1.Jenfasizza li kwalunkwe teknoloġija ġdida trid tiġi implimentata u tintuża bl-għan ġenerali li taqdi lin-nies u għandha tkun xprunata mill-prinċipji tal-“etika prestabbilita awtomatikament” u ta’ “prekawzjoni” kif ukoll minn approċċ iċċentrat fuq il-bniedem, ġestit min-nies u jibni fuq id-dispożizzjonijiet dwar is-sorveljanza mill-bniedem previsti fl-Artikolu 14 tal-Att dwar l-Intelliġenza Artifiċjali u fl-Artikolu 22 tar-Regolament Ġenerali dwar il-Protezzjoni tad-Data;

2.Ifakkar li t-tranżizzjoni diġitali, inkluż l-użu dejjem akbar tal-IA u tal-ġestjoni algoritmika, għandha l-potenzjal li tiġġenera eżiti pożittivi għas-suq tax-xogħol u opportunitajiet ġodda ta’ impjieg; jinsab imħasseb, madankollu, dwar l-isfidi sinifikanti li din tippreżenta għall-ħaddiema, b’mod partikolari f’termini ta’ kundizzjonijiet tax-xogħol u tal-impjieg; jenfasizza, għalhekk, li kwalunkwe inizjattiva ġdida dwar l-IA u l-ġestjoni algoritmika trid tiżgura impjiegi ta’ kwalità u tissalvagwardja l-benesseri tal-ħaddiema fl-era diġitali;

3.Jisħaq li teknoloġiji ġodda fuq il-post tax-xogħol jistgħu jikkostitwixxu vantaġġ importanti għall-kompetizzjoni u l-produttività, jappoġġjaw l-innovazzjoni u jistgħu jipprovdu redditu aħjar lill-kumpaniji li jużawhom; jissottolinja f’dan ir-rigward il-fatt li l-kumpaniji għandhom jitħeġġew jintegraw tali teknoloġiji b’mod responsabbli, trasparenti u inklużiv, b’rispett lejn il-privatezza tal-ħaddiema u l-protezzjoni tad-data, biex tinbena l-fiduċja fost il-ħaddiema; jisħaq li l-użu ta’ tali teknoloġiji fuq il-post tax-xogħol għandu jiġi ssorveljat b’mod metikoluż aktar milli ristrett;

4.Jisħaq li l-intelliġenza artifiċjali tista’ sservi bħala faċilitatur ewlieni għall-intraprenditorija innovattiva, b’mod partikolari fl-appoġġ tal-intrapriżi mikro, żgħar u ta’ daqs medju biex jespandu, itejbu l-produttività u jikkompetu fl-ekonomija diġitali; jistieden lill-Kummissjoni u lill-Istati Membri biex, filwaqt li japplikaw il-prinċipju tal-proporzjonalità u tal-vijabbiltà operazzjonali, jiffaċilitaw l-aċċess għal għodod, għarfien u infrastruttura relatati mal-IA għall-istart-ups u għan-negozji ż-żgħar, inkluż permezz ta’ programmi mmirati tal-Unjoni u appoġġ konsultattiv; jissottolinja li l-investiment fl-IA fil-livell tal-Unjoni jista’ jikkontribwixxi għall-ħolqien ta’ impjiegi ġodda u għall-bini ta’ ekosistema aktar reżiljenti u kompetittiva tal-intrapriżi mikro u żgħar madwar l-Unjoni; jilqa’ l-proġetti settorjali fil-komunikazzjoni tal-Kummissjoni tat-8 ta’ Ottubru 2025 bit-titolu “Strateġija għall-Applikazzjoni tal-IA”;

5.Jirrikonoxxi li l-litteriżmu, l-edukazzjoni kif ukoll it-titjib u t-tiġdid tal-ħiliet kontinwu fuq il-post tax-xogħol dwar it-teknoloġiji ġodda introdotti fuq il-post tax-xogħol, b’mod partikolari dawk li jaffettwaw direttament il-kompiti u l-prestazzjoni tal-ħaddiema, huma essenzjali biex jiġu żgurati kundizzjonijiet tax-xogħol adegwati, il-benesseri, is-sikurezza, l-awtonomija u l-iżvilupp professjonali tal-ħaddiema, kif ukoll biex tissaħħaħ l-adattabbiltà ġenerali, u l-kompetittività tal-kumpaniji Studji tal-każijiet: https://healthy-workplaces.osha.europa.eu/mt/media-centre/news/real-world-learnings-implementing-worker-management-through-ai.; jisħaq li t-taħriġ huwa wkoll essenzjali għall-impjegaturi, il-maniġers u l-persuni l-oħra li jimplimentaw, jiżviluppaw u jissorveljaw l-użu ta’ sistemi bħal dawn ta’ kuljum; jenfasizza li l-ħaddiema u r-rappreżentanti tagħhom, inklużi t-trade unions, għandhom jiġu informati u involuti fil-proċeduri għall-implimentazzjoni ta’ tali teknoloġiji, sabiex jagħtu riżultati tajbin, u jridu jingħataw biżżejjed żmien u appoġġ biex jiffamiljarizzaw ruħhom ma’ tali teknoloġiji;

6.Jilqa’ l-inizjattiva tal-Unjoni tal-Ħiliet; jistieden lill-Kummissjoni tiżgura li l-pjan direzzjonali mistenni dwar il-Kwalità tal-Impjiegi jirrifletti bis-sħiħ il-ħtieġa ta’ titjib u tiġdid tal-ħiliet, u ta’ taħriġ fuq il-post tax-xogħol kontinwi inkluż dwar l-IA u l-ġestjoni algoritmika permezz ta’ dritt individwali għat-taħriġ għall-ħaddiema kollha; jisħaq li l-inizjattivi rilevanti kollha li għandhom l-għan li jappoġġjaw lill-ħaddiema u lill-kumpaniji f’din it-tranżizzjoni jridu jagħtu prijorità lill-iżvilupp tal-ħiliet fl-IA u d-diġitalizzazzjoni sabiex isaħħu suq tax-xogħol u l-kompetittività globali tal-Ewropa; jisħaq li dawn l-inizjattivi jridu jiġu appoġġjati b’mod adegwat, inkluż permezz ta’ riżorsi finanzjarji suffiċjenti fil-livell tal-Unjoni u dak nazzjonali;

7.Jenfasizza r-rwol kruċjali tal-Fond Soċjali Ewropew Plus (FSE+) fit-tħejjija kemm tal-forza tax-xogħol kurrenti kif ukoll dik futura, tal-impjegaturi u tal-maniġers, għat-tranżizzjoni diġitali permezz ta’ investiment immirat fl-iżvilupp tal-ħiliet, fit-taħriġ u fl-opportunitajiet ta’ impjieg inklużivi; jistieden lill-Kummissjoni żżomm u tkompli ssaħħaħ il-Fond fil-perjodu ta’ wara l-2027, b’mod li jiżgura l-aċċess għat-titjib u t-tiġdid tal-ħiliet diġitali għall-ħaddiema kollha, b’attenzjoni partikolari għal dawk fis-setturi u r-reġjuni l-aktar affettwati mill-bidla teknoloġika, sabiex ikun jista’ jkompli jservi bħala strument ewlieni tal-Unjoni għall-appoġġ ta’ tranżizzjoni diġitali ġusta, inklużiva, innovattiva u kompetittiva;

8.Jissottolinja li l-investiment pubbliku strateġiku fl-IA huwa essenzjali biex jikkomplementa l-innovazzjoni privata, jiżgura governanza etika u trasparenti tal-IA, u jiffaċilita l-aċċess ekwu għall-għodod u l-ħiliet diġitali fir-reġjuni kollha; iħeġġeġ lill-Istati Membri jaċċeleraw l-implimentazzjoni tal-miżuri relatati mal-IA fl-ambitu tal-pjanijiet nazzjonali tagħhom għall-irkupru u r-reżiljenza, f’koordinazzjoni mill-qrib mal-awtoritajiet reġjonali u lokali, sabiex jimmassimizzaw il-kontribut tal-Faċilità għal tranżizzjoni diġitali ġusta u kompetittiva;

9.Jistieden lill-Kummissjoni u lill-Istati Membri jkomplu jimmonitorjaw id-domanda u l-provvista fis-suq tax-xogħol, u jippromwovu l-kooperazzjoni bejn l-istituzzjonijiet edukattivi, l-impjegaturi u t-trade unions, sabiex jantiċipaw aħjar il-ħiliet futuri meħtieġa biex jitħaddan il-potenzjal tat-tranżizzjoni diġitali; jissottolinja li valutazzjoni bir-reqqa tal-ħiliet se tgħin lill-ħaddiema, lill-impjegaturi u lill-fornituri tat-taħriġ jidentifikaw il-ħtiġijiet ta’ titjib u tiġdid tal-ħiliet relatati mal-intelliġenza artifiċjali u l-ġestjoni algoritmika fuq il-post tax-xogħol; jisħaq li tali valutazzjoni għandha tkun prattika, aċċessibbli u adattata għar-realtajiet speċifiċi tal-SMEs, u sservi bħala bażi għal programmi ta’ taħriġ immirati li jkunu appoġġjati permezz ta’ finanzjament nazzjonali u tal-Unjoni eżistenti; jilqa’ l-proposta għall-ħolqien ta’ Osservatorju Ewropew tal-Informazzjoni dwar il-Ħiliet; jisħaq li n-nuqqas kurrenti ta’ data diżaggregata rigward il-prevalenza u t-tip ta’ IA u ta’ sistemi ta’ ġestjoni algoritmika implimentati u l-kategoriji ta’ ħaddiema soġġetti għalihom ifixkel it-tfassil tal-politika bbażat fuq l-evidenza, u jħeġġeġ lill-Kummissjoni ttejjeb il-ġbir ta’ data f’dan il-qasam;

10.Jenfasizza li, f’konformità mal-prinċipji tas-sussidjarjetà u tar-rispett għas-sistemi nazzjonali tar-relazzjonijiet industrijali, l-Istati Membri jistgħu jippermettu lis-sħab soċjali jżommu, jinnegozjaw, jikkonkludu u jinfurzaw ftehimiet kollettivi bil-ħsieb li jimplimentaw jew jikkomplementaw id-dispożizzjonijiet dwar l-IA u l-ġestjoni algoritmika stabbiliti fil-livell tal-Unjoni;

11.Jinsab imħasseb li l-użu tal-IA u tas-sistemi ta’ ġestjoni algoritmika qed jikkontribwixxi għat-tneħħija gradwali ta’ ċerti impjiegi fil-livell tad-dħul, li tradizzjonalment iservu bħala punt ta’ aċċess essenzjali għas-suq tax-xogħol, u jissottolinja l-fatt li hemm ir-riskju li dan jaffettwa b’mod sproporzjonat liż-żgħażagħ u lill-persuni li qed ifittxu impjieg għall-ewwel darba; jenfasizza li sabiex l-Unjoni taħsad il-benefiċċji tat-trasformazzjoni diġitali fuq il-post tax-xogħol, toħloq u ssawwar mill-ġdid l-impjiegi, hemm bżonn li jiġi żgurat li l-ħaddiema, inklużi l-ħaddiema fil-livell tad-dħul u dawk b’livell baxx ta’ ħiliet, ikollhom il-ħiliet meħtieġa biex jaħdmu fl-era diġitali; jissottolinja li l-impatt sħiħ u mhux magħruf tal-evoluzzjoni tal-IA u tal-ġestjoni algoritmika diġà qed jaffettwa tipi oħra ta’ xogħol u kategoriji oħra ta’ ħaddiema wkoll, inklużi l-impjiegi b’livell għoli ta’ ħiliet; jistieden għalhekk lill-Kummissjoni u lill-Istati Membri, biex jieħdu miżuri proattivi, inkluża l-integrazzjoni tat-taħriġ fil-ħiliet diġitali rilevanti fis-sistemi edukattivi nazzjonali fosthom il-kurrikula tal-edukazzjoni u t-taħriġ vokazzjonali (VET), ħalli jiżguraw li ż-żgħażagħ li jidħlu fis-suq tax-xogħol jiġu appoġġjati b’mod adegwat u jingħataw opportunitajiet ta’ impjieg sinifikattivi, fl-ekonomija diġitali li qed tevolvi;

12.Jisħaq li l-użu dejjem akbar tat-teknoloġiji diġitali fuq il-post tax-xogħol jippreżenta kemm opportunitajiet kif ukoll sfidi, filwaqt li l-impatt sħiħ ta’ din it-tranżizzjoni għadu mhux magħruf; iqis, minn naħa waħda, li tali teknoloġiji jistgħu jżidu l-flessibbiltà u jippermettu bilanċ aħjar bejn ix-xogħol u l-ħajja privata permezz ta’ xogħol mill-bogħod u arranġamenti tax-xogħol flessibbli; jirrikonoxxi, minn naħa oħra, li dawn joħolqu bosta riskji għas-saħħa mentali tal-ħaddiema u l-bilanċ bejn ix-xogħol u l-ħajja privata tagħhom billi jċajpru l-konfini bejn il-ħajja professjonali u dik privata minħabba pressjoni dejjem akbar fuq il-ħaddiema biex ikunu disponibbli fi kwalunkwe ħin; jissottolinja wkoll li l-ġestjoni algoritmika tinvolvi riskji għall-protezzjoni tad-data, inklużi sorveljanza żejda u l-monitoraġġ tal-ħaddiema barra mill-post tax-xogħol; jissottolinja l-fatt li, jekk ma jiġux ġestiti kif xieraq, tali żviluppi jistgħu jwasslu għal stress eċċessiv relatat max-xogħol, eżawriment, iż-żieda fir-riskji psikosoċjali relatati max-xogħol, it-telf ta’ awtonomija u sentiment dejjem akbar ta’ iżolament soċjali u professjonali;

13.Jirrikonoxxi li l-ġestjoni algoritmika tista’ tkun sors ta’ diskriminazzjoni u preġudizzju detrimentali għall-ħaddiema u b’mod partikolari għall-ħaddiema nisa mingħajr sorveljanza mill-bniedem xierqa, u jenfasizza li t-tfassil, l-implimentazzjoni, u l-użu tal-IA u tas-sistemi ta’ ġestjoni algoritmika jridu jipprevjenu b’mod proattiv il-preġudizzji u d-diskriminazzjoni b’mod partikolari dawk ibbażati fuq il-ġeneru, l-oriġini razzjali jew etnika, l-età, id-diżabbiltà, l-orjentazzjoni sesswali, jew karatteristiċi protetti oħra, sabiex jiġu promossi u ssalvagwardjati l-ugwaljanza u d-diversità fuq il-post tax-xogħol; jinsab imħasseb li l-gruppi vulnerabbli għandhom anqas aċċess għal opportunitajiet ta’ impjieg relatati mal-IA u għal għodod tal-IA li jtejbu l-produttività fuq il-post tax-xogħol https://www.oecd.org/content/dam/oecd/en/publications/reports/2024/10/who-will-be-the-workers-most-affected-by-ai_fb7fcccd/14dc6f89-en.pdf., li jista’ jipprevjeni l-benefiċċji tal-IA milli jinqasmu b’mod wiesa’ u ġust;

14.Jirrikonoxxi li l-IA u l-ġestjoni algoritmika jistgħu jtejbu l-effiċjenzi, u jippermettu aġġustamenti individwalizzati fl-ambjenti tax-xogħol kif ukoll fil-kundizzjonijiet ġenerali tax-xogħol, iżda jistgħu wkoll iżidu l-pressjoni tal-prestazzjoni li tista’ twassal għal riskji serji għas-saħħa u s-sikurezza, bħal disturbi muskoloskeletali u kardjovaskulari jew eżawriment mentali jew fiżiku, li jwasslu biex il-ħaddiema jinjoraw jew ma jagħtux kas it-twissijiet tas-sikurezza, u b’hekk jiżdied b’mod sinifikanti r-riskju ta’ aċċidenti fuq il-post tax-xogħol; jisħaq li l-użu tal-IA u tas-sistemi ta’ ġestjoni algoritmika għandu jservi bħala għodda ta’ appoġġ b’valur miżjud reali għall-ħaddiema u li l-perspettivi tal-ħaddiema dwar l-inkorporazzjoni tagħha fl-ispazji tax-xogħol fil-biċċa l-kbira tagħhom mhumiex esplorati;

15.Jissottolinja l-ħtieġa li dawk ir-riskji jiġu mmonitorjati u indirizzati b’mod komprensiv u li kwalunkwe implimentazzjoni ġdida jew bidla sinifikanti fl-użu tal-għodod tal-IA jew tas-sistemi ta’ ġestjoni algoritmika fuq il-post tax-xogħol għandha tkun soġġetta għal valutazzjoni tas-saħħa u s-sikurezza, li tinkludi evalwazzjoni tar-riskju, miżuri ta’ prevenzjoni u protezzjoni, taħt ir-responsabbiltà tal-impjegaturi, f’konformità mad-Direttiva 89/391/KEE u monitoraġġ kontinwu fid-dawl tal-aħħar għarfien xjentifiku, u li jiġu żgurati s-sorveljanza mill-bniedem u l-kontroll ta’ dawk il-valutazzjonijiet; iħeġġeġ l-iżvilupp, f’kooperazzjoni mas-sħab soċjali, f’livell xieraq, ta’ gwida speċifika għas-settur dwar l-implimentazzjoni responsabbli tal-IA fuq il-post tax-xogħol li tiżgura r-rispett għad-drittijiet fundamentali u l-iskambju tal-aħjar prattiki;

16.Jissottolinja r-rwol kruċjali tad-djalogu soċjali u l-involviment attiv tal-ħaddiema u tar-rappreżentanti tagħhom f’konformità mad-Direttiva 2002/14/KE fl-implimentazzjoni, l-użu u l-evalwazzjoni tal-IA u tat-teknoloġiji ta’ ġestjoni algoritmika fuq il-post tax-xogħol, b’mod partikolari biex jitfassal l-użu f’setturi differenti; jisħaq li l-parteċipazzjoni sinifikanti tal-ħaddiema u tar-rappreżentanti tagħhom fil-proċessi tat-teħid tad-deċiżjonijiet fl-istadji kollha kif ukoll l-għoti ta’ informazzjoni u konsultazzjoni dwar it-taħriġ fuq il-post tax-xogħol biex tiġi ffaċilitata l-applikazzjoni ta’ teknoloġiji ġodda mill-ħaddiema kollha, it-trawwim ta’ sens ta’ awtonomija, l-(awto)stima u l-fiduċja, jgħinu biex jittaffew ir-riskji tat-teknoloġiji l-ġodda u jwasslu għal integrazzjoni aħjar, aktar effettiva u ċċentrata fuq il-bniedem tal-IA fuq il-post tax-xogħol;

17.Jissottolinja l-ħtieġa ta’ assenjazzjoni ċara tar-responsabbiltajiet ta’ sorveljanza li jikkonċernaw l-implimentazzjoni u l-użu tal-IA u tas-sistemi ta’ ġestjoni algoritmika fuq il-postijiet tax-xogħol f’konformità mal-prinċipju ta’ “bniedem fil-kontroll”, sabiex jiġu żgurati r-responsabbiltà u s-superviżjoni effettiva mill-bniedem, u l-ħaddiema jkunu jistgħu jidentifikaw il-punt ta’ kuntatt uman f’każ li jkollhom bżonn jeżerċitaw id-drittijiet tagħhom; jisħaq li s-sorveljanza u r-rieżami effettivi mill-bniedem jirrikjedu kapaċità ġenwina ta’ fehim, monitoraġġ, u, fejn meħtieġ, intervent fl-operat tas-sistemi tal-IA, filwaqt li jitqiesu l-isfidi inerenti preżentati minn sistemi tal-IA kumplessi u mhux trasparenti, kif ukoll riskji ta’ preġudizzju fl-awtomatizzazzjoni; jissottolinja għalhekk li s-sorveljanza mill-bniedem ma tridx tkun biss eżerċizzju formalistiku, iżda salvagwardja aċċessibbli għall-verifika, l-ispjegazzjoni u l-korrezzjoni tad-deċiżjonijiet tal-IA u li tali punt ta’ kuntatt uman irid ikollu l-kompetenza, it-taħriġ u l-awtorità meħtieġa biex jeżerċita dik il-funzjoni;

18.Jissottolinja li d-data personali tal-persuni li jwettqu xogħol tista’ tiġi aggregata f’bażi ta’ data kollettiva li tista’ tiġi pproċessata minn algoritmi, u għalhekk tirrikjedi protezzjoni tad-data fil-livell kollettiv ukoll;

19.Jenfasizza l-potenzjal li l-IA u l-ġestjoni algoritmika jista’ jkollhom għall-inklużjoni tal-ħaddiema b’diżabbiltà fis-suq tax-xogħol; jirrikonoxxi, madankollu, li hemm sfidi partikolari li l-persuni b’diżabbiltà, il-ħaddiema akbar fl-età u l-individwi vulnerabbli jistgħu jiffaċċjaw biex jadattaw għat-teknoloġiji l-ġodda fuq il-post tax-xogħol; jistieden għalhekk lill-Kummissjoni u lill-Istati Membri jiżguraw li l-kumpaniji li jimplimentaw l-IA u s-sistemi ta’ ġestjoni algoritmika jintroduċu miżuri ta’ appoġġ inklużivi u mfassla apposta li jrawmu l-parteċipazzjoni akbar tal-persuni b’diżabbiltà fis-suq tax-xogħol u l-aċċess tagħhom għal teknoloġiji ġodda; jissottolinja li kulħadd għandu jibbenefika mill-avvanzi teknoloġiċi;

20.Jistieden lill-Kummissjoni u lill-Istati Membri jiggarantixxu d-dritt għal arranġament raġonevoli u effettiv għall-persuni b’diżabbiltà f’konformità mad-Direttiva 2000/78/KE, u jirrispettaw l-awtorità aħħarija tagħhom biex jiddeterminaw jekk it-teknoloġiji ta’ assistenza bbażati fuq l-IA fuq il-post tax-xogħol humiex adattati għall-ħtiġijiet individwali tagħhom; jisħaq, f’dan il-kuntest, l-importanza tal-metodi ta’ ħidma flessibbli u tat-taħriġ fuq il-post tax-xogħol, kif ukoll tal-opportunitajiet effettivi biex jiġi implimentat l-użu ta’ teknoloġija ta’ assistenza f’konsultazzjoni mal-persuni b’diżabbiltà u r-rappreżentanti tagħhom; jistieden lill-Kummissjoni tintegra l-impatt tal-użu tal-IA fuq il-post tax-xogħol fir-reviżjoni li jmiss tal-Istrateġija tal-Unjoni dwar id-Drittijiet tal-Persuni b’Diżabbiltà;

21.Jisħaq li jekk l-Unjoni għandha l-għan li tkun fuq quddiem nett tat-tranżizzjoni diġitali, jeħtiġilha tmexxi bl-eżempju billi tistabbilixxi standards għoljin għall-implimentazzjoni tal-IA u tal-ġestjoni algoritmika fuq il-post tax-xogħol, inklużi regoli ċari dwar it-trasparenza u s-sorveljanza mill-bniedem;

22.Ifakkar li l-acquis eżistenti tal-Unjoni jikkostitwixxi element kostitwenti importanti fir-regolamentazzjoni tal-ġestjoni algoritmika u tal-użu tal-IA fuq il-post tax-xogħol; jilqa’ f’dan ir-rigward, id-Direttiva dwar ix-Xogħol fuq il-Pjattaformi, li tintroduċi, fost l-oħrajn, regoli dwar it-trasparenza, il-protezzjoni tad-data, is-sorveljanza u r-rieżami mill-bniedem, l-informazzjoni u l-konsultazzjoni u s-saħħa u s-sikurezza f’setturi fejn tali teknoloġiji qed isawru dejjem aktar id-deċiżjonijiet dwar ix-xogħol, u l-Att dwar l-Intelliġenza Artifiċjali u jfakkar fir-Regolament (UE) 2016/679; jisħaq, madankollu, li minkejja dan il-qafas leġiżlattiv, għad hemm għadd ta’ lakuni fir-rigward tal-protezzjoni, id-drittijiet u l-kundizzjonijiet tax-xogħol tal-ħaddiema rigward l-użu ta’ tali għodod fuq il-post tax-xogħol inkluż ir-rispett tad-data personali u l-privatezza, il-bilanċ bejn ix-xogħol u l-ħajja privata u d-dritt għall-iskonnessjoni; jenfasizza li d-dispożizzjonijiet tad-Direttiva dwar ix-Xogħol fuq il-Pjattaformi dwar il-ġestjoni algoritmika (b’mod partikolari d-drittijiet tal-ħaddiema għat-trasparenza, ir-rieżami mill-bniedem, l-informazzjoni u l-konsultazzjoni tal-ħaddiema u l-OSH) japplikaw biss għall-persuni li jagħmlu xogħol fuq il-pjattaformi, filwaqt li jħallu lill-ħaddiema l-oħra li jkunu dejjem aktar soġġetti għal ġestjoni algoritmika anqas protetti; jissottolinja l-ħtieġa li jiġi żgurat trattament ugwali tal-ħaddiema kollha u li l-inizjattivi futuri jkunu koerenti mal-qafas protettiv stabbilit mid-Direttiva dwar ix-Xogħol fuq il-Pjattaformi;

23.Jistieden lill-Kummissjoni u lill-Istati Membri jiżguraw li l-kumpaniji u l-istituzzjonijiet pubbliċi Ewropej ikollhom aċċess għal għodod tal-IA affidabbli u sovrani, żviluppati f’konformità mal-valuri demokratiċi Ewropej, filwaqt li jevitaw lock-in teknoloġiku ma’ fornituri minn ġuriżdizzjonijiet mhux tal-UE;

24.Jistieden lill-Kummissjoni u lill-Istati Membri jiżguraw li l-implimentazzjoni ta’ sistemi algoritmiċi fuq il-post tax-xogħol tagħti prijorità lill-użu ta’ teknoloġiji żviluppati, imħarrġa u ospitati fi ħdan l-Unjoni Ewropea, sabiex jiġu ssalvagwardjati d-drittijiet fundamentali, il-protezzjoni tad-data, iċ-ċibersigurtà u l-awtonomija strateġika;

25.Jissottolinja li r-rispons regolatorju fil-livell Ewropew għandu jiġi kkunsidrat bir-reqqa u jkun ippreċedut b’analiżi tal-leġiżlazzjoni eżistenti, żviluppat f’kooperazzjoni mas-sħab soċjali u li jirrispetta s-sussidjarjetà, sabiex tiġi żgurata soluzzjoni armonizzata b’livell għoli ta’ protezzjoni tal-ħaddiema madwar l-Unjoni u kundizzjonijiet ekwi fis-suq intern, inkluż permezz tal-implimentazzjoni sħiħa tal-oqfsa legali Ewropej u nazzjonali eżistenti; jenfasizza l-importanza li jiġi żgurat ambjent regolatorju prevedibbli sabiex jiġu promossi l-innovazzjoni, il-kompetittività u l-kompetizzjoni ġusta; jistieden lill-Kummissjoni tiżgura li kwalunkwe leġiżlazzjoni u inizjattiva relatati mal-ġestjoni algoritmika fuq il-post tax-xogħol jevitaw id-duplikazzjoni jew it-trikkib mal-istrumenti rilevanti eżistenti tal-Unjoni u ma jimponux piż amministrattiv bla bżonn, speċjalment għall-SMEs, inaqqsu l-kostijiet u jiffaċilitaw il-konformità;

26.Jirrikonoxxi li l-kumpaniji, b’mod partikolari l-intrapriżi żgħar u ta’ daqs medju (SMEs), diġà qed jiffaċċjaw sfidi sinifikanti biex jinnavigaw qafas regolatorju diverġenti u dejjem aktar kumpless; jenfasizza l-ħtieġa ta’ gwida, għodod, u mekkaniżmi ta’ appoġġ imfassla apposta biex jgħinu lill-SMEs jimplimentaw ir-rekwiżiti kollha b’mod effettiv;

27.Jistieden lill-Kummissjoni twettaq valutazzjoni tal-impatt komplementata minn test tal-Kompetittività u tal-SMEs u tissottometti abbażi tal-Artikoli 153(2), il-punt (b), flimkien mal-Artikolu 153(1), il-punt (b), u l-Artikolu 16(2) tat-Trattat dwar il-Funzjonament tal-Unjoni Ewropea, u tar-riżultat tal-passi msemmija hawn fuq, proposta dwar il-ġestjoni algoritmika fuq il-post tax-xogħol, skont ir-rakkomandazzjonijiet stabbiliti fl-Anness ta’ dan id-dokument, li tindirizza l-lakuni li fadal fil-leġiżlazzjoni eżistenti, tevita l-ħolqien ta’ strumenti legali mrikkbin u ttejjeb l-armonizzazzjoni tas-suq intern;

28.Iqis li kwalunkwe implikazzjoni finanzjarja tal-proposti mitluba għandha tkun koperta minn allokazzjonijiet baġitarji eżistenti;

29.Jagħti istruzzjonijiet lill-President tiegħu biex tgħaddi din ir-riżoluzzjoni kif ukoll ir-rakkomandazzjonijiet li jinsabu fl-anness lill-Kummissjoni u lill-Kunsill kif ukoll lill-parlamenti u lill-gvernijiet tal-Istati Membri.