(1)Fl-Unjoni bħalissa ma hemm l-ebda approċċ komuni għall-komputazzjoni tal-bażi taxxabbli għan-negozji. Għalhekk, in-negozji tal-Unjoni huma obbligati jikkonformaw ma’ sistema tat-taxxa korporattiva differenti f’kull Stat Membru li joperaw fih. Pereżempju, fl-2023, skont ir-Rapport Annwali tal-2024 dwar it-Tassazzjoni, ir-rati statutorji tat-taxxa korporattiva kienu jvarjaw bejn l-Istati Membri minn 10 % sa 31,5 % (u bejn 9 % u 29 %, meta jitqiesu l-iskemi ta’ għajnuna fiskali stabbiliti mill-gvernijiet).

(2)L-eżistenza ta’ 27 sistema tat-taxxa korporattiva fuq l-introjtu differenti fl-Unjoni twassal għal kumplessità fil-konformità mar-regoli tat-taxxa u twassal għal kompetizzjoni inġusta għan-negozji, u tista’ twassal għal taxxa doppja, evitar tat-taxxa u nontassazzjoni doppja. Skont ir-Rapport Annwali tal-2024 dwar it-Tassazzjoni, it-telf fid-dħul minħabba t-trasferiment tal-profitti korporattivi kien stmat li kien jilħaq l-20 % tad-dħul kollu mit-taxxa korporattiva miġbur fl-2022 fl-Unjoni, li jammonta għal madwar EUR 100 biljun f’valur nominali. Dawk il-fenomeni saru aktar evidenti hekk kif il-globalizzazzjoni u d-diġitalizzazzjoni tal-ekonomija biddlu b’mod sinifikanti l-perċezzjoni tal-fruntieri fuq l-art u l-mudelli ta’ negozju. Hekk kif il-gvernijiet ippruvaw jadattaw għal dik ir-realtà l-ġdida, rispons frammentat fost l-Istati Membri wassal għal aktar distorsjonijiet fis-suq intern. Id-diversi oqfsa legali inevitabbilment iwasslu għal prattiki differenti tal-amministrazzjoni tat-taxxa fl-Istati Membri wkoll. Dan spiss jinvolvi proċeduri twal ikkaratterizzati minn nuqqas ta’ prevedibbiltà u minn inkonsistenza flimkien ma’ kostijiet għoljin tal-konformità, li jista’ jkollhom impatt fuq l-investimenti transfruntieri. Tali kumplessità tista’ xxekkel l-espansjoni tan-negozji fis-suq intern, b’impatti negattivi ulterjuri fuq l-innovazzjoni, il-kompetittività u l-impjiegi. Għalhekk, huwa meħtieġ approċċ komuni, mhux biss biex tiġi żgurata tassazzjoni ġusta u effettiva, iżda wkoll biex jissaħħu l-integrità u l-kompetittività tal-kumpaniji li huma attivi fis-suq intern.

(3)Għalkemm huma differenti fit-tfassil tagħhom, il-karatteristiċi fundamentali tas-sistemi tat-taxxa korporattiva fuq l-introjtu huma simili billi jistabbilixxu regoli li għandhom l-għan li jilħqu l-istess objettiv, jiġifieri, li tinkiseb bażi taxxabbli għan-negozji. B’dan il-mod, biex jiġi appoġġat il-funzjonament xieraq tas-suq intern, l-ambjent tat-taxxa korporattiva fl-Unjoni jenħtieġ li jissawwar f’konformità mal-prinċipju li l-kumpaniji jħallsu s-sehem ġust tagħhom ta’ taxxa fil-ġuriżdizzjoni(jiet) fejn jiġu ġġenerati l-profitti tagħhom. Għalhekk, ikun importanti għan-negozji li joperaw fis-suq intern li l-Istati Membri jintroduċu qafas legali komuni sabiex jiġu armonizzati l-karatteristiċi fundamentali tas-sistemi tat-taxxa korporattiva fuq l-introjtu bl-għan li jiġu ssimplifikati r-regoli tat-taxxa, jitnaqqas il-piż amministrattiv, tiġi żgurata kompetizzjoni ġusta, tissaħħaħ iċ-ċertezza legali għall-kumpaniji li joperaw b’ mod transfruntier, u jiġi miġġieled l-evitar tat-taxxa. Il-kamp ta’ applikazzjoni ta’ tali armonizzazzjoni jenħtieġ li jkun strettament limitat għall-kriterji u l-entitajiet imsemmija f’din id-Direttiva, filwaqt li r-rata tat-taxxa u l-politiki ta’ infurzar jibqgħu f’idejn l-Istati Membri, fil-qafas tad-Direttiva tal-Kunsill (UE) 2022/25231a.

(5)Jenħtieġ li l-ambjent għan-negozju fis-suq intern isir aktar attraenti bl-għan li jiġu stimolati t-tkabbir u l-investiment fl-Unjoni. Għal dan l-għan, jenħtieġ li tingħata prijorità lill-promulgazzjoni ta’ qafas komuni ta’ regoli tat-taxxa korporattiva, sabiex ikun aktar faċli biex in-negozji jikkonformaw ma’ tali regoli meta joperaw b’mod transfruntier u wkoll sabiex dawk li jixtiequ jespandu aktar barra mill-pajjiż jiġu inkoraġġiti li jagħmlu hekk u biex tiġi inkoraġġita l-intraprenditorija fis-suq intern. Sett uniku ta’ regoli tat-taxxa korporattiva għall-attività internazzjonali huwa mistenni jirriżulta f’ċertezza tat-taxxa msaħħa u f’anqas tilwimiet dwar it-taxxa, peress li jkun jindirizza b’mod determinat id-distorsjonijiet u jnaqqas l-għadd ta’ każijiet ta’ taxxa doppja u ta’ nontassazzjoni. Dan jimplika wkoll anqas opportunitajiet biex jiġu abbużati xi dispożizzjonijiet nazzjonali speċifiċi tat-taxxa f’kuntest pan-Ewropew. Barra minn hekk, peress li s-sostenibbiltà tad-dħul mit-taxxa hija kruċjali għall-baġits tal-Istati Membri, inkluż sabiex jinvestu fl-infrastruttura, fir-riċerka u fl-iżvilupp, fis-sigurtà u d-difiża, u fit-tranżizzjoni ekoloġika u dik soċjali u sabiex jipprovdu servizzi pubbliċi, speċjalment għall-unitajiet domestiċi l-aktar vulnerabbli, huwa essenzjali li jitfasslu regoli għad-determinazzjoni tal-profitti fl-Unjoni li mhux se jirriżultaw fi dħul aktar baxx għall-IstatiMembri. Barra minn hekk, ikun kruċjali li jiġi żgurat għall-futur li l-allokazzjoni tad-dħul titwettaq f’konformità ma’ għodda bbażata fuq parametri solidi li ma jistgħux jiġu abbużati.

(7)Għalkemm il-livell limitu jiġi ddeterminat fuq il-bażi tad-dħul kombinat tal-grupp fuq bażi globali, il-mandat tad-dispożizzjonijiet jenħtieġ li jkun limitat għall-membri tal-grupp li joperaw fis-suq intern billi d-dritt tal-Unjoni japplika biss fl-Unjoni u ma jobbligax lil Stati mhux Membri. Għalhekk, jenħtieġ li jkun affettwat biss is-subsett tal-Unjoni ta’ tali grupp. Dan ikun jinkludi kumpaniji li huma residenti għal finijiet tat-taxxa fi Stat Membru u l-istabbilimenti permanenti tagħhom, inkluża kwalunkwe preżenza ekonomika sinifikanti, li joperaw fi Stat Membru kif ukoll l-istabbilimenti permanenti fl-Unjoni ta’ kumpaniji f’pajjiżi terzi tal-istess grupp.

(9)L-objettiv tas-simplifikazzjoni tar-regoli kurrenti jenfasizza l-inizjattiva prevista, billi jtejjeb l-effiċjenza u l-kompetittività tas-suq intern. Għalhekk, jenħtieġ li r-regoli dwar il-komputazzjoni tal-bażi għat-taxxa jinbnew billi tiġi applikata serje limitata ta’ aġġustamenti tat-taxxa għar-rapporti finanzjarji ta’ kull membru tal-grupp. Dawn l-aġġustamenti limitati jirrappreżentaw aġġustamenti komuni li huma neċessarji sabiex ir-rapporti tal-kontabilità finanzjarja jiġu kkonvertiti f’bażi għat-taxxa. Meta titqies il-ħtieġa għall-allinjament mad-Direttiva (UE) 2022/2523, jenħtieġ li l-aġġustamenti jiġu adattati mill-ġdid ma’ dak il-qafas, li jenħtieġ li jiffaċilita wkoll l-implimentazzjoni għall-Istati Membri u għan-negozji li diġà jkunu familjari mal-prinċipji ġenerali. F’dak il-qafas, jenħtieġ li jitqies il-ħlas tat-taxxa kumplimentari dovuta f’konformità mad-Direttiva (UE) 2022/2523 jew b’applikazzjoni ta’ taxxa kumplimentari domestika kwalifikata kif imsemmi f’dik id-Direttiva, jew kwalunkwe taxxa minima alternattiva oħra rikonoxxuta f’forum internazzjonali bħall-OECD.

(10)Minħabba li, bl-għan li tinkiseb simplifikazzjoni, il-kontijiet finanzjarji jintużaw bħala punt tat-tluq għall-komputazzjoni tal-bażi għat-taxxa ta’ kull membru tal-grupp, huwa neċessarju li r-regoli tat-taxxa jiġu abbozzati b’tali mod li jibqgħu kemm jista’ jkun qrib il-kontabilità finanzjarja. Fil-każijiet li fihom dan ikun possibbli, it-trattament kontabilistiku finanzjarju ta’ assi jew ta’ obbligazzjoni ma jinbidilx għall-finijiet tat-tassazzjoni u, konsegwentement, ma jkun meħtieġ l-ebda aġġustament. Għaldaqstant, huwa neċessarju wkoll li, f’konformità mar-raġunament tat-tassazzjoni, elementi oħrajn tal-bażi għat-taxxa jiġu ttrattati għall-finijiet tat-taxxa b’mod differenti meta mqabblin ma’ kif jiġu kkwalifikati taħt il-kontabilità finanzjarja. Sabiex tiġi żgurata l-konsistenza mal-prattiki tat-taxxa internazzjonali bħal dawk fl-ambitu tal-qafas tat-Tieni Pilastru, din id-Direttiva jenħtieġ li tippermetti flessibbiltà akbar fl-għażla tal-istandards kontabilistiċi finanzjarji użati biex jiġi ddeterminat ir-riżultat preliminari tat-taxxa.

(12)Sabiex jintlaħaq l-objettiv ewlieni li jinħoloq qafas simplifikat tat-taxxa korporattiva, jenħtieġ li r-riżultati tat-taxxa preliminari għal kull membru tal-grupp jiġu aggregati f’bażi komuni waħda għat-taxxa, sabiex sussegwentement din il-bażi tiġi allokata lill-membri tal-grupp eliġibbli. Tali qafas jenħtieġ li jkun sempliċi għan-negozji u jenħtieġ li jevita li jimponi kwalunkwe piż ġdid fuqhom. L-aġġustamenti tat-taxxa fir-rapporti finanzjarji jipproduċu riżultati tat-taxxa preliminari għal kull membru tal-grupp. Dawn ir-riżultati mbagħad jiġu aggregati, u dan jippermetti l-ħelsien minn taxxa b’limitu massimu għal telf transfruntier bejn il-membri tal-grupp tal-BEFIT, u sussegwentement, il-bażi għat-taxxa aggregata tiġi allokata lill-membri tal-grupp fuq il-bażi ta’ regola dwar l-allokazzjoni ta’ tranżizzjoni; dan iwitti t-triq għal mekkaniżmu permanenti. Il-mekkaniżmu permanenti jenħtieġ li jkun ibbażat fuq formula tat-tqassim, inklużi, iżda mhux biss, erba’ settijiet ta’ fatturi tanġibbli: ix-xogħol, l-assi, il-bejgħ u l-preżenza diġitali. Dan irendi inutli l-ħtieġa li t-tranżazzjonijiet tal-grupp intra-BEFIT ikunu konsistenti mal-prinċipju ta’ distakkament. Dan ikollu l-vantaġġ li juża data aktar reċenti ta’ rapportar pajjiż b’pajjiż (“CBCR”) u l-informazzjoni miġbura matul il-perjodu ta’ tranżizzjoni. Dan jippermetti wkoll valutazzjoni aktar bir-reqqa tal-impatt li l-implimentazzjoni tal-approċċ b’żewġ pilastri hija mistennija jkollha fuq il-bażijiet għat-taxxa nazzjonali u fuq il-bażijiet għat-taxxa tal-grupp tal-BEFIT, u għalhekk, inaqqas il-kostijiet tal-konformità mar-regoli tat-taxxa għall-kumpaniji. B’dan il-mod, xorta jsir possibbli li jintlaħaq l-objettiv ewlieni tan-newtralità tat-taxxa fis-suq intern, li jnaqqas il-każijiet ta’ taxxa doppja u ta’ nontassazzjoni doppja u jtejjeb iċ-ċertezza tat-taxxa bl-għan li jitnaqqas in-numru ta’ tilwimiet dwar it-taxxa. Fid-dawl tal-evoluzzjoni tal-iżviluppi fil-qasam tat-tassazzjoni internazzjonali u l-implimentazzjoni inċerta tal-Ewwel Pilastru minn ġurisdizzjonijiet ewlenin, huwa essenzjali li l-Unjoni tippreserva l-flessibbiltà hi u tiżviluppa mekkaniżmu ta’ allokazzjoni awtonomu, ġust u ekonomikament ibbilanċjat.

(14)Sabiex jipprovdu spazju għat-tkabbir u għall-investiment, l-Istati Membri jitħallew japplikaw ukoll aġġustamenti addizzjonali ta’ wara l-allokazzjoni individwalment (eż. trattament tat-taxxa tal-kontribuzzjonijiet tal-pensjoni) f’oqsma mhux koperti mill-qafas komuni. L-Istati Membri jkunu liberi wkoll li jaġġustaw aktar is-sehem allokat tagħhom mingħajr limitu sabiex jiżguraw li l-Istati Membri jkunu jistgħu jagħmlu l-għażliet ta’ politika nazzjonali tagħhom f’dan il-qasam, pereżempju biex jiġġeneraw l-effiċjenza tar-riżorsi, jistimulaw l-investiment u joħolqu l-impjiegi. Tali aġġustamenti addizzjonali jistgħu jinkludu tnaqqis, allowances, krediti tat-taxxa jew miżuri nazzjonali oħra tat-taxxa korporattiva fuq l-introjtu, inklużi dawk li jippromwovu r-riċerka u l-iżvilupp jew objettivi ta’ politika oħra, dment li tali miżuri japplikaw biss għas-sehem allokat tal-bażi għat-taxxa u ma jaffettwawx il-bażi għat-taxxa konsolidata jew il-mekkaniżmu ta’ allokazzjoni skont din id-Direttiva. Madankollu, l-aġġustamenti ta’ wara l-allokazzjoni jenħtieġ li jiffokaw fuq inċentivi fiskali bbażati fuq l-input. L-Istati Membri jenħtieġ li joqogħdu lura milli joffru inċentivi fiskali bbażati fuq l-output bħal sistemi ta’ inċentivi tat-taxxa favur il-privattivi u sistemi oħra ta’ proprjetà intellettwali.

(15)Xi Stati Membri joperaw sistemi tat-taxxa korporattiva li huma mibnijin fuq prinċipji li jvarjaw mill-aktar approċċ komuni, bħas-sistemi tat-taxxa bbażati fuq id-distribuzzjoni. Għalhekk, huwa ta’ importanza assoluta li jiġu stabbiliti l-aġġustamenti neċessarji, sabiex tiġi żgurata interazzjoni fattibbli ma’ dawk is-sistemi u mhux tiġi introdotta kontradizzjoni bejn iż-żewġ sistemi, li tiskoraġġixxi l-ħolqien ta’ negozji. Is-soluzzjoni tista’ tinstab f’ċerti aġġustamenti ta’ wara l-allokazzjoni. Dawn ikunu jinvolvu li l-parti li tiġi allokata lil membru tal-grupp fil-qafas ta’ sistema bbażata fuq id-distribuzzjoni jkollha tiġi mmodifikata fi proporzjon mad-distribuzzjonijiet magħmulin matul is-sena fiskali. L-essenza ta’ sistema tat-taxxa bbażata fuq id-distribuzzjoni tinżamm bis-sħiħ, meta jitqies li d-distribuzzjoni timmarka punt ta’ żmien għat-tassazzjoni tal-parti allokata u, b’hekk, jiġi ddeterminat kemm minn din ikun jeħtieġ li jiġi intaxxat. F’dan ir-rigward, jenħtieġ li jiġi previst li jitħaddem mekkaniżmu ta’ riport, sabiex jiġi żgurat li l-parti allokata li ma tkunx intaxxata fis-sena kurrenti tkun taxxabbli fis-snin ta’ wara. L-inklużjoni possibbli ta’ sistemi tat-taxxa bbażati fuq id-distribuzzjoni fil-kamp ta’ applikazzjoni ta’ din id-Direttiva jenħtieġ li tiġi vvalutata wara 5 snin.

(17)Qafas komuni għat-tassazzjoni korporattiva bilfors li jkollu sistema amministrattiva, li idealment jenħtieġ li tipprovdi għal grad ta’ ċertezza tat-taxxa u ta’ simplifikazzjoni. Sabiex tiġi promossa l-uniformità, is-sistema amministrattiva jkollha tibni fuq l-importanza li jitħaddem punt ċentralizzat ta’ referenza sabiex jiġu indirizzati diversi kwistjonijiet komuni, bħal Dikjarazzjoni ta’ Informazzjoni għall-grupp sħiħ, u l-iżgurar ta’ grad adegwat ta’ kunfidenzjalità u ta’ sigurtà, kif ukoll ta’ koordinazzjoni u ta’ kollaborazzjoni fost l-amministrazzjonijiet nazzjonali tat-taxxa. Fl-istess ħin, matul it-tranżizzjoni, jenħtieġ li s-sistema amministrattiva tirrispetta bis-sħiħ is-sovranità tat-taxxa nazzjonali billi d-dikjarazzjonijiet tat-taxxa lokali, l-awditi u s-soluzzjoni tat-tilwim ikollhom jibqgħu primarjament fil-livell tal-Istati Membri.

(18)Sabiex jiġi żgurat li r-regoli tal-qafas komuni jiġu implimentati u infurzati b’mod korrett, jenħtieġ li l-Istati Membri jistabbilixxu regoli dwar il-penali applikabbli għall-ksur tad-dispożizzjonijiet nazzjonali adottati skont din id-Direttiva. Jenħtieġ li penali bħal dawn ikunu effettivi, proporzjonati u dissważivi. Dawk il-penali jenħtieġ li jiġu stabbiliti b’rata minima ta’ 0,1 % tal-fatturat tal-grupp tal-BEFIT f’każ ta’ nuqqas ta’ preżentazzjoni tad-dikjarazzjoni tal-informazzjoni tal-BEFIT kif xieraq u f’każ ta’ rapportar ħażin apposta f’dikjarazzjoni tal-informazzjoni tal-BEFIT.

(19)Sabiex jiġu ottimizzati l-benefiċċji li jkun hemm qafas legali komuni għall-komputazzjoni tal-bażi għat-taxxa korporattiva fis-suq intern, jenħtieġ li l-applikazzjoni tar-regoli tkun fakultattiva għall-gruppi, inklużi l-gruppi ta’ SMEs, li jaqilgħu dħul annwali kombinat ta’ anqas minn EUR 750 000 000 sakemm iħejju rapporti finanzjarji konsolidati u jkollhom preżenza taxxabbli fl-Unjoni. Billi l-applikazzjoni tar-regoli tinżamm miftuħa għal gruppi ta’ daqs iżgħar, aktar gruppi bi strutturi u b’attivitajiet transfruntieri jistgħu jibbenefikaw mis-simplifikazzjoni li joffri l-qafas komuni. Il-kumpaniji li jagħżlu li jkunu koperti b’din id-Direttiva jenħtieġ li jibbenefikaw mill-assistenza teknika tal-Istati Membri u tal-Kummissjoni biex jikkonformaw mar-regoli l-ġodda u hekk irawmu l-attivitajiet transfruntieri tagħhom.

8.Il-Kummissjoni għandha tingħata s-setgħa li tadotta atti delegati f’konformità mal-Artikolu 74 sabiex temenda l-Annessi I u II strettament biex tirrifletti l-bidliet fil-liġijiet tal-Istati Membri fir-rigward tal-forom ta’ kumpaniji u tat-taxxi korporattivi.

(a)il-kumpanija tkun jew l-entità omm apikali tal-grupp jew kwalunkwe kumpanija oħra tal-grupp li fiha l-entità omm apikali jkollha, direttament jew indirettament, tal-anqas 50 % tad-drittijiet tas-sjieda jew tad-drittijiet li jagħtu intitolament għall-profitt;

(b)l-uffiċċju prinċipali tal-istabbiliment permanenti jkun jew l-entità omm apikali tal-grupp jew kwalunkwe membru ieħor (kumpanija jew entità) tal-grupp li fih l-entità omm apikali jkollha, direttament jew indirettament, tal-anqas 50 % tad-drittijiet tas-sjieda jew tad-drittijiet li jagħtu intitolament għall-profitt.

L-introjtu jew it-telf nett tal-kontabilità finanzjarja ta’ membru tal-grupp tal-BEFIT għandu jiġi aġġustat f’konformità mal-Artikolu 16(1), il-punt (e) tad-Direttiva (UE) 2022/2523.

imħassar

imħassar

1.L-introjtu jew it-telf nett tal-kontabilità finanzjarja ta’ membru tal-grupp BEFIT għandu jiġi aġġustat sabiex fis-sena fiskali tal-akkwiżizzjoni jiġi eskluż kwalunkwe assi fiss tanġibbli li għandu valur kontabilistiku qabel id-deprezzament li jkun anqas minn EUR 7500.

(a)il-bini kollu kif ukoll kwalunkwe tip ieħor ta’ proprjetà immobbli u ta’ struttura li tintuża għan-negozju, bl-eċċezzjoni tal-bini u l-istrutturi industrijali: 30 sena;

(b)l-assi fissi tanġibbli l-oħrajn kollha: il-ħajja utli tagħhom kif ivvalutata f’konformità mal-istandard kontabilistiku aċċettabbli fl-Unjoni msemmi fl-Artikolu 7, iżda b’miimu ta’ 10 snin;

1.Il-kostijiet tal-akkwiżizzjoni, il-kostijiet tal-kostruzzjoni jew il-kostijiet tat-titjib, flimkien mad-data tal-bidu tal-użu wara l-akkwiżizzjoni, il-kostruzzjoni jew it-titjib, għandhom jiġu rreġistrati f’reġistru tal-assi fissi fi ħdan il-grupp tal-BEFIT għal kull assi fiss separatament.

3.Ir-reġistru tal-assi fissi għandu jinżamm b’mod li jipprovdi informazzjoni suffiċjenti, inkluża data dwar id-deprezzament, sabiex jiġi kkalkolat ir-riżultat preliminari tat-taxxa. Kopja tar-reġistru tal-assi fissi għandha tinżamm mill-grupp tal-BEFIT għal 5 snin mid-data li fiha jkun waqaf id-deprezzament ta’ tali assi. Ir-reġistru tal-assi fissi għandu jinkludi tal-anqas l-informazzjoni li ġejja:

Meta kumpanija jew stabbiliment permanenti jidħol fi grupp tal-BEFIT, kwalunkwe telf mhux ikkumpensat imġarrab sa ħames snin qabel id-data tad-dħul, f’konformità mal-liġi dwar it-taxxa korporattiva tal-Istat Membru tar-residenza jew tal-post tat-taxxa tiegħu rispettivament, għandu jitnaqqas mis-sehem tiegħu tal-bażi għat-taxxa tal-BEFIT kif iddeterminat f’konformità mal-Kapitolu III.

Minkejja l-Artikolu 9, meta, bħala riżultat ta’ disponiment tal-ishma, membru tal-grupp tal-BEFIT jitlaq mill-grupp tal-BEFIT u matul dik is-sena fiskali preċedenti, dan il-membru tal-grupp tal-BEFIT ikun kiseb, fi tranżazzjoni tal-grupp intra-BEFIT, assi fiss wieħed jew aktar, l-ammont li jikkorrispondi għall-gwadann jew għat-telf li jirriżulta mid-disponiment tal-grupp intra-BEFIT ta’ dawn l-assi fissi għandu jiġi inkluż fl-introjtu jew fit-telf nett tal-kontabilità finanzjarja tal-membru tal-grupp tal-BEFIT li kien sid l-assi qabel id-disponiment tal-grupp intra-BEFIT.

L-ewwel subparagrafu ma għandux japplika jekk il-membru tal-grupp tal-BEFIT juri li t-tranżazzjoni tal-grupp intra-BEFIT twettqet għal raġunijiet kummerċjali validi skont it-tifsira tal-Artikolu 15(1), il-punt (a), tad-Direttiva 2009/133/KE.

(b)ammont negattiv, it-telf għandu jiġi paċut kontra l-introjtu taxxabbli tal-entità omm apikali u għandu jiġi riportat għal massimu ta’ 5 snin u paċut kontra l-bażi għat-taxxa pożittiva tal-BEFIT li jmiss. It-tnaqqis għandu jkun proporzjonali għall-parteċipazzjoni tal-entità omm apikali fis-sussidjarji kwalifikanti tagħha kif imsemmi fl-Artikolu 3(1) u għandu jkun sħiħ għall-istabbilimenti permanenti. It-tnaqqis tal-bażi għat-taxxa tal-kontribwent residenti ma għandux jirriżulta f’ammont negattiv.

Għal kull sena fiskali bejn l-1 ta’ Lulju 2028 u t-30 ta’ Ġunju 2033 l-aktar tard (il-“perjodu ta’ tranżizzjoni”), il-bażi għat-taxxa tal-BEFIT għandha tiġi allokata lill-membri tal-grupp tal-BEFIT f’konformità mal-perċentwal tal-allokazzjoni bażi.

Għal gruppi li jsiru soġġetti għal din id-Direttiva wara t-tmiem tal-ewwel sena fiskali meta din id-Direttiva tibda tapplika, il-perjodu ta’ tranżizzjoni msemmi fl-ewwel subparagrafu għandu jintemm sa mhux aktar tard mit-30 ta’ Ġunju 2033.

(a)żona b’riskju baxx: meta l-ispiża mġarrba, jew l-introjtu miksub, minn membru tal-grupp tal-BEFIT minn tranżazzjonijiet tal-grupp intra-BEFIT jiżdiedu f’sena fiskali b’anqas minn 15 % meta mqabbla mal-ispiża jew mal-introjtu medji tat-3 snin fiskali preċedenti minn tranżazzjonijiet tal-grupp intra-BEFIT;

(b)żona ta’ riskju għoli: meta l-ispiża mġarrba, jew l-introjtu miksub, minn membru tal-grupp tal-BEFIT minn tranżazzjonijiet tal-grupp intra-BEFIT jiżdiedu f’sena fiskali b’15 % jew aktar meta mqabblin mal-ispiża jew mal-introjtu medji tat-3 snin fiskali preċedenti minn tranżazzjonijiet tal-grupp intra-BEFIT.

5.Minkejja l-Artikolu 13(2), kostijiet tas-self eċċessivi kif imsemmijin fl-Artikolu 2 tad-Direttiva tal-Kunsill (UE) 2016/1164 li jirriżultaw minn tranżazzjoni bejn il-membri tal-grupp tal-BEFIT ma għandhomx jiġu rrikonoxxuti għall-finijiet tal-komputazzjoni tal-perċentwal tal-allokazzjoni bażi tal-membru tal-grupp tal-BEFIT li jġarrab it-tali kostijiet. L-Istati Membri għandhom jieħdu l-miżuri xierqa biex jinkoraġġixxu lin-negozji jnaqqsu dawn ir-riskji.

imħassar

10.Ir-regoli stabbiliti fil-paragrafi 1 sa 8 għandhom ikomplu japplikaw sad-dħul fis-seħħ ta’ kwalunkwe emenda proposta skont l-Artikolu 77(b).

2.Minbarra l-aġġustamenti elenkati fil-paragrafu 1, Stat Membru jista’, soġġett għad-Direttiva (UE) 2022/2523, jippermetti ż-żieda jew it-tnaqqis, permezz ta’ entrati addizzjonali, tal-parti allokata tal-membri tal-grupp tal-BEFIT li jkunu residenti għal finijiet tat-taxxa jew jinsabu fil-forma ta’ stabbiliment permanenti f’dak l-Istat Membru.

2.Id-dikjarazzjoni tal-informazzjoni tal-BEFIT għandha tiġi ppreżentata lill-awtorità tad-dikjarazzjoni mhux aktar tard minn sitt xhur wara t-tmiem tas-sena fiskali.

1.L-entità dikjaranti għandha tinnotifika lill-awtorità tad-dikjarazzjoni bl-iżbalji fid-dikjarazzjoni tal-informazzjoni tal-BEFIT fi żmien tliet xhur mis-sottomissjoni f’waqtha ta’ tali dikjarazzjoni.

3.L-informazzjoni kkomunikata bejn il-membri ta’ tim tal-BEFIT, għandha tiġi pprovduta b’mezzi elettroniċi sa fejn ikun possibbli, permezz ta’ konnessjoni sigura jew network sigur, permezz tal-użu ta’ għodda kollaborattiva tal-BEFIT.

4.Sabiex jiġu ffaċilitati l-operat u l-komunikazzjoni tat-tim tal-BEFIT, il-Kummissjoni għandha, permezz ta’ atti ta’ implimentazzjoni, tistandardizza l-komunikazzjoni tal-informazzjoni bejn il-membri ta’ tim tal-BEFIT billi jsir użu minn għodda kollaborattiva tal-BEFIT u tappoġġa t-trażmissjoni sigura tal-informazzjoni. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 73.

1.Membru tal-grupp tal-BEFIT għandu jinnotifika lill-awtorità kompetenti tal-Istat Membru li fih ikun residenti għal finijiet tat-taxxa jew ikun jinsab fil-forma ta’ stabbiliment permanenti dwar żbalji fid-dikjarazzjoni tat-taxxa individwali fi żmien tliet xhur mis-sottomissjoni f’waqtha ta’ tali dikjarazzjoni.

1.L-awtorità kompetenti ta’ Stat Membru tista’ tibda u tikkoordina awditi tal-membri tal-grupp tal-BEFIT li huma residenti għal finijiet tat-taxxa jew jinsabu fil-forma ta’ stabbiliment permanenti f’dak l-Istat Membru. Dik l-awtorità kompetenti għandha tinnotifika lill-membri l-oħra tat-tim tal-BEFIT fi żmien xahar mill-bidu ta’ tali awditu.

1.Membru tal-grupp tal-BEFIT jista’ jappella kontra l-kontenut tal-valutazzjoni tat-taxxa individwali magħmula skont l-Artikolu 64 quddiem l-awtorità kompetenti tal-Istat Membru fejn dak il-membru tal-grupp tal-BEFIT ikun residenti għal finijiet tat-taxxa jew jinsab fil-forma ta’ stabbiliment permanenti fi żmien tliet xhur minn meta l-valutazzjoni tiġi nnotifikata lilu. L-appell amministrattiv għandu jinstema’ minn korp amministrattiv li, f’konformità mal-liġi tal-Istat Membru tal-membru tal-grupp tal-BEFIT, ikun kompetenti sabiex jisma’ appelli fil-prima istanza. L-appell amministrattiv għandu jkun irregolat bil-liġi tal-Istat Membru li fih il-membru tal-grupp tal-BEFIT ikun residenti għal finijiet tat-taxxa jew jinsab fil-forma ta’ stabbiliment permanenti. Meta ma jkun hemm l-ebda korp amministrattiv bħal dan fl-Istat Membru fejn il-membru tal-grupp tal-BEFIT ikun residenti għal finijiet tat-taxxa jew jinsab fil-forma ta’ stabbiliment permanenti, il-membru tal-grupp tal-BEFIT jista’ jippreżenta appell ġudizzjarju direttament.

1.Meta d-deċiżjoni skont l-Artikolu 66 tkun ġiet ikkonfermata jew varjata, l-entità dikjaranti għandu jkollha d-dritt li tappella direttament quddiem il-qrati tal-Istat Membru fejn tkun residenti għal finijiet tat-taxxa jew tinsab fil-forma ta’ stabbiliment permanenti fi żmien 3 xhur mir-riċevuta tad-deċiżjoni tal-korp tal-appelli amministrattivi. Appell ġudizzjarju għandu jkun irregolat bil-liġi tal-Istat Membru fejn l-entità dikjaranti tkun residenti għal finijiet tat-taxxa jew tinsab fil-forma ta’ stabbiliment permanenti.

1.Meta d-deċiżjoni skont l-Artikolu 67 tkun ġiet ikkonfermata jew varjata, membru tal-grupp tal-BEFIT għandu jkollu d-dritt li jappella quddiem il-qrati tal-Istat Membru fejn ikun residenti għal finijiet tat-taxxa jew jinsab fil-forma ta’ stabbiliment permanenti fi żmien 3 xhur minn meta tkun ġiet innotifikata lilu d-deċiżjoni tal-korp tal-appelli amministrattivi msemmi fl-Artikolu 67. L-appell ġudizzjarju għandu jkun irregolat bil-liġi tal-Istat Membru li fih il-membru tal-grupp tal-BEFIT ikun residenti għal finijiet tat-taxxa jew jinsab fil-forma ta’ stabbiliment permanenti.

Meta l-eżitu ta’ appell amministrattiv jew ġudizzjarju jkun jeħtieġ emendi għall-valutazzjoni tat-taxxa tal-grupp tal-BEFIT jew għall-valutazzjonijiet tat-taxxa individwali ta’ membru wieħed jew aktar ta’ grupp tal-BEFIT, l-Istati Membri għandhom jieħdu l-miżuri xierqa sabiex jiżguraw li t-tali emendi jibqgħu possibbli, fi żmien perjodu ta’ 10 snin.

L-Istati Membri għandhom jistabbilixxu r-regoli dwar il-penali applikabbli għal ksur tad-dispożizzjonijiet nazzjonali adottati skont din id-Direttiva u għandhom jieħdu l-miżuri neċessarji kollha sabiex jiżguraw li jiġu implimentati u infurzati. Il-penali u l-miżuri ta’ konformità previsti għandhom ikunu effikaċi, proporzjonati u dissważivi. Il-penali għandhom jiġu ffissati għar-rata minima ta’ 0,1 % tal-fatturat tal-grupp tal-BEFIT f’każ ta’ nuqqas ta’ preżentazzjoni tad-dikjarazzjoni tal-informazzjoni tal-BEFIT f’konformità mal-Artikolu 59 u f’każ ta’ rapportar ħażin apposta f’dikjarazzjoni tal-informazzjoni tal-BEFIT.

2.L-Istati Membri għandhom jikkomunikaw lill-Parlament Ewropew u lill-Kummissjoni l-informazzjoni rilevanti għall-evalwazzjoni tad-Direttiva f’konformità mal-paragrafu 3, inkluża d-data aggregata dwar il-membri tal-grupp tal-BEFIT li jkunu residenti għal finijiet tat-taxxa fil-ġuriżdizzjoni tagħhom u l-istabbilimenti permanenti tagħhom li joperaw fil-ġuriżdizzjoni tagħhom, sabiex jiġi vvalutat kif xieraq:

4.L-informazzjoni kkomunikata lill-Parlament Ewropew u lill-Kummissjoni skont il-paragrafu 2 għandha tinżamm kunfidenzjali mill-Kummissjoni f’konformità mad-dispożizzjonijiet applikabbli għall-istituzzjonijiet tal-Unjoni u mal-Artikolu 76 ta’ din id-Direttiva.