1.Jesprimi l-akbar solidarjetà tiegħu mal-vittmi kollha, mal-familji tagħhom u mal-individwi kollha milquta mill-għargħar distruttiv fir-reġjun ta’ Valenzja, Spanja, u miċ-ċikluni devastanti f’Mayotte u Réunion, Franza, kif ukoll mal-awtoritajiet nazzjonali, reġjonali u lokali involuti fl-isforzi ta’ sokkors;

2.Jilqa’ d-deċiżjoni bħala forma tanġibbli u viżibbli tas-solidarjetà tal-Unjoni maċ-ċittadini tagħha u r-reġjuni fiż-żoni affettwati, iżda jinnota li tali solidarjetà ma tistax tissostitwixxi r-responsabbiltà diretta tal-awtoritajiet lokali, reġjonali u nazzjonali fil-prevenzjoni u l-ġestjoni tad-diżastri naturali relatati mal-klima;

3.Itenni l-importanza li l-benefiċċji tanġibbli pprovduti permezz tal-Fond ta’ Solidarjetà tal-Unjoni Ewropea (FSUE) jiġu kkomunikati lill-pubbliku, anke sabiex tkompli tiżdied is-sensibilizzazzjoni taċ-ċittadini dwar l-għodod u l-programmi tal-Unjoni;

4.Jenfasizza l-għadd dejjem akbar ta’ diżastri naturali kbar, distruttivi u fatali fl-Ewropa u jistieden lill-Istati Membri u lill-Kummissjoni jżidu l-investimenti fil-prevenzjoni, l-infrastruttura pubblika, il-mitigazzjoni tat-tibdil fil-klima u l-adattament għalih kif ukoll f’miżuri ta’ tħejjija għall-emerġenzi biex jiġu evitati t-telf tal-ħajjiet u t-telf ekonomiku; jistieden lill-Istati Membri jqisu li r-riskji klimatiċi u diżastri naturali oħra jaffettwaw b’mod sproporzjonat lill-popolazzjonijiet vulnerabbli u lill-intrapriżi żgħar u ta’ daqs medju minħabba fatturi soċjoekonomiċi u demografiċi kif ukoll territorji vulnerabbli bħar-reġjuni ultraperiferiċi; iqis li huwa essenzjali li jiġi żgurat livell għoli ta’ skrutinju demokratiku mill-awtorità baġitarja tal-FSUE; ifakkar li l-FSUE għandu baġit limitat u ma jistax jitqies bħala l-uniku strument biex jiġu indirizzati diżastri naturali kbar; jitlob għalhekk li ssir valutazzjoni tal-kapaċità finanzjarja tal-baġit tal-Unjoni u li titqies il-possibbiltà ta’ żieda fir-riżorsi tiegħu sabiex tingħata assistenza li tkun proporzjonata għall-kobor ta’ tali diżastri liċ-ċittadini; jinnota li ż-żieda ta’ din it-tip ta’ assistenza tippermetti lill-Istati Membri jirrispondu b’mod aktar effettiv u malajr għad-diżastri filwaqt li strumenti oħra, b’mod partikolari l-fondi ta’ koeżjoni li l-għan primarju tagħhom mhuwiex ir-rispons għad-diżastri, jkunu jistgħu jiġu ppreservati;

5.Jisħaq li l-FSUE huwa biss strument kurattiv u li l-Unjoni għandha wkoll tkompli tindirizza l-adattament għat-tibdil fil-klima u l-mitigazzjoni tiegħu billi tappoġġja l-politiki Ewropej u nazzjonali għall-prevenzjoni tad-diżastri naturali kif ukoll tirfed il-prinċipju ta’ “nibnu mill-ġdid aħjar” fl-azzjonijiet kollha tagħha; jissottolinja li r-Rapport Nru 1/2024 tal-EEA bit-titolu “European Climate Risk Assessment” (Valutazzjoni tar-Riskju Klimatiku fl-Ewropa) wissa li l-Unjoni mhix ippreparata għall-effetti tat-tibdil fil-klima u jisħaq fuq il-ħtieġa ta’ azzjoni biex jiġi evitat li r-riskji klimatiċi identifikati jilħqu livelli kritiċi; jistieden lill-Istati Membri u lill-Kummissjoni jieħdu l-miżuri meħtieġa bil-għan li jwasslu lill-Unjoni biex tilħaq l-impenji li saru fil-Ftehim ta’ Pariġi; ifakkar fil-ħtieġa ta’ sinerġiji effettivi ma’ politiki u programmi oħra tal-Unjoni u jissottolinja li l-Istati Membri għandhom jagħmlu l-aħjar użu mill-opportunitajiet ta’ finanzjament, b’mod partikolari l-Fond Ewropew għall-Iżvilupp Reġjonali, il-Fond Soċjali Ewropew Plus u l-programmi għall-iżvilupp rurali; jistieden lill-Kummissjoni tivvaluta bl-urġenza dovuta kwalunkwe talba motivata mill-Istati Membri biex jiġu riallokati fondi fi ħdan il-pjanijiet nazzjonali għall-irkupru u r-reżiljenza għall-assistenza f’diżastri naturali, f’konformità mar-regoli stabbiliti fir-Regolament (UE) 2021/241 tal-Parlament Ewropew u tal-Kunsill Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza, (ĠU L 57, 18.2.2021, p. 17, ELI: http://data.europa.eu/eli/reg/2021/241/oj)., speċjalment meta jitqies il-perċentwal għoli ta’ riżorsi minn dan il-mekkaniżmu li għadhom ma ntefqux; jisħaq ukoll fuq il-ħtieġa ta’ miżuri preventivi, mhux biss biex tiġi mitigata l-ħsara fil-futur iżda anke biex jiġi evitat li l-kundizzjonijiet ta’ riskju jaggravaw wara eventi katastrofiċi, bħal għargħar, nirien fis-selvaġġ, uqigħ tal-art jew l-inxif ta’ lagi u xmajjar; jisħaq ukoll dwar ir-riskji tat-temp estrem u d-diżastri naturali bħal mewġiet ta’ sħana għas-saħħa pubblika madwar l-Ewropa u jistieden lill-Kummissjoni tikkunsidra dan l-aspett fil-politiki rilevanti; iħeġġeġ l-użu ta’ għodod diġitali innovattivi, data satellitari (eż. Copernicus), u sistemi ta’ twissija bikrija biex tissaħħaħ it-tħejjija għad-diżastri; jissottolinja l-importanza ta’ flessibbiltà adegwata bejn il-programmi differenti; jissottolinja li l-assistenza mogħtija fl-ambitu tal-FSUE ma għandhiex tkun għad-detriment tal-finanzjament tal-Unjoni li l-Istati Membri jkunu rċevew fl-ambitu ta’ politiki jew programmi oħra tal-Unjoni; ifakkar li l-Istati Membri jistgħu jagħtu għajnuna mill-Istat, f’konformità mar-regoli applikabbli tal-Unjoni, b’mod partikolari lin-negozji agrikoli li jkunu ġarrbu ħsarat minħabba diżastri naturali;

6.Ifakkar li RESTORE ĠU L, 2024/3236, 23.12.2024, ELI: http://data.europa.eu/eli/reg/2024/3236/oj. u l-miżuri speċifiċi fl-ambitu tal-Fond Agrikolu Ewropew għall-Iżvilupp Rurali (FAEŻR) ĠU L, 2024/3242, 23.12.2024, ELI: http://data.europa.eu/eli/reg/2024/3242/oj. jipprovdu assistenza addizzjonali lill-Istati Membri affettwati minn diżastri naturali permezz ta’ aktar flessibbiltajiet fl-użu tal-fondi; jisħaq li l-Istati Membri għandhom jagħmlu użu minn dawn l-opportunitajiet;

7.Jiddispjaċih li l-ammont sħiħ ta’ għotja tal-FSUE jieħu medja ta’ sena biex jasal għand benefiċjarju; ifakkar fl-importanza ta’ valutazzjoni rapida u solida tal-ħsara li tqis kif xieraq ir-riperkussjonijiet ekonomiċi u jitlob li jsiru aktar sforzi operazzjonali sabiex jitnaqqas iż-żmien medju għar-rilaxx ta’ pagamenti antiċipati, filwaqt li jiġi żgurat li l-baġit tal-Unjoni jkun protett; jinnota li l-metodoloġija biex jiġi kkalkolat l-ammont totali tal-għajnuna tista’ tqis aħjar il-proporzjon bejn il-ħsara diretta totali u l-ING tat-territorju affettwat, b’mod partikolari meta jiġu affettwati r-reġjuni ultraperiferiċi;

8.Jisħaq fuq il-ħtieġa urġenti li tiġi rilaxxata assistenza finanzjarja immedjata permezz tal-FSUE biex jiġi żgurat li l-appoġġ ikun jista’ jilħaq lir-reġjuni milquta fi żmien xieraq biex jiġi appoġġjat irkupru rapidu u dejjiemi; jisħaq fuq l-importanza li jitnaqqas iż-żmien bejn is-sottomissjoni ta’ applikazzjoni għal assistenza mill-FSUE u d-deċiżjoni ta’ finanzjament; jitlob li jsir sforz biex jiġi żgurat li l-għajnuna mill-FSUE tasal għand ir-riċevituri finali tagħha minnufih, inklużi n-negozji, l-SMEs, il-familji, u ċ-ċittadini affettwati, kif ukoll ir-rikostruzzjoni tal-infrastruttura u t-tiswija tal-ħsara materjali, kollha bil-valutazzjoni tal-impatt korrispondenti u l-mekkaniżmi ta’ kontroll xierqa; jissottolinja l-ħtieġa li jiġu ssimplifikati u aċċellerati l-proċeduri interni mingħajr ma jiġi mminat il-bilanċ istituzzjonali, b’mod partikolari d-drittijiet tal-Parlament Ewropew bħala wieħed miż-żewġ fergħat tal-awtorità baġitarja; jinnota li l-governanza proposta tas-suċċessur ta’ wara l-2027 tal-Fond Ewropew ta’ Solidarjetà mhijiex konformi mal-pożizzjoni tal-Parlament Ewropew espressa fir-riżoluzzjoni tiegħu tas-7 ta’ Mejju 2025 “Baġit imġedded fit-tul għall-Unjoni f’dinja li qed tinbidel” Testi adottati, P10_TA(2025)0090.;

9.Japprova d-deċiżjoni annessa ma’ din ir-riżoluzzjoni;

10.Jagħti istruzzjonijiet lill-President tiegħu biex tiffirma din id-deċiżjoni flimkien mal-President tal-Kunsill u biex tiżgura li tiġi ppubblikata f’Il-Ġurnal Uffiċjali tal-Unjoni Ewropea;

11.Jagħti istruzzjonijiet lill-President tiegħu biex tgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.