1.Jieħu nota tal-Abbozz ta’ baġit emendatorju Nru 1/2025 kif imressaq mill-Kummissjoni, li huwa mfassal biex jibbaġitja s-surplus tal-2024, għal ammont ta’ EUR 1 345 miljun, f’konformità mal-Artikolu 18(3) tar-Regolament Finanzjarju;

2.Jilqa’ l-fatt li s-surplus għall-2024 huwa xprunat primarjament minn żieda fil-varjazzjoni fit-Titolu 4 (dħul finanzjarju, imgħax ta’ inadempjenza u multi), filwaqt li s-surplus tan-nefqa għadu modest ħafna b’ammont ta’ EUR 273 miljun;

3.Jiddispjaċih li l-ibbaġitjar tas-surplus inaqqas il-kontribuzzjoni għar-riżorsi proprji bbażati fuq id-DNG tal-Istati Membri għall-finanzjament tal-baġit 2025 b’ammont proporzjonat; jisħaq li, fi żmien meta l-ħtiġijiet ta’ finanzjament għadhom għoljin, b’mod partikolari għall-ispejjeż żejda tal-EURI, u l-ispazju għal ċaqliq fi ħdan il-baġit tal-Unjoni għadu estremament limitat, il-baġit għandu jżomm livell suffiċjenti ta’ flessibbiltà biex jippermetti lill-Unjoni tlaħħaq ma’ avvenimenti mhux previsti u prijoritajiet emerġenti ġodda; jissottolinja li l-flessibbiltà tal-baġit tal-Unjoni hija waħda mill-kwistjonijiet ewlenin li għandhom jiġu indirizzati fin-negozjati għall-qafas finanzjarju pluriennali ta’ wara l-2027;

4.Jistieden ukoll lill-Kummissjoni tfassal arkitettura soda u dejjiema għall-qafas finanzjarju pluriennali li jmiss li tippermetti l-ġestjoni sostenibbli tal-ispejjeż u l-obbligazzjonijiet mhux diskrezzjonarji kollha, filwaqt li tippreserva bis-sħiħ il-programmi tal-Unjoni u l-flessibbiltà u l-kapaċità ta’ rispons tal-baġit, b’mod partikolari fir-rigward tad-diżastri naturali u l-emerġenzi tas-saħħa, bil-ħsieb li tiġi implimentata bis-sħiħ l-Istrateġija ta’ Preparatezza tal-Unjoni;

5.Ifakkar fil-pożizzjoni li ilu jħaddan li l-gwadann imprevist li jirriżulta minn multi u tariffi, jew ammonti ekwivalenti, għandu jintuża bħala dħul supplimentari għall-baġit tal-Unjoni għal skopijiet ta’ rispons għall-kriżijiet jew ħtiġijiet mhux mistennija u ma għandux iwassal għal tnaqqis korrispondenti fil-kontribuzzjonijiet ibbażati fuq id-DNG;

6.Jieħu nota tal-partita tal-introjtu negattiv skont l-Artikolu 425 il-ġdid, li tammonta għal EUR 534 miljun u jilqa’ dan il-metodu ta’ inklużjoni tal-ispejjeż għall-baġit li jirriżultaw minn pagament li sar skont ftehim ta’ saldu li jinvolvi imgħax kumpensatorju u kumpens tal-imgħax ta’ inadempjenza relatati mal-pagament lura ta’ multi tal-kompetizzjoni annullati jew imnaqqsa f’konformità mas-sentenzi pertinenti tal-Qorti tal-Ġustizzja; ifakkar li l-Parlament, meta nnegozja r-riformulazzjoni tar-Regolament Finanzjarju, kien insista fuq l-applikazzjoni ta’ dan l-approċċ peress li s-soluzzjoni alternattiva kienet tkun approprjazzjonijiet tan-nefqa addizzjonali fl-Intestatura 7 li diġà hija mġebbda żżejjed; ifakkar li din is-soluzzjoni tintemm fil-31 ta’ Diċembru 2027; jistieden lill-Kummissjoni tipproponi soluzzjoni definittiva għall-qafas finanzjarju pluriennali li jmiss li tilħaq l-istess objettiv li jiġi evitat kwalunkwe impatt fuq in-naħa tan-nefqa tal-baġit;

7.Jenfasizza l-ħtieġa ta’ dħul sostenibbli għall-baġit tal-Unjoni; jiddeplora, għalhekk, in-nuqqas totali ta’ progress fil-Kunsill dwar ir-riforma tas-sistema tar-riżorsi proprji f’konformità mal-ispirtu tal-pjan direzzjonali vinkolanti legalment fil-Ftehim Interistituzzjonali tas-16 ta’ Diċembru 2020; ifakkar fil-pożizzjoni tiegħu b’appoġġ għall-proposti emendati tal-Kummissjoni u jħeġġeġ lill-Kunsill jadotta dawk il-proposti b’urġenza sabiex jiddiversifika u jikkonsolida r-riżorsi proprji disponibbli għall-baġit tal-Unjoni;

8.Jistieden, barra minn hekk, lill-Kummissjoni tkompli bl-isforzi biex tidentifika riżorsi proprji innovattivi u ġenwini ġodda addizzjonali u sorsi oħra ta’ dħul lil hinn minn dawk speċifikati fil-Ftehim Interistituzzjonali tas-16 ta’ Diċembru 2020; jisħaq li riżorsi proprji ġodda huma essenzjali mhux biss biex jippermettu l-ħlas lura tas-self tan-Next Generation EU, iżda biex jiġi żgurat li l-Unjoni tkun mgħammra biex tkopri l-ħtiġijiet ogħla ta’ nfiq tagħha, b’mod partikolari fil-kuntest tad-diversi sfidi li l-Unjoni qed tiffaċċja bħalissa, inkluż il-kuntest ġeopolitiku l-ġdid; iqis li l-politiki u l-isfidi l-ġodda kollha tal-Unjoni jridu jinvolvu mezzi finanzjarji ġodda u riżorsi ġodda addizzjonali;

9.Japprova l-pożizzjoni tal-Kunsill dwar l-Abbozz tal-baġit emendatorju Nru 1/2025;

10.Jagħti istruzzjonijiet lill-President tiegħu biex tiddikjara li l-Baġit emendatorju Nru 1/2025 ġie adottat b’mod definittiv u biex tiżgura li jiġi ppubblikat f’Il-Ġurnal Uffiċjali tal-Unjoni Ewropea;

11.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-istituzzjonijiet l-oħra u lill-entitajiet ikkonċernati, kif ukoll lill-parlamenti nazzjonali.