1.Jinnota l-adozzjoni wiesgħa u diversa tal-IA fis-settur tas-servizzi finanzjarji tal-UE, fejn l-istituzzjonijiet finanzjarji, li ilhom jużaw it-tagħlim awtomatiku klassiku għal perjodu estiż, issa qed jesperimentaw gradwalment bl-użu tal-IA ġenerattiva, inklużi mudelli lingwistiċi kbar (LLMs) u mudelli bażi oħra, bħala għodda ta’ appoġġ; jisħaq li l-maġġoranza tal-każijiet ta’ użu tal-IA attwali għandhom l-għan li jissimplifikaw il-proċessi tal-back-office u l-biċċa l-kbira tal-applikazzjonijiet jirrappreżentaw miri li jistgħu jintlaħqu faċilment pjuttost milli innovazzjoni ta’ riskju għoli; jinnota, madankollu, li l-użu tal-IA biex tiġi evalwata l-affidabbiltà kreditizja ta’ persuni fiżiċi jew biex jiġi stabbilit il-punteġġ tal-kreditu tagħhom, li bħalissa huwa definit bħala ta’ riskju għoli fl-Att dwar l-IA, huwa prevalenti u qed jiżdied; jisħaq li l-użu ta’ sistemi tal-IA kompletament awtonomi fis-settur finanzjarju għandu jkollu sorveljanza umana15 Il-Kwestjonarju tal-EBA dwar il-Valutazzjoni tar-Riskji tal-Ħarifa 2024; Ir-rapport tal-EIOPA dwar id-diġitalizzazzjoni tas-settur tal-assigurazzjoni Ewropew; Ir-rapport tal-ESMA dwar l-intelliġenza artifiċjali fil-fondi ta’ investiment tal-UE.; jinnota li l-istituzzjonijiet finanzjarji għadhom jesploraw każijiet ta’ użu li jinvolvu mudelli GPAI, li l-kumplessità akbar tagħhom tinvolvi riskju operazzjonali u ta’ konformità ogħla, iżda jinnota wkoll li dawn l-applikazzjonijiet fil-biċċa l-kbira għadhom fil-fażi tal-ittestjar;

2.Jemmen li l-IA hija opportunità kbira għall-istituzzjonijiet finanzjarji tal-UE biex jiżviluppaw prodotti aktar innovattivi, jissimplifikaw l-operazzjonijiet u jtejbu l-kompetittività fuq skala globali; jenfasizza li l-użu tal-IA fis-servizzi finanzjarji għandu l-potenzjal li jġib benefiċċji soċjetali, inklużi l-identifikazzjoni u l-prevenzjoni aktar effettivi tal-frodi, il-kontrolli kontra l-ħasil tal-flus u l-kontrolli tas-sanzjonijiet, l-appoġġ għall-klijenti, il-monitoraġġ tat-tranżazzjonijiet, il-pariri finanzjarji personalizzati, il-ġbir ta’ data ambjentali, soċjali u ta’ governanza, l-analiżi u r-rappurtar, il-mudelli u l-istrateġiji kummerċjali, l-assistenza għall-konformità regolatorja, is-sorveljanza tas-suq u l-monitoraġġ tal-abbuż; iqis li l-użu tal-IA fis-settur finanzjarju għandu jsib bilanċ bejn l-innovazzjoni u l-kompetittività minn naħa waħda, u l-ġestjoni tar-riskju, il-protezzjoni tal-konsumatur u l-istabbiltà finanzjarja min-naħa l-oħra; jisħaq li l-benefiċċji tal-użu tal-IA fis-servizzi finanzjarji għandhom jiġu mgħoddija primarjament lill-klijenti finali, pereżempju permezz ta’ prezzijiet aktar baxxi, kopertura aħjar, konsulenza finanzjarja mtejba, inklużjoni u aċċess finanzjarji akbar u litteriżmu finanzjarju msaħħaħ;

3.Jinnota li hemm ukoll riskji mill-użu tal-IA fis-servizzi finanzjarji; jenfasizza li, qabel l-avvanz reċenti tal-LLMs, dawn ir-riskji rriżultaw mill-kwalità, il-preċiżjoni u r-rappreżentattività tad-data li fuqha tħarrġu l-mudelli, peress li l-outputs tal-IA mhux LLM huma affidabbli biss daqs l-inputs tad-data; jissottolinja li kwalità ħażina tad-data tista’ twassal, fost affarijiet oħra, għal eżiti diskriminatorji, bejgħ inadatt u preġudizzji sistemiċi msaħħa, filwaqt li mudelli mhux trasparenti u kumplessi jistgħu jwasslu għal ksur tal-privatezza u l-esklużjoni ta’ konsumaturi vulnerabbli permezz ta’, pereżempju, diskriminazzjoni fil-prezzijiet, u b’hekk jaggravaw ir-riskji eżistenti jew joħolqu oħrajn ġodda; jisħaq li l-LLMs jintroduċu riskji addizzjonali sinifikanti li jistgħu jkunu diffiċli biex jitkejlu, inklużi alluċinazzjonijiet tal-mudelli anke meta d-data għat-taħriġ tkun ta’ kwalità għolja; jisħaq li tali riskji u eżiti jridu jiġu mitigati b’mod effettiv; josserva sfidi ulterjuri relatati mal-vulnerabbiltajiet taċ-ċibersigurtà u mal-ispjegabbiltà tas-sistemi tal-IA; jisħaq, għalhekk, fuq il-ħtieġa li jiġu żgurati governanza robusta tad-data, ittestjar rigoruż u dokumentazzjoni tal-mudelli tal-IA, flimkien maż-żamma tal-involviment uman u ż-żamma ta’ standard għoli għall-użu ta’ sistemi tal-IA f’applikazzjonijiet diretti għall-konsumatur;

4.Jifhem li l-istituzzjonijiet finanzjarji adottaw approċċ meqjus għall-iżvilupp, l-ittestjar u l-użu ta’ sistemi tal-IA, bil-ħsieb li tiġi żgurata l-konformità mal-leġiżlazzjoni trażversali u settorjali eżistenti; jissottolinja li dan l-approċċ prudenti jista’ jkun xprunat ukoll minn domanda mhux murija tal-klijenti, aspettattivi tal-klijenti li qed jevolvu u kunsiderazzjonijiet ta’ riskju, li ġew deskritti hawn fuq;

5.Jenfasizza li ż-żieda fl-IA toħloq sfidi għall-awtoritajiet superviżorji, b’mod partikolari minħabba nuqqas ta’ għarfien espert speċifiku għall-IA u għodod superviżorji biex jivvalutaw it-tagħlim awtomatiku avvanzat u l-mudelli tal-IA ġenerattiva; jistieden lill-awtoritajiet superviżorji Ewropej u nazzjonali jadattaw għall-użu dejjem akbar tal-IA fis-servizzi finanzjarji u jimmonitorjaw, jivvalutaw u jimmitigaw ir-riskji għall-konsumaturi u l-istabbiltà finanzjarja, filwaqt li joqogħdu attenti li ma jiskoraġġux l-innovazzjoni permezz ta’ piżijiet ta’ konformità sproporzjonati jew approċċi regolatorji preskrittivi żżejjed;

6.Jinnota li l-konċentrazzjoni fost il-fornituri ta’ servizzi tal-IA li joffru pariri dwar l-investiment tista’ twassal għal “imġiba ta’ merħla”, xprunata minn mudelli simili u sorsi ta’ data limitati; iħeġġeġ lis-superviżuri Ewropej u nazzjonali jimmonitorjaw dawn ir-riskji u l-istituzzjonijiet finanzjarji sabiex iqisuhom meta jiżviluppaw għodod tal-IA;

7.Jinnota d-dipendenza tal-atturi finanzjarji tal-UE fuq fornituri tat-teknoloġija terzi (TPPs) biex jospitaw u jiżviluppaw il-mudelli tal-IA tagħhom u jenfasizza li l-maġġoranza tad-ditti finanzjarji jiddependu biss fuq ftit TPPs għal dawn is-servizzi, u dan jista’ jwassal għal riskju ta’ konċentrazzjoni u jnaqqas is-saħħa ta’ negozjar tal-istituzzjonijiet finanzjarji meta jinnegozjaw jew jimmodifikaw it-termini kuntrattwali għas-servizzi tal-IA; iwissi li d-dipendenza fuq għadd żgħir ta’ fornituri għal servizz partikolari tista’ twassal għal riskji sistemiċi f’każ ta’ tfixkil, b’mod partikolari jekk migrazzjoni rapida lejn fornituri alternattivi ma tkunx fattibbli;

8.Jinnota li l-Att dwar ir-Reżiljenza Operazzjonali Diġitali (DORA) ippromulgat reċentement jirrikjedi li l-istituzzjonijiet finanzjarji jimplimentaw miżuri biex jimmitigaw ir-riskju ta’ konċentrazzjoni li joriġina mit-TPPs tat-teknoloġija tal-informazzjoni u l-komunikazzjoni (ICT), inklużi pjanijiet ta’ kontinġenza u arranġamenti biex tiġi żgurata l-kontinwità tal-operat; jitlob li l-Kummissjoni u l-awtoritajiet superviżorji Ewropej jivvalutaw, b’mod partikolari, il-fattibbiltà tal-applikazzjoni tal-istrateġiji ta’ ħruġ u d-dispożizzjonijiet ta’ tranżizzjoni stabbiliti fir-Regolament DORA għall-mudelli tal-IA ospitati mill-infrastruttura tat-TPPs, speċjalment fir-rigward tad-dipendenza konsiderevoli fuq TPPs ta’ pajjiżi terzi għas-servizzi tal-IA;

9.Jenfasizza li l-kumpaniji tal-UE jridu jkunu jistgħu jużaw l-infrastruttura eżistenti tal-cloud għall-iżvilupp u l-użu tal-IA; jitlob li jiġu esplorati b’mod attiv toroq biex jissaħħu l-kompatibbiltà u l-interoperabbiltà tal-mudelli tal-IA u l-oqfsa ta’ konformità ma’ dawk ta’ sħab internazzjonali tal-istess fehma, speċjalment dawk li jaspiraw li jipprovdu salvagwardji regolatorji ugwalment robusti, biex jiġi żgurat li l-istituzzjonijiet finanzjarji tal-UE jżommu aċċess għall-għodod u l-fornituri tal-IA u bil-ħsieb li jissawru standards globali bbilanċjati filwaqt li tiġi ssalvagwardjata ċ-ċertezza legali għan-negozji Ewropej;

10.Jappoġġja inizjattivi biex tingħata spinta lill-iżvilupp tal-IA u tal-cloud fl-UE, speċjalment bil-ħsieb li jiġu żviluppati servizzi tal-IA li jkunu konformi bis-sħiħ mal-oqfsa tal-UE għall-protezzjoni tad-data u d-drittijiet fundamentali, filwaqt li jissaħħu wkoll l-awtonomija strateġika u r-reżiljenza;

11.Jisħaq li s-settur tas-servizzi finanzjarji huwa regolat ħafna, soġġett għal diversi biċċiet ta’ leġiżlazzjoni settorjali kemm fil-livell nazzjonali kif ukoll f’dak tal-UE, li jirrikjedi li l-atturi jimmaniġġjaw ir-riskji f’varjetà ta’ oqsma inklużi l-protezzjoni tad-data, l-ittraċċar tad-data, il-kwalità tad-data, il-governanza tad-data, ir-reżiljenza operazzjonali, l-esternalizzazzjoni, ir-riskju tal-mudell, l-eżiti diskriminatorji, u r-riskju tas-suq u dak ta’ kreditu, li flimkien jiffurmaw il-qafas għall-użu u l-governanza tal-IA fis-settur tas-servizzi finanzjarji16 Eżempji notevoli ta’ leġiżlazzjoni settorjali rilevanti jinkludu, iżda mhumiex limitati għal, ir-Regolament dwar ir-Rekwiżiti ta’ Kapital, id-Direttiva dwar ir-Rekwiżiti ta’ Kapital, id-Direttiva Solvenza II, id-Direttiva dwar id-Distribuzzjoni tal-Assigurazzjoni, ir-Regolament dwar is-Swieq tal-Istrumenti Finanzjarji, id-Direttiva dwar is-Swieq fl-Istrumenti Finanzjarji, l-Att dwar ir-Reżiljenza Operazzjonali Diġitali, id-Direttiva dwar Maniġers ta’ Fondi ta’ Investiment Alternattivi u d-Direttiva UCITS, kif ukoll il-linji gwida u l-istandards tekniċi regolatorji ta’ akkumpanjament mill-Aġenziji Superviżorji Ewropej.; jenfasizza, madankollu, l-importanza li jiġu mmonitorjati kontinwament il-lakuni regolatorji u l-każijiet ta’ użu li qed jevolvu tal-IA fil-finanzi, speċjalment bil-ħsieb li jiġu ssalvagwardjati d-drittijiet tal-konsumatur u d-dritt għall-privatezza;

12.Jinnota li l-UE adottat approċċ aktar ibbażat fuq ir-riskji għar-regolamentazzjoni tal-IA minn ġuriżdizzjonijiet oħra; jissottolinja li, filwaqt li dan jista’ joħloq sfidi għall-adozzjoni u l-iżvilupp tal-IA fis-servizzi finanzjarji, joffri wkoll opportunità biex tinbena l-fiduċja u tiġi appoġġjata l-innovazzjoni, dment li l-qafas jiġi ċċarat u implimentat b’mod li jrawwem iċ-ċertezza legali, il-proporzjonalità u l-fiduċja fis-suq; jirrikonoxxi li l-Att dwar l-IA għadu ma ġiex implimentat bis-sħiħ u li l-implikazzjonijiet prattiċi tiegħu għadhom ma ġewx ivvalutati;

13.Ifakkar li l-Att dwar l-IA jqis b’mod espliċitu l-acquis attwali tas-servizzi finanzjarji u jipprova jevita d-duplikazzjoni tar-rekwiżiti, b’mod partikolari fir-rigward tal-governanza interna u tal-proċessi ta’ ġestjoni tal-kwalità, billi jippermetti derogi limitati għall-istituzzjonijiet finanzjarji sakemm rekwiżiti ekwivalenti jiġu stabbiliti fid-dritt tal-UE dwar is-servizzi finanzjarji; jesprimi tħassib li, madankollu, hemm trikkib regolatorju u nuqqas ta’ gwida suffiċjenti dwar l-interpretazzjoni ta’ dan it-trikkib u dawn l-interazzjonijiet regolatorji, u dan jintroduċi kumplessità, piżijiet ta’ konformità u inċertezza legali bla bżonn, u b’hekk ifixkel l-adozzjoni tal-IA fis-settur tas-servizzi finanzjarji; jissottolinja l-importanza li jiġi ggarantit qafas legali, regolatorju u amministrattiv li jkun ibbażat fuq iċ-ċertezza, il-prevedibbiltà u l-istabbiltà; jinnota li interpretazzjoni espansiva tal-Att dwar l-IA, pjuttost milli waħda proporzjonali, taf twassal għal rekwiżiti ta’ konformità indebiti għall-istituzzjonijiet finanzjarji u tikkawża inċertezza legali; jirrikonoxxi l-isfida li tirriżulta mill-fatt li l-aġenziji superviżorji għandhom interpretazzjonijiet u aspettattivi legali differenti f’termini tal-applikazzjoni tal-acquis, li jirriżultaw fi frammentazzjoni tas-suq uniku; jitlob lill-Kummissjoni u lill-awtoritajiet nazzjonali kompetenti jidentifikaw u jindirizzaw kwalunkwe inkonsistenza matul l-implimentazzjoni tal-Att dwar l-IA u bħala parti mill-pakkett Omnibus Diġitali futur;

14.Jappoġġja r-rakkomandazzjoni tal-Att dwar l-IA biex jiġu ddeżinjati awtoritajiet finanzjarji kompetenti bħala korpi tas-sorveljanza tas-suq għas-sistemi tal-IA użati fis-servizzi finanzjarji meqjusa li għandhom riskju għoli; jinnota, madankollu, li awtoritajiet nazzjonali kompetenti oħra se jkunu responsabbli għas-superviżjoni ta’ sistemi tal-IA li mhumiex ta’ riskju għoli; jirrikonoxxi l-isfidi li jirriżultaw mill-fatt li jkun hemm diversi aġenziji superviżorji b’kompetenzi fir-rigward tal-applikazzjoni tal-acquis; jirrikonoxxi, barra minn hekk, l-isfidi li jirriżultaw mid-differenzi fl-interpretazzjonijiet legali u l-aspettattivi tad-diversi aġenziji superviżorji, li jistgħu jwasslu għall-frammentazzjoni tas-suq uniku;

15.Iħeġġeġ lill-awtoritajiet superviżorji jsaħħu l-koordinazzjoni, il-kooperazzjoni u l-iskambju ta’ informazzjoni biex jiġi evitat trikkib tal-pretensjonijiet ġuriżdizzjonali; iħeġġeġ, barra minn hekk, lill-Kummissjoni u lill-awtoritajiet superviżorji jsaħħu l-kooperazzjoni mas-sħab internazzjonali f’fora globali li jistabbilixxu l-istandards biex jiġi żgurat l-allinjament u tiġi evitata l-frammentazzjoni tal-approċċi regolatorji, kif ukoll biex jiġi żgurat li l-UE żżomm il-pass u tallinja mal-iżviluppi regolatorji globali;

16.Jinnota li r-Regolament Ġenerali dwar il-Protezzjoni tad-Data u r-rekwiżiti tiegħu dwar il-minimizzazzjoni tad-data, il-limitazzjoni tal-fini, il-kunsens tal-klijent, u l-ipproċessar tad-data personali mill-istituzzjonijiet finanzjarji jimponu limitazzjonijiet fuq l-użu tal-IA fis-servizzi finanzjarji; iqis li huwa meħtieġ bilanċ tajjeb bejn il-benefiċċji mill-użu tal-IA fis-servizzi finanzjarji u l-protezzjoni tad-data tal-konsumaturi;

17.Jiddispjaċih li l-UE għadha lura f’termini ta’ innovazzjoni u investiment fl-IA, kif juru t-EUR 33 biljun f’finanzjament ta’ riskju li rċevew kumpaniji tal-UE li qed jiżviluppaw mudelli bażi bejn l-2018 u l-2023, meta mqabbla mal-aktar minn EUR 120 biljun li rċevew il-kontropartijiet tagħhom fl-Istati Uniti17 Christine Lagarde, “The transformative power of AI”, 2025, https://www.ecb.europa.eu/press/key/date/2025/html/ecb.sp250401_1~d6c9d8df11.en.html.; jemmen li s-settur tas-servizzi finanzjarji, bħala s-settur li jonfoq l-aktar fuq is-servizzi u l-prodotti tal-ICT, għandu l-potenzjal li jaġixxi bħala katalist fil-mobilizzazzjoni tal-investiment privat fl-IA; jappella, f’dan l-isfond ta’ investiment li jseħħ bil-mod fis-settur finanzjarju tal-UE, għal proposta ambizzjuża biex ix-xena Ewropea tal-kapital ta’ riskju tingħata spinta minnufih bħala parti mill-Unjoni tat-tfaddil u tal-investimenti;

18.Jistieden lill-Kummissjoni tipprovdi gwida ċara u prattika, żviluppata f’konsultazzjoni mal-awtoritajiet superviżorji Ewropej u nazzjonali u mal-partijiet ikkonċernati, dwar l-applikazzjoni tal-leġiżlazzjoni eżistenti dwar is-servizzi finanzjarji fir-rigward tal-użu tal-IA; iqis li tali gwida għandu jkollha l-għan li tippermetti l-użu tal-IA fis-settur tas-servizzi finanzjarji, inkluż b’mod li jkun etiku, responsabbli u trasparenti; jappella għal definizzjonijiet konsistenti u għas-simplifikazzjoni tal-qafas regolatorju biex jiġu evitati rekwiżiti duplikati, inklużi rekwiżiti ta’ rapportar tal-valutazzjoni tar-riskju, u jwissi kontra approċċ “kulħadd f’keffa waħda” li jpoġġi piż sproporzjonat fuq istituzzjonijiet finanzjarji iżgħar u ta’ daqs medju; jenfasizza l-ħtieġa ta’ bilanċ tajjeb bejn l-użu responsabbli tal-IA u li jiġi pprovdut biżżejjed spazju għall-innovazzjoni;

19.Jistieden lill-Kummissjoni tesplora kif l-għodod xprunati mill-IA jistgħu jintużaw fis-swieq finanzjarji, bħal fl-intermedjazzjoni, fil-ġestjoni tal-portafoll u fl-awtomatizzazzjoni tal-konformità, biex jikkontribwixxu għall-objettivi tal-Unjoni tat-tfaddil u tal-investimenti, inkluż billi jappoġġjaw lill-investituri fil-livell tal-konsumatur fit-teħid ta’ deċiżjonijiet infurmati dwar l-investiment, isaħħu l-edukazzjoni finanzjarja, irawmu l-innovazzjoni fost il-kumpaniji, inaqqsu l-frammentazzjoni tas-suq u jiżguraw ambjent sikur għall-konsumaturi; jisħaq li l-ilħuq ta’ dawn l-għanijiet jirrikjedi qafas regolatorju teknoloġikament newtrali;

20.Jemmen li l-leġiżlazzjoni settorjali li tirregola l-użu tal-IA fis-servizzi finanzjarji hija prinċipalment biżżejjed biex tkopri l-użu tal-IA fil-forma attwali tagħha; jissottolinja li għandu jkun hemm monitoraġġ kontinwu biex jiġi ddeterminat jekk hemmx duplikazzjonijiet jew nuqqasijiet fil-leġiżlazzjoni attwali dwar is-servizzi finanzjarji applikabbli għall-użu tal-IA; jissottolinja li leġiżlazzjoni addizzjonali żżid kumplessità u inċertezza u fl-aħħar mill-aħħar taf iċċaħħad lis-settur mill-benefiċċji tal-użu tal-IA; jisħaq li d-dipendenza fuq l-oqfsa attwali tirrikjedi attenzjoni superviżorja kontinwa, infurzar effettiv u allokazzjoni ċara tar-responsabbiltà għall-iżgurar tal-konformità, b’mod partikolari f’xenarji transfruntieri jew esternalizzati tal-użu tal-IA, kif ukoll il-monitoraġġ u l-valutazzjoni ta’ lakuni futuri possibbli maħluqa minn żviluppi ġodda tal-IA jekk joħolqu riskji sostanzjali għall-konsumaturi u l-istabbiltà finanzjarja; jirrakkomanda bil-qawwa lill-Kummissjoni u lill-Istati Membri biex jikkoordinaw ħalli tiġi evitata regolamentazzjoni żejda tal-leġiżlazzjoni rilevanti u biex jiġi evitat il-ħolqien ta’ ostakli ġodda fis-swieq transfruntieri; jinnota li l-Kummissjoni, skont l-Att dwar l-IA, tista’ tivvaluta l-lista ta’ applikazzjonijiet b’riskju għoli skont l-Anness III tal-Att dwar l-IA;

21.Jistieden lill-awtoritajiet superviżorji Ewropej u nazzjonali jappoġġjaw l-adozzjoni responsabbli tal-IA billi jippromwovu interpretazzjonijiet konsistenti u applikazzjoni proporzjonata tar-regolamenti attwali; jemmen li regolamentazzjoni adegwata tal-użu tal-IA fis-settur tas-servizzi finanzjarji tappoġġja l-adozzjoni tal-IA u l-fiduċja tas-soċjetà fiha; jenfasizza li l-attitudni u l-approċċ tas-superviżuri huma importanti daqs ir-regoli nfushom; jirrakkomanda li l-isforzi superviżorji jipprijoritizzaw riskji tanġibbli u operazzjonali fejn jiġu identifikati, pjuttost milli tħassib astratt jew teoretiku, filwaqt li jinżamm approċċ attiv u proporzjonat għas-superviżjoni, billi jiġu bbilanċjati l-innovazzjoni u l-protezzjoni tal-konsumatur, biex jiġu ġestiti riskji mhux previsti li jirriżultaw mit-twessigħ tal-adozzjoni tat-teknoloġiji tal-IA; jisħaq fuq ir-rwol tal-monitoraġġ u l-indirizzar b’mod effettiv tar-riskji relatati mal-IA, inklużi dawk relatati mal-opaċità, il-konċentrazzjoni tas-suq u t-telf tal-obbligu ta’ rendikont, li jista’ jkollhom impatt fuq l-istabbiltà finanzjarja;

22.Jistieden lill-Kummissjoni u lill-Istati Membri jneħħu l-ostakli għad-dħul fi ħdan l-UE għal impriżi finanzjarji innovattivi xprunati mill-IA inkluż permezz ta’ liċenzjar simplifikat, l-espansjoni ta’ negozji transfruntieri u l-inklużjoni f’ċentri ta’ innovazzjoni superviżorji;

23.Jappoġġja r-riċerka dwar l-impatt ambjentali tal-użu tal-IA, b’enfasi fuq l-intensità tar-riżorsi u s-sostenibbiltà fit-tul, sabiex tiżdied it-trasparenza u l-istituzzjonijiet finanzjarji jiġu megħjuna jivvalutaw dawn l-aspetti u l-impronta ambjentali tagħhom stess;

24.Jemmen li l-użu dejjem akbar tal-IA, li jista’ jkollu implikazzjonijiet għas-suq tax-xogħol tas-servizzi finanzjarji, jirrikjedi litteriżmu b’saħħtu fl-IA, ħiliet diġitali, u involviment tat-talenti, appoġġjati kemm minn inizjattivi ta’ titjib tal-ħiliet tas-settur pubbliku kif ukoll minn soluzzjonijiet ibbażati fuq is-suq; jappoġġja l-isforzi tal-industrija u inizjattivi mmirati, inklużi sħubijiet pubbliċi-privati u programmi ta’ tiġdid tal-ħiliet, biex jinbnew kompetenzi tekniċi u etiċi tal-IA, speċjalment rigward id-drittijiet u r-riskji, fil-forza tax-xogħol finanzjarja; jissottolinja l-importanza li jiġu żviluppati strateġiji tal-IA li jtejbu l-produttività, filwaqt li jappoġġjaw l-adattament, it-titjib tal-ħiliet u r-riallokazzjoni tal-ħaddiema, filwaqt li jiżguraw sorveljanza u kontroll sinifikanti mill-bniedem; jitlob aktar ċarezza fir-rigward tar-rekwiżiti tal-Att dwar l-IA għall-istituzzjonijiet finanzjarji biex jikkonformaw mar-rekwiżiti tal-litteriżmu fl-IA; jisħaq, barra minn hekk, fuq l-importanza li jiġi żgurat u promoss aċċess ugwali għall-għodod u s-servizzi tal-IA, inkluż għal segmenti tal-popolazzjoni b’inqas kapaċità diġitali;

25.Jistieden lill-Kummissjoni u lill-awtoritajiet superviżorji Ewropej u nazzjonali jivvalutaw il-valur miżjud ta’ ambjenti ta’ esperimentazzjoni regolatorja speċifiċi għall-IA, ċentri ta’ innovazzjoni u ambjenti ta’ ttestjar transfruntieri għas-servizzi finanzjarji biex jippermettu esperimentazzjoni bl-innovazzjoni finanzjarja xprunata mill-IA, kemm biex jgħinu lin-negozji ġodda jittestjaw il-prodotti tagħhom kif ukoll biex jippermettu lill-istituzzjonijiet stabbiliti jesploraw użu ġdid f’ambjent ikkontrollat, filwaqt li jissalvagwardjaw il-protezzjoni tal-konsumatur u l-integrità tas-suq; jemmen li l-isfruttar xieraq tal-ambjenti ta’ esperimentazzjoni regolatorja għall-IA jista’ jipprovdi l-ambjent tal-ittestjar strutturat u sorveljat meħtieġ biex jiffaċilita l-innovazzjoni u l-użu responsabbli tal-IA fis-settur tas-servizzi finanzjarji; iħeġġeġ lill-awtoritajiet superviżorji Ewropej u nazzjonali jsaħħu l-għodod u t-teknoloġija superviżorji (SupTech) permezz tal-użu tal-IA u jintegrawhom f’attivitajiet superviżorji ta’ kuljum biex itejbu l-effiċjenza u l-effikaċja tas-superviżjoni finanzjarja; jinnota li dawn l-għodod huma maħsuba biex jappoġġjaw, u mhux jissostitwixxu, is-superviżuri umani;

26.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni kif ukoll lill-gvernijiet u lill-parlamenti tal-Istati Membri.