P10_TA(2025)0241Grupp Permanenti ta’ Esperti dwar il-Foresti u l-ForestrijaEmendi adottati mill-Parlament Ewropew fil-21 ta' Ottubru 2025 dwar il-proposta għal deċiżjoni tal-Parlament Ewropew u tal-Kunsill li temenda d-Deċiżjoni tal-Kunsill 89/367/KEE li tistabbilixxi Kumitat Forestrarju Permanenti (COM(2023)0727 – C9-0424/2023 – 2023/0410(COD)) Il-każ ġie mgħoddi lura għan-negozjati interistituzzjonali lill-kumitat responsabbli, skont l-Artikolu 60(4), ir-raba’ subparagrafu (A10-0175/2025).(Proċedura leġiżlattiva ordinarja: l-ewwel qari)Test propost mill-KummissjoniEmendaEmenda 1Proposta għal deċiżjoniPremessa 1a (ġdida)

(1a)It-Trattat dwar il-Funzjonament tal-Unjoni Ewropea (TFUE) ma jagħmel l-ebda referenza għal politika komuni tal-Unjoni dwar il-foresti, u skont il-prinċipju tas-sussidjarjetà, ir-responsabbiltà għall-foresti taqa’ fuq l-Istati Membri. Madankollu, it-TFUE jikkonferixxi fuq l-Unjoni kompetenzi kondiviżi, b’mod partikolari fil-qasam tal-ambjent, li jistgħu jinkludu inizjattivi li jaffettwaw il-foresti u l-forestrija.

Emenda 2Proposta għal deċiżjoniPremessa 2

(2)Il-kontribut usa’ tal-foresti għall-objettivi stabbiliti fil-Komunikazzjoni tal-Kummissjoni tal-11 ta’ Diċembru 2019 bit-titolu “il-Patt Ekoloġiku Ewropew”4 , inkluż għall-klima, għall-bijodiversità u għall-bijoekonomija sostenibbli jeħtieġ struttura ta’ governanza tal-foresti tal-Unjoni aktar inklużiva u kkoordinata aħjar li tirrifletti l-objettivi kollha tal-Komunikazzjoni tal-Kummissjoni tas-16 ta’ Lulju 2021 bit-titolu “Strateġija Ġdida tal-UE għall-Foresti għall-2030”5 u l-interkonnessjonijiet tagħhom.

(2)Il-kontribut tal-foresti għall-objettivi stabbiliti fil-Komunikazzjoni tal-Kummissjoni tal-11 ta’ Diċembru 2019 bit-titolu “il-Patt Ekoloġiku Ewropew”4, b’mod partikolari għall-klima, għall-bijodiversità kif ukoll għall-bijoekonomija jeħtieġ struttura ta’ governanza tal-foresti tal-Unjoni kkoordinata li tirrifletti, inter alia, l-objettivi tal-Komunikazzjoni tal-Kummissjoni tas-16 ta’ Lulju 2021 bit-titolu “Strateġija Ġdida tal-UE għall-Foresti għall-2030”5 u l-interkonnessjonijiet tagħhom, filwaqt li jiġi żgurat li dawk l-għanijiet il-ġodda jkollhom bażi legali ċara, ma jkunux f’kunflitt mal-kompetenzi nazzjonali u jkunu appoġġati minn valutazzjoni komprensiva tal-impatt tagħhom fuq is-settur tal-forestrija.

__________________

4 COM(2019)640 final.

5 COM(2021)527 final.

Emenda 3Proposta għal deċiżjoniPremessa 2a (ġdida)

(2a)Sa mit-twaqqif tiegħu, il-Kumitat Forestrarju Permanenti evolva f’korp ċentrali għall-iskambju ta’ informazzjoni bejn l-Istati Membri u mal-Kummissjoni dwar l-aspetti kollha relatati mal-foresti, il-ġestjoni tal-foresti u l-oqsma ta’ politika kollha relatati mal-foresti. Il-Kumitat Forestrarju Permanenti preċedentement kien ingħata wkoll kompiti ta’ komitoloġija, iżda, minn dak iż-żmien ’l hawn, l-att bażiku li jagħti dawk il-kompiti ta’ komitoloġija lill-Kumitat Forestrarju Permanenti skada. Il-Kumitat Forestrarju Permanenti għalhekk jenħtieġ li jingħata l-isem ġdid Grupp Permanenti ta’ Esperti dwar il-Foresti u l-Forestrija (il-“grupp ta’ esperti”).

Emenda 4Proposta għal deċiżjoniPremessa 4

(4)L-aktar mod effettiv biex tinkiseb struttura ta’ governanza tal-foresti tal-Unjoni aktar inklużiva u kkoordinata aħjar huwa li jitwessa’ l-ambitu u li jiġu ċċarati l-kompiti u l-kompożizzjoni tal-Kumitat Forestrarju Permanenti. Il-Kumitat Forestrarju Permanenti jenħtieġ li jingħata l-isem ġdid ukoll bħala l-Grupp Permanenti ta’ Esperti dwar il-Foresti u l-Forestrija, sabiex jirrifletti dawk l-emendi. Fuq talba tal-Kummissjoni jew ta’ Stat Membru, jenħtieġ li dan jindirizza kwalunkwe kwistjoni jew aspett rigward il-foresti u l-forestrija li jirriżultaw minn diversi politiki tal-Unjoni. Għalhekk jixraq li jiġi żgurat li l-Istati Membri jinnominaw rappreżentanti mill-awtoritajiet li huma kompetenti għall-objettivi speċifiċi ta’ politika.

(4)Fuq talba tal-Kummissjoni jew ta’ Stat Membru, jenħtieġ li l-grupp ta’ esperti jindirizza kwalunkwe kwistjoni jew aspett rigward il-foresti u l-forestrija li jirriżultaw minn diversi politiki tal-Unjoni. Għalhekk huwa xieraq li r-rappreżentanti li jipparteċipaw ikunu jistgħu jirrappreżentaw l-interessi tal-Istati Membri dwar l-objettivi ta’ politika rilevanti kollha.

Emenda 5Proposta għal deċiżjoniArtikolu 1 – paragrafu 1 – punt 2Deċiżjoni tal-Kunsill 89/367/KEEArtikolu 1 – paragrafu 1

Sabiex tiġi żgurata kooperazzjoni msaħħa u sabiex jiġi organizzat kambju multidixxiplinari bejn il-Kummissjoni u l-Istati Membri dwar il-foresti u dwar is-settur tal-forestrija fir-rigward tal-oqsma ta’ politika kollha tal-Unjoni rilevanti għall-foresti, qiegħed jiġi stabbilit Grupp ta’ Esperti Permanenti dwar il-Foresti u l-Forestrija, minn hawn ’il quddiem imsejjaħ “il-grupp ta’ esperti”;

Sabiex tiġi żgurata kooperazzjoni mill-qrib u effettiva bejn il-Kummissjoni u l-Istati Membri dwar il-foresti u dwar is-settur tal-forestrija fir-rigward tal-oqsma ta’ politika kollha tal-Unjoni rilevanti għall-foresti, qiegħed jiġi stabbilit Grupp ta’ Esperti permanenti dwar il-Foresti u l-Forestrija (il-“grupp ta’ esperti”).

Emenda 6Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 1

1.Il-Kummissjoni tista’ tikkonsulta l-grupp ta’ esperti fuq kwalunkwe kwistjoni jew aspett rigward il-foresti u l-forestrija li jirriżultaw mid-diversi politiki tal-Unjoni kemm fuq inizjattiva tagħha stess kif ukoll fuq talba tar-rappreżentant ta’ kull Stat Membru.

1.Il-grupp ta’ esperti għandu jagħti pariri lill-Kummissjoni fuq kwalunkwe kwistjoni jew aspett rigward il-foresti u l-forestrija li jirriżultaw mid-diversi politiki tal-Unjoni rilevanti kemm fuq inizjattiva tagħha stess kif ukoll fuq talba tar-rappreżentant ta’ kull Stat Membru.

Emenda 7Proposta għal deċiżjoniArtikolu 1 – paragrafu 1 – punt 3 Deċiżjoni tal-Kunsill 89/367/KEEArtikolu 2 – paragrafu 2 – punt a

(a)li jassisti lill-Kummissjoni fit-tħejjija ta’ proposti leġiżlattivi, linji gwida jew inizjattivi ta’ politika oħrajn tal-Unjoni rilevanti għall-foresti u l-forestrija, inkluż fl-implimentazzjoni tal-Istrateġija l-Ġdida tal-UE għall-Foresti għall-2030 u Strateġiji sussegwenti tal-Unjoni għall-Foresti;

(a)li jassisti u jikkoopera mill-qrib mal-Kummissjoni u jipprovdilha għarfien espert u jikkontribwixxi fit-tħejjija u l-implimentazzjoni ta’ proposti leġiżlattivi, strateġiji, komunikazzjonijiet, linji gwida jew inizjattivi ta’ politika oħrajn tal-Unjoni rilevanti għall-foresti u l-forestrija, jew li jkollhom impatt sinifikanti fuq il-foresti jew il-forestrija fl-Unjoni;

Emenda 8Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 2 – punt b

(b)li jipprovdi lill-Kummissjoni b’pariri u b’għarfien espert, jew fuq l-inizjattiva tal-Kummissjoni jew fuq talba ta’ Stat Membru, bil-għan li jiġi appoġġjat il-kontribut usa’ tal-foresti u tal-forestrija għall-objettivi u l-inizjattivi ewlenin tal-Unjoni, bħall-Patt Ekoloġiku Ewropew, u l-promozzjoni tal-koerenza u s-sinerġiji bejn il-politiki tal-Unjoni rilevanti għall-foresti u l-forestrija;

(b)li jipprovdi lill-Kummissjoni b’pariri u b’għarfien espert, jew fuq l-inizjattiva tal-Kummissjoni jew tal-grupp ta’ esperti, jew fuq talba ta’ Stat Membru, bil-għan li jiġi żgurat kontribut adegwat tas-settur tal-forestrija tal-Istati Membri għall-objettivi u l-inizjattivi tal-Unjoni, jiġu promossi l-koerenza u s-sinerġiji kif ukoll jiġu eliminati l-inkonsistenzi eżistenti bejn il-politiki tal-Unjoni, u jiġi indirizzat l-impatt kumulattiv tagħhom u l-kompatibbiltà tagħhom mal-prinċipji tas-sussidjarjetà u tal-proporzjonalità minquxa fl-Artikolu 5 tat-Trattat dwar l-Unjoni Ewropea;

Emenda 9Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 2 – punt c

(c)li jippromwovi l-kooperazzjoni bejn il-Kummissjoni u l-Istati Membri dwar il-foresti u l-forestrija, inkluż b’appoġġ ta’ miżuri u interventi taħt il-politika agrikola komuni;

(c)li jsaħħaħ u jagħti spinta lill-kooperazzjoni bejn il-Kummissjoni u l-Istati Membri dwar il-foresti u l-forestrija, inkluż b’appoġġ ta’ miżuri u interventi taħt il-politika agrikola komuni, b’mod partikolari biex jitqiesu l-aspetti tas-sostenibbiltà u jinħolqu sinerġiji bejn il-foresti u l-agrikoltura, kif ukoll biex jissaħħaħ l-iżvilupp soċjoekonomiku taż-żoni rurali ddominati mill-foresti;

Emenda 10Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 2 – punt d

(d)li jrawwem l-iskambju ta’ għarfien, esperjenza u prattiki tajbin fil-qasam tal-foresti u l-forestrija.

(d)li jrawwem l-iskambju ta’ għarfien, esperjenza u prattiki tajbin, kif ukoll li jaġixxi bħala forum għall-iskambju ta’ fehmiet dwar kwistjonijiet u inizjattivi emerġenti fil-qasam tal-foresti u l-forestrija, u dwar il-funzjonijiet multipli tal-foresti, inklużi kwistjonijiet rilevanti għas-settur usa’ bbażat fuq il-foresti, kif ukoll irawwem l-iskambju ta’ fehmiet dwar l-applikabbiltà u l-implikazzjonijiet tal-politiki tal-Unjoni rilevanti għall-foresti u l-forestrija;

Emenda 11Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 2 – punt da (ġdid)

(da)li jfittex sinerġiji u jikkoopera dwarhom u jevita l-kunflitti bejn il-politiki nazzjonali u dawk tal-Unjoni relatati mal-foresti u l-forestrija, u li jqis ukoll żviluppi internazzjonali oħra;

Emenda 12Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 2 – punt db (ġdid)

(db)li jifformula opinjonijiet dwar proposti leġiżlattivi, strateġiji, komunikazzjonijiet, linji gwida jew inizjattivi ta’ politika oħra tal-Unjoni rilevanti għall-foresti u l-forestrija, jew li jkollhom impatt sinifikanti fuq il-foresti jew il-forestrija fl-Unjoni; il-Kummissjoni għandha tqis dawk l-opinjonijiet meta timbotta objettivi ta’ politika relatati mal-foresti, u għandha tipprovdi feedback dwar kif qieset dawk l-opinjonijiet.

Emenda 13Proposta għal deċiżjoniArtikolu 1 – paragrafu 1 – punt 3Deċiżjoni tal-Kunsill 89/367/KEEArtikolu 2 – paragrafu 3

3.Il-Parlament Ewropew u l-Kunsill, filwaqt li jaġixxu fuq proposta mill-Kummissjoni, jistgħu jassenjaw kompiti oħrajn lill-grupp ta’ esperti b’rabta mal-politiki tal-Unjoni li jaffettwaw il-foresti u l-forestrija.

3.Il-Parlament Ewropew u l-Kunsill, filwaqt li jaġixxu fuq proposta mill-Kummissjoni, jistgħu jassenjaw kompiti temporanji oħrajn lill-grupp ta’ esperti b’rabta mal-politiki tal-Unjoni li jaffettwaw il-foresti u l-forestrija.

Emenda 14Proposta għal deċiżjoniArtikolu 1 – paragrafu 1 – punt 4Deċiżjoni tal-Kunsill 89/367/KEEArtikolu 3 – paragrafu 1

Il-grupp ta’ esperti għandu jkun magħmul minn rappreżentanti tal-Istati Membri.

Il-grupp ta’ esperti għandu jkun magħmul minn rappreżentanti tal-Istati Membri. Kull Stat Membru għandu jiġi mistieden u għandu jiġi mħeġġeġ bil-qawwa biex jaħtar esperti nazzjonali u jiffaċilita l-parteċipazzjoni tagħhom fil-laqgħat tal-grupp ta’ esperti.

Emenda 15Proposta għal deċiżjoniArtikolu 1 – paragrafu 1 – punt 4Deċiżjoni tal-Kunsill 89/367/KEEArtikolu 3 – paragrafu 2

L-Istati Membri għandhom jinnominaw ir-rappreżentanti tagħhom, filwaqt li jiżguraw il-parteċipazzjoni tal-awtoritajiet li huma kompetenti għall-objettivi ta’ politika differenti tal-Istrateġija l-Ġdida tal-UE għall-Foresti għall-2030, li jinkludu, fost l-oħrajn, il-klima, is-saħħa tal-foresti, l-ambjent, il-forestrija, l-iżvilupp rurali u l-bijoekonomija u kwalunkwe strateġija sussegwenti tal-Unjoni għall-foresti.

L-Istati Membri għandhom jinnominaw ir-rappreżentanti tagħhom, filwaqt li jiżguraw l-involviment attiv tal-awtoritajiet rilevanti tagħhom u li r-rappreżentanti li jipparteċipaw ikunu jistgħu jirrappreżentaw l-interessi u l-esperjenzi tal-Istat Membru rispettiv tagħhom dwar l-objettivi ta’ politika rilevanti kollha.

Emenda 16Proposta għal deċiżjoniArtikolu 1 – paragrafu 1 – punt 4Deċiżjoni tal-Kunsill 89/367/KEEArtikolu 3 – paragrafu 3

Il-grupp ta’ esperti għandu jiġi ppresedut minn rappreżentant tal-Kummissjoni.

Il-grupp ta’ esperti għandu jiġi ppresedut minn rappreżentant tal-Kummissjoni. Il-president tal-grupp ta’ esperti jista’ jippreżenta l-pjan ta’ ħidma annwali tiegħu lill-Parlament Ewropew.