1.á áitiú gur bhain an tAontas agus na tíortha is iarrthóirí úsáid i gcónaí as an méadú mar uirlis bheartais agus gheopholaitiúil chun an daonlathas, an chobhsaíocht, an tslándáil agus an rathúnas a chur chun cinn ar fud na mór-roinne; á chur in iúl go bhfuil sí den tuairim gur infheistíocht gheostraitéiseach fhadtéarmach é méadú AE;

2.á chur i bhfáth go gcuireann cogadh foghach na Rúise i gcoinne na hÚcráine agus dúshláin gheopholaitiúla eile leis an bpráinn a bhaineann le próiseas an mhéadaithe a chur chun cinn; á áitiú go bhfuil gá le fís pholaitiúil fhadtéarmach agus cinntí misniúla chun méadú rathúil agus inbhuanaithe a bhaint amach, cinntí arb é is aidhm dóibh Eoraip éifeachtúil, chumhachtach agus dhaonlathach a chur chun cinn;

3.ag tabhairt dá haire gur léir ón taithí a fuarthas go ngabhann dúshláin agus deiseanna nua institiúideacha agus polaitiúla le gach rabharta nua méadaithe, ar cheart aghaidh a thabhairt orthu go tráthúil, sula mbeidh na tíortha is iarrthóirí ina mBallstáit, más féidir, chun feidhmiú éifeachtach AE a áirithiú agus sáinn institiúideach a chosc; á chur i bhfios, roimh gach méadú i stair an tionscadail Eorpaigh, go ndearnadh na hathchóirithe institiúideacha inmheánacha ba ghá nó go raibh na hathchóirithe sin ag gabháil leis an méadú;

4.á aithint gurb é is aidhm don aontoilíocht a áirithiú go dtabharfar aghaidh ar ábhair imní dhlisteanacha na mBallstát uile; á chreidiúint, áfach, má bhíonn Aontas méadaithe ann, go mbeidh comhordú níos sofaisticiúla ag teastáil chun aghaidh a thabhairt ar dhúshláin phróiseas reatha an mhéadaithe; á chur i bhfios go láidir a thábhachtaí atá sé aghaidh a thabhairt ar na deacrachtaí a eascraíonn as aontoilíocht sa Chomhairle, lena n-áirítear aontoilíocht a úsáid le haghaidh céimeanna idirmheánacha i bpróiseas an mhéadaithe, rud a d’fhéadfadh moill a chur ar aontachas comhaltaí nua leis an Aontas mar gheall ar shaincheisteanna déthaobhacha; á mheabhrú go gcumasaítear le hAirteagal 49 CAE aistriú chuig vótáil trí thromlach cáilithe gan gá le hathruithe ar an gConradh; ag tabhairt dá haire go bhfuil struchtúr agus rialachas bhuiséad AE anásta agus as dáta agus go bhféadfaí athdháileadh a dhéanamh ar leithdháileadh cistí talmhaíochta agus comhtháthaithe; á mheabhrú gur deis é méadú AE chun príomhbheartais AE a athchalabrú i ndáil leis sin; ag tacú le tionscnaimh atá dírithe ar an bpróiseas cinnteoireachta a dhéanamh níos éifeachtaí, rud atá ríthábhachtach chun iomaíochas an Aontais a fheabhsú;

5.ag athdhearbhú a seasaimh gur cheart do dhoimhniú an Aontais, dá phróisis um méadú agus d’aontú na hEorpa a bheith fite fuaite ina chéile agus iad ag dul ar aghaidh; á chur i bhfáth go bhfuil gá le hathchóirithe institiúideacha agus airgeadais Aontais chun aghaidh a thabhairt ar na dúshláin a ghabhann le próiseas reatha an mhéadaithe agus chun a áirithiú go mbeidh an tAontas in ann baill nua a ionsú agus a lánpháirtiú rathúil a chur chun cinn gan geilleagair na mBallstát eile a dhíchobhsú ná teannas sóisialta a ghéarú;

6.á aithint go bhféadfadh réitigh a bheith ina réitigh shealadacha, ach nach bhfuil an intuarthacht, an trédhearcacht dhaonlathach agus an chuntasacht ag gabháil leo, ná an inbhuanaitheacht fhadtéarmach nach féidir a bhaint amach ach le hathchóirithe struchtúracha;

7.á chreidiúint go daingean gur cheart go gcuirfeadh athchóirithe institiúideacha an Aontais, gan beann ar an nós imeachta cinnteoireachta chun iad a ghlacadh, le cumas an Aontais gníomhú ar bhealach éifeachtúil agus tráthúil; á chur i bhfios gur cheart go gcomhlíonfadh na hathchóirithe réamh-mhéadaithe ar chreat institiúideach an Aontais na cuspóirí maidir le héifeachtúlacht an Aontais a fheabhsú, an tAontas a dhéanamh níos cumhachtaí ar an leibhéal domhanda agus an tAontas a dhéanamh níos daonlathaí, níos dlisteanaí agus níos cuntasaí;

8.á chur i bhfios go láidir, chun éifeachtúlacht mhéadaithe an Aontais a fheabhsú, gur cheart comhdhéanamh institiúidí an Aontais a oiriúnú, a dhéanamh níos éifeachtúla agus a bhfeidhmiú a fheabhsú; á mholadh gur cheart tacú le próiseas an mhéadaithe trí dhlúth-rannpháirtíocht luath na dtíortha is iarrthóirí i bhfeidhmiú institiúidí an Aontais, e.g. trí stádas breathnóra; Ag tabhairt dá haire go bhféadfaí é sin a bhaint amach go rathúil ar an gcaoi chéanna agus a bhí tráth mhéadú 2004; ag cur sonrú, mar shampla dearfach den lánpháirtiú de réir a chéile sin, in iarrachtaí an Choimisiúin ról a thabhairt do thíortha is iarrthóirí i réimsí na slándála agus na cosanta, go háirithe tríd an tagairt a dhéantar dóibh sa pháipéar bán maidir le todhchaí chosaint an Aontais agus sa straitéis slándála inmheánaí;

9.á thabhairt dá haire nach mór d’athchóirithe institiúideacha réamh-mhéadaithe aghaidh a thabhairt ar impleachtaí an mhéadaithe do chomhdhéanamh na Parlaiminte; á chur i bhfios go láidir, agus ionadaíochas daonlathach iomchuí á háirithiú, gur cheart don Pharlaimint fanacht ar mhéid inoibrithe; á thabhairt chun suntais gur gá tús áite a thabhairt d’obair inmheánach agus idirinstitiúideach maidir le sásra buan leithdháilte suíochán a shainaithint, a bheidh in ann ionadaíocht dhéimeagrafach agus gheografach atá cothrom, trédhearcach agus marthanach a áirithiú, ag urramú phrionsabal na comhréireachta céimlaghdaithí; ag meabhrú a seasaimh gur cheart comhdhéanamh na Parlaiminte a mheas in éineacht leis an gcóras vótála sa Chomhairle;

10.ag tabhairt dá haire nach mór méadú a chur san áireamh i gcomhdhéanamh reatha an Choimisiúin; ag meabhrú na solúbthachta, i ndáil leis sin, dá bhforáiltear i gConradh Liospóin; á thabhairt chun suntais nach mór d’aon laghdú ar mhéid Choláiste na gCoimisinéirí, mar a fhorordaítear in Airteagal 17(5) CAE, leanúint de chomhdhéanamh an Choimisiúin atá cothrom ó thaobh geografaíochta, déimeagrafach agus inscne de a áirithiú;

11.á aithint gur gá machnamh a dhéanamh ar an athbhreithniú ar fheidhmiú agus ar phróiseas cinnteoireachta na Comhairle i bhfianaise an mhéadaithe; ag tabhairt dá haire nach mór tromlach cáilithe a athshainiú chun feabhas a chur ar an gcothromaíocht idir tíortha móra agus tíortha beaga agus chun tairseacha níos airde a choinneáil do na cinntí is tábhachtaí agus is íogaire ó thaobh na polaitíochta de; ag meabhrú, i ndáil leis sin, na rún uaithi an 22 Samhain 2023 maidir le tograí ó Pharlaimint na hEorpa chun na Conarthaí a leasú, go háirithe maidir le tromlaigh vótála sa Chomhairle; á iarraidh go mbeadh an-trédhearcacht agus sláine i bpróiseas cinnteoireachta na Comhairle i gcomhthéacs an mhéadaithe;

12.á mholadh go ndéanfaí an nós imeachta in Airteagal 7 CAE a neartú agus a athchóiriú trí dheireadh a chur leis an aontoilíocht i gcinntí ón gComhairle Eorpach, trí thréimhse ama shoiléir a thabhairt isteach agus trí réiteoir ar sháruithe a dhéanamh de Chúirt Bhreithiúnais an Aontais Eorpaigh;

13.ag athdhearbhú a hiarrata athbhreithniú a dhéanamh ar rialachas CAI, eadhon trí chumhachtaí comhreachtacha iomlána a shannadh ar thaobh an chaiteachais de i mbuiséad AE, lena n-áirítear CAI a ghlacadh;

14.á chur in iúl go bhfuil sí suite de gur cheart an clásal athbhreithnithe éigeantach reatha i gcás méadú a choinneáil sa chéad CAI eile agus nár cheart difear a dhéanamh do chlúdaigh náisiúnta; á chur i bhfios go láidir nach mór, leis an gcéad CAI eile, bearta iomchuí idirthréimhseacha agus céimnithe isteach a chur i bhfeidhm freisin le haghaidh príomhréimsí caiteachais, amhail comhtháthú agus talmhaíocht, bunaithe ar mheasúnú cúramach ar na tionchair ar earnálacha éagsúla;

15.á mheas go mbeidh an chéad CAI eile ríthábhachtach chun an tAontas a ullmhú don mhéadú agus do na tíortha is iarrthóirí ar aontachas;

16.ag meabhrú an tseasaimh ón bParlaimint a cuireadh in iúl i rún uaithi an 7 Bealtaine 2025 maidir le buiséad fadtéarmach athchóirithe don Aontas i ndomhan atá ag athrú Téacsanna arna nglacadh, P10_TA(2025)0090 nach mór do bhuiséad fadtéarmach AE imeacht ón leibhéal féin-fhorchurtha, a bhí sriantach go stairiúil, arb ionann é agus 1 % den ollioncam náisiúnta comhiomlánaithe; á chur i bhfáth gur léiríodh i dtuarascálacha Draghi agus Letta go bhfuil gá le hacmhainní dílse breise suntasacha chun go mbeidh an tAontas níos iomaíche, chun an t-aistriú cóir agus glas a thabhairt chun críche agus chun go mbeidh sé in ann é féin a chosaint go neamhspleách ar fhogha na Rúise faoi 2030;

17.á chur i bhfáth gur cheart go gcuirfeadh CAI tar éis 2027 agus buiséad níos éifeachtaí, lena n-áirítear an pacáiste nua acmhainní dílse, ar chumas an Aontais bogadh go cinntitheach i dtreo an mhéadaithe agus beartais, cláir agus tosaíochtaí reatha á gcosaint ag an am céanna;

18.á chur i bhfáth a thábhachtaí atá sé dlisteanacht dhaonlathach bheartais an Aontais a neartú trí chearta cinnteoireachta agus grinnscrúdaithe Pharlaimint na hEorpa a threisiú, lena n-áirítear an ceart fiosrúcháin, arb í an t-aon institiúid í a thoghtar go díreach agus a dhéanann ionadaíocht ar shaoránaigh an Aontais;

19.á chur i bhfios go láidir go bhfuil ról lárnach ag parlaimintí thíortha aontachais AE i bpróiseas aontachais AE, go háirithe trí reachtaíocht a bhaineann le haontachas a rith, agus ag cur béim ar a thábhachtaí atá comhar parlaiminteach agus forbairt comhdhearcaidh maidir le hábhair aontachais AE i ndáil leis sin; á athdhearbhú go bhfuil Parlaimint na hEorpa réidh chun a hacmhainní polaitiúla agus teicniúla a úsáid chun cabhrú le parlaimintí i dtíortha aontachais dul chun cinn a dhéanamh maidir leis an gclár oibre athchóirithe a bhaineann le AE, lena n-áirítear trí ghníomhaíochtaí tacaíochta daonlathais; á chur in iúl gur geal léi an dul chun cinn atá déanta i roinnt tíortha is iarrthóirí, lena n-áirítear trí ghníomhaíochtaí idirghabhála agus trí phróiseas Idirphlé Jean Monnet;

20.á chur i bhfáth gur gá Parlaimint na hEorpa a chumhachtú chun athchóiriú a dhéanamh ar phróisis chinnteoireachta AE trína cur ar comhchéim leis an gComhairle; ag athdhearbhú a hiarrata ar an bParlaimint ceart iomlán tionscnaimh reachtaigh a fháil – an chumhacht dlí an Aontais a thabhairt isteach, a leasú nó a aisghairm; á chur in iúl go bhfuil sí lánchinnte go ndéanfadh ceart tionscnaimh ginearálta agus díreach dlisteanacht dhaonlathach an Aontais a neartú tuilleadh agus saoránaigh an Aontais a chumhachtú;

21.á aithint nach leor iad cearta tionscnaimh díreacha na Parlaiminte chun go mbeadh sí in ann ionadaíocht a dhéanamh ar na saoránaigh, na sochaí sibhialta agus na gcomhpháirtithe sóisialta laistigh de na hinstitiúidí Eorpacha, ná baol air, rud a fhágann go bhfuil monaplacht, a bheag nó a mhór, ag an gCoimisiún ar an tionscnamh reachtach;

22.á chur i bhfios go láidir go dtugtar cearta díreacha tionscnaimh don Pharlaimint mar atá le Conradh Liospóin, agus go n-aithnítear a hinniúlacht ann maidir le féineagrú, feidhm grinnscrúdaithe agus dlisteanacht dhaonlathach na Parlaiminte mar an t-aon institiúid amháin de chuid an Aontais a thoghtar go díreach;

23.á mheas go bhfuil sé ríthábhachtach trédhearcacht agus cuntasacht dhaonlathach na Parlaiminte a fheabhsú, trí ghné Eorpach na dtoghchán a neartú agus trí rialacha toghcháin aonfhoirmeacha a leagan síos ar fud AE; á iarraidh ar an mBallstát eile Cinneadh 2018/994 ón gComhairle Cinneadh (AE, Euratom) 2018/994 ón gComhairle an 13 Iúil 2018 lena leasaítear an Ionstraim maidir le toghadh Feisirí de Pharlaimint na hEorpa trí vótáil chomhchoiteann dhíreach, atá i gceangal le Cinneadh 76/787/CEGC, CEE, Euratom ón gComhairle an 20 Meán Fómhair 1976 (IO L 178, 16.7.2018, lch. 1), nach bhfuil i bhfeidhm. http://data.europa.eu/eli/dec/2018/994/oj).a dhaingniú; á iarraidh ar an gComhairle obair a dhéanamh ar na moltaí a cuireadh chun cinn i seasamh na Parlaiminte an 3 Bealtaine 2022 Rún reachtach ó Pharlaimint na hEorpa an 3 Bealtaine 2022 ar an togra le haghaidh Rialachán ón gComhairle maidir le toghadh Feisirí de Pharlaimint na hEorpa trí vótáil chomhchoiteann dhíreach, lena n-aisghairtear Cinneadh (76/787/CEGC, CEE, Euratom) ón gComhairle agus an Ionstraim maidir le toghadh feisirí de Pharlaimint na hEorpa trí vótáil chomhchoiteann dhíreach atá i gceangal leis an gCinneadh sin (IO C 465, 6.12.2022, lch. 171).; ag athdhearbhú a hiarrata ar Pharlaimint na hEorpa agus ar an gComhairle dul chun cinn a dhéanamh sa phlé maidir le buansásra a thabhairt isteach chun suíocháin Pharlaimint na hEorpa a leithdháileadh;

24.á mheas gur féidir thuasluaite na n-athchóirithe institiúideacha réamh-mhéadaithe a chur chun feidhme ar bhealaí éagsúla, lena n-áirítear trí na solúbthachtaí a thairgtear leis na Conarthaí reatha a ghníomhachtú trí leasú spriocdhírithe amháin nó níos mó ar na Conarthaí;

25.á mheabhrú go bhfuil roinnt ionstraimí solúbthachta ann cheana féin, amhail clásail passerelle, comhar feabhsaithe, staonadh cuiditheach, PESCO agus sásraí um rogha gan bheith páirteach, faoi chreat dlíthiúil reatha an Aontais, mar a léirítear le taithí limistéar Schengen, ceann de na héachtaí is mó atá bainte amach ag AE, agus an t-airgeadra aonair; á mheabhrú gur féidir réitigh chéimniú isteach, maoluithe sealadacha agus idirthréimhsí a chaibidliú le haghaidh réimsí beartais áirithe i gcomhthéacs nósanna imeachta aontachais;

26.ag athdhearbhú a seasaimh gur cheart go dtarlódh comhtháthú difreáilte i gcónaí laistigh de chreat an Chonartha, gur cheart go gcoinneodh sé aontacht institiúidí AE agus nár cheart go gcruthófaí socruithe institiúideacha comhthreomhara ná socruithe a sháraíonn spiorad agus bunphrionsabail dhlí AE go hindíreach mar thoradh air, ach gur cheart, ina ionad sin, go bhféadfaí comhlachtaí sonracha a bhunú i gcás inarb iomchuí, gan dochar d’inniúlachtaí agus do ról institiúidí AE;

27.á thabhairt chun suntais go gceadaítear leis na solúbthachtaí dá bhforáiltear leis na Conarthaí reatha níos mó a dhéanamh chun dul chun cinn a dhéanamh i dtreo aontas cosanta Eorpach, gan gá le próiseas cuimsitheach athchóirithe Conartha; á chur i bhfios go láidir go mbeidh gá ar deireadh le cinneadh d’aon toil i gcomhréir le hAirteagal 42(2) chun buanaontas cosanta Eorpach a bhunú;

28.á chur i bhfáth, i réimse na cosanta, go gcuirtear, le PESCO (sean-Airteagal 46 CAE), ar chumas grúpa Ballstát dul chun cinn a dhéanamh i dtreo chóras cosanta Eorpach a chruthú; ag tabhairt dá haire, in ainneoin gur úsáideadh PESCO go príomha do thionscadail cosanta tionsclaíche, go bhfuil an acmhainneacht níos leithne aige a chuireann ar chumas na mBallstát toilteanach comhchosaint a institiúidiú gan mhoill, fiú in éagmais aontoilíochta laistigh den Chomhairle Eorpach;

29.á chur i bhfios go láidir, de bhun fhorálacha na gConarthaí atá ann cheana, go gceadófaí le cinneadh arna ghlacadh trí thromlach cáilithe córas cosanta Eorpach a chruthú faoi Airteagal 42(6) CAE agus Airteagal 1(b) de Phrótacal 10, agus ag an am céanna go bhfágfaí an doras ar oscailt do Bhallstáit eile a bheith rannpháirteach ag céim níos déanaí, mar a tharla i gcás an aontais eacnamaíoch agus airgeadaíochta; á iarraidh, i ndáil leis sin, ar an gCoimisiún agus ar na Ballstáit toilteanacha forálacha PESCO a ghníomhachtú chun na críche sin gan mhoill;

30.á iarraidh ar an gCoimisiún agus ar an gComhairle torthaí na n-athbhreithnithe beartais a chur in iúl go soiléir agus treochlár réalaíoch, seicheamhach a fhorbairt, i gcomhar leis an bParlaimint, chun na hathchóirithe institiúideacha is gá a chur chun feidhme i gcomhar le próiseas an mhéadaithe;

31.ag treorú dá hUachtarán an rún seo a chur ar aghaidh chuig an gComhairle agus chuig an gCoimisiún Eorpach.