1.ag aontú leis an gCoimisiún go bhfuil na coinníollacha a leagtar amach in Airteagal 4(2), pointe (a), de Rialachán CED comhlíonta agus go bhfuil an Ghearmáin i dteideal EUR 3 085 166 de ranníocaíocht airgeadais a fháil faoin Rialachán sin, arb ionann í agus 60 % den chostas iomlán de EUR 5 141 944, a chuimsíonn EUR 4 936 274 de chaiteachas ar sheirbhísí pearsantaithe agus EUR 205 670 de chaiteachas ar ghníomhaíochtaí ullmhúcháin, bainistithe, faisnéise agus poiblíochta, rialaithe agus tuairiscithe;

2.ag tabhairt dá haire gur chuir údaráis na Gearmáine an t-iarratas isteach an 10 Márta 2025, agus, tar éis don Ghearmáin faisnéis bhreise a chur ar fáil, gur thug an Coimisiún a mheasúnú i gcrích an 29 Iúil 2025, níos mó ná 4 mhí ina dhiaidh sin, agus gur thug sé fógra do Pharlaimint na hEorpa faoi an 26 Lúnasa 2025;

3.ag tabhairt dá haire go mbaineann an t-iarratas le 1,171 oibrí iomarcacha a ndearnadh difear dóibh le dúnadh an láithreáin táirgthe in Fulda, agus dúnadh páirteach saoráidí táirgthe in Hanau; ag tabhairt dá haire, thairis sin, go mbeidh 915 oibrí iomarcacha san iomlán ina dtairbhithe a bhfuiltear ag díriú orthu agus go bhfuiltear ag dréim leis go nglacfaidh siad páirt sna bearta;

4.ag tabhairt dá haire go bhfuil leibhéal íseal oideachais ag an gcuid is mó de na hoibrithe iomarcacha (oideachas meánscoile sóisearach nó níos luaithe ag 56 % díobh) agus go bhfuil siad 54 bliana d’aois nó níos sine (42 %); á chur i bhfios go láidir gur grúpa an-leochaileach iad oibrithe scothaosta go háirithe, a bhfuil bacainní suntasacha rompu maidir le hathfhostaíocht mar gheall ar dheiseanna teoranta maidir le huasoiliúint agus athoiliúint;

5.á chur in iúl gur chuir iomarcaíochtaí Goodyear méadú os cionn 10% leis an ráta dífhostaíochta i réigiún Fulda, agus go ndearnadh difear díréireach d’oibrithe fir agus do dhaoine níos sine ná 50, a bhfuil cáilíochtaí as dáta acu agus nach bhfuil a dtacair sainscileanna ar aon dul leis an éileamh reatha sa mhargadh; á chur i bhfáth go bhfuil gá le gníomhaíocht mhear chun meath struchtúrach réigiúnach a chosc agus ag cur béim ar a thábhachtaí atá sé poist ardcháilíochta atá dírithe ar an todhchaí a chothú chun athléimneacht fhadtéarmach eacnamaíoch agus shóisialta a áirithiú;

6.á mheabhrú gurb iad na gníomhaíochtaí seo a leanas atá sna seirbhísí pearsantaithe atá le soláthar d’oibrithe: bearta uasoiliúna nó athoiliúna substaintiúla, treoirchomhairleoireacht agus bearta gairm-threoshuímh / gníomhachtaithe gairme, seirbhísí comhairleacha agus liúntais le haghaidh gnólachtaí nuathionscanta, cúnamh chun poist a chuardach, dreasachtaí uasoiliúna agus forlíontaí, liúntais oiliúna, oiliúint faoi scileanna digiteacha; á chur i bhfáth, sa chomhthéacs sin, go bhfuil lucht saothair dea-oilte ríthábhachtach do gheilleagar Eorpach a bheidh slán i bhfad na haimsire;

7.á mheas gur freagracht shóisialta de chuid an Aontais agus na mBallstát é na cáilíochtaí is gá a chur ar fáil do na hoibrithe sin a cuireadh ar iomarcaíocht le haghaidh geilleagar Eorpach a sheasfaidh an aimsir agus a bhainfidh an claochlú digiteach agus glas amach; á mheas, dá bhrí sin, gur gá slógadh CED a leabú i bhfreagairt bheartais níos mó;

8.á iarraidh go ndéanfaí meastóireachtaí deiridh críochnúla ar na bearta a cuireadh chun feidhme, lena n-ionchorpraítear sonraí maidir le líon na n-oibrithe atá athimeasctha go rathúil san fhostaíocht chomh maith leo siúd a bhfuil bearta oiliúna agus uasoiliúna curtha i gcrích acu;

9.ag tabhairt dá haire, amhail ón 20 Feabhra 2025, gur tugadh 915 chonradh thríthaobhacha san iomlán i gcrích idir Goodyear, na fostaithe, agus PMB International GmbH, an soláthraí seirbhíse a roghnaíodh chun an chuideachta aistrithe a bhainistiú, agus 781 iontráil sceidealaithe do Fulda agus 134 iontráil beartaithe do Hanau; á chur in iúl gur geal léi an léiriú go bhfuiltear ag dréim leis go dtiocfaidh méadú ar na huimhreacha sin de réir mar a shíneofar níos mó comhaontuithe;

10.ag tabhairt dá haire gur thosaigh an Ghearmáin ar sheirbhísí pearsantaithe a sholáthar do na tairbhithe spriocdhírithe an 1 Samhain 2024 agus, dá bhrí sin, gur ón dáta sin go dtí 24 mhí tar éis theacht i bhfeidhm an chinnidh a ghabhann leis an rún seo a bheidh tréimhse na hincháilitheachta le haghaidh ranníocaíocht airgeadais ó CED;

11.ag tabhairt dá haire gur thosaigh an Ghearmáin ag tabhú caiteachas riaracháin chun CED a chur chun feidhme an 1 Samhain 2024 agus, dá bhrí sin, go mbeidh an caiteachas sin incháilithe le haghaidh ranníocaíocht airgeadais ó CED ón dáta sin go dtí 31 mhí tar éis theacht i bhfeidhm an chinnidh a ghabhann leis an rún seo;

12.á chur i bhfáth gur thug údaráis na Gearmáine dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

13.á mheabhrú go n-aithníonn údaráis na Gearmáine tionscnamh chistiú an Aontais agus go n-áirithíonn siad infheictheacht an chistithe sin, agus béim á leagan ar bhreisluach an Aontais; á chur i bhfáth gur cheart é sin a bhaint amach trí bhearta faisnéise spriocdhírithe lena dtabharfar aghaidh ar thairbhithe, ar chomhpháirtithe sóisialta agus ar na meáin;

14.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar chuideachtaí, de bhua an dlí náisiúnta nó comhaontuithe comhchoiteanna;

15.á chur i bhfáth go bhfuil géarghá le hiarrachtaí comhleanúnacha agus comhordaithe iomaíochais an Aontais, arna bhforbairt i ndlúthchomhar leis na Ballstáit, chun bonn fostaíochta tionsclaíoch agus slándáil shóisialta na hEorpa a choimirciú; á chur i bhfios go láidir nach féidir ach le geilleagar Eorpach láidir agus athléimneach iomarcaíochtaí ar mórscála a chosc go héifeachtach, rud a laghdóidh an gá atá le hidirghabháil CED sa chéad áit;

16.ag formheas an chinnidh a ghabhann leis an rún seo;

17.á threorú dá hUachtarán an cinneadh a shíniú le hUachtarán na Comhairle agus socrú a dhéanamh dá fhoilsiú in Iris Oifigiúil an Aontais Eorpaigh;

18.á threorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.