Il-Parlament Ewropew u l-Kunsill jirrikonoxxu l-ħtieġa imperattiva li tiġi appoġġata l-Bażi Industrijali u Teknoloġika tad-Difiża Ewropea u l-Bażi Industrijali u Teknoloġika tad-Difiża Ukrena biex tiżdied il-kompetittività tagħhom billi jitħaffef l-aġġustament tal-industrija għall-bidliet strutturali, inkluż billi jiżdiedu l-kapaċitajiet ta' produzzjoni u tiżdied il-kooperazzjoni fl-akkwist ta' prodotti tad-difiża, b'mod partikolari fid-dawl tal-isfidi maħluqa mill-gwerra ta' aggressjoni illegali, mhux provokata u mhux ġustifikata tar-Russja kontra l-Ukrajna.
Mingħajr preġudizzju għall-prerogattivi tal-awtorità baġitarja fil-qafas tal-proċeduri baġitarji annwali futuri, il-Parlament Ewropew u l-Kunsill jistiednu lill-Kummissjoni tesplora bħala kwistjoni ta' prijorità, filwaqt li tqis l-impenji politiċi preċedenti tal-awtorità baġitarja, inkluż biex jiġi kopert il-kost tal-imgħax tal-EURI, l-għażliet biex jissaħħaħ il-baġit għall-Programm għall-Industrija tad-Difiża Ewropea u l-Istrument ta' Appoġġ għall-Ukrajna f'konformità mal-punt 18 tal-FII dwar id-dixxiplina baġitarja mingħajr ma jitnaqqsu programmi u fondi simili tal-UE.
Il-Parlament Ewropew, il-Kunsill u l-Kummissjoni jirrikonoxxu l-ħtieġa imperattiva li tiġi appoġġata l-Bażi Industrijali u Teknoloġika tad-Difiża Ewropea u l-Bażi Industrijali u Teknoloġika tad-Difiża Ukrena biex tiżdied il-kompetittività tagħhom billi jitħaffef l-aġġustament tal-industrija għall-bidliet strutturali, inkluż billi jiżdiedu l-kapaċitajiet ta' produzzjoni u tiżdied il-kooperazzjoni fl-akkwist ta' prodotti tad-difiża, b'mod partikolari fid-dawl tal-isfidi maħluqa mill-gwerra ta' aggressjoni illegali, mhux provokata u mhux ġustifikata tar-Russja kontra l-Ukrajna.
F'konformità mal-Artikolu 17(4) tar-Regolament SAFE, il-kontribuzzjonijiet finanzjarji li għandhom jiġu pprovduti minn pajjiżi terzi għall-parteċipazzjoni tagħhom fl-istrument SAFE għandhom jintużaw għal programmi li jappoġġaw l-industrija tad-difiża tal-Unjoni, l-industrija tad-difiża Ukrena u l-Ukrajna f'konformità mar-regoli ta' dawk il-programmi. Il-Parlament Ewropew, il-Kunsill u l-Kummissjoni jaqblu li tali kontribuzzjonijiet għandhom jintużaw biex isaħħu l-EDIP, inkluż l-USI.
Il-Parlament Ewropew, il-Kunsill u l-Kummissjoni jaqsmu l-fehma li r-Regolament EDIP għandu jkun mgħammar b'riżorsi finanzjarji addizzjonali.
Għal dan l-għan, ir-Regolament EDIP jipprevedi speċifikament il-possibbiltà ta' kontribuzzjonijiet finanzjarji addizzjonali mill-Istati Membri, l-istituzzjonijiet, il-korpi u l-aġenziji tal-Unjoni, pajjiżi terzi, organizzazzjonijiet internazzjonali, istituzzjonijiet finanzjarji internazzjonali jew partijiet terzi oħra u jirreferi espressament għall-Fond għall-Aċċellerazzjoni tat-Trasformazzjoni tal-Ktajjen tal-Provvista tad-Difiża (FAST) f'dan ir-rigward.
Fid-dawl ta' dan u filwaqt li jitqies ir-rwol ċentrali tal-FAST fit-tisħiħ tal-kapaċitajiet ta' manifattura fid-difiża tal-SMEs u tal-mid-caps żgħar li b'mod partikolari jeħtieġu investimenti, tali kontribuzzjonijiet addizzjonali għandhom jiġu allokati bħala prijorità lill-FAST u jikkomplementaw l-ammonti allokati mill-pakkett ta' €1.200 miljun imsemmi fl-Artikolu 5(1), bl-għan li l-ammont indikattiv ġenerali għal dak il-fond partikolari taħt il-Programm jilħaq mill-inqas €150 miljun, filwaqt li jiġu rispettati l-prerogattivi tal-awtorità baġitarja.