1.Jinnota li fis-16 ta’ Lulju 2025, flimkien mal-proposta tagħha għal qafas finanzjarju pluriennali ġdid għall-perjodu 2028-2034, il-Kummissjoni ppreżentat proposti leġiżlattivi għar-riforma tal-PAK; jinsisti, madankollu, li l-pożizzjoni tal-Parlament dwar il-futur tal-PAK u tal-biedja tal-UE għadha kif stabbilit f’din ir-riżoluzzjoni;

2.Jieħu nota tar-rapport tal-Kummissjoni bit-titolu “Viżjoni għall-agrikoltura u l-ikel” bħala pjan direzzjonali promettenti għall-PAK wara l-2027, b’kontributi importanti bbażati fuq it-tiġdid ġenerazzjonali, il-kompetittività, is-sostenibbiltà, ir-reżiljenza, is-simplifikazzjoni u reċiproċità akbar tal-istandards fil-kummerċ, u bl-enfasi fuq l-innovazzjoni biex tinkiseb sostenibbiltà ekonomika, soċjali u ambjentali, fuq il-prijoritizzazzjoni tal-inċentivi fuq ir-restrizzjonijiet u fuq immirar aktar ekwu tal-appoġġ tal-PAK; jirrikonoxxi, f’dan l-approċċ, enfasi mġedda fuq l-għanijiet ewlenin tradizzjonali tal-PAK kif minquxa fl-Artikolu 39 tat-TFUE; jenfasizza l-importanza li jiġi żgurat baġit awtonomu tal-PAK sabiex jintlaħqu dawn l-għanijiet;

3.Jissottolinja li l-agrikoltura għandha rwol fundamentali fl-iżgurar tas-sigurtà tal-ikel għall-UE u lil hinn minnha, is-salvagwardja tas-saħħa tal-bniedem, iż-żamma tal-bijodiversità u tal-ħamrija u l-ilma f’saħħithom, u l-koeżjoni soċjali; jissottolinja li l-PAK futura għandha tissimplifika l-aċċess għall-miżuri ta’ adattament u mitigazzjoni tat-tibdil fil-klima u li l-bdiewa għandhom jiġu ppremjati għall-isforzi tagħhom f’dan ir-rigward; jisħaq fuq il-fatt li l-bdiewa għandhom rwol kritiku fl-iżgurar tas-sostenibbiltà tal-produzzjoni agrikola Ewropea fid-dimensjonijiet ambjentali, soċjali u ekonomiċi kollha tagħha, filwaqt li jikkontribwixxu wkoll għas-sigurtà tal-ikel u l-awtonomija strateġika u għalhekk għandhom jiġu appoġġjati; jappella li jsiru valutazzjonijiet tal-impatt li jqisu l-implikazzjonijiet fil-livell tal-azjendi agrikoli qabel ma jiġi propost xi regolament ġdid li jinvolvi rekwiżiti u piżijiet burokratiċi ġodda fuq il-bdiewa, u jappella li jsir rieżami tal-obbligi eżistenti kollha; jinsisti li l-agrikoltura tibqa’ politika tal-Unjoni u ma tiġix inkluża f’fond uniku, sabiex jiġu żgurati kundizzjonijiet uniformi fost l-Istati Membri;

4.Jappella għal baġit akbar u ddedikat għall-PAK, li jkun indiċjat għall-inflazzjoni permezz ta’ rievalwazzjonijiet ta’ kull sena, fil-qafas finanzjarju pluriennali li jmiss biex tiġi żgurata s-sigurtà tal-provvista tal-ikel indipendentement mill-instabbiltajiet kummerċjali li jirriżultaw mill-volatilità tal-ambjent ġeopolitiku; jenfasizza li mingħajr riżorsi adegwati, il-PAK ma tistax tibqax tkun mutur ewlieni biex tiżgura s-sostenibbiltà ekonomika, ambjentali u soċjali tal-agrikoltura Ewropea, filwaqt li fl-istess ħin tiżgura introjtu ġust u kundizzjonijiet ġusti għal min huwa involut fis-settur tal-biedja u suq uniku li jiffunzjona għalkollox; jappella li r-riżorsi finanzjarji allokati għall-PAK jibqgħu allokati fil-baġit għal dak l-għan, b’mod partikolari l-pagamenti diretti; jopponi bis-saħħa l-idea li l-Istati Membri għandhom jitħallew jużaw il-baġit tal-PAK bħala parti minn pakkett totali għal skopijiet oħra għajr l-agrikoltura; jenfasizza li baġit adegwat se jgħin biex jiżgura l-kontinwità ta’ politika komuni;

5.Jistieden lill-Kummissjoni u lill-koleġiżlaturi jżommu l-appoġġ għall-introjtu fiss u delimitat bħala komponent ewlieni tal-PAK ta’ wara l-2027, filwaqt li jirrikonoxxu r-rwol vitali tiegħu fl-iżgurar tal-produzzjoni tal-ikel, bi standards għoljin ta’ kwalità u tas-saħħa għall-konsumaturi tal-UE, jipprovdu lill-bdiewa bi stabbiltà fid-dawl tal-volatilità tas-suq u l-avvenimenti ta’ temp estrem, jiżguraw standard tal-għajxien ġust għall-bdiewa, jiggarantixxu s-sigurtà tal-provvista u jibnu l-awtonomija tal-ikel u tal-għalf; iqis li s-sitwazzjoni attwali tar-reġjuni li jinsabu fil-fruntieri esterni tal-UE trid titqies ukoll;

6.Jinnota t-tħassib tiegħu dwar ir-reviżjonijiet baġitarji potenzjali fil-baġit tal-UE ta’ wara l-2027, inkluża ċ-ċentralizzazzjoni possibbli tal-flussi ta’ finanzjament; iwissi li l-integrazzjoni tal-PAK ma’ oqsma ta’ finanzjament oħra bħall-koeżjoni, l-iżvilupp reġjonali u s-sajd tista’ ddgħajjef ir-rwol distint tal-politika agrikola;

7.Jenfasizza l-ħtieġa li l-PAK iżżomm il-pożizzjoni legali u istituzzjonali tagħha fil-perjodu ta’ wara l-2027; jisħaq fuq l-importanza li l-baġit għall-politika agrikola komuni (PAK) jinżamm bħala baġit awtonomu, distint u ddedikat, imfassal apposta għall-ħtiġijiet speċifiċi tas-settur agrikolu Ewropew; jistieden lill-Kummissjoni tnaqqas il-piżijiet amministrattivi biex tiżgura li l-bdiewa jistgħu jaċċessaw l-appoġġ direttament mingħajr dipendenza eċċessiva fuq il-konsulenti esterni;

8.Jafferma mill-ġdid l-importanza li l-PAK tinżamm bħala politika separata u distinta, li sservi ta’ sħubija bejn l-agrikoltura u s-soċjetà, u bejn l-Ewropa u l-bdiewa tagħha, u tipprovdi appoġġ affidabbli lilhom bl-għan li tissaħħaħ is-sigurtà tal-ikel; jiċħad bis-sħiħ kwalunkwe proposta li l-baġit tal-PAK jiġi inkluż f’fond wieħed ma’ politiki jew fondi oħra, minħabba li approċċ bħal dan inaqqas l-effettività tal-interventi u jikkomprometti l-objettivi strateġiċi tal-Unjoni fir-rigward tas-sigurtà tal-ikel u l-iżvilupp rurali;

9.Jindika li, fil-kuntest ġeopolitiku attwali, l-aċċess sigur u kostanti għall-ikel sar kwistjoni ta’ sigurtà strateġika, u li d-dipendenza fuq l-importazzjonijiet tista’ tiġi sfruttata bħala mezz biex issir pressjoni; jissottolinja li, f’dan il-kuntest, għandha ssir aktar enfasi fuq l-għanijiet ewlenin tradizzjonali tal-PAK: l-appoġġ għar-reżiljenza u s-sigurtà tal-ikel, l-iżgurar ta’ introjtu ġust għall-bdiewa, u t-titjib tal-istabbiltà u l-kompetittività tas-suq;

10.Jenfasizza li l-produzzjoni alimentari u agrikola sostenibbli għandhom rwol strateġiku akbar, aċċentwat mill-kuntest ġeopolitiku l-ġdid, bħala parti essenzjali mis-sigurtà, mill-istabbilità, mis-sovranità u mill-awtonomija strateġika Ewropej, u li l-ammont u l-qafas tal-baġit tal-PAK iridu jirriflettu dan; isostni li l-biedja tal-UE għandha tiġi rikonoxxuta mhux biss bħala settur ekonomiku, iżda wkoll bħala pedament ġeopolitiku, għodda għall-istabbiltà soċjali u territorjali u komponent kritiku tal-politiki tas-sigurtà u tad-difiża tal-UE; jinnota li, fil-livell dinji, bl-eċċezzjoni tal-UE, il-pajjiżi li għandhom rwol ewlieni fis-settur agrikolu żiedu l-infiq u l-miżuri ta’ protezzjoni tagħhom għas-settur sa mill-kriżi tal-prezzijiet tal-ikel tal-2007 u l-2008; ifakkar li l-produttività u r-reżiljenza agrikoli jiddependu mill-ġestjoni sostenibbli tar-riżorsi naturali biex tiġi ggarantita s-sostenibbiltà fit-tul tas-sistemi tal-ikel tagħna; jenfasizza l-ħtieġa li l-PAK ta’ wara l-2027 tikkontribwixxi għat-tisħiħ tal-preparatezza u r-reżiljenza ġenerali tal-Unjoni; jenfasizza li l-Kummissjoni u l-Istati Membri għandhom jinkludu l-ikel fil-pjanijiet tagħhom tas-sigurtà u tal-kompetittività; jistieden lill-Kummissjoni u lill-Istati Membri jikkunsidraw il-possibbiltà li jistabbilixxu installazzjonijiet strateġiċi ta’ ħin fuq skala Ewropea u nazzjonali bil-għan li tiġi ggarantita s-sigurtà alimentari;

11.Jirrimarka li l-produzzjoni agrikola effiċjenti tagħti kontribut importanti għas-sostenibbiltà tas-settur, billi tottimizza r-rendimenti bl-anqas inputs possibbli; jenfasizza li l-PAK trid tinkludi strumenti u investimenti li jsaħħu l-kapaċità tal-azjendi agrikoli u taż-żoni rurali li jkunu ppreparati għax-xokkijiet, li jassorbuhom u jirkupraw minnhom; jinsisti li l-objettiv primarju tal-PAK għandu jkun l-issodisfar tal-ħtiġijiet alimentari tal-popolazzjoni Ewropea, u li dan ifisser li l-bdiewa jiġu appoġġjati b’mod aktar effettiv sabiex tingħata spinta s-sigurtà tal-ikel u l-awtonomija strateġika tal-UE;

12.Jissottolinja, f’dan ir-rigward, ir-rwol strateġiku tas-swieq bl-ingrossa, l-istrutturi akkreditati fl-interess pubbliku, li jistgħu jiżguraw il-konformità mal-prinċipji tas-sostenibbiltà, it-tnaqqis tal-iskart u t-trasparenza tal-prezzijiet;

13.Jirrimarka li l-kooperazzjoni, l-aggregazzjoni u d-djalogu, kif ukoll organizzazzjoni aħjar tal-bdiewa permezz ta’ kooperattivi, organizzazzjonijiet ta’ produtturi jew assoċjazzjonijiet ta’ organizzazzjonijiet ta’ produtturi fil-katina tal-valur agroalimentari, flimkien ma’ derogi mid-dritt tal-kompetizzjoni u appoġġ speċifiku, huma kruċjali biex itejbu l-pożizzjoni tal-bdiewa, jippromwovu distribuzzjoni aktar ġusta tal-marġnijiet u jżidu l-effiċjenza tal-atturi kollha; jinnota, f’dan ir-rigward, ir-riforma tal-OKS u tad-Direttiva dwar Prattiki Kummerċjali Inġusti Id-Direttiva 2005/29/KE tal-Parlament Ewropew u tal-Kunsill tal-11 ta’ Mejju 2005 dwar prattiki kummerċjali żleali fin-negozju mal-konsumatur fis-suq intern, li temenda d-Direttiva tal-Kunsill 84/450/KEE, id-Direttivi 97/7/KE, 98/27/KE u 2002/65/KE tal-Parlament Ewropew u tal-Kunsill u tar-Regolament (KE) Nru 2006/2004 tal-Parlament Ewropew u tal-Kunsill (Id-Direttiva dwar il-Prattiki Kummerċjali Inġusti), ELI: http://data.europa.eu/eli/dir/2005/29/2022-05-28. tista’ sservi ta’ opportunità biex issaħħaħ il-pożizzjoni tal-bdiewa fi ktajjen tal-provvista agroalimentari nazzjonali u transnazzjonali, u tiżgura li l-produtturi jiksbu prezz ġust għall-prodotti tagħhom u għax-xogħol tagħhom, billi jissaħħu l-mekkaniżmi ta’ ġestjoni tal-kriżijiet u jittejjeb l-infurzar transfruntier kontra l-prattiki kummerċjali inġusti permezz tal-armonizzazzjoni fil-livell tal-UE, mingħajr ma jiġu kompromessi jew milquta b’mod negattiv l-aħjar strateġiji u prattiki nazzjonali eżistenti; jistieden lill-Kummissjoni teżamina l-possibbiltà li jiġu stabbiliti strumenti ġodda biex jiġi evitat li l-bdiewa jirċievu prezzijiet għall-prodotti tagħhom li jkunu taħt l-ispejjeż tal-produzzjoni;

14.Jissottolinja, b’mod partikolari, l-importanza tat-tisħiħ tal-kooperazzjoni transfruntiera bejn l-awtoritajiet kompetenti fl-Istati Membri, l-iżgurar ta’ infurzar tar-regoli effettiv, koordinat u konsistenti fis-suq intern kollu, sabiex tiġi miġġielda l-imġiba abbużiva, tiġi żgurata l-ġustizzja matul il-katina tal-provvista u tiġi prevenuta l-kompetizzjoni inġusta; jenfasizza li s-sigurtà tal-ikel u s-sovranità tal-ikel huma komponenti vitali tal-awtonomija strateġika u li l-QFP li jmiss irid ikompli jappoġġja b’mod effettiv il-kompetittività u r-reżiljenza tas-settur tal-agrikoltura tal-Unjoni;

15.Jisħaq fuq l-importanza li jiġi ssalvagwardjat u msaħħaħ l-appoġġ għall-introjtu dirett biex jiġu ssodisfati l-ħtiġijiet tal-bdiewa attivi u professjonali kollha fl-ambitu tal-PAK, kemm full-time kif ukoll part-time, irrispettivament mid-daqs u t-tip ta’ produzzjoni tagħhom; jissottolinja l-importanza li jiġu inklużi l-bdiewa pluriattivi, peress li l-bdiewa kollha jikkontribwixxu b’mod sinifikanti għan-nisġa soċjoekonomika taż-żoni rurali;

16.Jirrimarka li l-pagamenti diretti fil-forma attwali tagħhom jiġġeneraw valur miżjud ċar tal-UE u jfakkar fl-importanza ta’ mudell ibbażat fuq l-erja, filwaqt li jiżdied l-appoġġ għall-bdiewa l-aktar vulnerabbli, inklużi l-azjendi agrikoli mmexxija mill-familji, l-azjendi agrikoli żgħar u ta’ daqs medju, il-bdiewa żgħażagħ u nisa, l-azjendi agrikoli f’żoni b’restrizzjonijiet naturali u dawk li jadottaw prattiki aktar sostenibbli; jiffavorixxi mudell li jipprovdi l-istabbiltà u jikkontribwixxi b’mod effettiv għall-introjtu tal-bdiewa u li jżomm il-vijabbiltà ekonomika, il-kompetittività u s-sostenibbiltà tal-produzzjoni tal-ikel fir-reġjuni u t-territorji kollha tal-UE; jemmen li huwa essenzjali li tiġi żgurata l-ġustizzja fid-distribuzzjoni tal-pagamenti diretti, kemm fost l-Istati Membri kif ukoll fi ħdan l-Istati Membri individwali;

17.Jemmen li sabiex jittejjeb l-immirar tal-appoġġ tal-PAK lejn dawk involuti f’attività agrikola, huwa meħtieġ li tiġi rfinata aktar id-definizzjoni qafas ta’ bidwi fil-livell tal-UE u li, abbażi ta’ din id-definizzjoni, l-Istati Membri għandhom jiddefinixxu liema bdiewa huma eliġibbli għall-appoġġ; jinsisti li din id-definizzjoni ma għandhiex tirriżulta f’li jkun prekluż l-appoġġ lill-bdiewa pluriattivi, li jkunu attivi fil-biedja filwaqt li jkunu impenjati wkoll f’attivitajiet mhux agrikoli barra mill-azjenda agrikola tagħhom, minħabba li l-attivitajiet multipli tagħhom spiss isaħħu n-nisġa soċjoekonomika taż-żoni rurali;

18.Jenfasizza l-importanza tat-trasparenza fl-allokazzjoni tal-fondi tal-PAK u jappella għall-identifikazzjoni sistematika tal-benefiċjarji finali u l-kumpaniji interkonnessi; iħeġġeġ lill-Kummissjoni u lill-Istati Membri jintroduċu mekkaniżmi ta’ kontroll biex tiġi pprevenuta l-konċentrazzjoni tal-għajnuna permezz ta’ strutturi kumplessi ta’ sjieda jew frammentazzjoni artifiċjali tal-azjendi agrikoli;

19.Iqis li, sakemm jiġu rispettati kundizzjonijiet ekwi fis-suq intern, il-pagamenti volontarji ta’ appoġġ akkoppjat għandhom jinżammu jew jiżdiedu, b’allokazzjoni baġitarja suffiċjenti u flessibbiltà akbar fl-użu tagħhom, bħala għodda sempliċi biex tinżamm il-produzzjoni f’setturi vulnerabbli u biex jiġu miġġielda diffikultajiet speċifiċi, b’mod partikolari dawk li jirriżultaw mill-iżvantaġġ kompetittiv strutturali ta’ żoni żvantaġġati;

20.Jistieden lill-Kummissjoni u lill-Istati Membri jżommu n-natura volontarja tal-ekoskemi u jagħmluhom aktar sempliċi u aktar flessibbli fil-PAK ta’ wara l-2027; jistieden lill-Istati Membri jipprovdu lill-bdiewa tagħhom b’lista ċara u sempliċi ta’ għażliet ta’ ekoskemi effiċjenti u effettivi biex jagħżlu minnhom, akkumpanjata minn remunerazzjoni xierqa u attraenti biex jinċentivawhom, filwaqt li la jdgħajfu l-fondi allokati għall-pagamenti diretti u l-investimenti u lanqas iżidu l-burokrazija; jistieden lill-Istati Membri jinvestu fit-taħriġ biex jappoġġjaw lill-bdiewa fl-użu effettiv tal-ekoskemi;

21.Jirrikonoxxi l-progress li diġà sar permezz tal-kundizzjonalità soċjali; jappella għal evalwazzjoni tal-kundizzjonalità soċjali fil-PAK u implimentazzjoni proporzjonata, effettiva u definita b’mod ċar biex jiġu evitati d-duplikazzjoni tar-regolamenti fost l-Istati Membri u l-piżijiet amministrattivi sproporzjonati fuq il-bdiewa, u biex jiġu protetti d-drittijiet tal-ħaddiema;

22.Jappella li jsir studju komprensiv biex jiġi vvalutat jekk l-introduzzjoni ta’ mekkaniżmi obbligatorji, bħal ridistribuzzjoni jew limitazzjoni tal-pagamenti diretti fl-ambitu tal-PAK permezz ta’ l-iffissar ta’ limiti massimi u digressività, tagħmilx is-sistema aktar ġusta; jenfasizza li dan għandu jiġi analizzat qabel il-preżentazzjoni ta’ proposti għal PAK ġdida sabiex jiġu żviluppati strumenti xierqa li jistgħu ġenwinament jappoġġjaw il-vijabbiltà tal-azjendi agrikoli fl-UE kollha, inklużi l-bdiewa żgħażagħ u nisa u l-azjendi agrikoli żgħar u ta’ daqs medju; jisħaq li dan l-istudju għandu janalizza wkoll in-nuqqas ta’ applikazzjoni tal-limitu massimu għall-pagamenti speċifiċi, bħall-ekoskemi u l-pagamenti agroambjentali jew relatati mal-klima;

23.Jappella li tiġi mfittxija distribuzzjoni ekwa tal-valur li jiġi prodott fis-settur agroalimentari, permezz ta’ liġijiet ta’ qafas u interventi bl-għan li jżidu l-profitti tal-intraprenditorija u l-profitti agrikoli, billi jiġu bbilanċjati mill-ġdid ir-relazzjonijiet fi ħdan il-katina tal-provvista fil-konfront tad-distributuri u l-produtturi; jappella, b’mod partikolari, għal inċentivi u investimenti għal mudelli ġodda ta’ negozji agroalimentari li jipprovdu sostenibbiltà finanzjarja fit-tul u għal ibbilanċjar mill-ġdid tar-relazzjoni kummerċjali bejn il-bdiewa, id-distributuri u l-produtturi lil hinn mill-approċċ attwali tal-UE ta’ prattiki pprojbiti, billi titfassal leġiżlazzjoni qafas ta’ referenza imnebbħa mil-liġi Franċiża “EGAlim”;

24.Jappella għal tieni pilastru tal-PAK indipendenti u b’saħħtu, separat mill-politiki tal-koeżjoni iżda kkoordinat mill-qrib magħhom, li jippromwovi l-koerenza tal-politiki biex jiffaċilita, fost l-oħrajn, l-integrazzjoni territorjali, u jiżgura sinerġiji u appoġġ effettiv għas-settur agrikolu f’qafas koerenti li jiggarantixxi l-użu effiċjenti tal-fondi u l-investimenti tal-UE fil-proġetti; jinsisti li dawn il-fondi jaslu għand il-benefiċjarji b’mod f’waqtu; jemmen li l-finanzjament tal-iżvilupp rurali għandu jiġi allokat primarjament għall-attivitajiet agrikoli, filwaqt li azzjonijiet oħra li jappoġġjaw territorji jew infrastruttura għandhom jiġu ffinanzjati mill-fondi ta’ koeżjoni;

25.Jisħaq fuq il-ħtieġa ta’ programm tal-iżvilupp rurali ffinanzjat tajjeb fl-ambitu tat-tieni pilastru tal-PAK biex jiġu appoġġjati ż-żoni rurali, b’kontribuzzjoni finanzjarja qawwija tal-UE, ikkomplementata minn kofinanzjament nazzjonali biex jiġu żgurati l-effettività u s-sostenibbiltà fit-tul tal-programm; jenfasizza, f’dan is-sens, ir-rwol kruċjali tal-gvernijiet lokali u l-partijiet ikkonċernati, bħall-kooperattivi u l-gruppi ta’ azzjoni lokali, fis-simplifikazzjoni tal-isforzi fl-ambitu tal-Pilastru II tal-PAK; jinsisti li r-reġjuni jeħtiġilhom ikunu kapaċi jfasslu, jimplimentaw u jiġġestixxu l-miżuri tal-iżvilupp rurali b’mod awtonomu, filwaqt li jirrispettaw l-ispeċifiċitajiet kostituzzjonali ta’ kull Stat Membru;

26.Jappella għal żieda fil-baġit allokat għall-programm LEADER, li jikkontribwixxi għall-indirizzar tal-isfidi soċjali u l-promozzjoni ta’ gruppi ta’ azzjoni lokali permezz tat-tisħiħ tal-approċċi tal-iżvilupp lokali mmexxi mill-komunità, li huma kruċjali fil-bini ta’ rabtiet rurali-urbani aktar b’saħħithom; jisħaq li l-programm LEADER għandu rwol ċentrali fil-promozzjoni ta’ żoni rurali attraenti, prosperi, reżiljenti u interkonnessi billi jappoġġja inizjattivi li jiġġeneraw valur miżjud lokali, jistimulaw l-intraprenditorija, irawmu l-innovazzjoni u jsaħħu n-nisġa ekonomika u soċjali tat-territorji, li kollha huma essenzjali għaż-żamma u l-attirar tal-kapital uman, speċjalment iż-żgħażagħ u n-nisa, u jikkontribwixxu għall-bilanċ demografiku u territorjali, u t-tiġdid ġenerazzjonali;

27.Jirrikonoxxi li l-miżuri agroambjentali u klimatiċi volontarji, u l-miżuri dwar il-benesseri tal-annimali u s-saħħa tal-annimali u tal-pjanti fl-ambitu tal-Pilastru II, bl-użu ta’ approċċi simplifikati u bbażati kemm fuq l-inċentivi kif ukoll fuq il-konformità, huma strumenti ewlenin għas-salvagwardja tal-ambjent u l-promozzjoni ta’ prattiki sostenibbli, filwaqt li jikkontribwixxu għal introjtu deċenti għall-bdiewa li jimplimentawhom; iqis li dawn l-iskemi tal-Pilastru II huma aktar effettivi mill-ekoskemi, li, f’ħafna Stati Membri, ma kisbux ir-riżultati mixtieqa minħabba l-livell għoli ta’ kumplessità tagħhom għall-bdiewa, u għalhekk jemmen li dawn l-iskemi tal-Pilastru II għandhom jirċievu sehem akbar ta’ finanzjament fil-PAK futura; jissottolinja l-importanza li jiġi żgurat li l-miżuri agroambjentali u klimatiċi jikkontribwixxu għaż-żamma u t-tisħiħ tal-produzzjoni tal-ikel;

28.Jappella li l-appoġġ finanzjarju tal-PAK isir aktar sempliċi u aktar aċċessibbli għal proġetti żgħar, li ħafna drabi huma l-muturi tal-inizjattivi l-aktar innovattivi; jistieden lill-Kummissjoni u lill-Istati Membri jippromwovu u jestendu l-użu ta’ għażliet ta’ kostijiet issimplifikati;

29.Jistieden lill-Kummissjoni tadotta miżuri konkreti biex tiggarantixxi li l-importazzjonijiet ta’ prodotti agroalimentari minn pajjiżi mhux tal-UE ikollhom l-istess standards ambjentali, soċjali, tas-sikurezza tal-ikel u tal-benesseri tal-annimali bħal dawk mitluba mill-produtturi tal-UE, sabiex jiġu żgurati kundizzjonijiet ekwi u livell għoli ta’ sikurezza tal-ikel, traċċabbiltà u produzzjoni sostenibbli fl-UE; jinsisti li dan huwa essenzjali biex jiġi evitat li tiġi kompromessa l-kompetittività tal-produzzjoni agroalimentari tal-UE fir-rigward tal-prodotti importati; jinsisti li, sabiex tiġi evitata l-kompetizzjoni inġusta għall-bdiewa tal-UE, il-Kummissjoni trid tkun lesta li tattiva klawżoli ta’ salvagwardja fil-ftehimiet tagħha ma’ pajjiżi mhux tal-UE, fejn meħtieġ, biex tiżgura l-istabbiltà tas-suq intern;

30.Jistieden lill-Kummissjoni, fl-isforzi tagħha biex tiftaħ swieq ġodda u tikkonsolida dawk eżistenti, twettaq valutazzjoni tal-impatt sistematika tad-dispożizzjonijiet relatati mas-settur agrikolu f’kull wieħed mill-ftehimiet kummerċjali tagħha, li għandha tqis il-partijiet interessati kollha sabiex tiddetermina l-impatt kumulattiv tagħhom, u tipprovdi strateġiji speċifiċi biex tiżgura kundizzjonijiet ekwi u reċiproċità fil-livelli kollha, b’mod partikolari fir-rigward tal-istandards tal-produzzjoni u tal-kwalità u dawk soċjali;

31.Jenfasizza li huwa meħtieġ li tinżamm konsistenza bejn il-politika kummerċjali u l-politika tas-sostenibbiltà tal-Unjoni, u li jissaħħu l-kontrolli kemm fis-sors kif ukoll fil-fruntieri mill-Kummissjoni u mill-Istati Membri u permezz ta’ aġenzija ta’ kontroll tal-UE, peress li dan joffri garanziji akbar f’termini ta’ kompetizzjoni ġusta għall-produtturi Ewropej; jappella għal rieżami tal-politika kummerċjali tal-UE biex jiġi żgurat li tappoġġja b’mod effettiv il-kompetittività u s-sostenibbiltà tal-agrikoltura Ewropea; jenfasizza li s-sostenibbiltà u l-kompetittività tas-settur agrikolu tal-UE m’għandhomx jiddgħajfu meta jiġu żgurati ftehimiet kummerċjali futuri;

32.Jistieden lill-Kummissjoni ttejjeb is-sinerġiji, il-komplementarijiet u l-koordinazzjoni bejn l-istrumenti ta’ finanzjament tal-UE, bħall-Fond ta’ Koeżjoni, l-istrument għall-irkupru NextGenerationEU jew il-Fond għal Tranżizzjoni Ġusta, kif ukoll mal-istrumenti nazzjonali, kif ukoll biex tiftaħ linji diretti ta’ kooperazzjoni mal-awtoritajiet lokali fil-ġestjoni u fl-implimentazzjoni tal-fondi; jitlob, barra minn hekk, integrazzjoni msaħħa ma’ programmi rilevanti oħra, sabiex jiġi mmassimizzat l-impatt tal-objettivi tal-innovazzjoni, tad-diġitalizzazzjoni, tas-sostenibbiltà u tar-reżiljenza fl-agrikoltura u fiż-żoni rurali; jistieden lill-Kummissjoni tistabbilixxi proċedura interna, fil-bidu ta’ kull perjodu ta’ programmazzjoni finanzjarja, sabiex tiġi żgurata l-komplementarjetà u l-koerenza fil-livell tal-UE bejn l-istrumenti ta’ appoġġ differenti ppjanati għaż-żoni rurali;

33.Jenfasizza li l-aċċess għall-finanzjament għall-bdiewa u atturi oħra fis-settur agroalimentari huwa essenzjali biex jiġu implimentati l-investimenti, jiġi ffaċilitat l-aċċess għall-art u tiġi żgurata l-kontinwità tal-attività agrikola fl-azjendi agrikoli; jenfasizza, barra minn hekk, li l-innovazzjoni u t-teknoloġija fis-settur agroalimentari għandhom ikomplu jibbenefikaw minn appoġġ għall-investiment immirat bħala prijorità, sabiex l-UE tkun tista’ ssir ċentru diġitali globali, tingħata spinta lin-negozji ġodda filwaqt li ż-żgħażagħ b’talent jiġu attirati u jinżammu;

34.Jinnota li l-Istati Membri jħabbtu wiċċhom ma’ riskji varjati u li kulma jmur qed jiżdiedu; jenfasizza, f’dan ir-rigward, li żieda xierqa fir-riżerva komuni għal kriżijiet agrikoli u riforma tagħha flimkien mal-ħolqien ta’ strumenti finanzjarji ġodda u speċifiċi, b’riżorsi barra mill-PAK, huma t-tnejn essenzjali biex jappoġġjaw lill-bdiewa, fost distorsjonijiet imprevedibbli tas-suq u tat-tibdil fil-klima bħan-nixfa u l-għargħar, il-maltempati, il-mard tal-pjanti u tal-annimali, kif ukoll il-bidliet fl-imġiba tal-konsumaturi u t-tensjonijiet ġeopolitiċi; jistieden lill-Kummissjoni tistabbilixxi l-istrateġija ex ante tagħha ta’ ġestjoni ta’ kriżijiet fuq bażi ta’ prodott prodott, bl-għan li r-riżerva għal kriżijiet fis-settur tal-agrikoltura tintuża b’mod li jimmassimizza l-effiċjenza u l-valur miżjud komunitarju; jistieden lill-Kummissjoni u lill-Istati Membri jiżguraw reazzjonijiet rapidi, effettivi u proporzjonati għall-ħtiġijiet tal-bdiewa f’sitwazzjonijiet ta’ kriżi, li jippermettulhom jiksbu malajr il-kapital li jeħtieġu biex jirrestawraw l-attivitajiet agrikoli tagħhom;

35.Jenfasizza r-rwol importanti tal-mekkaniżmi ta’ intervent pubbliku tal-PAK biex jagħmlu s-swieq agrikoli stabbli u jipproteġu lill-bdiewa mill-varjazzjonijiet fil-prezzijiet; ifakkar li ilha diversi snin ma ssir rivalutazzjoni tal-limiti ta’ referenza, u dawn għandhom jiġu rieżaminati malajr kemm jista’ jkun sabiex jitqiesu l-bidliet fil-prezzijiet;

36.Jappella għal koordinazzjoni aħjar u simplifikazzjoni bejn l-istrumenti kollha disponibbli, inkluż il-Fond ta’ Solidarjetà, sabiex il-bdiewa, il-komunitajiet rurali u l-awtoritajiet lokali milquta minn diżastri naturali u diżastri relatati mal-klima jkunu jistgħu jaċċessaw għajnuna aktar rapida u aktar immirata; jitlob, fid-dawl taż-żieda fil-ħsarat ikkawżati mid-diżastri naturali, li jinħoloq mekkaniżmu tal-grillu awtomatiku biex titħaffef il-wasla ta’ għodod speċifiċi għall-mitigazzjoni u l-ġestjoni tar-riskji, imsejsa fuq miżuri attivi u passivi li jkunu affordabbli għall-bdiewa;

37.Jistieden lill-Istati Membri jiżguraw l-implimentazzjoni f’waqtha u korretta tal-pjanijiet strateġiċi nazzjonali tagħhom, fiż-żewġ pilastri, biex b’hekk jiġi evitat ir-ritorn tal-fondi;

38.Jenfasizza li, filwaqt li l-agrikoltura tikkontribwixxi permezz tal-PAK għal politiki u strateġiji oħra, bħall-ambjent, l-enerġija, il-kummerċ, il-klima, il-bijodiversità, is-saħħa u l-benesseri tal-annimali, is-saħħa pubblika u l-iżvilupp reġjonali, huwa rilevanti u pożittiv li l-politiki l-oħra jkomplu jikkontribwixxu għas-sostenibbiltà tal-agrikoltura u għall-iżvilupp rurali u biex jiġu provduti servizzi lil hinn mill-produzzjoni tal-ikel u ta’ riżorsi bijoġeniċi; jisħaq, b’mod partikolari, fuq l-importanza tal-iżvilupp tal-bijoenerġija u tal-bijoekonomija biex tiġi appoġġjata r-reżiljenza tas-settur agrikolu;

39.Jistieden lill-Kummissjoni timplimenta mekkaniżmu ta’ verifika rurali għall-UE kollha fl-oqsma kollha ta’ politika u tinkludi l-Komunità tal-Patt Rurali, kif ukoll il-Kumitat tar-Reġjuni, fl-attivitajiet kollha relatati mal-qafas tal-iżvilupp rurali; jiddispjaċih dwar il-fatt li għalkemm il-Kummissjoni inkludiet il-mekkaniżmu ta’ verifika rurali fil-viżjoni tagħha għaż-żoni rurali lejn l-2040, fil-prattika jidher li dan ġie implimentat biss b’mod limitat;

40.Jafferma mill-ġdid li l-UE għandha l-ogħla standards fid-dinja fir-rigward tas-sikurezza tal-ikel, il-benesseri tal-annimali u l-protezzjoni ambjentali u soċjali, li huma l-ġebel tax-xewka tal-kompetittività tal-prodotti agrikoli tal-UE b’livell għoli ta’ kwalità, u li jridu jiġu rispettati u mħarsa; jitlob, għalhekk, li kwalunkwe leġiżlazzjoni proposta f’dawn l-oqsma tkun ibbażata fuq ix-xjenza u preċeduta minn valutazzjoni tal-impatt rigoruża u komprensiva, u tkun imfassla biex issaħħaħ il-kompetittività u s-sostenibbiltà tal-azjendi agrikoli tal-UE; jemmen li l-inċentivar u l-kumpens għall-bdiewa għal kwalunkwe kostijiet addizzjonali li jġarrbu huma essenzjali biex jintlaħaq dan l-għan;

41.Jenfasizza li t-titjib tal-benesseri tal-annimali mhuwiex biss imperattiv etiku, iżda wkoll perkors lejn sistemi ta’ trobbija tal-bhejjem aktar reżiljenti u profittabbli; jissottolinja li annimali aktar b’saħħithom b’livelli ta’ stress aktar baxxi ġeneralment jirrikjedu inqas intervent veterinarju, għandhom rati ta’ fertilità ogħla, u għandhom prestazzjoni aħjar, u dan iwassal għal effiċjenza ekonomika akbar; jappella li l-miżuri tal-PAK ikomplu jappoġġjaw l-investimenti u t-taħriġ fi standards ogħla tal-benesseri tal-annimali, allinjati mal-aspettattivi tas-suq u r-rakkomandazzjonijiet xjentifiċi;

42.Jistieden lill-Kummissjoni tippreżenta, fil-proposti leġiżlattivi tagħha għall-PAK li jmiss, strateġija ambizzjuża u komprensiva dwar il-proteini, li għandha tinkludi miżuri u strumenti xierqa għall-promozzjoni tal-produzzjoni tal-għelejjel tal-proteini b’livell għoli ta’ kwalità, inklużi għelejjel leguminużi bħal, iżda mhux limitati għal, ċerti żrieragħ żejtnin, legumi u foraġġ aħdar, u għelejjel mhux leguminużi bħaż-żerriegħa tal-ġirasol u tal-kolza għal skopijiet ta’ ikel u għalf, bl-għan li jitnaqqas b’mod sinifikanti d-defiċit tal-proteini tal-UE u tiġi żgurata awtonomija strateġika;

43.Jenfasizza l-importanza strateġika tat-trobbija sostenibbli tal-bhejjem għall-iżvilupp rurali, il-konservazzjoni tal-bijodiversità, il-ġestjoni tal-pajsaġġ u s-sostenibbiltà ambjentali, b’mod partikolari f’żoni żvantaġġati u pajsaġġi ta’ valur naturali għoli, u jenfasizza l-ħtieġa li s-settur jingħata appoġġ finanzjarju adegwat biex tiġi żgurata s-sostenibbiltà tiegħu; jissottolinja li l-prodotti tal-annimali mhux biss għandhom valur nutrittiv, iżda li l-produzzjoni tagħhom għandha rwol kruċjali fil-preżervazzjoni tal-pajsaġġi kulturali tradizzjonali, il-fertilità tal-ħamrija u l-ħżin tal-karbonju; jistieden lill-Kummissjoni toħloq grupp ta’ livell għoli dwar it-trobbija tal-bhejjem li jinvolvi lill-partijiet ikkonċernati rilevanti kollha biex jiġu żviluppati approċċi ġodda biex jiġi ssalvagwardjat il-futur tas-settur u jiġi indirizzat it-telf progressiv tal-bhejjem fl-UE, tingħata spinta lit-tiġdid ġenerazzjonali, jiġu promossi l-benesseri tal-annimali u l-ekonomija ċirkolari – inkluż l-użu tad-diġestat bħala bijofertilizzant ta’ valur li jikkontribwixxi għar-riċiklaġġ tan-nutrijenti u għas-saħħa tal-ħamrija – u jiġi massimizzat il-kontribut pożittiv tat-trobbija sostenibbli tal-bhejjem għall-konservazzjoni u r-restawr tan-natura, il-bijodiversità u s-saħħa u l-fertilità tal-ħamrija, u biex jiġu promossi l-investimenti biex titrawwem il-kompetittività tas-settur; iqis li l-introduzzjoni ta’ sistema għall-iskambju ta’ kwoti tal-emissjonijiet (ETS) agrikoli ġdida toħloq kumplessità eċċessiva mingħajr ebda garanzija ta’ effettività;

44.Jenfasizza t-tifqigħat reċenti ta’ mard tal-annimali f’diversi Stati Membri; jistieden lill-Kummissjoni u lill-Istati Membri jissodaw il-miżuri ta’ prevenzjoni u ta’ eradikazzjoni u jżidu l-allokazzjonijiet ta’ finanzjament tal-PAK iddedikati għall-ġestjoni tar-riskju u investimenti mtejba fil-bijosigurtà fl-azjendi agrikoli; jistieden lill-Kummissjoni ssaħħaħ il-miżuri tas-saħħa tal-annimali fis-settur agrikolu tal-UE billi tikkoordina r-riċerka, ix-xiri u l-provvista ta’ vaċċini veterinarji fil-livell tal-UE permezz ta’ mekkaniżmu ta’ preparatezza u ta’ detezzjoni bikrija, u billi trawwem l-iżvilupp ta’ dawn il-vaċċini fl-UE; jappella għal finanzjament adegwat għal dan il-mekkaniżmu barra mill-PAK; iħeġġeġ lill-Istati Membri jappoġġjaw u jaħdmu mar-reġjuni fl-iżvilupp u fl-implimentazzjoni ta’ pjanijiet ta’ prevenzjoni, tilqim u mitigazzjoni fir-rigward ta’ dan il-mard;

45.Jiddispjaċih li l-finanzjament ta’ miżuri għall-prevenzjoni, il-kontroll u l-eradikazzjoni ta’ ċertu mard tal-annimali permezz tal-Programm tas-Suq Uniku mhuwiex suffiċjenti biex jappoġġja lill-bdiewa u lill-Istati Membri b’rabta ma’ mard bħall-marda tal-ilsien u d-dwiefer; jenfasizza li fl-UE, kwalunkwe nuqqas ta’ prevenzjoni jew kontroll tal-mard tal-annimali fi Stat Membru wieħed jista’ jkollu riperkussjonijiet immedjati fuq l-oħrajn, u jirrikjedi rispons koordinat; jappella li jiġu introdotti standards tas-saħħa tal-annimali stretti u fil-livell tal-UE biex tiġi ssalvagwardjata t-trobbija tal-bhejjem, inklużi dispożizzjonijiet għall-ġestjoni tal-popolazzjonijiet ta’ annimali selvaġġi li joħolqu riskji ta’ infezzjoni u għat-tilqim immirat tal-annimali meta jkun meħtieġ;

46.Jenfasizza li r-reżistenza antimikrobika hija theddida kbira għas-saħħa tal-bniedem u li t-tnaqqis tal-użu tal-antibijotiċi fit-trobbija tal-annimali jrid ikun prijorità; jinnota l-finanzjament disponibbli għat-tnaqqis tas-suxxettibbiltà u t-trażmissjoni tal-mard tal-annimali diġà disponibbli fil-PAK;

47.Itenni l-ħtieġa li tiġi żviluppata strateġija komprensiva tal-UE dwar l-ikel ibbażata fuq il-metodu ta’ ttestjar xjentifiku, li tintegra l-agrikoltura u t-trobbija tal-bhejjem, filwaqt li tiżgura trattament ġust għas-setturi agrikoli kollha; jappoġġja valutazzjonijiet ambjentali bbażati fuq ix-xjenza li jqisu ċ-ċiklu tal-ħajja kollu tal-prodotti tal-ikel; jappoġġja n-nutrizzjoni bbażata fuq evalwazzjonijiet xjentifiċi li jikkonfermaw l-importanza tal-ikel li joriġina mill-annimali għas-saħħa tal-bniedem, b’mod partikolari għal popolazzjonijiet vulnerabbli bħat-tfal, l-anzjani u n-nisa;

48.Jistieden lill-Istati Membri jippromwovu u jtejbu l-kundizzjonijiet tax-xogħol u soċjali u l-pagi għall-bdiewa jew għal kwalunkwe impjegat agrikolu u jiżguraw kopertura u sostituzzjoni xierqa tal-ħaddiema f’każ ta’ mard jew inċidenti li jikkawżaw assenza temporanja; jitlob ukoll l-għoti ta’ taħriġ u liv annwali u tal-familja għall-indukrar ta’ membri tal-familja, sabiex jiġu żgurati impjiegi ta’ kwalità u bilanċ aħjar bejn ix-xogħol u l-ħajja privata għall-bdiewa u l-ħaddiema agrikoli; jissottolinja r-rwol tal-agrikoltura bħala kontributur ewlieni għar-responsabbiltà soċjali u kundizzjonijiet tax-xogħol deċenti fiż-żoni rurali;

49.Jistieden lill-Kummissjoni taġġorna l-allokazzjonijiet finanzjarji tal-POSEI biex jirriflettu, bħala minimu, l-inflazzjoni akkumulata fil-QFP li jmiss, b’pakketti aġġustati kull sena, u jiddispjaċih li d-deflatur ta’ 2 % applikat għall-pagamenti diretti ma ġiex ikkunsidrat ukoll għall-POSEI fil-QFP attwali; jemmen, madankollu, li l-Kummissjoni jeħtiġilha tmur lil hinn u tipproponi żieda sinifikanti fil-baġit tal-POSEI fil-QFP li jmiss biex tipprovdi appoġġ komplementari għall-produzzjoni agrikola, u b’hekk tiżgura l-awtosuffiċjenza tal-ikel fir-reġjuni ultraperiferiċi; iqis li dan huwa essenzjali għall-kontinwità tal-attività agrikola fir-reġjuni ultraperiferiċi, għall-iżgurar tal-koeżjoni ekonomika, soċjali u territorjali tal-UE, f’konformità sħiħa mal-Artikolu 349 tat-TFUE, li jirrikonoxxi n-natura speċifika ta’ dawn ir-reġjuni u l-ħtieġa li jiġu adottati miżuri differenzjati biex jiġu indirizzati r-restrizzjonijiet permanenti tagħhom; jargumenta li ż-żieda fil-finanzjament tal-POSEI għandha tqis ukoll il-ħtiġijiet agrikoli reali u speċifiċi ta’ dawn ir-reġjuni, inklużi l-bidliet fil-kostijiet tal-produzzjoni, l-esponiment għal avvenimenti ta’ temp estrem, il-frammentazzjoni territorjali, il-volatilità tas-suq u l-ħtieġa li tiġi żgurata l-vijabbiltà ekonomika tal-azjendi agrikoli u l-introjtu ġust għall-bdiewa; jenfasizza, f’dan il-kuntest, l-importanza li jinħoloq mekkaniżmu speċifiku, jiġifieri programm POSEI tat-trasport, li jgħin biex jittaffew il-kostijiet addizzjonali tat-trasport tal-prodotti fi ħdan ir-reġjuni ultraperiferiċi u tal-prodotti ttrasportati barra mir-reġjuni ultraperiferiċi lejn is-suq uniku u l-fatturi tal-produzzjoni fir-reġjuni ultraperiferiċi;

50.Jindika li l-finanzjament tal-Pilastru II għat-trobbija tan-naħal għandu jkun aktar immirat u aktar effettiv, u li l-qafas leġiżlattiv il-ġdid għandu jipprevedi l-modernizzazzjoni u s-simplifikazzjoni tal-iskema ta’ appoġġ tal-Pilastru I għal min irabbi n-naħal b’tali mod li jitqiesu l-karatteristiċi u l-vulnerabbiltajiet speċifiċi tas-settur;

51.Jenfasizza l-importanza tal-aċċess għal infrastruttura fiżika u diġitali b’servizz tal-broadband affidabbli u ta’veloċità għolja u l-użu tat-teknoloġija satellitari għax-xogħol u l-kwalità tal-ħajja tal-bdiewa fiż-żoni rurali u biex jingħeleb l-iżolament soċjali; jinsisti, għalhekk, fuq l-importanza li tinkiseb diġitalizzazzjoni gradwali tal-agrikoltura, li tinvolvi aċċess kostanti għall-internet, għarfien diġitali, innovazzjoni, aċċess tal-bdiewa għad-data u għas-sjieda ta’ dik id-data, opportunitajiet ta’ edukazzjoni u taħriġ sabiex jiġu attirati u miżmuma n-nies f’dawn l-oqsma, speċjalment iż-żgħażagħ, li jagħtuhom il-possibbiltà li jibqgħu f’dawn l-oqsma jekk ikunu jixtiequ jagħmlu dan; jistieden lill-Kummissjoni u lill-Istati Membri jagħmlu t-taħriġ disponibbli għall-bdiewa u għall-forestieri biex jiksbu ħiliet diġitali li jistgħu jgħinuhom jagħmlu l-aħjar użu mill-vantaġġi tad-diġitalizzazzjoni u tal-biedja ta’ preċiżjoni u jaħdmu b’mod aktar effiċjenti u sostenibbli, filwaqt li jżommu f’moħħhom il-fatt li l-komunikazzjoni personali u verbali għadha essenzjali għal ħafna bdiewa fil-preżent; jirrikonoxxi r-rwol kruċjali tal-organizzazzjonijiet tal-bdiewa fit-tmexxija tat-trasformazzjoni diġitali tal-agrikoltura;

52.Jistieden lill-Kummissjoni u lill-Istati Membri jiżguraw allinjament sħiħ bejn il-Programm Ewropa Diġitali, il-politiki dwar l-introduzzjoni tal-broadband u l-PAK ta’ wara l-2027; jafferma l-ħtieġa kemm li ż-żoni rurali jiġu mgħammra b’servizzi ta’ infrastruttura diġitali kif ukoll li tingħata spinta lill-ħiliet meħtieġa għax-xogħol mill-bogħod, il-biedja ta’ preċiżjoni u l-intraprenditorija diġitali; jissottolinja li s-servizzi tal-infrastruttura diġitali jridu jkunu affordabbli għaċ-ċittadini rurali; jenfasizza li investiment bħal dan huwa essenzjali għat-tnaqqis tad-depopolazzjoni rurali u t-tisħiħ tal-attraenza tal-agrikoltura u l-ħajja rurali għall-ġenerazzjonijiet żagħżugħa;

53.Jappella għal sensibilizzazzjoni akbar dwar l-importanza tas-saħħa mentali tal-bdiewa u tal-ħaddiema agrikoli, minħabba r-rata għolja ta’ suwiċidji f’dan is-settur; jenfasizza li dan huwa fenomenu allarmanti kkawżat, fost l-oħrajn, minn livelli għoljin ta’ stress, inċertezza, piżijiet amministrattivi onerużi, kif ukoll vulnerabbiltà, iżolament soċjali, nuqqas ta’ btajjel, dejn u tbatija ekonomika li jħabbtu wiċċhom magħhom il-bdiewa; jenfasizza, barra minn hekk, li l-proċeduri stressanti ta’ spezzjoni tal-azjendi agrikoli jpoġġu pressjoni addizzjonali fuq il-bdiewa fil-ġestjoni tal-azjendi tagħhom u jistieden lill-Istati Membri jiżviluppaw mekkaniżmi biex jindirizzaw dan; iħeġġeġ lill-Kummissjoni u lill-Istati Membri jrawmu l-kollaborazzjoni biex jiżviluppaw strateġija komprensiva dwar is-saħħa mentali għall-bdiewa u jiżguraw li fil-PAK li jmiss jiġu inklużi miżuri ta’ appoġġ xierqa; jenfasizza l-valur ta’ approċċi mfassla apposta għaċ-ċirkostanzi lokali, bl-użu ta’ diversi tipi ta’ servizzi ta’ appoġġ, inklużi networks ta’ konsulenza għall-farms attwali u gruppi oħra ta’ appoġġ tal-komunità rurali; iqis li huwa meħtieġ li jiġu żviluppati programmi ta’ appoġġ psikoloġiku, kif ukoll miżuri li jippromwovu s-simplifikazzjoni amministrattiva u l-bilanċ bejn ix-xogħol u l-ħajja privata, u dawn kollha se jtejbu l-kwalità tal-ħajja tal-bdiewa u tal-ħaddiema tal-UE; itenni l-ħtieġa li l-bdiewa jirċievu prezzijiet ġusti għall-prodotti tagħhom, kemm dawk kif ukoll dawk mhux tas-suq;

54.Jenfasizza li aktar minn 70 % tal-konsumaturi fl-UE jibbażaw id-deċiżjonijiet tax-xiri tagħhom fuq l-informazzjoni fuq l-imballaġġ, u jiġbed l-attenzjoni għar-riskju reali li l-konsumaturi jiġu mqarrqa; jappella, għaldaqstant, għall-konsolidazzjoni ta’ tikkettar armonizzat tal-UE biex tiġi żgurata sistema ġusta u ekwa, li tipprovdi trasparenza dwar il-pajjiż ta’ oriġini, assikurazzjonijiet tal-kwalità u standards tal-produzzjoni, inkluż l-istandards tal-benesseri tal-annimali u l-istandards organiċi, tal-prodotti agroalimentari tal-UE; iqis li huwa meħtieġ li jiġu ggarantiti t-traċċabbiltà u l-kompetittività fis-suq uniku u globalment permezz ta’ regoli ċari biex jiġu evitati d-distorsjonijiet u l-prattiki qarrieqa sabiex tiġi protetta l-integrità tas-sistemi tal-ikel tal-UE, tittejjeb il-promozzjoni tagħhom u jissaħħu l-informazzjoni u s-sensibilizzazzjoni tal-konsumaturi;

55.Jirrakkomanda miżuri ta’ protezzjoni msaħħa għall-prodotti reġjonali, inkluż it-tisħiħ tar-reġimi tad-denominazzjonijiet ta’ oriġini protetti, tal-indikazzjonijiet ġeografiċi protetti u tal-ispeċjalitajiet tradizzjonali garantiti permezz ta’ proċeduri simplifikati li jipproteġu mill-użu ħażin u l-kontrafazzjoni;

56.Jitlob, barra minn hekk, lill-Kummissjoni, biex ittemm is-sistemi ta’ tikketti simplistiċi ta’ fuq quddiem tal-pakkett bħas-sistema “Nutriscore”, minħabba n-nuqqas ta’ kunsens xjentifiku wiesa’ u r-riskju li l-industrija tal-ikel tibdel il-parametri biex jaqdu l-interessi tagħha;

57.Jappella għall-promozzjoni tal-edukazzjoni dwar in-nutrizzjoni fl-iskejjel u fil-canteens tal-iskejjel, bl-għan li t-tfal jiġu megħjuna jifhmu l-importanza ta’ dieta kompluta u bbilanċjata minn età bikrija, bl-għan li t-tfal jiġu megħjuna jifhmu l-oriġini tal-ikel; iħeġġeġ l-iżvilupp ta’ drawwiet tal-ikel tajbin għas-saħħa u menus fl-iskejjel li jinkludu varjetà ta’ vitamini, fibra u ikel rikk fin-nutrijenti biex jikkontribwixxu għat-tisħiħ tal-benesseri fiżiku u mentali tal-istudenti; jenfasizza, barra minn hekk, il-ħtieġa li l-gastronomija nazzjonali, lokali u staġjonali tiġi rispettata u promossa bħala wirt kulturali prezzjuż, rappreżentat tajjeb fil-mudell tad-Diet tal-Mediterran; iħeġġeġ lill-Kummissjoni tiżgura li l-awtoritajiet lokali u reġjonali jingħataw riżorsi addizzjonali għal skemi mmirati lejn dawn l-attivitajiet u jenfasizza l-ħtieġa li l-akkwist pubbliku jkun iggwidat mill-kwalità, mhux mill-prezz, u li fejn ikun possibbli jiġi promoss il-konsum ta’ prodotti organiċi, lokali u staġjonali b’indikazzjonijiet ġeografiċi;

58.Jissottolinja l-importanza tal-iskema tal-UE għad-distribuzzjoni tal-ħalib, il-frott u l-ħaxix lit-tfal permezz ta’ programmi skolastiċi bħala għodda ewlenija għall-promozzjoni ta’ ikel tajjeb għas-saħħa, speċjalment għal tfal minn sfondi vulnerabbli li għalihom l-ikliet fl-iskejjel jistgħu jkunu wieħed mill-ftit sorsi ta’ nutrizzjoni bbilanċjata; jiddispjaċih li xi Stati Membri mhumiex qed jużaw il-fondi allokati għal dan il-programm, u dan qed iwassal biex il-baġit disponibbli ma jintużax biżżejjed; jiġbed l-attenzjoni dwar l-importanza tal-involviment tal-bdiewa u l-atturi tul il-katina tal-valur agroalimentari fit-twassil tal-edukazzjoni dwar l-ikel, u l-promozzjoni ta’ rabtiet diretti bejn il-produtturi u l-iskejjel;

59.Jenfasizza l-importanza li jinżamm finanzjament xieraq għall-produzzjoni taż-żejt taż-żebbuġa u taż-żebbuġ tal-mejda minħabba l-benefiċċji sinifikanti tagħhom għas-saħħa u n-nutrizzjoni għall-Ewropej kollha;

60.Jiddikjara li jinsab imħasseb ħafna dwar iż-żieda fil-proġetti ta’ produzzjoni ta’ “laħam imkabbar fil-laboratorju”; jenfasizza l-ħtieġa li jiġi rieżaminat il-qafas leġiżlattiv tal-UE applikabbli għall-awtorizzazzjoni ta’ dawn il-prodotti sabiex iqis b’mod aktar komplut l-implikazzjonijiet ekonomiċi, soċjali u ambjentali ta’ dan it-tip ta’ innovazzjoni, kif ukoll il-kunsiderazzjonijiet etiċi marbuta miegħu;

61.Iħeġġeġ lill-politiċi, l-iskejjel, il-media, il-bdiewa u l-assoċjazzjonijiet lokali jaħdmu flimkien biex jippromwovu immaġni pożittiva tal-biedja, iżidu l-attraenza tagħha għaż-żgħażagħ, u jikkomunikaw aħjar dwar ir-rwol tal-bidwi fil-produzzjoni tal-ikel u s-servizzi ambjentali sostenibbli; jappella għal rikonoxximent mifrux tal-ħidma essenzjali mwettqa mill-bdiewa u mill-ħaddiema tal-azjendi agrikoli fir-rigward tas-sikurezza tal-ikel u tal-impenn tagħhom għal prattiki sostenibbli permezz ta’ kampanji mmirati lejn is-sensibilizzazzjoni tal-konsumaturi dwar l-għażliet li jagħmlu meta jixtru u lejn it-tisħiħ tar-relazzjoni bejn il-konsumaturi u l-bdiewa tal-UE, filwaqt li tiġi promossa komprensjoni aħjar ta’ kif il-bdiewa jipproduċu l-prodotti agroalimentari li jixtru l-konsumaturi; jenfasizza l-ħtieġa li tiġi miġġielda l-miżinformazzjoni u l-messaġġi qarrieqa, żbaljati u mhux ġustifikati sabiex tittejjeb l-immaġni negattiva tal-bdiewa li għandha parti mis-soċjetà; iħeġġeġ lill-Istati Membri jinkludu dan ir-rikonoxximent fil-pjanijiet edukattivi tagħhom sabiex jagħmlu l-agrikoltura attività ekonomika attraenti; jiddispjaċih ħafna dwar il-fatt li l-bdiewa u r-residenti rurali sofrew ħafna snin ta’ deprijoritizzazzjoni u nuqqas ta’ investiment;

62.Jappoġġja, bil-ħsieb għall-futur, l-objettiv tal-Kummissjoni għall-perjodu 2024-2029 li tnaqqas il-piżijiet amministrattivi għall-bdiewa u li tissimplifika l-leġiżlazzjoni bħala prijorità strateġika trażversali, sabiex l-aċċess għall-appoġġ tal-PAK jiġi ffaċilitat u l-implimentazzjoni fuq il-post issir aktar effettiva; jinsisti li dan irid ikun wieħed mill-prinċipji gwida li jirfdu l-azzjonijiet kollha mmirati lejn il-kisba tas-sostenibbiltà soċjali, ambjentali u ekonomika tal-agrikoltura tal-UE, mingħajr ma jiddgħajfu l-ħames objettivi ewlenin tal-PAK kif stabbiliti fl-Artikolu 39 tat-TFUE; jenfasizza li s-simplifikazzjoni tal-PAK ma għandhiex tikkomprometti qafas regolatorju b’saħħtu fil-livell tal-UE, għax dan huwa essenzjali biex tiġi ppreżervata l-komunalità tal-PAK u biex jiġi żgurat l-appoġġ pubbliku għar-riżorsi finanzjarji meħtieġa; ’

63.Jisħaq fuq il-ħtieġa ta’ aktar flessibbiltà u struttura ta’ finanzjament aktar sempliċi għall-PAK il-ġdida, li tkun ta’ benefiċċju għall-bidwi attiv; jirrimarka li l-kundizzjonijiet volatili, iż-żieda fir-regolamenti u ż-żieda fl-aspettattivi tas-soċjetà jikkawżaw frustrazzjoni fost il-bdiewa u jolqtu l-attraenza tal-professjoni, speċjalment fost il-bdiewa żgħażagħ u dawk l-aktar vulnerabbli;

64.Jistieden lill-Kummissjoni, meta tfassal l-arkitettura futura tal-PAK, tiffoka fuq li jiġu stabbiliti kriterji aktar ċari, proċeduri diġitalizzati, linji gwida standardizzati, il-komunikazzjoni f’waqtha tal-bidliet u appoġġ tekniku aċċessibbli; jenfasizza li l-gold-plating iżid il-kumplessità għall-bdiewa u għall-benefiċjarji, u b’hekk inaqqas l-effettività u l-adozzjoni ta’ miżuri importanti;

65.Jitlob koordinazzjoni aħjar bejn il-Kummissjoni u l-awtoritajiet nazzjonali u reġjonali rigward tnaqqis fl-obbligi ta’ dokumentazzjoni u rappurtar; jenfasizza l-ħtieġa ta’ impenn proattiv bejn il-Kummissjoni, l-awtoritajiet tal-Istati Membri, il-bdiewa u l-organizzazzjonijiet tal-azjendi agrikoli qabel ma jitfasslu l-pjanijiet strateġiċi nazzjonali tal-PAK; jissottolinja l-ħtieġa ta’ flessibbiltà akbar għall-Istati Membri fi ħdan il-pjanijiet strateġiċi tal-PAK, li tippermettilhom jadattaw elementi speċifiċi mingħajr ma jirrikjedu approvazzjoni minn qabel mill-Kummissjoni, meta jkun meħtieġ; jappella għall-istabbiliment ta’ sistema ċentralizzata u elettronika ta’ rapportar, “punt uniku ta’ servizz tal-PAK”, fejn il-bdiewa jistgħu jippreżentaw l-applikazzjonijiet, ir-rapporti u d-dokumentazzjoni kollha meħtieġa f’post wieħed, filwaqt li jevitaw l-amministrazzjoni duplikata u bla bżonn;

66.Jappella għal sistema realistika u bbażata fuq l-inċentivi għall-bdiewa, li tirrifletti l-impenn tal-ħin muri mill-benefiċjarju, aktar milli sistema bbażata purament fuq obbligi biex jintlaħqu objettivi ambjentali u soċjali ambizzjużi, filwaqt li jitqiesu kif xieraq l-ispeċifiċitajiet taż-żoni ġeografiċi; jemmen li l-approċċi bbażati fuq l-inċentivi jagħtu l-aħjar riżultati f’termini tat-tisħiħ tas-sostenibbiltà tal-agrikoltura fl-UE; jenfasizza li huwa essenzjali li meta tiġi kkalkulata r-remunerazzjoni dovuta għas-servizzi, il-metodoloġija tmur lil hinn mil-lenti dejqa tal-“kostijiet imġarrba u l-introjtu mitluf” mill-bidwi, peress li t-telf soċjoekonomiku għall-komunità usa’ jista’ jkun ħafna akbar bit-telf kemm tal-attività ekonomika upstream kif ukoll downstream fiż-żona lokali; jemmen li l-finanzjament għal dawn il-pagamenti għandu jiġi mill-PAK jew minn fondi nazzjonali sabiex il-finanzjament pubbliku jkun jista’ verament jinċentiva l-innovazzjoni ekoloġika u t-tranżizzjoni ekoloġika; jistieden lill-Kummissjoni tesplora sorsi ta’ finanzjament addizzjonali lil hinn mill-PAK biex tappoġġja lill-bdiewa fl-iżvilupp ta’ mudelli tan-negozju sostenibbli u adattati għall-kundizzjonijiet lokali;

67.Jenfasizza li l-implimentazzjoni tar-rekwiżiti għall-kundizzjonijiet agrikoli u ambjentali tajba trid tqis l-użu attwali tal-art u l-prattiki agrikoli attwali; jenfasizza li l-bdiewa attivi jeħtiġilhom iżommu d-dritt li jkomplu l-attivitajiet agrikoli attwali tagħhom, inklużi l-operazzjonijiet ta’ manutenzjoni meħtieġa, mingħajr ma jiffaċċjaw restrizzjonijiet amministrattivi jew operazzjonali addizzjonali;

68.Jisħaq fuq il-ħtieġa li jkomplu jiġu vvalutati r-rekwiżiti ta’ kundizzjonalità tal-PAK sabiex jittaffew il-piżijiet amministrattivi, l-ostakli jew l-ostakli ekonomiċi, jitnaqqsu l-ispejjeż u jiġu evitati rekwiżiti eċċessivi ta’ implimentazzjoni għall-bdiewa; jinsisti fuq il-ħtieġa tal-bdiewa għal flessibbiltà u sempliċità, filwaqt li jkomplu jippromwovu l-prattiki agrikoli responsabbli, permezz ta’ inċentivi, iż-żamma ta’ kundizzjonijiet ekwi u appoġġ pubbliku għall-politika, f’approċċ li jiġġenera valur miżjud akbar u aktar investiment fl-innovazzjoni;

69.Iħeġġeġ lill-Kummissjoni tinkoraġġixxi lill-bdiewa jieħdu r-responsabbiltà billi tippermetti grad ta’ tolleranza u billi tiżgura li s-sanzjonijiet ikunu ġusti u proporzjonati, speċjalment fir-rigward tar-rekwiżiti ta’ kundizzjonalità, kif ukoll ekoskemi volontarji u miżuri agroambjentali u klimatiċi; jisħaq fuq il-ħtieġa li r-rekwiżiti leġiżlattivi l-ġodda kollha fl-ambitu tal-PAK ta’ wara l-2027 ikunu akkumpanjati minn perjodi ta’ tranżizzjoni suffiċjenti u minn simplifikazzjonijiet amministrattivi biex tiġi żgurata ċ-ċertezza tad-dritt u tal-ippjanar għall-bdiewa;

70.Jenfasizza li r-Regolament dwar l-OKS Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007, ĠU L 347, 20.12.2013, p. 671, ELI: http://data.europa.eu/eli/reg/2013/1308/oj. irid jiġi ssimplifikat, u b’hekk jitħaffu l-proċeduri għall-għoti ta’ għajnuna eċċezzjonali lill-bdiewa; jissottolinja l-importanza li jiġi promoss u msaħħaħ ir-rwol kruċjali tal-kooperattivi, l-organizzazzjonijiet ta’ produtturi, l-assoċjazzjonijiet ta’ organizzazzjonijiet ta’ produtturi, l-organizzazzjonijiet ta’ produtturi tal-frott u l-ħxejjex, l-organizzazzjonijiet interprofessjonali u entitajiet oħra li jikkontribwixxu għall-katina tal-valur agroalimentari, inkluż is-settur organiku, u li l-katina tal-valur agroalimentari ssir aktar ibbilanċjata, u b’hekk tiġi żgurata remunerazzjoni aħjar għall-bdiewa; iħeġġeġ lill-Kummissjoni teżamina kif il-kooperazzjoni tagħhom tista’ tiġi mħeġġa u appoġġjata aktar permezz tar-Regolament dwar l-OKS;

71.Jistieden lill-Kummissjoni twettaq rieżami komprensiv tal-għodod, inklużi l-osservatorji tas-suq, li għandhom l-għan li jtejbu r-reżiljenza kontra l-volatilità tas-suq u l-kollassi tal-prezzijiet tas-suq; jinsisti li meħtieġ jiġu aġġornati u msaħħa l-istrumenti attwali tal-ġestjoni tar-riskju u li tissaħħaħ il-kooperazzjoni fost il-kooperattivi, l-OP u l-AOP bl-għan li jissaħħaħ ir-rwol tagħhom fil-ġestjoni tal-għodod ekonomiċi u tal-ġestjoni tar-riskju; jinsisti fuq il-ħtieġa li tiġi ffaċilitata aktar l-applikazzjoni tal-eżenzjonijiet mir-regoli tal-kompetizzjoni għall-bdiewa biex jindirizzaw u jegħlbu l-kriżijiet tas-suq;

72.Jinkoraġġixxi lill-Kummissjoni tipprovdi xbieki ta’ sikurezza effiċjenti fir-Regolament dwar l-OKS, inkluż rieżami tal-prezzijiet attwali tal-intervent pubbliku u l-limiti ta’ referenza biex jirriflettu b’mod preċiż il-kundizzjonijiet u r-realtajiet ekonomiċi attwali;

73.Jilqa’ l-pakkett il-ġdid tal-Kummissjoni għas-settur tal-inbid u jistieden lill-Kummissjoni talloka aktar riżorsi finanzjarji għall-implimentazzjoni tal-miżuri proposti u għal qawmien mill-ġdid sostenibbli fit-tul tas-settur tal-inbid;

74.Ifakkar ukoll li r-Regolament dwar l-OKS għandu jindirizza d-domanda tal-produtturi u tal-konsumaturi rigward l-ismijiet tal-bejgħ ta’ ċerti prodotti agrikoli, bħal dawk relatati mal-laħam, li jridu jiġu protetti mir-riskju ta’ użu qarrieqi;

75.Jappella għal garanzija li kwalunkwe proposta leġiżlattiva li taffettwa l-agrikoltura tkun preċeduta, ħlief f’ċirkostanzi eċċezzjonali, minn valutazzjoni tal-impatt kumulattiva dettaljata, komprensiva u bbażata fuq l-evidenza, b’enfasi partikolari fuq l-aspetti ekonomiċi, ambjentali u soċjali, bl-għan li tipprovdi ċertezza legali għall-bdiewa; huwa favur il-valutazzjoni tal-impatti ekonomiċi tal-miżuri ta’ politika proposti fil-livell tal-azjendi agrikoli u tal-mezzi finanzjarji meħtieġa għall-implimentazzjoni tagħhom, kif ukoll il-monitoraġġ kontinwu tal-miżuri; jisħaq li ż-żieda kontinwa fil-piżijiet regolatorji mqiegħda fuq is-settur ikkawżat frustrazzjoni fost il-bdiewa u rriżultat f’kostijiet żejda sinifikanti fil-livell tal-azjendi agrikoli, u hija waħda mill-fatturi li jaffettwaw l-attraenza tal-professjoni għall-entranti ġodda;

76.jisħaq fuq l-importanza li tiġi rikonoxxuta d-diversità tal-agrikoltura Ewropea, inklużi l-ortikultura fis-serer u l-għelejjel permanenti meta jitfasslu miżuri ta’ appoġġ, rekwiżiti regolatorji u strateġiji ta’ innovazzjoni; jappella għall-introduzzjoni u l-adattament tar-regolamenti tal-UE żviluppati speċifikament biex jindirizzaw l-isfidi u l-opportunitajiet tal-biedja b’effett ta’ serra, urbana u vertikali;

77.Jisħaq fuq il-ħtieġa ta’ tranżizzjoni lejn sistemi diġitali integrati u interoperabbli għall-monitoraġġ tal-PAK; jissottolinja, f’dan il-kuntest, l-importanza li jiġi promoss il-ġbir ta’ data u informazzjoni taħt qafas leġiżlattiv uniku li jiddependi, b’mod partikolari, fuq immaġni bis-satellita biex jiġu żviluppati sistemi integrati ta’ ġestjoni u kontroll; jenfasizza li tali sistemi għandu jkollhom l-għan li jnaqqsu l-ispezzjonijiet wiċċ imb wiċċ jew fiżiċi fuq il-post, fejn fattibbli, u jimminimizzaw il-piżijiet u l-kostijiet amministrattivi tal-bdiewa; jinsisti li l-protezzjoni u s-sjieda tad-data tal-bdiewa jridu jiġu ggarantiti bis-sħiħ; ifakkar, madankollu, li fid-dawl tal-limitazzjonijiet eżistenti fl-użu tat-teknoloġija satellitari, b’mod partikolari rigward il-pakketti żgħar u ristretti, jibqa’ neċessarju li sadanittant jinżammu sistemi oħra;

78.Jappella biex l-Istati Membri jimplimentaw l-approċċ ta’ awditu uniku biex jimminimizzaw iż-żmien mitluf mill-bdiewa għall-kontrolli ta’ akkumpanjament; jinkoraġġixxi lill-Kummissjoni timmodernizza s-sistema integrata ta’ġestjoni u kontroll tal-immaġni bis-satellita, bħal Copernicus u Galileo, sabiex tintegra t-teknoloġiji eżistenti u ġodda biex tipprovdi preċiżjoni, affidabbiltà u simplifikazzjoni akbar;

79.Jirrakkomanda li l-Istati Membri jingħataw flessibbiltà akbar biex jappoġġjaw l-investiment f’innovazzjonijiet u teknoloġiji ewlenin, bħall-użu ta’ satelliti, l-internet tal-oġġetti u teknoloġiji simili biex tinġabar data operazzjonali; jemmen li dan se jiżgura t-trasparenza u l-konformità mingħajr ma jimponi kostijiet addizzjonali fuq il-bdiewa, jiffaċilita t-tranżizzjoni lejn sistema bbażata fuq il-fiduċja fejn bdiewa affidabbli jistgħu jiċċertifikaw huma stess il-konformità tagħhom, ikkomplementata minn awditi mmirati u bbażati fuq ir-riskju aktar milli spezzjonijiet ġenerali ta’ rutina;

80.Jissottolinja l-ħtieġa li jitfasslu strateġiji ta’ innovazzjoni u tranżizzjonijiet diġitali b’mod li jkun parteċipattiv u aċċessibbli għall-azjendi agrikoli kollha, filwaqt li jiġi żgurat li l-progress teknoloġiku jikkontribwixxi għall-koeżjoni rurali, il-parteċipazzjoni demokratika u l-iżvilupp sostenibbli;

81.Iqis li huwa essenzjali li l-Istati Membri li jirrikonoxxu li r-reġjuni għandhom rwol statutorju fil-ġestjoni tal-PAK jingħataw l-opportunità li jirkupraw l-istrumenti tal-ġestjoni fil-livell reġjonali fil-kuntest tal-miżuri tal-iżvilupp rurali;

82.Iħeġġeġ lill-Kummissjoni tintegra approċċ strateġiku u olistiku għar-riżorsi tal-ilma fil-PAK ta’ wara l-2027 u żżid is-sinerġiji tagħha ma’ fondi oħra tal-UE, bħall-Fond Ewropew għall-Iżvilupp Reġjonali, issaħħaħ ir-rabta bejn l-ilma u l-ikel bħala element ewlieni fit-tisħiħ tas-sigurtà tal-ikel u fl-iżvilupp taż-żoni rurali; jitlob, barra minn hekk, aktar investiment fit-titjib tar-reżiljenza tal-ilma permezz tal-modernizzazzjoni u l-iżvilupp taż-żamma, id-distribuzzjoni, il-ħżin u l-infrastruttura regolatorja sostenibbli tal-ilma, kif ukoll soluzzjonijiet ibbażati fuq in-natura, li huma kruċjali biex jinkiseb settur agrikolu aktar effiċjenti u kompetittiv;

83.Jistieden lill-Kummissjoni tiggarantixxi l-aċċess għall-ilma għal irrigazzjoni sostenibbli; jisħaq fuq il-ħtieġa li jiġi promoss l-investiment fil-purifikazzjoni u t-trattament tal-ilma mormi, kif ukoll l-użu ta’ sorsi tal-ilma mhux konvenzjonali, bħall-ilma reklamat u desalinat għas-settur agrikolu, irrispettivament mid-daqs tal-azjenda agrikola, bi prezzijiet kompetittivi, bl-interkonnessjonijiet tat-trasport tal-ilma jkunu ugwalment importanti biex jittrasportaw dan l-ilma; jistieden lill-Kummissjoni tqis kemm id-differenzi u l-isfidi sinifikanti fl-Istati Membri kif ukoll il-prattiki tajbin implimentati minn kull Stat Membru għas-salvagwardja tal-produzzjoni agrikola; jistieden lill-Kummissjoni tinvesti fi programmi ta’ taħriġ għall-bdiewa dwar l-effiċjenza fl-użu tal-ilma;

84.Jistieden lill-Kummissjoni tipprijoritizza l-promozzjoni ta’ teknoloġiji innovattivi u l-irrigazzjoni intelliġenti u d-diġitalizzazzjoni tal-infrastruttura biex jiġi ottimizzat l-użu tal-ilma u titnaqqas l-impronta fuq l-ilma, speċjalment fir-reġjuni affettwati min-nixfa u d-deżertifikazzjoni, filwaqt li tiġi żgurata produzzjoni stabbli;

85.Jiġbed l-attenzjoni għall-fatt li ħafna sistemi ta’ irrigazzjoni huma obsoleti u ineffiċjenti, u jikkawżaw telf sinifikanti ta’ ilma u għalhekk jeħtieġ jinbidlu jew jiġu modernizzati; jistieden, għalhekk, lill-Kummissjoni tinkludi inċentivi finanzjarji għal din il-modernizzazzjoni fost il-prijoritajiet tagħha u jappoġġja l-inklużjoni tagħhom bħala investimenti eliġibbli fil-pjanijiet strateġiċi tal-PAK u l-istrumenti ta’ koeżjoni rilevanti tal-UE;

86.Jenfasizza l-kumplessità tal-użu tal-fondi tal-PAK, b’mod partikolari dawk mill-Pilastru II, biex tiġi ffinanzjata l-infrastruttura tal-irrigazzjoni, u għalhekk jappella għal rieżami tal-mekkaniżmi ta’ tfassil u finanzjament għal tali infrastruttura biex jittejbu d-disponibbiltà u l-użu tar-riżorsi tal-ilma mill-bdiewa, li jirriflettu l-kostijiet reali u l-valur miżjud tas-servizzi ambjentali u tal-pajsaġġ li jipprovdu;

87.Jappella għal appoġġ immirat u effettiv għall-bdiewa u l-forestiera tal-UE biex jagħtu spinta lill-ekonomija ċirkolari u jintegraw fil-bijoekonomija emerġenti, permezz ta’ inċentivi għall-irkupru tal-bijomassa, l-iskart agrikolu u l-koprodotti, li jappoġġjaw ukoll l-awtonomija enerġetika tal-azjendi agrikoli u jnaqqsu d-dipendenza tagħhom fuq inputs esterni; jirrimarka l-ħtieġa li jiġi ottimizzat l-użu ta’ materja prima u prodotti sekondarji li jiġġeneraw prodotti sekondarji bħad-diġestat u sorsi ġodda ta’ enerġija, inklużi bijogass sostenibbli u bijofjuwils sostenibbli, filwaqt li jittieħed kont tal-ħtieġa li tingħata prijorità lill-produzzjoni tal-ikel; jissottolinja li dawn il-miżuri, li ma jridux iwasslu għal piżijiet amministrattivi akbar fil-livell tal-azjendi agrikoli, se jikkontribwixxu għat-tisħiħ tal-awtonomija enerġetika tal-UE, jagħtu spinta lil sorsi addizzjonali ta’ introjtu għall-bdiewa u joħolqu opportunitajiet ġodda ta’ impjieg; iħeġġeġ lill-Kummissjoni, f’dan il-kuntest, tirrikonoxxi l-importanza ta’ dawn l-aspetti fl-Istrateġija dwar il-Bijoekonomija għall-2025 li jmiss;

88.Jisħaq fuq il-ħtieġa ta’ approċċ olistiku għad-dekarbonizzazzjoni tal-agrikoltura u jappella għal inkoraġġiment u inċentivi xierqa, inkluż għall-irkupru tal-bijomassa u l-ippremjar tas-sekwestru tal-karbonju fil-ħamrija, kif ukoll finanzjament suffiċjenti għall-bdiewa biex jadottaw soluzzjonijiet u prattiki li jnaqqsu l-impronta tal-karbonju tal-għelejjel filwaqt li jżommu l-kompetittività tagħhom, sabiex il-piż ta’ tali dekarbonizzazzjoni u l-ammont ta’ xogħol ma jaqax esklużivament fuqhom;

89.Iħeġġeġ lill-Kummissjoni u lill-Istati Membri jinkoraġġixxu u jsaħħu l-integrazzjoni tal-agrikoltura u l-enerġija rinnovabbli, filwaqt li jirrikonoxxu l-potenzjal ta’ din is-sinerġija biex jippromwovu prattiki tal-biedja sostenibbli, isaħħu r-reżiljenza lokali għat-tibdil fil-klima u jsaħħu l-ekonomija ċirkolari; jenfasizza l-potenzjal li l-agrikoltura jkollha rwol ewlieni fil-Patt għal Industrija Nadifa u t-tranżizzjoni tal-enerġija permezz tal-produzzjoni tal-enerġija rinnovabbli fis-settur; jistieden lill-Kummissjoni tiċċara d-dispożizzjonijiet tal-PAK biex tallinja aħjar u żżid il-kompatibbiltà tas-sorsi tal-enerġija rinnovabbli u sostenibbli, bħall-agrisolar u l-bijogass mal-attivitajiet agrikoli;

90.Jirrakkomanda rieżami tad-Direttiva dwar in-Nitrati biex tiġi allinjata mal-aħħar evidenza xjentifika u l-aħjar prattiki agrikoli, filwaqt li tkompli tipproteġi l-kwalità tal-ilma; jistieden, f’dan ir-rigward, lill-Kummissjoni taħdem mal-Istati Membri biex tadotta malajr proposta bbażata fuq ix-xjenza li tippermetti l-użu ta’ fertilizzanti RENURE taħt kundizzjonijiet definiti b’mod ċar sabiex il-bdiewa jkunu jistgħu jnaqqsu d-dipendenza tagħhom fuq fertilizzanti sintetiċi u jaċċelleraw it-tranżizzjoni lejn sistemi ta’ ġestjoni tan-nutrijenti aktar ċirkolari u sostenibbli;

91.Jappella biex jiġu ffaċilitati l-iskambju strutturat tal-għarfien u l-kooperazzjoni bejn sistemi tal-produzzjoni komparabbli fl-Istati Membri kollha, sabiex jiġi appoġġjat it-tagħlim reċiproku, jiġu indirizzati l-isfidi speċifiċi għar-reġjun – bħal dawk iffaċċjati minn żoni ta’ produzzjoni intensiva – u jiġu aċċellerati tranżizzjonijiet sostenibbli li huma mfassla apposta għar-realtajiet speċifiċi ta’ kull settur;

92.Jistieden lill-Kummissjoni u lill-Istati Membri jsaħħu l-istrumenti ta’ ġestjoni tar-riskju fil-PAK wara l-2027 billi jżidu l-appoġġ għall-assigurazzjoni agrikola, il-fondi mutwi u l-għodda għall-istabbilizzazzjoni tal-introjtu; jinsisti fuq il-ħtieġa li l-assigurazzjoni ssir aktar aċċessibbli u finanzjarjament vijabbli għall-bdiewa; jindika l-ħtieġa li jiġi introdott mekkaniżmu fil-livell tal-UE biex jissaħħu l-iskemi nazzjonali ta’ assigurazzjoni agrikola li għandhom jiġu attivati awtomatikament biex ilaħħqu ma’ kriżijiet estremi u imprevedibbli tat-temp u sanitarji u tas-suq; jisħaq li dawn il-miżuri għandhom jiżdiedu mal-għodod attwali tal-ġestjoni tas-suq u ma għadhomx jimminaw l-iskemi nazzjonali attwali;

93.Jistieden lill-Kummissjoni ssaħħaħ il-miżuri ta’ ġestjoni tar-riskju, inklużi l-assigurazzjoni, l-iskemi ta’ riassigurazzjoni u fondi komplementari oħra li għandhom jintużaw f’każ ta’ limiti ogħla ta’ ħsara, kemm għal miżuri preventivi kif ukoll għal kumpens għall-bdiewa fir-rigward ta’ diżastri naturali, tifqigħat epiżootiċi u mard tal-pjanti; iqis li huwa meħtieġ, f’dan il-kuntest, li jiġi inkluż investiment fil-prevenzjoni, fis-sistemi ta’ twissija bikrija u fl-iżvilupp ta’ infrastruttura ġdida ta’ reżiljenza li tippermetti lis-settur jantiċipa u jirkupra minn riskji dejjem akbar relatati mal-klima; jissottolinja l-ħtieġa li l-Istati Membri jagħmlu użu akbar mill-għodod għall-ġestjoni tar-riskju li bħalissa mhumiex utilizzati biżżejjed;

94.Jisħaq fuq il-ħtieġa li tiġi riformata u tiżdied il-kapaċità finanzjarja tar-riżerva agrikola sabiex jiġu indirizzati disturbi mhux previsti fis-suq u avvenimenti relatati mal-klima bħal nixfiet u għargħar; jissottolinja, madankollu, li r-riżerva agrikola ma tistax tkun l-uniku strument u jtenni l-importanza li tiġi żviluppata firxa aktar wiesgħa ta’ għodod ta’ ġestjoni tar-riskju u ta’ rispons rapidu, inklużi skemi ta’ assigurazzjoni agrikola aktar effettivi, fondi mutwi, fondi għall-emerġenzi klimatiċi u appoġġ straordinarju ta’ likwidità għas-settur tal-biedja tal-UE;

95.Jiġbed l-attenzjoni għan-nuqqas ta’ metodoloġiji konsistenti u faċli biex jintużaw biex jiġu kkalkolati l-emissjonijiet ta’ setturi agrikoli individwali; jopponi, għalhekk, bis-saħħa kwalunkwe tentattiv biex l-agrikoltura tiġi inkluża fl-ETS jew fi kwalunkwe skema ta’ tassazzjoni ekoloġika;

96.Jisħaq li r-reġjuni kollha tal-UE huma affettwati mill-konsegwenzi tat-tibdil fil-klima; jirrimarka, madankollu, li r-reġjuni tan-Nofsinhar huma aktar vulnerabbli, u jbatu minn deżertifikazzjoni, nixfa, salinazzjoni tal-akwifer, nirien fil-foresti, kif ukoll xita u għargħar persistenti, li jikkawżaw pesti u mard ġodda, li kollha jheddu s-settur agrikolu; jissottolinja, għalhekk, li l-bdiewa madwar l-UE jeħtieġu miżuri u strumenti ta’ appoġġ speċifiċi biex jirduppjaw l-isforzi tagħhom ħalli jadattaw l-attivitajiet tagħhom għat-tibdil fil-klima u biex jipprevjenu u jimmitigaw l-effetti negattivi tiegħu; jiġbed l-attenzjoni għall-importanza li jingħata appoġġ komprensiv lill-komunitajiet rurali u lill-awtoritajiet lokali fil-kisba ta’ dawn l-għanijiet;

97.Jappella għal appoġġ kontinwu għat-tekniki tal-biedja innovattivi, inklużi dawk użati fil-biedja organika u prattiki agroekoloġiċi oħra, kemm fis-sistemi organiċi kif ukoll dejjem aktar f’dawk konvenzjonali, biex jitnaqqas b’mod sinifikanti l-użu tal-inputs u d-dipendenzi esterni fl-agrikoltura u jissaħħu l-awtonomija u s-sigurtà tal-ikel;

98.Jinsisti li l-iżvilupp futur tas-settur organiku tal-UE jrid ikun orjentat lejn is-suq u jappella biex il-PAK il-ġdida tkompli tipprovdi inċentivi għall-bdiewa u għall-bdiewa ġodda biex jinvolvu ruħhom fil-biedja organika; jistieden lill-Kummissjoni teżamina modi ġodda kif jiġu indirizzati l-kriżijiet fis-suq organiku; ifakkar fil-ħtieġa li jiġi promoss il-konsum organiku anke permezz tal-akkwist pubbliku;

99.Jinkoraġġixxi l-minimizzazzjoni tal-ħela u t-telf tal-ikel tul il-katina agroalimentari kollha, inklużi l-produtturi primarji, biex jiġi żgurat l-użu effiċjenti, innovattiv u sostenibbli tar-riżorsi kollha; jistieden lill-Kummissjoni tieħu miżuri fil-livelli kollha biex tipprevjeni t-telf u tippromwovi l-konverżjoni tal-eċċessi fi prodotti b’valur miżjud; jinsisti fuq il-ħtieġa li jingħata valur akbar lill-ikel prodott mill-bdiewa u lill-isforz kbir li jsir biex dan jinkiseb; jinkoraġġixxi lill-Kummissjoni, f’dan ir-rigward, tippromwovi soluzzjonijiet, bħal rieżami tad-dati tal-aħjar qabel u l-użu ta’ preservattivi naturali b’bażi bijoloġika, biex tiġi estiża l-ħajja fuq l-ixkaffa tal-prodotti tal-ikel;

100.Jistieden lill-Kummissjoni tiżviluppa strateġija komprensiva għall-irkupru tan-nutrijenti tul il-katina agroalimentari, b’appoġġ immirat għall-innovazzjoni fis-separazzjoni, it-trattament u l-użu mill-ġdid tan-nutrijenti mill-flussi tal-iskart mill-ipproċessar, il-bejgħ bl-imnut u l-konsum tal-ikel;

101.Jenfasizza li l-iżgurar tat-tiġdid ġenerazzjonali u l-intraprenditorija tan-nisa huma t-tnejn essenzjali għall-preservazzjoni tal-futur tal-agrikoltura tal-UE u l-istruttura soċjoekonomika taż-żoni rurali; jirrikonoxxi l-isforzi permezz tal-miżuri tal-PAK biex jitrawwem it-tiġdid ġenerazzjonali, b’mod partikolari f’żoni rurali aktar periferali, u jisħaq fuq il-ħtieġa li jissaħħu; jirrimarka, madankollu, li l-PAK ma tistax tkun l-unika għodda biex iż-żgħażagħ u n-nisa jiddaħħlu fil-biedja, iżda trid tkun appoġġjata minn strateġiji nazzjonali, li jinvolvu sorsi privati ta’ finanzjament, inklużi banek, arranġamenti u sħubijiet tal-biedja kollaborattiva, u strumenti finanzjarji b’rekwiżiti ta’ kofinanzjament imnaqqsa jew l-ebda rekwiżit ta’ kofinanzjament; jinsisti li l-objettiv ta’ importanza kruċjali li jiġi żgurat tiġdid ġenerazzjonali fl-agrikoltura tal-UE jrid ikun akkumpanjat minn miżuri strutturali, b’mod partikolari fir-rigward tal-innovazzjoni, id-diġitalizzazzjoni, il-konnettività diġitali u l-aċċess għall-art; jistenna bil-ħerqa, f’dan ir-rigward, il-pubblikazzjoni tal-istrateġija tal-Kummissjoni dwar it-tiġdid ġenerazzjonali;

102.Jistieden lill-Istati Membri jiżviluppaw strateġiji koerenti, sostenibbli u prevedibbli biex il-ħidma fl-agrikoltura ssir aktar attraenti, u tiġi żgurata l-kompatibbiltà mal-politiki tal-UE u dawk reġjonali, inklużi l-pjanijiet strateġiċi nazzjonali tagħhom; jinsisti fuq il-ħtieġa li jiżdiedu u jiġu mobilizzati r-riżorsi finanzjarji tal-PAK favur it-tiġdid ġenerazzjonali, li bħalissa jinkludu l-pagament addizzjonali tal-Pilastru I u l-appoġġ għall-għajnuna għall-investiment u għall-installazzjoni disponibbli taħt il-Pilastru II, kif ukoll il-ħolqien ta’ strumenti finanzjarji ġodda barra mill-PAK; jenfasizza li dawn l-istrumenti għandhom jinkludu aktar eżenzjonijiet u inċentivi tat-taxxa, self b’imgħax baxx, skemi ta’ garanzija tal-kreditu agrikolu, sussidji għal għodod tal-biedja ta’ preċiżjoni u servizzi ta’ taħriġ, inkluż dwar mudelli ta’ negozju sostenibbli, immirati biex itejbu l-profittabbiltà;

103.Jisħaq fuq l-importanza li jiġu pprovduti servizzi ta’ konsulenza diversifikati, imfassla apposta u indipendenti biex jiġu appoġġjati l-bdiewa żgħażagħ u bdiewa ġodda, kemm qabel l-istabbiliment tagħhom kif ukoll fis-snin ta’ wara, b’mod partikolari fil-ħiliet personali, diġitali u ta’ kummerċjalizzazzjoni diretta, fil-kontabbiltà, fl-aspetti legali, fid-diversifikazzjoni tan-negozju, fil-biedja sostenibbli u fil-komunikazzjoni; jappoġġja l-użu mifrux tal-inkubaturi tal-impriżi agrikoli li jippermettu lill-bdiewa propspettivi jibbenefikaw mill-għarfien tal-bdiewa li għandhom xi snin ta’ esperjenza f’ambjent strutturat qabel ma jieħdu f’idejhom azjenda agrikola indipendenti; jistieden lill-Kummissjoni u lill-Istati Membri jiżguraw li jiġi previst l-istabbiliment ta’ ċentri nazzjonali għat-taħriġ tal-bdiewa żgħażagħ;

104.Jitlob lill-Kummissjoni tivvaluta jekk l-estensjoni tal-eliġibbiltà għall-appoġġ għall-bdiewa żgħażagħ sal-età ta’ 45 sena tinkoraġġix aktar nies biex jistabbilixxu ruħhom fl-agrikoltura, inkluż permezz ta’ taħriġ mill-ġdid; jistieden ukoll lill-Kummissjoni tivvaluta mill-ġdid elementi oħra tal-kriterji ta’ eliġibbiltà li jistgħu jkunu restrittivi wisq;

105.Jilqa’ l-ftehim ta’ kooperazzjoni mal-Bank Ewropew tal-Investiment (BEI) bħala mudell promettenti li jista’ jrawwem il-ħolqien ta’ strumenti finanzjarji għal ħafna aspetti tal-PAK, inklużi l-appoġġ għall-bdiewa żgħażagħ u nisa, kif ukoll il-politiki dwar l-ilma, is-suq u r-reżiljenza għall-klima fl-Istati Membri kollha; jemmen li r-rwol tal-BEI għandu jiffoka primarjament fuq li jiġi provdut finanzjament b’kost baxx għall-finanzjament simetriku għal elementi kapitali u proġetti tal-infrastruttura li l-bdiewa jistgħu jkunu involuti fihom bħala parti minn programm ta’ modernizzazzjoni;

106.jinkoraġġixxi lill-Istati Membri jfasslu mekkaniżmi li jiffaċilitaw it-tranżizzjoni lejn irtirar dinjituż u ppjanat; jappella, b’mod partikolari, għal skemi ta’ rtirar bikri għall-bdiewa, iffinanzjati minn fondi separati; jitlob espansjoni fis-servizzi li jikkollegaw lill-bdiewa li jirtiraw ma’ bdiewa żgħażagħ jew ġodda aspiranti, flimkien ma’, fost l-oħrajn, appoġġ loġistiku u pariri legali li jippermettu t-trasferiment ta’ benefiċċju reċiproku tal-azjendi agrikoli u jiżguraw il-kontinwità tal-għarfien u l-attività agrikola;

107.Jistieden lill-Kummissjoni u lill-Istati Membri jindirizzaw, fl-istrateġiji ta’ tiġdid ġenerazzjonali tagħhom, l-ostakli speċifiċi li jiffaċċjaw in-nisa, b’mod partikolari n-nisa żgħażagħ, li jixtiequ jidħlu fis-settur agrikolu, inklużi kwistjonijiet mhux direttament relatati mal-agrikoltura, bħall-kura tas-saħħa adegwata u s-servizzi soċjali; jirrikonoxxi l-isforzi permezz ta’ miżuri tal-PAK biex jappoġġjaw lin-nisa fl-agrikoltura, iżda jisħaq li huwa meħtieġ appoġġ aktar b’saħħtu u aktar imfassal apposta, speċjalment f’żoni rurali periferali, inkluż l-aċċess għal self, taħriġ jew assistenza finanzjarja biex jiġu żgurati involviment reali u opportunitajiet indaqs; iħeġġeġ lill-Istati Membri jistabbilixxu kundizzjonijiet xierqa għall-parteċipazzjoni attiva tan-nisa f’organizzazzjonijiet agroalimentari rappreżentattivi u fil-korpi ta’ ġestjoni tal-intrapriżi agrikoli u l-assoċjazzjonijiet tan-nisa rurali; Jilqa’, f’dan ir-rigward, il-ħolqien prospettiv tal-pjattaforma tal-bdiewa nisa bħala spazju għal djalogu u skambju ta’ prattiki tajba biex jissaħħu l-parteċipazzjoni u l-opportunitajiet indaqs fis-settur agroalimentari;

108.Jistieden lill-Kummissjoni u lill-Istati Membri jindirizzaw b’mod urġenti l-problema tat-telf u l-konċentrazzjoni tal-art agrikola, inkluż in-nuqqas ta’ trasparenza f’dan is-suq; jisħaq li l-kiri tal-art taħt kundizzjonijiet ta’ ċertezza legali biex jiġi ffaċilitat l-aċċess għat-triq hija alternattiva vijabbli fuq terminu qasir peress li jirrikjedi anqas riżorsi għall-installazzjoni u jiffavorixxi t-tiġdid ġenerazzjonali; jenfasizza l-importanza ta’ servizzi ta’ tqabbil tal-art appoġġjati pubblikament u ppjanar strutturat tas-suċċessjoni, b’mod partikolari għat-trażmissjoni tal-art li tippermetti l-irtirar bikri u l-kontinwità tal-ġestjoni tal-azjendi agrikoli; huwa favur li l-Istati Membri jadottaw politiki biex jippromwovu l-kiri stabbli u fit-tul tal-art, biex b’hekk jipprovdu sigurtà fir-rigward tal-pussess tal-art u ż-żmien għall-investiment, speċjalment għall-bdiewa żgħażagħ, nisa u ġodda, li jista’ jtejjeb ukoll is-saħħa tal-ħamrija, il-prestazzjoni ambjentali u r-reżiljenza għall-klima;

109.Jilqa’ l-intenzjoni tal-Kummissjoni li tniedi osservatorju tal-UE dwar l-art agrikola, li jkollu jtejjeb it-trasparenza fis-suq tal-art agrikola fl-UE u jiffaċilita l-armonizzazzjoni tad-data dwar l-art agrikola u l-aċċess għall-art, jippermetti l-kooperazzjoni u l-iskambju tal-aħjar prattiki bejn l-Istati Membri, kif ukoll jipprovdi rakkomandazzjonijiet għal tfassil ta’ politika tal-UE aktar infurmat;

110.Jenfasizza l-fatt li l-preżervazzjoni tal-pajsaġġi kulturali diversi tal-UE mhijiex biss ta’ importanza ekoloġika u turistika, iżda wkoll aspett fundamentali tal-identità reġjonali u r-reżiljenza rurali fit-tul; jappella, għalhekk, għar-rikonoxximent espliċitu tagħhom u għall-integrazzjoni tal-preżervazzjoni tagħhom bħala objettiv strateġiku fl-istrateġija tal-PAK wara l-2027;

111.Jinkoraġġixxi approċċi għar-restawr tan-natura li jaħdmu fi sħubija mal-bdiewa u mas-sidien tal-art, u li jiżguraw rispett sħiħ għad-drittijiet tal-proprjetà;

112.Jinkoraġġixxi lill-Kummissjoni tesplora kif il-PAK tista’ tappoġġja mudelli tan-negozju ġodda għall-bdiewa fit-triq lejn agrikoltura saħansitra aktar sostenibbli u kompetittiva fl-Ewropa;

113.Jistieden lill-Kummissjoni tippromwovi sħubijiet għall-iskambju tal-aħjar prattiki u ideat innovattivi bejn l-Istati Membri f’kollaborazzjoni mal-awtoritajiet lokali, l-universitajiet, iċ-ċentri ta’ riċerka u l-azjendi agrikoli; jenfasizza li tali kooperazzjoni għandha tiffoka fuq is-simplifikazzjoni, l-aċċessibbiltà, iż-żieda fis-sostenibbiltà u l-indirizzar tal-isfidi speċifiċi għal kull reġjun u settur u għandha tkun appoġġjata minn taħriġ xieraq, biex b’hekk jiġu evitati distorsjonijiet u approċċi diverġenti li jistgħu jkunu ta’ żvantaġġ għall-bdiewa;

114.Jinkoraġġixxi l-promozzjoni ta’ programmi ta’ appoġġ u viżibbiltà li jirriflettu l-istil ta’ ħajja arrikkit u sodisfaċenti li s-settur agrikolu jista’ joffri, filwaqt li jenfasizza l-valur u l-impenn tal-bdiewa fir-rigward tan-natura, is-sigurtà tal-ikel u l-kwalitajiet u l-valuri speċifiċi inerenti fil-ħidma tal-professjonisti tal-azjendi agrikoli; jiġbed l-attenzjoni għall-valur tal-konsistenza tal-politika tul iż-żmien bħala essenzjali biex ikunu permessi objettivi ċari u fit-tul għas-settur tal-biedja;

115.Jisħaq fuq l-importanza ta’ politika ta’ promozzjoni tal-UE b’saħħitha u ffinanzjata tajjeb, inklużi allokazzjonijiet akbar tal-baġit tal-PAK, biex tiżdied is-sensibilizzazzjoni dwar il-kwalitajiet tal-prodotti agrikoli u tal-ikel tal-UE kemm fl-UE kif ukoll globalment, u jenfasizza li dan jassumi sinifikat saħansitra akbar matul perjodi ta’ inċertezza ekonomika;

116.Jappella għal pakkett ta’ investiment ambizzjuż għall-innovazzjoni, it-teknoloġija u r-riċerka applikata adattat għall-ħtiġijiet tal-bdiewa, iffinanzjat permezz tal-PAK, Orizzont Ewropa, il-Programm Ewropa Diġitali u mekkaniżmi oħra ta’ appoġġ, li se jkollhom rwol ewlieni fit-trawwim ta’ settur agrikolu aktar sostenibbli u adattat; jisħaq li l-programm Orizzont Ewropa għandu jinkludi pilastru speċifiku ddedikat għall-agrikoltura, immirat lejn il-promozzjoni tar-riċerka, l-innovazzjoni u t-trasferiment tal-għarfien fis-settur agroalimentari;

117.Jenfasizza l-ħtieġa li jiġi żgurat li s-soluzzjonijiet innovattivi u diġitali jkunu jistgħu jintużaw b’aċċess ekwu fit-tipi kollha ta’ azjendi agrikoli u territorji fl-UE u li dawn is-soluzzjonijiet jappoġġjaw l-agrikoltura sostenibbli, jgħinu fil-ġestjoni tad-diversità u l-kumplessità tal-agroekosistemi, jikkontribwixxu għall-istrateġiji ta’ mitigazzjoni u adattament għat-tibdil fil-klima, itejbu l-introjtu tal-bdiewa, inaqqsu l-ammont ta’ xogħol amministrattiv kemm għall-bdiewa kif ukoll għall-amministrazzjonijiet, jantiċipaw il-kundizzjonijiet tal-produzzjoni futuri u jkunu konformi mal-aspettattivi tal-konsumaturi u tas-soċjetà; jissottolinja li l-użu ta’ teknoloġiji ġodda għandu jiġi appoġġjat minn qafas legali xieraq sabiex jiġi sfruttat il-potenzjal sħiħ tagħhom u jkunu soġġetti għal valutazzjonijiet tar-riskju robusti;

118.Jappella għal aktar finanzjament għar-riċerka applikata dwar alternattivi sostenibbli u effettivi għall-prodotti konvenzjonali għall-protezzjoni tal-pjanti u jitlob reviżjoni tal-proċeduri ta’ approvazzjoni attwali; jenfasizza l-ħtieġa li jiġi evitat kwalunkwe rtirar ulterjuri mis-suq ta’ prodotti għall-protezzjoni tal-pjanti li jirrispettaw il-limiti ta’ sikurezza legali stabbiliti jekk għadhom mhumiex disponibbli alternattivi, sabiex jiġi żgurat li l-produzzjoni agrikola tkun tista’ tinżamm b’mod sikur u sostenibbli; jindika l-potenzjal tal-bijostimulanti fit-titjib tal-produttività tal-pjanti;

119.Jisħaq fuq l-importanza li jiġi rikonoxxut u msaħħaħ ir-rwol tal-mudell tal-AKIS bħala għodda strateġika u trażversali fil-PAK wara l-2027, li kapaċi tiżgura t-tixrid effettiv tal-għarfien u l-innovazzjoni lill-bdiewa; jemmen li AKIS effiċjenti u kkoordinata hija ċentrali biex jintlaħqu l-objettivi ewlenin tal-PAK f’termini ta’ kompetittività, produzzjoni sostenibbli tal-ikel, reżiljenza għall-klima u tranżizzjoni diġitali u trid tkun integrata bis-sħiħ mal-pjanijiet strateġiċi nazzjonali;

120.Jirrikonoxxi l-importanza tal-EIP-AGRI, li kkontribwiet għall-avvanz tal-innovazzjoni fis-settur agroalimentari u tal-forestrija permezz tal-ħolqien ta’ gruppi operazzjonali u l-implimentazzjoni ta’ proġetti innovattivi li għandhom l-għan li jiżviluppaw soluzzjonijiet mill-aktar avvanzati u juru l-aħjar prattika, li jtejbu s-sostenibbiltà, ir-reżiljenza u l-kompetittività tas-settur agroalimentari; jistieden lill-Kummissjoni ssaħħaħ l-appoġġ għal din l-inizjattiva fil-qafas tal-PAK ta’ wara l-2027;

121.Jindika l-ħtieġa li titfassal miżura speċifika fi ħdan il-qafas tal-iżvilupp rurali bbażata fuq il-prinċipji ta’ arikoltura sostenibbli integrata, biex isir użu akbar tal-ġestjoni integrata tal-pesti, inklużi l-bijokontroll, id-droni u l-endoterapija, biex tiġi ottimizzata l-applikazzjoni ta’ prodotti għall-protezzjoni tal-pjanti, filwaqt li dejjem jiġu rispettati l-limiti legali u ta’ sikurezza stabbiliti u jiġi pprovdut kumpens lill-bdiewa għal kwalunkwe telf finanzjarju mġarrab; jisħaq fuq l-importanza li tiġi stabbilita biedja integrata bħala sistema rikonoxxuta b’mod komuni fl-UE u li jsir aktar progress fl-istabbiliment u l-appoġġ ta’ prattiki tal-biedja sostenibbli u organika;

122.Jenfasizza l-importanza tal-ingranaġġ tal-finanzjament privat fil-PAK biex jiżdied l-investiment fl-agrikoltura u l-iżvilupp rurali billi jiġu mmobilizzati aktar riżorsi fit-tul għall-organizzazzjonijiet tal-bdiewa, speċjalment l-intrapriżi żgħar u ta’ daqs medju kif ukoll negozji tal-familja;

123.Jinnota li, skont studju tas-Servizz ta’ Riċerka tal-Parlament Ewropew (EPRS) tal-2025 Studju bit-titolu “Animal welfare during transport: Update on the implementation of Council Regulation (EC) No 1/2005” (Il-benessri tal-annimali matul it-trasport: Aġġornament dwar l-implimentazzjoni tar-Regolament tal-Kunsill (KE) Nru 1/2005), EPRS, Unità tal-Evalwazzjoni Ex Post, Marzu 2025, https://www.europarl.europa.eu/RegData/etudes/STUD/2025/765766/EPRS_STU(2025)765766_EN.pdf., għadd żgħir ta’ biċċeriji kbar huma kkonċentrati f’ċerti reġjuni; jenfasizza, għalhekk, il-ħtieġa li permezz ta’ fondi tal-PAK jiġu appoġġjati l-istabbiliment u l-iżvilupp ta’ biċċeriji biex tiġi stimulata l-ekonomija lokali, jinħolqu l-impjiegi u jissaħħu l-ktajjen tal-provvista qosra;

124.Jappella għall-approvazzjoni u l-implimentazzjoni rapidi ta’ teknoloġiji ġodda tat-tnissil, bħal CRISPER-Cas, f’kumpaniji żgħar kif ukoll kbar, biex jitrawwem l-iżvilupp tal-għelejjel li huma aktar reżiljenti, effiċjenti fl-użu tar-riżorsi u ambjentalment sostenibbli;

125.Jappella għal miżuri li jiżguraw li l-bdiewa jżommu sjieda sħiħa u kontroll sħiħ fuq id-data tagħhom, biex b’hekk jissalvagwardjaw id-drittijiet tagħhom u jippromwovu t-trasparenza fl-użu u l-kondiviżjoni tad-data agrikola fil-kuntest ta’ innovazzjonijiet diġitali u xprunati mill-IA li qed jevolvu;

126.Jirrikonoxxi l-benefiċċji potenzjali tal-qafas volontarju għall-UE kollha għaċ-ċertifikazzjoni tal-assorbiment tal-karbonju u jħeġġeġ lill-Kummissjoni ssaħħaħ l-aċċess għal dawn l-opportunitajiet għas-settur tal-biedja; jisħaq li l-krediti tal-karbonju u tan-natura jistgħu jipprovdu inċentiv pożittiv u remunerazzjoni addizzjonali għall-bdiewa, b’mod partikolari għall-bdiewa żgħażagħ, billi jippremjaw b’mod ġust prattiki bħall-agroforestrija u l-ġestjoni riġenerattiva tal-ħamrija, li jikkontribwixxu għall-qbid tal-karbonju u t-tnaqqis tal-emissjonijiet fl-azjendi agrikoli; jissottolinja li tali qafas ta’ ċertifikazzjoni jrid ikun miftuħ u disponibbli għall-bdiewa kollha li jixtiequ jżommu jew iżidu l-kapaċità tal-ħżin tal-karbonju tal-ħamrija tagħhom u jħeġġeġ lill-Kummissjoni toħloq kundizzjonijiet biex tiżgura d-domanda tas-suq għal tali ċertifikati permezz ta’ inċentivi xierqa u prevedibbiltà tas-suq fit-tul għall-investituri tas-settur privat; jenfasizza li l-kultivazzjoni karbonika għandha tikkomplementa, u mhux tissostitwixxi, il-produzzjoni agrikola attiva u sostenibbli;

127.Jistieden lill-Kummissjoni tippromwovi l-produzzjoni tal-enerġija solari fl-azjendi agrikoli b’mod li jiżgura li s-sjieda tal-installazzjonijiet u l-benefiċċji akkumulati jibqgħu f’idejn sid l-art u l-komunità lokali u li jkun kompatibbli mal-attività agrikola, bl-għan li tittejjeb il-kapaċità tal-bdiewa li jadattaw għat-tibdil fil-klima u jikkontribwixxu għall-istabbiltà u d-diversifikazzjoni tal-introjtu tal-bdiewa;

128.Iħeġġeġ lill-Kummissjoni ssegwi r-rakkomandazzjonijiet tar-rapport Niinistö u tikkunsidra l-importanza ta’ stokkijiet tal-ikel strateġiċi; jappella biex b’mod mifrux jiġu stabbiliti stokkijiet strateġiċi tal-ikel, abbażi tal-esperjenza soda miksuba fil-Finlandja u biex il-kunċett ta’ “użu doppju skont id-disinn” jiġi inkorporat fil-politiki għall-iżvilupp tal-produzzjoni tal-bijofjuwils; iqis li ma jista’ jkun hemm l-ebda sovranità tal-ikel mingħajr stokkijiet strateġiċi tal-ikel;

129.Jisħaq fuq l-importanza li tiġi kkonfermata b’mod espliċitu l-legalità tal-kultivazzjoni, il-ħsad, l-ipproċessar u l-kummerċjalizzazzjoni tal-pjanta tal-qanneb kollha għal skopijiet industrijali awtorizzati madwar l-UE sabiex tiġi pprovduta ċertezza legali għall-bdiewa, il-proċessuri, ir-regolaturi u l-konsumaturi; jinnota li l-kultivazzjoni tal-qanneb tirrikjedi relattivament ftit inputs, speċjalment fertilizzanti, prodotti għall-protezzjoni tal-pjanti u ilma; jenfasizza li tikkontribwixxi wkoll għas-saħħa tal-ħamrija u l-bijodiversità, toffri opportunitajiet ekonomiċi ġodda, introjtu addizzjonali u innovazzjoni għaż-żoni rurali permezz tal-provvista ta’ materja prima għal applikazzjonijiet industrijali bħall-fibra tat-tessuti, u użi oħra bħas-saħħa, l-ikel u l-għalf; jistieden lill-Kummissjoni tistabbilixxi limitu komuni għall-UE kollha ta’ 0,5% tetraidrokannabinol (THC) għall-klassifikazzjoni legali tal-qanneb industrijali, u tiżgura l-armonizzazzjoni tal-leġiżlazzjoni nazzjonali f’konformità mad-deċiżjonijiet tal-Qorti tal-Ġustizzja tal-Unjoni Ewropea u d-dritt internazzjonali;

130.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.