1.ag aontú leis an gCoimisiún go bhfuil na coinníollacha a leagtar amach in Airteagal 4(2), pointe (a), de Rialachán CED comhlíonta agus go bhfuil an Bheilg i dteideal EUR 931 690 de ranníocaíocht airgeadais a fháil faoin Rialachán sin, arb ionann í agus 85 % den chostas iomlán de EUR 1 096 107, a chuimsíonn EUR 1 052 607 de chaiteachas ar sheirbhísí pearsantaithe agus EUR 43 500 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.ag tabhairt dá haire gur chuir údaráis na Beilge an t-iarratas isteach an 21 Feabhra 2025, agus, tar éis don Bheilg faisnéis bhreise a chur ar fáil, gur chuir an Coimisiún bailchríoch ar a mheasúnú an 7 Iúil 2025, nach mór 5 mhí ina dhiaidh sin, agus gur thug sé fógra do Pharlaimint na hEorpa faoi an 26 Lúnasa 2025; á chur i bhfáth a thábhachtaí atá sé an t-am idir cur isteach iarratais ar chúnamh CED agus an cinneadh maoiniúcháin a laghdú; á chur i bhfios go láidir gur gá nósanna imeachta inmheánacha a shimpliú agus dlús a chur leo gan an bonn a bhaint ó chothromaíocht institiúideach, go háirithe cearta Pharlaimint na hEorpa mar údarás buiséadach;

3.ag tabhairt dá haire go mbaineann an t-iarratas le 417 dtairbhí spriocdhírithe, a cuireadh ar iomarcaíocht sa chuideachta BelGaN;

4.á chur i bhfios gur bhrúigh iomarcaíochtaí BelGaN an ráta dífhostaíochta bliantúil go + 9 % i gcríoch Oudenaarde, go háirithe i measc na n-oibrithe dífhostaithe ardoilte agus meánoilte; ag tabhairt dá haire, ag an am céanna, gur tháinig laghdú 22 % ar na folúntais post sa cheantar, mar gheall ar mhéadú suntasach ar líon na bhfiontar a rinne iarratas ar fhéimheacht le 3 bliana anuas;

5.á mheabhrú gurb iad na gníomhaíochtaí seo a leanas atá sna seirbhísí pearsantaithe atá le soláthar d’oibrithe: seisiúin faisnéise, socrúchán seachtrach, oiliúint agus athoiliúint, oiliúint san ionad oibre, aonach fostaíochta, cúnamh chun post a chuardach, scabhtáil fostaíochta agus meaitseáil poist agus é mar chuspóir a chur ar chumas oibrithe dul isteach arís sa mhargadh saothair a luaithe is féidir, scileanna agus oiliúint ardcháilíochta a thabhairt dóibh atá ábhartha d’fhostóirí ionchasacha san earnáil, agus a gcumas tionscnaimh fiontraíochta agus tionscadail nua a fhorbairt á chothú ag an am céanna; á chur i bhfáth, sa chomhthéacs sin, go bhfuil lucht saothair dea-oilte ríthábhachtach do gheilleagar Eorpach a sheasfaidh an aimsir;

6.á iarraidh go ndéanfaí meastóireachtaí críochnaitheacha cuimsitheacha ar na bearta a cuireadh chun feidhme, lena n-áirítear sonraí maidir le líon na n-oibrithe a ath-imeascadh go rathúil san fhostaíocht agus aiseolas ó thairbhithe maidir le cáilíocht agus ábharthacht na tacaíochta a chuirtear ar fáil;

7.ag tabhairt dá haire gur thosaigh an Bheilg ar sheirbhísí pearsantaithe a sholáthar do na tairbhithe spriocdhírithe an 8 Lúnasa 2024 agus, dá bhrí sin, gur ón dáta sin go dtí 24 mhí tar éis theacht i bhfeidhm an chinnidh a ghabhann leis an rialachán seo a bheidh tréimhse na hincháilitheachta le haghaidh ranníocaíocht airgeadais ó CED;

8.ag tabhairt dá haire gur thosaigh an Bheilg ag tabhú caiteachas riaracháin chun CED a chur chun feidhme an 31 Iúil 2024 agus, dá bhrí sin, go mbeidh an caiteachas sin incháilithe le haghaidh ranníocaíocht airgeadais ó CED ón dáta sin go dtí 31 mhí tar éis theacht i bhfeidhm an chinnidh a ghabhann leis an rialachán seo;

9.á chur i bhfáth gur thug údaráis na Beilge dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

10.ag cur béim ar an bhfíoras gur gá aitheantas agus infheictheacht shoiléir chistiú an Aontais a áirithiú chun aird a tharraingt ar a bhreisluach; á iarraidh go ndéanfaí cumarsáid chomhsheasmhach agus spriocdhírithe le tairbhithe, le húdaráis réigiúnacha agus áitiúla, le comhpháirtithe sóisialta, leis na meáin agus leis an bpobal i gcoitinne;

11.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar chuideachtaí, de bhua an dlí náisiúnta nó comhaontuithe comhchoiteanna;

12.ag formheas an chinnidh a ghabhann leis an rún seo;

13.á threorú dá hUachtarán an cinneadh a shíniú le hUachtarán na Comhairle agus socrú a dhéanamh dá fhoilsiú in Iris Oifigiúil an Aontais Eorpaigh;

14.á threorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.