A.billi fis-27 ta’ Jannar 2023, Corteva Agriscience Belgium B.V., ibbażata fil-Belġju, f’isem Corteva Agriscience LLC, ibbażata fl-Istati Uniti, ippreżentat applikazzjoni lill-awtorità nazzjonali kompetenti tan-Netherlands għat-tqegħid fis-suq ta’ ikel, ingredjenti tal-ikel u għalf li fihom il-qamħirrum ġenetikament modifikat DP51291, li jikkonsistu minnu, jew li huma prodotti minnu (il-“qamħirrum ĠM”);

B.billi l-qamħirrum ĠM jipproduċi t-tossina IPD072Aa biex taġixxi kontra d-dudu tal-għeruq tal-qamħirrum, il-proteina fosfinotrikina aċetiltransferażi (PAT) għat-tolleranza għall-erbiċidi li fihom il-glufosinat u l-proteina PMI bħala markatur li jista’ jintgħażel;

C.billi l-glufosinat, li jitqies bħala erbiċida komplementari, huwa kklassifikat bħala sustanza tossika għar-riproduzzjoni fil-kategorija 1B u għalhekk jissodisfa l-“kriterji ta’ limitu” stabbiliti fir-Regolament (KE) Nru 1107/2009 tal-Parlament Ewropew u tal-Kunsill Ir-Regolament (KE) Nru 1107/2009 tal-Parlament Ewropew u tal-Kunsill tal-21 ta’ Ottubru 2009 dwar it-tqegħid fis-suq ta’ prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (ĠU L 309, 24.11.2009, p. 1, ELI: http://data.europa.eu/eli/reg/2009/1107/oj).; billi l-approvazzjoni għall-użu tal-glufosinat fl-Unjoni skadiet fil-31 ta’ Lulju 2018;

D.billi IPD072Aa hija tossina insettiċida prodotta mill-batterju Pseudomonas chlororaphis, maħdum biex jaġixxi kontra d-dudu tal-għeruq tal-qamħirrum;

Inġinerija ġenetika kumplessa

E.billi l-qamħirrum DP51291 ġie żviluppat permezz ta’ proċess kumpless u f’diversi stadji tal-inġinerija ġenetika li jinvolvi l-ħolqien ta’ “pad għall-inżul” ġenomiku, segwit minn kobombardament ta’ mikroprojettili bl-użu ta’ ħames plażmidi, u l-inserzjoni sussegwenti medjata mill-Agrobacterium tumefaciens ta’ cassettes ta’ espressjoni fil-pad għall-inżul;

F.billi dan il-proċess ta’ modifika ġenetika rriżulta fit-tħassir ta’ 113-il par bażi ta’ DNA ġenomiku tal-qamħirrum, kif żvelat mill-analiżi bijoinformatika, u wassal għall-formazzjoni ta’ diversi kwadri ta’ qari miftuħ (ORFs) miftuħa, li jindikaw perturbazzjonijiet ġenomiċi potenzjali li jirriżultaw mill-proċedura ta’ trasformazzjoni; billi ħamsa minn dawn l-ORFs urew identità ta’ sekwenza akbar minn 35 % għal allerġeni magħrufa, u b’hekk qabżu l-limitu użat b’mod komuni fil-valutazzjonijiet tal-allerġeniċità https://www.testbiotech.org/wp-content/uploads/2024/12/Testbiotech_comment_‌maize_DP51291.pdf.;

Nuqqas ta’ data dwar il-prattiki agrikoli u l-fatturi ambjentali

G.billi r-Regolament ta’ Implimentazzjoni tal-Kummissjoni (UE) Nru 503/2013 Ir-Regolament ta’ Implimentazzjoni tal-Kummissjoni (UE) Nru 503/2013 tat-3 ta’ April 2013 dwar applikazzjonijiet għal awtorizzazzjoni ta’ ikel u għalf ġenetikament modifikat skont ir-Regolament (KE) Nru 1829/2003 tal-Parlament Ewropew u tal-Kunsill u li jemendaw ir-Regolamenti (KE) Nru 641/2004 u (KE) Nru 1981/2006 (ĠU L 157, 8.6.2013, p. 1, ELI: http://data.europa.eu/eli/reg_impl/2013/503/oj). jirrikjedi valutazzjoni dwar jekk il-prattiki agrikoli mistennija jinfluwenzawx l-eespressjoni tal-punti tat-tmiem studjati; billi, skont dak ir-Regolament ta’ Implimentazzjoni, dan huwa speċjalment rilevanti għal pjanti tolleranti għall-erbiċidi;

H.billi l-fatturi ta’ stress ambjentali, bħan-nixfa jew l-estremitajiet tat-temperatura, jistgħu jwasslu għal xejriet mhux mistennija ta’ espressjoni tal-ġeni f’sekwenzi tad-DNA li jkunu għadhom kif iddaħħlu Trtikova, M., Wikmark O. G., Zemp, N., Widmer, A., Hilbeck, A., (2015) “Transgene Expression and Bt Protein Content in Transgenic Bt Maize (MON810) under Optimal and Stressful Environmental Conditions” (L-Espressjoni Transġene u l-Kontenut tal-Proteina Bt f’Qamħirrum Bt Transġeniku (MON810) f’Kundizzjonijiet Ambjentali Ottimali u ta’ Stress), PLoS ONE 10 (4): e0123011, https://doi.org/10.1371/journal.pone.0123011.;

I.billi l-provi fuq il-post użati biex jappoġġjaw l-analiżi kompożizzjonali u fenotipika tal-qamħirrum ĠM twettqu matul staġun wieħed tat-tkabbir (2021) fl-Istati Uniti u fil-Kanada f’kundizzjonijiet tat-temp li ma jirrappreżentawx b’mod adegwat id-diversità tar-reġjuni li jkabbru l-qamħirrum, b’mod partikolari f’pajjiżi bħall-Brażil;

J.billi ġew irrappurtati avvenimenti estremi tat-temp f’xi postijiet ta’ prova; billi ma saret l-ebda investigazzjoni speċifika biex jiġu vvalutati l-kundizzjonijiet futuri influwenzati mit-tibdil fil-klima li għaddej bħalissa;

K.billi l-glufosinat, ġie applikat darba biss matul il-provi fuq il-post, b’segwitu tar-rakkomandazzjonijiet tad-dożaġġ tal-EFSA; billi, madankollu, fil-prattiki agrikoli tad-dinja reali, ir-rati u l-frekwenzi tal-applikazzjoni tal-erbiċidi spiss ivarjaw b’mod sinifikanti skont ir-reġjun u jistgħu jinvolvu użu ogħla jew ripetut, li jfisser li d-data tal-prova fuq il-post tista’ ma tirriflettix biżżejjed il-firxa sħiħa ta’ kundizzjonijiet ambjentali u agrikoli li skonthom il-qamħirrum ĠM x’aktarx li jiġi kkultivat jew importat;

Nuqqas ta’ valutazzjoni tal-glufosinat

L.billi l-glufosinat huwa assoċjat ma’ riskji sinifikanti għall-bijodiversità, it-tossiċità, u s-saħħa tal-ekosistema fit-tul;

M.billi l-maġġoranza l-kbira tal-għelejjel ĠM ġew ġenetikament modifikati sabiex ikunu tolleranti għal erbiċida “komplementari” waħda jew aktar li jistgħu jintużaw matul il-kultivazzjoni tal-għalla ĠM, mingħajr ma l-għalla tmut, kif ikun il-każ għal għalla mhux tolleranti għall-erbiċidi; billi hemm għadd ta’ studji li juru li l-għelejjel ĠM tolleranti għall-erbiċidi jirriżultaw f’użu akbar ta’ erbiċidi komplementari, fil-biċċa l-kbira minħabba li jfeġġ ħaxix ħażin tolleranti għall-erbiċidi Ara, pereżempju, Schulz, R., Bub, S., Petschick, L. L., Stehle, S., Wolfram, J. (2021) “Applied pesticide toxicity shifts toward plants and invertebrates, even in GM crops” (It-tossiċità tal-pestiċidi applikata tiċċaqlaq lejn pjanti u invertebrati, anke fl-għelejjel ĠM), Science 372 (6537), pp. 81-84, https://doi.org/10.1126/science.abe1148; Bonny, S., “Genetically Modified Herbicide-Tolerant Crops, Weeds, and Herbicides: Overview and Impact” (Għelejjel Tolleranti għall-Erbiċida, Ħaxix Ħażin u Erbiċidi Ġenetikament Modifikati: Ħarsa ġenerali u Impatt), Environmental Management, Jannar 2016;57 (1), pp. 31-48, https://www.ncbi.nlm.nih.gov/pubmed/26296738; u Benbrook, C. M., “Impacts of genetically engineered crops on pesticide use in the U.S. - the first sixteen years” (Impatti tal-għelejjel maħduma ġenetikament fuq l-użu tal-pestiċidi fl-Istati Uniti - l-ewwel sittax-il sena), Environmental Sciences Europe, 28 ta’ Settembru 2012, Vol. 24(24), https://doi.org/10.1186/2190-4715-24-24.;

N.billi l-għelejjel ĠM tolleranti għall-erbiċidi jillimitaw lill-bdiewa f’sistema ta’ ġestjoni tal-ħaxix ħażin li hija fil-biċċa l-kbira jew kompletament dipendenti mill-erbiċidi, u tagħmel dan billi titlob premium għaż-żrieragħ ĠM li jista’ jiġi ġġustifikat biss jekk il-bdiewa li jixtru tali żrieragħ ibexxu wkoll l-erbiċidi komplementari; billi dipendenza akbar fuq erbiċidi komplementari fuq azjendi agrikoli li jħawlu l-għelejjel ĠM se tħaffef il-ħruġ mill-ġdid u t-tixrid ta’ ħaxix ħażin reżistenti għal dawk l-erbiċidi, u b’hekk tiskatta l-ħtieġa ta’ aktar użu ta’ erbiċidi, ċirku vizzjuż magħruf bħala “l-ispirall tal-erbiċidi”;

O.billi l-impatti negattivi li jirriżultaw mid-dipendenza eċċessiva fuq l-erbiċidi se jaggravaw fir-rigward tas-saħħa tal-ħamrija, il-kwalità tal-ilma, u l-bijodiversità ta’ fuq u ta’ taħt l-art, u jwasslu għal żieda fl-esponiment tal-bniedem u tal-annimali, potenzjalment ukoll permezz ta’ żieda fir-residwi tal-erbiċidi fl-ikel u l-għalf;

P.billi l-valutazzjoni tar-residwi ta’ erbiċidi u tal-metaboliti misjuba fi pjanti ĠM titqies li ma taqax taħt il-kompetenza tal-Bord tal-EFSA dwar Organiżmi Ġenetikament Modifikati (“il-Bord tal-EFSA dwar l-OĠM”) u għalhekk ma ssirx bħala parti mill-proċess ta’ awtorizzazzjoni għall-OĠM;

Kwistjonijiet pendenti li jikkonċernaw it-tossina IPD072Aa

Q.billi r-Regolament ta’ Implimentazzjoni (UE) Nru 503/2013 jirrikjedi valutazzjoni tossikoloġika biex jintwera li l-effetti maħsuba ta’ modifika ġenetika ma jinvolvux effetti negattivi fuq is-saħħa tal-bniedem u tal-annimali;

R.billi IPD072Aa hija proteina ġdida, li jfisser li l-użu tagħha fl-agrikoltura u l-introduzzjoni tagħha fil-katina alimentari ma jistgħux jiddependu bis-sħiħ mill-esperjenza miksuba qabel;

S.billi, minkejja d-differenzi, is-similaritajiet osservati bejn IPD072Aa u t-tossini Bt jenfasizzaw il-ħtieġa ta’ kunsiderazzjoni bir-reqqa fil-proċess tal-valutazzjoni tar-riskju; billi diversi studji indikaw li t-tossini Bt jistgħu jikkawżaw effetti sekondarji relatati mal-immunità, inklużi proprjetajiet aġġuvanti potenzjali Għal rieżami, ara Rubio-Infante, N., Moreno-Fierros, L., “An overview of the safety and biological effects of Bacillus thuringiensis Cry toxins in mammals” (Ħarsa ġenerali lejn is-sikurezza u l-effetti bijoloġiċi tat-tossini tal-Cry Bacillus thuringiensis fil-mammiferi), Journal of Applied Toxicology, Mejju 2016, 36(5), pp. 630-648, https://onlinelibrary.wiley.com/doi/full/10.1002/jat.3252., li jfisser li jistgħu jżidu l-allerġeniċità ta’ proteini oħra li jiġu f’kuntatt magħhom;

T.billi studju xjentifiku sab li t-tossiċità tat-tossini Bt tista’ tissaħħaħ ukoll permezz ta’ interazzjoni mar-residwi mill-bexx bl-erbiċidi, u li huma meħtieġa aktar studji dwar l-effetti kombinatorji ta’ events ta’ trasformazzjoni multipli (għelejjel ĠM li ġew immodifikati biex ikunu tolleranti għall-erbiċidi u jipproduċu insettiċidi fil-forma ta’ tossini Bt) Bøhn, T., Macagnan Rover, C., Semenchuk, P. R., “Daphnia magna negatively affected by chronic exposure to purified Cry-toxins” (Daphnia magna affettwata negattivament minn esponiment kroniku għal tossini Cry purifikati), Food and Chemical Toxicology, Mejju 2016, Volum 91, pp. 130-140, https://doi.org/10.1016/j.fct.2016.03.009.; billi l-valutazzjoni tal-interazzjoni potenzjali ta’ residwi tal-erbiċidi u l-metaboliti tagħhom mat-tossini Bt titqies, madankollu, li ma taqax taħt il-kompetenza tal-Bord tal-EFSA dwar l-OĠM u għalhekk ma ssirx bħala parti mill-valutazzjoni tar-riskju;

U.billi l-valutazzjoni tat-tossiċità ta’ IPD072Aa ma tqisx l-effetti sinerġistiċi jew kumulattivi potenzjali li jirriżultaw mill-interazzjonijiet mal-metaboliti tal-pjanti jew mar-residwi tal-erbiċidi;

V.billi ma ġiet ipprovduta l-ebda data dwar l-akkumulazzjoni ta’ IPD072Aa fix-xbieki alimentari, it-tixrid ambjentali tagħha, b’mod partikolari permezz tal-ilma mormi u d-demel fil-ħamrija u l-ekosistemi akkwatiċi, jew l-effetti tagħha fuq organiżmi mhux fil-mira;

W.billi l-potenzjal għall-fluss tal-ġeni lejn qraba selvaġġi bħat-teosinte, irrapportat fi Spanja u fi Franza, iqajjem tħassib dwar il-persistenza tat-transġene fl-ambjent u l-konsegwenzi ekoloġiċi possibbli tiegħu Trtikova, M., Lohn, A., Binimelis, R., Chapela, I., Oehen, B., Zemp, N., Widmer, A., Hilbeck, A., (2017), “Teosinte in Europe – Search for the Origin of a Novel Weed” (It-Teosinte fl-Ewropa – Tfittxija għall-Oriġini ta’ Ħaxix Ħażin Ġdid), Rapporti Xjentifiċi, 7: 1560, https://doi.org/10.1038/s41598-017-01478-w.;

X.billi r-rekwiżiti ta’ monitoraġġ stabbiliti fir-Regolament ta’ Implimentazzjoni (UE) Nru 503/2013 mhumiex infurzati biżżejjed, mingħajr ebda verifika indipendenti tad-data sottomessa minn Corteva Agriscience LLC;

L-iżgurar ta’ kundizzjonijiet ekwi globali u r-rispett tal-obbligi internazzjonali tal-Unjoni

Y. billi l-kultivazzjoni tal-qamħirrum ĠM mhijiex permessa fl-Unjoni; billi l-adozzjoni tad-Deċiżjoni ta’ Implimentazzjoni (UE) 2025/1898 tippermetti importazzjonijiet fl-Unjoni li ma jikkonformawx mal-istandards osservati mill-bdiewa tal-Unjoni, u b’hekk dan ipoġġihom fi żvantaġġ kompetittiv;

Z.billi l-konklużjonijiet tad-Djalogu Strateġiku dwar il-Futur tal-Agrikoltura fl-UE “Strategic Dialogue on the Future of EU Agriculture - A shared prospect for farming and food in Europe” (Djalogu Strateġiku dwar il-Futur tal-Agrikoltura tal-UE - Prospett kondiviż għall-biedja u għall-ikel fl-Ewropa), Settembru 2024, https://agriculture.ec.europa.eu/document/download/171329ff-0f50-4fa5-946f-aea11032172e_en?filename=strategic-dialogue-report-2024_en.pdf. jistiednu lill-Kummissjoni tivvaluta mill-ġdid l-approċċ tagħha dwar l-aċċess għas-suq għall-importazzjonijiet u l-esportazzjonijiet agroalimentari, minħabba l-isfida tal-istandards diverġenti tal-Unjoni u tas-sħab kummerċjali tagħha; billi relazzjonijiet kummerċjali aktar ġusti, fuq livell globali, konsistenti mal-miri għal ambjent b’saħħtu kienu waħda mit-talbiet ewlenin tal-bdiewa matul id-dimostrazzjonijiet tal-2023 u l-2024;

AA.billi rapport tal-2017 mir-Rapporteur Speċjali tan-Nazzjonijiet Uniti (NU) dwar id-dritt għall-ikel sab li, b’mod partikolari fil-pajjiżi li qed jiżviluppaw, il-pestiċidi perikolużi għandhom impatti katastrofiċi fuq is-saħħa https://www.ohchr.org/en/documents/thematic-reports/ahrc3448-report-special-rapporteur-right-food.; billi l-Mira 3.9 tal-Għan ta’ Żvilupp Sostenibbli (“SDG tan-NU”) tan-NU għandha l-għan li sal-2030 tnaqqas b’mod sostanzjali l-għadd ta’ mwiet u mard minn sustanzi kimiċi perikolużi u t-tniġġis u l-kontaminazzjoni tal-arja, tal-ilma u tal-ħamrija https://www.un.org/sustainabledevelopment/health/.;

AB.billi l-Qafas Globali tal-Bijodiversità ta’ Kunming-Montreal, li sar qbil fuqu fil-COP15 tal-Konvenzjoni tan-NU dwar id-Diversità Bijoloġika (“KDB tan-NU”) ta’ Diċembru 2022, jinkludi mira globali biex sal-2030 ir-riskju tal-pestiċidi jitnaqqas b’mill-anqas 50 % https://ec.europa.eu/commission/presscorner/detail/mt/ip_22_7834.;

AC.billi r-Regolament (KE) Nru 1829/2003 jiddikjara li l-ikel jew l-għalf ĠM ma jridx ikollu effetti negattivi fuq is-saħħa tal-bniedem, is-saħħa tal-annimali jew l-ambjent, u jirrikjedi li l-Kummissjoni tqis kwalunkwe dispożizzjoni rilevanti fid-dritt tal-Unjoni u fatturi leġittimi oħra rilevanti għall-kwistjoni taħt kunsiderazzjoni meta tkun qed tabbozza d-deċiżjoni tagħha; billi tali fatturi leġittimi għandhom jinkludu l-obbligi tal-Unjoni skont l-SDGs tan-NU u l-KDB tan-NU;

It-tnaqqis tad-dipendenza fuq l-għalf importat

AD.billi waħda mit-tagħlimiet mill-kriżi tal-COVID-19 u l-gwerra li għadha għaddejja fl-Ukrajna hija l-ħtieġa li l-Unjoni ttemm id-dipendenzi fuq xi materjali kritiċi; billi fl-ittra ta’ missjoni lill-Kummissarju Christophe Hansen, il-President tal-Kummissjoni, Ursula von der Leyen, talbitu jfittex modi kif jitnaqqsu l-importazzjonijiet ta’ komoditajiet kritiċi https://commission.europa.eu/document/2c64e540-c07a-4376-a1da-368d289f4afe_en.;

Proċess deċiżjonali mhux demokratiku

AE.billi, fit-tmien leġiżlatura tiegħu, il-Parlament adotta total ta’ 36 riżoluzzjoni li joġġezzjonaw għall-introduzzjoni fis-suq ta’ OĠM għall-ikel u għall-għalf (33 riżoluzzjoni) u għall-kultivazzjoni ta’ OĠM fl-Unjoni (tliet riżoluzzjonijiet); billi, fid-disa’ mandat tiegħu, il-Parlament adotta 38 riżoluzzjoni li joġġezzjonaw għat-tqegħid tal-OĠM fis-suq u adotta 11-il riżoluzzjoni oħra li joġġezzjonaw għat-tqegħid tal-OĠM fis-suq diġà fl-għaxar terminu attwali;

AF.billi minkejja r-rikonoxximent tagħha stess tan-nuqqasijiet demokratiċi, in-nuqqas ta’ appoġġ mill-Istati Membri u l-oġġezzjonijiet tal-Parlament, il-Kummissjoni qed tkompli tawtorizza l-OĠM;

AG.billi mhija meħtieġa ebda bidla fil-liġi biex il-Kummissjoni tkun tista’ ma tawtorizzax l-OĠM meta ma jkunx hemm maġġoranza kwalifikata ta’ Stati Membri favur fil-Kumitat ta’ Appell Il-Kummissjoni “tista’”, u mhux “għandha”, tmexxi bl-awtorizzazzjoni jekk ma jkun hemm l-ebda maġġoranza kwalifikata ta’ Stati Membri favur fil-Kumitat ta’ Appell, skont l-Artikolu 6(3) tar-Regolament (UE) Nru 182/2011.;

AH.billi l-votazzjoni fit-13 ta’ Ġunju 2025 tal-Kumitat Permanenti dwar il-Pjanti, l-Annimali, l-Ikel u l-Għalf imsemmi fl-Artikolu 35 tar-Regolament (KE) Nru 1829/2003 ma tat l-ebda opinjoni, li jfisser li l-awtorizzazzjoni ma kinitx appoġġjata minn maġġoranza kwalifikata tal-Istati Membri https://food.ec.europa.eu/document/download/ee1a5aed-5303-4c32-bb59-813143a1df47_en?filename=sc_modif-genet_20250613_sum.pdf.; billi anki l-votazzjoni tal-15 ta’ Lulju 2025 tal-Kumitat ta’ Appell ma tat ebda opinjoni;