A.billi, fis-26 ta’ Settembru 2024, il-Prosekutur Ġenerali tal-Ungerija ressaq talba għat-tneħħija tal-immunità ta’ Péter Magyar, Membru tal-Parlament Ewropew elett fl-Ungerija, b’rabta ma’ akkużi ta’ allegata mġiba ħażina ta’ serq imwettaq għal valur minuri skont it-Taqsima 370(1) u t-Taqsima 370(2)(a) tal-Att C tal-2012 (il-Kodiċi Kriminali Ungeriż);

B.billi t-talba tindika li fil-21 ta’ Ġunju 2024, Péter Magyar kien qiegħed fi klabb f’Budapest fejn huwa ntgħaraf mill-parti offiża li rreġistrat filmat tiegħu; billi t-talba tindika wkoll li Péter Magyar u l-parti offiża ġew fl-idejn għal ftit fejn Péter Magyar ġibed it-telefown minn id il-parti offiża bħala mod kif iwaqqaf ir-reġistrazzjoni, poġġa t-telefown fil-but tiegħu stess u telaq jimxi ’l hemm; billi wara, it-tnejn li huma reġgħu tlewmu bejniethom u spiċċaw biex tneħħew mill-klabb mill-gwardji tas-sigurtà; billi minkejja t-talbiet tal-parti offiża biex ireġġagħlu lura t-telefown, Péter Magyar allegatament waqqa’ t-telefown tal-parti offiża fid-Danubju;

C.billi skont it-talba, il-bugħaddasa tal-pulizija li ssejħu fuq il-post irkupraw it-telefown, li kien jiswa madwar HUF 130 000–150 000, mid-Danubju u reġġgħuh lura lill-parti offiża fi stat ta’ funzjonament;

D.billi Péter Magyar ġie elett għall-Parlament Ewropew fl-elezzjonijiet Ewropej f’Ġunju 2024; billi r-riżultati tal-elezzjonijiet Ewropej fl-Ungerija ġew ipproklamati mill-awtoritajiet Ungeriżi fl-14 ta’ Ġunju 2024, u kienu jinkludu lil Péter Magyar fost il-Membri tal-Parlament Ewropew uffiċjalment iddikjarati eletti fl-Ungerija; billi Péter Magyar kien għalhekk Membru tal-Parlament Ewropew fiż-żmien tal-allegat reat u tal-investigazzjonijiet imwettqa mill-awtoritajiet kompetenti;

E.billi l-allegat reat ma jikkostitwix xi opinjoni espressa jew xi vot mitfugħ minn Péter Magyar fil-qadi ta’ dmirijietu skont it-tifsira tal-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea, u lanqas it-talba sussegwenti għat-tneħħija tal-immunità ta’ Péter Magyar ma hija relatata ma’ xi opinjoni espressa jew xi vot mitfugh minnu fil-qadi ta’ dmirijietu skont it-tifsira tal-istess Artikolu 8;

F.billi l-Artikolu 9, l-ewwel paragrafu, il-punt (a), tal-Protokoll Nru 7 dwar il-Privileġġi u l-Immunitajiet tal-Unjoni Ewropea jipprevedi li l-Membri tal-Parlament Ewropew għandhom igawdu, fit-territorju tal-Istat tagħhom stess, l-immunitajiet mogħtija lill-membri tal-parlament tagħhom;

G.billi l-Artikolu 4(2) tal-Liġi Fundamentali tal-Ungerija jipprevedi li l-membri tal-Parlament Ungeriz għandhom igawdu l-immunità parlamentari; billi, skont it-Taqsima 79(2) tal-Att Nru XXXVI tal-2012 dwar l-Assemblea Nazzjonali, persuna rreġistrata b’effett finali u vinkolanti bħala kandidat għandha tgawdi l-istess immunità bħall-membri sakemm ir-riżultat tal-elezzjoni jsir finali u vinkolanti, u billi, fi kwalunkwe każ, skont it-Taqsima 79(1) tiegħu, il-Membri għandhom igawdu l-immunità mill-jum li fih jiġu eletti; billi, skont it-Taqsima 74(1) tal-Att Nru XXXVI tal-2012 dwar l-Assemblea Nazzjonali, huwa biss bil-kunsens minn qabel tal-Assemblea Nazzjonali li jistgħu jinbdew u jiġu prosegwiti proċedimenti kriminali jew, fil-każ li l-immunità ma titneħħiex b’mod volontarju fir-rigward tal-każ inkwistjoni, proċedimenti ta’ ksur, u jiġu applikati miżuri ta’ koerċizzjoni skont proċedura kriminali kontra membru;

H.billi, f’konformità mal-Artikolu 5(2) tar-Regoli ta’ Proċedura, l-immunità parlamentari mhix privileġġ personali ta’ Membru imma hija garanzija tal-indipendenza tal-Parlament Ewropew kollu kemm hu u tal-Membri tiegħu;

I.billi l-għan tal-immunità prevista fil-Protokoll Nru 7 dwar il-Privileġġi u l-Immunitajiet tal-Unjoni Ewropea huwa li tipproteġi lill-Parlament u lill-Membri tiegħu minn proċedimenti ġudizzjarji fir-rigward ta’ attivitajiet imwettqa fil-qadi tad-dmirijiet parlamentari u li huma inseparabbli minn dawk id-dmirijiet;

J.billi mill-ġurisprudenza tal-Qorti tal-Ġustizzja tal-Unjoni Ewropea jirriżulta li l-Parlament għandu “setgħa diskrezzjonali wiesgħa fir-rigward tal-orjentazzjoni li kellu intenzjoni jagħti lid-deċiżjoni fir-rigward ta’ talba għat-tneħħija tal-immunità [...], minħabba n-natura politika li għandha tali deċiżjoni” Is-sentenza tal-Qorti Ġenerali tas-17 ta’ Jannar 2013, Gollnisch vs Il-Parlament, T-346/11 u T-347/11, ECLI:EU:T:2013:23, il-punt 59 u l-ġurisprudenza ċċitata.;

K.billi Péter Magyar huwa l-president tal-Partit Tisza (Tisztelet és Szabadság Párt) kif ukoll il-kap tal-lista tal-kandidati ta’ dak il-partit għall-elezzjonijiet Ewropej tal-2024; billi Péter Magyar kien avversarju vokali tal-politiki u l-pożizzjonijiet tal-gvern Ungeriż, inklużi dawk fir-rigward tal-Unjoni; billi l-fatti li wasslu għat-talba għat-tneħħija tal-immunità, l-inkonsistenzi fil-mod li bih twettqu l-investigazzjonijiet tal-pulizija, inkluża t-tweġiba mhux kompluta mill-Prosekutur Ġenerali tal-Ungerija dwar il-proporzjonalità tal-azzjonijiet meħuda mill-awtoritajiet fil-każ ta’ Péter Magyar meta mqabbla ma’ sitwazzjonijiet simili li jinvolvu oġġetti ta’ valur żgħir, u n-nuqqas ta’ ċarezza fit-tweġiba tal-awtoritajiet kompetenti dwar il-kwalifika legali tal-allegat reat kriminali li bih ġie akkużat Péter Magyar, iqajmu tħassib li l-intenzjoni wara l-proċedimenti setgħet kienet li tagħmel ħsara lir-reputazzjoni ta’ Péter Magyar;

L.billi għalhekk jidher li dan huwa każ fejn wieħed jista’ jassumi l-eżistenza ta’ każ ta’ fumus persecutionis, jiġifieri “evidenza konkreta” Is-sentenza tal-Qorti tal-Ġustizzja tas-17 ta’ Settembru 2020, Troszczynski vs Il-Parliament, C-12/19 P, ECLI:EU:C:2020:725, punt 26. li tindika li l-prosekuzzjoni inkwistjoni nbdiet bl-intenzjoni li timmina l-attività politika ta’ Péter Magyar, u b’mod partikolari l-attività tiegħu bħala Membru tal-Parlament Ewropew;

M.billi, minn naħa, il-Parlament ma jistax jitqies bħala qorti u, min-naħa l-oħra, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” Is-sentenza tal-Qorti Ġenerali tat-30 ta’ April 2019, Briois vs Il-Parlament, T-214/18, ECLI:EU:T:2019:266.;