1.Jilqa’ r-rapport tal-Kummissjoni tas-27 ta’ Marzu 2024 bit-titolu “Il-viżjoni fit-tul għaż-żoni rurali tal-UE: il-kisbiet ewlenin u t-triq ’il quddiem” u jaqbel mal-objettivi kumplessivi;

2.Jieħu nota tal-erba’ oqsma ta’ azzjoni li jirfdu l-viżjoni rurali u tat-30 azzjoni li minnhom huwa magħmul il-pjan ta’ azzjoni rurali tal-UE; jistieden lill-Kummissjoni u lill-Istati Membri jagħtu importanza assoluta lill-implimentazzjoni tagħha;

3.Jenfasizza r-rwol kruċjali li ż-żoni rurali għandhom fit-tiswir tal-mudelli ekonomiċi u tal-organizzazzjoni soċjali u territorjali tad-diversi Stati Membri, b’mod partikolari bħala l-benniena tal-produzzjoni agrikola u tal-ikel, iżda anke bħala kustodji ta’ wirt kulturali u tal-pajsaġġ insostitwibbli; jinnota, madankollu, li s-sinifikat tagħhom għadu mhux apprezzat biżżejjed u għadu qed jiġi ffinanzjat b’mod inadegwat; jemmen li huwa d-dmir tal-UE li timbotta biex ikun hemm qawmien mill-ġdid u riġenerazzjoni tassew ta’ dawn iż-żoni, billi tagħmel aktar sforzi biex tipprovdi liż-żoni rurali tagħna l-għodod adegwati biex jegħlbu l-isfidi konsiderevoli fit-tul li qed jiffaċċjaw u li qed ikollhom impatt dejjem ikbar fuq il-kompetittività reġjonali u l-koeżjoni soċjali, sabiex tiġi ppreżervata d-diversità Ewropea u jiġi żgurat li l-progress tal-Unjoni ma jsirx għad-detriment taż-żoni rurali u tal-popolazzjonijiet tagħhom;

4.Iqis li huwa importanti li jiġu żviluppati ktajjen tal-provvista qosra u li jiġi promoss l-użu ta’ skemi tat-tikkettar sabiex jiġu rrikonoxxuti l-kwalità u l-varjetà tal-prodotti tradizzjonali miż-żoni rurali; jisħaq li l-canteens pubbliċi, bħall-canteens tal-iskejjel u tal-isptarijiet, jista’ jkollhom rwol sinifikanti fl-iżvilupp ta’ ktajjen tal-provvista agroalimentari qosra;

5.Jirrikonoxxi r-rwol ewlieni tal-bliet żgħar u ta’ daqs medju bħala ċentri ta’ żvilupp fir-reġjuni rurali u jistieden lill-Kummissjoni u lill-Istati Membri jsaħħu speċifikament il-funzjonijiet ekonomiċi, soċjali u infrastrutturali tagħhom, jagħtu ħajja ġdida liċ-ċentri tal-bliet, jutilizzaw aħjar is-sinerġiji bejn iż-żoni rurali u r-reġjuni metropolitani kbar, u jiżguraw żvilupp territorjali aktar bilanċjat;

6.Jenfasizza l-ħtieġa urġenti ta’ miżuri sabiex jiġi miġġieled il-faqar fiż-żoni rurali billi jiġu żviluppati strateġiji mmirati biex tittejjeb is-sigurtà soċjali, jinħolqu l-opportunitajiet ekonomiċi, u jiġu appoġġjati l-popolazzjonijiet partikolarment vulnerabbli, sabiex jitkisser iċ-ċiklu tal-faqar;

7.Jisħaq li ż-żoni rurali huma atturi ewlenin fil-mitigazzjoni tal-effetti tat-tibdil fil-klima; jenfasizza l-ħtieġa li jsir aktar investiment fir-riċerka u fl-innovazzjoni għaż-żoni rurali, b’mod partikolari fl-oqsma tal-agrikoltura sostenibbli, tal-enerġija rinnovabbli, tat-trasformazzjoni diġitali, u tas-soluzzjonijiet innovattivi għall-mobilità, sabiex jissaħħu l-kompetittività u r-reżiljenza tar-reġjuni rurali u jinħolqu l-awtosuffiċjenza enerġetika u opportunitajiet ġodda ta’ impjieg; jinkoraġġixxi l-ġestjoni sostenibbli tal-foresti u l-prevenzjoni tan-nirien fil-foresti, anke billi jiġi promoss l-użu tal-bijomassa li tinġabar mingħajr ħsara għall-ekosistemi tal-foresti;

8.Jappella għall-espansjoni tal-enerġija rinnovabbli fiż-żoni rurali abbażi tal-potenzjal tagħhom li jnaqqsu l-kostijiet tal-enerġija bl-involviment tas-soċjetà ċivili u tal-komunitajiet lokali; jenfasizza l-ħtieġa ta’ inċentivi finanzjarji, miżuri bħall-komunitajiet tal-enerġija rinnovabbli u proċessi amministrattivi simplifikati biex tingħata spinta lill-indipendenza u s-sostenibbiltà tal-enerġija reġjonali filwaqt li jiġu evitati l-impatti negattivi minn fuq il-produzzjoni tal-ikel, id-disponibbiltà u l-prezzijiet tal-art, kif ukoll fuq il-koeżjoni soċjali; jitlob li jkun hemm mekkaniżmu ta’ finanzjament iddedikat għall-installazzjoni ta’ sorsi fotovoltajċi, eoliċi u sorsi oħra ta’ enerġija rinnovabbli;

9.Jappella għal aktar appoġġ għall-preservazzjoni, ir-restawr u l-konverżjoni tal-bini aktar qadim, inkluż bini storiku, knejjes u postijiet oħra ta’ qima, swali sportivi u skejjel fiż-żoni rurali biex jittejbu l-effiċjenza enerġetika, is-sostenibbiltà u s-sikurezza; iħeġġeġ l-investimenti fil-modernizzazzjoni tal-infrastruttura pubblika filwaqt li jiġu ppreservati l-istrutturi storiċi fejn possibbli; jistieden lill-Kummissjoni u lill-Istati Membri jippromwovu politiki mmirati li jappoġġjaw ir-rinnovazzjoni u l-modifika retroattiva effiċjenti fl-enerġija tal-akkomodazzjonijiet rurali, inċentivi finanzjarji għal dawk li jixtru dar rurali għall-ewwel darba, b’mod partikolari għaż-żgħażagħ u l-familji, u l-iżvilupp ta’ proġetti ta’ akkomodazzjoni sostenibbli u affordabbli adattati għall-ħtiġijiet tal-komunitajiet lokali li jikkontribwixxu għall-attraenza u r-rivitalizzazzjoni ta’ dawn ir-reġjuni;

10.Jitlob lill-Kummissjoni tivvaluta u timplimenta bis-sħiħ l-Artikoli 174, 175 u 349 tat-TFUE biex telimina id-distakk fl-iżvilupp fost ir-reġjuni, inkluż fir-rigward tal-infrastruttura, u tara li l-politiki kollha tal-UE mhux biss japplikaw il-prinċipju “la tagħmilx ħsara lill-koeżjoni”, iżda wkoll li jsegwu approċċ aktar assertiv ta’ “ippromwovi l-koeżjoni” kull fejn ikun possibbli, b’mod partikolari fiż-żoni rurali u fiż-żoni partikolarment affettwati mit-tranżizzjoni industrijali, l-isfidi demografiċi u d-depopolazzjoni, u dawk li jinsabu fir-riskju ta’ depopolazzjoni, bħar-reġjuni ultraperiferiċi, il-gżejjer, ir-reġjuni tal-fruntiera, transfruntiera u muntanjużi;

11.Jistieden lill-Kummissjoni tiżviluppa strateġija rurali bil-ħsieb tal-programmazzjoni ta’ wara l-2027; iħeġġeġ lill-Kummissjoni u lill-Istati Membri jiżguraw l-inkorporazzjoni ta’ dimensjoni rurali fil-politiki rilevanti u jiżguraw li l-istrateġija tippromwovi l-iżvilupp ekonomiku u soċjali taż-żoni rurali u jallokaw riżorsi speċifiċi għall-modernizzazzjoni tal-agrikoltura, jappoġġjaw l-intrapriżi rurali żgħar u ta’ daqs medju (SMEs) u dawk ġodda u jippromwovu l-ktajjen tal-provvista qosra sabiex iż-żoni rurali jsiru aktar konnessi, kompetittivi, reżiljenti u attraenti għaż-żgħażagħ u għall-investituri, u b’hekk jiġi żgurat żvilupp ibbilanċjat u sostenibbli fit-tul u tittejjeb il-kwalità tal-ħajja; jisħaq, f’dan ir-rigward, fuq l-importanza li jkun hemm mekkaniżmu ta’ verifika rurali li jkun verament effettiv fil-livell tal-UE sabiex jiġi vvalutat il-potenzjali tal-politiki rilevanti kollha u biex jiġi mtaffi kwalunkwe impatt negattiv possibbli li jista’ jkollhom fuq iż-żoni rurali;

12.Jenfasizza li sabiex tiġi żgurata l-prosperità fit-tul taż-żoni rurali u jingħata appoġġ lil settur agrikolu b’saħħtu sabiex iżomm din il-prosperità fiż-żoni rurali, huwa essenzjali li jissaħħu s-sinerġiji bejn il-Fondi Strutturali u ta’ Investiment tal-UE u Orizzont Ewropa, il-programm emblematiku ta’ riċerka u ta’ innovazzjoni tal-UE, u l-PAK fil-qafas finanzjarju pluriennali (QFP) li jmiss;

13.Jistieden lill-Kummissjoni tippreżenta, sal-2027, rapport dwar l-applikazzjoni tal-mekkaniżmu ta’ verifika rurali għall-politiki u għall-interventi fil-livell tal-UE, kif ukoll ir-riżultati miksuba;

14.Jistieden lill-Kummissjoni tagħti prijorità lill-investimenti ffukati u lill-miżuri ta’ politika biex jappoġġjaw it-tranżizzjoni lejn ġenerazzjoni ġdida ta’ bdiewa sabiex l-agrikoltura tal-UE tiġi mmodernizzata u jinħolqu aktar opportunitajiet fiż-żoni rurali;

15.Jenfasizza r-rwol kruċjali tal-politika ta’ koeżjoni għall-iżvilupp taż-żoni rurali bħala għodda b’saħħitha u deċentralizzata għall-iżvilupp ekonomiku u soċjali, li tippermetti lir-reġjuni kollha jindirizzaw b’mod determinat dawn l-isfidi speċifiċi tal-Unjoni; jissottolinja f’dan ir-rigward li l-politika ta’ koeżjoni għandha tkompli tkun pilastru ewlieni tal-QFP wara l-2027, b’allokazzjoni li tinżamm f’livell limitu minimu ekwivalenti għal-livelli attwali tal-QFP 2021–2027, filwaqt li jiġi żgurat ir-rwol fundamentali tagħha fit-tnaqqis tad-disparitajiet reġjonali u fit-tiswir ta’ Ewropa aktar reżiljenti u kompetittiva li ma tħalli lil ħadd barra; jitlob li tiġi esplorata l-għażla li jiġu pprovduti riżorsi adegwati għaż-żoni rurali u muntanjużi fil-qafas tal-politika ta’ koeżjoni li jmiss u li l-PDG fil-livell reġjonali jiġi kkomplementat b’indikaturi oħra; ifakkar li l-prinċipji fundamentali tal-politika ta’ koeżjoni, bħas-sħubija, il-governanza f’diversi livelli, l-approċċ ibbażat fuq il-post u l-ġestjoni kondiviża, iridu jiġu rispettati sabiex jitrawwem l-iżvilupp u jiġu ssodisfati l-ħtiġijiet u l-isfidi speċifiċi taż-żoni rurali b’enfasi partikolari fuq l-għodod li jappoġġjaw it-tkabbir u l-iżvilupp sostenibbli u l-impjieg taż-żgħażagħ u n-nisa, inkluż fost il-vittmi tal-vjolenza kontra n-nisa, u fuq it-titjib tas-servizzi u l-infrastruttura;

16.Jemmen li strateġiji ta’ speċjalizzazzjoni intelliġenti u ta’ diversifikazzjoni ekonomika jistgħu jippromwovu aktar opportunitajiet f’iż-żoni rurali; jenfasizza, b’mod partikolari, l-importanza ewlenija li l-kunċett tal-irħula intelliġenti jiġi integrat fil-politika ta’ koeżjoni u li l-iżvilupp ta’ rħula intelliġenti jiġi appoġġjat b’mod espliċitu, b’finanzjament flessibbli u approċċ integrat, bħala għodda innovattiva għat-titjib tal-kwalità tal-ħajja u r-rivitalizzazzjoni taż-żoni rurali u s-servizzi permezz tal-innovazzjoni diġitali u soċjali u inizjattivi bħall-promozzjoni tal-ispazji tax-xogħol sabiex jiġu attirati l-ħaddiema, inklużi t-teleħaddiema, u biex jingħata kontribut għar-rivitalizzazzjoni tal-ekonomiji lokali;

17.Iħeġġeġ inizjattivi li jippromwovu s-sostenibbiltà ekonomika u soċjali, inkluż l-appoġġ għall-intraprenditorija rurali, it-turiżmu rurali u mudelli kummerċjali ġodda bbażati fuq l-innovazzjoni u d-diġitalizzazzjoni;

18.Jistieden lill-Kummissjoni tiżgura li fil-politika ta’ koeżjoni futura titpoġġa enfasi qawwija u olistika fuq l-iżvilupp taż-żoni rurali, b’tali mod li l-inizjattivi ta’ politika kollha jkunu konsistenti mal-għan li jitnaqqsu d-disparitajiet territorjali; iqis li huwa essenzjali li jiġu definiti strateġiji fit-tul li jkunu kapaċi jappoġġjaw iż-żoni rurali, b’enfasi fuq il-prinċipju tal-koeżjoni u tas-sostenibbiltà u li jipprovdu l-istrumenti meħtieġa biex jiġu indirizzati l-isfidi demografiċi, soċjali u ekonomiċi sabiex jiġi żgurat li dawn iż-żoni ma jsirux postijiet abbandunati, iżda jkunu jistgħu jsiru protagonisti tal-futur tal-Ewropa, mingħajr ma jkollhom jiddependu kontinwament minn interventi straordinarji; jistieden, f’dan ir-rigward, lill-Kummissjoni tappoġġja l-iżvilupp sinifikanti taż-żoni rurali fil-politika ta’ koeżjoni futura, u timpenja ruħha li tistabbilixxi punti lokali ta’ informazzjoni u toffri pjattaforma u appoġġ finanzjarju biex l-Istati Membri jkunu jistgħu jiskambjaw l-informazzjoni u l-aħjar prattika dwar il-possibbiltajiet ta’ finanzjament, bl-għan li l-awtoritajiet lokali jingħataw appoġġ u assistenza effettivi fil-ġestjoni tar-riżorsi u fl-implimentazzjoni tal-inizjattivi ta’ żvilupp; jenfasizza, barra minn hekk, li l-parteċipazzjoni effettiva tal-awtoritajiet reġjonali, lokali u rurali u kapaċità amministrattiva b’saħħitha huma kruċjali biex jitnaqqsu l-piż amministrattiv eċċessiv u r-rekwiżiti kumplessi għar-riċevituri u għall-eżekuzzjoni effettiva tal-fondi tal-politika ta’ koeżjoni; jenfasizza li l-finanzjament multiplu għadu jidher diffiċli f’xi pajjiżi u jistieden lill-Kummissjoni ssaħħaħ il-komplementarjetajiet bejn il-FAEŻR u l-fondi tal-politika ta’ koeżjoni;

19.Jisħaq fuq il-ħtieġa ta’ strateġija Ewropea integrata għall-għoti ta’ ħajja ġdida liż-żoni rurali, inkluż permezz tal-iżvilupp ta’ biodistretti, filwaqt li tirrikonoxxi l-potenzjal tagħhom li jiddiversifikaw l-ekonomija rurali billi timmira lejn miżuri fiskali, ekonomiċi u soċjali biex tibqa’ tinżamm il-popolazzjoni attiva; jenfasizza wkoll il-valur tal-introduzzjoni ta’ inċentivi għar-rilokazzjoni ta’ professjonisti fl-oqsma tas-saħħa, tal-edukazzjoni u tal-amministrazzjoni pubblika, kif ukoll l-importanza tas-sħubijiet bejn l-awtoritajiet lokali u s-settur privat għall-ħolqien ta’ impjiegi ġodda;

20.Jissottolinja li l-espansjoni tal-pjanijiet ta’ investiment territorjali integrat (ITI) u l-isfruttar tal-potenzjal sħiħ tagħhom jistgħu jagħmluhom fundamentali għall-iżvilupp reġjonali, lokali u rurali integrat; jenfasizza li t-tisħiħ tar-rwol tal-ITIs fiż-żoni rurali huwa essenzjali biex titrawwem il-koeżjoni territorjali, titjieb il-konnettività, u jiġi xprunat it-tkabbir ekonomiku inklużiv billi jiġu appoġġjati setturi ewlenin bħall-agrikoltura, l-SMEs rurali, it-turiżmu, u l-enerġija rinnovabbli; jappella, barra minn hekk, għal flessibbiltà akbar fl-implimentazzjoni tal-ITI u għal aktar allokazzjonijiet finanzjarji u sinerġiji msaħħa ma’ mekkaniżmi oħra ta’ finanzjament tal-UE, inklużi l-programm LEADER u s-CLLD, l-istrumenti ewlenin għat-trawwim ta’ żvilupp rurali parteċipattiv minn isfel għal fuq u għaż-żamma u r-restawr ta’ ekonomiji rurali lokali ħajjin u b’saħħithom, biex jiġi massimizzat l-impatt u jiġu involuti b’mod attiv l-awtoritajiet lokali u reġjonali u s-soċjetà ċivili f’konformità mal-prinċipju tas-sħubija;

21.Jissuġġerixxi li d-Direttorati Ġenerali rilevanti kollha tal-Kummissjoni jwettqu valutazzjoni tal-impatt territorjali tal-politiki rispettivi tagħhom mill-anqas darbtejn kull perjodu ta’ programmazzjoni; jemmen li dawn l-evalwazzjonijiet jistabbilixxu linja bażi aktar preċiża u jidentifikaw modi kif il-karatteristiċi taż-żoni rurali jiġu integrati fil-politiki Ewropej b’mod aktar effettiv;

22.Jistieden lill-Istati Membri jagħmlu użu sħiħ mill-miżuri kollha li jappoġġjaw ir-reġjuni rurali, interni, muntanjużi, insulari u ultraperiferiċi, kif ukoll ir-reġjuni transfruntiera u l-fruntieri esterni tal-UE, inklużi dawk bi fruntieri mar-Russja, il-Belarussja u l-Ukrajna li huma l-aktar affettwati mill-gwerra, biex itaffu t-tfixkil ekonomiku u jiżguraw il-futur u l-prosperità tagħhom; jilqa’ r-Regolament il-ġdid BRIDGEforEU u jitlob lill-Istati Membri jimplimentawh, filwaqt li jsaħħu l-kooperazzjoni bejn ir-reġjuni transfruntiera biex jippermettu ekonomiji ta’ skala meta jipprovdu servizzi u infrastruttura bażiċi fiż-żoni rurali affettwati;

23.Jisħaq fuq id-diversità taż-żoni rurali tal-UE, li l-viżjoni fit-tul tagħhom titlob soluzzjonijiet imfassla apposta għall-ħtiġijiet u għar-riżorsi taż-żoni rurali, filwaqt li jissaħħu l-istrateġiji fit-tul għat-tkabbir sostenibbli; jissottolinja, f’dan ir-rigward, il-ħtieġa li l-awtoritajiet reġjonali u lokali jiġu involuti bis-sħiħ, peress li huma fl-aħjar post biex jidentifikaw l-isfidi u l-ħtiġijiet attwali fil-livelli reġjonali u lokali; jenfasizza l-importanza li jinżamm mudell deċentralizzat għall-programmazzjoni u l-implimentazzjoni tal-politika ta’ koeżjoni bbażat fuq il-prinċipju tas-sħubija u tal-governanza f’diversi livelli u fuq approċċ minn isfel għal fuq u bbażat fuq il-post; jappella, għalhekk, biex l-awtoritajiet lokali u reġjonali jkunu involuti b’mod qawwi biex jiġi żgurat aktar aċċess dirett għall-fondi tal-politika ta’ koeżjoni għall-awtoritajiet lokali u reġjonali, filwaqt li titnaqqas il-kumplessità burokratika u jitnaqqas iż-żmien biex jingħataw il-fondi, permezz ta’ proċeduri aktar simplifikati, pjattaformi diġitali intuwittivi u appoġġ tekniku akbar għall-benefiċjarji lokali; jipproponi l-inkoraġġiment tal-użu ta’ skemi ta’ prefinanzjament u ta’ pagament antiċipat għal proġetti żgħar f’żoni rurali;

24.Jisħaq li ċ-ċentralizzazzjoni tista’ twassal għal ineffiċjenzi burokratiċi u għal dewmien fl-assorbiment tal-fondi, li fl-aħħar mill-aħħar inaqqsu l-effettività tal-investimenti tal-UE fl-iżvilupp rurali;

25.Jenfasizza li, fl-implimentazzjoni tiegħu, l-approċċ maniġerjali għall-politiki tal-iżvilupp taż-żoni rurali jeħtieġ li jkun ikkoordinat, integrat u multisettorjali u li t-tisħiħ ta’ approċċ fuq diversi livelli f’konformità mal-prinċipju tas-sussidjarjetà huwa essenzjali biex jiġi żgurat is-suċċess tiegħu;

26.Jenfasizza li r-reżiljenza hija essenzjali biex l-awtoritajiet fil-livelli lokali u reġjonali jkunu jistgħu jtaffu l-isfidi li jiġu għal għarrieda, jadattaw għalihom, u jirkupraw minnhom, filwaqt li jiżguraw il-benesseri tal-komunità, is-sigurtà u s-sostenibbiltà fit-tul;

27.Jappella biex sehem adegwat mill-finanzjament tal-politika ta’ koeżjoni jiġi allokat għar-reġjuni tal-fruntiera u f’dan ir-rigward, jappella biex ir-raggruppamenti Ewropej ta’ kooperazzjoni territorjali (REKT) jingħataw livell ogħla ta’ awtonomija fl-għażla tal-proġetti u fl-użu tal-fondi, b’mod partikolari billi jinnominaw ir-REKT bħala awtoritajiet ta’ ġestjoni għall-programmi Interreg, u jsaħħu l-kapaċità istituzzjonali u finanzjarja tagħhom; jirrakkomanda, barra minn hekk, li r-REKT jingħataw rwol aktar sinifikanti fl-ilħuq tal-objettiv ta’ politika 5, jiġifieri li jqarrbu lill-Ewropa lejn iċ-ċittadini tagħha;

28.Jissottolinja l-ħtieġa li tissaħħaħ il-parteċipazzjoni demokratika u politika fiż-żoni rurali billi jiġu promossi l-impenn ċiviku attiv u l-għodod diġitali; jistieden lill-Kummissjoni tappoġġja inizjattivi li jrawmu proċessi demokratiċi lokali biex titjieb il-koeżjoni bejn ir-reġjuni urbani u rurali;

29.Jenfasizza l-ħtieġa li ż-żoni rurali jkunu jistgħu jipprovdu servizzi ta’ interess ġenerali essenzjali u ta’ kwalità għolja liċ-ċittadini biex jitjieb l-għajxien tagħhom u biex jivvalorizzaw il-punti b’saħħithom tagħhom sabiex jinkiseb żvilupp sostenibbli, li għalih għandhom jirċievu appoġġ finanzjarju adegwat; jissottolinja, għal dak l-għan, il-ħtieġa li jingħata aċċess ugwali, b’mod partikolari għall-persuni vulnerabbli u l-persuni b’diżabbiltà, għas-servizzi kollha tal-kura tas-saħħa, is-servizzi tat-trasport u tal-konnettività, inklużi s-soluzzjonijiet innovattivi għall-mobbiltà, il-pjanijiet speċifiċi għall-akkomodazzjoni affordabbli, is-servizzi tal-ilma, is-servizzi tal-edukazzjoni u tat-taħriġ, l-infrastruttura diġitali, u servizzi bażiċi oħra bħas-servizzi postali u bankarji, filwaqt li jiġu żgurati l-aċċessibbiltà u l-affordabbiltà tagħhom sabiex jiġu garantiti l-kundizzjonijiet xierqa tal-għajxien; jistieden, għalhekk, lill-Kummissjoni u lill-Istati Membri jiffaċilitaw l-aċċess għal finanzjament u għal miżuri ta’ appoġġ imfassla apposta għal inizjattivi tal-ekonomija soċjali li jindirizzaw il-ħtiġijiet lokali u jikkontribwixxu għall-iżvilupp reġjonali u, fl-istess ħin, isaħħu l-appoġġ finanzjarju offrut lill-SMEs rurali, b’mod partikolari billi jiffaċilitaw l-aċċess għar-riżorsi finanzjarji, il-kooperattivi u l-ktajjen tal-valur lokali li jrawru d-diversifikazzjoni ekonomika;

30.Jisħaq fuq l-importanza strateġika tar-riżorsi tal-ilma għaż-żoni rurali u jenfasizza l-ħtieġa li jingħataw riżorsi speċifiċi, fl-ambitu tal-politika ta’ koeżjoni u l-programmi ta’ żvilupp rurali, għall-manutenzjoni u l-modernizzazzjoni tan-network tal-ilma; jirrakkomanda, b’mod partikolari, li jiġu inklużi miżuri biex jiġi miġġieled it-telf tal-ilma, titjieb l-effiċjenza tas-sistemi tal-provvista u jiġi promoss l-użu sostenibbli tar-riżorsi tal-ilma fiż-żoni rurali;

31.Iqis li huwa essenzjali li niffukaw aktar fuq miżuri preventivi biex tiżdied ir-reżiljenza taż-żoni rurali tal-Ewropa f’każijiet ta’ diżastri naturali; jemmen li approċċ integrat għall-ġestjoni tar-riżorsi tal-ilma huwa importanti ħafna sabiex jiġi evitat l-għargħar u fl-istess ħin tiġi indirizzata n-nixfa, żewġ theddidiet dejjem akbar f’ħafna reġjuni rurali, kemm fis-settur agrikolu u dak tal-ikel; jirrikonoxxi li, skont il-kuntest, il-bini ta’ digi u ġibjuni jew il-modernizzazzjoni tal-faċilitajiet eżistenti huma ta’ prijorità, filwaqt li jkun hemm bilanċ bejn l-infrastruttura mibnija u l-miżuri mhux vinkolanti b’kost relattivament baxx, b’mod partikolari minħabba li huma sors nadif ta’ enerġija; jinnota li għalkemm il-politika ta’ koeżjoni diġà tappoġġja inizjattivi f’dan il-qasam, huma meħtieġa proġetti addizzjonali u aktar investimenti, f’konformità mal-istrateġiji nazzjonali u reġjonali għall-ġestjoni tar-riskju, biex jiġi żgurat li ż-żoni rurali jkunu aktar ippreparati u kapaċi jifilħu għal avvenimenti ta’ temp estrem relatati mal-klima;

32.Jisħaq fuq it-theddida dejjem akbar tar-riskji klimatiċi bħad-diżastri naturali, id-deżertifikazzjoni u l-iskarsezza tal-ilma għal ħafna żoni rurali fl-Ewropa, b’mod partikolari fin-Nofsinhar tal-Ewropa u fil-baċir tal-Mediterran; jistieden lill-Kummissjoni tippromwovi strateġija ta’ adattament li tħares ’il quddiem fil-livelli nazzjonali, reġjonali u lokali, inklużi l-ġestjoni tal-ilma, l-infrastruttura reżiljenti u t-tħejjija għad-diżastri, u jappella għal investimenti fl-infrastruttura tal-ilma innovattiva, bħall-użu mill-ġdid tal-ilma tad-drenaġġ ittrattat, is-sistemi ta’ tisqija intelliġenti, u l-kostruzzjoni ta’ ġibjuni għall-ħżin tal-ilma tax-xita;

33.Jinnota li ż-żoni rurali jbatu minn aċċess limitat għal servizzi essenzjali tal-kura tas-saħħa, b’nuqqas ta’ faċilitajiet u ta’ persunal mediku, u għalhekk jappella għal aċċess imtejjeb għall-kura tas-saħħa ta’ kwalità, inklużi s-servizzi tas-saħħa mentali;

34.Jistieden lill-Istati Membri u lill-awtoritajiet lokali jissalvagwardjaw is-servizzi essenzjali li huma vitali għall-iżvilupp taż-żoni rurali billi jżommu lura milli jimponu restrizzjonijiet ekonomiċi fuq il-kura tas-saħħa f’żoni rurali, peress li dan iwassal għall-għeluq, jew it-tnaqqis fl-għadd ta’ faċilitajiet tal-ewwel għajnuna jew faċilitajiet tal-isptar bażiċi li għandhom ikunu msaħħa;

35.Jistieden lill-Kummissjoni u lill-Istati Membri jiżviluppaw pjan għall-unitajiet mediċi mobbli u t-telemediċina, għat-tisħiħ tal-faċilitajiet mediċi inklużi s-servizzi ta’ spas mediċi, l-infermiera tas-saħħa tal-komunità u s-soluzzjonijiet tas-saħħa diġitali, u l-inċentivi għat-tobba li jaħdmu f’żoni rurali u remoti;

36.Jistieden lill-Kummissjoni tinkorpora miżuri speċifiċi għaż-żoni identifikati bħala rurali fl-istrateġija tagħha dwar l-“e-Saħħa”, sabiex tipprovdi appoġġ prattiku lill-unitajiet tal-kura tas-saħħa lokali għat-titjib teknoloġiku u tippromwovi s-servizzi li tali unitajiet joffru; jisħaq li l-Istati Membri għandhom jiġu offruti programm ta’ skrinjar maħsub għaż-żoni rurali u li għandu wkoll jiġi stabbilit appoġġ amministrattiv biex jgħin fit-tfassil tal-pjanijiet u tar-reġistri ta’ prevenzjoni; jistieden lill-Istati Membri jqisu l-karatteristiċi partikolari ta’ dawn iż-żoni u jinkoraġġixxu l-ħolqien ta’ spiżeriji rurali, sabiex in-networks tal-ispiżeriji jiġu adattati speċifikament għal żona rurali b’arranġamenti ta’ koordinazzjoni għall-provvista ta’ mediċini u apparati mediċi, bil-għan li l-ħtiġijiet tal-unitajiet tal-kura tas-saħħa jiġu integrati f’żona waħda u adattati għaliha; jistieden lill-Istati Membri jtejbu l-provvista tal-kura tas-saħħa primarja u s-servizzi ta’ appoġġ fost dawn l-ispiżeriji, definiti bħala “rurali”;

37.Jenfasizza r-rwol ewlieni li l-iżvilupp infrastrutturali għandu fuq it-tkabbir ekonomiku u soċjali taż-żoni rurali, abbażi tal-ħtieġa għal sistemi tat-trasport, b’mod partikolari dawk pubbliċi, b’kapaċità li jtejbu l-konnettività u l-aċċess għal servizzi essenzjali, għal networks tal-enerġija, inklużi dawk rinnovabbli, u għal infrastruttura adegwata għall-konnettività diġitali; jinnota, b’mod partikolari, li l-kwalità tat-trasport u tal-konnettività diġitali jeħtieġ li titjieb sabiex in-nies ikollhom aċċess faċli għax-xogħol, l-iskejjel, l-isptarijiet, is-servizzi pubbliċi u l-opportunitajiet ta’ xogħol; jissottolinja li l-links tat-trasport bit-triq, bil-ferrovija u bil-baħar jeħtieġ li jiġu żviluppati jew imsaħħa permezz ta’ programmi kofinanzjati mill-UE biex jitnaqqas l-iżolament taż-żoni rurali, b’mod partikolari ċ-ċentri urbani, u b’hekk jitnaqqas id-distakk eżistenti u tiġi ffaċilitata l-mobbiltà tal-persuni u tal-merkanzija; jappella għal strateġija komprensiva biex titjieb il-mobbiltà fiż-żoni rurali, b’enfasi qawwija fuq is-sostenibbiltà, fuq l-espansjoni tal-infrastruttura tal-irriċarġjar, u fuq il-promozzjoni tal-elettromobbiltà; jenfasizza l-ħtieġa għal investimenti mmirati fit-trasport pubbliku, soluzzjonijiet ta’ mobbiltà kondiviża, u mudelli tat-trasport alternattiv biex jiġu żgurati l-aċċessibbiltà u l-konnettività għall-popolazzjonijiet rurali;

38.Jisħaq li d-distakk diġitali bejn iż-żoni rurali u urbani għadu sinifikanti, u dan ixekkel l-opportunitajiet ugwali għar-residenti kollha; jistieden lill-Kummissjoni u lill-Istati Membri jaċċelleraw l-investimenti fil-konnettività tal-broadband, inkluż il-5G, f’kopertura mobbli aħjar, fin-networks tal-internet b’veloċità għolja, fis-soluzzjonijiet għal biedja diġitali u fiċ-ċentri rurali ta’ innovazzjoni, filwaqt li jiġi żgurat li t-tranżizzjoni diġitali tkun ta’ benefiċċju għall-komunitajiet rurali u li tingħata attenzjoni speċjali lir-reġjuni anqas ippreparati għal din it-trasformazzjoni, inklużi żoni remoti u reġjuni ultraperiferiċi; jisħaq li dawn l-investimenti huma kruċjali biex tissaħħaħ il-produttività, tiġi appoġġjata l-intraprenditorija tal-farms żgħar, jiġi ffaċilitat ix-xogħol mill-bogħod u l-aċċess għas-servizzi elettroniċi u t-tagħlim online u jiġi żgurat li ż-żoni rurali jibqgħu kompetittivi fl-era diġitali; jisħaq fuq il-ħtieġa ta’ inizjattivi dwar il-litteriżmu diġitali u t-taħriġ vokazzjonali biex tiġi appoġġjata l-integrazzjoni tat-teknoloġiji diġitali fl-ekonomija rurali u jitnaqqsu d-distakki teknoloġiċi u ekonomiċi eżistenti;

39.Jisħaq fuq l-importanza u l-interkonnettività tal-mobbiltà militari, l-iżvilupp tal-infrastruttura rurali u s-sigurtà reġjonali; jissottolinja l-koinċidenza bejn in-network tal-mobbiltà militari tal-UE u n-network trans-Ewropew tat-trasport;

40.Jappella għal strateġiji biex jindirizzaw bini vojt u jippromwovu kunċetti alternattivi ta’ akkomodazzjoni f’żoni rurali, inklużi akkomodazzjoni affordabbli, proġetti ta’ rinnovazzjoni u għajxien interġenerazzjonali; jenfasizza l-ħtieġa għal inċentivi biex jerġgħu jintużaw propjetajiet vojta, jiġu appoġġjati inizjattivi ta’ akkomodazzjoni mmexxija mill-komunità, u jiġu żgurati spazji tal-għajxien sostenibbli u inklużivi;

41.Jisħaq fuq l-importanza li jiġu promossi politiki prijoritarji li jappoġġjaw liż-żgħażagħ, bħala atturi ewlenin tal-eżodu rurali, u jistieden lill-Kummissjoni tiżguralhom l-applikazzjoni effettiva tad-“dritt li jibqgħu”, permezz ta’ miżuri mmirati maħsuba biex jiġġieldu t-tnaqqis demografiku fiż-żoni rurali u biex jinkoraġġixxu lill-persuni b’talent jibqgħu hemmhekk; jemmen li l-individwi li jixtiequ jikkontribwixxu għall-iżvilupp tal-komunitajiet lokali tagħhom għandhom jingħataw ħafna opportunitajiet, u li għalhekk hemm urġenza li jitneħħew l-ostakli u d-differenzi sinifikanti bejn iż-żgħażagħ fiż-żoni urbani u rurali f’termini ta’ aċċess għall-edukazzjoni, l-awtonomija ekonomika, l-attivazzjoni soċjali u politika, u l-interazzjonijiet soċjali interġenerazzjonali ta’ kwalità għolja; jappella għal miżuri konkreti u programmi ta’ finanzjament immirati, inkluż pjan ta’ azzjoni dwar l-eżodu ta’ mħuħ mill-Kummissjoni, biex jappoġġjaw liż-żgħażagħ u lill-intraprendituri żgħażagħ billi jingħataw l-għodod u r-riżorsi kollha meħtieġa biex jgħinuhom jaċċessaw ir-raba’, l-impjiegi u l-opportunitajiet ta’ negozju; jinnota li tali miżuri għandhom jinkludu aċċess imtejjeb għas-servizzi pubbliċi, faċilitajiet edukattivi u kulturali, aċċess għall-akkomodazzjoni, self b’imgħax baxx, filwaqt li jitqies kif xieraq il-prinċipju tas-sussidjarjetà fi kwistjoni fiskali, inċentivi relatati mat-taxxi li jgħinu liż-żgħażagħ jibnu futur stabbli f’konformità mal-aspirazzjonijiet tagħhom, mingħajr il-bżonn li jabbunaw il-post tal-oriġini tagħhom u filwaqt li joħolqu inċentivi biex jistabbilixxu ruħhom fiż-żoni rurali jew jirritornaw fihom; iqis li huwa meħtieġ, għalhekk, li jiġu promossi miżuri li jiddiversifikaw l-ekonomija rurali billi jiġi sfruttat il-potenzjal lokali, inkluż f’oqsma lil hinn mill-agrikoltura u t-turiżmu, u li jinħolqu impjiegi ta’ kwalità,

42.Jenfasizza l-importanza li l-edukazzjoni u t-taħriġ vokazzjonali jingħataw spinta, filwaqt li jiġu mħeġġa wkoll inizjattivi mmexxija miż-żgħażagħ u tagħlim mhux formali għaż-żgħażagħ biex jiżviluppaw ħiliet speċifiċi relatati mal-ekonomija taż-żoni rurali, bħala għodda għall-koeżjoni soċjali u x-xogħol ta’ kwalità, bil-ħsieb li tiġi miġġielda d-depopolazzjoni f’dawn iż-żoni;

43.Jenfasizza r-rwol ewlieni tal-kampanji ta’ sensibilizzazzjoni u ta’ kondiviżjoni tal-għarfien fil-promozzjoni ta’ diversi programmi u kampanji edukattivi, u l-importanza li dawn isiru parti integrali mill-kurrikuli tal-iskejjel; jisħaq fuq id-data dejjem aktar inkwetanti dwar it-tluq bikri mill-iskola, u għal dak l-għan, jistieden lill-awtoritajiet nazzjonali u lokali jorganizzaw mill-ġdid is-sistemi edukattivi tagħhom biex jiggarantixxu d-dritt għall-edukazzjoni fit-territorji tagħhom, filwaqt li jqisu d-diffikultajiet serji u objettivi li jistgħu jiffaċċjaw; jistieden, għalhekk, lill-Istati Membri u lill-awtoritajiet lokali ma jgħaqqdux flimkien l-istrutturi eżistenti tal-ġestjoni tal-iskejjel f’dawn iż-żoni;

44.Jistieden lill-Kummissjoni u lill-Istati Membri jipprovdu strumenti ġodda ta’ kreditu sussidjat li jistgħu jappoġġjaw lill-intraprendituri żgħażagħ u lill-nisa fl-attivitajiet tagħhom, inklużi forom ta’ garanziji alternattivi għall-aċċess għall-kreditu; jappella għal appoġġ finanzjarju biex jagħti s-setgħa lill-bdiewa żgħażagħ, filwaqt li jiġi żgurat it-tkabbir fl-ekonomiji rurali;

45.Jilqa’ l-pakkett il-ġdid ta’ finanzjament ta’ self bl-ammont ta’ EUR 3 biljun għall-agrikoltura, il-forestrija u s-sajd madwar l-Ewropa mill-Grupp tal-Bank Ewropew tal-Investiment (BEI) bħala inizjattiva konkreta biex jitnaqqsu l-lakuni ta’ finanzjament għall-SMEs fl-oqsma tal-agrikoltura u l-bijoekonomija u jiġi ffaċilitat il-finanzjament għall-bdiewa żgħażagħ u n-nisa; jistieden lill-Grupp tal-BEI jesplora forom ġodda ta’ appoġġ biex tiġi pprovduta l-likwidità lill-atturi fil-ktajjen tal-valur agrikoli u rurali;

46.Jistieden lill-Kummissjoni u lill-Istati Membri jippromwovu start-ups lokali u programmi ta’ inċentivi għar-ritorn taż-żgħażagħ u għax-xiri u r-rinnovazzjoni ta’ akkomodazzjoni miż-żgħażagħ f’żoni rurali;

47.Jistieden lill-Kummissjoni tistabbilixxi Fond Ewropew għall-intraprenditorija taż-żgħażagħ fiż-żoni rurali, b’enfasi speċjali fuq ir-reġjuni milquta minn qgħad għoli fost iż-żgħażagħ u mill-eżodu ta’ mħuħ; jinnota li dan il-fond għandu jappoġġja l-istart-ups rurali, l-agrikoltura innovattiva, it-turiżmu sostenibbli, u d-diġitalizzazzjoni permezz ta’ strumenti finanzjarji u inċentivi fiskali ddedikati;

48.Jiġbed l-attenzjoni għall-ħtieġa ta’ aċċess ugwali universali għall-miżuri li jippermettu lil kull persuna tiżviluppa ħiliet ta’ kwalità għolja li teħtieġ biex tilħaq l-għanijiet professjonali tagħha, kif ukoll għat-taħriġ vokazzjonali u edukattiv; jiddeplora l-fatt li fiż-żona rurali, f’ħafna oqsma, ix-xogħol tan-nisa bħalissa ma jgawdix opportunitajiet u kundizzjonijiet ugwali, peress li spiss jiffaċċjaw sfidi addizzjonali, inklużi aċċess limitat għall-opportunitajiet ta’ xogħol, nuqqas ta’ miżuri adegwati għall-bilanċ bejn ix-xogħol u l-ħajja privata u nuqqas ta’ faċilitajiet għall-indukrar tat-tfal; jenfasizza l-ħtieġa li jitrawwem ambjent favorevoli għall-impjieg tan-nisa, b’appoġġ għall-familji kollha, filwaqt li jiġu żgurati sistemi tal-edukazzjoni u tal-kura bikrija tat-tfal ta’ kwalità għolja kif ukoll appoġġ għall-ġenituri;

49.Jappella għal appoġġ akbar għan-nisa fiż-żoni rurali, b’mod partikolari permezz ta’ miżuri sabiex jitjieb l-aċċess għall-impjiegi, għall-edukazzjoni, għall-kura tas-saħħa u għall-infrastruttura soċjali, kif ukoll il-protezzjoni mill-vjolenza u l-prevenzjoni tal-vjolenza, sabiex tiġi promossa l-parteċipazzjoni ekonomika u soċjali tagħhom; jenfasizza li għandhom jinħolqu programmi mmirati biex jappoġġjaw lill-intraprendituri nisa fir-reġjuni rurali sabiex tissaħħaħ l-indipendenza ekonomika tagħhom;

50.Jisħaq li l-appoġġ għan-nisa fiż-żoni rurali huwa kruċjali għal diversi raġunijiet, inklużi l-promozzjoni tal-ugwaljanza bejn il-ġeneri, it-trawwim tat-tkabbir ekonomiku, il-promozzjoni tal-iżvilupp tal-komunità, it-tnaqqis tal-faqar, u l-garanzija tas-sostenibbiltà ambjentali; jenfasizza li n-nisa għandhom rwol f’diversi livelli fl-iżvilupp rurali, bħala ħaddiema, bdiewa u sidien ta’ negozji, u jisħaq li l-importanza tagħhom fiż-żoni rurali u fl-ekonomiji lokali hija spiss injorata; jisħaq li għandha tingħata attenzjoni speċjali lin-nisa fiż-żoni rurali meta jitfasslu l-programmi strutturali ta’ appoġġ soċjali u ta’ żvilupp reġjonali; jenfasizza li huwa kruċjali li dawn l-ostakli jiġu indirizzati biex in-nisa jingħataw is-setgħa u jiġi sfruttat il-potenzjal sħiħ tagħhom fil-komunitajiet rurali;

51.Jistieden lill-Istati Membri u lill-Kummissjoni jżidu l-għarfien dwar il-possibilitajiet eżistenti u futuri ta’ finanzjament tal-UE għall-intraprendituri nisa fiż-żoni rurali u sabiex jagħmluhielhom aktar faċli biex jaċċessaw l-appoġġ finanzjarju; jinkoraġġixxi lill-Istati Membri u lill-awtoritajiet reġjonali u lokali jagħmlu użu mill-fondi strutturali u ta’ investiment tal-UE eżistenti biex jippromwovu lill-intraprendituri nisa;

52.Jappella għal politiki favur l-ugwaljanza bejn il-ġeneri fil-qasam tal-impjiegi u għal miżuri mmirati biex jippromwovu bilanċ aħjar bejn ix-xogħol u l-ħajja privata fiż-żoni rurali, inklużi mudelli tax-xogħol flessibbli, opportunitajiet tax-xogħol diġitali, offerti mtejba ta’ divertiment u ta’ edukazzjoni, u l-promozzjoni tal-istrutturi ta’ kura u appoġġ ibbażati fil-komunità għall-familji;

53.Iħeġġeġ lill-Kummissjoni tadotta miżuri biex tipproteġi l-mudell tal-biedja mill-familja li jirfed it-territorju rurali, huwa aktar ekoloġiku u jiggarantixxi s-sigurtà tal-ikel fl-UE; jisħaq fuq il-ħtieġa ta’ sistema ta’ inċentivi tal-UE biex tillimita l-akkumulazzjoni tar-raba’ f’fondi ta’ investiment privati u ż-żieda konsegwenti fil-prezzijiet tal-art; jinsisti fuq il-protezzjoni tal-farms żgħar u ta’ daqs medju billi jissaħħaħ ir-rwol tal-kooperattivi u tal-bdiewa professjonali fil-politiki tal-UE; barra minn hekk, jinkoraġġixxi lill-Istati Membri jimplimentaw miżuri konkreti biex jappoġġjaw dawn l-farms billi jissimplifikaw l-aċċess għall-kreditu, jimmodernizzaw l-infrastruttura rurali u jagħtu spinta lill-kooperattivi agrikoli;

54.Jisħaq fuq ir-rwol ewlieni li l-agrikoltura u s-settur agroalimentari għandhom fil-produzzjoni tal-ikel, filwaqt li jiġu żgurati s-sigurtà tal-ikel fl-UE u l-ħolqien tal-impjiegi – rwol li għandu jiġi valorizzat peress li huwa pilastru fundamentali għall-ekonomiji lokali u element ewlieni biex tiġi żgurata l-ġestjoni sostenibbli tat-territorju, u jservi wkoll bħala mutur għall-iżvilupp u t-tkabbir taż-żoni interni u rurali, ħafna drabi rappreżentati minn prodotti tipiċi ta’ eċċellenza fil-livell internazzjonali; jinnota li huwa meħtieġ li l-bdiewa jiġu mgħejuna fit-triq tal-innovazzjoni u tad-diversifikazzjoni, filwaqt li fl-istess ħin titrawwem il-kompetittività tal-farms; jemmen li t-tranżizzjoni lejn mudell aktar sostenibbli jirrikjedi approċċ ibbilanċjat, li jqis l-ispeċifiċitajiet lokali u l-ħtiġijiet ekonomiċi tal-komunitajiet rurali, mingħajr ma jimponi bidliet li jirriskjaw li jimminaw l-iżvilupp fit-tul tagħhom; jistieden, f’dan ir-rigward, lill-Kummissjoni u lill-Istati Membri jieħdu azzjoni b’saħħitha u mmirata billi jnaqqsu l-piżijiet regolatorji eċċessivi u jiżguraw kundizzjonijiet tas-suq ġusti, biex itaffu t-tnaqqis fl-għadd ta’ farms u jinkoraġġixxu tiġdid ġenerazzjonali; jappella għal appoġġ adegwat biex jiġu promossi l-awtosuffiċjenza fl-ikel u d-diversifikazzjoni tal-għelejjel; jenfasizza, b’mod partikolari, l-isfidi strutturali speċifiċi tar-reġjuni ultraperiferiċi u ż-żoni rurali tagħhom;

55.Iħeġġeġ lill-Kummissjoni u lill-Istati Membri jsaħħu l-ekwivalenza stretta tal-istandards tal-produzzjoni għall-prodotti agrikoli fl-UE sabiex tissaħħaħ is-sigurtà tal-ikel u jiġi żgurat li l-bdiewa Ewropej ma jiffaċċjawx kompetizzjoni inġusta minn prodotti li ma jissodisfawx l-istess standards ambjentali, tal-benesseri tal-annimali u tas-sigurtà tal-ikel u, f’dan ir-rigward, jistieden lill-UE tiżgura li l-ftehimiet kummerċjali jirrispettaw l-istandards agrikoli Ewropej u jiżguraw kundizzjonijiet ekwi għall-bdiewa tal-UE;

56.Jirrikonoxxi li l-għanijiet ambizzjużi tat-tranżizzjoni ekoloġika jinvolvu kemm opportunitajiet kif ukoll riskji għall-agrikoltura tal-UE; jenfasizza li l-għadd ta’ farms fl-UE naqas b’madwar 37 % bejn l-2005 u l-2020 u, f’dan ir-rigward, jistieden lill-Kummissjoni u lill-Istati Membri jieħdu azzjoni biex itaffu t-tnaqqis fl-għadd ta’ farms u jappoġġjaw id-dħul u l-kompetittività tagħhom, sabiex jiġġieldu l-fatt li dawn it-territorji qed jiġu abbandunati u jinkoraġġixxu t-tiġdid ġenerazzjonali;

57.Jirrimarka l-ħtieġa li jiġu ssimplifikati l-proċeduri amministrattivi għall-aċċess għall-fondi tal-UE billi titnaqqas il-burokrazija żejda għall-bdiewa u għan-negozji żgħar rurali u titjieb il-koordinazzjoni bejn il-livelli istituzzjonali involuti fil-ġestjoni tal-fondi, sabiex jiġi żgurat li r-riżorsi jingħataw b’mod aktar effiċjenti u f’waqtu;

58.Jirrimarka wkoll il-ħtieġa li dawn iż-żoni, kif ukoll in-negozji u d-detenturi ta’ żoni agrikoli u forestali, jingħataw appoġġ finanzjarju adegwat, inkluż appoġġ għax-xiri u għall-manutenzjoni tat-tagħmir, bil-ħsieb li jkun hemm kompetittività Ewropea akbar;

59.Huwa konxju bis-sħiħ li ż-żoni rurali għandhom rwol ewlieni fit-tranżizzjonijiet ekoloġiċi u diġitali; jissottolinja li t-tranżizzjonijiet għandhom jiġu implimentati gradwalment, abbażi tal-għanijiet li jistgħu jintlaħqu; jappella, f’dan ir-rigward, biex il-finanzjament tal-UE jkun marbut aħjar mas-sostenibbiltà ambjentali u mal-protezzjoni tal-bijodiversità;

60.Jenfasizza l-ħtieġa li jiġu appoġġjati l-komunitajiet rurali fir-reġjuni Ewropej li ntlaqtu bl-agħar mod mill-kummerċ jew mill-esportazzjoni ta’ prodotti agrikoli Ukreni;

61.Jirrimarka l-importanza ta’ miżuri ta’ kumpens għall-bdiewa u għan-negozji rurali biex jiġi żgurat li t-tranżizzjoni ekoloġika tkun ġusta u prattika u ma twassalx għal disparitajiet soċjoekonomiċi ġodda; jenfasizza li, biex din it-tranżizzjoni tkun ta’ suċċess, se jkunu essenzjali l-involviment u l-kollaborazzjoni sħaħ tal-partijiet ikkonċernati kollha, b’mod partikolari l-bdiewa u l-forestiera;

62.Jenfasizza li l-promozzjoni tal-agrikoltura hija komponent meħtieġ ta’ kwalunkwe strateġija għall-iżvilupp rurali iżda li din weħidha mhijiex suffiċjenti, peress li mhux in-nies kollha fiż-żoni rurali huma impjegati fis-settur agrikolu jew jgħixu fi strutturi agrikoli;

63.Jirrikonoxxi li t-turiżmu spiss huwa sors ewlieni ta’ introjtu għaż-żoni rurali, muntanjużi, insulari u ultraperiferiċi, kif ukoll fir-reġjun tal-Mediterran, u li għandu potenzjal li jinkoraġġixxi l-ħolqien tal-impjiegi u l-intraprenditorija u joffri esperjenzi uniċi marbuta man-natura, it-tradizzjonijiet u l-wirt kulturali, li jattiraw għadd dejjem akbar ta’ viżitaturi; jemmen, għal din ir-raġuni, li t-turiżmu għandu jkun appoġġjat permezz ta’ investiment fl-ekonomija rurali, f’sinerġija mas-setturi agrikoli, tas-sajd, tal-ikel u kulturali, u li l-UE għandha tippromwovi l-koeżistenza u l-iżvilupp ulterjuri ta’ dawn is-setturi;

64.Jenfasizza li t-turiżmu rurali u l-agrituriżmu jistgħu jkunu attività komplementari għall-agrikoltura, u joffru opportunitajiet għad-diversifikazzjoni tal-introjti tal-farms u jkunu ta’ benefiċċju għall-iżvilupp taż-żoni rurali, u li għalhekk għandhom jiġu allokati riżorsi għall-iżvilupp tat-turiżmu u l-attivitajiet tal-HoReCa;

65.Jissottolinja l-ħtieġa li jiġi promoss turiżmu rurali b’mod sostenibbli; jenfasizza l-importanza li jiġu ottimizzati l-benefiċċji ekonomiċi tat-turiżmu għaż-żoni rurali filwaqt li jiġu minimizzati l-impatti negattivi potenzjali fuq il-komunitajiet lokali u l-ekosistemi;

66.Jenfasizza l-importanza li jiġu protetti u promossi l-minoranzi lingwistiċi fiż-żoni rurali tal-UE, filwaqt li jiġu rikonoxxuti bħala parti integrali mill-wirt kulturali tal-Ewropa u bħala mutur tal-iżvilupp reġjonali; għalhekk, jistieden lill-Kummissjoni u lill-Istati Membri jallokaw riżorsi tal-politika ta’ koeżjoni biex jappoġġjaw proġetti għall-promozzjoni lingwistika, għat-taħriġ, għat-turiżmu kulturali, u għall-intraprenditorija lokali konnessi mat-tradizzjonijiet lingwistiċi u kulturali tar-reġjuni;

67.Iħeġġeġ lill-Kummissjoni u lill-Istati Membri jagħtu spinta lit-turiżmu fiż-żoni rurali u dawk depopolati, jew f’żoni li jinsabu f’riskju ta’ depopolazzjoni, billi jiffinanzjaw inizjattivi li jsaħħu l-villaġġi storiċi u l-prodotti lokali tradizzjonali u joħolqu kurituri ħodor ġodda u mogħdijiet oħra fin-natura, kif ukoll billi jiġu rikonoxxuti ambjenti eċċellenti għat-turiżmu rurali u tan-natura, simili għall-“bandiera blu” li tingħata lill-bajjiet;

68.Jinnota li f’xi Stati Membri, il-muniċipalitajiet għandhom rwol kruċjali bħala muturi tal-iżvilupp ekonomiku reġjonali, u b’hekk jibbenefikaw minn dħul sostanzjali mit-taxxa ġġenerat mill-ekonomiji lokali tagħhom; jenfasizza li dan id-dħul jista’ jimmotiva lill-muniċipalitajiet biex jinvestu fondi ta’ koeżjoni tal-UE sabiex iżidu l-bażi tat-taxxa futura tagħhom, jippromwovu tkabbir ekonomiku lokali fit-tul, u jiżguraw dħul mit-taxxa fit-tul; għal dan l-għan, jistieden lill-Kummissjoni, filwaqt li tqis il-prinċipju tas-sussidjarjetà fi kwistjonijiet fiskali, tibda djalogu dwar il-benefiċċji potenzjali tal-kondiviżjoni tat-taxxi fuq l-attivitajiet ekonomiċi mal-muniċipalitajiet;

69.Jinsisti li l-burokrazija eċċessiva ma għandhiex tipprevjeni lill-bdiewa milli jiffokaw fuq il-produzzjoni tal-ikel sostenibbli u fuq l-iżvilupp ekonomiku rurali; jistieden lill-Kummissjoni u lill-Istati Membri jinkludu dimensjoni rurali b’saħħitha fir-regolamenti futuri tal-politika ta’ koeżjoni u jippromwovu, bħala kwistjoni ta’ prijorità, regolamentazzjoni aħjar sabiex jitnaqqsu l-piżijiet amministrattivi u jittieħdu passi biex tiġi żgurata l-kompetittività tan-negozji rurali, b’mod partikolari l-SMEs, il-kooperattivi u l-komunitajiet immexxija miċ-ċittadini, u jippromwovu aċċess aktar faċli u aktar effiċjenti għall-fondi, tnaqqis tal-kostijiet u simplifikazzjoni tal-proċess ta’ applikazzjoni u ta’ evalwazzjoni tal-finanzjament tal-UE, speċjalment għall-benefiċjarji żgħar; jafferma mill-ġdid li l-ottimizzazzjoni tal-proċeduri, it-tnaqqis tal-burokrazija u t-titjib tat-trasparenza huma vitali biex jitjieb l-aċċess għar-riżorsi disponibbli; jistieden lill-Kummissjoni, għalhekk, tipprovdi servizzi ta’ konsulenza u assistenza teknika adegwati lill-awtoritajiet ta’ ġestjoni, u b’hekk tikkontribwixxi wkoll għal rati ta’ assorbiment ogħla;

70.Jappella għal approċċ aktar integrat bejn il-politiki industrijali u ta’ koeżjoni tal-UE, filwaqt li jiġi żgurat li l-istrateġiji ta’ żvilupp reġjonali jkunu allinjati mal-isforzi ta’ tranżizzjoni industrijali, b’mod partikolari fiż-żoni tat-Tramuntana li huma skarsament popolati;

71.Jenfasizza l-importanza tal-SMEs fis-setturi teknoloġiċi għad-diġitalizzazzjoni rurali u għar-reżiljenza ekonomika; jistieden lill-Kummissjoni tiżgura li l-miżuri pubbliċi jappoġġjaw lin-negozji lokali u jrawmu ekonomiji bbażati fuq il-qrubija, filwaqt li tevita kriterji li jistgħu jkunu ta’ żvantaġġ għall-intrapriżi iżgħar;

72.Jisħaq fuq il-ħtieġa għal allinjament aħjar bejn l-istrumenti eżistenti għall-iżvilupp territorjali u l-Fondi Strutturali, inklużi inizjattivi bħall-Isfruttar tat-Talent u l-Patt tas-Sindki;

73.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.