1.Jaqbel mal-Kummissjoni li l-kundizzjonijiet stabbiliti fl-Artikolu 4(2), il-punt (a), tar-Regolament tal-FEG huma ssodisfati u li l-Belġju huwa intitolat għal kontribuzzjoni finanzjarja ta’ EUR 931 690 skont dak ir-Regolament, somma li tirrappreżenta 85 % tal-kost totali ta’ EUR 1 096 107, li tinkludi n-nefqa għal servizzi personalizzati ta’ EUR 1 052 607 u n-nefqa għall-attivitajiet ta’ tħejjija, ġestjoni, informazzjoni u pubbliċità, kontroll u rapportar ta’ EUR 43 500;

2.Jinnota li l-awtoritajiet Belġjani ressqu l-applikazzjoni fil-21 ta’ Frar 2025, u li, wara li l-Belġju ta informazzjoni addizzjonali, il-Kummissjoni ffinalizzat il-valutazzjoni tagħha fis-7 ta’ Lulju 2025 u nnotifikatha lill-Parlament fis-26 ta’ Awwissu 2025; jenfasizza l-importanza li jitnaqqas iż-żmien bejn is-sottomissjoni ta’ applikazzjoni għal assistenza mill-FEG u d-deċiżjoni ta’ finanzjament; jissottolinja l-ħtieġa li jiġu ssimplifikati u aċċellerati l-proċeduri interni mingħajr ma jiġi mminat il-bilanċ istituzzjonali, b’mod partikolari d-drittijiet tal-Parlament Ewropew bħala awtorità baġitarja;

3.Jinnota li l-applikazzjoni hija relatata ma’ 417-il ħaddiem li ngħataw is-sensja fil-kumpanija TNT BelGaN;

4.Jirrimarka li s-sensji ta’ BelGaN wasslu r-rata tal-qgħad annwali għal + 9 % fit-territorju ta’ Oudenaarde, b’mod partikolari fost il-ħaddiema qiegħda b’livell għoli u medju ta’ ħiliet; jinnota li, fl-istess ħin, l-opportunitajiet ta’ impjieg fiż-żona naqsu bi 22 %, minħabba żieda kunsiderevoli fl-għadd ta’ intrapriżi li ddikjaraw falliment matul l-aħħar tliet snin;

5.Ifakkar li s-servizzi personalizzati li jridu jiġu pprovduti lill-ħaddiema jikkonsistu mill-azzjonijiet li ġejjin: sessjonijiet ta’ informazzjoni, rikollokament, taħriġ u taħriġ mill-ġdid, taħriġ fuq il-post tax-xogħol, fiera tal-impjiegi, għajnuna għat-tfittix ta’ impjieg, u tqabbil tal-impjiegi bl-għan li l-ħaddiema jkunu jistgħu jerġgħu jidħlu fis-suq tax-xogħol malajr kemm jista’ jkun, billi jiġu mgħammra b’ħiliet u taħriġ ta’ kwalità għolja rilevanti għal impjegaturi prospettivi fis-settur, filwaqt li fl-istess ħin titrawwem il-kapaċità tagħhom li jiżviluppaw inizjattivi intraprenditorjali u proġetti ġodda; jenfasizza f’dan il-kuntest li forza tax-xogħol imħarrġa sew hija essenzjali għal ekonomija Ewropea li tibqa’ valida fil-futur;

6.Jitlob evalwazzjonijiet finali komprensivi tal-miżuri implimentati, inkluża data dwar l-għadd ta’ ħaddiema integrati mill-ġdid b’suċċess fl-impjieg u feedback mill-benefiċjarji dwar il-kwalità u r-rilevanza tal-appoġġ ipprovdut;

7.Jinnota li l-Belġju beda joffri servizzi personalizzati lill-benefiċjarji fil-mira fit-8 ta’ Awwissu 2024 u li, għalhekk, il-perjodu ta’ eleġibbiltà għal kontribuzzjoni finanzjarja mill-FEG se jkun minn dik id-data sa 24 xahar wara d-data tad-dħul fis-seħħ tad-deċiżjoni annessa ma’ din ir-riżoluzzjoni;

8.Jinnota li l-Belġju beda jassumi nefqa amministrattiva biex jimplimenta l-FEG fil-31 ta’ Lulju 2024 u li, għalhekk, tali nefqa għandha tkun eleġibbli għal kontribuzzjoni finanzjarja mill-FEG minn dik id-data sa 31 xahar wara d-data tad-dħul fis-seħħ tad-deċiżjoni annessa ma’ din ir-riżoluzzjoni;

9.Jisħaq li l-awtoritajiet Belġjani taw l-assikurazzjoni li l-prinċipji tat-trattament ugwali u tan-nondiskriminazzjoni se jiġu rispettati fl-aċċess għall-azzjonijiet proposti u fl-implimentazzjoni tagħhom, u li se ssir prevenzjoni għal finanzjament doppju;

10.Jenfasizza l-ħtieġa li jiġu żgurati rikonoxximent u viżibbiltà ċari tal-finanzjament tal-Unjoni biex jiġi enfasizzat il-valur miżjud tiegħu; jappella għal komunikazzjoni konsistenti u mmirata tajjeb lill-benefiċjarji, lill-awtoritajiet reġjonali u lokali, lis-sħab soċjali, lill-midja, u lill-pubbliku ġenerali;

11.Itenni li l-għajnuna mill-FEG ma tridx tissostitwixxi azzjonijiet li huma r-responsabbiltà tal-kumpaniji, bis-saħħa tal-leġiżlazzjoni nazzjonali jew ta’ ftehimiet kollettivi;

12.Japprova d-deċiżjoni annessa ma’ din ir-riżoluzzjoni;

13.Jagħti istruzzjonijiet lill-President tiegħu biex jiffirma din id-deċiżjoni flimkien mal-President tal-Kunsill u biex jiżgura li tiġi ppubblikata f’Il-Ġurnal Uffiċjali tal-Unjoni Ewropea;

14.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.