1.ag cur sonrú i nDréachtbhuiséad leasaitheach Uimh. 3/2025 mar a thíolaic an Coimisiún é, agus go háirithe an tionchar an-íseal foriomlán ar ranníocaíochtaí OIN na mBallstát, mar gheall ar chomhardú na riachtanas íocaíochta níos airde agus na sreafaí ioncaim breise;

2.á chur in iúl gur geal léi an méadú EUR 2 bhilliún ar na leithreasuithe faoi chomhair íocaíochtaí do Chiste Forbraíochta Réigiúnaí na hEorpa (CFRE), i gcomhar leis na treisithe ar an gComhbheartas Talmhaíochta (CBT) in Ollaistriú na bliana seo (DEC 15/25), mar chomhartha go bhfuil dlús á chur le cur chun feidhme an chláir tar éis tús mall, ar ábhar imní é, sa tréimhse 2021-2027; ag cur béim ar an bhfíoras go bhfuil ról ríthábhachtach ag atreisiú na gcistí struchtúracha agus leithreasuithe CBT maidir le leanúnachas scéimeanna tacaíochta talmhaíochta a choinneáil, slándáil bia a áirithiú, agus forbairt tuaithe inbhuanaithe a chur chun cinn; ag tabhairt dá haire go bhfuil tábhacht ar leith ag baint leis na bearta sin chun athléimneacht earnáil na talmhaíochta a neartú agus chun an chothromaíocht shocheacnamaíoch i gceantair thuaithe a chaomhnú; ag meabhrú chomhlántacht na méaduithe sin leis na coigeartuithe ar leithreasú faoi chomhair íocaíochtaí san Ollaistriú (DEC 15/2025);

3.ag tathant i gcónaí go gcuirfí dlús le cur chun feidhme na mbeart faoi CFRE, CSE+ agus faoin Ionstraim le haghaidh Tacaíocht Airgeadais don Bhainistiú Teorainneacha agus don Bheartas Víosaí (IBTV); á chur in iúl gur geal léi glacadh níos tapúla an Ardáin um Theicneolaíochtaí Straitéiseacha don Eoraip (STEP) ná mar a bhíothas ag súil leis; ag dréim leis go n-úsáidfear níos mó ná EUR 3 bhilliún in íocaíochtaí breise ó STEP go pras agus go héifeachtach le haghaidh na gcuspóirí sonracha faoi na bunghníomhartha faoi seach;

4.ag cur sonrú sa staid reatha is déanaí maidir leis na Comhaontuithe Comhpháirtíochta Iascaigh Inbhuanaithe (SFPAnna) agus á chur in iúl gur geal léi, i gcomhréir leis na forálacha ábhartha in IIA, go bhfuil ról gníomhach ag an údarás buiséadach maidir leis na leithreasuithe atá faoi chúlchiste a scaoileadh ar theacht i bhfeidhm agus ar chur i bhfeidhm na bprótacal cur chun feidhme idirnáisiúnta faoi seach;

5.á chur in iúl gur oth léi an laghdú ar ghealltanais (EUR 78 milliún) agus ar íocaíochtaí (EUR 48 milliún) don Ionstraim um Threalamh Rialaithe Custaim (ITRC) mar gheall ar mhoilleanna ar chur chun feidhme sna Ballstáit tráth ar cheart go mbeadh comhar agus infheistíochtaí sa réimse sin a bheith bisiúil;

6.á chur in iúl gur geal léi an coigilteas ar ghealltanais (EUR 5 mhilliún) don Ionstraim um Thacaíocht Theicniúil (ITT) mar gheall ar ghnóthachain éifeachtúlachta ó nósanna imeachta soláthair iomaíocha;

7.ag cur sonrú i luas chur chun feidhme na n-athchóirithe agus moilliú comhréireach ar ionsú na n-íocaíochtaí faoin tSaoráid don Úcráin; á aithint go bhféadfar codanna de na leithreasuithe neamhshúite a thabhairt anonn go dtí an chéad bhliain bhuiséid eile; á mholadh do na gníomhaithe uile lena mbaineann dul chun cinn a dhéanamh maidir le bearta a bhaineann le hathchóirithe agus infheistíochtaí, amhail na comhaontuithe measctha;

8.ag cur sonrú sna coigeartuithe ar ranníocaíocht an Aontais le gníomhaireachtaí díláraithe éagsúla; á mheas gur de chineál teicniúil iad na coigeartuithe sin den chuid is mó; á chur in iúl gur geal léi an méid sin a mhéid a bhaineann siad an úsáid is fearr is féidir as acmhainní faoi na línte oibríochtúla, amhail LIFE, AMIF nó Clár an Mhargaidh Aonair; á chur in iúl gur oth léi, áfach, gurb é an chúis fhorluiteach atá le leithreasuithe faoi chomhair gealltanas agus íocaíochtaí a ‘fhilleadh’ ó na línte gníomhaireachta faoi seach go dtí na línte clár gaolmhara ná moill ar earcú foirne nó moill ar rolladh amach tionscnamh nua beartais agus reachtach amhail Straitéis Infheistíochta Miondíola (a bhaineann le ESMA agus ÚEÁPC), an Comhshocrú maidir le Tearmann agus Imirce (a bhaineann le EUAA), an pacáiste sábháilteachta muirí (a bhaineann le EMSA) nó an togra maidir le teicnící nua géanómaíocha (a bhaineann le EFSA);

9.sa chomhthéacs sin, á thabhairt chun suntais agus á athdhearbhú, go dtacaíonn sí go láidir leis an Údarás nuabhunaithe um Fhrithsciúradh Airgid (AMLA) sa chreat athbhreithnithe maidir le frithsciúradh airgid ar leibhéal an Aontais; á chur in iúl gur cúis mhór bhuartha di i gcónaí na moilleanna leanúnacha sa chéim bhunaithe, go háirithe maidir le hearcaíocht agus á iarraidh go gcuirfí dlús leis na próisis earcaíochta ábhartha;

10.á chur in iúl gur geal léi ioncam breise a eascraíonn as fíneálacha cinntitheacha agus íocaíochtaí pionósacha dar luach EUR 1 185.1 milliún a ionchorprú sa bhuiséad; á mheas gur fíorfhoinsí ioncaim de chuid an Aontais iad na méideanna sin lena laghdaítear ranníocaíochtaí OIN-bhunaithe na mBallstát; sa chomhthéacs sin, á mheabhrú go bhfuil modhnuithe molta ag an gCoimisiún do thréimhse an chéad Chreat Airgeadais Ilbhliantúil eile chun a áirithiú go bhféadfadh leithreasuithe caiteachais breise a bheith mar thoradh ar an ioncam amhantair sin;

11.ag cur sonrú sa togra chun EUR 1 300 milliún de ‘bharrachas measta na nAcmhainní Dílse Traidisiúnta’ a bhuiséadú; á chur in iúl go bhfuil amhras uirthi faoin bhfiúntas a bhaineann le nuashonruithe arís agus arís eile ar an ioncam a eascraíonn as dleachtanna custaim le linn na bliana buiséid, go háirithe lasmuigh den bhuiséad leasaitheach tiomnaithe bliantúil chun taobhanna an ioncaim a thabhairt cothrom le dáta agus a thabhairt chun rialtachta;

12.ag cur sonrú i nuashonrú na gcoigeartuithe tuarascáil le haghaidh 2025 agus á chomhaontú tionchar buiséadach na gcoigeartuithe sin a chomhtháthú mar leasú teicniúil i nDréachtbhuiséad leasaitheach Uimh. 3/2025; ag cur dá haire go dtugtar le fios leis sin laghdú de shuim iomlán EUR 78,8 milliún i leithreasuithe neamhdhifreáilte thar na línte buiséid ábhartha agus na ranna ábhartha faoi Cheannteideal 7;

13.ag formheas an tseasaimh ón gComhairle ar Dhréachtbhuiséad leasaitheach Uimh. 3/2025;

14.á threorú dá hUachtarán a dhearbhú go bhfuil Buiséad Leasaitheach Uimh. 3/2025 glactha go cinntitheach agus socrú a dhéanamh maidir lena fhoilsiú in Iris Oifigiúil an Aontais Eorpaigh;

15.á threorú dá hUachtarán an rún seo a chur ar aghaidh chuig an gComhairle, chuig an gCoimisiún agus chuig na parlaimintí náisiúnta.