Toradh imscrúdú na hOifige Frith-Chalaoise Eorpaí (OLAF)4.ag tabhairt dá haire go ndearna OLAF leagan anaithnidithe dá thuarascáil chríochnaitheach maidir leis an imscrúdú a bhí ar fáil d’Fheisirí an Choiste um Rialú Buiséadach i mí an Mhárta 2025 agus don Choiste um Shaoirsí Sibhialta, um Cheartas agus um Ghnóthaí Baile i mí Iúil 2025; á chur in iúl gur saoth léi an mhoill ar an rochtain ar an imscrúdú, nár deonaíodh ach i mí an Mhárta in ainneoin na hiarrata a rinne an rapóirtéir i mí na Nollag 2024, agus sa fhreagra ó OLAF inar luadh agóidí ó Bhord Bainistíochta Ghníomhaireacht an Aontais Eorpaigh um Thearmann; á áitiú gur cheart rochtain ar an tuarascáil a bheith tugtha d’Fheisirí CONT ní ba luaithe chun feidhmiú a sainordaithe a ráthú go leormhaith;
5.á chur in iúl gurb eol di go ndéanfar imscrúduithe OLAF go leanúnach thar thréimhse nach mór a bheith comhréireach le himthosca agus castacht an cháis; á chur in iúl gur cúis bhuartha di fad imscrúduithe OLAF toisc go mbaineann sé an bonn de chumas an údaráis um urscaoileadh a dtorthaí a mheas go héifeachtúil: á áitiú go bhfuil ról ríthábhachtach ag imscrúduithe tráthúla i ndáil le maoirseacht éifeachtach Pharlaimint na hEorpa a choinneáil; á iarraidh ar OLAF athbhreithniú a dhéanamh ar an nós imeachta maidir le himscrúduithe a thabhairt chun críche agus a chomhroinnt leis an Údarás um Urscaoileadh agus dlús a chur leis an nós imeachta sin; á chur i bhfáth go mbaineann moilleanna den sórt sin an bonn de chumas fheisirí CONT a sainordú maoirseachta a fheidhmiú go héifeachtach agus á iarraidh go ndéanfaí bearta chun rochtain phras ar thuarascálacha imscrúdaithe a áirithiú amach anseo;
6.á chur i bhfáth nach mór cosaint bhuiséad an Aontais a bheith ina bunluach de bhainistiú fónta airgeadais i gcónaí, a bhfuil sé de cheangal ar institiúidí uile an Aontais seasamh leis, lena n-áirítear gníomhaireachtaí agus comhlachtaí díláraithe nach mór dóibh sampla soiléir a leagan síos maidir le freagracht agus trédhearcacht in úsáid cistí poiblí Eorpacha; á athdhearbhú go bhfuil gá le comhordú agus comhar neartaithe laistigh den chreat institiúideach frithchalaoise, go háirithe chun aghaidh a thabhairt ar an ngá atá le himscrúduithe OLAF níos tapúla agus níos éifeachtúla, agus ar an gcaoi sin na hiarrachtaí sin a ailíniú leis an sprioc níos leithne maidir le hairgeadas an Aontais a chosaint;
7.á iarraidh ar an nGníomhaireacht agus ar OLAF achoimre anaithnidithe ar thuarascáil OLAF a chur ar fáil go poiblí, a mhéid is féidir ó thaobh an dlí de, ar mhaithe le trédhearcacht agus muinín an phobail;
8.ag tabhairt dá haire gur eisigh OLAF moltaí araíonachta agus riaracháin tar éis an imscrúdaithe;
9.ag tabhairt faoi deara, maidir leis na moltaí araíonachta, gur chinn an Bord Bainistíochta, mar obair leantach, gan imeachtaí araíonachta a thionscnamh agus, ina ionad sin, gur eisigh sé moltaí i scríbhinn le rabhadh agus gur iarr sé tograí nithiúla ar an Stiúrthóir Feidhmiúcháin trí bhíthin gníomhaíochtaí ceartaitheacha, agus tráthchlár chun iad a chur chun feidhme a luaithe is féidir; ag aithint, i gcomhréir leis an iarraidh sin, gur chuir an Stiúrthóir Feidhmiúcháin na doiciméid seo a leanas faoi bhráid an Bhoird Bainistíochta, lena n-áirítear:- –na Moltaí a rinne an Bord Bainistíochta;
- –staid reatha na Gníomhaireachta maidir le gach Moladh; agus
- –na gníomhaíochtaí ceartaitheacha breise atá le cur chun feidhme lena gcuimsítear amlíne shealadach dá gcur chun feidhme; á iarraidh ar an mBord Bainistíochta obair leantach a dhéanamh ar na moltaí agus tuairisc a thabhairt don údarás um urscaoileadh maidir lena gcur chun feidhme iomlán agus tráthúil;
10.á chur in iúl gur oth léi go bhfuil cinneadh déanta ag an mBord Bainistíochta tar éis dianphlé a dhéanamh gan moltaí araíonachta OLAF a chur chun feidhme, lena n-áirítear imeachtaí araíonachta a thionscnamh i gcoinne Stiúrthóir Feidhmiúcháin Ghníomhaireacht an Aontais Eorpaigh um Thearmann nó aon fhoireann eile sa Ghníomhaireacht, in ainneoin thorthaí suntasacha OLAF, a dhealraíonn a bheith córasach agus a bhaineann an bonn den mhuinín as ceannaireacht na Gníomhaireachta; ag cur béim ar an bhfíoras go n-ardaítear leis an gcinneadh sin ceisteanna faoi thiomantas an Bhoird don chuntasacht agus don fhreagracht, i gcomhréir le hionchais institiúideacha, agus ag aithint rogha an Bhoird d’aon ghnó gan na moltaí a chur chun feidhme tar éis athbhreithniú a dhéanamh ar na saincheisteanna a ardaíodh; á chur i bhfáth go leanfaidh an Pharlaimint d’aird ar leith a thabhairt, go háirithe maidir leis na gníomhaíochtaí ceartaitheacha a dhéantar; ag dréim leis go léireoidh an Ghníomhaireacht obair leantach eiseamláireach, ardchaighdeáin, freagracht shoiléir as bearta ceartaitheacha a chur chun feidhme agus cuntasacht iomlán; á iarraidh ar an nGníomhaireacht tuairisciú trédhearcach don Pharlaimint a áirithiú trí, inter alia, miontuairiscí phléití an Bhoird Bainistíochta a roinnt leis an bParlaimint, chun maoirseacht pharlaiminteach a neartú;
11.ag tabhairt dá haire gur ullmhaigh an Stiúrthóir Feidhmiúcháin ‘Ráiteas Físe maidir le ceannaireacht a chuireann na hathruithe in EUAA chun feidhme’ ina bhfuil na gníomhaíochtaí ceartaitheacha atá curtha chun feidhme agus na gníomhaíochtaí ceartaitheacha atá le cur chun feidhme; á iarraidh ar an nGníomhaireacht an t-údarás um urscaoileadh a chur ar an eolas faoi na gníomhaíochtaí ceartaitheacha atá curtha chun feidhme agus le cur chun feidhme, mar aon le spriocdhátaí chun iad a chur i gcrích;
12.á chur in iúl gur cúis bhuartha di gur tugadh aghaidh sna moltaí riaracháin ar chleachtas na meastóireachtaí foirne atá á ndéanamh ag cinn earnála seachas ag cinn aonaid, chomh maith le heasnaimh i mbainistiú coinbhleachtaí leasa laistigh den Ghníomhaireacht;
13.á chur in iúl gur geal léi, ag tosú in 2025, go ndéanfaidh na cinn aonaid na meastóireachtaí foirne mar a fhoráiltear sna rialacha is infheidhme;
14.á chur in iúl gur saoth léi go mór na laigí i mbainistiú coinbhleachtaí leasa laistigh den Ghníomhaireacht, go háirithe láimhseáil lochtach gearán ag an mBord Bainistíochta i gcoinne cinntí arna ndéanamh ag an Stiúrthóir Feidhmiúcháin; á áitiú go mbaintear an bonn ó shláine agus ó chreidiúnacht na Gníomhaireachta le cleachtais den sórt sin; á iarraidh ar an nGníomhaireacht an t-údarás um urscaoileadh a chur ar an eolas faoi na gníomhaíochtaí ceartaitheacha agus na hathruithe eagraíochtúla a cuireadh i bhfeidhm; á chur i bhfáth nach measfar ach creat láidir eiseamláireach chun coinbhleacht leasa a bhainistiú a bheith inghlactha;
15.ag tabhairt dá haire go n-aithníonn an Bord Bainistíochta agus an Stiúrthóir Feidhmiúcháin araon tromchúis na líomhaintí agus na saincheisteanna a ardaíodh; á aithint, áfach, gur chuir an Stiúrthóir Feidhmiúcháin sceipteachas in iúl, agus ualach oibre urghnách á lua aige le linn géarchéimeanna, nach féidir a úsáid chun bonn cirt a thabhairt leis na torthaí a dhíbhe; á mheas nach mór bearta ceartaitheacha cinntitheacha, cur chun feidhme tráthúil, agus cuntasacht iomlán don údarás um urscaoileadh a bheith ag gabháil leis an aitheantas;
16.ag tabhairt dá haire, agus é ina ábhar imní di, na teipeanna leanúnacha sa rialachas, lena n-áirítear neamhábaltacht an Bhoird Bainistíochta maoirseacht thráthúil agus éifeachtach a dhéanamh; á chur in iúl gur oth léi go bhféadfaí roinnt de na neamhrialtachtaí a chosc le rialuithe inmheánacha níos fearr agus le rannpháirtíocht réamhghníomhach ón mBord Bainistíochta; á áitiú nach mór aghaidh a thabhairt ar an teip institiúideach sin ó thaobh struchtúir de, ní hamháin ó thaobh nós imeachta de;
17.á chur in iúl gur saoth léi saincheisteanna an drochriaracháin, go háirithe i réimse na n-acmhainní daonna, le neamhrialtachtaí tromchúiseacha, go háirithe i nósanna imeachta ceapacháin agus roghnúcháin de shárú ar Rialacháin Foirne na nOifigeach agus Coinníollacha Fostaíochta Seirbhíseach Eile; á chur in iúl gur eol di gur thug an Ghníomhaireacht aghaidh ar imthosca dúshlánacha le linn na tréimhse ó 2019 go 2022, amhail paindéim COVID-19, gníomhachtú na Treorach um Chosaint Shealadach, nó teacht i bhfeidhm Rialachán na Gníomhaireachta Rialachán (AE) 2021/2303 ó Pharlaimint na hEorpa agus ón gComhairle an 15 Nollaig 2021 maidir le Gníomhaireacht an Aontais Eorpaigh um Thearmann agus lena n-aisghairtear Rialachán (AE) Uimh. 439/2010 (IO L 468, 30.12.2021, lch. 1, ELI: http://data.europa.eu/eli/reg/2021/2303/oj). le sainordú, inniúlachtaí agus freagrachtaí nua; ag diúltú, áfach, d’aon iarracht imthosca den sórt sin a úsáid chun údar a thabhairt le neamhchomhlíonadh reachtaíochta ceangailtí; á iarraidh ar an nGníomhaireacht a próisis earcaíochta a ailíniú go hiomlán leis na rialacha is infheidhme, agus á áitiú go nglacfaí nósanna imeachta dochta, trédhearcacha agus fiúntasbhunaithe, a mbeidh treoirlínte in-fhorfheidhmithe ag gabháil leo agus a bheidh faoi réir dlúthmhaoirseacht ag an údarás um urscaoileadh;
18.á chur in iúl gur geal léi gur cuireadh deireadh leis an gcleachtas bainisteoirí ad interim a cheapadh amhail ó mhí Eanáir 2023;
19.á mheabhrú go bhfuil sé ar cheann de phríomhdhualgais an Bhoird Bainistíochta treoshuíomh ginearálta a thabhairt do ghníomhaíochtaí na Gníomhaireachta agus a áirithiú go gcomhlíonfaidh an Ghníomhaireacht a sainordú go héifeachtach; á mheas, chun treoshuíomh ginearálta a thabhairt, nach mór don Bhord Bainistíochta a bheith feasach agus ar an eolas go cuí faoin reachtaíocht is infheidhme don Ghníomhaireacht chomh maith le forbairtí tábhachtacha i mbainistiú na Gníomhaireachta; á chur in iúl gur saoth léi na heasnaimh leanúnacha ina leith sin agus á iarraidh ar an nGníomhaireacht nósanna imeachta cumarsáide éifeachtúla, córasacha agus trédhearcacha a bhunú leis an mBord Bainistíochta;
20.á iarraidh ar an gCoimisiún Eorpach, a bhfuil dhá shuíochán aige ar an mBord Bainistíochta, tacaíocht agus cúnamh gníomhach a thabhairt do chomhaltaí eile boird maidir lena dtuiscint ar na rialacha is infheidhme i ndáil leis an nGníomhaireacht, agus na ceachtanna a foghlaimíodh ón gcás áirithe sin a shainaithint agus a scaipeadh mar chuid d’iarrachtaí coisctheacha níos leithne; á iarraidh ar an nGníomhaireacht tuairisc a thabhairt don údarás um urscaoileadh maidir leis na bearta a glacadh chun cumarsáid leis an mBord Bainistíochta a fheabhsú;
21.á chur in iúl gur geal léi gur mhol an Coimisiún le linn an mhalartaithe tuairimí go bhféadfaí Seirbhísí Comhpháirteacha a chomhroinnt i réimsí cothrománacha áirithe ar fud na nGníomhaireachtaí díláraithe, ós rud é go gcabhródh sé sin le próisis a bhainistiú ar bhealach níos fearr agus le húsáid níos éifeachtúla a bhaint as acmhainní; ag moladh don Choimisiún an fhéidearthacht sin a fhiosrú agus gníomhaíochtaí nithiúla a mholadh i ndáil leis sin;
22.á iarraidh ar an nGníomhaireacht feidhm eitice inmheánach neamhspleách a bhunú agus ag cur béim ar a thábhachtaí atá sé rialacha láidre maidir le cosaint sceithirí a bheith ann i gcomhréir le Treoir (AE) 2019/1937; á chur i bhfáth nach mór bealaí tuairiscithe inmheánacha a bheith rúnda, inchreidte agus iontaofa ag an bhfoireann ar gach leibhéal;
23.á thabhairt chun suntais, cé go dtéann cuid de na himeachtaí siar go dtí na blianta 2021, 2022 agus roimhe sin, nár tugadh imscrúdú OLAF i gcrích go dtí 2024; ag cur béim ar an bhfíoras nach féidir teacht ar an gconclúid go fóill go bhfuil na saincheisteanna sin réitithe go hiomlán; á chur i bhfáth go gcoinníonn an tÚdarás um Urscaoileadh an ceart iomlán a fhreagrachtaí maoirseachta a fheidhmiú go dtí go ndéanfar an cás a leigheas agus a shoiléiriú go hiomlán; á iarraidh ar an Stiúrthóir Feidhmiúcháin agus ar an mBord Bainistíochta aon laigí struchtúracha i mbainistiú acmhainní daonna na Gníomhaireachta agus i bhfeidhmeanna maoirseachta an Bhoird Bainistíochta araon a aithint agus aghaidh a thabhairt orthu, agus bearta éifeachtacha a dhéanamh chun atarlú saincheisteanna comhchosúla a chosc agus an ceart a fhorchoimeád cinntí urscaoilte amach anseo a choinneáil siar nó coinníoll a chur leo, i gcás ina mainneoidh an Ghníomhaireacht athchóiriú struchtúrach iomlán a dhéanamh;
24.ag tabhairt dá haire, agus é ina ábhar imní di go háirithe, na rátaí athraithe foirne an-ard mar a luaitear i dtuarascáil OLAF, gan an bhainistíocht a bheith in ann míniú sásúil a thabhairt; á iarraidh ar an Stiúrthóir Feidhmiúcháin agus ar an mBord Bainistíochta, agus go háirithe ar ionadaithe an Choimisiúin laistigh de, agallaimh chórasacha scoir a chur i bhfeidhm leis an bhfoireann uile atá ag éirí as oifig, na torthaí a dhoiciméadú go cuimsitheach, agus tuairisciú don údarás um urscaoileadh maidir leis na torthaí agus an dul chun cinn atá bainte amach ina leith sin faoi chuimsiú nós imeachta um urscaoileadh 2024;
25.ag tabhairt ardmholadh d’fhoireann na Gníomhaireachta as a dtiomantas a gcuid cúraimí a chur i gcrích in ainneoin imthosca dúshlánacha; á mheas go bhfuil sé bunriachtanach timpeallacht oibre dhearfach a chothú trí dhea-chleachtais a chur chun cinn ar leibhéal na n-acmhainní daonna agus trí fheidhmíocht bunaithe ar fhiúntas a chúiteamh; ag tathant ar an mBord Bainistíochta agus ar an Stiúrthóir Feidhmiúcháin a áirithiú gur ionad oibre sábháilte agus tacúil í an Ghníomhaireacht lena spreagtar cumarsáid oscailte agus lena gcumhachtaítear daoine aonair labhairt amach gan eagla roimh fhrithbheart; á iarraidh ar an nGníomhaireacht a áirithiú go ndéanfar imscrúdú tromchúiseach agus críochnúil ar na tuarascálacha uile ar mhí-iompar gairmiúil, agus go ndéanfar gníomhaíochtaí leantacha iomchuí chun sláine agus muinín a choinneáil laistigh den eagraíocht;
°
° °
26.ag tagairt, i ndáil le barúlacha eile, do rún uaithi an 7 Bealtaine 2025 IO L, 2025/1681, 8.10.2025, ELI: http://data.europa.eu/eli/res/2025/1681/oj. ina bhfuil na barúlacha atá ina gcuid dhílis de na cinntí maidir le hurscaoileadh i ndáil le cur chun feidhme bhuiséad ghníomhaireachtaí an Aontais Eorpaigh.