Aithníonn Parlaimint na hEorpa agus an Chomhairle gur gá tacú le bonn tionsclaíoch agus teicneolaíoch na cosanta Eorpaí agus le bonn tionsclaíoch agus teicneolaíoch cosanta na hÚcráine chun a n-iomaíochas a mhéadú trí dhlús a chur le coigeartú na tionsclaíochta d’athruithe struchtúracha, lena n-áirítear trí acmhainneachtaí táirgeachta a mhéadú agus tríd an gcomhar a mhéadú maidir le soláthar táirgí cosanta, go háirithe i bhfianaise na ndúshlán a eascraíonn as cogadh foghach neamhdhleathach na Rúise ar an Úcráin, ar cogadh é atá gan chúis gan údar.
Gan dochar do shainphribhléidí an údaráis bhuiséadaigh faoi chuimsiú nósanna imeachta buiséadacha bliantúla amach anseo, iarrann Parlaimint na hEorpa agus an Chomhairle ar an gCoimisiún féachaint, mar ábhar tosaíochta, agus réamhghealltanais pholaitiúla an údaráis bhuiséadaigh á gcur san áireamh, lena n-áirítear chun costas úis na hionstraime téarnaimh a chumhdach, ar roghanna chun an buiséad don Chlár um Thionscal Cosanta na hEorpa agus don Ionstraim um Thacaíocht don Úcráin a threisiú i gcomhréir le pointe 18 den chomhaontú idirinstitiúideach maidir leis an smacht buiséadach, gan cláir agus cistí comhchosúla de chuid an Aontais a laghdú.
Aithníonn Parlaimint na hEorpa, an Chomhairle agus an Coimisiún an géarghá atá ann maidir le tacú le bonn tionsclaíoch agus teicneolaíoch na cosanta Eorpaí agus le bonn tionsclaíoch agus teicneolaíoch cosanta na hÚcráine chun a n-iomaíochas a mhéadú trí dhlús a chur le coigeartú na tionsclaíochta d’athruithe struchtúracha, lena n-áirítear trí acmhainneachtaí táirgeachta a mhéadú agus tríd an gcomhar a mhéadú maidir le soláthar táirgí cosanta, go háirithe i bhfianaise na ndúshlán a eascraíonn as cogadh foghach neamhdhleathach na Rúise ar an Úcráin, ar cogadh é atá gan chúis gan údar.
I gcomhréir le hAirteagal 17(4) de Rialachán SAFE, úsáidfear na ranníocaíochtaí airgeadais atá le soláthar ag tríú tíortha dá rannpháirtíocht in Ionstraim SAFE le haghaidh na gclár lena dtacaítear le tionscal cosanta an Aontais, le tionscal cosanta na hÚcráine agus leis an Úcráin i gcomhréir le rialacha na gclár sin. Aontaíonn Parlaimint na hEorpa, an Chomhairle agus an Coimisiún gur cheart na ranníocaíochtaí sin a úsáid chun EDIP a threisiú, lena n-áirítear an Ionstraim um Thacaíocht don Úcráin.
Tá Parlaimint na hEorpa, an Chomhairle agus an Coimisiún den tuairim gur cheart acmhainní airgeadais breise a chur ar fáil do Rialachán EDIP.
Chuige sin, foráiltear go sonrach i Rialachán EDIP go bhféadfaí ranníocaíochtaí airgeadais breise a dhéanamh ó na Ballstáit, ó institiúidí, comhlachtaí agus gníomhaireachtaí an Aontais, ó thríú tíortha, ó eagraíochtaí idirnáisiúnta, ó institiúidí airgeadais idirnáisiúnta nó ó thríú páirtithe eile agus tagraítear go sainráite ann don Chiste chun dlús a chur le claochlú shlabhraí soláthair na cosanta i ndáil leis sin.
I bhfianaise an mhéid sin agus an ról lárnach atá ag an gCiste chun dlús a chur le claochlú shlabhraí soláthair na cosanta maidir le feabhas a chur ar acmhainneachtaí monaraíochta cosanta FBManna agus cuideachtaí meánchaipitlithe beaga a bhfuil gá ar leith acu le hinfheistíochtaí á chur san áireamh, ba cheart na ranníocaíochtaí breise sin a leithdháileadh mar thosaíocht ar an gCiste sin agus na méideanna a leithdháiltear ón imchlúdach €1.200 milliún dá dtagraítear in Airteagal 3(1) á gcomhlánú, agus é mar aidhm leis sin go mbeidh EUR 150 milliún ar a laghad sa mhéid táscach foriomlán don chiste áirithe sin faoin gClár, agus sainphribhléidí an údaráis bhuiséadaigh á n‑urramú.