1.Jinsisti li l-enfasi reġjonali u lokali, l-approċċ ibbażat fuq il-post u l-ippjanar strateġiku tal-politika ta’ koeżjoni, kif ukoll il-mudell deċentralizzat ta’ programmazzjoni u ta’ implimentazzjoni tiegħu bbażat fuq il-prinċipju tas-sħubija b’implimentazzjoni msaħħa tal-kodiċi ta’ kondotta Ewropea, l-involviment ta’ atturi ekonomiċi u tas-soċjetà ċivili u l-governanza f’diversi livelli, huma elementi ewlenin tal-politika u jiddeterminaw l-effettività tagħha; huwa konvint bis-sħiħ li dan il-mudell tal-politika ta’ koeżjoni għandu jitkompla fir-reġjuni kollha u jiġi appofondit kull fejn hu possibbli bħala l-istrument ta’ investiment ewlieni fit-tul tal-UE biex inaqqas id-disparitajiet, jiżgura l-koeżjoni ekonomika, soċjali u territorjali u jistimula t-tkabbir sostenibbli reġjonali u lokali f’konformità ma’ strateġiji tal-UE, jipproteġi l-ambjent, u bħala kontributur ewlieni għall-kompetittività u t-tranżizzjoni ġusta tal-UE, kif ukoll biex jgħin jiġu indirizzati l-isfidi l-ġodda futuri;

2.Jappella għal demarkazzjoni ċara bejn il-politika ta’ koeżjoni u strumenti oħrajn, sabiex jiġu evitati koinċidenzi u kompetizzjoni bejn l-istrumenti tal-UE, tiġi żgurata l-komplementarjetà tad-diversi interventi, u tiżdied il-viżibbiltà u l-leġġibbiltà tal-appoġġ tal-UE; f’dan il-kuntest jinnota li l-fondi tal-Faċilità għall-Irkupru u r-Reżiljenza huma impenjati għall-iżvilupp u t-tkabbir ekonomiku mingħajr ma speċifikament jiffokaw fuq koeżjoni ekonomika, soċjali u territorjali bejn ir-reġjuni; huwa mħasseb dwar il-pjanijiet tal-Kummissjoni li tapplika approċċ ibbażat fuq il-prestazzjoni għall-Fondi Strutturali u ta’ Investiment Ewropej (FSIE); jirrikonoxxi li l-mekkaniżmi bbażati fuq il-prestazzjoni jistgħu jkunu strumentali biex il-politika ssir aktar effiċjenti u orjentata lejn ir-riżultati, iżda jwissi kontra li jiġi imponut l-approċċ “kulħadd f’keffa waħda” tal-mudell u jesprimi dubju serju dwar ideat biex l-iżborż tal-FSIE jintrabat mat-twettiq ta’ għanijiet ta’ riforma definiti ċentralment, aktar u aktar jekk l-għanijiet ta’ riforma ma jaqgħux fil-kamp ta’ applikazzjoni tal-kompetenza tal-livell reġjonali;

3.Jopponi kwalunkwe forma ta’ riforma ta’ ċentralizzazzjoni minn fuq għal isfel tal-programmi ta’ finanzjament tal-UE, inklużi dawk taħt ġestjoni kondiviża, bħall-politika ta’ koeżjoni u l-politika agrikola komuni, u jirrakkomanda deċentralizzazzjoni akbar tat-teħid tad-deċiżjonijiet fil-livelli lokali u reġjonali; jappella għal involviment imsaħħaħ tal-awtoritajiet lokali u reġjonali u tal-atturi ekonomiċi u tas-soċjetà ċivili f’kull stadju tal-programmi ta’ ġestjoni kondiviża tal-UE, mit-tħejjija u l-programmazzjoni sal-implimentazzjoni, it-twettiq u l-evalwazzjoni, filwaqt li wieħed iżomm f’moħħu li l-iżvilupp ekonomiku u soċjali tar-reġjuni, u l-koeżjoni territorjali bejniethom, jistgħu jitwettqu biss abbażi ta’ kooperazzjoni tajba bejn l-atturi kollha;

4.Jenfasizza li l-Fond Agrikolu Ewropew għall-Iżvilupp Rurali (FAEŻR) għandu rwol ewlieni flimkien mal-fondi tal-politika ta’ koeżjoni biex jappoġġja żoni rurali; jisħaq li t-tfassil tal-FAEŻR irid ikun allinjat mar-regoli tal-fondi tal-politika ta’ koeżjoni biex jissaħħu s-sinerġiji u jiġu ffaċilitati proġetti ta’ żvilupp rurali ffinanzjati minn aktar minn fond wieħed;

5.Huwa konvint li l-politika ta’ koeżjoni tista’ tkompli taqdi r-rwol tagħha biss jekk ikollha finanzjament sod; jissottolinja li dan jimplika li l-politika ta’ koeżjoni futura trid tkun ipprovduta b’finanzjament robust għall-perjodu finanzjarju ta’ wara l-2027; jisħaq li huwa meħtieġ li jiġi pprovdut finanzjament li huwa ambizzjuż biżżejjed u li huwa faċilment aċċessibbli biex jippermetti lill-politika ta’ koeżjoni tkompli taqdi r-rwol tagħha bħala l-politika ewlenija ta’ investiment tal-UE, filwaqt li żżomm il-flessibbiltà biex tissodisfa l-isfidi ġodda potenzjali, inkluża l-possibbiltà li jiġi ffinanzjat l-iżvilupp ta’ prodotti b’użu doppju, u biex l-awtoritajiet lokali, il-partijiet ikkonċernati u l-benefiċjarji jkunu jistgħu jrawmu b’mod effettiv l-iżvilupp lokali; huwa tal-opinjoni soda li l-kapaċità li jiġu offruti reazzjonijiet flessibbli għal sfidi imprevedibbli ma għandhiex issir għad-detriment tal-enfasi strateġika ċara fit-tul u l-objettivi tal-politika ta’ koeżjoni;

6.Jissottolinja l-importanza tal-qafas finanzjarju pluriennali (QFP) tal-UE li jmiss u r-rieżami ta’ nofs it-terminu tal-programmi tal-politika ta’ koeżjoni 2021-2027 biex ifasslu l-futur tal-politika ta’ koeżjoni; itenni l-ħtieġa ta’ politika ta’ koeżjoni aktar ambizzjuża għal wara l-2027 fil-QFP li jmiss 2028-2034; jitlob għaldaqstant li l-QFP li jmiss jiżgura li l-politika ta’ koeżjoni tkompli tirċievi mill-anqas l-istess livell ta’ finanzjament bħall-perjodu attwali f’termini reali; jappella, barra minn hekk, li l-politika ta’ koeżjoni tibqa’ intestatura separata fil-QFP il-ġdid; jisħaq li l-politika ta’ koeżjoni għandha tiġi protetta minn effetti statistiċi li jistgħu jibdlu l-eliġibbiltà ta’ reġjuni billi jinbidel il-PDG medju tal-UE; itenni l-ħtieġa ta’ riżorsi proprji ġodda tal-UE;

7.Jipproponi għalhekk li l-QFP li jmiss ikun aktar reattiv għal ħtiġijiet mhux previsti, inkluż b’marġnijiet u flessibbiltajiet suffiċjenti mill-bidu nett; jenfasizza f’dan ir-rigward, madankollu, li l-politika ta’ koeżjoni mhijiex strument ta’ kriżi u li ma għandhiex tiddevja mill-objettivi ewlenin tagħha, jiġifieri min-natura ta’ investiment fit-tul tagħha; jitlob li l-Fond ta’ Solidarjetà tal-Unjoni Ewropea jissaħħaħ, inkluż fil-prefinanzjament tiegħu, u jsir anqas burokratiku u aktar faċilment aċċessibbli, sabiex jiġi żviluppat strument xieraq li jkun kapaċi jirreaġixxi b’mod adegwat għall-konsegwenzi ekonomiċi, soċjali u territorjali ta’ diżastri naturali jew emerġenzi tas-saħħa futuri; jenfasizza l-ħtieġa tal-Parlament li jkollu kontroll adegwat fuq kwalunkwe fond u strument ta’ emerġenza;

8.Jirrikonoxxi l-ħtieġa li tintuża wkoll il-klassifikazzjoni tan-nomenklatura tal-unitajiet territorjali għall-istatistika (NUTS) 3 għal każijiet speċifiċi, b’mod li jirrikonoxxi li jeżistu inugwaljanzi fl-iżvilupp fir-reġjuni NUTS 2 kollha; huwa tal-fehma li l-PDG reġjonali per capita jrid jibqa’ l-kriterju ewlieni biex jiġu ddeterminati l-allokazzjonijiet tal-Istati Membri fl-ambitu tal-politika ta’ koeżjoni; jilqa’ l-fatt li, wara l-appelli persistenti tal-Parlament, il-Kummissjoni bdiet tikkunsidra kriterji addizzjonali Il-Qorti Ewropea tal-Awdituri, Rapid case review – Allocation of Cohesion policy funding to Member States for 2021-2027 (Analiżi rapida dwar każ speċifiku – Allokazzjoni tal-finanzjament taħt il-Politika ta’ Koeżjoni lill-Istati Membri għall-perjodu 2021-2027), Marzu 2019. bħall-emissjonijiet ta’ gassijiet serra, id-densità tal-popolazzjoni, il-livelli tal-edukazzjoni u r-rati tal-qgħad, sabiex tipprovdi ħarsa ġenerali soċjoekonomika aħjar tar-reġjuni;

9.Jisħaq li l-kundizzjonalità tal-istat tad-dritt hija kundizzjonalità globali, li tirrikonoxxi u ssaħħaħ ir-rispett għall-istat tad-dritt, anke bħala kundizzjoni abilitanti għall-finanzjament tal-politika ta’ koeżjoni, biex tiżgura li r-riżorsi tal-Unjoni jintużaw b’mod trasparenti, ġust u responsabbli b’ġestjoni finanzjarja soda; iqis li huwa meħtieġ li jissaħħaħ ir-rispett għall-istat tad-dritt u d-drittijiet fundamentali, u li jiġi żgurat li l-azzjonijiet kollha jkunu konsistenti mal-appoġġ għall-prinċipji demokratiċi, l-ugwaljanza bejn il-ġeneri u d-drittijiet tal-bniedem, inklużi d-drittijiet tal-ħaddiema, id-drittijiet tal-persuni b’diżabbiltà u d-drittijiet tat-tfal, fl-implimentazzjoni tal-politika ta’ koeżjoni; jenfasizza r-rwol importanti tal-Uffiċċju Ewropew ta’ Kontra l-Frodi (OLAF) u l-Uffiċċju tal-Prosekutur Pubbliku Ewropew (UPPE) biex jipproteġu l-interessi finanzjarji tal-Unjoni;

10.Jitlob li jsiru aktar sforzi biex jiġu ssimplifikati s-sinerġiji, u jsiru aktar flessibbli u jissaħħu, u jiġu ssimplifikati r-regoli u l-proċeduri amministrattivi li jirregolaw il-fondi tal-politika ta’ koeżjoni fil-livelli tal-UE, nazzjonali u reġjonali, filwaqt li jieħdu vantaġġ sħiħ mit-teknoloġiji disponibbli biex iżidu l-aċċessibbiltà u l-effiċjenza, jibnu fuq il-qafas ta’ ġestjoni kondiviża eżistenti u stabbilit sew, sabiex tissaħħaħ il-fiduċja fost l-utenti, u b’hekk titħeġġeġ il-parteċipazzjoni ta’ firxa usa’ ta’ atturi ekonomiċi u tas-soċjetà ċivili fi proġetti appoġġjati u jiġi massimizzat l-impatt tal-fondi; jappella għal aktar inizjattivi li jippermettu assorbiment aħjar tal-fondi ta’ koeżjoni, inklużi livelli ta’ kofinanzjament akbar, prefinanzjament ogħla, u rimborżi ta’ investiment aktar malajr; jitlob li l-amministrazzjoni lokali, b’mod partikolari li tirrappreżenta komunitajiet iżgħar, titħarreġ mil-lat tekniku għal ġestjoni amministrattiva aħjar tal-fondi; jisħaq għalhekk fuq l-importanza li jissaħħaħ il-prinċipju tal-awditu uniku, jitwessgħu aktar l-għażliet ta’ kostijiet simplifikati u jitnaqqsu l-kontrolli u l-awditi dupplikati li jikkoinċidu mas-sorveljanza nazzjonali u reġjonali għall-istess proġett u benefiċjarju, bil-għan li tiġi eliminata l-possibbiltà li jiġu ripetuti l-iżbalji fis-snin ta’ implimentazzjoni sussegwenti;

11.Jistieden lill-Kummissjoni u lill-Istati Membri jagħtu flessibbiltà akbar lir-reġjuni diġà fl-istadju tal-programmazzjoni, sabiex ikopru l-ħtiġijiet u l-ispeċifiċitajiet partikolari tagħhom, u jenfasizza l-ħtieġa li jiġu involuti l-atturi ekonomiċi u tas-soċjetà ċivili; jissottolinja li l-konċentrazzjoni tematika kienet element ewlieni fl-allinjament tal-politika ta’ koeżjoni mal-objettivi tal-Ewropa 2020; jitlob lill-Kummissjoni, għalhekk, tippreżenta s-sejbiet kollha relatati mal-implimentazzjoni tal-konċentrazzjoni tematika u tislet tagħlimiet għal proposti leġiżlattivi futuri;

12.Jirrikonoxxi li t-tranżizzjonijiet ekoloġiċi, diġitali u demografiċi jippreżentaw sfidi sinifikanti, iżda fl-istess ħin, opportunitajiet biex jintlaħaq l-objettiv tal-koeżjoni ekonomika, soċjali u territorjali; jirrikonoxxi li, mill-aspett statistiku, iż-żoni b’introjtu għoli jistgħu jgħattu l-problemi ekonomiċi f’reġjun; huwa konxju mir-riskju li jikbru d-disparitajiet reġjonali u l-inugwaljanzi soċjali u li tiżdied il-“ġeografija tal-iskuntentizza” relatata mal-proċess ta’ tranżizzjoni; jissottolinja l-ħtieġa li jintlaħqu l-objettivi tal-UE dwar is-sostenibbiltà u l-klima, u li jinżamm it-tkabbir ekonomiku kondiviż billi tissaħħaħ il-kompetittività tal-Unjoni; jappella, għalhekk, għal strateġija Ewropea li tiggarantixxi tkabbir armonjuż fl-Unjoni, filwaqt li jintlaħqu l-ħtiġijiet speċifiċi tar-reġjuni rispettivi; jafferma mill-ġdid l-impenn tiegħu li jsegwi t-tranżizzjonijiet ekoloġiċi u diġitali peress li se joħolqu opportunitajiet biex tittejjeb il-kompetittività tal-UE; jissottolinja l-ħtieġa li jsir investiment fi proġetti ta’ infrastruttura li jsaħħu l-konnettività, b’mod partikolari fit-trasport sostenibbli u intelliġenti, kif ukoll f’networks tal-enerġija u diġitali, filwaqt li jiġi żgurat li r-reġjuni kollha, inklużi dawk remoti u anqas żviluppati, ikunu integrati b’mod sħiħ fis-suq uniku u jibbenefikaw b’mod ekwu mill-opportunitajiet li jipprovdi; jenfasizza, f’dan il-kuntest, il-ħtieġa li jiġi appoġġjat l-iżvilupp tal-industriji ekoloġiċi, u jitrawmu l-ispeċifiċitajiet u t-tradizzjonijiet lokali biex tiżdied ir-reżiljenza tal-ambjent ekonomiku u s-soċjetà ċivili għall-isfidi futuri;

13.Iħeġġeġ li l-politika ta’ koeżjoni tibqa’ konsistenti bi spinta lejn innovazzjoni akbar u l-ikkompletar tas-suq uniku tal-UE, f’konformità mal-konklużjonijiet tar-rapport Draghi dwar il-kompetittività Ewropea; jissottolinja, fil-kuntest tad-disparitajiet reġjonali, il-problema tad-distakk persistenti fl-innovazzjoni, u jippromwovi approċċ ibbażat fuq il-post imfassal apposta biex titrawwem il-konverġenza fl-innovazzjoni u dik ekonomika bejn ir-reġjuni u titnaqqas id-diskrepanza fl-innovazzjoni; jappella għal rwol aktar b’saħħtu għall-innovazzjoni lokali u reġjonali biex jinbnew ekosistemi ta’ riċerka u innovazzjoni kompetittivi u tiġi promossa l-koeżjoni territorjali; jindika inizjattivi ġodda tal-UE, bħall-widien tal-innovazzjoni reġjonali u s-sħubiji għall-innovazzjoni reġjonali, li għandhom l-għan li jgħaqqdu territorji b’livelli differenti ta’ prestazzjoni fl-innovazzjoni u jindirizzaw id-diskrepanza fl-innovazzjoni; iqis li dan l-approċċ se jsaħħaħ l-awtonomija reġjonali, u jippermetti lill-awtoritajiet lokali u reġjonali jfasslu l-politiki u l-objettivi tal-UE f’konformità mal-ħtiġijiet, mal-karatteristiċi u mal-kapaċitajiet speċifiċi tagħhom, filwaqt li jiġi ssalvagwardjat il-prinċipju tas-sħubija;

14.Huwa konvint li l-politika ta’ koeżjoni jeħtieġ li tkompli trawwem il-prinċipju ta’ tranżizzjoni ġusta, u tindirizza l-ħtiġijiet speċifiċi tar-reġjuni, filwaqt li ma tħalli lill-ebda territorju u lill-ebda persuna tibqa’ lura; jitlob finanzjament kontinwu tal-proċess ta’ tranżizzjoni ġusta, bil-Fond għal Tranżizzjoni Ġusta integrat b’mod sħiħ fir-Regolament dwar Dispożizzjonijiet Komuni u mogħni b’mezzi finanzjarji adegwati għall-perjodu ta’ programmazzjoni għal wara l-2027; jenfasizza, madankollu, il-ħtieġa li jiġi vvalutat l-impatt tal-Fond għal Tranżizzjoni Ġusta fuq it-trasformazzjoni tar-reġjuni eliġibbli u, filwaqt li jiġi żgurat li jibqa’ parti mill-politika ta’ koeżjoni, jiġi rfinat l-approċċ tiegħu fil-QFP il-ġdid abbażi tas-sejbiet u miżuri konkreti biex jiġi żgurat il-benesseri ekonomiku u soċjali tal-komunitajiet affettwati;

15.Jissottolinja l-bżonn li tittejjeb ir-relazzjoni bejn il-politika ta’ koeżjoni u l-governanza ekonomika tal-UE, filwaqt li jiġi evitat approċċ punittiv; jisħaq li s-Semestru Ewropew għandu jikkonforma mal-objettivi tal-politika ta’ koeżjoni skont l-Artikoli 174 u 175 tat-TFUE; jappella għall-parteċipazzjoni tar-reġjuni fit-twettiq ta’ dawn l-objettivi u għal approċċ territorjali aktar b’saħħtu; jappella għal proċess ta’ riflessjoni dwar il-kunċett tal-kundizzjonalità makroekonomika u li tiġi esplorata l-possibbiltà li dan il-kunċett jiġi sostitwit b’forom ġodda ta’ kundizzjonalità biex jiġu riflessi aħjar l-isfidi l-ġodda li ġejjin;

16.Huwa mħasseb dwar l-għadd dejjem jikber ta’ reġjuni f’nassa tal-iżvilupp, li qed jistaġnaw ekonomikament u qed ibatu minn tnaqqis demografiku qawwi u aċċess limitat ta’ servizzi essenzjali; jappella, għalhekk, għal aġġustament ’il fuq fil-kofinanzjament għal proġetti li għandhom l-għan li jsaħħu s-servizzi essenzjali; jisħaq fuq ir-rwol tal-istrumenti tal-politika ta’ koeżjoni biex jappoġġjaw reġjuni u żoni lokali differenti li qed jiffaċċjaw l-evoluzzjoni demografika li taffettwa d-dritt effettiv tan-nies li jibqgħu fit-territorju, inkluż, fost l-oħrajn, l-isfidi relatati mad-depopolazzjoni, it-tixjiħ, l-iżbilanċi bejn il-ġeneri, l-eżodu ta’ mħuħ, in-nuqqas ta’ ħiliet u l-iżbilanċi fil-forza tax-xogħol fir-reġjuni kollha; jirrikonoxxi l-ħtieġa ta’ inċentivi ekonomiċi mmirati u interventi strutturali biex jipprevjenu dawn il-fenomeni; f’dan il-kuntest, jappella għall-implimentazzjoni ta’ programmi mmirati biex jiġi attirat, żviluppat u miżmum it-talent, b’mod partikolari fir-reġjuni li qed jesperjenzaw flussi ta’ ħruġ sinifikanti ta’ ħaddiema tas-sengħa, billi jitrawmu ekosistemi ta’ edukazzjoni, kultura, intraprenditorija u innovazzjoni li jallinjaw mal-ħtiġijiet u mal-opportunitajiet ekonomiċi lokali u reġjonali;

17.Jirrikonoxxi l-importanza li jiġu appoġġjati u ffinanzjati soluzzjonijiet speċifiċi għal reġjuni b’diffikultajiet ekonomiċi fit-tul u serji jew żvantaġġi naturali u demografiċi permanenti serji; itenni l-ħtieġa li jinżamm u jittejjeb il-forniment tas-servizzi (bħall-edukazzjoni u l-kura tas-saħħa), tat-trasport u tal-konnettività diġitali essenzjali u ta’ kwalità ta’ dawn ir-reġjuni, u jitrawmu d-diversifikazzjoni ekonomika u l-ħolqien tal-impjiegi tagħhom, u jiġu megħjuna jirreaġixxu għal sfidi bħad-deżertifikazzjoni rurali, it-tixjiħ tal-popolazzjoni, il-faqar, id-depopolazzjoni, is-solitudni u l-iżolament, kif ukoll in-nuqqas ta’ opportunitajiet għal persuni vulnerabbli bħal persuni b’diżabbiltajiet; jissottolinja l-ħtieġa li tingħata prijorità lill-iżvilupp u l-finanzjament adegwat ta’ setturi strateġiċi, bħall-enerġija rinnovabbli, it-turiżmu sostenibbli, l-innovazzjoni u l-infrastruttura diġitali, b’mod li jkunu mfassla skont il-potenzjal ekonomiku u r-riżorsi ta’ kull reġjun, sabiex jinħolqu kundizzjonijiet usa’ għat-tkabbir endoġenu u l-iżvilupp ibbilanċjat fir-reġjuni kollha, speċjalment iż-żoni rurali, remoti u anqas żviluppati, ir-reġjuni tal-fruntiera, il-gżejjer u r-reġjuni ultraperiferiċi; ifakkar fl-importanza ta’ konnessjonijiet rurali-urbani b’saħħithom u appoġġ partikolari għan-nisa f’żoni rurali;

18.Jenfasizza l-ħtieġa ta’ approċċ imfassal apposta għar-reġjuni ultraperiferiċi, kif iddefinit skont l-Artikolu 349 tat-TFUE, li jiffaċċjaw sfidi strutturali uniċi u kumulattivi minħabba l-pożizzjoni remota tagħhom, id-daqs żgħir tas-suq, il-vulnerabbiltà għat-tibdil fil-klima u d-dipendenzi ekonomiċi; jissottolinja li dawn ir-restrizzjonijiet permanenti, inkluż id-daqs żgħir tal-ekonomija domestika, id-distanza kbira mill-kontinent Ewropew, il-pożizzjoni qrib pajjiżi terzi, l-insularità doppja għall-biċċa l-kbira tagħhom, u diversifikazzjoni limitata tas-settur produttiv, jirriżultaw fi spejjeż addizzjonali u kompetittività mnaqqsa, li jagħmlu l-adattament tagħhom għat-tranżizzjoni ekoloġika u diġitali partikolarment kumplessa u għalja; jissottolinja l-potenzjal kbir tagħhom biex ikomplu jiżviluppaw, fost l-oħrajn permezz tal-konnettività reġjonali mtejba, setturi ewlenin bħall-ekonomija blu, l-agrikoltura sostenibbli, l-enerġija rinnovabbli, l-attivitajiet spazjali, ir-riċerka jew l-ekoturiżmu; itenni l-istedina li għamel żmien ilu lill-Kummissjoni biex tqis kif xieraq l-impatt ta’ kull leġiżlazzjoni proposta ġdida fuq ir-reġjuni ultraperiferiċi, bil-ħsieb li jiġu evitati piżijiet regolatorji sproporzjonati u effetti negattivi fuq l-ekonomiji ta’ dawn ir-reġjuni;

19.Jissottolinja li l-bliet żgħar, il-bliet u ż-żoni metropolitani għandhom l-isfidi tagħhom, bħal żoni konsiderevoli ta’ faqar, problemi ta’ akkomodazzjoni, konġestjoni tat-traffiku u kwalità tal-arja ħażina, li jiġġeneraw sfidi għall-koeżjoni soċjali u ekonomika maħluqa minn żvilupp territorjali mhux armonjuż; jenfasizza l-ħtieġa ta’ aġenda speċifika għall-bliet u jappella għall-approfondiment tar-rabtiet tagħhom ma’ żoni urbani funzjonali, li jinkludu bliet iżgħar, biex jiġi żgurat li l-benefiċċji ekonomiċi u soċjali jinfirxu b’mod aktar ekwu fit-territorju kollu; jenfasizza l-ħtieġa li tissaħħaħ il-koordinazzjoni bejn l-inizjattivi tal-Aġenda Urbana tal-UE u l-istrumenti tal-politika ta’ koeżjoni, biex tiffavorixxi approċċ integrat li jqis l-ispeċifiċitajiet territorjali u l-isfidi emerġenti; jappella, barra minn hekk, għal aċċess aktar dirett għall-finanzjament tal-UE għall-awtoritajiet reġjonali u lokali, kif ukoll għall-awtoritajiet tal-bliet u dawk urbani, billi fost l-oħrajn jitwessa’ l-użu tal-investimenti territorjali integrati (ITI);

20.Jisħaq fuq il-ħtieġa li jitkomplew u jissaħħu l-investimenti fl-akkomodazzjoni affordabbli fil-qafas tal-politika ta’ koeżjoni, filwaqt li jiġi rikonoxxut is-sinifikat tagħha kemm għar-reġjuni kif ukoll għall-bliet; jenfasizza l-ħtieġa li jitrawmu l-bidliet tagħha rilevanti għall-investiment fl-akkomodazzjoni lil hinn miż-żewġ possibbiltajiet attwali (l-effiċjenza enerġetika u l-akkomodazzjoni soċjali); jenfasizza r-rwol importanti li għandha l-politika ta’ koeżjoni fit-tnedija u l-koordinazzjoni ta’ dawn l-inizjattivi; jemmen, barra minn hekk, li huwa importanti li tiġi inkluża l-affordabbiltà tal-akkomodazzjoni fl-inizjattiva URBACT;

21.Jisħaq fuq l-importanza strateġika ta’ reġjuni tal-fruntieri esterni b’saħħithom għas-sigurtà u għar-reżiljenza tal-UE; jistieden lill-Kummissjoni tappoġġja lill-Istati Membri u lir-reġjuni affettwati mill-gwerra ta’ aggressjoni tar-Russja kontra l-Ukrajna, b’mod partikolari r-reġjuni mal-fruntiera tal-Lvant tal-UE, billi tirrevedi l-Linji Gwida dwar l-għajnuna reġjonali mill-Istat Il-komunikazzjoni tal-Kummissjoni tad-29 ta’ April 2021 bit-titolu “Linji Gwida dwar l-għajnuna reġjonali mill-Istat” (ĠU C 153, 29.4.2021, p. 1)., permezz ta’ għodod u investimenti mfassla apposta skont il-politika ta’ koeżjoni, kif ukoll tappoġġjahom biex jagħmlu l-aħjar użu mill-possibbiltajiet offruti mill-fondi tal-politika ta’ koeżjoni, inkluż Interreg, biex tgħinhom ilaħħqu mal-impatt soċjoekonomiku detrimentali tal-gwerra fuq il-popolazzjonijiet u t-territorji tagħhom; jitlob, barra minn hekk, li jingħata appoġġ lir-reġjuni li jmissu ma’ pajjiżi kandidati bħall-Ukrajna u l-Moldova biex jissaħħu l-konnessjonijiet u tiġi promossa l-integrazzjoni tagħhom fl-UE;

22.Jenfasizza l-valur miżjud tal-kooperazzjoni territorjali b’mod ġenerali u l-kooperazzjoni transfruntiera b’mod partikolari; jissottolinja l-importanza ta’ Interreg għar-reġjuni transfruntiera, inklużi r-reġjuni ultraperiferiċi; jenfasizza r-rwol importanti tiegħu biex jikkontribwixxi għall-iżvilupp tagħhom u jegħleb l-ostakli transfruntiera, inkluż jibni l-fiduċja bejn il-fruntieri, jiżviluppa konnessjonijiet tat-trasport, jidentifika u jnaqqas l-ostakli legali u amministrattivi u jżid il-provvista u l-użu ta’ servizzi pubbliċi transfruntiera, fost oħrajn; iqis Interreg bħala l-istrument ewlieni tal-UE biex jindirizza l-ostakli transfruntiera persistenti li jiffaċċjaw is-servizzi ta’ emerġenza, u jipproponi li jkun hemm enfasi aktar prominenti fuq dawn is-servizzi; jissottolinja l-fatt li ż-żoni transfruntiera, inklużi ż-żoni fil-fruntieri esterni tal-UE, u li jmissu ma’ pajjiżi aggressuri spiss jiffaċċjaw sfidi speċifiċi; jemmen li r-reġjuni tal-fruntiera tal-UE, li jiffaċċjaw diversi sfidi, iridu jiġu appoġġjati u huwa tal-fehma li għandhom jiġu pprovduti b’mezzi akbar; jilqa’ r-regolament il-ġdid dwar BRIDGEforEU; jenfasizza l-importanza ta’ proġetti fuq skala żgħira u transfruntiera u jisħaq fuq il-ħtieġa ta’ implimentazzjoni effettiva fil-prattika; jistieden lill-Kummissjoni tħeġġeġ lill-Istati Membri jappoġġjaw b’mod attiv il-kampanji ta’ sensibilizzazzjoni f’reġjuni li jmissu magħhom sabiex jiġi massimizzat l-impatt tal-kooperazzjoni transfruntiera;

23.Ifakkar fil-ħtieġa ta’ “koeżjoni ta’ appoġġ”, pjuttost milli sempliċi dipendenza fuq il-prinċipju ta’ “la tagħmilx ħsara lill-koeżjoni”, li jfisser li l-ebda azzjoni ma għandha tfixkel il-proċess ta’ konverġenza jew tikkontribwixxi għal disparitajiet reġjonali; jappella għal integrazzjoni aktar b’saħħitha ta’ dawn il-prinċipji bħala prinċipju trażversali fil-politiki kollha tal-UE, sabiex jiġi żgurat li jappoġġjaw l-objettivi tal-koeżjoni soċjali, ekonomika u territorjali, kif stipulat fl-Artikoli 3 u 174 tat-TFUE; jistieden, barra minn hekk, lill-Kummissjoni toħroġ linji gwida speċifiċi dwar kif għandhom jiġu implimentati u infurzati dawn il-prinċipji fil-politiki kollha tal-UE, billi tingħata attenzjoni partikolari lill-impatt tal-liġijiet tal-UE fuq il-kompetittività tar-reġjuni anqas żviluppati; itenni li l-proposti leġiżlattivi ġodda jeħtieġ li jqisu r-realtajiet lokali u reġjonali; jissuġġerixxi li l-Kummissjoni tuża għodod innovattivi bħal RegHub (in-network ta’ ċentri reġjonali) biex tiġbor data dwar l-impatt tal-politiki tal-UE fuq ir-reġjuni; għal dan l-għan, jissottolinja l-ħtieġa li tissaħħaħ il-valutazzjoni tal-impatt territorjali tal-leġiżlazzjoni tal-UE, b’tisħiħ simultanju tal-aspetti territorjali ta’ politiki rilevanti oħra; jinsisti li l-promozzjoni tal-koeżjoni għandha titqies ukoll bħala mod kif jitrawmu s-solidarjetà u l-appoġġ reċiproku fost l-Istati Membri u r-reġjuni tagħhom; jistieden lill-Kummissjoni u lill-Istati Membri jkomplu bl-isforzi tagħhom rigward il-komunikazzjoni u l-viżibbiltà tal-benefiċċji tal-politika ta’ koeżjoni, u dawn juru liċ-ċittadini l-impatt tanġibbli tal-UE u jservu bħala għodda ewlenija biex jindirizzaw l-Ewroxettiċiżmu; jilqa’ t-tnedija tal-verżjoni multilingwi tal-pjattaforma Kohesio;

24.Jinnota bi tħassib it-tnaqqis kbir f’dawn l-aħħar snin tal-livelli adegwati ta’ finanzjament nazzjonali tal-Istati Membri għall-ifqar reġjuni tagħhom; ifakkar fl-importanza li tiġi rispettata r-regola tal-UE dwar l-addizzjonalità; jistieden lill-Kummissjoni tiżgura li l-awtoritajiet nazzjonali jqisu kif xieraq il-koeżjoni interna meta jabbozzaw u jimplimentaw il-proġetti tal-fondi strutturali u ta’ investiment;

25.Jinsisti li, minbarra li taġġusta l-ħtiġijiet reġjonali, il-politika ta’ koeżjoni trid tiġi adattata għall-iżgħar skala, jiġifieri l-fondi jridu jkunu aċċessibbli għall-iżgħar proġetti u għal dawk li jkollhom il-proġetti; jirrimarka li l-inizjattivi tagħhom sikwit huma l-aktar innovattivi u għandhom impatt sinifikanti fuq l-iżvilupp rurali; itenni li dawn il-fondi għandhom ikunu aċċessibbli għal kulħadd, irrispettivament mid-daqs jew il-kamp ta’ applikazzjoni tagħhom; japprova t-talba tal-Alleanza għall-Koeżjoni, għal “Politika ta’ Koeżjoni wara l-2027 li ħadd ma jitħalla jibqa’ lura”;

26.Jisħaq li d-dewmien fin-negozjati tal-QFP, flimkien mal-fatt li l-Istati Membri poġġew enfasi akbar fuq il-programmazzjoni tal-fondi tal-Faċilità għall-Irkupru u r-Reżiljenza, wasslu għal dewmien konsiderevoli fil-perjodu ta’ programmazzjoni 2021-2027; jisħaq fuq l-importanza ta’ ftehim f’waqtu fil-qafas li jmiss, u għalhekk jitlob li r-Regolament dwar Dispożizzjonijiet Komuni (RDK) u n-negozjati dwar il-baġit jiġu ffinalizzati mill-anqas sena qabel il-bidu tal-perjodu ta’ finanzjament il-ġdid sabiex l-Istati Membri jkunu jistgħu jiżviluppaw l-istrateġiji ta’ finanzjament nazzjonali u reġjonali tagħhom fi żmien xieraq biex jiżguraw tranżizzjoni ta’ suċċess għall-perjodu ta’ finanzjament li jmiss u l-kontinwazzjoni ta’ proġetti FSIE eżistenti;

27.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Kumitat Ekonomiku u Soċjali Ewropew, lill-Kumitat Ewropew tar-Reġjuni u lill-parlamenti nazzjonali u reġjonali tal-Istati Membri;