1.Jesprimi dispjaċir kbir għall-fatt li mill-2009 u għal darb’oħra għas-sena finanzjarja 2023, il-Kunsill kompla jirrifjuta li jikkoopera mal-Parlament dwar il-proċedura ta’ kwittanza, u għaldaqstant il-Parlament ma setax jieħu deċiżjoni infurmata bbażata fuq skrutinju serju u bir-reqqa tal-implimentazzjoni tal-baġit tal-Kunsill u kellu jirrifjuta li jagħti l-kwittanza;

2.Jinnota li, fl-20 ta’ Settembru 2024, is-servizzi rilevanti tal-Parlament, f’isem ir-rapporteur għall-proċedura ta’ kwittanza, bagħtu kwestjonarju lis-Segretarjat tal-Kunsill b’90 mistoqsija importanti mill-Parlament sabiex jingħata lok għal skrutinju bir-reqqa tal-implimentazzjoni tal-baġit tal-Kunsill u tal-ġestjoni tal-Kunsill; jinnota wkoll li ntbagħtu kwestjonarji simili lill-istituzzjonijiet l-oħra kollha, li kollha kemm huma taw lill-Parlament tweġibiet dettaljati għall-mistoqsijiet kollha;

3.Jesprimi dispjaċir għall-fatt li, fit-23 ta’ Settembru 2024, is-Segretarjat Ġenerali tal-Kunsill informa lill-Parlament għal darb’oħra li ma kienx se jwieġeb għall-kwestjonarju tal-Parlament u li l-Kunsill ma kienx se jipparteċipa fis-seduta ta’ smigħ li kienet ippjanata li ssir fit-12 ta’ Novembru 2024 bħala parti mill-proċedura ta’ kwittanza, u li fiha pparteċipaw l-istituzzjonijiet mistiedna l-oħra kollha;

4.Jenfasizza l-prerogattivi tal-Parlament li jagħti kwittanza skont l-Artikolu 319 tat-TFUE, kif ukoll id-dispożizzjonijiet applikabbli tar-Regolament Finanzjarju u tar-Regoli ta’ Proċedura tal-Parlament, f’konformità mal-interpretazzjoni u l-prattika attwali, jiġifieri, is-setgħa li jagħti l-kwittanza sabiex tinżamm it-trasparenza u tiġi żgurata r-responsabbiltà demokratika fil-konfront tal-kontribwenti tal-Unjoni;

5.Jissottolinja li l-Artikolu 59(1) tar-Regolament Finanzjarju jiddikjara li l-Kummissjoni għandha tagħti s-setgħat meħtieġa lill-istituzzjonijiet l-oħrajn tal-Unjoni għall-implimentazzjoni tat-taqsimiet tal-baġit li huma relatati magħhom u, għalhekk, għal darb’oħra jsibha inkomprensibbli li l-Kunsill jemmen li huwa xieraq li għandha tingħata kwittanza lill-Kummissjoni għall-implimentazzjoni tal-baġit tal-Kunsill;

6.Jisħaq fuq il-prattika stabbilita sew u rispettata segwita mill-Parlament matul kważi għoxrin sena mill-għoti ta’ kwittanza lill-istituzzjonijiet, lill-korpi, lill-uffiċċji u lill-aġenziji kollha tal-Unjoni; ifakkar li l-Kummissjoni ddikjarat in-nuqqas ta’ kapaċità tagħha li tissorvelja l-implimentazzjoni tal-baġits tal-istituzzjonijiet l-oħra tal-Unjoni; jisħaq fuq il-fehma mtennija tal-Kummissjoni li l-prattika li tingħata kwittanza lil kull istituzzjoni tal-Unjoni għan-nefqa amministrattiva tagħha għandha tkompli tiġi segwita mill-Parlament;

7.Jisħaq li s-sitwazzjoni attwali tippermetti li l-Parlament jista’ biss jivverifika r-rapporti tal-Qorti tal-Awdituri u tal-Ombudsman kif ukoll l-informazzjoni disponibbli għall-pubbliku fuq is-sit web tal-Kunsill, għax il-Kunsill qed ikompli bil-prattika ħażina tiegħu li ma jikkooperax mal-Parlament, u dan jagħmilha impossibbli li l-Parlament iwettaq dmirijietu b’mod xieraq u jieħu deċiżjoni infurmata dwar l-għoti tal-kwittanza;

8.Jiddeplora l-fatt li l-Kunsill, għal kważi 15-il sena, wera nuqqas ta’ rieda politika li jikkollabora mal-Parlament fil-kuntest tal-proċedura annwali ta’ kwittanza; jissottolinja li din l-attitudni kellha effett negattiv dejjiemi fuq iż-żewġ istituzzjonijiet, skreditat il-ġestjoni u l-iskrutinju demokratiku tal-baġit tal-Unjoni u għamlet ħsara lill-fiduċja taċ-ċittadini fl-Unjoni bħala entità trasparenti;

9.Jafferma mill-ġdid il-frustrazzjoni profonda tiegħu fir-rigward tal-attitudni tal-Kunsill lejn il-proċedura ta’ kwittanza, li qed twassal messaġġ mhux xieraq liċ-ċittadini tal-Unjoni fi żmien meta huwa essenzjali li jkun hemm trasparenza akbar; jissottolinja li l-Kunsill jeħtieġlu jaderixxi mal-istess standards ta’ responsabbiltà li jistenna minn istituzzjonijiet oħra tal-Unjoni;

10.Jenfasizza li l-istituzzjonijiet l-oħra kollha tal-Unjoni jirrikonoxxu u jifhmu l-prinċipju li, minħabba d-delega tas-setgħa li tikkonċerna l-implimentazzjoni tal-baġit, il-Parlament għandu kemm id-dritt kif ukoll l-obbligu li jiskrutinizza l-baġits tagħhom u l-eżekuzzjoni tagħhom bħala parti mill-proċedura ta’ kwittanza; fid-dawl ta’ dan, jesprimi d-diżapprovazzjoni qawwija tiegħu li l-Kunsill jippersisti fir-rifjut tiegħu li jikkoopera mal-Parlament f’dan ir-rigward;

11.Ifakkar li l-ġurisprudenza tal-Qorti tal-Ġustizzja tal-Unjoni Ewropea tappoġġja d-dritt tal-kontribwenti u li l-pubbliku jinżamm infurmat dwar l-użu tad-dħul pubbliku; jitlob, għalhekk, rispett sħiħ għall-prerogattiva u r-rwol tal-Parlament bħala garanti tal-prinċipju tar-responsabbiltà demokratika; jistieden lill-Kunsill isegwi kif xieraq ir-rakkomandazzjonijiet adottati mill-Parlament fil-kuntest tal-proċedura ta’ kwittanza;

12.Jisħaq li s-sitwazzjoni attwali trid tittejjeb permezz ta’ kooperazzjoni interistituzzjonali aħjar fi ħdan il-qafas eżistenti tat-Trattati; iqis li reviżjoni possibbli tat-Trattati tista’ tagħmel il-proċedura ta’ kwittanza aktar ċara u aktar trasparenti billi tagħti s-setgħa b’mod espliċitu lill-Parlament biex jagħti kwittanza individwalment lill-istituzzjonijiet, lill-korpi, lill-uffiċċji u lill-aġenziji kollha tal-Unjoni u jħeġġeġ lill-Kunsill jinvolvi ruħu b’mod attiv mal-Parlament biex jindirizza s-sitwazzjoni attwali;

13.Jinnota li fis-6 ta’ Mejju 2025, matul l-intervent tiegħu fil-plenarja tal-Parlament, ir-Rappreżentant tal-Presidenza tal-Kunsill esprima r-rieda ta’ din tal-aħħar “li tinvolvi ruħha f’kooperazzjoni sinifikattiva u prammatika bejn l-istituzzjonijiet tagħna” f’dak li jirrigwarda l-kwittanza fir-rigward tat-taqsima tal-Kunsill Ewropew u tal-Kunsill tal-baġit tal-Unjoni, u jappella sabiex din l-intenzjoni tiġi tradotta f’passi konkreti fi żmien xieraq; jistieden, għalhekk, lill-Kunsill ikompli kemm jista’ jkun malajr in-negozjati mal-Parlament fl-ogħla livell, bl-involviment tas-Segretarji Ġenerali u l-Presidenti taż-żewġ istituzzjonijiet, sabiex jintemm l-impass u tinstab soluzzjoni filwaqt li jiġu rispettati r-rwoli rispettivi tal-Parlament u tal-Kunsill fil-proċedura ta’ kwittanza u jiġu żgurati t-trasparenza u l-kontroll demokratiku xieraq tal-implimentazzjoni tal-baġit;

14.Jisħaq li l-kummenti tal-Parlament dwar il-ġestjoni baġitarja u finanzjarja, il-ġestjoni interna, il-prestazzjoni u l-kontroll intern, ir-riżorsi umani, l-ugwaljanza u l-benesseri, il-qafas etiku u t-trasparenza, id-diġitalizzazzjoni, iċ-ċibersigurtà u l-protezzjoni tad-data, il-bini, l-ambjent u s-sostenibbiltà, il-kooperazzjoni u l-komunikazzjoni interistituzzjonali mir-riżoluzzjoni ta’ kwittanza tiegħu tas-7 ta’ Mejju 2025, għadhom validi;

15.Itenni d-dispjaċir tiegħu li l-baġit tal-Kunsill Ewropew u tal-Kunsill ma nqasamx f’żewġ baġits separati b’mod ċar kif irrakkomandat mill-Parlament f’riżoluzzjonijiet ta’ kwittanza preċedenti sabiex jittejbu t-trasparenza u l-obbligu ta’ rendikont, mhux l-anqas rigward il-Kunsill Ewropew, peress li bħalissa huwa impossibbli li tinkiseb informazzjoni affidabbli dwar il-kostijiet tiegħu; jisħaq fuq l-importanza ta’ data affidabbli għal kontroll oġġettiv; jappella għall-konformità mar-rakkomandazzjoni tal-awtorità ta’ kwittanza;

16.Jiddispjaċih ħafna dwar il-pożizzjoni ostruttiva tal-Gvern Ungeriż fil-Kunsill Ewropew; jinnota li l-istaġnar politiku li għaddej bħalissa u l-progress insuffiċjenti fir-riformi tat-trasparenza għadhom jimminaw il-fiduċja u l-effettività tal-Kunsill Ewropew; jappella għal riformi mmirati tat-trattati biex jissaħħu t-teħid ta’ deċiżjonijiet demokratiku u t-trasparenza fi ħdan il-Kunsill Ewropew;

17.Jilqa’ d-deċiżjoni li jiġu adottati konklużjonijiet appoġġati minn 26 Stat Membru dwar l-appoġġ kontinwu u sod tal-Unjoni għall-indipendenza, is-sovranità u l-integrità territorjali tal-Ukrajna, kif stabbilit fid-dokument tal-Kunsill Ewropew EUCO 16/25 adottat fis-26 ta’ Ġunju 2025; jiddispjaċih li tali kors kien meħtieġ minħabba għadd ta’ veto persistenti; jappella għall-iżvilupp ta’ mekkaniżmi alternattivi biex jiġu evitati l-veto fi kwistjonijiet urġenti, sakemm isiru bidliet fit-trattati biex jittejbu l-effiċjenza fit-teħid tad-deċiżjonijiet u l-unità fi ħdan il-Kunsill Ewropew; jissottolinja li l-baġit tal-Unjoni għall-2023 diġà mmobilizza riżorsi sostanzjali biex jappoġġa lill-Ukrajna, u jisħaq fuq l-importanza li jiġi żgurat li d-deċiżjonijiet baġitarji futuri jirriflettu dan l-impenn strateġiku;

18.Iħeġġeġ lill-Kunsill jiżgura li l-Presidenza tal-Kunsill titmexxa strettament f’konformità mad-dritt tal-Unjoni, mal-prinċipji u mal-kredibbiltà tal-Unjoni; jiddeplora l-imġiba ħażina min-naħa tal-Gvern Ungeriż tal-Presidenza tal-Kunsill fit-twettiq ta’ attivitajiet bilaterali li jikkontradixxu l-valuri fundamentali tal-Unjoni; iħeġġeġ bil-qawwa lill-Kunsill biex jikkundanna tali mġiba.