(2)Sabiex jintlaħqu dawk l-objettivi, id-Direttiva (UE) 2015/2302 wessgħet id-definizzjoni tat-terminu “pakkett” meta mqabbla mad-Direttiva 90/314/KEE. Id-Direttiva (UE) 2015/2302 speċifikat ulterjorment id-drittijiet eżistenti tal-vjaġġaturi u introduċiet oħrajn ġodda, bħad-dritt għall-vjaġġaturi li jitterminaw kuntratt ta’ pakkett tal-ivvjaġġar mingħajr tariffi ta’ terminazzjoni, taħt ċerti kundizzjonijiet, fil-każ ta’ ċirkostanzi inevitabbli u straordinarji.

(3)Filwaqt li, b’mod ġenerali, id-Direttiva (UE) 2015/2302 ħadmet tajjeb, tfaċċaw diversi sfidi mill-bidu tal-applikazzjoni tagħha fl-1 ta’ Lulju 2018. Il-pandemija tal-COVID-19 u l-miżuri tal-gvern relatati kellhom impatt sinifikanti kemm fuq l-industrija tal-ivvjaġġar kif ukoll fuq il-vjaġġaturi u esponew ċerti dgħufijiet fil-mudelli kummerċjali prevalenti u wrew li dispożizzjonijiet speċifiċi tad-Direttiva jistgħu jiġu ċċarati. Barra minn hekk, minkejja l-isforzi marbuta mad-Direttiva biex tiġi żgurata t-trasparenza u biex tingħata informazzjoni ċara lill-vjaġġaturi, għad hemm nuqqas ta’ uniformità fil-komunikazzjoni tal-informazzjoni lill-vjaġġaturi dwar id-drittijiet tagħhom.

(5)Filwaqt li, b’mod ġenerali, id-definizzjoni ta’ “pakkett” titqies li kienet effettiva, id-definizzjoni ta’ arranġamenti tal-ivvjaġġar marbuta u r-regoli dwarhom ħolqu aktar kumplessità u inċertezza legali, u rarament jintużaw fil-prattika. Għalhekk, id-definizzjoni ta’ “pakkett” jenħtieġ li tiġi ċċarata u ssimplifikata, u d-dispożizzjonijiet dwar l-arranġamenti tal-ivvjaġġar marbuta jenħtieġ li jitħassru mid-Direttiva (UE) 2015/2302. Din il-kjarifika u din is-simplifikazzjoni tad-definizzjonijiet u tal-kunċett ta’ “pakkett” u t-tħassir tar-referenzi għall-kunċett ta’ “arranġament tal-ivvjaġġar marbut” jenħtieġ li jżidu ċ-ċertezza legali għall-partijiet kollha, filwaqt li jagħmlu l-protezzjoni tal-vjaġġaturi aktar effettiva u jiżguraw kundizzjonijiet ekwi għall-kummerċjanti. Fl-istess ħin, jenħtieġ li jitnaqqas l-għadd ta’ formoli ta’ informazzjoni li għandhom jintużaw mill-kummerċjanti meta jinformaw lill-vjaġġaturi dwar id-drittijiet tagħhom. Bit-tħassir tal-kunċett ta’ “arranġamenti tal-ivvjaġġar marbuta”, l-Anness II sussegwentement jenħtieġ li jitħassar.

(6)Il-prinċipju li fuqu hija bbażata d-definizzjoni ta’ “pakkett” jenħtieġ li jibqa’ jkun li hemm rabta mill-qrib bejn servizzi tal-ivvjaġġar differenti pprenotati għall-finijiet tal-istess vjaġġ jew vaganza. Prenotazzjonijiet ta’ tipi differenti ta’ servizzi tal-ivvjaġġar għall-istess vjaġġ jew vaganza f’punt wieħed ta’ bejgħ fejn is-servizzi tal-ivvjaġġar ikunu ntgħażlu qabel ma l-vjaġġatur jikkonkludi l-ewwel kuntratt jenħtieġ li jitqiesu bħala pakketti bl-istess mod bħas-servizzi tal-ivvjaġġar ipprenotati f’punt wieħed ta’ bejgħ fi żmien qasir. Fiż-żewġ każijiet, hemm rabta mill-qrib bejn il-prenotazzjonijiet tas-servizzi tal-ivvjaġġar. Għalhekk, id-definizzjoni ta’ “pakkett”, jenħtieġ li tkopri ż-żewġ sitwazzjonijiet.

(7)Fil-kuntest tal-prenotazzjonijiet magħmula f’perjodu qasir ta’ żmien f’punt wieħed ta’ bejgħ, huwa xieraq li l-kriterju pjuttost vag ta’ “żjara jew kuntatt wieħed” jiġi sostitwit. Għalhekk, il-prenotazzjonijiet ta’ tipi differenti ta’ servizzi tal-ivvjaġġar għall-istess vjaġġ jew vaganza fejn, qabel ma l-vjaġġatur jaqbel li jħallas għall-ewwel servizz tal-ivvjaġġar, kummerċjant jistieden attivament lil vjaġġatur biex jipprenota servizz addizzjonali wieħed jew aktar għall-istess vjaġġ jew vaganza fi żmien 24 siegħa minn meta jaqbel li jħallas għall-ewwel servizz, jenħtieġ li jitqiesu bħala pakketti. Għall-fini ta’ din id-Direttiva, kummerċjant jenħtieġ li jitqies li jkun qed jistieden attivament lil vjaġġatur jipprenota servizz meta jottimizza l-offerta għall-bejgħ inkwistjoni jew jippromwovi tali offerta.

(8)Id-definizzjoni ta’ pakkett ifformat permezz ta’ proċessi ta’ prenotazzjoni online marbuta fl-Artikolu 3(2)(b)(v) tad-Direttiva (UE) 2015/2302, li kienet tirrikjedi li l-isem, id-dettalji tal-pagament u l-indirizz tal-posta elettronika tal-vjaġġatur kollha jiġu trażmessi minn kummerċjant għal kummerċjant ieħor, uriet li hija ristretta wisq. Għalhekk, huwa xieraq li jitqiesu bħala “pakkett” prenotazzjonijiet ta’ tipi differenti ta’ servizzi tal-ivvjaġġar għall-istess vjaġġ jew vaganza fejn il-kummerċjant li jkun parti għall-ewwel kuntratt jittrasferixxi d-data personali ta’ vjaġġatur lil kummerċjant li jkun parti għat-tieni kuntratt jew għal kuntratt ieħor. Tali trasferiment ta’ data personali jenħtieġ li jippermetti lill-kummerċjanti involuti jistabbilixxu li l-istess vjaġġatur huwa parti għall-kuntratti rilevanti u jista’ jinkludi, pereżempju, l-isem, id-dettalji tal-pagament, l-indirizz tal-posta elettronika jew in-numru tat-telefon tal-vjaġġatur. It-trasferiment ta’ data personali jindika rabta mill-qrib bejn il-prenotazzjonijiet/il-kuntratti.

imħassar

(10)Fir-rigward ta’ pakketti fejn, pereżempju, l-akkomodazzjoni tkun ikkombinata ma’ servizzi turistiċi oħrajn, iżda li ma jkun fihom l-ebda trasportazzjoni ta’ passiġġieri, il-kriterju ġenerali ta’ “proporzjon sinifikanti” tal-valur tal-kombinazzjoni, li japplika għas-servizzi turistiċi kif imsemmi fl-Artikolu 3(1)(d), jenħtieġ li jiġi sostitwit bil-kriterju aktar speċifiku ta’ “mill-anqas 25 %” sabiex tiżdied iċ-ċertezza legali. Jenħtieġ li jiġi nnotat li attivitajiet differenti fuq il-post li jiġu pprovduti bħala parti intrinsika tal-akkomodazzjoni jew tipikament assoċjati magħha, irrispettivament mill-valur tagħhom, jenħtieġ li ma jwasslux għall-ħolqien ta’ pakkett jekk dawn is-servizzi jkunu kkombinati biss mal-akkomodazzjoni.

(12)Hemm ċerti riskji li huma inerenti fil-prattika tan-negozju li jirrikjedu pagamenti bil-quddiem, b’mod partikolari f’sitwazzjonijiet fejn l-organizzaturi huma obbligati li jirrifondu ammonti sinifikanti lil vjaġġaturi għal vjaġġi kkanċellati f’perjodu ta’ żmien qasir. Għalhekk, jenħtieġ li jkun previst li l-kapparri, jiġifieri l-pagamenti mitluba lill-vjaġġaturi fil-ħin tal-prenotazzjoni jew ftit wara, jenħtieġ li jiġu ffissati f’livell xieraq. Il-kapparri jistgħu jkunu soġġetti għal limitazzjonijiet abbażi tal-ġuriżdizzjoni nazzjonali.

imħassar

imħassar

(16)F’ċerti sitwazzjonijiet, il-vawċers volontarji lill-vjaġġaturi jistgħu jkunu alternattiva utli għar-rifużjonijiet. Il-vawċers jistgħu jagħtu aktar flessibbiltà lill-organizzaturi b’mod partikolari jekk ikunu qed jiffaċċjaw l-obbligu li jagħmlu ħafna rifużjonijiet f’perjodu ta’ żmien qasir. Fl-istess ħin, il-vawċers jistgħu jkunu aċċettabbli għal vjaġġaturi li ma jeħtiġux rifużjoni immedjata, sakemm ikun hemm garanziji legali speċifiċi. Għalhekk, jenħtieġ li jiġu stabbiliti regoli ċari dwar il-vawċers li jipprovdu dawn il-garanziji. Dawk il-garanziji jenħtieġ li jinkludu t-trasparenza dwar in-natura volontarja u dwar il-karatteristiċi ewlenin tal-vawċers, kif ukoll dwar id-drittijiet tal-vjaġġaturi fir-rigward tal-vawċers, pereżempju, il-fatt li huma protetti kontra l-insolvenza tal-organizzatur u li l-vjaġġaturi huma intitolati għal rifużjoni awtomatika meta vawċer ma jissarrafx matul il-perjodu ta’ validità tiegħu. Jenħtieġ li jkun possibbli li l-vawċer jintuża għal kwalunkwe servizz propost mill-organizzatur. L-organizzaturi jenħtieġ li jkunu jistgħu jagħmlu l-vawċers aktar attraenti, pereżempju, billi jżidu l-valur tagħhom meta mqabbel mad-dritt ta’ rifużjoni tal-vjaġġatur. F’każijiet bħal dawn, il-protezzjoni kontra l-insolvenza jenħtieġ li tkun limitata għall-ammont tad-drittijiet ta’ rifużjoni tal-vjaġġatur.

(18)Jenħtieġ li jiġi ċċarat li t-terminazzjoni ta’ kuntratt hija possibbli jekk jista’ jkun raġonevolment mistenni li l-eżekuzzjoni tiegħu tkun affettwata b’mod sinifikanti u oġġettiv minn ċirkostanzi inevitabbli u straordinarji, li jkun jirrikjedi valutazzjoni każ b’każ. Il-valutazzjoni dwar jekk ċirkostanzi inevitabbli u straordinarji humiex se jkollhom effetti sinifikanti u oġġettivi fuq l-eżekuzzjoni tal-pakkett jenħtieġ li tkun ibbażata fuq previżjoni, fil-mument tat-terminazzjoni tal-kuntratt, tal-probabbiltà li ċ-ċirkostanzi inevitabbli u straordinarji jkollhom effetti sinifikanti u oġġettivi fuq l-eżekuzzjoni tal-pakkett. Meta vjaġġatur jittermina l-kuntratt, tali valutazzjoni jenħtieġ li ssir mill-perspettiva ta’ vjaġġatur medju li jkun raġonevolment infurmat sew u li jkun raġonevolment osservanti u ċirkuspett, abbażi ta’ informazzjoni disponibbli fid-data tat-terminazzjoni tal-kuntratt ta’ pakkett tal-ivvjaġġar inkwistjoni. L-effetti taċ-ċirkostanzi inevitabbli u straordinarji li jseħħu fil-post tat-tluq, fid-destinazzjoni, inklużi l-viċinanzi immedjati tagħha, jew li jaffettwaw il-vjaġġ lejn id-destinazzjoni jew minnha, inklużi d-diversi postijiet konnessi mal-bidu u r-ritorn tal-vjaġġ inkwistjoni, jenħtieġ li jitqiesu meta jaffettwaw l-eżekuzzjoni tas-servizzi tal-ivvjaġġar inklużi fil-kuntratt ta’ pakkett tal-ivvjaġġar rilevanti. Iċ-ċirkostanzi li jaffettwaw biss il-vjaġġ lejn id-destinazzjoni jew il-vjaġġ ta’ ritorn jenħtieġ li ma jitqisux jekk dak il-vjaġġ ma jkunx parti mill-kuntratt ta’ pakkett tal-ivvjaġġar, inkluż it-trasport tal-passiġġier lejn il-post tat-tluq miftiehem.

(19)Matul il-pandemija tal-Covid-19, ħarġu interpretazzjonijiet differenti fir-rigward tad-drittijiet ta’ kanċellazzjoni minħabba “ċirkostanzi inevitabbli u straordinarji” inkluż fir-rigward tar-rilevanza tat-twissijiet tal-ivvjaġġar. Għalhekk, huwa xieraq li jiġi speċifikat li t-twissijiet uffiċjali tal-ivvjaġġar għad-destinazzjoni tal-ivvjaġġar maħruġa mill-awtoritajiet tal-Istat Membru tar-residenza jew tat-tluq jew tal-pajjiż tad-destinazzjoni tal-vjaġġatur, huma elementi importanti meta jiġi vvalutat jekk it-terminazzjoni ta’ kuntratt tkunx ġustifikata. Barra minn hekk, in-nuqqas ta’ twissijiet uffiċjali tal-ivvjaġġar jenħtieġ li ma jipprevjenix l-istabbiliment tal-eżistenza ta’ dawk iċ-ċirkostanzi u tal-effetti tagħhom fuq l-eżekuzzjoni tal-pakkett. Iċ-ċirkostanzi inevitabbli u straordinarji jistgħu jkopru mhux biss iċ-ċirkostanzi li jaffettwaw l-eżekuzzjoni ta’ pakkett, iżda anki ċ-ċirkostanzi li, mingħajr ma jipprevjenu tali eżekuzzjoni, ifissru li l-pakkett ma jistax jiġi eżegwit mingħajr ma l-vjaġġaturi kkonċernati jiġu esposti għal riskji għas-saħħa u s-sikurezza tagħhom. Ir-rilevanza ta’ tali ċirkostanzi u tal-effetti tagħhom jenħtieġ li tiġi vvalutata b’mod oġġettiv, filwaqt li, meta jkun xieraq, jitqies sa liema livell il-passiġġieri kkonċernati huma esposti għar-riskju. Il-fatt li, minħabba ċirkostanzi inevitabbli u straordinarji, il-vjaġġaturi se jiġu soġġetti għal restrizzjonijiet serji fid-destinazzjoni tal-ivvjaġġar jew fil-post tat-tluq tagħhom, inklużi r-rekwiżiti ta’ kwarantina għal perjodu sinifikanti, jenħtieġ li jiġi vvalutat ukoll meta jiġi kkunsidrat jekk terminazzjoni ta’ kuntratt tkunx ġustifikata.

(20)Jenħtieġ li jiġi ċċarat ukoll li l-perjodu ta’ rifużjoni ta’ 14-il jum, li jiġi skattat mit-terminazzjoni tal-kuntratt, japplika irrispettivament minn jekk il-vjaġġatur speċifikament jitlobx rifużjoni. Barra minn hekk, jenħtieġ li jiġi speċifikat li l-organizzatur għandu l-obbligu li jirrimborża l-pagamenti kollha li saru mill-vjaġġatur jew f’ismu fir-rigward tal-pakkett.

(22)Sabiex tiġi żgurata l-effettività tal-protezzjoni mill-insolvenza għall-vjaġġaturi f’kull ħin, jenħtieġ li jiġi stipulat li s-sigurtà tkun biżżejjed biex tkopri l-kostijiet għar-rifużjonijiet u r-ripatrijazzjonijiet f’każijiet fejn isseħħ insolvenza fi żmien meta organizzatur jirċievi l-ogħla ammonti ta’ pagamenti. Jenħtieġ li titqies kwalunkwe żieda ta’ dawk l-ammonti minħabba volum antiċipat ogħla ta’ pakketti mibjugħa f’perjodu partikolari. Jenħtieġ li jiġi ċċarat li l-Istati Membri jenħtieġ li jissorveljaw il-protezzjoni mill-insolvenza tal-organizzaturi u jimmonitorjaw is-suq għall-provvista ta’ protezzjoni mill-insolvenza. Jenħtieġ li jiġi ċċarat li dawn il-miżuri jistgħu jiġu kofinanzjati mill-Istati Membri biss f’ċirkostanzi eċċezzjonali u jiġi mtenni li dawk id-dispożizzjonijiet huma mingħajr preġudizzju għad-dispożizzjonijiet tal-Unjoni dwar l-għajnuna mill-Istat sa fejn dawn il-miżuri jinvolvu għajnuna mill-Istat.

(25)Huwa importanti li l-vjaġġaturi jkunu informati kif xieraq dwar id-drittijiet tagħhom, ikunu jistgħu jifhmu l-informazzjoni pprovduta lilhom u jkollhom aċċess għal dik l-informazzjoni meta jkollhom bżonnha. Għalhekk, jenħtieġ li jsiru ċerti bidliet fir-rigward tar-rekwiżiti ta’ informazzjoni prekuntrattwali, il-kontenut ta’ kuntratt ta’ pakkett tal-ivvjaġġar u l-formoli ta’ informazzjoni standard stabbiliti fl-Annessi I u II tad-Direttiva (UE) 2015/2302. Pereżempju, il-formoli ta’ informazzjoni standard fl-Anness I jenħtieġ li jispeċifikaw il-kummerċjant responsabbli għar-rifużjonijiet għal pakketti kkanċellati. Id-dritt ta’ terminazzjoni ta’ kuntratt ta’ pakkett tal-ivvjaġġar mingħajr tariffa minħabba ċirkostanzi inevitabbli u straordinarji jenħtieġ li jiġi ppreżentat ħdejn il-possibbiltà ta’ kanċellazzjoni ta’ pakkett soġġett għal tariffa għall-kanċellazzjoni. Barra minn hekk, l-organizzaturi jenħtieġ li jkunu obbligati jżidu l-formola ta’ informazzjoni standard mal-kuntratt sabiex din tkun disponibbli għall-vjaġġaturi wara l-konklużjoni tal-kuntratt, flimkien mad-dettalji ta’ kuntatt tal-kummerċjanti rilevanti. Biex jiġi żgurat li l-vjaġġaturi jkunu infurmati sew dwar id-drittijiet tagħhom, l-organizzaturi jenħtieġ li jipprovdu assistenza aċċessibbli għall-vjaġġaturi, speċjalment il-vjaġġaturi vulnerabbli, permezz ta’ punt uniku ta’ servizz. Il-kanali ta’ komunikazzjoni diġitali jenħtieġ li jiġu rikonoxxuti bħala għodda fundamentali biex tiġi pprovduta informazzjoni aġġornata u personalizzata dwar id-drittijiet tal-passiġġieri f’kull ħin. Din l-informazzjoni jenħtieġ li tiġi pprovduta b’mod awtomatiku u proattiv mill-organizzaturi, b’mod partikolari f’każ ta’ event li x’aktarx ikollu impatt fuq il-pakkett, sabiex jiġi ffaċilitat il-fluss ta’ informazzjoni lill-vjaġġatur u lill-organizzatur. Il-kanali ta’ komunikazzjoni diġitali jenħtieġ li jingħataw prijorità, mingħajr ma tiġi affettwata ħażin l-assistenza lill-passiġġieri mogħtija fil-bankijiet fiżiċi.

Artikolu 1

Suġġett

L-għan ta’ din id-Direttiva huwa li tikkontribwixxi għall-funzjonament tajjeb tas-suq intern u għall-kisba ta’ livell għoli u kemm jista’ jkun uniformi ta’ protezzjoni tal-konsumatur billi jiġu approssimati u ssimplifikati ċerti aspetti tal-liġijiet, regolamenti u dispożizzjonijiet amministrattivi tal-Istati Membri rigward kuntratti bejn il-vjaġġaturi u l-kummerċjanti dwar il-pakketti tal-ivvjaġġar u ċerti aspetti ta’ kuntratti bejn organizzaturi ta’ pakketti u fornituri tas-servizz tal-ivvjaġġar, kif ukoll tar-rekwiżiti ta’ informazzjoni speċifika li f’xi każijiet ma jwasslux għall-ħolqien ta’ pakkett.

Din id-Direttiva tapplika għal pakketti offruti għal bejgħ jew li jinbiegħu mill-kummerċjanti lill-vjaġġaturi.

(i)dawk is-servizzi jinxtraw minn punt uniku ta’ bejgħ u jkunu ntgħażlu qabel ma l-vjaġġatur jaqbel li jħallas, jew

(ii)offruti, mibjugħa jew imħallsa bi prezz inklużiv jew totali, irrispettivament minn kwalunkwe kont separat, jew

(iii)reklamati jew mibjugħa bit-terminu “pakkett” jew b’xi terminu simili, jew

(iv)kombinati wara l-konklużjoni ta’ kuntratt li bih kummerċjant jintitola lill-vjaġġatur li jagħżel fost għażla ta’ tipi differenti ta’ servizzi tal-ivvjaġġar, jew

(v)mixtrija minn kummerċjanti separati permezz ta’ proċessi ta’ prenotazzjoni online marbuta fejn id-data personali tal-vjaġġatur li permezz tagħha l-vjaġġatur jista’ jiġi identifikat bħala parti kontraenti, tiġi trażmessa mill-kummerċjant li miegħu jiġi konkluż l-ewwel kuntratt lil kummerċjant ieħor jew lil kummerċjanti oħrajn u jiġi konkluż kuntratt jew jiġu konklużi kuntratti sa mhux aktar minn 24 siegħa wara l-konferma tal-prenotazzjoni tal-ewwel servizz tal-ivvjaġġar mal-kummerċjant jew mal-kummerċjanti tal-aħħar,

(b)il-punt 5 huwa mħassar

“(d) l-arranġamenti għall-pagament, inkluż permezz ta’ punti jew sistemi oħra ta’ kumpens monetarju u kwalunkwe ammont jew perċentwal tal-prezz li għandu jitħallas bħala kapparra u l-iskeda ta’ żmien għall-pagament tal-bilanċ, jew garanziji finanzjarji li għandhom jitħallsu jew jiġu pprovduti mill-vjaġġatur;”

Artikolu 5a

Pagamenti

L-Istati Membri jistgħu, f’konformità mad-dispożizzjonijiet nazzjonali, jintroduċu limitazzjonijiet għall-pagamenti bil-quddiem.

2a.Il-formola ta’ informazzjoni rilevanti stabbilita fl-Anness I għandha tiġi mehmuża mal-kuntratt jew issir disponibbli elettronikament fil-mument li jiġi konkluż. Il-kuntratt għandu jkun fih referenza ċara għal dik il-formola ta’ informazzjoni.

2.Bla ħsara għall-paragrafu 1, il-vjaġġatur għandu jkollu d-dritt li jittermina l-kuntratt ta’ pakkett tal-ivvjaġġar qabel il-bidu tal-pakkett mingħajr ma jħallas l-ebda tariffa ta’ terminazzjoni meta jkun raġonevolment mistenni li l-kuntratt tal-pakkett tal-ivjaġġar se jkun affettwat b’mod oġġettiv u sinifikanti minn ċirkostanzi inevitabbli u straordinarji li jseħħu fil-post tad-destinazzjoni jew fil-viċinanza immedjata tagħha, fil-post tat-tluq jew li jaffettwaw il-vjaġġ tal-vjaġġatur. F’każ ta’ terminazzjoni tal-kuntratt ta’ pakkett tal-ivvjaġġar f’konformità ma’ dan il-paragrafu, il-vjaġġatur għandu jkun intitolat għal rifużjoni sħiħa ta’ kull pagament li sar għall-pakkett, iżda ma għandux ikun intitolat għal kumpens addizzjonali.

3a.Twissijiet uffiċjali kontra l-ivvjaġġar lejn destinazzjoni partikolari maħruġa mill-awtoritajiet tal-Istat Membru tat-tluq jew tar-residenza tal-vjaġġatur jew il-pajjiż tad-destinazzjoni, jew il-fatt li l-vjaġġaturi se jkunu soġġetti għal restrizzjonijiet serji fid-destinazzjoni tal-ivvjaġġar jew fl-Istat Membru ta’ residenza jew ta’ tluq wara r-ritorn mill-vjaġġ jew mill-vaganza, għandhom ikunu elementi importanti li għandhom jitqiesu fil-valutazzjoni ta’ jekk terminazzjoni tal-kuntratt ibbażata fuq il-paragrafu 2 u l-paragrafu 3, il-punt (b), hijiex iġġustifikata. Dan japplika b’mod partikolari fejn tkun inħarġet twissija uffiċjali mhux aktar minn 28 jum qabel il-bidu skedat tal-pakkett iżda huwa mingħajr preġudizzju għal valutazzjoni każ b’każ. Meta l-vjaġġaturi jkunu ġew debitament infurmati dwar it-twissija uffiċjali u r-restrizzjonijiet tal-ivvjaġġar mill-organizzatur, u madankollu xorta pproċedew bi prenotazzjoni, il-vjaġġaturi għandhom jassumu r-riskju finanzjarju fil-każ li jitterminaw il-kuntratt ta’ pakkett tal-ivvjaġġar.

L-organizzatur għandu jagħti kwalunkwe rifużjoni meħtieġa skont il-paragrafi 2 u 3 jew, fir-rigward tal-paragrafu 1, irodd lura kwalunkwe pagament li jkun sar minn jew f’isem il-vjaġġatur għall-pakkett bit-tariffa adatta u ġustifikabbli ta’ terminazzjoni mnaqqsa. L-organizzatur għandu jagħmel tali rifużjonijiet jew rimborżi lill-vjaġġatur mingħajr dewmien żejjed u, fi kwalunkwe każ, mhux aktar tard minn 14-il jum wara li jiġi tterminat il-kuntratt ta’ pakkett tal-ivvjaġġar, irrispettivament minn jekk il-vjaġġatur speċifikament jitlobx rifużjoni. Meta d-dettalji tal-pagament tal-vjaġġatur ma jibqgħux validi, il-vjaġġatur għandu jipprovdi lill-organizzatur bid-dettalji tal-pagament korretti. L-organizzatur għandu jagħmel rifużjoni jew rimborż mhux aktar tard minn 14-il jum wara li l-vjaġġatur ikun issottometta d-dettalji tal-pagament ġodda.

1.L-Istati Membri għandhom jiżguraw li, meta kuntratt jiġi tterminat skont l-Artikoli 10, 11 jew 12, l-organizzatur jista’ jagħti lill-vjaġġatur l-għażla li jaċċetta vawċer li jista’ jintuża għal pakkett futur minflok rifużjoni. L-organizzatur jista’ joffri vawċer ta’ valur totali ogħla mid-dritt għal rifużjoni tal-vjaġġatur.

(b)il-perjodu ta’ validità tal-vawċer u d-drittijiet tal-vjaġġaturi fir-rigward tal-vawċers kif stabbiliti f’dan l-Artikolu u l-fatt li dawn mhux se jinbidlu matul il-perjodu ta’ validità tal-vawċer,

3.Il-valur tal-vawċer offrut għandu jikkorrispondi tal-anqas mal-ammont tad-dritt ta’ rifużjoni tal-vjaġġatur. L-organizzatur jista’ joffri vawċer ta’ valur totali ogħla.

4.Il-vjaġġaturi għandhom jitilfu d-dritt tagħhom għal rifużjoni matul il-perjodu ta’ validità tal-vawċer wara li jaċċettaw il-vawċer fuq mezz li jservi għal żmien twil. Il-partijiet jistgħu fi kwalunkwe ħin jaqblu dwar rifużjoni sħiħa jew parzjali qabel ma vawċer jissarraf jew jiskadi.

5.Il-vawċers għandu jkollhom perjodu ta’ validità ta’ massimu ta’ 12-il xahar mill-jum li fih il-vjaġġatur jaċċetta vawċer f’konformità mal-paragrafu 4. Dak il-perjodu jista’ jiġi estiż darba sa 12-il xahar bil-ftehim espliċitu u bil-miktub taż-żewġ partijiet. Il-vjaġġaturi għandu jkollhom id-dritt li jitolbu rifużjoni wara t-tmiem tal-perjodu ta’ validità.

6.Għandu jkun possibbli li l-vawċers jintużaw għas-servizzi tal-ivvjaġġar kollha proposti mill-organizzatur. Il-vjaġġaturi jistgħu jużaw il-vawċers għal servizz wieħed jew aktar offruti mill-organizzaturi u f’partijiet f’iktar minn darba. Jekk il-vawċer ma jissarrafx fi żmien il-perjodu ta’ validità tiegħu, l-organizzatur għandu jirrifondi l-ammont li jikkorrispondi mad-drittijiet għal rifużjoni tal-vjaġġatur mill-aktar fis possibbli u mhux aktar tard minn 14-il jum wara t-tmiem tal-perjodu ta’ validità mingħajr il-ħtieġa ta’ kwalunkwe talba minn qabel mill-vjaġġatur. Jekk il-vawċer jissarraf parzjalment, l-organizzatur għandu jirrifondi l-ammont li jkun fadal fil-vawċer mill-aktar fis possibbli u mhux aktar tard minn 14-il jum wara li l-vawċer jissarraf parzjalment, mingħajr il-ħtieġa ta’ kwalunkwe talba minn qabel mill-vjaġġatur.

7.Il-vawċers għandhom ikunu trasferibbli għal vjaġġatur ieħor darba biss mingħajr ebda kost addizzjonali. Il-vjaġġatur għandu jinforma lill-organizzatur bil-miktub dwar it-trasferiment tal-vawċer, u għandu jagħti lill-organizzatur id-data personali tad-destinatarju meħtieġa biex il-vawċer jissarraf jew biex jirċievi rifużjoni fi tmiem il-perjodu ta’ validità tiegħu. Sabiex tittejjeb it-traċċabbiltà, il-vawċer għandu jiġi mmarkat bħala ttrasferit.

L-Istati Membri għandhom jiżguraw li l-organizzaturi stabbiliti fit-territorju tagħhom jipprovdu sigurtà għar-rifużjoni tal-pagamenti kollha magħmula minn jew f’isem il-vjaġġaturi fil-każ ta’ insolvenza tal-organizzaturi. Dan għandu jinkludi l-protezzjoni tal-pagamenti magħmula meta pakkett ma jkunx eżegwit kompletament jew parzjalment bħala konsegwenza tal-insolvenza tal-organizzatur jew meta vjaġġatur kien intitolat għal rifużjoni jew kien irċieva vawċer mill-organizzatur qabel l-insolvenza tiegħu. Fir-rigward ta’ vawċers, is-sigurtà għandha tkun limitata għad-drittijiet għal rifużjoni tal-vjaġġatur. Jekk il-vjaġġ ta’ ritorn huwa inkluż fil-kuntratt ta’ pakkett tal-ivvjaġġar, l-organizzaturi għandhom jipprovdu wkoll is-sigurtà għar-ripatrijazzjoni tal-vjaġġatur. Tista’ tiġi offruta l-kontinwazzjoni tal-pakkett.

2.Is-sigurtà msemmija fil-paragrafu 1 għandha tkun effettiva u għandha tkopri l-kostijiet li huma raġonevolment prevedibbli. Din għandha tkopri l-ammonti ta’ pagamenti li jsiru minn jew f’isem il-vjaġġaturi fir-rigward tal-pakketti, filwaqt li jitqies it-tul tal-perjodu bejn meta jasal kwalunkwe pagament u t-tlestija tal-pakketti, kif ukoll il-kost stmat għar-ripatrijazzjonijiet fil-każ tal-insolvenza tal-organizzatur. Is-sigurtà għandha tkun biżżejjed biex tkopri l-kostijiet għar-rifużjonijiet u, fejn applikabbli, ir-ripatrijazzjoni u l-vawċers, f’kull ħin. Il-kopertura għandha tqis il-perjodi fejn l-organizzaturi jirċievu l-ogħla ammonti ta’ pagamenti.

3.Sabiex tiġi żgurata l-effettività tal-protezzjoni mill-insolvenza, l-Istati Membri għandhom jissorveljaw l-arranġamenti ta’ protezzjoni mill-insolvenza tal-organizzaturi stabbiliti fit-territorju tagħhom u jimmonitorjaw is-suq għall-provvista ta’ protezzjoni mill-insolvenza. Kwalunkwe kofinanzjament mill-Istati Membri huwa possibbli biss f’ċirkostanzi eċċezzjonali u debitament iġġustifikati u għandu jkun bil-kundizzjoni ta’ approvazzjoni skont id-dispożizzjonijiet tal-Unjoni dwar l-għajnuna mill-Istat.

6.Ir-rifużjonijiet tal-pagamenti affettwati mill-insolvenza tal-organizzatur għandhom jiġu pprovduti mingħajr dewmien żejjed wara t-talba tal-vjaġġatur u mhux aktar tard minn 6 xhur wara li l-vjaġġatur ikun issottometta d-dokumenti meħtieġa biex tiġi eżaminata t-talba. Meta jitolbu rifużjoni, il-vjaġġaturi għandhom jipprovdu l-kuntratt ta’ pakkett tal-ivvjaġġar kif ukoll prova tal-pagament li sar lill-organizzatur jew, fejn applikabbli, lill-bejjiegħa bl-imnut. Din id-dokumentazzjoni għandha tkun biżżejjed biex il-vjaġġatur jitlob rifużjoni.

2.L-Istati Membri għandhom jaħtru punti ta’ kuntatt ċentrali biex jiffaċilitaw il-kooperazzjoni amministrattiva u s-superviżjoni tal-organizzaturi li joperaw fi Stati Membri differenti u biex jiskambjaw informazzjoni fir-rigward tal-protezzjoni mill-insolvenza u kwalunkwe mekkaniżmu stabbilit biex jiżgura l-effettività tar-rifużjonijiet għal kuntratti ta’ pakkett tal-ivvjaġġar li jkunu ġew itterminati. L-Istati Membri għandhom jinnotifikaw id-dettalji tal-kuntatt ta’ dawk il-punti ta’ kuntatt lill-Istati Membri l-oħrajn kollha u lill-Kummissjoni. Kull Stat Membru għandu joħloq inventarju li fih jelenka l-kummerċjanti kollha li jbigħu pakketti fit-territorju tagħhom u l-identità rispettiva tal-entità inkarigata mill-protezzjoni mill-insolvenza. Dawk l-inventarji għandhom ikunu pubbliċi u aċċessibbli u għandhom jiffaċilitaw il-kooperazzjoni bejn il-punti ta’ kuntatt deżinjati mill-Istati Membri. Il-Kummissjoni għandha tiċċentralizza u żżomm aġġornata informazzjoni relatata mal-protezzjoni mill-insolvenza, inkluża lista tal-inventarji kollha u tagħmilha disponibbli għall-pubbliku fuq is-sit web tagħha.

(11)Il-Kapitolu VI huwa mħassar.

(14)L-Anness II huwa mħassar.

Artikolu 3

Traspożizzjoni

L-Istati Membri għandhom jadottaw u jippubblikaw, sa mhux aktar tard minn [24 xahar wara d-dħul fis-seħħ tad-Direttiva], il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva.

Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni. Huma għandhom japplikaw dawk id-dispożizzjonijiet minn [6 xhur wara d-data ta’ skadenza għat-traspożizzjoni].

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

imħassar