1.Ifakkar il-memorja, sena wara t-traġedja, tas-16-il vittma li tilfu ħajjithom minħabba li, fl-1 ta’ Novembru 2024, sfronda saqaf estern tal-istazzjon ferrovjarju ta’ Novi Sad u jesprimi s-solidarjetà tiegħu ma’ dawk li ndarbu; itenni l-appell tiegħu biex isiru proċedimenti ġudizzjarji sħaħ u trasparenti wara l-investigazzjoni mill-awtoritajiet, biex dawk responsabbli jitressqu quddiem il-ġustizzja, f’konformità mal-istat tad-dritt; jitlob eżami tekniku indipendenti tal-falliment strutturali, rieżami komprensiv tal-permessi tal-kostruzzjoni u tal-proċeduri ta’ sorveljanza, u valutazzjoni sħiħa tal-potenzjal ta’ korruzzjoni jew negliġenza; iħeġġeġ lill-awtoritajiet Serbi jiggarantixxu lill-familji tal-vittmi aċċess effettiv għall-ġustizzja u kumpens adegwat; jissottolinja l-ħtieġa li jiġi eżaminat b’mod usa’ sa liema punt il-korruzzjoni wasslet biex l-istandards tas-sikurezza tbaxxew u kkontribwiet għal din it-traġedja;

2.Jappoġġja d-dritt tal-istudenti u ċ-ċittadini Serbi għal protesti paċifiċi li jitolbu l-akkontabbiltà u r-riformi demokratiċi marbuta direttament mal-istat tad-dritt, li l-UE tistenna mis-Serbja; jisħaq fuq l-importanza tal-kuraġġ ċiviku, tal-impenn għan-nonvjolenza, u tal-involviment taż-żgħażagħ għall-avvanz tal-perkors Ewropew tas-Serbja; jinnota l-lista tal-istudenti Serbi magħżula bħala finalisti għall-Premju Sakharov għal-Libertà tal-Ħsieb 2025; jappoġġja t-tentattivi ġenwini ta’ djalogu dwar kif il-gvern jista’ jissodisfa t-talbiet tal-istudenti; jinsab imħasseb ħafna dwar il-fatt li s-sitwazzjoni fis-Serbja għadha mimlija tensjoni u polarizzazzjoni li tista’ faċilment twassal għall-vjolenza, li hija riżultat dirett ta’ diskors ta’ mibegħda, ta’ promozzjoni tal-vjolenza, ta’ kampanji ta’ malafama kontra l-avversarji, ta’ propaganda kontra l-UE u favur ir-Russja mifruxa b’mod wiesa’ permezz ta’ media kkontrollata mill-gvern kif ukoll minn uffiċjali tal-gvern, kif ukoll ta’ falliment enormi mil-lat uffiċjali li jiġi kkonfrontat u aċċettat il-passat tas-Serbja; jistieden lill-atturi politiċi u soċjali kollha fis-Serbja joqogħdu lura minn tali retorika u jikkontribwixxu għat-trawwim ta’ klima ta’ rispett reċiproku, djalogu demokratiku u tnaqqis tat-tensjoni; iħeġġeġ lill-Gvern Serb jippromwovi parteċipazzjoni politika inklużiva u jiggarantixxi aċċess ugwali għall-media lill-partiti politiċi u lill-kandidati kollha; jisħaq l-importanza tad-depolarizzazzjoni tad-diskors pubbliku u t-trawwim ta’ kultura politika msejsa fuq it-tolleranza, il-kompromess u r-rispett għall-istituzzjonijiet demokratiċi; jistieden lis-soċjetà ċivili, lill-media u lill-istituzzjonijiet edukattivi jaqdu rwol attiv biex jingħelbu d-diviżjonijiet tas-soċjetà u tissaħħaħ ir-reżiljenza demokratika;

3.Jesprimi tħassib dwar l-approfondiment tal-polarizzazzjoni politika fis-Serbja; jistieden lill-atturi politiċi kollha, lir-rappreżentanti tas-soċjetà ċivili u lill-partijiet ikkonċernati rilevanti fis-Serbja jinvolvu ruħhom fi djalogu kostruttiv u ħieles minn indħil jew pressjoni esterni, bl-għan li titnaqqas il-polarizzazzjoni politika u soċjali, tinbena l-fiduċja fost l-istituzzjonijiet u tinstab triq sostenibbli ’l quddiem għall-pajjiż; jenfasizza li s-sovranità u l-perkors politiku tas-Serbja għandhom jirriflettu l-aspirazzjonijiet taċ-ċittadini tagħha;

4.Jikkundanna bl-aktar mod qawwi l-mewġa ta’ vjolenza u ta’ intimidazzjonijiet sponsorizzati mill-Istat fil-konfront tad-dimostranti paċifiċi, tal-ġurnalisti, tal-organizzazzjonijiet tas-soċjetà ċivili u tar-rappreżentanti tal-oppożizzjoni fis-Serbja, kif ukoll l-arresti indiskriminati tagħhom; jikkundanna l-kampanji ta’ malafama, l-intimidazzjonijiet fil-konfront tal-media u l-użu abbużiv tad-data personali biex jiġu skreditati d-dimostranti u jħeġġeġ lill-awtoritajiet Serbi jiżguraw il-libertà tal-media; jistieden lill-uffiċjali għolja jġibu fi tmiemha r-retorika xewwiexa li tinċita l-ostilità jew il-vjolenza; jikkundanna l-użu ta’ sorveljanza illegali kontra d-dimostranti, bħal permezz tal-użu ta’ Pegasus, ta’ Cellebrite u ta’ NoviSpy; jesprimi tħassib partikolari dwar l-użu ta’ apparat akustiku fuq medda twila u l-użu estensiv tal-gass tad-dmugħ kontra ċ-ċivili; iħeġġeġ l-adozzjoni u l-implimentazzjoni ta’ protokolli ċari dwar it-teknoloġiji legali ta’ kontroll tal-folla u dwar il-mekkaniżmi ta’ sorveljanza indipendenti; jistieden lill-Gvern Serb jiggarantixxi u jirrispetta bis-sħiħ id-dritt tal-poplu ta’ għaqda u l-libertà tal-espressjoni f’konformità mal-Kostituzzjoni Serba, id-Dikjarazzjoni Universali tad-Drittijiet tal-Bniedem u l-Konvenzjoni Ewropea dwar id-Drittijiet tal-Bniedem; jikkundanna wkoll il-forom kollha ta’ diskors ta’ mibegħda u inċitament għall-mibegħda, b’mod partikolari kontra l-minoranzi nazzjonali;

5.Iqis lill-mexxejja Serbi politikament responsabbli għar-repressjoni li ħraxet, għan-normalizzazzjoni tal-vjolenza u għall-imminar tal-istituzzjonijiet demokratiċi; jiddeplora l-fatt li l-biċċa l-kbira tal-uffiċjali statali tal-ogħla livell qegħdin ixerrdu b’mod attiv teoriji ta’ komplott dwar is-saqaf estern li sfronda bħala att ta’ sabotaġġ jew attakk terroristiku; huwa mħasseb bin-nuqqas ta’ reazzjoni mill-istituzzjonijiet statali, fosthom l-aġenziji inkarigati mill-infurzar tal-liġi u l-ġudikatura, biex jirrespinġu dawn l-affermazzjonijiet infondati;

6.Iwissi kontra l-użu ħażin tad-dritt kriminali biex titrażżan il-parteċipazzjoni ċivika; jisħaq li l-emendi għall-Kodiċi Kriminali, il-Kodiċi ta’ Proċedura Kriminali u l-Liġi tal-2005 dwar id-Delinkwenti Minorenni u l-Protezzjoni Kriminali tal-Minorenni ma jridux jirriżultaw fil-kriminalizzazzjoni ta’ mġiba paċifika jew forom mhux vjolenti ta’ protesta; ifakkar li l-applikazzjoni proporzjonali tas-sanzjonijiet kriminali hija pedament tal-istat tad-dritt u tal-obbligi tas-Serbja skont il-Konvenzjoni Ewropea dwar id-Drittijiet tal-Bniedem;

7.Jinsab imħasseb dwar l-arresti illegali li saru qabel il-protesti tal-15 ta’ Marzu u tat-28 ta’ Ġunju 2025, li kienu preċeduti minn reġistrazzjonijiet żvelati tal-konverżazzjonijiet tas-suspettati ppubblikati mill-media favur il-gvern; josserva li diversi attivisti politiċi u membri tal-partit fl-oppożizzjoni, Moviment taċ-Ċittadini Liberi (PSG), ġew arrestati fuq dawn ir-raġunijiet u li wħud għadhom f’detenzjoni domiċiljari jew f’eżilju; jitlob li dawn jinħelsu minnufih;

8.Jitlob li jsiru investigazzjonijiet urġenti, imparzjali u trasparenti tal-allegazzjonijiet kollha ta’ użu mhux neċessarju u sproporzjonat tal-forza, arresti arbitrarji, detenzjonijiet, torturi, vjolenza sesswali fuq persuni detenuti, prosekuzzjonijiet b’motivazzjoni politika u abbużi gravi oħra tad-drittijiet tal-bniedem, bħal uffiċjali li jobżqu fuq persuni detenuti mrażżna u li jsawtuhom, li jiddegradawhom verbalment u li jhedduhom bil-mewt; jistieden lill-awtoritajiet jeżaminaw bir-reqqa l-allegazzjonijiet skont liema dan il-ksur joriġina minn uffiċjali ta’ livell għoli tas-servizzi ta’ protezzjoni tal-pulizija (JZO), b’mod partikolari l-uffiċjal kmandant tagħhom, Marko Kričak; itenni li dawn l-azzjonijiet jistgħu jammontaw għal trattament inuman u degradanti li huwa pprojbit mid-dritt internazzjonali u mill-protokolli tal-pulizija;

9.Jieħu nota tar-riżenja tal-Prim Ministru Miloš Vučević, li ġiet ikkonfermata mill-Assemblea Nazzjonali fid-19 ta’ Marzu 2025, u l-ħatra sussegwenti tal-gvern il-ġdid immexxi minn Đuro Macut fis-16 ta’ April 2025;

10.Jinnota l-arrest f’Awwissu 2025 tal-ex ministri tal-gvern Tomislav Momirović and Goran Vesić, u l-ħelsien sussegwenti tagħhom, fuq akkużi ta’ abbuż tal-uffiċċju u suspett ta’ danni għall-baġit statali Serb ta’ mill-anqas USD 115-il miljun b’rabta mar-rikostruzzjoni tal-linja ferrovjarja bejn Belgrad u Budapest, inkluż is-saqaf estern li sfronda tal-istazzjon ferrovjarju ta’ Novi Sad; jiddispjaċih ħafna dwar it-tfixkil tal-ġustizzja li impedixxa lil dawk responsabbli għall-isfrondar tas-saqaf tal-istazzjon ferrovjarju milli jinżammu akkontabbli; jikkundanna l-kampanji ta’ malafama mxerrda permezz ta’ kanali favur il-gvern kontra l-imħallfin u l-prosekuturi li jaħdmu biex jinfurzaw l-istat tad-dritt;

11.Jikkundanna bil-qawwa r-repressjoni tal-gvern fil-konfront tal-impjegati fis-setturi tal-edukazzjoni u l-kultura talli appoġġjaw il-protesti, inkluż it-telf ta’ xogħol, it-tnaqqis tas-salarji, il-preżenza tal-pulizija fil-campuses universitarji u r-revoka tal-finanzjamenti għall-universitajiet pubbliċi;

12.Jistieden lill-awtoritajiet Serbi jerġgħu minnufih jibdew jagħtu finanzjamenti lill-universitajiet; jistieden lill-istituzzjonijiet kompetenti jiżguraw il-parteċipazzjoni mingħajr xkiel tal-komunità akkademika u tar-riċerka fil-proġetti ffinanzjati mill-UE;

13.Jikkundanna l-azzjonijiet tal-membri tal-partit fil-gvern, speċifikament l-organizzazzjoni ta’ kamp illegali fil-park Pionirski quddiem il-bini tal-presidenza u l-espansjoni sussegwenti tiegħu fil-pjazza ta’ quddiem l-Assemblea Nazzjonali; jinsab imħasseb serjament dwar il-bosta rapporti ta’ individwi bi sfond kriminali li qed jiġu mobilizzati mill-partit fil-gvern fl-ambitu ta’ attivitajiet kontra l-protesti, biex jattakkaw id-dimostranti b’pirotekniċi, u dan ikompli jeskala t-tensjonijiet, il-vjolenza u l-polarizzazzjoni fil-pajjiż; jikkundanna l-azzjonijiet li jqiegħdu fil-mira lill-membri ta’ minoranzi nazzjonali, inklużi l-Islovakki f’Bački Petrovac, ir-Rumeni, il-Bulgari u l-Kroati, u l-użu ta’ insulti etniċi mill-media favur il-gvern;

14.Jikkundanna l-użu arbitrarju tal-maħfra presidenzjali favur persuni kkundannati jew suġġetti għal prosekuzzjoni talli kkommettew vjolenza fuq studenti u ċittadini oħra li pparteċipaw fil-protesti paċifiċi, inkwantu jqis li tali azzjonijiet jikkostitwixxu ndħil dirett fil-ġustizzja u jikkompromettu bis-serjetà l-istat tad-dritt;

15.Jistieden lill-awtoritajiet Serbi jippermettu r-ritorn sikur taċ-ċittadini kollha li ħarbu mill-pajjiż minħabba r-repressjoni politika, l-intimidazzjonijiet jew il-biża’ ta’ persekuzzjonijiet u jiggarantixxu l-protezzjoni sħiħa tagħhom u r-reintegrazzjoni sħiħa tagħhom f’konformità mad-dritt u mal-obbligi internazzjonali tas-Serbja;

16.Jikkundanna bil-qawwa l-arrest u t-tkeċċija illegali ta’ ċittadini tal-UE li għamlu dikjarazzjonijiet favur l-istudenti li qed jipprotestaw, kif ukoll l-iżvelar pubbliku, min-naħa ta’ kriminali tal-gwerra kkundannati, tad-data personali ta’ ċittadini tal-UE; jesprimi tħassib dwar l-għadd dejjem jikber ta’ każijiet ta’ detenzjoni li jinvolvu ċittadini tal-UE fil-fruntieri tas-Serbja;

17.Jikkundanna bl-aktar mod qawwi possibbli l-attakki verbali fuq il-Membri tal-PE mill-ogħla uffiċjali Serbi minħabba l-parteċipazzjoni tagħhom fil-protesti tal-istudenti, jew id-dikjarazzjonijiet li saru fil-kuntest tagħhom, bl-aktar eżempju prominenti tagħhom ikun l-attakk tal-President Vučić fuq il-Membri tal-PE mill-Grupp Verts/ALE fil-5 ta’ Settembru 2025;

18.Jikkundanna l-indħil b’mod apert tal-Federazzjoni Russa fil-protesti Serbi permezz tad-diżinformazzjoni mxerrda mill-uffiċjali tagħha, inkluż Vladimir Putin, li jallega li l-protesti jiffurmaw parti minn “rivoluzzjoni tal-lewn” appoġġjata mill-Punent; jirrifjuta l-allegazzjonijiet kollha tal-uffiċjali Serbi u tal-media favur il-gvern skont liema l-UE u wħud mill-Istati Membri tagħha kienu involuti fl-organizzazzjoni tal-protesti tal-istudenti bil-għan li jqanqlu “rivoluzzjoni tal-lewn”; jistieden lill-awtoritajiet Serbi jieħdu azzjoni kontra tali propaganda malizzjuża fil-media nazzjonali, minflok ma tipparteċipa fit-tixrid tagħha; Jibqa’ mħasseb dwar in-narrattivi nazzjonalistiċi preżenti f’partijiet tal-moviment ta’ protesta; jiddeplora l-użu kontinwu ta’ narrattivi nazzjonalistiċi, bħall-kunċetti “Serbja l-Kbira” u “Dinja Serba”, li fil-passat ġew promossi minn ċerti membri tal-Gvern Serb; ifakkar li tali retorika ma għandha l-ebda post fir-relazzjonijiet bejn l-UE u s-Serbja u ddgħajjef l-istabbiltà reġjonali;

19.Jinnota bi tħassib li, b’mod parallel mal-protesti li għaddejjin, il-Gvern Serb jidher li kien qed jinnegozja mas-sidien tal-kumpanija United Media sabiex din “iddgħajjef” il-mezzi tal-media indipendenti li joperaw taħtha; iwissi li, jekk jiġi kkonfermat, dan jirrappreżenta attakk serju fuq il-pluraliżmu tal-media li diġà jinsab fil-periklu fis-Serbja; jistieden lis-Serbja tallinja ruħha mal-politiki tal-UE fil-ġlieda kontra l-indħil barrani u l-kampanji ta’ diżinformazzjoni;

20.Jitlob għall-implimentazzjoni immedjata u sħiħa tar-rakkomandazzjonijiet kollha tal-missjonijiet internazzjonali ta’ osservazzjoni elettorali tal-Uffiċċju għall-Istituzzjonijiet Demokratiċi u d-Drittijiet tal-Bniedem tal-Organizzazzjoni għas-Sigurtà u l-Kooperazzjoni fl-Ewropa (OSKE) biex jiġu żgurati elezzjonijiet ħielsa u ġusti fis-Serbja, b’mod partikolari dawk dwar awditjar indipendenti tar-reġistru elettorali, il-ħatra trasparenti u pluralistika tal-membri tal-Kunsill tal-Awtorità Regolatorja għall-Media Elettronika (REM) u l-forniment ta’ aċċess ġust u ndaqs għall-atturi politiċi kollha għall-ispazju televiżiv u fuq ir-radju fuq ix-xandir pubbliku RTS;

21.Jistieden lill-awtoritajiet Serbi jwettqu spezzjoni teknika ta’ sikurezza komprensiva u kompletament trasparenti tal-faċilitajiet infrastrutturali kollha, inklużi dawk tul il-linja ferrovjarja minn Belgrad, li tgħaddi minn Novi Sad, sal-fruntiera mal-Ungerija, sabiex jiġu żgurati l-integrità, is-sikurezza u l-konformità tal-istruttura tagħhom mal-istandards internazzjonali; iħeġġeġ lill-awtoritajiet Serbi ma jħaddmux faċilitajiet infrastrutturali li ma jkollhomx il-permessi u ċ-ċertifikati meħtieġa għal użu sikur u mingħajr interruzzjonijiet, b’mod partikolari dawk li jinsabu f’kurituri tat-trasport importanti f’livell internazzjonali u reġjonali;

22.Jinkoraġġixxi lis-Serbja ssaħħaħ il-kooperazzjoni mal-Grupp ta’ Stati kontra l-Korruzzjoni (GRECO) u timplimenta bis-sħiħ l-obbligi tagħha fl-ambitu tal-UNCAC; jitlob aktar trasparenza tas-sjieda u tal-finanzjamenti fl-akkwist pubbliku għall-proġetti infrastrutturali; jisħaq li s-Serbja jeħtiġilha tissalvagwardja l-istandards ambjentali u d-drittijiet tal-komunitajiet minoritarji lokali u nazzjonali meta tapprova tali proġetti;

23.Jistieden lill-Kummissjoni u lill-Istati Membri jimmonitorjaw b’attenzjoni l-implimentazzjoni tar-riformi permezz tal-proċess ta’ adeżjoni mal-UE u tal-aġenda ta’ riforma adottata fl-ambitu tal-Faċilità għar-Riforma u t-Tkabbir; jirrikonoxxi l-progress tas-Serbja f’ċerti oqsma, inklużi t-tkabbir ekonomiku, il-konnettività tal-infrastruttura reġjonali u l-kooperazzjoni mal-UE dwar il-ġestjoni tal-migrazzjoni u s-sigurtà tal-enerġija; jilqa’ l-parteċipazzjoni tas-Serbja fi proġetti ffinanzjati mill-UE fl-ambitu tal-Pjan ta’ Tkabbir għall-Balkani tal-Punent u l-Aġenda Ekoloġika; iħeġġeġ lis-Serbja tkompli tavvanza r-riformi f’allinjament mal-istandards tal-UE, u jafferma mill-ġdid ir-rieda tal-UE li tappoġġja lill-poplu Serb fl-isforzi tiegħu lejn futur demokratiku, prosperu u Ewropew;

24.Jissottolinja l-impenn fit-tul tiegħu għall-perspettiva Ewropea tas-Serbja u s-sħubija futura fl-UE, filwaqt li jissottolinja b’mod ċar li l-progress fl-adeżjoni mal-UE jiddependi fuq ir-rispett sħiħ għall-valuri tal-UE, proċess ġenwinament ibbażat fuq il-mertu, u l-aderenza mad-demokrazija, l-istat tad-dritt u d-drittijiet fundamentali, li huma fost il-kriterji ta’ Copenhagen;

25.Itenni li n-negozjati ta’ adeżjoni mal-UE mas-Serbja għandhom jimxu ’l quddiem biss abbażi ta’ progress sostenibbli u li jista’ jitkejjel fil-ġabra tal-elementi fundamentali, b’mod partikolari l-istat tad-dritt, il-ġlieda kontra l-korruzzjoni u l-kriminalità organizzata, l-indipendenza tal-ġudikatura, il-libertà tal-media, ir-riforma tal-amministrazzjoni pubblika, l-allinjament sħiħ mal-politika estera u ta’ sigurtà komuni (PESK) tal-UE, u s-sanzjonijiet kontra r-Russja; ifakkar li s-Serbja tibqa’ eċċezzjoni notevoli fil-Balkani tal-Punent fir-rigward tal-allinjament mal-PESK; jenfasizza li l-allinjament progressiv mal-PESK huwa rekwiżit ewlieni għall-pajjiżi kandidati kollha tal-UE; jistieden lill-awtoritajiet Serbi jrawmu diskussjoni miftuħa u bbażata fuq il-fatti dwar l-adeżjoni mal-UE;

26.Itenni l-appoġġ qawwi tiegħu għall-organizzazzjonijiet tas-soċjetà ċivili, id-difensuri tad-drittijiet tal-bniedem u l-attivisti indipendenti Serbi li jaħdmu biex isaħħu d-demokrazija, l-istat tad-dritt u d-drittijiet fundamentali; jistieden lill-Kummissjoni tiżgura finanzjament adegwat u aċċessibbli u mekkaniżmi ta’ protezzjoni effettivi għall-atturi tas-soċjetà ċivili; jikkundanna kwalunkwe forma ta’ intimidazzjoni, fastidju jew pressjoni amministrattiva kontra organizzazzjonijiet u attivisti mhux governattivi; jenfasizza r-rwol vitali tas-soċjetà ċivili fil-promozzjoni tat-trasparenza, il-monitoraġġ tal-istandards demokratiċi u ż-żamma tal-awtoritajiet pubbliċi akkontabbli;

27.Jappoġġja l-organizzazzjoni malajr ta’ missjoni ta’ ġbir ta’ informazzjoni ad hoc tal-UE fis-Serbja, bil-parteċipazzjoni tal-Parlament Ewropew, bil-għan li jiġu vvalutati fuq il-post il-qagħda tad-demokrazija, il-protesti li għaddejjin, l-attakki fuq id-dimostranti u r-repressjoni fil-konfront tal-istudenti, tal-akkademiċi, tal-edukaturi u tal-impjegati fis-settur pubbliku;

28.Jistieden lill-uffiċjali tal-ogħla livell tal-UE jastjenu milli jagħmlu dikjarazzjonijiet infondati li jfaħħru l-proċess ta’ riforma fis-Serbja; jilqa’ l-fatt li, waqt iż-żjara li għamlet dan l-aħħar fis-Serbja, il-President tal-Kummissjoni biddlet it-ton, u dan jirrifletti valutazzjoni aktar preċiża tal-problemi sottostanti tas-Serbja u tar-riżultati negattivi f’dawk li huma riformi fundamentali; jieħu nota tal-ftehim imħabbar fir-rigward tal-verifika indipendenti tar-reġistru elettorali u tal-Kunsill tal-Awtorità Regolatorja għall-Media Elettronika (REM), filwaqt li jissottolinja li l-progress huwa vvalutat abbażi tal-implimentazzjoni tar-riformi;

29.Jistieden lill-Kummissjoni tniedi inizjattiva għall-impożizzjoni ta’ sanzjonijiet individwali mmirati fil-konfront ta’ dawk responsabbli minn ksur gravi tad-dritt u tad-drittijiet tal-bniedem fis-Serbja, bi qbil mar-reġim globali ta’ sanzjonijiet tal-UE b’rabta mad-drittijiet tal-bniedem;

30.Jistieden lill-Istati Membri tal-UE jsaħħu l-miżuri ta’ protezzjoni għall-persuni f’riskju, inklużi l-viżi ta’ emerġenza u l-programmi ta’ trasferiment; iħeġġeġ lill-missjonijiet diplomatiċi tal-UE u tal-Istati Membri jimmonitorjaw mill-qrib il-proċedimenti ġudizzjarji kollha li għaddejjin relatati mal-protesti; iħeġġeġ lill-Istati Membri tal-UE jadottaw rispons magħqud għar-rigress demokratiku tas-Serbja, inkluż billi jikkunsidraw sanzjonijiet immirati kontra individwi responsabbli għal ksur serju tad-dritt u tad-drittijiet tal-bniedem fis-Serbja;

31.Jistieden lill-pajjiżi kollha li se jipparteċipaw fl-Expo 2027 fis-Serbja jieħdu kont tat-tħassib u tal-provi gravi ta’ korruzzjoni mifruxa b’rabta mal-awtoritajiet fil-poter, kif ukoll tan-nuqqas, skont rapporti, ta’ konformità mal-istandards tal-kostruzzjoni bażiċi u mar-rekwiżiti ġuridiċi fl-organizzazzjoni u fil-kostruzzjoni tal-espożizzjoni;

32.Jagħti istruzzjonijiet lill-President tiegħu biex tgħaddi din ir-riżoluzzjoni lill-President tal-Kunsill Ewropew, lill-Kummissjoni, lill-Viċi President tal-Kummissjoni/ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-gvernijiet u lill-parlamenti tal-Istati Membri, lill-President, lill-Gvern u lill-Assemblea Nazzjonali tas-Serbja, lill-Uffiċċju tal-OSKE għall-Istituzzjonijiet Demokratiċi u d-Drittijiet tal-Bniedem, lill-Assemblea Parlamentari tal-OSKE, u lill-Assemblea Parlamentari tal-Kunsill tal-Ewropa.