1.Jesprimi l-akbar solidarjetà tiegħu mal-vittmi kollha, mal-familji tagħhom u mal-individwi kollha milquta mill-għargħar distruttiv fl-Awstrija, fil-Polonja, fiċ-Ċekja, fis-Slovakkja, fil-Moldova u fil-Bożnija-Ħerzegovina kif ukoll mal-awtoritajiet nazzjonali, reġjonali u lokali involuti fl-isforzi tas-sokkors;

2.Jilqa’ d-deċiżjoni bħala forma tanġibbli u viżibbli tas-solidarjetà tal-Unjoni maċ-ċittadini tagħha u mar-reġjuni fiż-żoni milquta, inklużi ma’ dawk tal-pajjiżi sħab;

3.Itenni l-importanza li l-benefiċċji tanġibbli pprovduti permezz tal-Fond ta’ Solidarjetà tal-Unjoni Ewropea (FSUE) jiġu kkomunikati lill-pubbliku, anke sabiex is-sensibilizzazzjoni taċ-ċittadini dwar l-għodod u l-programmi tal-Unjoni fl-Istati Membri u l-pajjiżi involuti f’negozjati tal-adeżjoni tkompli tikber;

4.Jenfasizza l-għadd dejjem jikber ta’ diżastri naturali kbar, distruttivi u fatali fl-Ewropa u jistieden lill-Istati Membri u lill-Kummissjoni jinvestu f’miżuri ta’ mitigazzjoni tat-tibdil fil-klima u l-adattament għalih biex jiġu evitati t-telf tal-ħajjiet u t-telf ekonomiku; jissottolinja li fl-2024 il-maltempati u l-għargħar affettwaw madwar 413 000 persuna, li rriżultaw biex mill-anqas 335 persuna tilfu ħajjithom u li l-ħsara mill-maltempati u l-għargħar madwar l-Ewropa matul is-sena hija stmata li tiswa mill-inqas EUR 18-il biljun Is-Servizz dwar it-Tibdil fil-Klima ta’ Copernicus (C3S) u l-Organizzazzjoni Meteoroloġika Dinjija (WMO), 2025: European State of the Climate 2024 (L-Istat tal-Klima fl-Ewropa 2024), climate.copernicus.eu/ESOTC/2024, doi.org/10.24381/14j9-s541.; iqis li l-baġit tal-FSUE jew l-ekwivalenti tiegħu għandu jiġi estiż b’mod sostanzjali fid-dawl tal-proposta li jmiss tal-Kummissjoni dwar il-Qafas Finanzjarju Pluriennali l-ġdid u tan-negozjati interistituzzjonali sussegwenti u li l-FSUE jew l-ekwivalenti tiegħu jrid jipprovdi assistenza għaċ-ċittadini li tkun proporzjonata għall-kobor ta’ tali diżastri; jinnota li ż-żieda sostanzjali tal-FSUE tippermetti lill-Istati Membri jirrispondu b’mod aktar effettiv u malajr għad-diżastri filwaqt li jistgħu jiġu ppreservati strumenti oħra, b’mod partikolari l-fondi ta’ koeżjoni li l-għan primarju tagħhom mhuwiex ir-rispons għad-diżastri; iħeġġeġ ukoll lill-Kummissjoni tesplora l-mezzi kollha possibbli biex taċċellera l-mobilizzazzjoni tal-FSUE, b’mod partikolari billi temenda r-regoli attwali u l-għoti ta’ pagamenti bil-quddiem ogħla lill-pajjiżi applikanti;

5.Jistieden lill-Kummissjoni tiżviluppa strumenti ddedikati ta’ rispons għall-kriżijiet għall-perjodu ta’ wara l-2027, filwaqt li tirrikonoxxi li l-frekwenza u s-severità dejjem akbar tad-diżastri naturali, l-emerġenzi tas-saħħa, l-instabbiltà ġeopolitika, u x-xokkijiet ekonomiċi jirrikjedu mekkaniżmi finanzjarji aktar aġli u mfassla apposta fil-livell tal-Unjoni; jissottolinja l-ħtieġa ta’ koordinazzjoni msaħħa mas-sistemi nazzjonali ta’ protezzjoni ċivili u mekkaniżmi ta’ twissija bikrija, biex jiġi żgurat rispons għad-diżastri fl-Unjoni kollha aktar integrat u xprunat mid-data; jenfasizza l-importanza ta’ appoġġ iddedikat għall-kooperazzjoni transfruntiera u reġjonali fl-isforzi ta’ preparatezza, mitigazzjoni u rkupru, b’mod partikolari f’żoni vulnerabbli jew ta’ riskju għoli;

6.Jisħaq li l-FSUE huwa biss strument kurattiv u li l-Unjoni għandha wkoll tkompli tindirizza l-adattament għat-tibdil fil-klima u l-mitigazzjoni tiegħu billi tappoġġja l-politiki Ewropej u nazzjonali għall-prevenzjoni tad-diżastri naturali; jissottolinja li r-Rapport Nru 1/2024 tal-Aġenzija Ewropea għall-Ambjent bit-titolu “European Climate Risk Assessment” (Valutazzjoni tar-Riskju Klimatiku fl-Ewropa) wissa li l-Unjoni mhix ippreparata għall-effetti tat-tibdil fil-klima anke jekk id-dinja jirnexxielha trażżan iż-żieda fit-temperatura globali għal 1,5 grad Celsius, kif stabbilit fil-ftehim ta’ Pariġi, u jisħaq fuq il-ħtieġa ta’ azzjoni biex jiġi evitat li r-riskji klimatiċi identifikati jilħqu livelli kritiċi; ifakkar fil-ħtieġa ta’ sinerġiji effettivi ma’ politiki u programmi oħra tal-Unjoni u jissottolinja li l-Istati Membri għandhom jagħmlu l-aħjar użu mill-opportunitajiet ta’ finanzjament, b’mod partikolari l-Fond Ewropew għall-Iżvilupp Reġjonali, il-Fond Soċjali Ewropew Plus u l-programmi għall-żvilupp rurali; jistieden lill-Kummissjoni tivvaluta b’urġenza dovuta kwalunkwe talba motivata mill-Istati Membri biex talloka mill-ġdid fondi fi ħdan il-pjanijiet nazzjonali għall-irkupru u r-reżiljenza għall-assistenza f’diżastri naturali, f’konformità mar-regoli stabbiliti fir-Regolament (UE) 2021/241 tal-Parlament Ewropew u tal-Kunsill Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, p. 17, ELI: http://data.europa.eu/eli/reg/2021/241/oj).; jisħaq ukoll fuq il-ħtieġa ta’ miżuri preventivi, mhux biss biex tiġi mitigata l-ħsara fil-futur iżda anke biex jiġi evitat li l-kundizzjonijiet ta’ riskju jaggravaw wara eventi katastrofiċi, bħal għargħar, nirien fis-selvaġġ, uqigħ tal-art jew l-inxif ta’ lagi u xmajjar; jenfasizza li r-rikostruzzjoni kollha ffinanzjata mill-FSUE trid tkun reżiljenti għall-klima; jissottolinja l-importanza ta’ flessibbiltà adegwata bejn il-programmi differenti; jissottolinja li l-assistenza mogħtija fl-ambitu tal-FSUE ma għandhiex tkun għad-detriment tal-finanzjament tal-Unjoni li rċevew l-Istati Membri fl-ambitu ta’ politiki jew programmi oħra tal-Unjoni; ifakkar li l-Istati Membri jistgħu jagħtu għajnuna mill-Istat, f’konformità mar-regoli applikabbli tal-Unjoni, b’mod partikolari lin-negozji agrikoli li jkunu ġarrbu ħsarat minħabba diżastri naturali;

7.Ifakkar li RESTORE u l-miżuri speċifiċi fl-ambitu tal-Fond Agrikolu Ewropew għall-Iżvilupp Rurali (FAEŻR) introdott mir-Regolament (UE) 2024/3242 tal-Parlament Ewropew u tal-Kunsill Ir-Regolament (UE) 2024/3242 tal-Parlament Ewropew u tal-Kunsill tad-19 ta’ Diċembru 2024 li jemenda r-Regolament (UE) 2020/2220 fir-rigward ta’ miżuri speċifiċi skont il-Fond Agrikolu Ewropew għall-Iżvilupp Rurali biex tingħata assistenza addizzjonali lill-Istati Membri affettwati minn diżastri naturali (ĠU L, 2024/3242, 23.12.2024, ELI: http://data.europa.eu/eli/reg/2024/3242/oj). jipprovdu assistenza addizzjonali lill-Istati Membri milquta minn diżastri naturali permezz ta’ aktar flessibbiltajiet fl-użu tal-fondi; jisħaq li l-Istati Membri għandhom jagħmlu użu mill-opportunitajiet il-ġodda; jissottolinja wkoll li RESTORE pprovda flessibbiltà limitata għal xi Stati Membri peress li l-implimentazzjoni tal-Qafas Finanzjarju Pluriennali attwali hija avvanzata ħafna;

8.Ifakkar fl-importanza ta’ valutazzjoni rapida u solida tal-ħsara li tqis kif xieraq ir-riperkussjonijiet ekonomiċi u jitlob li jsiru aktar sforzi operazzjonali sabiex jitnaqqas iż-żmien medju għar-rilaxx tal-avvanzi biex tiġi offruta assistenza f’waqtha lir-reġjuni milquta minn diżastri naturali u eventi ta’ temp estrem, filwaqt li jiġi żgurat li l-baġit tal-Unjoni jkun protett; jisħaq li l-Istati Membri għandhom, fil-kuntest tar-reazzjoni għad-diżastri u l-miżuri ta’ rkupru, jagħtu l-prijorità dovuta lill-ħtiġijiet tal-popolazzjoni milquta, b’attenzjoni partikolari għall-gruppi vulnerabbli;

9.Jisħaq fuq il-ħtieġa urġenti li tiġi rilaxxata assistenza finanzjarja immedjata permezz tal-FSUE biex jiġi żgurat li l-appoġġ ikun jista’ jilħaq lir-reġjuni milquta fi żmien xieraq;

10.Japprova d-deċiżjoni annessa ma’ din ir-riżoluzzjoni;

11.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

12.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.