1.Jilqa’ l-impenn tal-Kummissjoni għall-finanzjament umanitarju, bl-UE u l-Istati Membri tagħha li jibqgħu d-donatur ewlieni globali fl-assistenza umanitarja bbażata fuq il-ħtiġijiet; jinsisti fuq l-obbligu u r-responsabbiltà għall-istati kollha u għall-partijiet f’kunflitt li jirrispettaw u jiżguraw ir-rispett għad-dritt umanitarju internazzjonali u għad-dritt internazzjonali dwar id-drittijiet tal-bniedem, fuq il-ħtieġa li tingħata prijorità lill-protezzjoni tal-popolazzjoni ċivili u li dawn jibqgħu objettiv essenzjali tal-azzjoni esterna tal-UE, inkluża l-għajnuna umanitarja tagħha; jistieden lill-UE tkompli ssaħħaħ iċ-ċentralità tal-prinċipji umanitarji mhux negozjabbli tal-umanità, l-imparzjalità, in-newtralità u l-indipendenza – li jinsabu dejjem aktar taħt pressjoni – u l-promozzjoni tad-dritt umanitarju internazzjonali billi tapplika approċċ umanitarju bi prinċipji u bbażat fuq il-ħtiġijiet, filwaqt li toqgħod lura minn sħubijiet li jdgħajfu dawn il-prinċipji; ifakkar li, skont l-Artikolu 3(5) tat-TUE, l-Unjoni għandha tippromwovi l-protezzjoni tad-drittijiet tal-bniedem kif ukoll tikkontribwixxi għall-osservanza stretta u l-iżvilupp tad-dritt internazzjonali, inkluż ir-rispett għall-prinċipji tal-Karta tan-NU, u tiddefendi l-ugwaljanza bejn il-ġeneri bħala wieħed mill-prinċipji ewlenin tagħha, f’konformità mal-Artikolu 2 tat-TUE, fid-dawl tad-deprijoritizzazzjoni attwali tal-għajnuna umanitarja, speċjalment għan-nisa u l-bniet; jisħaq fuq l-importanza li l-aċċess universali għas-servizzi tas-saħħa sesswali u riproduttiva jiġi promoss bħala parti mill-azzjoni umanitarja tal-UE, u l-impenn tal-UE li tiżgura aċċess għas-servizzi tal-kura tas-saħħa riproduttiva u materna;

2.Jinsab allarmat biż-żieda fil-każijiet ta’ ksur tad-Dritt Umanitarju Internazzjonali f’dawn l-aħħar snin – li wħud minnhom ġew irrappurtati bħala metodi strateġiċi tal-gwerra; jiddeplora l-fatt li l-ispazju umanitarju qed jiċkien u li r-rispett għad-dritt umanitarju internazzjonali u l-prinċipji umanitarji qed jitnaqqar, u dawn jippreżentaw ostakli sinifikanti għall-għoti tal-għajnuna li ssalva l-ħajjiet f’diversi kuntesti milquta minn kunflitti; jikkundanna bil-qawwa ż-żieda allarmanti fl-attakki kontra l-popolazzjonijiet ċivili u kontra l-infrastruttura meħtieġa għas-sopravivenza tagħhom, il-każijiet ta’ ksur serju kontra t-tfal, u l-attakki kontra l-ħaddiema tal-għajnuna umanitarja; jiddenunzja n-nuqqas ta’ kunsiderazzjoni sfaċċat tal-protezzjoni tal-faċilitajiet mediċi fejn, fi kważi kull kunflitt, ġew attakkati l-isptarijiet, bi ksur tar-Riżoluzzjoni 2286 (2016) tal-Kunsill tas-Sigurtà tan-NU tat-3 ta’ Mejju 2016 dwar il-protezzjoni tal-midruba u l-morda, il-persunal mediku u l-persunal umanitarju f’kunflitt armat; jitlob li l-awturi ta’ attakki sistematiċi bħal dawn jinżammu responsabbli ta’ għemilhom, u jistieden lill-UE tikkunsidra sanzjonijiet kontra atturi statali jew mhux statali li jostakolaw deliberatament l-aċċess umanitarju;

3.Jistieden lill-Kummissjoni u lill-Istati Membri jsaħħu l-azzjonijiet għall-prevenzjoni tal-ksur tad-Dritt Umanitarju Internazzjonali u jindirizzaw il-lakuni fil-monitoraġġ tal-ksur tad-Dritt Umanitarju Internazzjonali permezz tal-ġbir ta’ data imparzjali u indipendenti u promozzjoni aktar effettiva u bbażata fuq l-evidenza sabiex it-trasgressuri jinżammu responsabbli għal għemilhom; jistieden lill-Kummissjoni tappoġġja l-mekkaniżmi għall-monitoraġġ u r-rappurtar dwar l-isfidi tal-aċċess umanitarju f’kuntesti milquta mill-kunflitti;

4.Jilqa’ l-adozzjoni tar-Riżoluzzjoni 2730 (2024) tal-Kunsill tas-Sigurtà tan-NU, dwar il-protezzjoni tal-persunal umanitarju u n-NU u l-persunal assoċjat fil-kunflitti armati; jissottolinja l-obbligu skont id-dritt umanitarju internazzjonali li jiġu rispettati u mħarsa l-membri tal-persunal umanitarju, kif ukoll l-importanza li tiġi appoġġjata azzjoni umanitarja indipendenti, newtrali u imparzjali billi l-ispazju umanitarju jiġi protett mill-attakki diretti, mill-impatti mhux intenzjonati tal-politiki kontra t-terroriżmu u r-reġimi ta’ sanzjonijiet, mill-politiċizzazzjoni u min-narrattivi qarrieqa;

5.Jappella għal miżuri konkreti biex tiġi żgurata l-implimentazzjoni effettiva tal-protezzjonijiet tas-sikurezza u s-sigurtà għall-ħaddiema umanitarji, f’konformità mar-Riżoluzzjoni 2730 (2024) tal-Kunsill tas-Sigurtà tan-NU, inkluż l-istabbiliment ta’ investigazzjonijiet, trasparenza u inkjesti imparzjali dwar il-ksur tad-dritt umanitarju internazzjonali; jenfasizza l-ħtieġa li titqies il-vulnerabbiltà akbar tal-membri tal-persunal lokali, li jħabbtu wiċċhom ma’ riskji akbar għas-sikurezza u s-sigurtà tagħhom, u li tiġi żgurata l-protezzjoni speċifika tagħhom; jistieden lill-Kummissjoni tappoġġja miżuri ta’ sikurezza u sigurtà għall-protezzjoni tal-ħaddiema umanitarji, u titlob obbligu ta’ rendikont għall-attakki li jsiru fuqhom; itenni l-importanza ta’ mekkaniżmi ta’ rispons rapidu li joffru assistenza finanzjarja, legali u psikosoċjali immedjata lill-ħaddiema umanitarji li jħabbtu wiċċhom ma’ arrest, intimidazzjoni, jew inċidenti ta’ sigurtà oħra, abbażi ta’ mudelli bħall-inizjattiva “Protect Aid Workers” (Nipproteġu l-Ħaddiema Umanitarji);

6.Jesprimi tħassib dwar iż-żieda fit-theddid, il-fastidju u l-kriminalizzazzjoni tad-difensuri tad-drittijiet tal-bniedem u tal-voluntiera umanitarji f’kuntesti ta’ kunflitti u ta’ kriżijiet; jitlob lill-UE tinkludi l-protezzjoni tagħhom bħala prijorità fl-impenn umanitarju tagħha; jiddeplora ż-żieda fit-tentattivi biex l-għajnuna umanitarja tiġi kriminalizzata mingħajr raġunijiet leġittimi ta’ tħassib, speċjalment fir-rigward ta’ interventi li jsalvaw il-ħajja għal persuni li qed jaħarbu minn kunflitt, vjolenza, persekuzzjoni jew faqar; jappella għall-adozzjoni ta’ qafas legali protettiv biex tiġi indirizzata l-kriminalizzazzjoni tal-għajnuna, tiġi miġġielda l-impunità, u jiġu inklużi eżenzjonijiet umanitarji fir-reġimi ta’ sanzjonijiet, kif ukoll miżuri għall-prevenzjoni tal-kriminalizzazzjoni tal-ħaddiema umanitarji permezz ta’ liġijiet kontra t-terroriżmu;

7.Jikkonferma l-appoġġ tiegħu għall-multilateraliżmu bin-NU fil-qalba tiegħu; jissottolinja li l-operazzjonijiet tal-UE jridu jkunu kkoordinati u konsistenti mal-korpi internazzjonali, u jistieden lill-Kummissjoni tkompli bl-appoġġ kritiku tagħha lil diversi entitajiet tan-NU fil-qasam umanitarju, bl-għan li jiġu rispettati l-prinċipji umanitarji u d-dritt umanitarju internazzjonali; jafferma mill-ġdid l-obbligu li jiġu rispettati u ffaċilitati l-mandati tal-entitajiet tan-NU, u jikkundanna bil-qawwa kwalunkwe tentattiv biex tiġi ostakolata, ristretta jew kompromessa l-kapaċità tal-aġenziji tan-NU li jwettqu d-dmirijiet umanitarji tagħhom b’mod effettiv;

8.Jisħaq fuq il-ħtieġa li jiġu indirizzati b’mod urġenti l-kriżijiet umanitarji bla preċedent fis-Sudan u fir-Repubblika Demokratika tal-Kongo (RDK), li huma fost l-aktar severi fid-dinja llum. Fis-Sudan, terz tal-popolazzjoni jeħtieġu urġentement għajnuna umanitarja, u f’ħafna partijiet tal-pajjiż ġew ikkonfermati livelli allarmanti ta’ insigurtà tal-ikel u kundizzjonijiet ta’ karestija, filwaqt li bl-istess mod, fir-RDK, 21 miljun persuna jeħtieġu għajnuna umanitarja; jistieden lill-partijiet kollha fil-kunflitt jiżguraw aċċess umanitarju sikur u mingħajr xkiel f’konformità mal-prinċipji umanitarji u biex jirrispettaw u jipproteġu l-persunal umanitarju; jistieden ukoll lill-UE u lill-Istati Membri tagħha jżidu l-għajnuna umanitarja lis-Sudan u lir-RDK, u lill-pajjiżi ġirien tagħhom, u b’mod speċjali jiffinanzjaw l-appoġġ għas-superstiti tal-vjolenza sesswali relatata mal-kunflitti, il-programmi lokali ta’ reżiljenza u protezzjoni, u l-programmi li jippromwovu d-drittijiet tan-nisa u t-tfal u l-ugwaljanza bejn il-ġeneri;

9.Jisħaq li l-għajnuna umanitarja, u għalhekk il-ġuħ, qatt ma jridu jiġu politiċizzati jew użati bħala arma, u li l-għajnuna għandha tasal għand il-popolazzjoni ċivili fil-bżonn mingħajr xkiel jew manipulazzjoni, f’konformità sħiħa mad-dritt umanitarju internazzjonali; itenni li s-siti ta’ distribuzzjoni, il-popolazzjoni ċivili, il-ħaddiema umanitarji u l-persunal mediku jeħtieġ li jiġu protetti u jeħtieġ li ma jsirux bersalji ta’ azzjoni militari; jesprimi rabja għall-qtil ta’ 508 ħaddiema umanitarji f’Gaża, kif ukoll għall-attakki ripetuti fuq l-isptarijiet u l-konvojs umanitarji; jopponi bil-qawwa kwalunkwe sistema ta’ distribuzzjoni tal-għajnuna f’Gaża li tkun inkompatibbli mal-prinċipji umanitarji; jiddeplora l-fatt li din l-iskema ta’ distribuzzjoni wasslet għall-qtil ta’ aktar minn elf Palestinjan li marru biex jieħdu l-għajnuna; jappella għal rispons u investigazzjoni internazzjonali biex jiġi żgurat l-obbligu ta’ rendikont għall-ksur possibbli tad-dritt internazzjonali li seħħ fis-siti ġestiti mill-Fondazzjoni Umanitarja ta’ Gaża;

10.Jeżiġi li tingħata mingħajr xkiel u fuq skala kbira l-assistenza umanitarja, taħt il-koordinazzjoni tan-NU u f’konformità mal-prinċipji umanitarji; jappella għall-ftuħ tal-punti ta’ qsim tal-fruntieri rilevanti kollha, filwaqt li jfakkar li ċ-ċaħda tal-aċċess għall-għajnuna umanitarja li ssalva l-ħajjiet hija kastig kollettiv, u tikkostitwixxi delitt tal-gwerra; jissottolinja l-ħtieġa urġenti li l-korpi umanitarji internazzjonali kollha, u b’mod partikolari dawk li huma parti min-network tan-NU, f’konformità mal-Artikolu 214 tat-TFUE, ikollhom aċċess sħiħ, rapidu, sikur u mingħajr xkiel għall-Istrixxa ta’ Gaża kollha kemm hi; jisħaq fuq ir-rwol ċentrali tal-Aġenzija ta’ Fondi u tax-Xogħol tan-Nazzjonijiet Uniti għar-rifuġjati tal-Palestina fil-Lvant Qarib (UNRWA) biex tagħti l-għajnuna umanitarja lir-rifuġjati Palestinjani, u jiddeplora t-tentattivi biex din tiġi deleġittimizzata; jappella li l-mandat u l-finanzjament tal-UNRWA jerġgħu jiġu stabbiliti b’mod komplut, b’sorveljanza u obbligu ta’ rendikont qawwija, billi jiġi żgurat finanzjament fit-tul, sostenibbli, pluriennali u prevedibbli għal UNRWA riformata biex tipprovdi servizzi vitali lir-rifuġjati Palestinjani, u b’hekk jiġu prevenuti kriżijiet umanitarji ulterjuri;

11.Jitlob ukoll li tinżamm u tiżdied l-assistenza umanitarja tal-UE għall-popolazzjoni ċivili affettwata mill-gwerra ta’ aggressjoni tar-Russja kontra l-Ukrajna, b’enfasi partikolari fuq il-ħtiġijiet tal-persuni spostati internament, ir-rifuġjati, l-anzjani u t-tfal, inklużi l-vittmi ta’ deportazzjoni furzata lejn il-Federazzjoni Russa u t-territorji okkupati;

12.Jenfasizza, b’mod partikolari, is-sitwazzjoni fl-Afganistan, li qed jiffaċċja kriżi umanitarja severa u kumplessa, b’aktar minn 23,7 miljun ruħ fi bżonn ta’ assistenza; jinnota li s-sitwazzjoni x’aktarx se tkompli tiddeterjora minħabba t-tkeċċija ta’ rifuġjati mill-Pakistan u l-Iran u l-instabbiltà reġjonali li għaddejja; jilqa’ l-wegħda tal-UE ta’ EUR 266 miljun f’appoġġ, u jappella għal azzjonijiet lokali mmirati biex jassistu lin-nisa u l-bniet;

13.Itenni t-talba tiegħu lill-Kummissjoni biex tiżviluppa strateġija ta’ diplomazija umanitarja tal-UE, flimkien mal-Istati Membri, is-Servizz Ewropew għall-Azzjoni Esterna (SEAE) u r-Rappreżentanti Speċjali tal-UE (EUSRs), u f’konsultazzjoni mal-atturi umanitarji, sabiex tingħata spinta lill-isforzi u jiġi żgurat approċċ aktar sistematiku u kkoordinat għad-diplomazija umanitarja, filwaqt li jsir adattament għaċ-ċirkostanzi li dejjem jinbidlu, bl-użu tal-għodod kollha disponibbli billi jiġi sfruttat il-piż politiku u ekonomiku tal-UE permezz tad-djalogu politiku, u r-relazzjonijiet kummerċjali u ta’ għajnuna, sabiex jiġi żgurat l-aċċess umanitarju, jiġu protetti l-ħaddiema umanitarji u jiġi salvagwardjat l-ispazju umanitarju fil-kunflitti armati, inkluż in-negozjar tal-waqfien tal-ostilitajiet, il-pawżi umanitarji, u l-passaġġi sikuri għall-popolazzjoni ċivili u l-provvisti ta’ sokkors f’kunflitti attivi; iħeġġeġ lill-Kummissjoni, flimkien mal-Istati Membri, is-SEAE u r-Rappreżentanti Speċjali tal-UE biex jiżguraw li d-diplomazija umanitarja ta’ livell għoli tkun infurmata b’mod sistematiku mill-esperjenzi operattivi tal-atturi umanitarji, li għandhom jiġu kkonsultati fuq bażi regolari;

14.Jistieden lill-Kummissjoni ssaħħaħ l-azzjonijiet ħalli tipprevjeni l-ksur tad-dritt umanitarju internazzjonali u tindirizza l-lakuni fil-monitoraġġ tal-ksur tad-dritt umanitarju internazzjonali permezz tal-ġbir tad-data u promozzjoni aktar effettiva u bbażata fuq l-evidenza;

15.Jisħaq fuq il-ħtieġa ta’ aċċess umanitarju indipendenti għall-faċilitajiet kollha relatati mal-migrazzjoni, inklużi ċ-ċentri ta’ detenzjoni, il-hotspots u ż-żoni informali tal-fruntiera, fejn in-nisa u l-persuni LGBTQI+ jiffaċċjaw riskji akbar ta’ vjolenza, sfruttament u ċaħda ta’ servizzi essenzjali, inkluża l-kura tas-saħħa sesswali u riproduttiva; japella għal mekkaniżmi trasparenti ta’ monitoraġġ u obbligu ta’ rendikont f’kuntesti bħal dawn;

16.Jilqa’ ż-żieda suġġerita fil-finanzjament umanitarju għal EUR 25 biljun għal programm Ewropa Globali, u jappella għal żieda sinifikanti fil-livell ta’ finanzjament umanitarju fil-QFP li jmiss u għal finanzjament żgurat li jkun adegwat, prevedibbli u sostnut, filwaqt li jissottolinja li l-flessibbiltà għall-għajnuna umanitarja għandha tiġi delimitata, speċjalment fid-dawl tad-diskrepanza dejjem tikber bejn il-ħtiġijiet umanitarji u l-finanzjament, iżda wkoll biex jitrawwem l-interess tal-UE ħalli tippromwovi l-paċi u l-istabbiltà fil-livell dinji u l-kredibbiltà internazzjonali tagħha bħala attur umanitarju bi prinċipji, u bħala donatur affidabbli; jirrakkomanda bil-qawwa li l-istituzzjonijiet kollha tal-UE u l-Istati Membri jaħdmu biex irawmu l-kooperazzjoni internazzjonali sabiex jindirizzaw b’mod konġunt l-isfidi umanitarji globali, speċjalment l-insigurtà globali tal-ikel;

17.Jistieden lill-Kummissjoni biex iżżomm linji baġitarji u strumenti separati għall-għajnuna umanitarja, sabiex tirrispetta l-prinċipji tan-newtralità, l-indipendenza u l-imparzjalità; jopponi l-fużjoni suġġerita tal-Istrument tal-UE għall-Għajnuna Umanitarja mal-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali – Ewropa Globali fil-QFP li jmiss, u jisħaq fuq il-ħtieġa li jiġi żgurat li r-riżerva ta’ għajnuna f’emerġenza jkollha l-kapaċità li tirreaġixxi meta jkun meħtieġ, kemm għall-ħtiġijiet interni kif ukoll għal dawk esterni tal-UE;

18.Jitlob lill-Kummissjoni tiżgura li ż-żieda fil-flessibbiltà fil-QFP li jmiss taħdem favur l-azzjoni umanitarja tal-UE, b’aktar trasparenza, u li din ma tkunx ta’ detriment għan-newtralità, l-impatt, il-kredibbiltà u l-prevedibbiltà tagħha; ifakkar li t-trasparenza hija essenzjali biex jiġi żgurat li l-QFP li jmiss ikun protett kontra l-użu ħażin, il-frodi u l-ksur tal-prinċipji tal-istat tad-dritt u l-valuri tal-Unjoni, u biex jiġi żgurat li l-għajnuna umanitarja u l-għajnuna għall-iżvilupp iffinanzjati mill-Unjoni jilħqu lill-popolazzjonijiet ċivili fil-bżonn; jistieden lill-Kummissjoni żżid il-mekkaniżmi ta’ monitoraġġ tagħha, u tipprevedi l-għażla rigoruża tas-sħab lokali, monitoraġġ strett tal-użu tal-fondi, u kooperazzjoni msaħħa mal-Istati Membri u l-atturi internazzjonali, bl-għan li jiġi prevenut ir-riskju ta’ devjazzjoni jew abbuż; jappella għal mekkaniżmi aktar b’saħħithom ta’ sorveljanza demokratika fir-rigward tal-allokazzjoni u l-użu tal-finanzjament umanitarju tal-UE, filwaqt li jitqiesu r-rakkomandazzjonijiet tal-organizzazzjonijiet tas-soċjetà ċivili fil-monitoraġġ u l-evalwazzjoni tal-operazzjonijiet umanitarji ffinanzjati mill-UE;

19.Jafferma mill-ġdid li l-kredibbiltà tal-UE bħala attur umanitarju globali tiddependi miż-żamma tal-involviment impenjat, ibbażat fuq il-prinċipji, kostanti u inklużiv tagħha fir-reġjuni milquta minn kriżijiet umanitarji, inkluż fil-kuntesti fraġli u fil-kriżijiet minsija; itenni li l-għajnuna umanitarja ma tridx tkun subordinata għall-objettivi ġeopolitiċi, tal-kontroll migratorju jew tas-sigurtà, u jwissi kontra l-istrumentalizzazzjoni tal-azzjoni umanitarja biex taqdi l-għanijiet tal-politika esterna tal-UE jew tal-Istati Membri tagħha;

20.Itenni t-talba tiegħu lill-Kummissjoni biex tiżviluppa approċċ aktar armonizzat għall-kriżijiet minsija u tirrapporta dwar l-impenn tagħha li talloka 15 % tal-baġit umanitarju annwali inizjali tagħha għall-kriżijiet minsija u li tipprevjeni t-trasferiment tar-riżorsi minn kriżijiet li diġà mhumiex iffinanzjati biżżejjed; jistieden lill-Kunsill jikkoordina aħjar l-attenzjoni u l-appoġġ tal-Istati Membri għal dawn il-kriżijiet;

21.Jenfasizza l-isfidi speċjali li jħabbtu wiċċhom magħhom it-tfal u l-persuni b’diżabbiltà u l-familji tagħhom f’termini tal-aċċess għall-għajnuna umanitarja; jissottolinja li bħalissa, frazzjoni biss tal-għajnuna uffiċjali għall-iżvilupp (12 %) hija mmirata lejn it-tfal meta mqabbla mar-rappreżentanza sinifikanti tagħhom fil-popolazzjoni ta’ persuni li jirċievu għajnuna uffiċjali għall-iżvilupp, anke jekk l-investiment fit-tfal – u mhux biss prijoritajiet settorjali individwali – irawwem titjib dejjiemi tal-livelli ta’ għajxien tagħhom, flimkien mal-komunitajiet kollha tagħhom; jenfasizza l-importanza li tingħata prijorità lill-ħtiġijiet speċifiċi tat-tfal, b’mod partikolari l-edukazzjoni u l-protezzjoni tat-tfal, fil-fażijiet kollha tar-rispons umanitarju, inkluż it-tħejjija, l-għajnuna ta’ emerġenza u l-irkupru; jissottolinja li s-salvagwardja tad-drittijiet u tal-benesseri tat-tfal hija essenzjali għar-reżiljenza fit-tul u għall-iżvilupp sostenibbli; jistieden lill-Kummissjoni u lill-Istati Membri jiżguraw finanzjament, programmazzjoni u mekkaniżmi ta’ koordinazzjoni maħsuba biex jindirizzaw il-ħtiġijiet speċifiċi tat-tfal f’kuntesti umanitarji;

22.Jisħaq fuq il-ħtieġa li l-finanzjament pubbliku jibqa’ riżorsa primarja għall-għajnuna umanitarja, fid-dawl tar-responsabbiltà tal-istati li jiżguraw finanzjament adegwat u sostnut, filwaqt li jiġi rikonoxxut li l-finanzjament pubbliku waħdu mhux se jkun biżżejjed biex tintemm id-diskrepanza fil-finanzjament umanitarju u jissottolinja li jridu jitqiesu sorsi ġodda ta’ finanzjament, inkluż mis-settur privat; iħeġġeġ lill-Kummissjoni u lill-Istati Membri, għalhekk, jespandu l-bażi tar-riżorsi billi jappoġġjaw l-iżvilupp ta’ approċċi u sħubijiet innovattivi biex jikkumpensaw għad-diskrepanza fil-finanzjament umanitarju f’kooperazzjoni mal-istituzzjonijiet finanzjarji internazzjonali, il-banek multilaterali tal-iżvilupp, is-settur privat – dment li kwalunkwe impenn privat jikkonforma mal-prinċipji umanitarji u t-trasparenza sħiħa – u l-komunità xjentifika, biex jikkomplementaw l-assistenza umanitarja pubblika internazzjonali u jnaqqsu d-diskrepanza fil-finanzjament umanitarju globali; jistieden lill-Kummissjoni u lill-Istati Membri jesploraw mekkaniżmi ta’ finanzjament progressivi u sostenibbli għall-għajnuna umanitarja; jenfasizza l-ħtieġa ta’ kooperazzjoni ma’ pajjiżi donaturi emerġenti bl-għan li jiżdied il-kontribut tagħhom għall-għajnuna umanitarja;

23.Jilqa’ r-Rilanċ Umanitarju varat min-NU, u jisħaq li dan irid jintuża bħala opportunità biex jissaħħu l-prinċipji umanitarji u sistema bbażata fuq il-ħtiġijiet u ċċentrata fuq in-nies, u mhux biss xprunata minn tnaqqis fl-ispejjeż; jissottolinja li, meta mqabbel mal-kisba ta’ effiċjenza u effikaċja akbar, huwa ugwalment importanti li jiġi żgurat l-obbligu ta’ rendikont għall-implimentazzjoni, u li setturi kritiċi, bħall-mandati ta’ protezzjoni u l-miżuri għall-ġlieda kontra l-vjolenza abbażi tal-ġeneru, jibqa’ jkollhom rwol ċentrali bħala settur li jsalva l-ħajjiet;

24.Jilqa’ l-isforzi sinifikanti tal-Kummissjoni biex tagħmel il-ktajjen tal-provvista umanitarji aktar effettivi u effiċjenti, meta jitqies li dawn jirrappreżentaw kważi 70 % tal-kostijiet umanitarji, u dan jagħmilhom qasam ta’ prijorità kritiku meta tiġi indirizzata d-diskrepanza dejjem tikber fil-finanzjament; iħeġġeġ lill-Kummissjoni tkompli tiżviluppa u tappoġġja approċċ strateġiku għall-ktajjen tal-provvista;

25.Jistieden lill-Istati Membri jwettqu l-impenn kollettiv tagħhom li jipprovdu mill-anqas 0,7 % tal-introjtu nazzjonali gross (ING) bħala għajnuna uffiċjali għall-iżvilupp, biex jilħqu l-mira tal-għajnuna uffiċjali għall-iżvilupp ta’ 0,2 % tal-ING għall-Pajjiżi l-Anqas Żviluppati sal-2030, u li jiddedikaw 10 % tal-għajnuna uffiċjali għall-iżvilupp tagħhom għall-azzjoni umanitarja; jistieden lill-Kummissjoni tiżgura li l-għajnuna umanitarja tindirizza b’mod adegwat il-ħtiġijiet tan-nisa u l-bniet bħala investiment strateġiku b’impatti pożittivi fit-tul għal kulħadd, filwaqt li jiddispjaċih li l-organizzazzjonijiet tad-drittijiet tan-nisa għadhom sistematikament sottofinanzjati, u jirċievu anqas minn 1 % tal-għajnuna uffiċjali għall-iżvilupp globali23 Dokument ta’ sintesi tal-ODI “Where next for feminist foreign policy on funding feminist movements?” (X’inhuma l-passi li jmiss għal politika barranija feminista fil-qasam tal-finanzjament tal-movimenti feministi?) - https://media.odi.org/documents/ODI-ET-FundingMovements-PB-EN-May24-Final.pdf, Mejju 2024.;

26.Jesprimi t-tħassib tiegħu dwar it-tnaqqis possibbli fid-daqs tad-delegazzjonijiet tal-UE, inkluż f’pajjiżi terzi fejn qed tiġi pprovduta assistenza umanitarja sinifikanti; iqis li huwa essenzjali, għall-kuntrarju, li dawn l-istrutturi jissaħħu fl-aktar pajjiżi kritiċi;

27.Jenfasizza li d-diversità ta’ kuntesti fraġli tirrikjedi approċċi mfassla apposta u strumenti finanzjarji speċifiċi li jrawmu azzjoni miftiehma fost l-atturi umanitarji, tal-iżvilupp u tal-paċi, filwaqt li jiġi rispettat il-mandat distint tal-azzjoni umanitarja bi prinċipji, b’enfasi partikolari fuq l-involviment mal-atturi lokali u t-tisħiħ tal-pożizzjoni tagħhom, kemm fil-proċessi tat-teħid tad-deċiżjonijiet kif ukoll fl-implimentazzjoni tal-programmi; jistieden lill-Kummissjoni u lill-Istati Membri jżommu u jintensifikaw l-involviment fil-kuntesti fraġli u milquta mill-kunflitti;

28.Jistieden lill-Kummissjoni tadotta l-komunikazzjoni dwar l-għajnuna umanitarja kif previst fil-Programm ta’ Ħidma tagħha għall-2026, b’enfasi fuq approċċ ambizzjuż, iċċentrat fuq in-nies u integrat għall-fraġilità, u l-mekkaniżmi għall-implimentazzjoni tagħha, u tikkonsulta lill-Parlament dwar it-tħejjija u l-implimentazzjoni ta’ din l-istrateġija; jilqa’ l-intenzjoni kkomunikata mill-Kummissjoni li tħejji strateġija integrata biex tindirizza l-fraġilità u l-kunflitt; jenfasizza l-importanza li tiġi żviluppata strateġija bħal din, b’finanzjament adattat kif xieraq u speċifiku għall-kuntest, li tindirizza l-isfidi interkonnessi tal-paċi, l-iżvilupp, l-azzjoni klimatika u l-ħtiġijiet umanitarji, inkluż billi jkun hemm aktar involviment mas-settur privat lokali, u b’rispett sħiħ tal-prinċipji umanitarji; fid-dawl ta’ din l-istrateġija, jistieden lill-Kummissjoni tqis id-dimensjoni tal-ġeneru;

29.Jistieden lill-Kummissjoni tiżgura li l-pajjiżi ma jinqabdux f’ċikli bla tmiem ta’ għajnuna umanitarja iżda pjuttost li jkunu jistgħu jimxu lejn l-iżvilupp sostenibbli, sabiex jissaħħu l-komunitajiet lokali u tiġi prevenuta d-dipendenza fuq il-provvisti esterni, permezz tal-finanzjament ta’ servizzi essenzjali bħall-edukazzjoni, is-saħħa u l-infrastruttura ewlenija, inkluż u lil hinn mill-Global Gateway, li għandha l-potenzjal li tkun tista’ tavvanza firxa ta’ SDGs interkonnessi, billi tisfrutta diversi sorsi ta’ finanzjament, inklużi l-investimenti tas-settur privat, u tirrispetta l-istandards soċjali u ambjentali li jistgħu jwasslu għal tkabbir aċċellerat, il-ħolqien ta’ impjiegi deċenti, it-tnaqqis tal-faqar u l-inugwaljanza fl-introjtu, u tiżgura żvilupp aktar reżiljenti u inklużiv li fih ħadd ma jitħalla jibqa’ lura; jistieden lill-Kummissjoni tagħmel użu mill-istrumenti ta’ kooperazzjoni tal-UE għall-pjanijiet tal-iżvilupp lokali permezz ta’ proġetti speċifiċi u mmirati li diġà ġew ippruvati u ttestjati mill-Istati Membri;

30.Ifakkar li t-tibdil fil-klima jaġixxi bħala wieħed mill-muturi ewlenin tal-kunflitt, tan-nixfa, tal-karestija u tal-migrazzjoni; jisħaq li ż-żieda fil-livell tal-baħar tista’ toħloq theddida eżistenzjali għall-Istati Gżejjer Żgħar li qed Jiżviluppaw, li huma fost l-aktar pajjiżi vulnerabbli għat-tibdil fil-klima fid-dinja;

31.Jistieden lill-UE tavvanza fl-implimentazzjoni tar-rabta tat-tliet elementi biex tindirizza l-kawżi ewlenin tal-kriżijiet u tappoġġja l-bini tar-reżiljenza, b’mod partikolari f’kuntesti fraġli u milquta mill-kunflitti, billi tappoġġja lill-organizzazzjonijiet lokali, inklużi l-organizzazzjonijiet taż-żgħażagħ u dawk immexxija min-nisa, l-organizzazzjonijiet ibbażati fuq it-twemmin, li għandhom rwol ewlieni fir-rispons għall-kriżijiet umanitarji, u tiżgura l-parteċipazzjoni sħiħa, ugwali u sinifikattiva tagħhom fiċ-ċiklu tal-programm umanitarju u fl-ispazji tat-teħid tad-deċiżjonijiet fil-livelli kollha;

32.Jistieden lill-Kummissjoni twettaq l-impenn tagħha li sal-2027 tagħti mill-anqas 25 % tal-finanzjament umanitarju tagħha lill-atturi lokali, inkluż permezz tal-użu ta’ fondi raggruppati bbażati fil-pajjiżi u mekkaniżmi oħra ta’ finanzjament li jagħtu prijorità lill-atturi lokali, kif ukoll tesplora kif tipprovdi għotjiet b’mod dirett lill-organizzazzjonijiet lokali, u tgħin biex jissaħħu l-kapaċitajiet tagħhom ħalli jissodisfaw ir-rekwiżiti regolatorji, ta’ trasparenza u ta’ obbligu ta’ rendikont; jistieden lill-UE tagħti prijorità lill-finanzjament għall-organizzazzjonijiet lokali li jagħtu assistenza liż-żgħażagħ, lin-nisa, lill-persuni b’diżabbiltà, lill-popolazzjonijiet LGBTQI+ u lil gruppi vulnerabbli oħra;

33.Jistieden lill-Kummissjoni biex fil-QFP li jmiss tagħti prijorità lill-finanzjament pluriennali għall-prevenzjoni tal-kunflitti u l-konsolidazzjoni tal-paċi sabiex jiġu infurzati r-rabtiet bejn il-mekkaniżmi umanitarji u ta’ rispons għall-kriżijiet u l-programmazzjoni fit-tul tal-konsolidazzjoni tal-paċi u tal-iżvilupp; jisħaq fuq l-importanza li jissaħħu l-mekkaniżmi ta’ koordinazzjoni fil-livell lokali fl-azzjonijiet kollha umanitarji, tal-iżvilupp u tal-konsolidazzjoni tal-paċi tal-UE, biex jiġu żgurati eżiti konġunti u koerenti, inkluż permezz tal-approċċ ta’ Tim Ewropa; jissottolinja l-importanza tas-sħubija bejn l-UE u n-NU biex tissaħħaħ ir-rabta bejn l-azzjoni umanitarja, l-iżvilupp u l-paċi, u li tingħata attenzjoni speċjali lill-bniet u n-nisa żgħażagħ, il-persuni b’diżabbiltà, it-tfal u l-persuni akbar fl-età f’sitwazzjonijiet vulnerabbli, u jisħaq fuq l-importanza tal-finanzjament tal-UE għas-sistema tan-NU; iqis li l-inugwaljanzi strutturali qed ikomplu jinfluwenzaw id-dinamika tal-poter tal-interventi umanitarji, l-aċċess għall-finanzjament u l-parteċipazzjoni fit-teħid tad-deċiżjonijiet; jappella għal approċċ aktar inklużiv, ekwu u bbażat fuq id-drittijiet għall-politika umanitarja tal-UE, bi tmexxija akbar mill-atturi lokali u storikament emarġinati;

34.Jinnota li f’kuntesti suxxettibbli għall-kriżijiet, azzjoni antiċipatorja qabel il-kriżijiet umanitarji hija mezz effiċjenti biex jiġu prevenuti jew mitigati l-ħtiġijiet umanitarji futuri, u anke biex tiġi appoġġjata l-kapaċità tal-komunitajiet li jassorbu x-xokkijiet u jadattaw għalihom, u li jibnu r-reżiljenza tagħhom; iħeġġeġ lill-Kummissjoni u lill-Istati Membri jiżguraw li l-investimenti fil-prevenzjoni, l-azzjoni antiċipatorja u t-tħejjija għad-diżastri jiġu preservati biex jiġi mitigat l-impatt tal-kriżijiet fuq il-popolazzjonijiet u s-sistemi;

35.Jinsisti fuq il-ħtieġa ta’ approċċ ibbażat fuq l-evidenza għall-azzjoni antiċipatorja, b’mod partikolari f’kuntesti fraġli u vulnerabbli għall-klima, biex tiżdied id-disponibbiltà ta’ data ta’ kwalità u analiżi tar-riskju sabiex is-sistemi ta’ twissija bikrija jittejbu u t-tbassir tar-riskju jiġi integrat fl-ippjanar umanitarju;

36.Iħeġġeġ lill-Istati Membri jżidu b’mod sinifikanti l-investiment tagħhom f’azzjoni antiċipatorja integrata u mmexxija lokalment, bħal investimenti f’sistemi ta’ twissija bikrija, analiżi tar-riskju u reżiljenza tal-komunità, u żieda fis-sehem ta’ fondi għall-klima maħsuba biex isaħħu r-reżiljenza u l-adattament fl-aktar pajjiżi u reġjuni suxxettibbli għad-diżastri, u jisħaq fuq l-importanza li grupp varjat ta’ atturi, inklużi organizzazzjonijiet tas-soċjetà ċivili u networks fil-livell lokali, jiġu involuti f’azzjonijiet antiċipatorji, inkluż finanzjament ibbażat fuq it-tbassir, it-tħejjija għad-diżastri u l-ġestjoni tar-riskju, speċjalment f’kuntesti fraġli u vulnerabbli għall-klima;

37.Jilqa’ l-progress li sar fl-implimentazzjoni tar-Riżoluzzjoni 1325 (2000) tal-Kunsill tas-Sigurtà tan-NU u l-aġenda dwar in-Nisa, il-Paċi u s-Sigurtà, li huwa għodda essenzjali biex jiġi żgurat li d-drittijiet tan-nisa u l-bniet jiġu osservati f’kull ħin; jinnota li 25 sena wara l-adozzjoni tagħha, għad hemm lakuni kbar fl-implimentazzjoni: in-nisa għadhom emarġinati fil-proċessi ta’ paċi u milquta b’mod sproporzjonat mill-kunflitti u l-kriżijiet, inkluż permezz ta’ vjolenza abbażi tal-ġeneru mifruxa, u dan jirrikjedi appoġġ politiku u finanzjarju akbar favur l-aġenda min-naħa tal-UE, bħala katalist u investiment għall-paċi u l-iżvilupp dejjiema u sostenibbli; jistieden lill-Kummissjoni u lis-SEAE jkomplu jippromwovu l-ugwaljanza bejn il-ġeneri u d-drittijiet u l-emanċipazzjoni tan-nisa, inkluża l-implimentazzjoni tal-SDG 5, prijorità fl-azzjoni esterna kollha tal-UE; jistieden lill-UE u lill-Istati Membri jagħtu prijorità lill-implimentazzjoni tal-aġenda dwar in-Nisa, il-Paċi u s-Sigurtà;

38.Jistieden lill-partijiet kollha fil-kunflitti armati jieħdu miżuri biex jippromwovu s-saħħa sesswali u riproduttiva u d-drittijiet tan-nisa u l-bniet, u jipproteġuhom minn kull forma ta’ vjolenza sesswali u abbażi tal-ġeneru relatata mal-kunflitti, b’mod partikolari l-istupru, filwaqt li jirrikonoxxi li tali vjolenza spiss tintensifika matul il-kunflitti u tista’ tkun qed tintuża b’mod sistematiku bħala arma tal-gwerra; jissottolinja r-rabta profonda bejn il-kunflitti armati u l-kriżijiet umanitarji u klimatiċi, u ż-żieda fil-migrazzjoni irregolari, it-traffikar tal-bnedmin u r-riskju ta’ sfruttament, li jolqtu b’mod sproporzjonat lin-nisa u l-bniet; jissottolinja l-importanza tal-parteċipazzjoni attiva, sħiħa, ugwali u b’sinifikat tan-nisa fl-istadji kollha ta’ proċess ta’ paċi, inkluż fin-negozjati ta’ waqfien mill-ġlied, l-isforzi ta’ medjazzjoni, il-prevenzjoni u r-riżoluzzjoni tal-kunflitti armati, il-konsolidazzjoni tal-paċi u r-rikostruzzjoni ta’ wara l-kunflitt; jistieden lill-Kummissjoni, lis-SEAE u lill-Istati Membri jsaħħu l-isforzi biex iqisu l-ħtiġijiet u l-kontributi speċifiċi tan-nisa u l-bniet fl-istrateġiji għall-prevenzjoni tal-kunflitti, għall-medjazzjoni u għall-konsolidazzjoni tal-paċi;

39.Jissottolinja li n-nisa f’kuntesti umanitarji għandhom jiġu rikonoxxuti mhux biss bħala vittmi, iżda bħala aġenti tal-bidla li jixprunaw b’mod attiv it-trasformazzjoni pożittiva u jsawru d-destin tagħhom stess; jenfasizza r-rwol kruċjali li jiżvolġu n-nisa bħala dawk li joffru l-ewwel rispons u bħala mexxejja tal-komunità u r-rwol li jiżvolġu l-organizzazzjonijiet immexxija min-nisa f’kuntesti umanitarji, fl-isforzi tal-preparatezza, tar-rispons u tal-irkupru, li jipprovdu servizzi li jsalvaw il-ħajjiet, bħal pereżempju r-rifuġju, servizzi tas-saħħa sesswali u riproduttiva, servizzi f’każ ta’ vjolenza abbażi tal-ġeneru, assistenza fi flus kontanti, protezzjoni affidabbli bbażata fil-komunità, u li jaħdmu favur id-drittijiet u l-ħtiġijiet tan-nisa, tal-bniet u tal-popolazzjonijiet emarġinati, kif ukoll jixprunaw il-ħidma favur il-konsolidazzjoni tal-paċi u l-iżvilupp fil-komunitajiet tagħhom, filwaqt li jirċievu biss 0,3 % tal-għajnuna bilaterali fi stati fraġli;

40.Jiddispjaċih dwar il-fatt li l-organizzazzjonijiet lokali mmexxija min-nisa huma fost dawk li ntlaqtu l-aktar mit-tnaqqis reċenti fl-għajnuna barranija, u li nofshom huma f’riskju li jkollhom jagħlqu, u jħeġġeġ involviment aħjar magħhom fil-programmazzjoni umanitarja24 UN Women, “Humanitarian funding cuts threaten women’s rights: What’s at stake and how to help” (It-tnaqqis fil-finanzjament umanitarju jhedded id-drittijiet tan-nisa: x’inhuma r-riskji u kif tista’ tgħin), 13 ta’ Mejju 2025.; jistieden lill-Kummissjoni talloka finanzjament speċifiku, sostenibbli, flessibbli u pluriennali, iżżomm is-sħubiji eżistenti, tissimplifika l-aċċess għall-fondi u tespandi l-appoġġ tagħha għall-organizzazzjonijiet lokali mmexxija min-nisa f’kuntesti umanitarji, tiżgura sistema aktar effettiva, inklużiva u b’obbligu ta’ rendikont, tikseb dan billi żżid il-finanzjament tagħha għall-organizzazzjonijiet lokali mmexxija min-nisa, issaħħaħ it-traċċar u l-obbligu ta’ rendikont għall-finanzjament umanitarju għall-organizzazzjonijiet lokali u mmexxija min-nisa, tadatta l-proċessi u l-mekkaniżmi ta’ finanzjament eżistenti biex jaqdu aħjar il-ħtiġijiet u l-kapaċitajiet tagħhom, kif ukoll iżżid il-livelli ta’ finanzjament dirett pluriennali disponibbli għalihom; jinnota b’dispjaċir li kważi nofs (47 %) l-organizzazzjonijiet immexxija min-nisa u tan-nisa mistħarrġa huma mistennija jagħlqu fi żmien sitt xhur jekk il-livelli ta’ finanzjament attwali jippersistu, filwaqt li aktar minn terz (35 %) għadhom maqbuda fl-inċertezza, ma jistgħux jippjanaw jew isostnu xogħolhom, u 18 % biss jirrapportaw li jantiċipaw li jistgħu jibqgħu operattivi għal aktar minn sena25 UN Women, At a breaking point: The impact of foreign aid cuts on women’s organizations in humanitarian crises worldwide (Fil-punt tal-kollass: l-impatt tat-tnaqqis fl-għajnuna barranija fuq l-organizzazzjonijiet tan-nisa fil-kriżijiet umanitarji fid-dinja kollha), April 2025.; jistieden lill-Kummissjoni u lill-Istati Membri jipprovdu 5 % tal-għajnuna tagħhom f’kuntesti fraġli lil organizzazzjonijiet immexxija min-nisa u lill-organizzazzjonijiet tad-drittijiet tan-nisa permezz ta’ finanzjament flessibbli u fit-tul, inkluż billi jimpenjaw mill-anqas 5 % tal-finanzjament tal-għajnuna uffiċjali għall-iżvilupp tagħhom biex jappoġġjaw lil dawk l-organizzazzjonijiet fi ħdan il-QFP li jmiss;

41.Iħeġġeġ lill-Kummissjoni, lis-SEAE u lill-Istati Membri jippromwovu approċċi reattivi għall-kwistjonijiet tal-ġeneru fl-interventi umanitarji u jżidu l-appoġġ tagħhom għall-parteċipazzjoni tan-nisa fil-proċessi tat-teħid ta’ deċiżjonijiet umanitarji, jappoġġjaw il-ħolqien ta’ kundizzjonijiet biex in-nisa jieħdu f’idejhom rwoli ta’ tmexxija f’kuntesti ta’ kriżi, u jiżguraw li l-perspettivi u l-ħtiġijiet tagħhom jingħataw prijorità fit-tfassil u fl-għoti tal-għajnuna, f’konformità mal-objettivi tar-Riżoluzzjoni 1325 tal-Kunsill tas-Sigurtà tan-NU (2000); jistieden lill-Kummissjoni tapplika approċċ inklużiv, intersezzjonali u reattiv għall-kwistjonijiet tal-ġeneru fl-ippjanar umanitarju kollu, filwaqt li tqis il-ħtiġijiet u d-drittijiet speċifiċi tan-nisa, tal-bniet, tal-persuni b’diżabbiltà, tal-persuni LGBTQI+ u ta’ gruppi emarġinati oħra; jistieden lill-Kummissjoni u lill-Istati Membri jiżguraw il-parteċipazzjoni sinifikattiva ta’ dawn il-gruppi fit-tfassil, l-implimentazzjoni u l-evalwazzjoni tal-programmi ta’ għajnuna umanitarja; iqis li jeħtieġ li tingħata prijorità lill-persuni b’diżabbiltà fl-għajnuna umanitarja ffinanzjata mill-UE, u jiġu indirizzati b’mod partikolari l-ħtiġijiet u l-prijoritajiet tan-nisa u t-tfal li jgħixu b’diżabbiltà, inkluż billi jiġi pprovdut finanzjament lill-organizzazzjonijiet u n-networks lokali tan-nisa u l-bniet b’diżabbiltà, li spiss ikunu fl-aħjar pożizzjoni biex jirreaġixxu għall-ħtiġijiet, iżda jkunu dawk li jintlaqtu l-aktar mit-tnaqqis fil-finanzjament;

42.Jistieden lill-Kummissjoni tiżgura li l-ugwaljanza bejn il-ġeneri tibqa’ tingħata prijorità meta jsiru r-riforma u r-ristrutturazzjoni tas-sistema umanitarja bħala parti mir-Rilanċ Umanitarju mmexxi min-NU, tissalvagwardja l-finanzjament u l-mekkaniżmi kritiċi, bħaż-żamma ta’ raggruppament maħsub fi ħdan is-sistema umanitarja li jinkludi azzjoni speċjalizzata dwar il-vjolenza abbażi tal-ġeneru, l-ugwaljanza bejn il-ġeneri, u l-protezzjoni mill-isfruttament u l-abbuż sesswali, bħala servizzi kritiċi li jsalvaw il-ħajjiet; jistieden lill-Kummissjoni tiżgura l-implimentazzjoni sistematika ta’ analiżi rigoruża tal-ġeneru, ġbir ta’ data diżaggregata skont il-ġeneru, ibbaġitjar sensittiv għall-kwistjonijiet tal-ġeneru u valutazzjonijiet tal-impatt fir-rigward tal-ġeneru, kif ukoll l-iżvilupp ta’ għarfien espert maħsub fil-qasam tal-ġeneri fil-Kummissjoni, tappoġġja rwoli bħal dawn f’organizzazzjonijiet sħab, u tkompli ssaħħaħ l-użu tal-għodda tal-UE li tikkunsidra l-integrazzjoni tal-ġeneru u l-età; jilqa’ l-għadd dejjem jikber u l-formalizzazzjoni ta’ persuni fokali fir-rigward tal-ġeneru (GFPs), fejn issa 99 % tad-delegazzjonijiet tal-UE u 87 % tas-servizzi tal-kwartieri ġenerali għandhom GFPs;

43.Itenni l-ħtieġa li s-servizzi tas-saħħa sesswali u riproduttiva xierqa u f’waqthom jingħataw prijorità u jsiru disponibbli fir-risponsi umanitarji kollha, inkluż permezz tal-implimentazzjoni tal-Pakkett ta’ Servizzi Inizjali Minimi għas-saħħa riproduttiva fl-emerġenzi u t-tranżizzjoni lejn servizzi komprensivi jekk is-sitwazzjoni tkun tippermetti;

44.Itenni l-appell tiegħu għall-implimentazzjoni sħiħa tar-Riżoluzzjoni 1325 tal-Kunsill tas-Sigurtà tan-NU (2000) u r-riżoluzzjonijiet sussegwenti tagħhom mill-UE u mill-Istati Membri tagħha; jilqa’, f’dan ir-rigward, il-progress li sar fuq il-Pjan ta’ Azzjoni tal-UE dwar in-Nisa, il-Paċi u s-Sigurtà u fuq il-GAP III, u jisħaq fuq l-importanza li l-Kummissjoni tippreżenta GAP IV u l-ħtieġa ta’ riżorsi adegwati għall-implimentazzjoni tiegħu; jiddispjaċih li mit-tnedija tal-GAP III, 3,8 % tal-azzjonijiet kollha immirati/reattivi għall-kwistjonijiet tal-ġeneru biss għandhom l-ugwaljanza bejn il-ġeneri bħala objettiv prinċipali; jistieden lill-Kummissjoni tiżgura li 85 % tal-azzjonijiet esterni l-ġodda kollha jinkorporaw il-ġeneru bħala objettiv sinifikanti jew prinċipali u li 20 % tal-għajnuna uffiċjali għall-iżvilupp f’kull pajjiż tiġi allokata għal programmi li għandhom l-ugwaljanza bejn il-ġeneri bħala wieħed mill-objettivi prinċipali tagħhom;

45.Jesprimi tħassib serju dwar l-influwenza dejjem tikber ta’ movimenti fundamentalisti ultrakonservattivi, kontra l-ġeneru u reliġjużi – kemm fl-UE kif ukoll barra minnha – li għandhom l-għan li jimminaw id-drittijiet fundamentali tan-nisa u l-bniet, inkluż f’kuntesti umanitarji; jisħaq li tali movimenti spiss ixerrdu d-diżinformazzjoni, jistigmatizzaw is-servizzi tas-saħħa sesswali u riproduttiva, u jdgħajfu l-protezzjoni tan-nisa mill-vjolenza abbażi tal-ġeneru; jistieden lill-Kummissjoni, lis-SEAE u lill-Istati Membri jiżguraw li l-programmi umanitarji ffinanzjati mill-UE jibqgħu bbażati b’mod sod fuq l-istandards internazzjonali tad-drittijiet tal-bniedem u l-ugwaljanza bejn il-ġeneri, u jappoġġjaw b’mod attiv lill-organizzazzjonijiet tas-soċjetà ċivili fil-mira tal-atturi kontra d-drittijiet;

46.Iwissi kontra l-vjolenza istituzzjonali u n-negliġenza minn atturi umanitarji, inkluż programmazzjoni li ma tqisx il-ġeneri, ambjenti mhux sikuri għan-nisa u għall-persuni LGBTQI+, u nuqqas ta’ obbligu ta’ rendikont għall-abbużi; jappella għal standards vinkolanti ta’ sensittività għall-ġeneru, sistemi ta’ rappurtar komprensivi u politiki ta’ tolleranza żero fl-operazzjonijiet umanitarji kollha ffinanzjati mill-UE;

47.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà u lis-Servizz Ewropew għall-Azzjoni Esterna.