A.billi l-inizjattiva taċ-ċittadini Ewropej (IĊE) hija għodda għaċ-ċittadini tal-UE biex jitolbu lill-Kummissjoni tipproponi leġiżlazzjoni ġdida; billi meta IĊE tiġbor mill-inqas miljun firma, il-Kummissjoni jeħtiġilha, fi żmien sitt xhur mill-validazzjoni tal-IĊE, tispjega liema azzjonijiet biħsiebha tieħu b’reazzjoni għal dan;

B.billi “Il-Vuċi Tiegħi, l-Għażla Tiegħi” huwa moviment taċ-ċittadini li jlaqqa’ flimkien aktar minn 300 organizzazzjoni minn madwar l-Ewropa kollha; billi l-moviment jistieden lill-UE tiżgura abort sikur u aċċessibbli għal kulħadd u jitlob li l-UE tgħaddi leġiżlazzjoni li toħloq mekkaniżmu finanzjarju biex tgħin lill-Istati Membri li jissieħbu volontarjament fil-mekkaniżmu biex jipprovdu kura sikura għall-abort għal dawk kollha li ma għandhomx aċċess għalih;

C.billi, fid-Deċiżjoni (UE) 2024/1158 dwar ir-reġistrazzjoni tal-IĊE, il-Kummissjoni ddikjarat li “jidher li ma hemm l-ebda interferenza mmirata sempliċi mal-kompetenzi tal-Istati Membri biex jiddefinixxu l-politika tas-saħħa tagħhom stess u l-organizzazzjoni tas-servizzi tas-saħħa tagħhom bis-sempliċi fatt li jipprovdu appoġġ finanzjarju biex jipprovdu dan it-tip ta’ servizz tas-saħħa”;

D.billi l-aċċess għas-saħħa sesswali u riproduttiva u d-drittijiet relatati (SRHR), inkluża l-kura għal abort sikur, aċċessibbli universalment u legali, jikkostitwixxi dritt fundamentali; billi l-projbizzjoni tal-aċċess għall-kura riproduttiva ma tnaqqasx il-ħtieġa ta’ kura f’każ ta’ abort, iżda pjuttost iżżid ir-rikors għal abort mhux sikur, li għandu impatt negattiv fuq ħafna oqsma tal-ħajja tan-nisa u tal-bniet, inklużi l-fertilità u l-mortalità tagħhom, jew iġiegħel lill-pazjenti jivvjaġġaw barra mill-pajjiż biex jiksbu kura legali f’każ ta’ abort;

E.billi jeħtieġ li l-kapaċità li l-individwi jeżerċitaw l-awtonomija riproduttiva tagħhom, inkluż id-dritt tagħhom li jiddeċiedu liberament u b’mod responsabbli jekk, meta u kif ikollhom it-tfal, tiġi garantita sabiex l-ugwaljanza bejn il-ġeneri u t-tgawdija sħiħa tad-drittijiet tal-bniedem tinkiseb għal kulħadd fl-Ewropa; billi d-dritt għall-integrità fiżika u l-awtonomija jrid jiġi rrispettat u ggarantit bis-sħiħ;

F.billi skont il-Kumitat tan-NU għall-Eliminazzjoni tad-Diskriminazzjoni kontra n-Nisa, id-dritt tan-nisa għas-saħħa jinkludi d-drittijiet sesswali u riproduttivi tagħhom, u, fir-Rakkomandazzjoni Ġenerali tiegħu Nru 35, il-Kumitat jiddikjara li “l-ksur tas-saħħa u d-drittijiet sesswali u riproduttivi tan-nisa, bħall-isterilizzazzjoni furzata, l-abort furzat, it-tqala furzata, il-kriminalizzazzjoni tal-abort, iċ-ċaħda jew id-dewmien ta’ abort sikur jew il-kura ta’ wara l-abort, il-kontinwazzjoni furzata tat-tqala, u l-abbuż u t-trattament ħażin tan-nisa u l-bniet li jfittxu informazzjoni, oġġetti u servizzi dwar is-saħħa sesswali u riproduttiva, huma forom ta’ vjolenza abbażi tal-ġeneru li, skont iċ-ċirkostanzi, jistgħu jammontaw għal tortura jew trattament krudili, inuman jew degradanti”; billi l-Kumitat iħeġġeġ lill-Istati jirrevokaw il-liġijiet li jikkriminalizzaw l-abort; billi l-WHO u l-korpi internazzjonali tad-drittijiet tal-bniedem jistiednu lill-pajjiżi jillegalizzaw l-abort fuq talba u jeliminaw ostakli bla bżonn u dannużi li jdewmu jew jipprevjenu l-aċċess f’waqtu għall-kura f’każ ta’ abort;

G.billi s-saħħa sesswali u riproduttiva u d-drittijiet relatati huma inklużi fil-miri tal-Għanijiet ta’ Żvilupp Sostenibbli tan-NU, speċifikament il-Mira 3.7 dwar l-iżgurar ta’ aċċess universali għas-servizzi tal-kura tas-saħħa sesswali u riproduttiva, u l-Mira 5.6 dwar l-iżgurar ta’ aċċess universali għas-saħħa sesswali u riproduttiva u d-drittijiet relatati;

H.billi huwa essenzjali li jiġu ssodisfati s-saħħa sesswali u riproduttiva u d-drittijiet relatati biex tinżamm id-dinjità tal-bniedem u peress li dan huwa intrinsikament marbut mal-ġlieda kontra l-vjolenza sesswali u abbażi tal-ġeneru, mal-ksib tal-ugwaljanza bejn il-ġeneri u mal-ħarsien tad-drittijiet tal-bniedem oħra bħad-dritt għall-ħajja, għas-saħħa, għall-privatezza, għas-sigurtà tal-persuna, għan-nondiskriminazzjoni, għall-ugwaljanza quddiem il-liġi u għall-ħelsien mit-tortura u minn trattament jew pieni krudili, inumani jew degradanti oħra;

I.billi n-nuqqas ta’ kapaċità ta’ aċċess għal abort aċċessibbli universalment, sikur u legali jirrestrinġi direttament id-drittijiet tan-nisa, inklużi d-drittijiet tagħhom għall-awtodeterminazzjoni, l-integrità fiżika u mentali, is-saħħa, l-edukazzjoni u x-xogħol; billi r-restrizzjoni ta’ tali drittijiet tirreduċi lin-nisa sempliċiment għar-rwol ta’ prokreazzjoni tagħhom u b’hekk toħloq diskriminazzjoni abbażi tas-sess;

J.billi ħafna Stati Membri tal-UE ħadu passi leġiżlattivi sinifikanti biex javvanzaw l-aċċess għall-abort billi jneħħu l-ostakli proċedurali u regolatorji dannużi u jabolixxu l-pieni kriminali; billi, madankollu, żewġ Stati Membri għadhom ma jippermettux l-abort fuq talba, tmien Stati Membri jżommu perjodu ta’ stennija obbligatorju u diversi Stati Membri jew ma jirrimborżawx jew ma jissussidjawx il-kura f’każ ta’ abort jew joffru biss kopertura limitata; billi 11-il pajjiż fl-Ewropa ma jipprovdux abort mediku (jiġifieri abort mhux kirurġiku) u ħamsa biss jippermettu kura f’każ ta’ abort permezz tat-telemediċina; billi l-limiti ta’ żmien għall-abort fuq talba jvarjaw b’mod sinifikanti fl-Ewropa, u jvarjaw minn 10 ġimgħat sa 24 ġimgħa;

K.billi xi Stati Membri għadhom iżommu ostakli rigressivi għall-aċċess għall-abort, inklużi konsulenza obbligatorja, għażla għall-professjonisti mediċi li jirrifjutaw li jipprovdu kura f’każ ta’ abort, ultrasounds obbligatorji, nuqqas ta’ kopertura finanzjarja, awtorizzazzjonijiet obbligatorji ta’ partijiet terzi, restrizzjonijiet fuq ir-raġunijiet għall-kura f’każ ta’ abort u restrizzjonijiet fuq il-metodi ta’ abort; billi xi Stati Membri saħansitra introduċew ostakli bħal dawn reċentement;

L.billi d-data turi li l-biċċa l-kbira tal-aborti jseħħu fl-ewwel trimestru u li l-maġġoranza tan-nisa li għandhom aborti diġà għandhom tfal, huma miżżewġin jew jinsabu f’relazzjonijiet fit-tul, jew kienu qed jużaw il-kontraċezzjoni f’dak iż-żmien;

M.billi madwar 20 miljun mara fl-Ewropa Din iċ-ċifra hija bbażata fuq l-għadd ta’ nisa li jgħixu fil-Polonja u f’Malta li ma għandhomx aċċess għall-abort minħabba liġijiet restrittivi fil-pajjiżi ta’ residenza tagħhom u restrizzjonijiet u limitazzjonijiet fi Stati Membri oħra tal-UE. ma għandhomx aċċess għal kura sikura u legali għall-abort u s-saħħa tagħhom għadha mhix sikura; billi din iċ-ċifra tinkludi nisa li qed jaħarbu minn kunflitti u gwerer, u nisa migranti;

N.billi ħafna nisa huma mġiegħla jivvjaġġaw lejn pajjiżi oħra biex jaċċessaw il-kura f’każ ta’ abort f’pajjiż ieħor tal-UE, u spiss jiffaċċjaw ostakli finanzjarji, loġistiċi u psikoloġiċi, minkejja l-eżistenza ta’ regoli tal-UE dwar il-kura tas-saħħa transfruntiera;

O.billi skont it-Trattat dwar il-Funzjonament tal-Unjoni Ewropea “l-Unjoni għandha tqis ir-rekwiżiti marbuta mal-... il-protezzjoni tas-saħħa tal-bniedem’ (l-Artikolu 9), u ‘tista’ wkoll tadotta miżuri ta’ inċentiva għall-protezzjoni u t-titjib tas-saħħa tal-bniedem’ (l-Artikolu 168)”;

P.billi n-nisa u l-bniet kollha għandhom jirċievu l-istess aċċess għas-servizzi tal-kura tas-saħħa kull fejn jgħixu, mingħajr diskriminazzjoni; billi persuni emarġinati, inklużi persuni li jappartjenu għal minoranzi razzjali, etniċi u reliġjużi, migranti, persuni minn sfondi soċjoekonomiċi żvantaġġati, persuni li jgħixu f’żoni rurali, persuni b’diżabbiltà, individwi tal-komunità LGBTQI+ u vittmi tal-vjolenza, spiss jiffaċċjaw ostakli addizzjonali, diskriminazzjoni intersezzjonali u vjolenza fl-aċċess għall-kura tas-saħħa;

Q.billi n-nisa bijoloġiċi biss jistgħu joħorġu tqal u jwelldu t-tfal;

R.billi d-diskrepanzi fil-kura għall-abort fl-Ewropa huma realtà; billi s-sistemi tal-kura tas-saħħa ta’ xi Stati Membri diġà jeħtieġ li jassorbu l-pazjenti li jeħtieġu kura f’każ ta’ abort minn Stati Membri oħra minħabba r-restrizzjonijiet li jeżistu hemmhekk, u għalhekk din l-IĊE tipproponi kumpens finanzjarju lil dawk l-Istati Membri;

S.billi xi nisa ma jistgħux jivvjaġġaw biex jaċċessaw il-kura tal-abort minħabba restrizzjonijiet finanzjarji;

T.billi l-leġiżlazzjoni attwali tal-UE mhijiex adegwata biex twieġeb għall-isfidi tal-kura tal-abort transfruntiera;