1.Jistieden lill-Kummissjoni tippreżenta Strateġija ambizzjuża dwar l-Ugwaljanza bejn il-Ġeneri 2026-2030, li tibni fuq l-ewwel Strateġija dwar l-Ugwaljanza bejn il-Ġeneri 2020-2025, b’miżuri u objettivi leġiżlattivi u mhux leġiżlattivi konkreti, li jistgħu jitkejlu u tanġibbli fl-oqsma ewlenin deskritti hawn taħt;

2.Jistieden lill-Kummissjoni tippreżenta proposta lill-Kunsill biex tinkludi l-vjolenza abbażi tal-ġeneru bħala qasam ġdid ta’ kriminalità elenkat fl-Artikolu 83(1) tat-TFUE u telimina, mingħajr dewmien, il-forom kollha ta’ vjolenza kontra n-nisa u l-bniet, inkluża l-vjolenza sistemika, li tikkostitwixxi ksur tad-drittijiet fundamentali fl-UE fost l-aktar frekwenti;

3.Jistieden lill-Kummissjoni tippubblika malajr ir-rakkomandazzjoni tagħha dwar il-prevenzjoni ta’ prattiki dannużi kontra n-nisa u l-bniet, inklużi l-forom kollha ta’ vjolenza ostetrika u ġinekoloġika, prattika ħażina f’ambjenti mediċi, abort furzat u sterilizzazzjoni furzata, iċ-ċaħda tal-kura tal-abort, u l-mutilazzjoni ġenitali tan-nisa u intersesswali, u tiżgura li din tikkomplementa d-Direttiva (UE) 2024/1385;

4.Jistieden lill-Kummissjoni timmonitorja u tħeġġeġ traspożizzjoni rapida tad-Direttiva (UE) 2024/1385 dwar il-ġlieda kontra l-vjolenza kontra n-nisa u l-vjolenza domestika;

5.Iħeġġeġ lill-Kummissjoni tirrikonoxxi l-femminiċidju bħala reat distint u awtonomu u jenfasizza li l-fehim tal-femminiċidju bħala “il-qtil ta’ mara jew tifla minħabba l-ġeneru tagħha” huwa kritiku biex wieħed jifhem il-kawżi ewlenin tiegħu marbuta mad-diskriminazzjoni abbażi tal-ġeneru u l-iżbilanċi tal-poter;

6.Jistieden għal darba oħra lill-Kummissjoni tiżviluppa linji gwida għall-Istati Membri dwar l-implimentazzjoni tad-Direttiva (UE) 2024/1385 dwar il-ġlieda kontra l-vjolenza kontra n-nisa u l-vjolenza domestika u dwar il-vjolenza fl-oqsma kollha tal-ħajja, inklużi linji gwida ċari dwar edukazzjoni komprensiva u xierqa għall-età dwar is-sesswalità u r-relazzjonijiet b’enfasi fuq l-edukazzjoni dwar il-kunsens f’konformità mal-istandards internazzjonali, u tagħti attenzjoni partikolari lill-implimentazzjoni u l-infurzar sħaħ tal-artikoli kollha tad-Direttiva, u speċjalment tal-Artikolu 35, li jindirizza d-distribuzzjoni ta’ materjali edukattivi dwar il-kunsens u l-organizzazzjoni ta’ kampanji jew programmi ta’ sensibilizzazzjoni biex jiżdied l-għarfien dwar il-fatt li s-sess mhux kunsenswali huwa meqjus bħala reat kriminali;

7.Iħeġġeġ lill-Kummissjoni tenfasizza l-importanza tal-element ta’ rapportar tad-Direttiva (UE) 2024/1385, sabiex id-direttiva taħdem b’mod effettiv fil-prevenzjoni u l-eliminazzjoni ta’ tali vjolenza kontra n-nisa u l-bniet; jistieden lill-Kummissjoni tagħti prijorità lill-prevenzjoni tal-vjolenza abbażi tal-ġeneru kemm online kif ukoll offline, filwaqt li tenfasizza l-importanza ta’ miżuri ta’ prevenzjoni adegwati, immirati u f’waqthom, permezz tal-edukazzjoni, il-litteriżmu diġitali, it-taħriġ tal-professjonisti, u kampanji ta’ informazzjoni u sensibilizzazzjoni bħala element ewlieni fil-ġlieda kontra l-vjolenza kontra n-nisa u l-bniet f’konformità mad-dispożizzjonijiet tal-leġiżlazzjoni relatata tal-UE;

8.Jistieden lill-Kummissjoni tindirizza l-ħtiġijiet speċifiċi tal-vittmi ta’ vjolenza abbażi tal-ġeneru, inkluż, iżda mhux limitat għal, appoġġ psikosoċjali, akkomodazzjoni għall-vittmi, programmi ta’ tagħlim tul il-ħajja u l-indokrar tat-tfal, u jappella għall-protezzjoni xierqa tal-vittmi u tas-superstiti, billi jiġu żgurati u jiżdiedu l-investimenti pubbliċi fit-tul u jiġu ggarantiti risposti effettivi, li għandhom ikunu strutturali, intersezzjonali u ċċentrati fuq is-superstiti u għandhom jindirizzaw il-kawżi fundamentali soċjali, ekonomiċi u kulturali tal-vjolenza abbażi tal-ġeneru;

9.Jistieden lill-Kummissjoni tħeġġeġ lill-Istati Membri li għadhom ma rratifikawx il-Konvenzjoni ta’ Istanbul biex jagħmlu dan u jħaffu dan il-proċess; jistieden lill-Kummissjoni tiżgura, timmonitorja u tippromwovi l-proċess ta’ implimentazzjoni;

10.Jissottolinja li l-gruppi emarġinati jiffaċċjaw riskju akbar ta’ vjolenza u li forom intersezzjonali ta’ diskriminazzjoni jintensifikaw l-effetti tal-vjolenza abbażi tal-ġeneru u r-rivittimizzazzjoni; jistieden lill-Kummissjoni, għalhekk, tiżviluppa u, f’kooperazzjoni mal-Istati Membri, timplimenta taħriġ obbligatorju u komprensiv għall-professjonisti legali kollha, inklużi l-imħallfin u l-prosekuturi, dwar kwistjonijiet relatati mal-vjolenza abbażi tal-ġeneru, l-intersezzjonalità u l-appoġġ għall-vittmi biex tiżgura li l-professjonisti legali jkunu mgħammra b’mod adegwat biex jittrattaw il-każijiet, kemm offline kif ukoll online, b’mod sensittiv għall-ġeneru u intersezzjonali u tiżgura li l-vittmi ma jkunux soġġetti għal vittimizzazzjoni sekondarja matul il-proċedimenti legali;

11.Jistieden lill-Kummissjoni tressaq leġiżlazzjoni tal-UE biex tikkriminalizza l-istupru abbażi tan-nuqqas ta’ kunsens fl-Istati Membri kollha; jinnota li 14-il Stat Membru għadhom jirrikjedu jew xi forma ta’ vjolenza biex jikkriminalizzaw l-istupru jew ma jsemmux il-kunsens b’mod espliċitu; itenni li l-istupru mhuwiex biss ksur tad-drittijiet fundamentali, tal-awtonomija u tal-integrità fiżika tan-nisa, iżda wkoll forma ta’ abbuż sesswali u sfruttament tan-nisa u l-bniet, li huwa reat tal-UE skont it-TFUE92 L-Artikolu 83 tat-TFUE.; jistieden lill-Istati Membri li għadhom jużaw id-definizzjoni ta’ stupru abbażi ta’ suppożizzjoni ta’ vjolenza, iniedu bidliet leġiżlattivi sabiex id-definizzjoni ssir konformi mal-aħħar standards internazzjonali u mal-Artikolu 36 tal-Konvenzjoni ta’ Istanbul;

12.Jissottolinja l-obbligu legali tal-Kummissjoni u tal-Istati Membri li jipproteġu d-drittijiet tan-nisa u l-integrità fiżika tagħhom; iħeġġeġ lill-Kummissjoni tiżgura t-traspożizzjoni rapida u sħiħa tad-Direttiva riveduta kontra t-Traffikar li tistabbilixxi regoli aktar stretti, li tipprovdi għodod aktar b’saħħithom għall-ġlieda kontra t-traffikar tal-bnedmin, inklużi forom ġodda ta’ sfruttament sesswali, u gruppi kriminali organizzati, pereżempju permezz ta’ komunikazzjoni transfruntiera aħjar, u speċjalment il-protezzjoni tad-drittijiet tan-nisa minoritarji u migranti; jisħaq li t-tnaqqis tad-domanda huwa strument ewlieni għall-prevenzjoni u t-tnaqqis tat-traffikar tal-bnedmin, peress li jimmira lejn l-inċentivi finanzjarji; iħeġġeġ, barra minn hekk, lill-Kummissjoni u lill-Istati Membri jappoġġjaw l-isforzi għas-salvataġġ u r-riabilitazzjoni tal-vittmi;

13.Jisħaq li l-approċċ ta’ soċjetà lejn il-prostituzzjoni għandu impatt fuq il-fehim tagħha tal-ugwaljanza bejn il-ġeneri u d-drittijiet tan-nisa u jwassal messaġġi u normi; jistieden lill-Kummissjoni tinkoraġġixxi u tappoġġja l-isforzi tal-Istati Membri biex jieħdu azzjoni fl-oqsma tal-prevenzjoni, id-dekriminalizzazzjoni tan-nies u speċjalment tan-nisa fil-prostituzzjoni, it-tnaqqis tad-domanda, il-kastig tal-klijenti, id-destigmatizzazzjoni u l-eliminazzjoni tal-istereotipi, u tiżgura programmi ta’ ħruġ iffinanzjati b’mod suffiċjenti, faċilment aċċessibbli u ta’ kwalità għolja għal dawk li jixtiequ joħorġu mill-prostituzzjoni; jistieden lill-Istati Membri jiżguraw li l-persuni f’sitwazzjoni ta’ prostituzzjoni jkunu involuti b’mod attiv fit-tfassil tal-politika dwar id-drittijiet tagħhom; jitlob lill-Kummissjoni tappoġġja dawn l-isforzi;

14.Jikkundanna l-prattika tal-maternità surrogata, li tinvolvi l-isfruttament riproduttiv u l-użu tal-ġisem tan-nisa għal gwadann finanzjarju jew gwadann ieħor, b’mod partikolari fil-każ ta’ nisa partikolarment vulnerabbli f’pajjiżi terzi; jistieden lill-Kummissjoni tieħu miżuri biex tappoġġja t-tmiem ta’ dan il-fenomenu;

15.Jistieden lill-Kummissjoni tirrakkomanda l-appoġġ tal-UE għal studji dwar ir-relazzjoni bejn il-vjolenza abbażi tal-ġeneru, il-vjolenza minn sieħeb intimu u l-kanċer;

16.Jenfasizza li s-saħħa hija dritt fundamentali, u għalhekk kulħadd jeħtieġlu jkollu aċċess għal servizzi ta’ kura tas-saħħa ta’ kwalità, affordabbli u aċċessibbli li jirrispettaw il-kunsens infurmat u l-awtonomija fiżika tagħhom; iħeġġeġ lill-Kummissjoni tiżgura aċċess universali għal kura tas-saħħa reattiva għal kwistjonijiet ta’ ġeneru u ffukata fuq il-kwalità, il-pazjent u l-eżitu f’konformità mal-ogħla standards għan-nisa u l-bniet, fid-diversità kollha tagħhom, b’mod partikolari gruppi li jesperjenzaw forom intersezzjonali ta’ diskriminazzjoni, inklużi persuni b’diżabbiltà u minn sfondi soċjoekonomiċi żvantaġġati, vittmi ta’ vjolenza abbażi tal-ġeneru, persuni razzjalizzati u persuni minn sfondi etniċi, minoritarji jew migranti, persuni akbar fl-età, LGBTIQ+, speċjalment nisa intersesswali, individwi transġeneru u mhux binarji, nisa f’żoni rurali u remoti u reġjuni ultraperiferiċi, nisa tqal u ommijiet, speċjalment ommijiet waħedhom; jisħaq fuq il-ħtieġa li l-persunal tal-kura tas-saħħa jkun imħarreġ fi kwistjonijiet tas-saħħa sensittivi għall-ġeneru u li jirrispondi għall-vjolenza abbażi tal-ġeneru u l-vjolenza sesswali;

17.Jistieden lill-Kummissjoni tindirizza b’mod urġenti d-differenza fis-saħħa bejn il-ġeneri, inkluż billi tindirizza l-ħtiġijiet u r-riskji tas-saħħa speċifiċi għall-ġeneru matul l-istadji kollha tal-ħajja, filwaqt li tagħti attenzjoni partikolari lill-mard li jaffettwa b’mod sproporzjonat lin-nisa, tindirizza d-disparitajiet u l-preġudizzji bejn il-ġeneri fir-riċerka medika, fit-taħriġ u fil-provi kliniċi u tħeġġeġ aktar nisa jsegwu karrieri mediċi; jistieden lill-Kummissjoni tressaq pjan ta’ azzjoni speċifiku biex tindirizza dawn il-kwistjonijiet u tkompli torjenta l-inizjattivi futuri relatati mas-saħħa lejn il-kunċett ta’ mediċina tal-ġeneru, kif introdott mid-WHO93 WHO, Gender and health (Il-ġeneru u s-saħħa), https://www.who.int/health-topics/gender#tab=tab_1.;

18.Iħeġġeġ lill-Kummissjoni tiżgura li l-Istrateġija l-ġdida dwar l-Ugwaljanza bejn il-Ġeneri tinkludi enfasi msaħħa fuq l-ugwaljanza bejn il-ġeneri fis-saħħa pubblika; jistieden lill-Kummissjoni tibni fuq il-fehim dejjem jikber tal-fatturi li jaffettwaw l-eżiti tat-trattament billi tappoġġja l-ġbir ta’ aktar data diżaggregata u ta’ kwalità aħjar biex tidentifika d-disparitajiet fis-saħħa f’sottogruppi li altrimenti jistgħu ma jkunux evidenti fil-popolazzjoni, tfassal interventi tas-saħħa li jindirizzaw is-sottogruppi li fihom jeżistu d-disparitajiet u timmonitorja l-eżiti tas-saħħa f’popolazzjonijiet b’riskju għoli; jinnota li għandha tingħata attenzjoni speċjali lin-nisa tqal u li qed ireddgħu;

19.Jistieden lill-Kummissjoni tindirizza l-isfidi persistenti tas-saħħa mentali li jiffaċċjaw in-nisa u l-bniet u l-gruppi emarġinati u jħeġġeġ lill-Kummissjoni tiżgura aċċess universali għal kura tas-saħħa mentali reattiva għal kwistjonijiet ta’ ġeneru u żżid l-investiment fil-faċilitajiet tal-kura tas-saħħa fiż-żoni rurali u tiżviluppa soluzzjonijiet adattabbli bħal kliniċi tas-saħħa mobbli;

20.Jistieden lill-Kummissjoni tindirizza – fil-livell tal-UE – il-lakuni, l-inugwaljanzi u l-ostakli għall-aċċess għall-kura tas-saħħa għan-nisa fid-diversità kollha tagħhom, inklużi n-nisa minn gruppi vulnerabbli;

21.Jistieden lill-Istati Membri tal-UE jiżguraw u jiggarantixxu aċċess għal servizzi tal-kura tas-saħħa u medikazzjonijiet essenzjali u jistieden lill-Kummissjoni żżid l-investiment fl-integrazzjoni tal-perspettiva tal-ġeneri fis-sistemi tas-saħħa; jisħaq li t-taħriġ tal-professjonisti mediċi u tal-ħaddiema tal-kura tas-saħħa kollha għandu jinkludi approċċ ibbażat fuq il-ġeneru; jistieden lill-Kummissjoni tiżgura li ħadd, speċjalment in-nisa b’diżabbiltà, ma jkun soġġett għal trattamenti dannużi, invażivi jew irriversibbli kontra r-rieda tagħhom, u tistabbilixxi li l-interventi mediċi kollha jkunu bbażati fuq il-kunsens personali, liberu u infurmat bis-sħiħ ta’ kull individwu;

22.Iħeġġeġ lill-Kummissjoni tiżviluppa strateġija komprensiva tal-UE biex tindirizza l-ħtiġijiet tas-saħħa speċifiċi ħafna tan-nisa f’kull stadju tal-ħajja u tindirizza l-fatturi li għandhom impatt fuq is-saħħa tan-nisa u l-bniet, anke billi tinkludi s-saħħa fis-Semestru tal-UE;

23.Jisħaq fuq l-importanza tal-kooperazzjoni u tal-iskambju tal-aħjar prattiki fil-livell Ewropew flimkien mal-użu effiċjenti tal-fondi relatati tal-UE biex jiġu indirizzati sfidi komuni fil-kura tas-saħħa u jistieden lill-Kummissjoni ssaħħaħ il-kooperazzjoni bejn is-servizzi ta’ politika rilevanti biex tiżgura li l-ugwaljanza bejn il-ġeneri tkun integrata b’mod sistematiku fl-inizjattivi kollha relatati mas-saħħa; jistieden lill-Kummissjoni tinkoraġġixxi u tappoġġja lill-Istati Membri fl-implimentazzjoni jew l-espansjoni ta’ sistemi nazzjonali tal-assigurazzjoni tas-saħħa li joffru kura komprensiva u affordabbli;

24.Jistieden lill-Kummissjoni tiżviluppa approċċ sensittiv għall-ġeneru għall-kura tas-saħħa u tindirizza kwistjonijiet speċifiċi fejn għad hemm sfidi, bħas-saħħa mentali, il-kanċer, l-endometrijożi jew il-kura tas-saħħa tal-omm; jistieden lill-Kummissjoni tiżviluppa standards komuni għall-UE kollha fil-kura tas-saħħa ta’ qabel it-twelid, tat-twelid, tal-qwiebel ta’ wara t-twelid u tal-kura tas-saħħa tat-trabi tat-twelid u tal-omm biex taġġorna d-Direttiva tal-UE dwar il-Qwiebel94 Id-Direttiva tal-Kunsill 80/155/KEE tal-21 ta’ Jannar 1980 dwar il-koordinazzjoni ta’ dispożizzjonijiet stabbiliti b’liġi, b’regolament jew b’azzjoni amministrattiva li għandhom x’jaqsmu mal-bidu u l-insegwiment tal-attivitajiet tal-qwiebel (ĠU L 33, 11.2.1980, p. 8, ELI: http://data.europa.eu/eli/dir/1980/155/oj). f’konformità mal-istandards internazzjonali u biex tippermetti lill-professjonisti tal-kura tas-saħħa jaqsmu l-aħjar prattiki f’dan il-qasam; jappella għall-istabbiliment ta’ qafas tal-UE dwar l-użu sikur tal-mediċini matul it-tqala u t-treddigħ;

25.Jistieden lill-Kummissjoni tappoġġja s-sistemi tal-kura tas-saħħa biex jiżviluppaw, jimplimentaw u jevalwaw strateġiji ta’ prevenzjoni tal-mard iffukati fuq il-ġeneru peress li l-prevenzjoni tista’ ttejjeb il-kwalità tal-ħajja tan-nisa u l-bniet; għalhekk, iħeġġeġ lill-Kummissjoni timplimenta miżuri li huma kemm ibbażati fuq il-prevenzjoni kif ukoll iqajmu kuxjenza dwar id-dritt ta’ aċċess għas-servizzi tal-kura tas-saħħa;

26.Jisħaq fuq il-ħtieġa li jiġu indirizzati d-disparitajiet territorjali fl-aċċess għall-kura tas-saħħa billi tiġi żgurata d-disponibbiltà ta’ servizzi tas-saħħa reattivi għal kwistjonijiet ta’ ġeneru f’żoni rurali, remoti u depopolati; jistieden lill-Kummissjoni u lill-Istati Membri jinvestu f’unitajiet tas-saħħa mobbli, it-telemediċina u t-taħriġ u l-istazzjonament ta’ professjonisti tal-kura tas-saħħa f’reġjuni li mhumiex moqdija biżżejjed;

27.Jistieden lill-Kummissjoni toħloq qafas komprensiv u vinkolanti u tiżgura aċċess sħiħ u ugwali għas-servizzi kollha tal-kura tas-saħħa sesswali u riproduttiva, għal kulħadd fl-UE irrispettivament mill-istatus ta’ migrazzjoni jew ta’ residenza tiegħu; jinnota li dawn is-servizzi u d-drittijiet jinkludu kura tas-saħħa ostetrika, ġinekoloġika, ta’ qabel it-twelid, tat-twelid u ta’ wara t-twelid u tat-trabi tat-twelid, rispettuża u ta’ kwalità għolja, informazzjoni u servizzi komprensivi dwar l-ippjanar tal-familja, kura li tafferma l-ġeneru u aċċess għal kura u trattamenti mediċi ta’ riproduzzjoni assistita u fertilità, metodi ta’ kontraċezzjoni moderni sikuri u affordabbli tal-għażla tal-individwu u d-dritt għal servizzi ta’ kura tal-abort sikuri u legali (mediċi u kirurġiċi), edukazzjoni xierqa għall-età dwar is-sesswalità u r-relazzjonijiet, il-prevenzjoni tal-iSTIs, il-profilassi ta’ wara l-espożizzjoni, is-servizzi ta’ skoperta u trattament bħala parti integrali mid-drittijiet tal-bniedem tagħhom, li mingħajrhom l-istat tad-dritt ma jistax jiġi rrispettat; jenfasizza li l-Istati Membri jeħtiġillhom jiżguraw li dawn is-servizzi jkunu aċċessibbli, affordabbli u mhux diskriminatorji; jistieden lill-Kummissjoni tirrikonoxxi l-ksur kollu tas-saħħa u d-drittijiet sesswali u riproduttivi tan-nisa bħala forma ta’ vjolenza abbażi tal-ġeneru;

28.Jisħaq li kwalunkwe strateġija dwar l-ugwaljanza għandha tindirizza l-forom kollha ta’ vjolenza abbażi tal-ġeneru, inkluż ir-rigress u l-ksur tas-saħħa u d-drittijiet sesswali u riproduttivi tan-nisa; itenni li l-aċċess għall-kura tas-saħħa u s-servizzi pubbliċi, b’mod partikolari l-aċċess għall-kura tal-abort u l-appoġġ psikoloġiku għan-nisa vittmi ta’ vjolenza għandhom jitqiesu bħala prijorità; jistieden lill-Kummissjoni tapplika sanzjonijiet f’każijiet ta’ rigressjonijiet fid-drittijiet tan-nisa, inklużi restrizzjonijiet fuq is-saħħa sesswali u riproduttiva u d-drittijiet relatati, l-aċċess għall-kura tal-abort jew l-edukazzjoni sesswali, li jridu jitqiesu bħala ksur tal-valuri tal-UE u jiskattaw risposti istituzzjonali proporzjonati, inklużi proċeduri ta’ ksur u konsegwenzi għall-finanzjament; jistieden lill-Kummissjoni tistabbilixxi mekkaniżmu ta’ monitoraġġ u ta’ akkontabbiltà, biex tindirizza malajr kwalunkwe żvilupp retrogressiv jew theddid għall-ugwaljanza bejn il-ġeneri u l-ksur kollu tad-drittijiet tan-nisa inklużi s-saħħa sesswali u riproduttiva u d-drittijiet relatati u d-drittijiet tal-persuni LGBTIQ+, fl-Istati Membri, kif ukoll tuża l-mekkaniżmi eżistenti biex tivvaluta l-konformità mal-istat tad-dritt jew mad-drittijiet fundamentali, jew bħala mekkaniżmu ddedikat u tinkludi sottopilastru ddedikat dwar il-vjolenza abbażi tal-ġeneru fir-rapport annwali tagħha dwar l-Istat tad-Dritt; jistieden lill-Kummissjoni tħeġġeġ u tinvolvi lill-irġiel bħala alleati attivi fil-promozzjoni tas-saħħa sesswali u riproduttiva u d-drittijiet relatati biex jiġi indirizzat il-kuntest usa’ tar-rigressjoni dejjem akbar fost l-irġiel żgħażagħ kontra n-nisa żgħażagħ u l-femminiżmu;

29.Jistieden lill-Istati Membri u lill-Kummissjoni jinkludu s-Saħħa u d-Drittijiet Sesswali u Riproduttivi, inkluż id-dritt għal kura sikura u legali tal-abort, fil-Karta tad-Drittijiet Fundamentali tal-UE, kif stabbilit fir-riżoluzzjoni tal-Parlament tal-11 ta’ April 2024;

30.Jenfasizza l-appoġġ wiesa’ taċ-ċittadini tal-UE biex kulħadd fl-UE jkun jista’ jkollu aċċess għal kura sikura tal-abort, irrispettivament minn min hu jew minn fejn ġej, kif huwa rifless fost affarijiet oħra mill-inizjattiva taċ-ċittadini Ewropej (IĊE) ta’ suċċess “Il-vuċi tiegħi, l-għażla tiegħi” li titlob lill-UE tgħaddi leġiżlazzjoni li toħloq mekkaniżmu finanzjarju li jgħin lill-Istati Membri li volontarjament jissieħbu f’din il-politika biex jipprovdu kura sikura tal-abort għal dawk kollha li ma għandhomx aċċess għaliha; iħeġġeġ lill-Kummissjoni tieħu azzjoni rapida u ssegwi din it-talba tal-IĊE u tistabbilixxi mekkaniżmu ta’ solidarjetà finanzjarja bejn l-Istati Membri biex jiġi żgurat li n-nisa fl-UE jkunu jistgħu jaċċessaw il-kura tal-abort;

31.Jistieden lill-Kummissjoni toħroġ Rakkomandazzjonijiet lill-Istati Membri dwar kif għandhom jiġu miġġielda l-forom kollha ta’ vjolenza ostetrika u ġinekoloġika, li jinkludu varjetà ta’ prattiki negliġenti, degradanti, abbużivi jew dannużi li jinkludu, iżda mhumiex limitati għall-“ħjata tar-raġel”; jistieden lill-Kummissjoni tiffaċilita l-iskambji fost l-Istati Membri dwar il-kwistjoni tal-vjolenza ostetrika u ġinekoloġika u tagħti mandat lill-EIGE biex jiżviluppa sett ta’ indikaturi kwantitattivi u kwalitattivi biex ikejjel il-prevalenza u l-manifestazzjoni tal-vjolenza ostetrika u jalloka biżżejjed riżorsi biex jindirizzaha;

32.Jistieden lill-Kummissjoni toħroġ, fil-qafas tal-implimentazzjoni tad-Direttiva dwar il-ġlieda kontra l-vjolenza kontra n-nisa u l-vjolenza domestika, linji gwida ċari dwar l-għoti ta’ kura tas-saħħa sesswali u riproduttiva lill-vittmi ta’ vjolenza sesswali, f’konformità mal-istandards internazzjonali tas-saħħa pubblika u tad-drittijiet tal-bniedem, inklużi l-istandards tad-WHO dwar il-ġestjoni klinika tal-istupru;

33.Jirrikonoxxi li l-fertilità hija aspett kritiku tas-saħħa tan-nisa, u jenfasizza l-ħtieġa li jiġu indirizzati b’mod proattiv il-fatturi u l-isfidi multidimensjonali relatati mal-fertilità, bħan-nuqqas ta’ aċċess għall-kura tas-saħħa u t-trattamenti relatati mal-fertilità, jew informazzjoni u servizzi ta’ appoġġ insuffiċjenti; iħeġġeġ lill-Kummissjoni tiżgura li l-informazzjoni dwar il-preservazzjoni tal-fertilità tkun aċċessibbli għal kulħadd;

34.Jistieden lill-Kummissjoni ssegwi u tirrapporta lura lill-Parlament dwar l-implimentazzjoni tad-Direttiva dwar Pagi Minimi Adegwati95 Id-Direttiva (UE) 2022/2041 tal-Parlament Ewropew u tal-Kunsill tad-19 ta’ Ottubru 2022 dwar pagi minimi adegwati fl-Unjoni Ewropea (ĠU L 275, 25.10.2022, p. 33, ELI: http://data.europa.eu/eli/dir/2022/2041/oj).u d-Direttiva dwar it-Trasparenza fil-Pagi96 Id-Direttiva (UE) 2023/970 (ĠU L 132, 17.5.2023, p. 21., ELI: http://data.europa.eu/eli/dir/2023/970/oj)., inkluża l-garanzija ta’ rekwiżiti robusti ta’ rapportar tal-pagi, aċċess effettiv għal rimedji ġudizzjarji għall-vittmi ta’ diskriminazzjoni fil-pagi, u sanzjonijiet xierqa għan-nuqqas ta’ konformità, u t-traspożizzjoni tad-Direttiva dwar in-Nisa fuq il-Bordijiet97 Id-Direttiva (UE) 2022/2381 (ĠU L 315, 7.12.2022, p. 44, ELI: http://data.europa.eu/eli/dir/2022/2381/oj).; iħeġġeġ lill-Kummissjoni timmonitorja u tiggarantixxi l-infurzar xieraq u f’waqtu ta’ dawn id-Direttivi, li huwa ta’ importanza kruċjali għan-nisa fis-suq tax-xogħol u jippermettilhom igawdu drittijiet u kundizzjonijiet ugwali matul il-karriera tagħhom;

35.Jenfasizza li l-Parlament se jopponi bil-qawwa kwalunkwe tentattiv biex tiġi rtirata jew imdgħajfa d-Direttiva dwar it-Trasparenza fil-Pagi;

36.Iħeġġeġ lill-Kummissjoni tippromwovi b’mod attiv id-dħul u ż-żamma tan-nisa fis-suq tax-xogħol, tieħu miżuri biex tnaqqas id-differenza fl-impjiegi, id-differenza fil-pagi u fil-pensjonijiet bejn il-ġeneri u tinvesti fi programmi ta’ tagħlim tul il-ħajja għan-nisa u l-bniet; jistieden lill-Kummissjoni tistabbilixxi miri għall-UE kollha bil-għan li tiżdied il-parteċipazzjoni tan-nisa fis-suq tax-xogħol; jilqa’ l-analiżi tal-EIGE tal-ostakli ewlenin għall-impjieg tan-nisa fl-Ewropa, inklużi l-ostakli għall-impjieg full-time, li tipprovdi pedament lill-Istati Membri biex jindirizzaw l-ostakli strutturali għall-impjieg tan-nisa; jistieden lill-Kummissjoni tħeġġeġ lill-Istati Membri jiżguraw l-aċċess ugwali tan-nisa għax-xogħol bi drittijiet u pagi deċenti, inkluż permezz ta’ negozjar kollettiv; jistieden lill-Kummissjoni tħeġġeġ lill-Istati Membri jieħdu miżuri sodi biex jissanzjonaw in-negozji li jiddiskriminaw bejn l-irġiel u n-nisa u jonqsu milli jikkonformaw mal-leġiżlazzjoni dwar ix-xogħol;

37.Jistieden lill-Kummissjoni u lill-Istati Membri jsaħħu l-politiki u l-istrumenti ta’ finanzjament li jappoġġjaw lin-nisa li jirritornaw fis-suq tax-xogħol wara l-leave tal-maternità jew waqfiet fit-tul fil-karriera relatati mar-responsabbiltajiet tal-indokrar; jissottolinja l-importanza ta’ miżuri attivi tas-suq tax-xogħol, programmi mfassla apposta ta’ taħriġ mill-ġdid u ta’ titjib tal-ħiliet, u konsulenza individwalizzata dwar l-impjiegi, u jistieden lill-Kummissjoni tippromwovi u tappoġġja lill-impjegaturi biex joffru opportunitajiet ta’ impjieg flessibbli u ta’ kwalità lin-nisa li jirritornaw; jisħaq fuq il-ħtieġa li tiġi indirizzata d-diskriminazzjoni kontra n-nisa fuq il-post tax-xogħol, speċjalment kontra n-nisa bit-tfal; jistieden lill-Kummissjoni tiżgura li d-diskriminazzjoni fit-tqala u fil-maternità tiġi miġġielda permezz ta’ arranġamenti tax-xogħol flessibbli li jkunu mfassla u kkomunikati kif xieraq; jistieden lill-Kummissjoni tipproponi leġiżlazzjoni dwar ir-regoli tat-telexogħol u d-Dritt għall-Iskonnessjoni mingħajr aktar dewmien u tiżgura li dan isir b’mod reattiv għal kwistjonijiet ta’ ġeneru li ma jiggravax l-inugwaljanzi eżistenti bejn il-ġeneri; jistieden lill-Kummissjoni tappoġġja postijiet tax-xogħol sensittivi għall-ġeneru biex tiżgura li n-nisa li jbatu minn mard mhux komunikabbli, mard kroniku, diżabilitajiet jew sintomi tal-menopawsa jkollhom drittijiet u opportunitajiet ugwali fl-aċċess u l-permanenza fuq il-post tax-xogħol;

38.Jistieden lill-Kummissjoni tipproponi qafas leġiżlattiv biex tindirizza l-vjolenza abbażi tal-ġeneru fid-dinja tax-xogħol biex tiżgura l-protezzjoni tal-ħaddiema kollha minn vjolenza abbażi tal-ġeneru, inklużi l-fastidju, l-intimidazzjoni u kwalunkwe forma ta’ vjolenza sesswali fuq il-post tax-xogħol; jistieden lill-bqija tal-Istati Membri li għadhom ma rratifikawx il-Konvenzjoni 190 tal-ILO dwar il-Vjolenza u l-Fastidju fid-Dinja tax-Xogħol biex jagħmlu dan u jirrikonoxxu d-dritt għal dinja tax-xogħol ħielsa mill-vjolenza u l-fastidju, inkluża l-vjolenza abbażi tal-ġeneru;

39.Iħeġġeġ lill-Kummissjoni ssaħħaħ l-isforzi biex tindirizza d-diskriminazzjoni li jiffaċċjaw in-nisa, il-bniet u l-persuni l-aktar vulnerabbli li jiffaċċjaw diskriminazzjoni intersezzjonali, kif imsemmi fil-lista ta’ raġunijiet ta’ nondiskriminazzjoni u dawk affettwati mill-awtomatizzazzjoni tal-impjiegi; itenni li dawn il-gruppi huma aktar probabbli li jiltaqgħu ma’ sfidi speċifiċi jew sproporzjonati fis-suq tax-xogħol, bħal rati għoljin ta’ qgħad, pagi baxxi u impjiegi prekarji u diffikultajiet fl-aċċess għall-protezzjoni tal-ħaddiema, il-leave tal-maternità u s-sigurtà soċjali; jistieden lill-Kummissjoni tinkoraġġixxi programmi li jiżguraw opportunitajiet indaqs, inkluż l-aċċess għal rwoli ta’ tmexxija u ta’ teħid ta’ deċiżjonijiet għal dawk kollha li jiffaċċjaw diskriminazzjoni u inċertezza fis-suq tax-xogħol; jinnota li dan għandu jsir billi, fost affarijiet oħra, tiġi żgurata l-implimentazzjoni tad-Direttiva dwar l-Ugwaljanza fl-Impjiegi98 Id-Direttiva tal-Kunsill 2000/78/KE tas-27 ta’ Novembru 2000 li tistabbilixxi qafas ġenerali għall-ugwaljanza fit-trattament fl-impjieg u fix-xogħol (ĠU L 303, 2.12.2000, p. 16, ELI: http://data.europa.eu/eli/dir/2000/78/oj). fl-Istati Membri kollha, jissaħħu l-korpi tal-ugwaljanza, kif previst mid-Direttiva (UE) 2024/149999 Id-Direttiva tal-Kunsill (UE) 2024/1499 tas-7 ta’ Mejju 2024 dwar standards għall-korpi tal-ugwaljanza fil-qasam tat-trattament ugwali bejn il-persuni irrispettivament mill-oriġini razzjali jew etnika tagħhom, it-trattament ugwali fil-qasam tal-impjiegi u x-xogħol bejn il-persuni irrispettivament mir-reliġjon jew it-twemmin, id-diżabbiltà, l-età jew l-orjentazzjoni sesswali tagħhom, it-trattament ugwali bejn in-nisa u l-irġiel fi kwistjonijiet tas-sigurtà soċjali u fl-aċċess għal prodotti u servizzi u l-provvista tagħhom, u li temenda d-Direttivi 2000/43/KE u 2004/113/KE (ĠU L, 2024/1499, 29.5.2024, ELI: http://data.europa.eu/eli/dir/2024/1499/oj). u jiġi żgurat l-aċċess għall-pagi minimi fuq bażi ugwali ma’ ħaddieħor; jisħaq fuq il-ħtieġa li jiġu żviluppati strateġiji mmirati ta’ impjieg u titjib tal-ħiliet għan-nisa li għandhom aktar minn 55 sena u għan-nisa li jgħixu f’reġjuni rurali jew strutturalment żvantaġġati, li jiffaċċjaw ostakli komposti; jistieden lill-Kummissjoni tappoġġja lill-Istati Membri fit-tfassil ta’ politiki inklużivi tas-suq tax-xogħol, inkluż permezz tal-istrumenti tal-politika ta’ koeżjoni u l-Fond Soċjali Ewropew Plus (FSE+);

40.Jistieden lill-Kummissjoni tiżgura li l-Istati Membri jqisu d-dimensjoni tal-ġeneru meta jwettqu riforma tas-sistemi tal-pensjonijiet u meta jadattaw l-età tal-irtirar, u jqisu d-differenzi bejn il-mudelli tax-xogħol tan-nisa u l-irġiel, inklużi l-prattiki kollha ta’ impjieg bla ħlas, filwaqt li jqisu r-riskju ogħla ta’ diskriminazzjoni intersezzjonali li jiffaċċjaw in-nisa fis-suq tax-xogħol; jistieden lill-Kummissjoni u lill-Istati Membri jressqu pjan komprensiv biex jindirizzaw id-differenza fil-pensjonijiet bejn il-ġeneri, inkluż billi jiżguraw appoġġ adegwat għall-indokrar tat-tfal u, jimmitigaw il-“penali tal-maternità”, kif ukoll jagħtu spinta lil-litteriżmu finanzjarju għan-nisa u jtejbu l-konsulenza finanzjarja għan-nisa, b’mod partikolari biex titnaqqas id-differenza fl-investiment bejn il-ġeneri;

41.Jistieden lill-Kummissjoni tirrieżamina d-Direttiva 79/7/KEE dwar is-Sigurtà Soċjali100 Id-Direttiva tal-Kunsill 79/7/KEE tad-19 ta’ Diċembru 1978 dwar l-implimentazzjoni progressiva tal-prinċipju tat-trattament ugwali tal-irġiel u n-nisa fi kwistjonijiet ta’ sigurtà soċjali (ĠU L 6, 10.1.1979, p. 24, ELI: http://data.europa.eu/eli/dir/1979/7/oj). biex tiżgura li din tippermetti l-adozzjoni ta’ azzjoni pożittiva u tikkontribwixxi biex titnaqqas id-differenza fil-pensjonijiet bejn il-ġeneri;

42.Jisħaq li n-nisa bħalissa jirrappreżentaw biss terz tal-imprendituri fl-UE101 Eurochambres, Eurochambres Women Entrepreneurs Survey 2025 – Unveiling insights from the women entrepreneurs, https://www.eurochambres.eu/publication/eurochambres-women-entrepreneurs-survey-2025-unveiling-insights-from-the-women-entrepreneurs/., u jenfasizza l-ħtieġa ta’ azzjoni mmirata biex titnaqqas id-differenza bejn il-ġeneri fl-intraprenditorija;

43.Iħeġġeġ lill-Kummissjoni tiżviluppa linji gwida għall-Istati Membri, is-settur privat u s-soċjetà ċivili biex tgħin fl-istabbiliment ta’ miri u strateġiji dwar l-ugwaljanza bejn il-ġeneri inklużi opportunitajiet indaqs ta’ tmexxija fl-ekonomija, inkluż għall-imprendituri nisa u biex jitneħħew l-ostakli għan-nisa biex jibdew u jkollhom negozji sabiex titnaqqas id-differenza bejn il-ġeneri fl-intraprenditorija; jistieden lill-Kummissjoni tappoġġja lill-Istati Membri f’dawn l-isforzi, u tippromwovi l-ugwaljanza bejn il-ġeneri fl-aċċess għall-finanzjament, u tindirizza d-differenza persistenti bejn il-ġeneri fit-tmexxija tan-negozju u l-innovazzjoni;

44.Itenni li d-differenza bejn il-ġeneri fis-setturi diġitali u tal-IA inevitabbilment tirriżulta f’algoritmi preġudikati; jistieden għalhekk lill-Kummissjoni tippromwovi l-ugwaljanza bejn il-ġeneri f’kumpaniji li jaħdmu fuq attivitajiet relatati mal-IA u l-ICT, inkluż permezz tal-finanzjament ta’ proġetti mmexxija min-nisa fis-settur diġitali u l-promozzjoni ta’ numru minimu ta’ riċerkaturi nisa li jipparteċipaw f’sejħiet għall-finanzjament ta’ riċerka relatata mal-IA u l-ICT; jistieden lill-Kummissjoni tressaq inizjattivi mmirati biex tappoġġja lin-nisa fix-xjenza, it-teknoloġija, l-inġinerija u l-matematika (STEM) u biex timmotiva lill-bniet jikkunsidraw karrieri relatati mal-iSTEM, l-ICT u l-IA, inkluż billi tiddefinixxi mira għall-parteċipazzjoni ta’ riċerkaturi nisa fi proġetti STEM u tal-IA, sabiex jitnaqqsu d-differenzi ġenerali fil-ħiliet u bejn il-ġeneri f’dan is-settur; jenfasizza l-ħtieġa li jiġu riflessi l-interessi tan-nisa u tal-gruppi vulnerabbli fit-tranżizzjoni diġitali; jistieden lill-Kummissjoni u lill-Eurostat isaħħu l-monitoraġġ tal-kompożizzjoni tal-ġeneru fil-professjonijiet STEM, bħal fil-forza tax-xogħol tal-kura tas-saħħa;

45.Jisħaq li t-tisħiħ tal-pożizzjoni tan-nisa bħala ċittadini u atturi ekonomiċi huwa imperattiv kemm etiku kif ukoll ekonomiku, u li l-kisba ta’ “Unjoni tal-Ħiliet” effettiva u ekwa tirrikjedi sforzi ddedikati biex jiġu eliminati l-ostakli li bħalissa jillimitaw il-parteċipazzjoni fis-suq tax-xogħol, b’mod partikolari għan-nisa; iħeġġeġ lill-Kummissjoni tinkoraġġixxi l-attività ekonomika tan-nisa u tiżgura l-ugwaljanza fil-livelli kollha tul il-ħajja professjonali ta’ kulħadd fl-UE, peress li hija ta’ benefiċċju għas-soċjetà Ewropea, l-ekonomija u d-dinja tax-xogħol, minħabba li l-ugwaljanza bejn il-ġeneri hija prekundizzjoni għas-suċċess, il-kompetittività u t-tkabbir sostenibbli tal-Ewropa; iħeġġeġ lill-Kummissjoni tiżgura li l-proposti għal simplifikazzjonijiet regolatorji ma jmorrux kontra l-għan li tinkiseb l-ugwaljanza bejn il-ġeneri;

46.Jirrimarka li l-prinċipju ta’ paga ugwali għal xogħol ugwali jew xogħol ta’ valur ugwali minqux fid-dritt tal-UE jrid jiġi applikat fil-prattika; jistieden lill-Kummissjoni tindirizza d-disparitajiet sistemiċi fil-pagi minħabba n-nuqqas ta’ rikonoxximent u s-sottovalutazzjoni tax-xogħol f’setturi ddominati min-nisa bħall-kura, il-kura tas-saħħa, l-edukazzjoni u l-bejgħ bl-imnut; jappella għal miżuri vinkolanti tal-UE biex tiġi żgurata wkoll paga ugwali għal xogħol ta’ valur ugwali, u biex jittejbu l-kundizzjonijiet tax-xogħol f’setturi sottovalutati ddominati min-nisa; iħeġġeġ, għalhekk, lill-Kummissjoni taħdem mal-Istati Membri u s-sħab soċjali biex tiżviluppa għodod u kriterji ta’ evalwazzjoni tal-impjiegi newtrali għall-ġeneru li jippermettu definizzjoni u tqabbil fl-UE kollha tal-“valur tax-xogħol” bil-għan ta’ valutazzjoni u remunerazzjoni aktar ġusti tax-xogħol imwettaq f’setturi ddominati min-nisa; jinnota li dan għandu jsir billi jiġu żgurati d-drittijiet ta’ negozjar kollettiv, jissaħħu l-ispezzjonijiet tax-xogħol u tiġi ggarantita rappreżentanza ugwali tal-ħaddiema nisa fid-djalogu soċjali;

47.Jistieden lill-Kummissjoni u lill-Istati Membri jindirizzaw b’mod effettiv id-differenza persistenti fil-pagi bejn il-ġeneri, inkluż billi l-fondi tal-FSE+ jiġu mmirati biex jappoġġjaw il-ġlieda kontra l-istereotipi marbuta mal-ġeneru fl-edukazzjoni u l-konsulenza dwar ix-xogħol, u jippromwovu karti u inizjattivi dwar id-diversità fis-setturi privati u pubbliċi;

48.Jistieden lill-Kummissjoni tagħmel l-istrateġija li jmiss kontra l-faqar reattiva għal kwistjonijiet ta’ ġeneru billi tiffoka b’mod qawwi fuq il-faqar strutturali tan-nisa; iħeġġeġ lill-Kummissjoni u lill-Istati Membri jsaħħu l-miżuri ekonomiċi u soċjali biex jindirizzaw il-faqar tan-nisa u l-esklużjoni soċjali tan-nisa, b’mod partikolari fir-rigward tal-aċċess għal akkomodazzjoni, enerġija u trasport deċenti u affordabbli; jissottolinja li akkomodazzjoni deċenti u affordabbli hija dritt fundamentali li għandu jiġi protett u rikonoxxut bħala prekundizzjoni għat-tgawdija ta’ drittijiet fundamentali oħra; ifakkar li l-inugwaljanza fl-akkomodazzjoni twassal biex ħafna nisa jgħixu f’sitwazzjonijiet mhux dinjitużi u mhux sikuri, f’riskju li jisfaw bla dar u vittmi ta’ vjolenza; jistieden lill-Kummissjoni tqis dan fil-pjan li jmiss tagħha tal-UE għal akkomodazzjoni affordabbli u tagħti attenzjoni speċifika lill-ħtiġijiet ta’ akkomodazzjoni tal-vittmi ta’ vjolenza abbażi tal-ġeneru u kapaċitajiet adegwati ta’ kenn; jisħaq li l-aċċess għas-sigurtà soċjali u l-akkomodazzjoni għal kulħadd għandu jiġi ssalvagwardjat b’mod effettiv fl-Istati Membri u jistieden lill-Kummissjoni tippromwovih kontinwament; iħeġġeġ lill-Kummissjoni tkompli l-ġlieda kontra l-faqar mestrwali, li huwa n-nuqqas ta’ aċċess adegwat għall-prodotti u l-faċilitajiet tal-iġjene mestrwali, li jaffettwa madwar 10 % tal-popolazzjoni mestrwali fl-Unjoni, u li jaffettwa b’mod sproporzjonat lill-gruppi emarġinati u vulnerabbli, u jillimita l-parteċipazzjoni fil-ħajja soċjali, edukattiva u professjonali; jistieden lill-Kummissjoni tiżgura l-aċċess għal prodotti mestrwali aċċessibbli u, bħala l-ewwel pass, tibda rieżami tad-Direttiva 2004/113/KE bil-għan li titneħħa l-VAT mill-prodotti mestrwali u jiġu eliminati d-differenzi mhux ġustifikati fil-prezzijiet – spiss imsejħa “taxxa roża” – li jirriżultaw f’kostijiet ogħla għall-prodotti u s-servizzi tal-kura tas-saħħa kkummerċjalizzati lin-nisa;

49.Jenfasizza l-importanza li jiġi żgurat aċċess għal edukazzjoni ta’ kwalità għall-bniet bħala prekundizzjoni għall-ugwaljanza bejn il-ġeneri, it-tisħiħ tal-pożizzjoni tan-nisa u t-tgawdija sħiħa tad-drittijiet tagħhom; iħeġġeġ lill-Kummissjoni tiżgura aċċess inklużiv għall-ġeneru u l-età għal-livelli kollha tal-edukazzjoni u t-taħriġ li jippromwovi l-ugwaljanza bejn il-ġeneri u jneħħi l-istereotipi marbuta mal-ġeneru u n-normi soċjetali dannużi, u tappoġġja b’mod speċjali lin-nisa, il-bniet u l-persuni l-aktar vulnerabbli li jiffaċċjaw diskriminazzjoni intersezzjonali fil-vjaġġ edukattiv tagħhom; iħeġġeġ lill-Kummissjoni tiżgura li l-Unjoni tal-Ħiliet tindirizza l-iżbilanċi bejn il-ġeneri, bil-għan li tissaħħaħ il-pożizzjoni tal-individwi kollha madwar l-UE;

50.Iħeġġeġ lill-Kummissjoni tinvesti fl-iżvilupp professjonali tal-edukaturi biex tiġġieled aħjar l-istereotipi marbuta mal-ġeneru fl-edukazzjoni tat-tfal u tal-adulti, l-edukazzjoni u t-taħriġ vokazzjonali, it-taħriġ fuq il-post tax-xogħol, fil-perkorsi edukattivi kollha ta’ tagħlim formali u mhux formali u tipprovdi lill-pubblikaturi b’linji gwida dwar l-eliminazzjoni tal-preġudizzju tal-ġeneru fil-materjali edukattivi; jistieden lill-Kummissjoni tinkoraġġixxi programmi ta’ taħriġ obbligatorji għal kull min jaħdem fis-settur tal-edukazzjoni, inklużi l-edukazzjoni informali u l-voluntiera, kif ukoll infrastruttura sikura, mekkaniżmi ta’ rapportar kunfidenzjali u azzjonijiet dixxiplinari;

51.Jistieden lill-Kummissjoni tirrikonoxxi l-edukazzjoni komprensiva, xjentifikament akkurata, ibbażata fuq il-kunsens u xierqa għall-età, dwar is-sesswalità r-relazzjonijiet, ibbażata fuq id-drittijiet tal-bniedem u l-ugwaljanza bejn il-ġeneri, bħala parti ewlenija mit-tkissir tal-istereotipi marbuta mal-ġeneru u l-indirizzar tal-imġiba ta’ ħsara, u biex tiżviluppa linji gwida tal-UE għal tali edukazzjoni għall-Istati Membri; jinnota li l-għan għandu jkun li ż-żgħażagħ jiġu mgħammra b’għarfien dwar l-awtonomija tal-ġisem, ir-relazzjonijiet b’saħħithom, is-saħħa riproduttiva u l-prevenzjoni tal-vjolenza abbażi tal-ġeneru u d-diskriminazzjoni; jisħaq fuq l-importanza li l-minorenni online jiġu protetti minn kontenut pornografiku vjolenti u ta’ ħsara;

52.Iħeġġeġ lill-Kummissjoni u lill-Istati Membri jieħdu miżuri biex inaqqsu d-differenza bejn il-ġeneri, b’mod partikolari fis-setturi STEM, tal-IA u dawk diġitali, billi jippromwovu strateġija integrata biex tissaħħaħ l-edukazzjoni tan-nisa u l-bniet minn età bikrija f’dawn is-setturi; jisħaq li tali strateġija għandha tinkludi inizjattivi mmirati biex jimmotivaw lin-nisa u l-bniet jidħlu fil-perkorsi STEM, u jistieden lill-Kummissjoni tiżgura l-aċċess ugwali tan-nisa għal korsijiet ta’ taħriġ vokazzjonali, internships u korsijiet ta’ sensibilizzazzjoni f’dawn is-suġġetti billi tippromwovi t-taħriġ u t-tagħlim tul il-ħajja, ixxerred l-aħjar prattiki edukattivi ta’ suċċess u inklużivi, tippromwovi mudelli eżemplari tan-nisa u tinkoraġġixxi lin-nisa jiksbu għarfien u jiżviluppaw il-ħiliet essenzjali għalihom biex ikollhom aċċess ugwali għal opportunitajiet ta’ impjieg f’oqsma emerġenti bħas-settur diġitali, it-tranżizzjoni ekoloġika u fl-ekonomija u n-negozju b’mod ġenerali u tagħti prijorità lid-diversità u l-inklużjoni fl-iSTEM; jinnota li bl-istess mod is-subien għandhom jiġu mħeġġa jidħlu fis-settur tal-EHW (edukazzjoni, saħħa u benessri); jissottolinja li t-teknoloġija u l-pjattaformi diġitali qed isiru kruċjali fil-proċess ġenerali tal-għoti tal-edukazzjoni u t-taħriġ lin-nisa u l-bniet kif ukoll f’ħafna proċessi tal-għażla tax-xogħol; jesprimi dispjaċir għall-impatti negattivi tal-aċċess mhux ugwali għat-teknoloġija, li jistgħu jfixklu l-iżvilupp tal-litteriżmu diġitali tan-nisa u l-bniet; jistieden lill-Kummissjoni tiżgura li n-nisa u l-bniet fid-diversità kollha tagħhom ma jiġux affettwati b’mod sproporzjonat min-nuqqas ta’ aċċess għat-teknoloġija;

53.Jistieden lill-Kummissjoni żżomm u tkompli tiżviluppa politika ta’ tolleranza żero fir-rigward tal-forom kollha ta’ vjolenza abbażi tal-ġeneru fl-ambjent diġitali; ifakkar li l-kondiviżjoni mhux kunsenswali ta’ materjal intimu, inklużi deepfakes, cyberstalking, fastidju ċibernetiku u inċitament ċibernetiku għall-vjolenza jew għall-mibegħda (diskors ta’ mibegħda) huma kriminalizzati taħt id-Direttiva (UE) 2024/1385 dwar il-ġlieda kontra l-vjolenza kontra n-nisa u l-vjolenza domestika u d-definizzjonijiet ta’ dawn ir-reati kriminali għandhom jiġu implimentati kif xieraq mil-liġijiet nazzjonali tal-Istati Membri; jappella għal kooperazzjoni msaħħa madwar l-UE kollha fl-identifikazzjoni u l-prosekuzzjoni ta’ reati diġitali abbażi tal-ġeneru, bħall-fastidju ċibernetiku u t-tixrid mhux kunsenswali ta’ media manipulata; jenfasizza l-ħtieġa ta’ kapaċità forensika diġitali transfruntiera u taħriġ ġudizzjarju; jistieden lill-Kummissjoni tkompli timmonitorja u tiżviluppa politika fir-rigward ta’ tipi oħra ta’ vjolenza abbażi tal-ġeneru online, speċjalment immirata lejn il-bniet u ż-żgħażagħ LGBTQI+;

54.Jistieden lill-Kummissjoni tinkorpora miżuri preventivi u salvagwardji fl-oqsma kollha tal-politika diġitali, b’attenzjoni partikolari għall-ugwaljanza bejn il-ġeneri, il-vjolenza abbażi tal-ġeneru u d-drittijiet tal-bniedem, kif ukoll il-protezzjoni tal-minorenni online; iħeġġeġ lill-Kummissjoni tiżgura l-infurzar sħiħ tal-obbligi ta’ valutazzjoni u ta’ mitigazzjoni tar-riskju fl-ambitu ta’ strumenti eżistenti bħad-DSA, inkluż il-kodiċi ta’ kondotta tiegħu, u l-Att dwar l-Intelliġenza Artifiċjali filwaqt li tiżviluppa wkoll proposti ta’ politika ġodda, pereżempju taħt it-Tarka Ewropea għad-Demokrazija u l-Att dwar il-Ġustizzja Diġitali; jappella għal skrutinju pubbliku tal-valutazzjonijiet annwali tar-riskju relatati mal-vjolenza abbażi tal-ġeneru u tal-miżuri ta’ mitigazzjoni introdotti minn pjattaformi online kbar ħafna (VLOPs, very large online platforms) u magni tat-tiftix online kbar ħafna (VLOSEs, very large online search engines) biex jiġu ffaċilitati r-riċerka u l-fehim aħjar tal-fenomenu;

55.Jistieden lill-Kummissjoni tagħti attenzjoni partikolari lill-modi li bihom l-algoritmi jistgħu jirriproduċu u jamplifikaw kontenut sessist jew degradanti, billi timponi trasparenza akbar u billi tiżola d-data ġġenerata mill-IA skont is-sess sabiex jiġu identifikati xejriet ta’ diskriminazzjoni; iħeġġeġ lill-Kummissjoni u lill-Istati Membri jistabbilixxu politiki u jimplimentaw programmi edukattivi u ta’ sensibilizzazzjoni mmirati lejn il-prevenzjoni, ir-rikonoxximent u r-rispons għall-vjolenza abbażi tal-ġeneru, speċjalment fost iż-żgħażagħ; jistieden lill-Kummissjoni tinvesti f’riċerka li ssegwi l-ugwaljanza bejn il-ġeneri fl-industriji tal-media u dawk diġitali, inkluż b’perspettiva intersezzjonali;

56.Jistieden lill-Kummissjoni toperazzjonalizza d-dritt għall-kura u li wieħed jirċievi l-kura kif rikonoxxut fil-Prinċipju 18 tal-Pilastru Ewropew tad-Drittijiet Soċjali; jisħaq li x-xogħol tal-kura jrid jiġi rikonoxxut, remunerat u appoġġjat, inkluż bħala ben pubbliku, u jappella għall-istabbiliment ta’ sistemi ta’ kura ta’ kwalità għolja, affordabbli u aċċessibbli li jiżguraw id-dinjità kemm għar-riċevituri tal-kura kif ukoll għall-ħaddiema tal-kura;

57.Jistieden għalhekk lill-Kummissjoni tiżviluppa l-Istrateġija Ewropea għall-Kura f’Patt Ewropew dwar il-Kura komprensiv, li jindirizza kemm il-persuni li jindokraw b’mod formali kif ukoll informali (l-aktar nisa fiż-żewġ każijiet), mgħammar b’għodod leġiżlattivi u finanzjarji vinkolanti għall-investiment fl-indokrar tat-tfal affordabbli u ta’ kwalità għolja, programmi edukattivi ta’ wara l-iskola u servizzi ta’ kura fit-tul, u l-iżgurar ta’ aċċess universali għalihom; itenni li l-Patt dwar il-Kura għandu jkun approċċ ibbażat fuq id-drittijiet għall-kura, u l-finanzjament tal-infrastruttura tal-kura għandu jsir permezz ta’ tassazzjoni progressiva u provvista pubblika; jenfasizza l-ħtieġa ta’ politiki tal-UE u nazzjonali għall-persuni li jindokraw b’mod informali li jimmiraw għal appoġġ finanzjarju u serħan, taħriġ, inklużjoni fis-sistemi tal-pensjonijiet u tas-saħħa sabiex jittaffew l-effetti negattivi tal-indokrar fuq il-karrieri tan-nisa u l-indipendenza ekonomika; jistieden lill-Kummissjoni żżid l-investimenti biex ittejjeb il-kundizzjonijiet tax-xogħol u s-saħħa u s-sikurezza fis-settur tal-kura, li fih il-maġġoranza tal-ħaddiema huma nisa;

58.Jistieden lill-Kummissjoni tiffaċilita perkorsi legali biex jiġi fformalizzat l-istatus tal-ħaddiema migranti nisa li jindokraw li huma affettwati b’mod sproporzjonat mid-diskriminazzjoni intersezzjonali, jiġu rikonoxxuti l-kwalifiki tagħhom u rikonoxxuti l-kontributi importanti tagħhom għas-sistemi tal-kura fl-UE, jiġi pprovdut aċċess għal impjiegi ta’ kwalità f’konformità mal-pjan direzzjonali għall-impjiegi ta’ kwalità li jmiss u jiġu żgurati kundizzjonijiet tax-xogħol ġusti għalihom, filwaqt li jiġu promossi opportunitajiet indaqs fis-settur tal-kura;

59.Jistieden lill-Kummissjoni tħeġġeġ lill-Istati Membri jiżguraw it-traspożizzjoni fil-pront u sħiħa tad-Direttiva dwar il-Bilanċ bejn ix-Xogħol u l-Ħajja Privata u l-miżuri li tinkludi; jistieden ukoll lill-Kummissjoni tistabbilixxi l-mekkaniżmi robusti ta’ infurzar, monitoraġġ u rapportar annwali previsti fid-Direttiva u fejn meħtieġ, tibda proċedimenti ta’ ksur jew miżuri oħra ta’ infurzar biex tiżgura konformità sħiħa u talloka finanzjament iddedikat taħt il-QFP li jmiss, u tipproponi rakkomandazzjoni għal standards ta’ kwalità fil-livell tal-UE għas-servizzi ta’ kura fit-tul, inkluż il-persunal, it-taħriġ u l-assigurazzjoni tal-kwalità; jistieden lill-Kummissjoni tirrieżamina d-Direttiva dwar il-Bilanċ bejn ix-Xogħol u l-Ħajja Privata biex tiżgura li hija adattata għall-iskop tagħha, issaħħaħha billi tkompli tiżviluppa u tespandi l-leave tal-maternità, tal-paternità u tal-kura tal-ġenituri kondiviża, u ttejjeb l-inċentivi għat-tieni ġenitur biex jieħu l-leave tal-ġenituri, filwaqt li tkompli tipproteġi lill-ġenituri u tiffaċilita l-kombinazzjoni ta’ impjieg bi ħlas u r-responsabbiltajiet ta’ indokrar; iħeġġeġ lill-Kummissjoni testendi l-perjodi ta’ leave tal-maternità u tal-paternità bi ħlas fl-Istati Membri, tippromwovi l-leave tal-ġenituri mhux trasferibbli, u tadotta miżuri biex tqassam mill-ġdid ir-responsabbiltajiet tal-indokrar fi ħdan l-unitajiet domestiċi u bejn l-Istat u l-familji;

60.Jenfasizza li infrastruttura tat-trasport inadegwata, nuqqas ta’ konnettività tat-trasport pubbliku, u għażliet ta’ mobbiltà mhux affordabbli jikkostitwixxu ostaklu strutturali bbażat fuq il-ġeneru għall-aċċess tan-nisa għall-impjiegi, l-edukazzjoni, il-kura tas-saħħa, u s-servizzi tal-kura, b’mod partikolari f’żoni rurali, remoti u b’introjtu baxx; jistieden lill-Kummissjoni u lill-Istati Membri jagħtu prijorità lill-investiment f’sistemi tat-trasport inklużivi, sikuri, affordabbli u sostenibbli li jqisu x-xejriet u l-ħtiġijiet speċifiċi tal-mobbiltà tan-nisa, bħala parti minn sforzi usa’ biex jitnaqqas il-faqar fit-trasport u tiġi promossa l-ugwaljanza territorjali;

61.Jisħaq fuq il-ħtieġa li jiġi implimentat mudell ta’ “ħaddiem ugwali – indokratur ugwali” fl-UE bil-għan li jinkiseb bilanċ aktar ugwali bejn il-ġeneri fir-rigward tar-responsabbiltajiet tal-indokrar għall-Istati Membri kollha tal-UE, u fl-istituzzjonijiet tal-UE; jappella għal promozzjoni qawwija tal-leave tal-paternità, introdotta mid-Direttiva dwar il-Bilanċ bejn ix-Xogħol u l-Ħajja Privata, kif ukoll is-sensibilizzazzjoni dwar ir-rabta mill-qrib bejn il-miżuri għall-bilanċ bejn ix-xogħol u l-ħajja privata u d-differenza fl-indokrar bejn il-ġeneri, li tikkontribwixxi għad-differenza fl-impjiegi, fil-pagi u fil-pensjonijiet; jissottolinja li r-responsabbiltajiet tal-indokrar ma jridux ikunu ostaklu għall-progress fil-karriera tan-nisa;

62.Jappella għall-introduzzjoni ta’ Jum Ewropew tal-Bilanċ bejn ix-Xogħol u l-Ħajja Privata fl-20 ta’ Marzu ta’ kull sena, li jirrifletti b’mod simboliku l-ugwaljanza bejn il-ġurnata u l-lejl tar-rebbiegħa;

63.Jissottolinja l-effetti dannużi li d-degradazzjoni ambjentali għandha fuq is-saħħa tan-nisa u l-bniet, speċjalment l-impatt tas-sustanzi per- u polifluworoalkilati (PFAS) u jħeġġeġ lill-Kummissjoni tqajjem kuxjenza dwar dawn ir-rabtiet u tiżgura approċċ koordinat u komprensiv għal din ir-rabta bejn it-tibdil fil-klima u l-ugwaljanza bejn il-ġeneri fil-ħidma kollha tagħha u tinforza politiki li jipprevjenu l-qerda kontinwa tal-ambjent u d-degradazzjoni kontinwa tas-saħħa tan-nisa, tal-bniet u tal-gruppi vulnerabbli;

64.Jissottolinja li l-politika barranija, is-sigurtà u d-difiża għandhom jinftiehmu fis-sens l-aktar wiesa’ tagħhom, permezz ta’ approċċ iċċentrat fuq il-bniedem, inklużi d-dimensjonijiet soċjali, edukattivi, ambjentali u kulturali, il-ġustizzja soċjali u klimatika, li kollha jirrikjedu demokraziji u ugwaljanza b’saħħithom, inkluża l-ugwaljanza bejn il-ġeneri; jisħaq fuq il-ħtieġa li tiġi implimentata l-aġenda dwar in-Nisa, il-Paċi u s-Sigurtà bħala prinċipju ewlieni tal-politika estera u ta’ sigurtà komuni (PESK) tal-UE u jtenni li l-finanzjament kollu relatat mal-PESK irid iqis dan filwaqt li jirrikonoxxi l-aspetti usa’ tas-sigurtà; jistieden lill-Kummissjoni tqis il-progress li sar fl-implimentazzjoni tal-aġenda dwar in-Nisa, il-Paċi u s-Sigurtà fil-livell tal-UE u tippreżenta l-konklużjonijiet tagħha lill-Kunsill u lill-Parlament Ewropew; iħeġġeġ lill-Kummissjoni tressaq, abbażi tal-eżerċizzju ta’ rendikont, Pjan ta’ Azzjoni ta’ segwitu għall-Pjan ta’ Azzjoni dwar in-Nisa, il-Paċi u s-Sigurtà 2019-2024, li tadattah u testendih għan-natura li qed tinbidel tal-kunflitti u t-theddid il-ġdid u tippreżenta azzjonijiet biex tinkiseb tmexxija bbilanċjata bejn il-ġeneri u reattiva għal kwistjonijiet ta’ ġeneru fil-livelli tat-teħid ta’ deċiżjonijiet tal-UE; jappella għall-avvanz tal-implimentazzjoni tar-Riżoluzzjoni 1325 tan-NU permezz ta’ Pjanijiet ta’ Azzjoni Nazzjonali dwar in-Nisa, il-Paċi u s-Sigurtà (NAP 1325-IV) u jistieden lill-Kummissjoni u lill-Istati Membri jsaħħu r-reklutaġġ, iż-żamma u l-avvanz tan-nisa fil-forzi armati nazzjonali u l-missjonijiet ċivili, u jintegraw il-perspettivi tal-ġeneru fit-tfassil, l-ippjanar u l-implimentazzjoni tal-politika dwar is-sigurtà u d-difiża;

65.Jappella lill-Kummissjoni biex tiżgura bbaġitjar konsistenti u sostenibbli għall-attivitajiet kollha relatati mal-ġeneru fis-settur tad-difiża u s-sigurtà tal-UE, f’konformità mal-Pjan ta’ Azzjoni tal-UE dwar in-Nisa, il-Paċi u s-Sigurtà; jenfasizza l-ħtieġa ta’ finanzjament iddedikat għal azzjonijiet relatati mal-ġeneru fi ħdan il-missjonijiet tal-politika ta’ sigurtà u ta’ difiża komuni (PSDK), inkluża linja baġitarja speċifika għall-konsulenti dwar il-ġeneru f’missjonijiet ċivili tal-PSDK;

66.Jenfasizza li l-kriżijiet, bħall-kunflitti armati, l-okkupazzjoni tat-territorju, id-diżastri naturali u l-kriżijiet umanitarji, il-faqar enerġetiku, it-tibdil fil-klima u l-kriżi tal-għoli tal-ħajja jiggravaw l-inugwaljanzi eżistenti; id-difensuri tad-drittijiet tal-bniedem femministi, LGBTIQ+ u SRHR li jaħdmu fuq dawn il-kwistjonijiet iridu jiġu protetti permezz ta’ mekkaniżmi ddedikati, speċjalment f’pajjiżi li qed jesperjenzaw rigress demokratiku; jistieden lill-Kummissjoni żżid il-ġestjoni tal-kriżijiet, il-preparatezza u s-sigurtà mal-Istrateġija futura dwar l-Ugwaljanza bejn il-Ġeneri għal wara l-2025;

67.Jistieden lill-Kummissjoni twettaq reviżjoni oħra tal-progress miksub fl-implimentazzjoni tal-Pjan ta’ Azzjoni kurrenti dwar il-Ġeneri (GAP III) u tkompli timplimenta l-mekkaniżmu biex issegwi l-ammont ta’ finanzjament tal-UE għall-ugwaljanza bejn il-ġeneri allokat u żborżat fil-pajjiżi sħab u tirrapporta dwaru permezz tal-GAP III; iħeġġeġ lill-Kummissjoni żżomm għoli l-pass u l-livell ta’ ambizzjoni għall-implimentazzjoni tal-pjan u jistieden lill-Kummissjoni tibda t-tħejjijiet għal Pjan ta’ Azzjoni ambizzjuż dwar il-Ġeneri għal wara l-2027 (GAP IV) biex tiżgura l-adozzjoni f’waqtha tiegħu, inkluż billi twarrab finanzjament adegwat għall-implimentazzjoni tal-pjan fil-proposta li jmiss għall-QFP 2028-2034; jenfasizza li l-prinċipji ewlenin tal-GAP III – approċċ ibbażat fuq id-drittijiet tal-bniedem, inklużi s-saħħa sesswali u riproduttiva u d-drittijiet relatati, l-intersezzjonalità u approċċ li jittrasforma l-perspettiva tal-ġeneru – għandhom ikunu parti integrali mill-GAP IV u l-implimentazzjoni konkreta tagħhom għandha tissaħħaħ; jistieden lill-Kummissjoni żżid l-appoġġ politiku u finanzjarju għall-inizjattivi ta’ ugwaljanza bejn il-ġeneri u l-aġenziji tan-NU bħall-UN Women u l-Fond tan-NU għall-Popolazzjoni (UNFPA), b’enfasi speċifika fuq is-Sħubija ta’ Provvista tal-UNFPA);

68.Jistieden lill-Kummissjoni tistabbilixxi servizz ta’ appoġġ iddedikat li jopera permezz tar-Rappreżentanzi Diplomatiċi tal-UE f’pajjiżi terzi, b’mandat speċifiku biex jipprovdi appoġġ għad-difensuri tad-drittijiet tan-nisa u l-organizzazzjonijiet b’mod globali sabiex jiġu miġġielda l-movimenti kontra l-ġeneru; iħeġġeġ lill-Kummissjoni u lill-Istati Membri jaffermaw mill-ġdid l-impenn tagħhom favur l-ugwaljanza bejn il-ġeneri u t-tisħiħ tal-pożizzjoni tan-nisa globalment u jżidu l-finanzjament għall-organizzazzjonijiet tan-nisa, speċjalment fin-Nofsinhar Globali u f’reġjuni fejn l-ugwaljanza bejn il-ġeneri tinsab taħt attakk sabiex jintervjenu fil-lakuni fl-għajnuna għall-iżvilupp għall-organizzazzjonijiet tad-drittijiet tan-nisa li kienu kkawżati mit-tnaqqis fl-għajnuna mill-Aġenzija tal-Istati Uniti għall-Iżvilupp Internazzjonali (USAID);

69.Iħeġġeġ lill-Kummissjoni tiggarantixxi l-koerenza fil-politiki interni u esterni dwar l-ugwaljanza bejn il-ġeneri, jiġifieri fl-Istrateġija dwar l-Ugwaljanza bejn il-Ġeneri li jmiss għal wara l-2025 (GAP III u GAP IV) u tiżgura li dawn ikunu kkoordinati mal-istrateġiji, l-oqfsa u l-pjanijiet ta’ azzjoni rilevanti l-oħra kollha eżistenti u futuri, bħall-Istrateġija tal-UE dwar id-Diżabbiltà 2021-2030, il-Qafas Strateġiku tal-UE għar-Rom dwar l-ugwaljanza, l-inklużjoni u l-parteċipazzjoni, l-Istrateġija tal-UE dwar id-Drittijiet tal-Vittmi, l-Istrateġija dwar l-LGBTIQ u l-Pjan ta’ Azzjoni tal-UE kontra r-Razziżmu; jistieden lill-Kummissjoni tiżgura trasparenza akbar u involviment akbar tal-partijiet ikkonċernati fl-implimentazzjoni tal-inizjattivi kollha relatati mal-ġeneru, u tinvolvi lill-Parlament b’mod aktar sistematiku fl-iskrutinju u l-evalwazzjoni ta’ dawn l-azzjonijiet;

70.Jinnota bi tħassib iż-żieda allarmanti fir-reati ta’ mibegħda u fid-diskors ta’ mibegħda mmirati lejn in-nisa, l-individwi LGBTIQ+, il-minoranzi razzjali jew etniċi u gruppi emarġinati oħra, u jenfasizza r-rabta bejn l-istat tad-dritt u l-istandards demokratiċi li qed jiddeterjoraw u l-ksur tad-drittijiet fundamentali, b’mod partikolari d-drittijiet tan-nisa u tal-minoranzi; jenfasizza li l-implimentazzjoni inkonsistenti tas-salvagwardji fl-Istati Membri twassal għal protezzjoni inadegwata u tesponi lil ċerti gruppi għal riskji ogħla ta’ diskriminazzjoni u vjolenza; jesprimi tħassib dwar in-nuqqas ta’ progress fl-implimentazzjoni tal-liġijiet dwar l-ugwaljanza u kontra d-diskriminazzjoni f’xi Stati Membri u jħeġġeġ lill-Kummissjoni tindirizza dan fl-Istrateġija dwar l-Ugwaljanza bejn il-Ġeneri għal wara l-2025; jilqa’ t-treġġigħ lura tad-deċiżjoni li tiġi rtirata d-direttiva orizzontali kontra d-diskriminazzjoni u jħeġġeġ lill-Istati Membri jadottaw il-leġiżlazzjoni mingħajr dewmien;

71.Iħeġġeġ lill-Kummissjoni tiżgura mekkaniżmu komprensiv ta’ monitoraġġ u ta’ akkontabbiltà biex tindirizza malajr l-erożjoni kontinwa tad-demokrazija, id-drittijiet tan-nisa u l-ugwaljanza bejn il-ġeneri, inklużi s-saħħa sesswali u riproduttiva u d-drittijiet relatati u d-drittijiet tal-persuni LGBTIQ+, li huma intrinsikament marbuta; jistieden lill-Kummissjoni tibni fuq il-mekkaniżmi eżistenti biex tivvaluta l-konformità mal-istat tad-dritt jew mad-drittijiet fundamentali u tiżviluppa progressivament mekkaniżmu ddedikat li jinkludi l-valuri kollha tal-Unjoni skont l-Artikolu 2 tat-TUE, inklużi d-demokrazija, l-istat tad-dritt u d-drittijiet fundamentali u tal-bniedem, inklużi d-drittijiet tan-nisa, li jopera skont ftehim interistituzzjonali bejn il-Kummissjoni, il-Parlament u l-Kunsill, filwaqt li jiġi żgurat approċċ unifikat għall-monitoraġġ annwali fl-Istati Membri kollha u rabta ċara ma’ miżuri konkreti tal-Unjoni għal każijiet li fihom in-nuqqasijiet jibqgħu ma jiġux indirizzati; jinnota li l-miżuri kollha kontra r-rigress għandhom jirriflettu perspettiva intersezzjonali; iħeġġeġ lill-Kummissjoni twettaq riċerka fil-fond dwar il-movimenti kontra l-ġeneru biex tikseb għarfien aktar profond dwar l-operazzjonijiet u l-istrateġiji ta’ finanzjament kurrenti tagħhom; jisħaq li l-fehim ta’ dawn id-dinamiċi huwa kruċjali għas-salvagwardja ta’ Ewropa moderna, inklużiva u tolleranti;

72.Jenfasizza bi tħassib kbir it-tkabbir tal-“manosfera”; jissottolinja li l-algoritmi użati mill-pjattaformi tal-media soċjali jamplifikaw il-kontenut misoġinu estrem; iħeġġeġ lill-Kummissjoni tinvestiga u tissanzjona lill-VPLOs li ma jissodisfawx l-obbligi tagħhom li jneħħu l-kontenut ta’ ħsara; iħeġġeġ lill-Kummissjoni tesplora d-diverġenza dejjem tikber fl-attitudnijiet bejn l-irġiel u n-nisa żgħażagħ lejn l-ugwaljanza bejn il-ġeneri, tivvaluta l-konsegwenzi soċjetali tagħha, b’mod partikolari fl-ispazji online, u tiżviluppa miżuri biex tindirizza u tiġġieled iż-żieda fil-valuri misoġini u tal-lemin estrem fost is-subien u l-irġiel żgħażagħ fir-rigward tal-ugwaljanza bejn il-ġeneri u d-drittijiet tan-nisa; jistieden għalhekk lill-Kummissjoni tippromwovi edukazzjoni komprensiva u xierqa għall-età dwar is-sesswalità u r-relazzjonijiet fl-iskejjel, issaħħaħ il-litteriżmu kritiku fil-media, tiġġieled il-miżinformazzjoni u d-diżinformazzjoni marbuta mal-ġeneru u tindirizza l-istereotipi marbuta mal-ġeneru; jisħaq fuq il-ħtieġa ta’ fehim aktar profond tal-fenomenu u l-ideoloġija taċ-ċelibat involontarju u jenfasizza l-importanza tal-prevenzjoni permezz ta’ politiki aktar attivi biex jiġu miġġielda dawn u n-narrattivi tagħhom flimkien ma’ kwistjonijiet sottostanti potenzjali ta’ saħħa mentali u kwistjonijiet ta’ sigurtà;

73.Ifakkar fir-rwol kruċjali u indispensabbli li għandhom l-organizzazzjonijiet tas-soċjetà ċivili (OSĊ) f’sistema ta’ kontrokontrolli f’demokrazija b’saħħitha, speċjalment l-organizzazzjonijiet tad-drittijiet tan-nisa u d-difensuri tad-drittijiet tal-bniedem tan-nisa, inklużi dawk li jaħdmu fis-settur umanitarju, fid-difiża u l-avvanz tal-ugwaljanza bejn il-ġeneri, id-drittijiet tal-bniedem u l-libertajiet fundamentali, speċjalment fi żminijiet ta’ rigressjoni politika, soċjali u istituzzjonali; jistieden lill-Kummissjoni tirrikonoxxi, tipproteġi, tiżgura s-sikurezza u tappoġġja lill-organizzazzjonijiet tas-soċjetà ċivili, lill-organizzazzjonijiet u d-difensuri tad-drittijiet tal-bniedem tan-nisa, lill-movimenti femministi, LGBTIQ+ u tad-drittijiet sesswali u riproduttivi li huma essenzjali fil-promozzjoni ta’ riformi ta’ politika inklużivi, fl-isfida ta’ prattiki diskriminatorji, u fil-mobilizzazzjoni tal-komunitajiet fid-difiża tad-drittijiet fundamentali fl-UE u globalment; jinnota li dawn qed ikunu dejjem aktar fil-mira ta’ atturi tal-lemin estrem u dawk kontra d-drittijiet; jistieden lill-Kummissjoni tinkludi bħala pilastru orizzontali fil-politiki tal-UE u fl-Istrateġija dwar l-Ugwaljanza bejn il-Ġeneri għal wara l-2025 azzjonijiet u rakkomandazzjonijiet dwar is-salvagwardja u l-appoġġ lill-organizzazzjonijiet tas-soċjetà ċivili li jaħdmu fuq id-drittijiet tan-nisa, l-ugwaljanza bejn il-ġeneri u kontra d-diskriminazzjoni;

74.Iħeġġeġ lill-Kummissjoni tiżgura finanzjament sostenibbli u aċċessibbli għall-organizzazzjonijiet tad-drittijiet tan-nisa, inkluż permezz tal-QFP il-ġdid u żżomm u ssaħħaħ l-impenn tagħha li tappoġġja lis-soċjetà ċivili, inkluż finanzjarjament permezz tal-Programm dwar iċ-Ċittadini, l-Ugwaljanza, id-Drittijiet u l-Valuri (CERV), filwaqt li tiżgura li dan jibqa’ għodda robusta biex jiġi indirizzat it-theddid emerġenti għad-drittijiet u l-libertajiet; jistieden b’mod partikolari lill-Kummissjoni żżomm is-CERV bħala programm awtonomu taħt ġestjoni diretta u żżid b’mod sostanzjali l-finanzjament tiegħu sabiex iwieġeb għall-ħtiġijiet tal-organizzazzjonijiet tas-soċjetà ċivili sottofinanzjati u għat-theddid u l-isfidi dejjem jiżdiedu għall-ispazju ċiviku u l-valuri tal-UE; iħeġġeġ lill-Kummissjoni żżomm il-fergħa ddedikata tal-programmi għall-ugwaljanza bejn il-ġeneri u d-drittijiet tan-nisa, inkluża s-saħħa sesswali u riproduttiva u d-drittijiet relatati, kif ukoll fergħat iddedikati bħal Daphne, li għandu jibqa’ programm awtonomu b’linja baġitarja separata fil-QFP il-ġdid għall-ġlieda kontra l-vjolenza abbażi tal-ġeneru u d-diskriminazzjoni inkluż kontra l-persuni LGBTIQ;

75.Iwissi li porzjon sinifikanti tal-finanzjament li jixpruna t-tkabbir tal-movimenti kontra l-ġeneru madwar l-UE ġej minn atturi barranin; itenni li l-finanzjament kollu jrid jallinja mal-valuri komuni tal-Unjoni kif stabbiliti fl-Artikolu 2 tat-TUE u l-Karta tad-Drittijiet Fundamentali, biex jiġi żgurat li l-appoġġ finanzjarju jsaħħaħ il-valuri demokratiċi tal-UE; jistieden lill-Kummissjoni tirrevedi u tawditja l-finanzjament kurrenti kollu, b’mod reattiv għal kwistjonijiet ta’ ġeneru fuq il-prinċipju ta’ “la tagħmilx ħsara” sabiex jiġi żgurat li l-ebda fond tal-UE ma jmur lejn objettivi u proġetti antidemokratiċi u kontra l-ġeneru; iħeġġeġ lill-Kummissjoni timmonitorja mill-qrib l-implimentazzjoni fl-Istati Membri ta’ fondi taħt ġestjoni kondiviża mmirati lejn il-promozzjoni tal-ugwaljanza bejn il-ġeneri u l-appoġġ għas-soċjetà ċivili, inklużi l-organizzazzjonijiet mhux governattivi tan-nisa, sabiex jiġi żgurat li s-sejħiet għal proposti biex jinkisbu tali fondi ma jiġux imwaqqfa jew miżmuma deliberatament;

76.Jistieden lill-Kummissjoni timmonitorja mill-qrib l-implimentazzjoni, mill-Istati Membri, tas-sentenzi kemm tal-Qorti Ewropea tad-Drittijiet tal-Bniedem kif ukoll tal-QĠUE, b’attenzjoni partikolari għas-sentenzi relatati mal-ugwaljanza bejn il-ġeneri, man-nondiskriminazzjoni u mad-drittijiet tal-minoranzi, filwaqt li tiżgura l-aderenza sħiħa mal-obbligi internazzjonali;

77.Jappella għal finanzjament adegwat għar-riċerka tal-UE dwar l-ugwaljanza bejn il-ġeneri, inkluż għall-EIGE u għall-Aġenzija tal-UE għad-Drittijiet Fundamentali, u permezz ta’ għodod bħall-proġetti tal-pjanijiet għall-ugwaljanza bejn il-ġeneri ffinanzjati minn Orizzont Ewropa; jappella għal metodoloġija mtejba li għandha tidentifika mhux biss il-benefiċjarji tal-fondi tal-UE, iżda wkoll il-potenzjal trasformattiv tal-programmi; iħeġġeġ lill-Kummissjoni tiżgura li l-fondi tal-UE jingħataw biss lil proġetti li jikkonformaw mad-drittijiet u l-prinċipji fundamentali tal-UE, inklużi l-ugwaljanza bejn il-ġeneri, l-aċċess għas-saħħa sesswali u riproduttiva u d-drittijiet relatati u l-eliminazzjoni tal-vjolenza abbażi tal-ġeneru; iħeġġeġ lill-Kummissjoni tiżgura tranżizzjoni ġusta u soċjalment ġusta li taħdem għal kulħadd billi tiżviluppa strateġija intersezzjonali li tittrasforma l-perspettiva tal-ġeneru biex jiġu indirizzati kwistjonijiet ewlenin u jisħaq fuq il-ħtieġa li tingħata spinta sinifikanti lill-investiment fis-servizzi soċjali essenzjali bil-għan li jingħata kontribut għall-indipendenza, l-ugwaljanza u l-emanċipazzjoni tan-nisa;

78.Jirrikonoxxi li ħafna nisa jiffaċċjaw inugwaljanzi u diskriminazzjoni intersezzjonali fl-UE u jħeġġeġ lill-Kummissjoni tkompli tiżviluppa l-applikazzjoni tal-intersezzjonalità bħala prinċipju trażversali fl-Istrateġija l-ġdida dwar l-Ugwaljanza bejn il-Ġeneri għal wara l-2025 u fi ħdan il-miżuri leġiżlattivi u mhux leġiżlattivi kollha;

79.Iħeġġeġ lill-Kummissjoni u lill-Istati Membri jindirizzaw l-intersezzjonalità fil-politiki kollha relatati mal-ugwaljanza bejn il-ġeneri, filwaqt li jirrikonoxxi li l-vjolenza abbażi tal-ġeneru u d-diskriminazzjoni huma ggravati wkoll minn fatturi bħall-età, ir-razza, l-etniċità, minoranza, id-diżabilità, l-identità tal-ġeneru u l-orjentazzjoni sesswali, u li l-intersezzjoni ta’ dawn il-fatturi toħloq forom multipli u uniċi ta’ diskriminazzjoni li jirrikjedu miżuri mmirati u speċifiċi għall-kuntest;

80.Jistieden lill-Kummissjoni tiżgura li l-miżuri jkopru t-territorju kollu tal-UE u li jipprovdu strumenti effettivi biex jindirizzaw id-disparitajiet reġjonali fl-ugwaljanza bejn il-ġeneri kemm bejn l-Istati Membri tal-UE u r-reġjuni tagħhom kif ukoll fi ħdanhom; jisħaq li dawn il-miżuri għandhom ikunu adattabbli u b’riżorsi adegwati biex jindirizzaw id-disparitajiet bejn il-ġeneri, b’kont meħud tar-riżorsi disponibbli, l-aċċessibbiltà u l-livell ta’ progress ta’ kull reġjun;

81.Jesprimi dispjaċir għall-fatt li minkejja r-rwol vitali li għandhom in-nisa fiż-żoni rurali biex iżommu l-komunitajiet tagħhom u jżommu l-agrikoltura vijabbli, il-kontribut tagħhom spiss ma jiġix rikonoxxut u jkomplu jiffaċċjaw bosta sfidi, inklużi opportunitajiet limitati ta’ impjieg, aċċess aktar baxx għas-servizzi, infrastruttura anqas żviluppata u sottorappreżentanza fit-teħid tad-deċiżjonijiet; jistieden lill-Kummissjoni toħloq u timplimenta sottoprogrammi u attivitajiet iddedikati għan-nisa fiż-żoni rurali;

82.Jistieden lill-Kummissjoni ssaħħaħ u tappoġġja l-konfigurazzjoni tal-Kunsill dwar l-ugwaljanza bejn il-ġeneri li tiġbor ministri u segretarji tal-Istat inkarigati mill-ugwaljanza bejn il-ġeneri, iddedikati għall-kwistjonijiet tad-drittijiet tan-nisa u l-ugwaljanza bejn il-ġeneri biex twassal miżuri komuni u konkreti inkluż permezz tal-presidenzi tal-Kunsill, u tiżgura li l-kwistjonijiet dwar l-ugwaljanza bejn il-ġeneri jiġu diskussi fl-ogħla livell politiku;

83.Iħeġġeġ lill-Kummissjoni timmonitorja u tħeġġeġ l-implimentazzjoni rapida tad-Direttiva dwar l-istandards għall-korpi tal-ugwaljanza (id-Direttiva (UE) 2024/1499) u tressaq rakkomandazzjoni lill-Istati Membri rigward l-istandards għall-funzjonament u l-kompiti tagħhom sabiex tiffaċilita t-traspożizzjoni korretta tad-direttiva u tiżgura l-armonizzazzjoni tal-istabbiliment tal-korpi tal-ugwaljanza madwar l-Unjoni; jisħaq fuq l-importanza tal-adeżjoni tal-UE mal-Konvenzjoni Ewropea dwar id-Drittijiet tal-Bniedem u jistieden lill-Kummissjoni tieħu azzjoni biex jintlaħaq dan il-għan billi titlob l-opinjoni legali tal-QĠUE;

84.Ifaħħar il-kooperazzjoni kostruttiva tal-EIGE u l-ħidma ddedikata tiegħu, li għandha rwol kruċjali fil-ġbir adegwat ta’ data, fl-analiżi ta’ data diżaggregata komparabbli, fl-għoti ta’ riċerka u gwida lill-istituzzjonijiet tal-UE u lill-Istati Membri, kif ukoll fil-monitoraġġ tal-implimentazzjoni tal-leġiżlazzjoni tal-UE rilevanti għall-ġeneru fl-Istati Membri kollha tal-UE; jistieden lill-Kummissjoni tiżgura li l-EIGE jkollu biżżejjed riżorsi finanzjarji u umani u kapaċità biex ikun jista’ jwettaq il-kompiti tiegħu b’mod effettiv; ifakkar li l-EIGE esperjenza problemi persistenti b’nuqqas ta’ persunal, li komplew jiġu ggravati miż-żieda qawwija fit-talbiet għal assistenza teknika; jappella, għalhekk, biex l-EIGE jiġi allokat aġenti temporanji ġodda;

85.Jistieden lill-Kummissjoni tikkonsulta u tinvolvi b’mod attiv lin-nisa u l-bniet fid-diversità kollha tagħhom, inkluż permezz ta’ organizzazzjonijiet rappreżentattivi, fit-tħejjija u l-implimentazzjoni tal-Istrateġija dwar l-Ugwaljanza bejn il-Ġeneri għal wara l-2025;

86.Jistieden lill-Kummissjoni tirrikonoxxi r-rwol importanti li għandhom l-organizzazzjonijiet tas-soċjetà ċivili u l-atturi f’livelli differenti, bħall-komunitajiet rurali, il-gruppi ta’ azzjoni lokali, il-muniċipalitajiet lokali u reġjonali, kif ukoll l-akkademiċi u l-istituzzjonijiet bħall-Kumitat tar-Reġjuni, fit-twettiq tal-ugwaljanza bejn il-ġeneri; jistieden, għalhekk, lill-Kummissjoni ssegwi approċċ inklużiv u tinvolvi mill-qrib lil dawn il-partijiet ikkonċernati kollha biex jgħinu fil-kisba tal-għanijiet tal-Istrateġija dwar l-Ugwaljanza bejn il-Ġeneri għal wara l-2025;

87.Jenfasizza l-importanza tal-kooperazzjoni mal-esperti fil-qasam; jistieden lill-Kummissjoni tiżgura wkoll li l-politiki dwar l-ugwaljanza bejn il-ġeneri jiġu ffinanzjati kif xieraq u jiġu appoġġjati fil-livelli lokali u reġjonali u li l-fondi ta’ koeżjoni u għall-irkupru tal-UE jinkludu rekwiżiti għal objettivi ċari tal-ugwaljanza bejn il-ġeneri, biex jiġi żgurat li l-iżvilupp reġjonali jikkontribwixxi għat-tnaqqis tad-disparitajiet bejn il-ġeneri pjuttost milli jiggrava l-inugwaljanzi, peress li dawn għandhom influwenza diretta fuq firxa ta’ oqsma li jaffettwaw l-ugwaljanza bejn il-ġeneri, bħall-impjiegi, l-edukazzjoni, l-infrastruttura tal-kura, is-saħħa, l-appoġġ għan-nisa li huma vittmi tal-vjolenza, u l-ippjanar urban u t-trasport sensittivi għall-ġeneru;

88.Jistieden lill-Kummissjoni tiżgura u ttejjeb – f’kooperazzjoni mal-EIGE u l-Eurostat – ġbir, rapportar u analiżi regolari, affidabbli u adegwati ta’ data komparabbli diżaggregata skont il-ġeneru fil-livelli tal-UE u tal-Istati Membri; jistieden lill-Kummissjoni tiżviluppa metodoloġija komuni ta’ traċċar għall-ġbir tad-data, fejn ma tkunx disponibbli, u jissottolinja l-ħtieġa li jiġu żviluppati definizzjonijiet orizzontali tal-UE, biex jiġu ffaċilitati l-valutazzjonijiet tal-impatt fuq il-ġeneri fl-oqsma ta’ politika tal-Unjoni; jistieden lill-Kummissjoni ttejjeb, b’mod partikolari, il-ġbir ta’ data dwar il-prevenzjoni, il-prosekuzzjoni u s-sanzjonar tal-vjolenza abbażi tal-ġeneru, inklużi l-femminiċidju, l-istupru u vjolenza sesswali oħra permezz tar-reġistrazzjoni ta’ data komprensiva u komparabbli kemm dwar il-vittmi kif ukoll dwar l-awturi tar-reati diżaggregata skont is-sess, il-grupp ta’ età, ir-relazzjoni bejn il-vittma u l-awtur tar-reat u t-tip ta’ reat kif elenkat fid-Direttiva dwar il-ġlieda kontra l-vjolenza kontra n-nisa u l-vjolenza domestika u, fejn possibbli, il-ġeneru, l-identità tal-ġeneru, l-oriġini razzjali jew etnika, l-orjentazzjoni sesswali, il-karatteristiċi tas-sess, id-diżabilità u l-istatus taċ-ċittadinanza, u tiżgura li d-data tiġi rieżaminata regolarment u tintuża biex tinforma t-tfassil tal-politika, l-allokazzjoni tar-riżorsi u miżuri oħra mmirati lejn il-prevenzjoni u l-indirizzar tal-vjolenza sesswali u vjolenza oħra abbażi tal-ġeneru; jinkoraġġixxi l-kooperazzjoni tal-Istati Membri mas-soċjetà ċivili biex jiġu żgurati d-drittijiet tal-vittmi u meta jitfasslu politiki speċifiċi;

89.Jenfasizza li l-prekundizzjoni għall-iżvilupp ta’ politiki dwar l-ugwaljanza bejn il-ġeneri hija l-allokazzjoni ta’ riżorsi adegwati u l-implimentazzjoni tal-Istrateġija dwar l-Ugwaljanza bejn il-Ġeneri għal wara l-2025;

90.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.