1.Jaqbel mal-Kummissjoni li l-kundizzjonijiet stabbiliti fl-Artikolu 4(2), il-punt (a), tar-Regolament dwar il-FEG huma ssodisfati u li l-Ġermanja hija intitolata għal kontribuzzjoni finanzjarja ta’ EUR 3 085 166 skont dak ir-Regolament, somma li tirrappreżenta 60 % tal-ispiża totali ta’ EUR 5 141 944, liema spiża tinkludi n-nefqa għal servizzi personalizzati ta’ EUR 4 936 274 u n-nefqa għal attivitajiet ta’ tħejjija, ta’ ġestjoni, ta’ informazzjoni u ta’ pubbliċità, ta’ kontroll u ta’ rapportar ta’ EUR 205 670;

2.Jinnota li l-awtoritajiet Ġermaniżi ppreżentaw l-applikazzjoni fl-10 ta’ Marzu 2025, u li, wara l-għoti ta’ informazzjoni addizzjonali mill-Ġermanja, il-Kummissjoni ffinalizzat il-valutazzjoni tagħha fid-29 ta’ Lulju 2025, aktar minn erba’ xhur wara, u l-Parlament ġie notifikat fis-26 ta’ Awwissu 2025;

3.Jinnota li l-applikazzjoni hija relatata mal-1 171 ħaddiem issensjat affettwat mill-għeluq tas-sit tal-produzzjoni f’Fulda u l-għeluq parzjali tal-faċilitajiet tal-produzzjoni f’Hanau; jinnota wkoll li total ta’ 915-il ħaddiem issensjat se jkunu benefiċjarji fil-mira u huma mistennija jipparteċipaw fil-miżuri;

4.Jieħu nota li l-biċċa l-kbira tal-ħaddiema ssensjati għandhom livell baxx ta’ edukazzjoni (56 % b’edukazzjoni sekondarja tal-ewwel livell jew anqas) u għandhom 54 sena jew aktar (42 %); jissottolinja li l-ħaddiema akbar fl-età b’mod partikolari jikkostitwixxu grupp vulnerabbli ħafna, li jaffaċċja ostakli sinifikanti għall-impjieg mill-ġdid minħabba opportunitajiet limitati għat-titjib tal-ħiliet u t-taħriġ mill-ġdid;

5.Jirrimarka li s-sensji tal-Goodyear żiedu r-rata annwali tal-qgħad fir-reġjun ta’ Fulda b’aktar minn 10 %, b’impatt sproporzjonat fuq il-ħaddiema rġiel u l-individwi li għandhom aktar minn 50 sena, li l-kwalifiki u settijiet ta’ ħiliet tagħhom mhumiex rilevanti li huma allinjati ħażin mad-domandi attwali tas-suq tax-xogħol; jisħaq li hija meħtieġa azzjoni rapida biex jiġi evitat tnaqqis strutturali reġjonali u jenfasizza l-importanza li jitrawmu impjiegi ta’ kwalità għolja u orjentati lejn il-futur biex tiġi żgurata reżiljenza ekonomika u soċjali fit-tul;

6.Ifakkar li s-servizzi personalizzati li jridu jiġu pprovduti lill-ħaddiema jikkonsistu mill-azzjonijiet li ġejjin: miżuri sostanzjali ta’ titjib tal-ħiliet jew ta’ taħriġ mill-ġdid, gwida u konsulenza u miżuri ta’ orjentazzjoni u attivazzjoni vokazzjonali, servizzi u għotjiet ta’ konsulenza għall-intrapriżi start-up, għajnuna għat-tfittix ta’ impjieg, inċentivi għat-titjib tal-ħiliet u għal żidiet, allowances għat-taħriġ, taħriġ fil-ħiliet diġitali; jenfasizza f’dan il-kuntest li forza tax-xogħol imħarrġa sew hija essenzjali għal ekonomija Ewropea li tibqa’ valida fil-futur;

7.Iqis li hija responsabbiltà soċjali tal-Unjoni u tal-Istati Membri li jipprovdu lill-ħaddiema li ngħataw is-sensja l-kwalifiki meħtieġa għal ekonomija Ewropea li tibqa’ valida fil-futur li twettaq it-trasformazzjoni diġitali u ekoloġika; iqis għalhekk li l-mobilizzazzjoni tal-FEG jeħtieġ li tiġi inkorporata f’reazzjoni politika akbar;

8.Jitlob li jsiru evalwazzjonijiet finali bir-reqqa tal-miżuri implimentati, li jinkorporaw data dwar l-għadd ta’ ħaddiema integrati mill-ġdid b’suċċess fl-impjieg kif ukoll dawk li lestew il-miżuri ta’ taħriġ u titjib tal-ħiliet;

9.Jinnota li mill-20 ta’ Frar 2025, ġew konklużi total ta’ 915-il kuntratt tripartitiku bejn Goodyear, l-impjegati, u PMB International GmbH, il-fornitur ta’ servizzi magħżul biex jiġġestixxi l-kumpanija ta’ trasferiment, b’781 persuna pjanata għal Fulda u 134 għal Hanau; jilqa’ l-indikazzjoni li dawn in-numri mistennija jiżdiedu hekk kif jiġu ffirmati aktar ftehimiet;

10.Jinnota li l-Ġermanja bdiet toffri servizzi personalizzati lill-benefiċjarji fil-mira fl-1 ta’ Novembru 2024 u li, għalhekk, il-perjodu ta’ eliġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni annessa ma’ din ir-riżoluzzjoni;

11.Jinnota li l-Ġermanja bdiet iġġarrab nefqa amministrattiva biex timplimenta l-FEG fl-1 ta’ Novembru 2024 u li, għalhekk, tali nefqa għandha tkun eliġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni annessa ma’ din ir-riżoluzzjoni;

12.Jisħaq li l-awtoritajiet Ġermaniżi pprovdew aċċertament li l-prinċipji tat-trattament ugwali u tan-nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li kwalunkwe finanzjament doppju se jiġi evitat;

13.Ifakkar li l-awtoritajiet Ġermaniżi jirrikonoxxu l-oriġini tal-finanzjament tal-Unjoni u jiżguraw il-viżibbiltà tiegħu, filwaqt li jenfasizzaw il-valur miżjud tal-Unjoni; jenfasizza li dan għandu jinkiseb permezz ta’ miżuri ta’ informazzjoni mmirati li jindirizzaw il-benefiċjarji, is-sħab soċjali u l-midja;

14.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-kumpaniji, bis-saħħa tal-leġiżlazzjoni nazzjonali jew ta’ ftehimiet kollettivi;

15.Jisħaq fuq il-ħtieġa urġenti ta’ sforzi koerenti u kkoordinati għall-kompetittività tal-Unjoni, żviluppati fi sħubija mill-qrib mal-Istati Membri, sabiex jiġu ssalvagwardjati l-bażi tal-impjiegi industrijali u s-sigurtà soċjali tal-Ewropa; jissottolinja li ekonomija Ewropea robusta u reżiljenti biss tista’ tipprevjeni b’mod effettiv is-sensji fuq skala kbira, u b’hekk qabelxejn tnaqqas il-ħtieġa ta’ intervent tal-FEG;

16.Japprova d-deċiżjoni annessa ma’ din ir-riżoluzzjoni;

17.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata fil-Ġurnal Uffiċjali tal-Unjoni Ewropea;

18.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.