1.á chur in iúl go seasann sí i ndlúthpháirtíocht iomlán leis na híospartaigh uile, lena dteaghlaigh agus leis na daoine uile a buaileadh ag na tuilte millteacha i réigiún Valencia na Spáinne, agus ag cioclóin thubaisteacha in Mayotte agus in La Réunion na Fraince, chomh maith leis na húdaráis náisiúnta, réigiúnacha agus áitiúla atá páirteach sna hiarrachtaí fóirithinte;

2.á chur in iúl gur geal léi an cinneadh mar fhoirm inláimhsithe agus infheicthe de dhlúthpháirtíocht an Aontais lena shaoránaigh agus leis na réigiúin sna limistéir atá buailte, ach ag tabhairt dá haire nach féidir an dlúthpháirtíocht sin a chur in ionad fhreagracht dhíreach na n-údarás áitiúil, réigiúnach agus náisiúnta maidir le tubaistí nádúrtha a bhaineann leis an aeráid a chosc agus a bhainistiú;

3.á athdhearbhú a thábhachtaí atá sé na sochair nithiúla a eascraíonn as Ciste Dlúthpháirtíochta an Aontais Eorpaigh (CDAE) a chur in iúl don phobal, agus feasacht na saoránach ar uirlisí agus cláir an Aontais a mhéadú tuilleadh;

4.á thabhairt chun suntais go bhfuil méadú ag teacht ar líon na dtubaistí nádúrtha tromchúiseacha, millteacha agus marfacha san Eoraip agus á iarraidh ar na Ballstáit agus ar an gCoimisiún infheistíochtaí a mhéadú i gcosc, i mbonneagar poiblí, i maolú ar an athrú aeráide agus in oiriúnú don athrú sin chomh maith le bearta ullmhachta éigeandála chun caillteanais dhaonna agus eacnamaíocha a sheachaint; á iarraidh ar na Ballstáit a chur san áireamh go ndéanann rioscaí aeráide agus tubaistí nádúrtha eile difear díréireach do phobail leochaileacha agus d’fhiontair bheaga agus mheánmhéide mar gheall ar thosca socheacnamaíocha agus déimeagrafacha chomh maith le críocha leochaileacha amhail na réigiúin is forimeallaí; á mheas go bhfuil sé ríthábhachtach ardleibhéal grinnscrúdaithe dhaonlathaigh ag údarás buiséadach CDAE a áirithiú; á mheabhrú go bhfuil buiséad teoranta ag CDAE agus nach féidir a mheas gurb é an t-aon ionstraim amháin é chun aghaidh a thabhairt ar mhórthubaistí nádúrtha; á iarraidh, dá bhrí sin, go ndéanfaí measúnú ar acmhainneacht airgeadais bhuiséad an Aontais agus go mbreithneofaí méadú féideartha ar a acmhainní chun cúnamh a chur ar fáil do shaoránaigh atá i gcomhréir le méid na dtubaistí sin; á thabhairt dá haire go gcuirfeadh méadú ar an gcineál seo cúnaimh ar chumas na mBallstáit freagairt níos éifeachtaí agus níos tapúla ar thubaistí, agus go bhféadfaí ionstraimí eile, go háirithe cistí comhtháthaithe nach é an príomhchuspóir atá leo freagairt ar thubaistí, a chaomhnú;

5.á chur i bhfáth nach bhfuil in CDAE ach ionstraim leigheasach agus gur cheart don Aontas leanúint d’aghaidh a thabhairt ar oiriúnú don athrú aeráide agus ar mhaolú ar an athrú sin trí thacú le beartais Eorpacha agus náisiúnta chun tubaistí nádúrtha a chosc chomh maith le bonn taca a chur faoin bprionsabal ‘atógáil chun feabhais’ ina ghníomhaíochtaí uile; á chur i bhfios go láidir gur tugadh rabhadh i dTuarascáil Uimh. 1/2024 ó EEA dar teideal European Climate Risk Assessment [Measúnú Eorpach ar Rioscaí Aeráide] nach bhfuil an tAontas ullamh d’éifeachtaí an athraithe aeráide agus á chur i bhfáth go bhfuil gá le gníomhaíocht chun a áirithiú nach sroichfidh na rioscaí aeráide sainaitheanta leibhéil chriticiúla; ag iarraidh ar na Ballstáit agus ar an gCoimisiún na bearta is gá a dhéanamh chun go mbainfidh an tAontas na gealltanais arna dtabhairt faoi Chomhaontú Pháras amach; á mheabhrú go bhfuil gá le sineirgí éifeachtacha le beartais agus cláir eile de chuid an Aontais agus á chur i bhfios go láidir gur cheart do na Ballstáit an leas is fearr is féidir a bhaint as deiseanna cistiúcháin, go háirithe Ciste Forbraíochta Réigiúnaí na hEorpa, Ciste Sóisialta na hEorpa+ agus na cláir forbartha tuaithe; ag iarraidh ar an gCoimisiún measúnú a dhéanamh go pras ar aon iarraidh réasúnaithe ó na Ballstáit cistí laistigh de na pleananna Náisiúnta Téarnaimh agus Athléimneachta a ath-leithdháileadh ar chúnamh i gcás tubaistí nádúrtha, i gcomhréir leis na rialacha a leagtar síos i Rialachán (AE) 2021/241 ó Pharlaimint na hEorpa agus ón gComhairle Rialachán (AE) 2021/241 ó Pharlaimint na hEorpa agus ón gComhairle an 12 Feabhra 2021 lena mbunaítear an tSaoráid Téarnaimh agus Athléimneachta (IO L 57, 18.2.2021, lch. 17, ELI: http://data.europa.eu/eli/reg/2021/241/oj)., go háirithe agus céatadán ard na n-acmhainní ón sásra sin nach bhfuil caite go fóill á chur i gcuntas; á chur i bhfáth freisin go bhfuil gá le bearta coisctheacha, ní hamháin chun damáiste amach anseo a mhaolú ach freisin chun géarú ar dhálaí riosca i ndiaidh teagmhais thurraingeacha a chosc, amhail tuilte, falscaithe, sciorrthaí talún nó triomú lochanna agus aibhneacha; ag cur béim, thairis sin, ar na rioscaí a bhaineann le hadhaimsir agus tubaistí nádúrtha amhail tonnta teasa don tsláinte phoiblí ar fud na hEorpa agus á iarraidh ar an gCoimisiún an ghné sin a mheas i mbeartais ábhartha; á mholadh go n-úsáidfí uirlisí digiteacha nuálacha, sonraí satailíte (e.g. Copernicus), agus córais luathrabhaidh chun ullmhacht do thubaistí a fheabhsú; á chur i bhfios go láidir a thábhachtaí atá solúbthacht leormhaith idir na cláir éagsúla; á chur i bhfios go láidir nár cheart go ndéanfadh an cúnamh a sholáthraítear faoi CDAE dochar do chistiú an Aontais a fhaigheann na Ballstáit faoi bheartais nó cláir eile de chuid an Aontais; á mheabhrú gur féidir leis na Ballstáit Státchabhair a dheonú, i gcomhréir leis na rialacha is infheidhme de chuid an Aontais, go háirithe do ghnólachtaí talmhaíochta a d’fhulaing damáistí de dheasca tubaistí nádúrtha;

6.á mheabhrú go gcuireann RESTORE IO L, 2024/3236, 23.12.2024, ELI: http://data.europa.eu/eli/reg/2024/3236/oj. agus na bearta sonracha faoin gCiste Eorpach Talmhaíochta um Fhorbairt Tuaithe (CETFT) IO L, 2024/3242, 23.12.2024, ELI: http://data.europa.eu/eli/reg/2024/3242/oj. cúnamh breise ar fáil do na Ballstáit a bhuailtear le tubaistí nádúrtha trí sholúbthacht bhreise maidir le húsáid na gcistí; á chur i bhfáth gur cheart do na Ballstáit leas a bhaint as na deiseanna nua;

7.á chur in iúl gur oth léi go dtógann sé bliain ar an meán do mhéid iomlán deontais CDAE chun an tairbhí a bhaint amach; á mheabhrú a thábhachtaí atá measúnú tapa agus láidir ar dhamáiste lena dtugtar aird chuí ar na hiarmhairtí eacnamaíocha agus á iarraidh go ndéanfaí iarrachtaí oibríochtúla méadaithe ar mhaithe le laghdú a dhéanamh ar an meán-am chun réamhíocaíochtaí a scaoileadh, agus buiséad an Aontais á chosaint; ag tabhairt dá haire go bhféadfaí an cóimheas idir damáiste díreach iomlán agus OIN na críche a ndéantar difear di a chur i gcuntas ar bhealach níos fearr sa mhodheolaíocht chun méid iomlán na cabhrach a ríomh, go háirithe nuair a dhéantar difear do na réigiúin is forimeallaí;

8.á chur i bhfáth go bhfuil géarghá le cúnamh airgeadais láithreach a chur ar fáil trí CDAE chun a áirithiú gur féidir leis an tacaíocht na réigiúin atá buailte a shroicheadh go tráthúil chun tacú le téarnamh tapa agus fadtéarmach; á chur i bhfáth a thábhachtaí atá sé an t-am idir cur isteach iarratais ar chúnamh CDAE agus an cinneadh maoiniúcháin a laghdú; á iarraidh go ndéanfaí iarracht chun a áirithiú go sroichfidh cabhair CDAE a fhaighteoirí deiridh go pras, lena n-áirítear gnólachtaí, FBManna, teaghlaigh agus saoránaigh dá ndéantar difear, chomh maith le hatógáil bonneagair agus deisiú damáiste ábhartha, agus an measúnú tionchair comhfhreagrach agus sásraí rialaithe iomchuí ag gabháil leo go léir; á chur i bhfios go láidir gur gá nósanna imeachta inmheánacha a shimpliú agus dlús a chur leo gan an bonn a bhaint ón gcothromaíocht institiúideach, go háirithe cearta Pharlaimint na hEorpa mar cheann de dhá bhrainse den údarás buiséadach; ag tabhairt dá haire nach bhfuil an rialachas atá beartaithe do chomharba Chiste Dlúthpháirtíochta na hEorpa tar éis 2027 i gcomhréir leis an seasamh ó Pharlaimint na hEorpa a cuireadh in iúl i rún uaithi an 7 Bealtaine 2025 ‘Buiséad fadtéarmach athchóirithe don Aontas i ndomhan atá ag athrú’ Téacsanna arna nglacadh, P10_TA(2025)0090.;

9.ag formheas an chinnidh a ghabhann leis an rún seo;

10.ag treorú dá hUachtarán an cinneadh a shíniú le hUachtarán na Comhairle agus socrú a dhéanamh dá fhoilsiú in Iris Oifigiúil an Aontais Eorpaigh;

11.ag treorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.