“1. Soġġett għall-paragrafi 2 sa 5, l-Istati Membri għandhom jilħqu l-mira tal-mili ta’ 83 % għall-kapaċità aggregata tal-faċilitajiet kollha ta’ ħżin ta’ gass taħt l-art li jinsabu fuq it-territorju tagħhom u li huma interkonnessi direttament ma’ żona tas-suq fit-territorju tagħhom u għall-faċilitajiet tal-ħżin elenkati fl-Anness Ib fi kwalunkwe żmien bejn l-1 ta’ Ottubru u l-1 ta’ Diċembru kull sena.”;

“2. Minkejja l-paragrafu 1 u mingħajr preġudizzju għall-obbligi ta' Stati Membri oħra li jimlew il-faċilitajiet tal-ħżin tal-gass taħt l-art ikkonċernati, il-mira tal-mili għal kull Stat Membru li fih ikunu jinsabu l-faċilitajiet tal-ħżin tal-gass taħt l-art għandha titnaqqas għal volum li jikkorrispondi għal 32,28 % tal-konsum annwali medju tal-gass matul il- ħames snin preċedenti għal dak l-Istat Membru.”;

“5a. Minkejja l-paragrafu 1 u mingħajr preġudizzju għall-obbligu ta’ Stati Membri oħra li jimlew il-faċilitajiet ta’ ħżin ta’ gass taħt l-art ikkonċernati, l-Istati Membri jistgħu jiddeċiedu li jiddevjaw sa massimu ta’ erba’ punti perċentwali, mill-mira tal-mili stabbilita fil-paragrafu 1 għal kull Stat Membru jekk il-kundizzjonijiet tas-suq ikunu sfavorevoli għall-mili tal-faċilitajiet ta’ ħżin ta’ gass taħt l-art.

5b.F’każijiet debitament ġustifikati ta’ kundizzjonijiet tas-suq sfavorevoli persistenti, u dment li l-provvista tas-sigurtà tal-Unjoni u tal-Istati Membri ma tiġix kompromessa, il-Kummissjoni għandha s-setgħa li tadotta atti delegati f’konformità mal-Artikolu 19 biex temenda dan ir-Regolament billi żżid id-devjazzjoni permessa għall-Istati Membri, kif stabbilit fil-paragrafu 5a sa massimu ta’ erba’ punti perċentwali.

Fil-valutazzjoni tagħha, il-Kummissjoni għandha tqis b’mod partikolari l-livell tal-mili tal-ħażniet fl-Istati Membri, il-provvista globali tal-gass, il-prospettiva tal-provvista staġjonali tal-ENTSOG, u l-indikazzjonijiet ta’ manipulazzjoni tas-suq. Tista’ tqis ukoll il-miżuri tal-Istati Membri, bħall-introduzzjoni għall-gass ta’ miżuri għat-tnaqqis tad-domanda tal-gass li jiksbu tnaqqis ekwivalenti fil-gass matul l-istaġun tal-irtirar ta’ wara.

5c.L-Istati Membri msemmija fil-paragrafu 2 jistgħu taħt l-istess kundizzjonijiet bħal dawk previsti fil-paragrafu 5a jiddeċiedu li jiddevjaw sa massimu ta’ 1,55 % taħt il-volum stabbilit fil-paragrafu 2.

5d.Qabel ma juża kwalunkwe devjazzjoni minn dawk previsti fil-paragrafi 5a u 5c, kull Stat Membru għandu jikkonsulta lill-Kummissjoni u jipprovdi mingħajr dewmien żejjed ġustifikazzjoni għad-deċiżjoni tiegħu. Il-Kummissjoni għandha tinforma minnufih lill-GCG rigward l-effetti kumulattivi tad-devjazzjonijiet kollha skont il-paragrafi 5a u 5c u lil kwalunkwe Stat Membru affettwat direttament.”;

“6. Sabiex tintlaħaq il-mira tal-mili, l-Istati Membri għandhom jieħdu l-miżuri kollha meħtieġa u jagħmlu ħilithom biex isegwu l-pjan għall-mili definit f’konformità mal-paragrafu 7.

7. L-Istati Membri b’faċilitajiet ta’ ħżin ta’ gass taħt l-art għandhom jibagħtu lill-Kummissjoni fi żmien debitu pjan indikattiv għall-mili għas-sena kalendarja kollha biex tintlaħaq il-mira annwali tal-mili tal-ħażniet tal-gass stabbilita fil-paragrafu 1. Il-pjan għandu jinkludi informazzjoni teknika għall-faċilitajiet ta’ ħżin ta’ gass taħt l-art fuq it-territorju tiegħu u għandu jkun interkonness direttament maż-żona tas-suq tiegħu f’forma aggregata.”;

“10. L-awtorità kompetenti ta’ kull Stat Membru għandha timmonitorja kontinwament il-konformità mal-mira tal-mili kif stabbilita fil-pjan għall-mili u għandha tirrapporta regolarment u tal-anqas darba fix-xahar lill-Kummissjoni u lill-GCG. Jekk ikun previst li l-mira ma tistax tintlaħaq, l-awtorità kompetenti għandha, mingħajr dewmien, tieħu miżuri effettivi biex tilħaq il-mira. L-Istati Membri għandhom jinfurmaw lill-Kummissjoni u lill-GCG bil-miżuri li jkunu ttieħdu.

11.Fil-każ ta’ devjazzjoni sostanzjali u sostnuta minn Stat Membru mill-pjan għall-mili, li tikkomprometti l-ilħuq tal-mira tal-mili jew fil-każ ta’ devjazzjoni mill-mira tal-mili, il-Kummissjoni għandha, meta xieraq, wara li tikkonsulta lill-GCG u lill-Istati Membri kkonċernati, toħroġ rakkomandazzjoni lil dak l-Istat Membru jew lill-Istati Membri l-oħra kkonċernati rigward miżuri li jridu jittieħdu immedjatament biex tiġi rimedjata d-devjazzjoni jew biex jiġi minimizzat l-impatt fuq is-sigurtà tal-provvista, filwaqt li tqis, fost l-oħrajn, il-kundizzjonijiet sfavorevoli possibbli tas-suq u l-ispeċifiċitajiet tal-Istati Membri, bħall-karatteristiċi tekniċi u d-daqs tal-faċilitajiet ta’ ħżin ta’ gass taħt l-art fir-rigward tal-konsum domestiku tal-gass, l-importanza dejjem tonqos tal-faċilitajiet ta’ ħżin ta’ gass taħt l-art b’valur kalorifiku baxx għas-sigurtà tal-provvista tal-gass, u l-kapaċità eżistenti ta’ ħżin tal-LNG.

11a.Meta Stat Membru ma jilħaqx il-mira tal-mili stabbilita fil-paragrafu 1 u b’hekk jipperikola s-sigurtà tal-provvista tal-Unjoni, il-Kummissjoni għandha tadotta att ta’ implimentazzjoni li jistabbilixxi pjan għall-mili għal dak l-Istat Membru għas-sena ta’ wara, abbażi tal-informazzjoni teknika pprovduta minn kull Stat Membru u b’kont meħud tal-valutazzjoni tal-GCG. Dak l-att ta’ implimentazzjoni għandu jiġi adottat f’konformità mal-proċedura ta’ eżami msemmija fl-Artikolu 18a(2). Għandu jkun ibbażat fuq valutazzjoni tas-sitwazzjoni ġenerali tas-sigurtà tal-provvista tal-gass u l-iżvilupp tad-domanda u tal-provvista tal-gass fl-Unjoni u fl-Istati Membri individwali bl-għan li tiġi ssalvagwardjata s-sigurtà tal-provvista tal-gass.”;

“1. L-Istati Membri għandhom jieħdu l-miżuri kollha meħtieġa biex jilħqu l-mira tal-mili stabbilita skont l-Artikolu 6a. Meta jiżguraw li l-mira tal-mili tkun intlaħqet, l-Istati Membri għandhom jagħtu prijorità, meta possibbli, lil miżuri bbażati fuq is-suq.”;

“2. Il-miżuri meħuda mill-Istati Membri skont il-paragrafu 1 għandhom ikunu limitati għal dak li huwa meħtieġ biex tintlaħaq il-mira tal-mili. Għandhom ikunu definiti b’mod ċar, trasparenti, proporzjonati, nondiskriminatorji u verifikabbli. Ma għandhomx ifixklu bla bżonn il-kompetizzjoni jew il-funzjonament tajjeb tas-suq intern tal-gass, iżidu bla bżonn l-ispejjeż tal-enerġija jew jipperikolaw is-sigurtà tal-provvista tal-gass ta’ Stati Membri oħra jew tal-Unjoni. L-Istati Membri għandhom jinfurmaw lill-Kummissjoni u lill-GCG bi kwalunkwe miżura tali.”;

“1. Stat Membru mingħajr faċilitajiet ta’ ħżin ta’ gass taħt l-art għandu jiżgura li parteċipanti fis-suq f’dak l-Istat Membru jkollhom stabbiliti arranġamenti ma’ operaturi tas-sistema tal-ħżin taħt l-art jew ma’ parteċipanti oħra fis-suq fl-Istati Membri b’faċilitajiet ta’ ħżin ta’ gass taħt l-art. Dawk l-arranġamenti għandhom jipprevedu l-użu, sal-1 ta’ Diċembru, tal-volumi tal-ħżin li jikkorrispondu għal tal-anqas 15 % tal-konsum annwali medju tal-gass tul il-ħames snin preċedenti tal-Istat Membru mingħajr faċilitajiet ta’ ħżin ta’ gass taħt l-art. Madankollu, meta l-kapaċità ta’ trażmissjoni transfruntiera jew limitazzjonijiet tekniċi oħra jipprevjenu lil Stat Membru mingħajr faċilitajiet ta’ ħżin ta’ gass taħt l-art milli juża bis-sħiħ 15 % ta’ dawk il-volumi tal-ħżin, dak l-Istat Membru għandu jaħżen biss dawk il-volumi li jkunu teknikament possibbli.”;

“L-Istati Membri mingħajr faċilitajiet ta’ ħżin ta’ gass taħt l-art għandhom juru li huma jikkonformaw mal-paragrafu 1 u għandhom jinnotifikaw lill-Kummissjoni skont dan.”;

“(a) jiżguraw li, sal-1 ta’ Diċembru, il-volumi tal-ħżin jikkorrispondu tal-anqas għall-użu medju tal-kapaċità ta’ ħżin tul il-ħames snin preċedenti, iddeterminati, fost l-oħrajn, billi jitqiesu l-flussi matul l-istaġun tal-irtirar tul il-ħames snin preċedenti mill-Istati Membri fejn ikunu jinsabu l-faċilitajiet tal-ħżin; jew”;

“6. Sakemm ma jkunx speċifikat mod ieħor fl-Anness Ib, fil-każ ta’ faċilitajiet ta’ ħżin ta’ gass taħt l-art li jinsabu fi Stat Membru wieħed li ma jkunux koperti mill-paragrafu 5 iżda li jkunu konnessi direttament maż-żona tas-suq ta’ Stat Membru ieħor, dak l-Istat Membru l-ieħor għandu jiżgura li bejn l-1 ta’ Ottubru u l-1 ta’ Diċembru l-volumi tal-ħżin jikkorrispondu tal-anqas mal-medja tal-kapaċità ta’ ħżin riżervata fil-punt transfruntier rilevanti tul il-ħames snin preċedenti.”;

“1. L-operaturi tas-sistema tal-ħżin għandhom jirrapportaw il-livell tal-mili lill-awtorità kompetenti f’kull Stat Membru fejn ikunu jinsabu l-faċilitajiet ta’ ħżin ta’ gass taħt l-art ikkonċernati u, jekk applikabbli, lil entità nominata minn dak l-Istat Membru (l-“entità nominata”) kif stabbilit skont l-Artikolu 6a.

2.L-awtorità kompetenti u, jekk applikabbli, l-entità nominata minn kull Stat Membru għandhom jimmonitorjaw il-livelli tal-mili tal-faċilitajiet ta’ ħżin ta’ gass taħt l-art fit-territorju tagħhom fl-aħħar ta’ kull xahar u jirrapportaw kull xahar ir-riżultati lill-Kummissjoni mingħajr ebda dewmien. L-awtorità kompetenti għandha tinkludi wkoll informazzjoni dwar is-sehem ta’ gass li joriġina fil-Federazzjoni Russa li jkun qed jinħażen f’dak l-Istat Membru, meta tali informazzjoni tkun disponibbli.

Il-Kummissjoni tista’, meta xieraq, tistieden lill-Aġenzija tal-Unjoni Ewropea għall-Kooperazzjoni tar-Regolaturi tal-Enerġija (ACER) biex tassisti b’tali monitoraġġ.”;

“4. Il-GCG għandu jassisti lill-Kummissjoni fil-monitoraġġ tal-mira tal-mili, u għandu jiżviluppa gwida għall-Kummissjoni dwar miżuri adegwati biex jiġi żgurat allinjament aħjar f’każ li r-rati tal-mili tal-Istati Membri jikkompromettu l-ilħuq tal-mira tal-mili, jew biex tiġi żgurata l-konformità mal-mira tal-mili.

4a.Meta xieraq, il-Kummissjoni għandha timplimenta miżuri li jgħinu lill-Istati Membri jilħqu l-mira tal-mili, inklużi miżuri li jħeġġu l-parteċipazzjoni fil-mekkaniżmu ta’ aggregazzjoni tad-domanda u xiri konġunt stabbilit fl-ambitu tar-Regolament (UE) 2022/2576 (“AggregateEU”)* .

5.L-Istati Membri u, meta xieraq, il-Kummissjoni għandhom jieħdu l-miżuri meħtieġa biex jilħqu l-mira tal-mili u biex jinfurzaw l-obbligi tal-ħżin fuq il-parteċipanti fis-suq. Dawn il-miżuri jistgħu jinkludu sanzjonijiet u multi deterrenti biżżejjed, bħal penali finanzjarji adegwati.

___________________

* Ir-Regolament tal-Kunsill (UE) 2022/2576 tad-19 ta’ Diċembru 2022 li jsaħħaħ is-solidarjetà permezz ta’ koordinazzjoni aħjar tax-xiri tal-gass, parametri referenzjarji affidabbli tal-prezzijiet u skambji transfruntiera tal-gass (ĠU L 335, 29.12.2022, p. 1, ELI: http://data.europa.eu/eli/reg/2022/2576/oj).”;

“(da) l-informazzjoni dwar is-sehem ta’ gass li joriġina fil-Federazzjoni Russa maħżun fil-ħażniet tal-UE, ipprovduta mill-Istati Membri f’konformità mal-Artikolu 6d(2).”;

“L-Artikolu 2, il-punti (27) sa (31), l-Artikoli 6a sa 6d, l-Artikolu 16(3), l-Artikolu 17a, l-Artikolu 18a, l-Artikolu 20(4) u l-Anness Ib għandhom japplikaw sal-31 ta’ Diċembru 2027.”;