tionscadail ilchistithe forbartha tuaithe a éascú;

5.á chur in iúl go bhfuil sí suite de nach féidir leis an mbeartas comhtháthaithe leanúint dá ról a imirt ach amháin má tá cistiú láidir aige; á chur i bhfios go láidir go dtugtar le tuiscint leis sin nach mór cistiú láidir a chur ar fáil don bheartas comhtháthaithe a bheidh ann amach anseo don tréimhse airgeadais tar éis 2027; á chur i bhfáth gur gá cistiú a chur ar fáil atá uaillmhianach go leor agus inrochtana go héasca chun gur féidir leis an mbeartas comhtháthaithe leanúint dá ról mar phríomhbheartas infheistíochta an Aontais a chomhlíonadh, agus ag an am céanna an tsolúbthacht a choinneáil chun aghaidh a thabhairt ar dhúshláin nua a d’fhéadfadh a bheith ann, lena n-áirítear an fhéidearthacht forbairt táirgí dé-úsáide a mhaoiniú, agus chun cur ar chumas na n-údarás áitiúil, na ngeallsealbhóirí agus na dtairbhithe forbairt áitiúil a chothú go héifeachtach; á chur in iúl go bhfuil sí den tuairim dhaingean nár cheart fócas straitéiseach agus cuspóirí soiléire fadtéarmacha an bheartais comhtháthaithe a bheith thíos leis an acmhainneacht freagairtí solúbtha a thabhairt ar dhúshláin dhothuartha;

6.á chur i bhfios go láidir a thábhachtaí atá an chéad chreat airgeadais ilbhliantúil (CAI) eile de chuid an Aontais agus an t-athbhreithniú meántéarma ar chláir an bheartais comhtháthaithe 2021-2027 maidir le todhchaí an bheartais comhtháthaithe a mhúnlú; á athdhearbhú go bhfuil gá le beartas comhtháthaithe níos uaillmhianaí tar éis 2027 sa chéad CAI eile, 2028-2034; á iarraidh, dá bhrí sin, go n-áiritheofar leis an CAI atá ar na bacáin go leanfaidh an beartas comhtháthaithe de bheith ag fáil an leibhéil chéanna cistiúcháin ar a laghad agus a fhaightear don tréimhse reatha i dtéarmaí réadacha; á iarraidh, thairis sin, go bhfanfadh an beartas comhtháthaithe ina cheannteideal ar leithligh sa CAI nua; á chur i bhfáth gur cheart an beartas comhtháthaithe a chosaint ar éifeachtaí staidrimh a d’fhéadfadh incháilitheacht na réigiún a athrú trí mheán-OTI an Aontais a athrú; á athdhearbhú go bhfuil gá le hacmhainní dílse nua de chuid an Aontais;

7.á mholadh, dá bhrí sin, go mbeadh an chéad CAI eile níos freagrúla do riachtanais gan choinne, lena n-áirítear le corrlaigh agus solúbthachtaí leordhóthanacha ón tús; ag cur béim ar an bhfíoras, i ndáil leis an méid sin, nach ionstraim ghéarchéime é an beartas comhtháthaithe agus nár cheart dó imeacht óna phríomhchuspóirí, eadhon óna chineál infheistíochta fadtéarmaí; á iarraidh go ndéanfaí Ciste Dlúthpháirtíochta an Aontais Eorpaigh a neartú, lena n-áirítear ina réamh-mhaoiniú, rud a fhágfaidh nach mbeidh sé chomh maorlathach sin agus go mbeidh rochtain níos éasca air, chun ionstraim iomchuí a fhorbairt a bheidh in ann freagairt go leordhóthanach d’iarmhairtí eacnamaíocha, sóisialta agus críochacha tubaistí nádúrtha nó éigeandálaí sláinte a bheidh ann amach anseo; ag cur béim ar an bhfíoras gur gá go mbeadh smacht leormhaith ag an bParlaimint ar aon chistí agus ionstraimí éigeandála;

8.á aithint gur gá ainmníocht na n-aonad críochach le haghaidh staidrimh (NUTS) 3 a úsáid freisin le haghaidh cásanna sonracha, ar bhealach lena n-aithnítear gurb ann d’éagothroime san fhorbairt i ngach réimse in NUTS 2; á chur in iúl go bhfuil sí den tuairim nach mór an OTI réigiúnach per capita a bheith ina phríomhchritéar fós chun leithdháiltí Ballstát a chinneadh faoi bheartas comhtháthaithe; á chur in iúl gur geal léi, tar éis iarrataí leanúnacha na Parlaiminte, go bhfuil tús curtha ag an gCoimisiún le breithniú a dhéanamh ar chritéir bhreise Cúirt Iniúchóirí na hEorpa, Rapid case review – Allocation of Cohesion policy funding to Member States for 2021-2027 [Mear-athbhreithniú ar chás – Leithdháileadh chistiú an bheartais comhtháthaithe ar na Ballstáit le haghaidh 2021-2027], Márta 2019. amhail astaíochtaí gás ceaptha teasa, dlús daonra, leibhéil oideachais agus rátaí dífhostaíochta, chun forléargas socheacnamaíoch níos fearr a sholáthar ar na réigiúin;

9.á chur i bhfáth gur coinníollacht uileghabhálach í coinníollacht an smachta reachta, lena n-aithnítear agus lena bhforfheidhmítear urraim don smacht reachta, agus mar choinníoll cumasúcháin freisin do chistiú an bheartais comhtháthaithe, chun a áirithiú go n-úsáidfear acmhainní an Aontais ar bhealach trédhearcach, cothrom agus freagrach le bainistíocht fhónta airgeadais; á mheas gur gá urraim don smacht reachta agus do chearta bunúsacha a threisiú, agus a áirithiú go bhfuil gach gníomhaíocht comhsheasmhach le tacú le prionsabail dhaonlathacha, comhionannas inscne agus cearta an duine, lena n-áirítear cearta oibrithe, cearta daoine faoi mhíchumas agus cearta leanaí, i gcur chun feidhme an bheartais comhtháthaithe; ag tabhairt chun suntais go bhfuil ról tábhachtach ag an Oifig Eorpach Frith-Chalaoise agus ag Oifig an Ionchúisitheora Phoiblí Eorpaigh maidir le leasanna airgeadais an Aontais a chosaint;

10.á iarraidh go ndéanfaí tuilleadh iarrachtaí chun sineirgí a shimpliú, a dhéanamh níos solúbtha agus a neartú agus chun cuíchóiriú a dhéanamh ar na rialacha agus na nósanna imeachta riaracháin lena rialaítear cistí an bheartais comhtháthaithe ar leibhéal an Aontais, ar an leibhéal náisiúnta agus ar an leibhéal réigiúnach, agus leas iomlán á bhaint as na teicneolaíochtaí atá ar fáil chun inrochtaineacht agus éifeachtúlacht a mhéadú, ag tógáil ar an gcreat bainistíochta comhroinnte atá ann cheana agus atá seanbhunaithe, chun muinín i measc úsáideoirí a neartú, agus ar an gcaoi sin rannpháirtíocht raon níos leithne gníomhaithe eacnamaíocha agus ghníomhaithe na sochaí sibhialta a spreagadh i dtionscadail a dtacaítear leo agus tionchar na gcistí a uasmhéadú; á iarraidh go mbeadh tionscnaimh bhreise ann lena gcumasófar cistí comhtháthaithe a ionsú ar bhealach níos fearr, lena n-áirítear leibhéil mhéadaithe chómhaoinithe, réamh-mhaoiniú níos airde agus aisíocaíochtaí infheistíochta níos tapúla; á iarraidh go gcuirfí oiliúint theicniúil ar luchtanna riarachán áitiúil, a dhéanann ionadaíocht ar phobail bheaga go háirithe, chun bainistiú riaracháin níos fearr a dhéanamh ar na cistí; á chur i bhfáth, dá bhrí sin, a thábhachtaí atá sé prionsabal na hiniúchóireachta aonair a neartú, roghanna costais simplithe a leathnú tuilleadh agus dúbailt a laghdú i leith rialuithe agus iniúchtaí a bhfuil forluí eatarthu leis an maoirseacht náisiúnta agus réigiúnach don tionscadal agus don tairbhí céanna, d’fhonn deireadh a chur leis an bhféidearthacht earráidí a dhéanamh arís i mblianta cur chun feidhme ina dhiaidh sin;

11.á iarraidh ar an gCoimisiún agus ar na Ballstáit solúbthacht níos mó a thabhairt do réigiúin atá ag céim an chlársceidealaithe cheana féin, chun freastal ar a riachtanais agus ar a sainiúlachtaí ar leith, lena gcuirtear béim ar an ngá atá le páirt a thabhairt do na gníomhaithe eacnamaíocha agus do ghníomhaithe na sochaí sibhialta; á chur i bhfios go láidir go raibh díriú téamach ina phríomhghné chun an beartas comhtháthaithe a ailíniú le cuspóirí Eoraip 2020; á iarraidh ar an gCoimisiún, dá bhrí sin, na torthaí uile a bhaineann le cur chun feidhme an dírithe théamaigh a thíolacadh agus ceachtanna a fhoghlaim do thograí reachtacha a bheidh ann amach anseo;

12.á aithint go bhfuil dúshláin shuntasacha, ach, ag an am céanna, deiseanna suntasacha ag baint leis an aistriú glas, leis an aistriú digiteach agus leis an aistriú déimeagrafach maidir le cuspóirí an chomhtháthaithe eacnamaíoch, shóisialta agus chríochaigh a bhaint amach; á aithint gur féidir le limistéir ardioncaim, ó thaobh staidrimh de, na fadhbanna eacnamaíocha laistigh de réigiún a cheilt; á chur in iúl go bhfuil sí ar an eolas faoin mbaol go leathnófaí éagothromaíochtaí réigiúnacha, go ndéanfaí éagothromaíochtaí sóisialta a dhoimhniú agus go dtiocfadh méadú ar ‘thíreolaíocht na míshástachta’ a bhaineann leis an bpróiseas aistrithe; á chur i bhfios go láidir gur gá cuspóirí inbhuanaitheachta agus aeráide an Aontais a bhaint amach, agus fás eacnamaíoch comhroinnte a choinneáil trí iomaíochas an Aontais a neartú; á iarraidh, dá bhrí sin, go mbeadh straitéis Eorpach ann lena ráthófar fás comhchuí laistigh den Aontas, lena gcomhlíonfar riachtanais shonracha na réigiún faoi seach; á athdhearbhú go bhfuil sí tiomanta na haistrithe glasa agus digiteacha a shaothrú, ós rud é go gcruthófar leis sin deiseanna chun iomaíochas an Aontais a fheabhsú; á chur i bhfios go láidir gur gá infheistíocht a dhéanamh i dtionscadail bhonneagair lena bhfeabhsaítear nascacht, go háirithe in iompar inbhuanaithe cliste, agus i líonraí fuinnimh agus digiteacha, lena n-áiritheofar go ndéanfar gach réigiún, lena n-áirítear réigiúin iargúlta agus réigiúin bheagfhorbartha, a chomhtháthú go hiomlán sa mhargadh aonair agus go mbainfidh siad tairbhe chothrom as na deiseanna a chuirtear ar fáil leis; ag cur béim, sa chomhthéacs sin, ar an ngá atá le tacú le forbairt na dtionscal glas, lena gcothófar sainiúlachtaí agus traidisiúin áitiúla chun athléimneacht na timpeallachta eacnamaíche agus na sochaí sibhialta a mhéadú i leith dúshláin a bheidh ann amach anseo;

13.ag tathant go leanfadh an beartas comhtháthaithe de bheith comhsheasmhach le hiarracht chun an nuálaíocht a mhéadú agus margadh aonair an Aontais a thabhairt chun críche, i gcomhréir leis na conclúidí ó thuarascáil Draghi maidir le hiomaíochas na hEorpa; á chur i bhfios go láidir, i gcomhthéacs na n-éagothromaíochtaí réigiúnacha, go bhfuil fadhb ann leis an deighilt leanúnach nuálaíochta agus á mholadh go mbeadh cur chuige saincheaptha áitbhunaithe ann chun nuálaíocht agus cóineasú eacnamaíoch a chothú ar fud na réigiún agus chun an bhearna nuálaíochta a laghdú; á iarraidh go mbeadh ról níos láidre ag an nuálaíocht áitiúil agus réigiúnach maidir le héiceachórais iomaíocha taighde agus nuálaíochta a thógáil agus comhtháthú críochach a chur chun cinn; á chur i bhfios go bhfuil tionscnaimh nua de chuid an Aontais ann, amhail gleannta nuálaíochta réigiúnacha agus comhpháirtíochtaí le haghaidh nuálaíocht réigiúnach, arb é is aidhm leo críocha a nascadh le leibhéil éagsúla feidhmíochta nuálaíochta agus dul i ngleic leis an mbearna nuálaíochta; á chur in iúl go bhfuil sí den tuairim go dtreiseoidh an cur chuige sin an neamhspleáchas réigiúnach, lena gcuirfear ar chumas na n-údarás áitiúil agus réigiúnach beartais agus cuspóirí an Aontais a mhúnlú i gcomhréir lena riachtanais, lena saintréithe agus lena n-acmhainneachtaí sonracha, agus prionsabal na comhpháirtíochta á chosaint ag an am céanna;

14.á chur in iúl go bhfuil sí suite de gur gá don bheartas comhtháthaithe leanúint de phrionsabal an aistrithe chóir a chothú, agus aghaidh á tabhairt ar riachtanais shonracha na réigiún, agus gan aon chríoch ná aon duine a fhágáil ar lár ag an am céanna; á iarraidh go leanfar de phróiseas an aistrithe chóir a mhaoiniú, agus an Ciste um Aistriú Cóir comhtháite go hiomlán i Rialachán na bhForálacha Coiteanna agus acmhainní airgeadais atreisithe aige don chlárthréimhse tar éis 2027; ag cur béim ar an bhfíoras, mar sin féin, gur gá measúnú a dhéanamh ar thionchar an Chiste um Aistriú Cóir ar chlaochlú na réigiún incháilithe agus, agus é á áirithiú go leanfaidh sé de bheith mar chuid den bheartas comhtháthaithe, a chur chuige a bheachtú sa CAI nua ar bhonn na dtorthaí agus na mbeart nithiúil chun folláine eacnamaíoch agus shóisialta na bpobal a ndéantar difear dóibh a áirithiú;

15.á chur i bhfios go láidir gur gá feabhas a chur ar an gcaidreamh idir an beartas comhtháthaithe agus rialachas eacnamaíoch an Aontais, agus cur chuige pionósach á sheachaint; á chur i bhfáth gur cheart don Seimeastar Eorpach cuspóirí an bheartais comhtháthaithe faoi Airteagail 174 agus 175 CFAE a chomhlíonadh; á iarraidh go mbeadh na réigiúin rannpháirteach i gcomhlíonadh na gcuspóirí sin agus go mbeadh cur chuige críochach níos láidre ann; á iarraidh go ndéanfaí próiseas machnaimh ar choincheap na coinníollachta maicreacnamaíche agus go bhféachfaí an bhféadfaí cineálacha nua coinníollachta a chur in ionad an choincheapa sin, chun na dúshláin nua atá romhainn a léiriú ar bhealach níos fearr;

16.á chur in iúl gur cúis bhuartha di an méadú atá ag teacht ar líon na réigiún atá i sáinn forbartha, atá marbhánta ó thaobh an gheilleagair de agus atá thíos le meath géar déimeagrafach agus rochtain theoranta ar sheirbhísí bunriachtanacha; á iarraidh, dá bhrí sin, go ndéanfaí coigeartú suas ar chómhaoiniú do thionscadail atá dírithe ar sheirbhísí bunriachtanacha a neartú; á chur i bhfáth go bhfuil ról ag ionstraimí an bheartais comhtháthaithe maidir le tacú le réigiúin agus ceantair áitiúla éagsúla atá ag déileáil le héabhlóid dhéimeagrafach a dhéanann difear do cheart fanachta éifeachtach ndaoine, lena n-áirítear, i measc nithe eile, dúshláin a bhaineann le dídhaonrú, aosú, míchothromaíochtaí inscne, imirce daoine oilte, ganntanais scileanna agus míchothromaíochtaí lucht saothair ar fud na réigiún; á aithint go bhfuil gá le dreasachtaí eacnamaíocha spriocdhírithe agus le hidirghabhálacha struchtúracha chun gníomhú in aghaidh na bhfeiniméan sin; á iarraidh, sa chomhthéacs sin, go ndéanfaí cláir spriocdhírithe a chur chun feidhme chun tallann a mhealladh, a fhorbairt agus a choinneáil, go háirithe i réigiúin ina bhfuil eis-sreafaí suntasacha oibrithe oilte, trí éiceachórais oideachais, cultúir, fiontraíochta agus nuálaíochta a chothú atá i gcomhréir le riachtanais agus deiseanna eacnamaíocha áitiúla agus réigiúnacha;

17.ag aithint a thábhachtaí atá sé tacú le réitigh shonracha agus iad a mhaoiniú do réigiúin a bhfuil deacrachtaí eacnamaíocha tromchúiseacha acu le fada nó a bhfuil míbhuntáistí móra buana nádúrtha agus déimeagrafacha acu; á athdhearbhú gur gá soláthar seirbhísí bunriachtanacha ardcháilíochta (amhail oideachas agus cúram sláinte), iompar agus nascacht dhigiteach na réigiún sin a chothabháil agus a fheabhsú, a n-éagsúlú eacnamaíoch agus a gcruthú post a chothú, agus cabhrú leo freagairt do dhúshláin amhail ‘gaineamhlú’ na tuaithe, aosú an daonra, bochtaineacht, dídhaonrú, uaigneas agus leithlisiú, chomh maith leis an easpa deiseanna do dhaoine leochaileacha amhail daoine faoi mhíchumas; á chur i bhfios go láidir gur gá tús áite a thabhairt d’fhorbairt agus do chistiú leordhóthanach earnálacha straitéiseacha, amhail fuinneamh in-athnuaite, turasóireacht inbhuanaithe, nuálaíocht dhigiteach agus bonneagar, ar bhealach atá saincheaptha d’acmhainneacht eacnamaíoch agus d’acmhainní gach réigiúin, chun dálaí níos leithne a chruthú don fhás inginiúil agus don fhorbairt chothrom ar fud na réigiún uile, go háirithe i limistéir thuaithe, iargúlta agus bheagfhorbartha, i réigiúin teorann, ar oileáin agus sna réigiúin is forimeallaí; á mheabhrú a thábhachtaí atá naisc láidre thuaithe-uirbeacha agus tacaíocht ar leith do mhná i gceantair thuaithe;

18.ag cur béim ar an bhfíoras go bhfuil gá le cur chuige saincheaptha do na réigiúin is forimeallaí, mar a shainítear faoi Airteagal 349 CFAE, a bhfuil dúshláin struchtúracha uathúla agus charnacha rompu mar gheall ar a n-iargúltacht, méid beag a margadh, a leochaileacht i leith an athraithe aeráide agus a spleáchais eacnamaíocha; á chur i bhfios go láidir go mbíonn costais bhreise agus iomaíochas laghdaithe ann mar thoradh ar na srianta buana sin, lena n-áirítear méid beag an gheilleagair intíre, an t-achar mór ó mhór-roinn na hEorpa, a suíomh a bheith gar do thríú tíortha, oileánachas dúbailte don chuid is mó díobh, agus éagsúlú teoranta na hearnála táirgiúla, rud a fhágann go bhfuil a n-oiriúnú don aistriú glas agus don aistriú digiteach an-chasta agus an-chostasach; á chur i bhfios go láidir go bhfuil acmhainneacht mhór acu forbairt a dhéanamh tuilleadh, inter alia trí nascacht réigiúnach fheabhsaithe, príomhearnálacha amhail an geilleagar gorm, talmhaíocht inbhuanaithe, fuinneamh in-athnuaite, gníomhaíochtaí spáis, taighde nó éiceathurasóireacht; á iarraidh an athuair ar an gCoimisiún, le fada an lá, machnamh cuí a dhéanamh ar thionchar na reachtaíochta nua uile atá beartaithe ar na réigiúin is forimeallaí, d’fhonn ualaí rialála díréireacha agus éifeachtaí díobhálacha ar gheilleagair na réigiún sin a sheachaint;

19.á chur i bhfios go láidir go bhfuil dúshláin dá gcuid féin ag bailte, cathracha agus ceantair uirbeacha, amhail paistí móra ina bhfuil an bhochtaineacht, fadhbanna tithíochta, plódú tráchta agus droch-cháilíocht aeir, rud a chruthaíonn dúshláin don chomhtháthú sóisialta agus eacnamaíoch a chruthaítear le forbairt chríochach neamh-chomhchuí; ag cur béim ar an bhfíoras go bhfuil gá le clár oibre sonrach do chathracha agus á iarraidh go ndéanfaí a naisc le limistéir uirbeacha fheidhmiúla a dhoimhniú, lena gcuimsítear cathracha agus bailte beaga, chun a áirithiú go scaipfear na tairbhí eacnamaíocha agus sóisialta ar bhealach níos cothroime ar fud na críche; á thabhairt chun suntais gur gá comhordú a neartú idir tionscnaimh an Chláir Oibre Uirbigh don Aontas agus ionstraimí an bheartais comhtháthaithe, agus tús áite á thabhairt do chur chuige comhtháite lena gcuirtear san áireamh sainiúlachtaí críochacha agus dúshláin atá ag teacht chun cinn; á iarraidh, thairis sin, go mbeadh rochtain níos dírí ar an Aontais ag údaráis réigiúnacha agus áitiúla, chomh maith le cathracha agus údaráis uirbeacha, trí úsáid infheistíochtaí críochacha comhtháite a leathnú inter alia;

20.á chur i bhfáth gur gá leanúint d’infheistíochtaí i dtithíocht inacmhainne agus iad a neartú laistigh de chreat an bheartais comhtháthaithe, agus a suntas do na réigiúin agus do na cathracha araon a aithint; á thabhairt chun suntais gur gá na hathruithe atá ábhartha maidir le hinfheistíocht a dhéanamh i dtithíocht a chothú ar bhonn níos leithne ná an dá fhéidearthacht atá ann faoi láthair (éifeachtúlacht fuinnimh agus tithíocht shóisialta); ag cur béim ar an ról tábhachtach atá ag an mbeartas comhtháthaithe maidir leis na tionscnaimh sin a chur i bhfeidhm agus a chomhordú; á chreidiúint, thairis sin, gur tábhachtach inacmhainneacht tithíochta a áireamh i dtionscnamh URBACT;

21.á chur i bhfáth go bhfuil tábhacht straitéiseach ag baint le réigiúin teorann seachtraí láidre do shlándáil agus athléimneacht an Aontais; á iarraidh ar an gCoimisiún tacú leis na Ballstáit agus leis na réigiúin atá thíos le cogadh foghach na Rúise i gcoinne na hÚcráine, go háirithe na réigiúin ar theorainn thoir an Aontais, trí na Treoirlínte maidir le Státchabhair réigiúnach a athbhreithniú Teachtaireacht ón gCoimisiún an 29 Aibreán 2021 dar teideal Guidelines on regional State aid [Treoirlínte maidir le Státchabhair réigiúnach] (IO C 153, 29.4.2021, lch. 1)., trí uirlisí agus infheistíochtaí saincheaptha faoin mbeartas comhtháthaithe, chomh maith le tacú leo an leas is fearr is féidir a bhaint as na féidearthachtaí a chuirtear ar fáil le cistí an bheartais comhtháthaithe, lena n-áirítear Interreg, ar bhealach solúbtha, chun cabhrú le déileáil le tionchar díobhálach socheacnamaíoch an chogaidh ar a bpobail agus ar a gcríocha; á iarraidh, thairis sin, go dtabharfaí tacaíocht do réigiúin a bhfuil teorainn acu le tíortha is iarrthóirí amhail an Úcráin agus an Mholdóiv chun naisc a neartú agus a lánpháirtiú san Aontas a chur chun cinn;

22.á thabhairt chun suntais go bhfuil breisluach ag an gcomhar críochach i gcoitinne agus comhar trasteorann go háirithe; á chur i bhfios go láidir a thábhachtaí atá Interreg do réigiúin trasteorann, lena n-áirítear na réigiúin is forimeallaí; ag cur béim ar an ról tábhachtach atá aici maidir le rannchuidiú lena bhforbairt agus le constaicí trasteorann a shárú, lena n-áirítear muinín a chothú thar theorainneacha, naisc iompair a fhorbairt, bacainní dlí agus riaracháin a shainaithint agus a laghdú agus soláthar agus úsáid seirbhísí poiblí trasteorann a mhéadú, i measc nithe eile; á mheas gurb é Interreg príomhionstraim an Aontais chun dul i ngleic leis na bacainní leanúnacha trasteorann atá os comhair seirbhísí éigeandála, agus á mholadh go ndíreofaí níos mó ar na seirbhísí sin; á chur i bhfios go láidir gur minic a bhíonn dúshláin shonracha roimh limistéir trasteorann, lena n-áirítear limistéir ag teorainneacha seachtracha an Aontais a roinneann teorainn le tíortha is ionsaitheoirí; á chreidiúint nach mór tacú le réigiúin teorann an Aontais, a bhfuil dúshláin iomadúla rompu, agus á chur in iúl go bhfuil sí den tuairim nach mór acmhainní méadaithe a chur ar fáil dóibh; á chur in iúl gur geal léi an rialachán nua maidir le BRIDGEforEU; ag cur béim ar a thábhachtaí atá tionscadail ar mhionscála agus trasteorann agus á chur i bhfáth go bhfuil gá le cur chun feidhme éifeachtach ar an láthair; á iarraidh ar an gCoimisiún na Ballstáit a spreagadh chun tacú go gníomhach le feachtais múscailte feasachta i réigiúin a roinneann teorainn chun tionchar an chomhair trasteorann a uasmhéadú;

23.ag meabhrú gur gá ‘tacú leis an gcomhtháthú’, seachas brath go díreach ar an bprionsabal ‘gan dochar a dhéanamh don chomhtháthú’, rud a chiallaíonn nár cheart go gcuirfeadh aon ghníomhaíocht isteach ar phróiseas an chóineasaithe ná go gcuirfeadh sí le héagothromaíochtaí réigiúnacha; á iarraidh go ndéanfaí na prionsabail sin a chomhtháthú ar bhealach níos láidre mar phrionsabail trasearnála i mbeartais uile an Aontais, chun a áirithiú go dtacóidh siad le cuspóirí an chomhtháthaithe shóisialta, eacnamaíoch agus chríochaigh, mar a leagtar amach in Airteagail 3 agus 174 CFAE; á iarraidh ar an gCoimisiún, thairis sin, treoirlínte sonracha a eisiúint maidir leis an dóigh na prionsabail sin a chur chun feidhme agus a fhorfheidhmiú ar fud bheartais an Aontais, agus aird ar leith á tabhairt ar thionchar dhlíthe an Aontais ar iomaíochas na réigiún beagfhorbartha; á athdhearbhú nach mór aird chuí a thabhairt ar réaltachtaí áitiúla agus réigiúnacha sna tograí reachtacha nua; á mholadh don Choimisiún leas a bhaint as uirlisí nuálacha amhail RegHub (líonra na mol réigiúnach) chun sonraí a bhailiú maidir le tionchar bheartais an Aontais ar na réigiúin; á chur i bhfios go láidir chuige sin gur gá an measúnú tionchair chríochaigh ar reachtaíocht an Aontais a neartú, agus gnéithe críochacha den bheartas ábhartha eile a neartú ag an am céanna; á áitiú gur cheart féachaint freisin ar chur chun cinn an chomhtháthaithe mar bhealach chun dlúthpháirtíocht agus tacaíocht fhrithpháirteach a chothú i measc na mBallstát agus a réigiún; á iarraidh ar an gCoimisiún agus ar na Ballstáit leanúint dá n-iarrachtaí maidir le cumarsáid agus infheictheacht na dtairbhí a bhaineann leis an mbeartas comhtháthaithe, lena léireofaí tionchar inláimhsithe an Aontais do na saoránaigh agus lena bhfeidhmeofaí mar phríomhuirlis chun aghaidh a thabhairt ar an eoraisceipteachas; á chur in iúl gur geal léi gur seoladh an leagan ilteangach den ardán Kohesio;

24.ag tabhairt dá haire, agus é ina ábhar imní di, go bhfuil laghdú mór tagtha le blianta beaga anuas ar leibhéil leordhóthanacha cistiúcháin náisiúnta ó na Ballstáit i dtreo a réigiún is boichte; á mheabhrú a thábhachtaí atá sé prionsabal an Aontais maidir leis an mbreisíocht a urramú; á iarraidh ar an gCoimisiún a áirithiú go dtabharfaidh na húdaráis náisiúnta aird chuí ar an gcomhtháthú inmheánach agus tionscadail cistí struchtúracha agus infheistíochta á ndréachtú agus á gcur chun feidhme acu;

25.á áitiú, chomh maith le dul in oiriúint do riachtanais réigiúnacha, nach mór an beartas comhtháthaithe a chur in oiriúint don scála is lú, i.e. nach mór rochtain a bheith ag na tionscadail agus ag na hiompróirí tionscadail is lú ar chistí; á chur i bhfios gur minic gurb iad a dtionscnaimh na tionscnaimh is nuálaí agus go mbíonn tionchar suntasach acu ar an bhforbairt tuaithe; á athdhearbhú gur cheart go mbeadh rochtain ag cách ar na cistí sin, gan beann ar a méid ná ar a raon feidhme; ag formheas ghlao na Comhghuaillíochta um Chomhtháthú le haghaidh ‘Beartas Comhtháthaithe tar éis 2027 nach bhfágfaidh aon duine ar lár’;

26.á chur i bhfáth go raibh moilleanna suntasacha ar chlárthréimhse 2021-2027 mar thoradh ar mhoilleanna ar chaibidlíocht CAI, mar aon leis an bhfíoras gur chuir na Ballstáit béim níos mó ar chlársceidealú chistí STA; á chur i bhfáth a thábhachtaí atá comhaontú tráthúil sa chéad chreat eile, agus dá bhrí sin á iarraidh go ndéanfaí Rialachán na bhForálacha Coiteanna (RFC) agus an chaibidlíocht ar an mbuiséad a thabhairt chun críche bliain ar a laghad roimh thús na tréimhse cistiúcháin nua ionas gur féidir leis na Ballstáit a straitéisí cistiúcháin náisiúnta agus réigiúnacha a fhorbairt in am trátha chun aistriú rathúil chuig an gcéad tréimhse chistiúcháin eile a áirithiú agus chun a áirithiú go leanfar de na tionscadail atá ann cheana faoi CSIE;

27.á threorú dá hUachtarán an rún seo a chur ar aghaidh chuig an gComhairle, chuig an gCoimisiún, chuig Coiste Eacnamaíoch agus Sóisialta na hEorpa, chuig Coiste Eorpach na Réigiún, agus chuig parlaimintí náisiúnta agus réigiúnacha na mBallstát.