1.ag cur sonrú i nDréachtbhuiséad Leasaitheach Uimh. 2/2025 mar a thíolaic an Coimisiún é;

2.ag tabhairt dá haire go bhfuil gá méadaithe foriomlán le ranníocaíochtaí OIN EUR 4,3 billiún mar thoradh ar an laghdú ar mhéid na n-acmhainní dílse seachas OIN agus ar na riachtanais íocaíochta bhreise ar thaobh an chaiteachais; á aithint go dtugtar le tuiscint leis sin modhnú ar ghlaoráta aonfhoirmeach OIN ó 0,527 % (in DBL 1/2025) go 0,547 % in DBL 2/2025;

3.á chur i bhfios go láidir, le Dréachtbhuiséad leasaitheach Uimh. 2/2025, gurb ionann laghduithe cnapshuime OIN do na cúig Bhallstát is tairbhithe agus thart ar EUR 9,2 billiún (comhlán); á chur i bhfáth go bhfuil na lacáistí sin nasctha le boilsciú agus, dá bhrí sin, go bhfuil méadú tagtha orthu ag ráta níos airde ná uasteorainneacha an chreata airgeadais ilbhliantúil (CAI), a dhéantar a choigeartú go bliantúil ar bhonn an díbhoilsceora 2 %; á thabhairt chun suntais go bhfuil síneadh suntasach curtha le buiséad an Aontais chun freagairt do ghéarchéimeanna éagsúla le blianta beaga anuas; á chur i bhfios go láidir go méadaíonn an aimhrialtacht sin maidir le lacáistí an t-ualach ar na Ballstáit eile;

4.á chur in iúl gur geal léi iarrachtaí nua an Choimisiúin níos mó roghanna a chur i láthair le haghaidh foinsí nua ioncaim do bhuiséad an Aontais; ag tabhairt dá haire, i ndáil leis sin, an togra ón gCoimisiún le haghaidh Cinneadh ón gComhairle maidir le Córas Acmhainní Dílse an Aontais Eorpaigh an 16 Iúil 2025; á mheas gur gá acmhainní dílse nua a ghlacadh go pras chun na hacmhainní atá ar fáil don bhuiséad a mhéadú; á chur i bhfáth nach mór d’acmhainní dílse nua a bheith cothrom agus go bhfuil siad bunriachtanach ní hamháin chun aisíoc chostais iasachtaíochta Ionstraim Théarnaimh an Aontais Eorpaigh a chumasú, ach chun a áirithiú go mbeidh an tAontas in ann a riachtanais chaiteachais níos airde a chumhdach; sa chomhthéacs sin, ag meabhrú a seasaimh sheanbhunaithe gur cheart gnóthachain amhantair a eascraíonn as fíneálacha agus pionóis, nó méideanna coibhéiseacha díobh, a úsáid mar ioncam forlíontach do bhuiséad an Aontais chun críocha freagairt ar ghéarchéimeanna nó riachtanais gan choinne agus nár cheart laghdú comhfhreagrach ar ranníocaíochtaí OIN-bhunaithe a bheith mar thoradh orthu; á chur i bhfáth, sa CAI reatha, go ndéantar na méideanna sin ‘a thabhairt ar ais’ do na Ballstáit;

5.á chur i bhfios go láidir gur gá machnamh dáiríre a dhéanamh ar sholúbthacht sa chéad CAI eile mar gheall ar cheachtanna ó ghéarchéimeanna a tharla le déanaí — an phaindéim, suaití fuinnimh agus an cogadh san Úcráin; ag athdhearbhú a seasaimh gur cheart an Ionstraim Sholúbthachta a bheidh ann amach anseo a chothú trí roinnt foinsí breise maoinithe, lena n-áirítear an barrachas bliantúil ón mbliain roimhe sin, fíneálacha agus athshreabha; ag tabhairt dá haire na forálacha ábhartha sa Rialachán CAI atá beartaithe, i gcás ina molann an Coimisiún méideanna áirithe a chur leis an Ionstraim Sholúbthachta, i gcomhréir le héilimh sheanbhunaithe na Parlaiminte; á mheabhrú, áfach, nár cheart go mbeadh an tsolúbthacht chun dochair don trédhearcacht;

6.á chur in iúl gur geal léi na coigeartuithe suas ar na leithreasuithe faoi chomhair íocaíochtaí don Chiste Forbartha Tuaithe, lena léirítear go bhfuil dlús á chur le cur chun feidhme phleananna straitéiseacha CBT 2023-2027 chomh maith leis na hidirghabhálacha faoi chláir 2014-2020 agus, ar an gcaoi sin, go ndéantar moilleanna sna blianta buiséid roimhe sin a chúiteamh;

7.ag moladh na bhfeabhsuithe leanúnacha i réimse an tSásra Coigeartaithe Carbóin ar Theorainneacha (SCCT), ach ag ceistiú cén fáth ar cheart méadú thart ar EUR 8 milliún ar riachtanais a bheith i gceist le simpliú ar rialachán SCCT, seachas laghdú mar gheall ar ghnóthachain éifeachtúlachta;

8.á mheas, thairis sin, go bhfuil amhras ann faoi chúiteamh na riachtanas breise don chóras custaim láraithe i gCeannteideal 1 agus SCCT i gCeannteideal 3 trí laghdú comhréireach ar leithdháiltí faoin Ionstraim um Threalamh Rialaithe Custaim i gCeannteideal 4; á chur in iúl gur oth léi go bhfuil an Coimisiún tar éis cistí suntasacha a ath-leithdháileadh ar fud na gCeannteideal mar gheall ar an staid bhuiséadach atá ann faoi láthair agus ag meabhrú a seasaimh sheanbhunaithe gur cheart airgead úr a bheith ag gabháil le tosaíochtaí beartais, cúraimí nó riachtanais nua; á chur i bhfáth go láidir nach bealach inmharthana iad athdháiltí athfhillteacha chun tosaíochtaí an Aontais a mhaoiniú toisc go ndéanann siad dochar d’infheistíochtaí agus go gcuireann siad baint amach na gcuspóirí beartais arna gcomhaontú i mbaol;

9.á thabhairt chun suntais agus á chur in iúl gur geal léi go gcuirfidh roinnt modhnuithe i bplean bunaíochta an Údaráis AE um Chomhrac an Sciúrtha Airgid ar chumas na gníomhaireachta sin a cúraimí a chur i gcrích go tráthúil agus go héifeachtúil; á mheabhrú go bhfuil ról lárnach ag an bpríomhinstitiúid sin maidir le hairgead na gcáiníocóirí a chosaint agus gur thacaigh Parlaimint na hEorpa go láidir léi;

10.á chur in iúl gur geal léi an dul chun cinn atá déanta ag an mBulgáir i dtreo an Euro a thabhairt isteach agus ag tacú go hiomlán le modhanna breise chun gníomhaíochtaí cumarsáide oiriúnacha agus spriocdhírithe a chur leis an athrú airgeadra; á aithint, in éagmais corrlach neamh-leithdháilte i gCeannteideal 2b, nach mór an Ionstraim Sholúbthachta a shlógadh chun na críche sin;

11.ag formheas an tseasaimh ón gComhairle ar Dhréachtbhuiséad leasaitheach Uimh. 2/2025;

12.á threorú dá hUachtarán a dhearbhú go bhfuil buiséad leasaitheach Uimh. 2/2025 glactha go cinntitheach agus socrú a dhéanamh maidir lena fhoilsiú in Iris Oifigiúil an Aontais Eorpaigh;

13.á threorú dá hUachtarán an rún reachtach seo a chur ar aghaidh chuig an gComhairle, chuig an gCoimisiún, chuig na hinstitiúidí agus na comhlachtaí eile lena mbaineann agus chuig na parlaimintí náisiúnta.