1.Jieħu nota tal-abbozz ta’ baġit emendatorju Nru 2/2025, kif imressaq mill-Kummissjoni;

2.Jieħu nota li t-tnaqqis fl-ammont ta’ riżorsi proprji għajr l-ING u l-ħtiġijiet ta’ pagament addizzjonali min-naħa tan-nefqa jirriżultaw fi ħtieġa globali akbar fil-kontribuzzjonijiet tal-ING ta’ EUR 4,3 biljun; jirrikonoxxi li dan jimplika modifika tar-rata uniformi ta’ ġbir tal-ING minn 0,527 % (fl-ABE 1/2025) għal 0,547 % fl-ABE 2/2025;

3.Jissottolinja li, bl-abbozz ta’ baġit emendatorju Nru 2/2025, it-tnaqqis ta’ somma f’daqqa tal-ING għall-ħames Stati Membri benefiċjarji jammonta għal ftit anqas minn EUR 9,2 biljun (gross); jisħaq li dawn ir-ribassi huma marbuta mal-inflazzjoni u għalhekk żdiedu b’rata ogħla mil-limiti massimi tal-qafas finanzjarju pluriennali (QFP), liema limiti jiġu aġġustati kull sena abbażi tad-deflatur ta’ 2 %; jenfasizza li l-baġit tal-Unjoni tqiegħed taħt tensjoni konsiderevoli biex jirrispondi għal diversi kriżijiet f’dawn l-aħħar ftit snin; jissottolinja li din l-anomalija fir-rigward tar-ribassi żżid il-piż fuq l-Istati Membri l-oħra;

4.Jilqa’ l-isforzi l-ġodda tal-Kummissjoni biex tippreżenta aktar għażliet għal sorsi ġodda ta’ dħul għall-baġit tal-Unjoni; f’dan ir-rigward, jieħu nota tal-proposta tal-Kummissjoni għal Deċiżjoni tal-Kunsill dwar is-sistema tar-riżorsi proprji tal-Unjoni Ewropea tas-16 ta’ Lulju 2025; iqis li l-adozzjoni rapida ta’ riżorsi proprji ġodda hija meħtieġa sabiex jiżdiedu r-riżorsi disponibbli għall-baġit; jisħaq li riżorsi proprji ġodda jridu jkunu ġusti u huma essenzjali mhux biss biex jippermettu l-ħlas lura tas-self tan-Next Generation EU, iżda biex jiġi żgurat li l-Unjoni tkun mgħammra biex tkopri l-ħtiġijiet ta’ nfiq akbar tagħha; f’dan il-kuntest, ifakkar fil-pożizzjoni li ilu jħaddan li l-gwadann imprevist li jirriżulta minn multi u penali, jew ammonti ekwivalenti, għandu jintuża bħala dħul supplimentari għall-baġit tal-Unjoni għal skopijiet ta’ rispons għall-kriżijiet jew ħtiġijiet mhux mistennija u ma għandux iwassal għal tnaqqis korrispondenti fil-kontribuzzjonijiet ibbażati fuq l-ING; jisħaq li, fil-QFP attwali, ammonti bħal dawn “jingħataw lura” lill-Istati Membri;

5.Jissottolinja li t-tagħlimiet mill-kriżijiet reċenti – il-pandemija, ix-xokkijiet tal-enerġija, u l-gwerra fl-Ukrajna – jirrikjedu riflessjoni serja dwar il-flessibbiltà fil-QFP li jmiss; itenni l-pożizzjoni tiegħu li l-Istrument ta’ Flessibbiltà futur għandu jiġi alimentat minn għadd ta’ sorsi addizzjonali ta’ finanzjament, inkluż is-surplus annwali mis-sena preċedenti, multi u rimborżi; jieħu nota tad-dispożizzjonijiet rilevanti fir-Regolament QFP propost, fejn il-Kummissjoni tipproponi li żżid ċerti ammonti mal-Istrument ta’ Flessibbiltà, f’konformità mat-talbiet li ilhom isiru mill-Parlament; ifakkar, madankollu, li l-flessibbiltà m’għandhiex issir għad-detriment tat-trasparenza;

6.Jilqa’ l-aġġustamenti ʼl fuq għall-approprjazzjonijiet ta’ pagament għall-Fond għall-Iżvilupp Rurali, li jindikaw li l-implimentazzjoni tal-pjanijiet strateġiċi tal-PAK 2023–2027 kif ukoll l-interventi fl-ambitu tal-programmi 2014–2020 qed jaċċelleraw u b’hekk qed inaqqsu d-dewmien fis-snin baġitarji preċedenti;

7.Ifaħħar it-titjib li qed isir fil-qasam tal-mekkaniżmu ta’ aġġustament tal-karbonju fil-fruntieri (CBAM), iżda jistaqsi għaliex simplifikazzjoni fir-Regolament CBAM għandha tinvolvi żieda fil-ħtiġijiet ta’ madwar EUR 8 miljun, pjuttost milli tnaqqis minħabba titjib fl-effiċjenza;

8.Iqis ukoll ta’ dubju l-fatt li l-ħtiġijiet addizzjonali għas-sistema doganali ċentralizzata fl-Intestatura 1 u għal CBAM fl-Intestatura 3 jiġu kkumpensati bi tnaqqis proporzjonat tal-allokazzjonijiet fl-ambitu tal-Istrument għat-Tagħmir ta’ Kontroll Doganali fl-Intestatura 4; jiddispjaċih li s-sitwazzjoni baġitarja attwali wasslet lill-Kummissjoni biex tirrialloka fondi sinifikanti fl-Intestaturi kollha u jfakkar fil-pożizzjoni li ilu jħaddan li l-prijoritajiet, il-kompiti jew il-ħtiġijiet ta’ politika ġodda għandhom ikunu akkumpanjati minn flus ġodda; jisħaq bil-qawwa li r-riallokazzjonijiet rikorrenti mhumiex mod vijabbli biex jiġu ffinanzjati l-prijoritajiet tal-Unjoni peress li jagħmlu ħsara lill-investimenti u jipperikolaw it-twettiq tal-objettivi ta’ politika li jkun intlaħaq qbil dwarhom;

9.Jenfasizza u jilqa’ l-fatt li xi modifiki fit-tabella tal-persunal għall-Awtorità tal-UE għall-Ġlieda Kontra l-Ħasil tal-Flus se jippermettu lil din l-aġenzija twettaq il-kompiti tagħha fil-ħin u b’mod effiċjenti; ifakkar li din l-istituzzjoni ewlenija għandha rwol ċentrali fil-protezzjoni ta’ flus il-kontribwenti u ġiet appoġġjata bis-sħiħ mill-Parlament Ewropew;

10.Jilqa’ l-progress li għamlet il-Bulgarija fir-rigward tal-introduzzjoni tal-Euro u jappoġġja bis-sħiħ mezzi addizzjonali biex il-bidla fil-munita tiġi akkumpanjata minn attivitajiet ta’ komunikazzjoni xierqa u mmirati; jirrikonoxxi li minħabba n-nuqqas ta’ marġni mhux allokat fl-Intestatura 2b, l-Istrument ta’ Flessibbiltà jrid jiġi mobilizzat għal dan l-għan;

11.Japprova l-pożizzjoni tal-Kunsill dwar l-abbozz ta’ baġit emendatorju Nru 2/2025;

12.Jagħti istruzzjonijiet lill-President tiegħu biex tiddikjara li l-baġit emendatorju Nru 2/2025 ġie adottat b’mod definittiv u biex tiżgura li jiġi ppubblikat f’Il-Ġurnal Uffiċjali tal-Unjoni Ewropea;

13.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-istituzzjonijiet l-oħra u lill-entitajiet ikkonċernati, kif ukoll lill-parlamenti nazzjonali.