Rigress demokratiku3.Jikkundanna d-deterjorament tax-xenarju globali tad-drittijiet tal-bniedem u x-xejriet li b’mod ċar qed jaċċelleraw il-ksur u l-abbużi tad-drittijiet tal-bniedem u r-rigress demokratiku madwar id-dinja, bħall-ksur tad-drittijiet tan-nisa, l-eżekuzzjonijiet, il-qtil ekstraġudizzjarju, l-arresti u d-detenzjonijiet arbitrarji, it-tortura u t-trattament ħażin, il-vjolenza abbażi tal-ġeneru, it-trażżin tas-soċjetà ċivili, tal-avversarji politiċi, tal-gruppi emarġinati u vulnerabbli inklużi t-tfal u l-anzjani, l-migranti, r-rifuġjati u l-persuni li jfittxu ażil, u tal-minoranzi etniċi u reliġjużi;
4.Jisħaq li l-UE jeħtiġilha tkun imħejjija bis-sħiħ biex tiġġieled iż-żieda fl-awtoritarjaniżmu, it-totalitarjaniżmu u l-populiżmu, kif ukoll il-ksur dejjem aktar tal-prinċipji tal-universalità tad-drittijiet tal-bniedem, id-demokrazija u d-dritt umanitarju internazzjonali; jinnota li d-dritt għall-parteċipazzjoni f’elezzjonijiet ħielsa u ġusti jinsab taħt attakk minn reġimi awtoritarji, totalitarji u illiberali; jiddeplora l-fatt li qiegħed ikun hemm dejjem aktar ostakli għat-tgawdija sħiħa ta’ tali drittijiet f’għadd ta’ demokraziji maturi; jenfasizza li r-reġimi msemmija qabel iwettqu elezzjonijiet foloz bl-għan li jilleġittimizzaw is-setgħa tagħhom, peress li ma għandhomx kundizzjonijiet reali għall-kontestazzjoni, il-leġittimità u l-pluraliżmu;
5.Jenfasizza l-importanza li tiġi pprovduta edukazzjoni ta’ kwalità għall-bniet u li jiġu żgurati opportunitajiet ugwali bħala kundizzjonijiet essenzjali għall-għoti tas-setgħa lin-nisa u għall-eżerċitar sħiħ tad-drittijiet tagħhom; jisħaq li l-investiment fl-edukazzjoni tal-bniet globalment jagħti riżultati pożittivi għas-soċjetajiet għall-ġenerazzjonijiet li ġejjin; itenni l-ħtieġa ta’ edukazzjoni komprensiva, xierqa għall-età u bbażata fuq l-evidenza dwar is-sesswalità u r-relazzjonijiet, kemm fl-UE kif ukoll lil hinn minnha, il-ħtieġa li jiġu eliminati l-istereotipi marbuta mal-ġeneru u n-normi dannużi tas-soċjetà li jixprunaw l-inugwaljanzi;
6.Jisħaq fuq il-ħtieġa kritika li jiġu protetti d-drittijiet tan-nisa tqal, filwaqt li jiġi żgurat appoġġ komprensiv għas-saħħa, is-sikurezza u d-dinjità tagħhom;
7.Jisħaq fuq l-importanza tal-ġlieda kontra l-forom kollha ta’ sfruttament sesswali tan-nisa, inkluż it-traffikar għall-iskop ta’ sfruttament sesswali; jissottolinja l-ħtieġa li jiġu evitati u miġġielda l-legalizzazzjoni u n-normalizzazzjoni tal-prostituzzjoni, li jirriskjaw li jirrinfurzaw l-isfruttament, l-abbuż u l-kriminalità organizzata; jappella għal politiki effettivi ffukati fuq il-prevenzjoni, il-protezzjoni u l-appoġġ tal-vittmi, u l-prosekuzzjoni ta’ dawk li japprofittaw mill-isfruttament sesswali;
8.Itenni li l-istupru jibqa’ wieħed mill-aktar ksur tad-drittijiet tal-bniedem mifrux u jfakkar li l-istupru, definit abbażi ta’ nuqqas ta’ kunsens, jeħtieġ li jiġi kriminalizzat fl-ambitu tad-dritt tal-UE skont il-bażi legali eżistenti; jikkundanna bl-aktar mod qawwi l-użu tal-istupru u ta’ forom oħra ta’ vjolenza sesswali bħala arma tal-gwerra, u li dawn jintużaw biex jitterrorizzaw lill-popolazzjonijiet ċivili, irażżnu r-reżistenza u jeqirdu l-komunitajiet; ifakkar li tali atti jistgħu jikkostitwixxu delitti tal-gwerra, delitti kontra l-umanità, jew atti li jikkontribwixxu għal ġenoċidju skont id-dritt internazzjonali;
9.Jappella lill-UE u lill-atturi globali biex jiddenunzjaw prattiki bħall-mutilazzjoni ġenitali femminili, iż-żwieġ furzat u taħt l-età, u l-vjolenza u l-qtil ibbażati fuq l-“unur”; jappella għal azzjoni deċiżiva fl-UE kollha u globalment biex jiġi evitat it-traffikar tan-nisa u tal-bniet u jiġu appoġġjati l-vittmi ta’ vjolenza sesswali u abbażi tal-ġeneru;
10.Jisħaq li l-attakki ċibernetiċi, id-diżinformazzjoni u l-miżinformazzjoni, spiss użati bħala għodod ta’ ndħil barrani, inkluż matul il-perjodi elettorali, jikkontribwixxu għal din ix-xejra ta’ tnaqqis fid-demokrazija; jisħaq fuq is-sinifikat kritiku ta’ sorsi ta’ informazzjoni affidabbli, indipendenti u diversi u ta’ ġurnaliżmu ta’ kwalità mhux biss għat-trasparenza u għall-obbligu ta’ rendikont iżda wkoll għar-reżiljenza tal-istituzzjonijiet demokratiċi u l-parteċipazzjoni infurmata taċ-ċittadini fil-ħajja pubblika; jinsab għalhekk imħasseb ħafna dwar l-isfidi multidimensjonali dejjem akbar iffaċċjati mill-media indipendenti, inklużi l-attakki dejjem aktar kontra l-ġurnalisti u t-tnaqqis fil-finanzjament disponibbli; itenni li l-libertà tal-kelma hija dritt tal-bniedem, essenzjali għall-iżvilupp ta’ soċjetà pluralistika u demokratika; jikkundanna ż-żieda fiċ-ċensura, fit-tiskit u fil-fastidju tal-ġurnalisti, tad-DDB u tal-OSĊ fil-ħidma tagħhom permezz tal-applikazzjoni tal-hekk imsejħa liġijiet dwar aġenti barranin, kif ukoll miżuri leġiżlattivi u mhux leġiżlattivi oħra adottati minn reġimi awtoritarji u illiberali; jinnota li din l-imġiba fiha miżuri li jinkludu kawżi strateġiċi kontra l-parteċipazzjoni pubblika (SLAPPs), politiki restrittivi tal-gvern, repressjoni tranżnazzjonali, kampanji ta’ malafama, diskriminazzjoni, intimidazzjoni, detenzjoni arbitrarja u vjolenza, u din ikollha effett fit-tul fuq il-karriera u s-sikurezza tagħhom; jenfasizza f’dan ir-rigward, ir-rwol tal-verifikaturi tal-fatti fl-ambjent tal-media, li jiżguraw li l-pubbliku jista’ jafda l-informazzjoni li jirċievi;
11.Jissottolinja r-rwol essenzjali li s-soċjetà ċivili taqdi f’demokrazija li tiffunzjona tajjeb; jinsab estremament imħasseb dwar ir-restrizzjoni kontinwa tal-ispazju tas-soċjetà ċivili, iż-żieda fit-theddid għall-ħidma tad-DDB u tal-membri tal-OSĊ, kif ukoll il-familji, il-komunitajiet u l-avukati tagħhom, u jqis li l-fatt li l-mezzi użati għall-persekuzzjoni tagħhom huma dejjem aktar sofistikati huwa partikolarment ta’ tħassib; jikkundanna bil-qawwa d-detenzjonijiet u l-qtil arbitrarji tagħhom; jiddeplora l-azzjonijiet meħuda mill-gvernijiet madwar id-dinja biex jiċċekken l-ispazju ċiviku, bħal permezz tal-introduzzjoni ta’ leġiżlazzjoni mfassla apposta li għandha l-għan li tirrestrinġi l-finanzjament għall-organizzazzjonijiet nongovernattivi, inkluż il-finanzjament minn sorsi barranin, l-adozzjoni tal-hekk imsejħa liġijiet dwar aġenti barranin u l-użu ħażin tal-liġijiet kontra t-terroriżmu jew kontra l-korruzzjoni sabiex titrażżan il-libertà ta’ għaqda u jitrażżnu d-DDB; jiddenunzja r-repressjoni fuq dimostranti paċifiċi u fuq protesti u organizzazzjonijiet immexxija miż-żgħażagħ u mill-istudenti fid-dinja b’każijiet ta’ tortura u ta’ trattament ħażin li wasslu għal imwiet u ksur serju ieħor;
12.Jikkundanna l-ostruzzjoni tal-parteċipazzjoni indipendenti tas-soċjetà ċivili f’fora multilaterali, pereżempju permezz tal-istrumentalizzazzjoni ta’ NGOs affiljati mal-gvern u permezz ta’ intimidazzjoni u rappreżalji;
13.Jenfasizza l-ħidma kruċjali tad-DDB biex javvanzaw id-drittijiet tal-bniedem; jiddeplora, madankollu, l-attakki dejjem aktar fuq id-DDB; jikkundanna l-impunità li biha l-awturi jwettqu ksur kontra d-DDB, kemm fl-oqsma pubbliċi kif ukoll fl-oqsma privati; jinsisti fuq it-theddid partikolari ffaċċjat mid-difensuri nisa tad-drittijiet tal-bniedem u n-nuqqas ta’ rfigħ tar-responsabbiltà għal tali atti; jinnota ż-żieda fis-sofistikazzjoni tal-metodi użati biex jippersegwitawhom f’pajjiżhom u barra minnu, inkluż permezz ta’ diversi forom ta’ repressjoni u theddid tranżnazzjonali , inkluż permezz ta’ mezzi finanzjarji, sorveljanza, intimidazzjoni, fastidju diġitali, u detenzjoni politikament motivata ta’ dissidenti u attivisti barra mill-pajjiż;
14.Jenfasizza l-fatt li r-reġimi awtokratiċi u illiberali qed jieħdu dejjem aktar vantaġġ illegali mil-leġiżlazzjonijiet internazzjonali dwar il-finanzi u ċ-ċibersigurtà, bħal-liġijiet dwar il-Ġlieda Kontra l-Ħasil tal-Flus u l-Finanzjament tat-Terroriżmu jew l-istandards tat-Task Force ta’ Azzjoni Finanzjarja, biex jimmiraw lejn vuċijiet dissidenti u jiksbu data dwar l-imġiba tagħhom, anke fit-territorju tal-UE;
15.Jirrimarka li l-persuni LGBTIQ+ huma partikolarment vulnerabbli fi gwerra u fi spostamenti furzati, u jiffaċċjaw persekuzzjoni u vjolenza; jistieden lill-Kummissjoni u lis-Servizz Ewropew għall-Azzjoni Esterna (SEAE) jiżguraw li l-għajnuna esterna tal-UE tinkludi miżuri ta’ protezzjoni u ta’ salvagwardja f’dawn is-sitwazzjonijiet;
16.Jisħaq li matul kunflitt u spostamenti furzati, il-piż tal-indukrar jaqa’ b’mod sproporzjonat fuq in-nisa u l-bniet, u dan jillimita l-aċċess tagħhom għall-edukazzjoni, għall-impjiegi u għall-parteċipazzjoni politika; jappella biex l-għajnuna umanitarja tal-UE tinkludi miżuri li jappoġġjaw lill-indokraturi;
17.Iqis li filwaqt li l-użu ta’ teknoloġiji ġodda u emerġenti, bħall-intelliġenza artifiċjali (IA), għandu l-potenzjal li jtejjeb b’mod konsiderevoli l-benesseri tal-bniedem, l-applikazzjoni mingħajr restrizzjonijiet jew mingħajr distinzjoni tagħhom toħloq ukoll theddid serju għad-demokrazija u għad-drittijiet tal-bniedem, filwaqt li jfakkar li din it-trasformazzjoni tista’ tissawwar minn data preġudikata u tkun iggwidata minn algoritmi li spiss jirrinfurzaw id-diskriminazzjoni; jikkundanna l-użu ħażin u l-abbuż dejjem aktar minn reġimi awtoritarji tat-teknoloġija tal-għarfien tal-wiċċ, tas-sorveljanza diġitali tal-massa, tad-deepfakes u tal-kampanji ta’ diżinformazzjoni, taċ-ċensura tal-kontenut online, u tas-soppressjoni tal-informazzjoni, tal-attakki ċibernetiċi, tal-ksur tad-data, tal-operazzjonijiet ta’ influwenza online sponsorjati mill-Istat u tal-għadd dejjem akbar ta’ każijiet ta’ għeluq tal-internet bħala strumenti koerċittivi b’saħħithom; jenfasizza li l-għeluq tal-internet spiss jintuża minn reġimi awtoritarji biex isikktu d-dissidenza politika u jrażżnu l-libertà politika; jinnota, fin-nuqqas ta’ salvagwardji minimi robusti tad-drittijiet tal-bniedem, li hemm riskju li t-teknoloġiji rilevanti jiġu esportati lejn sistemi awtokratiċi, u b’hekk jiġi ffaċilitat ukoll il-ksur tad-drittijiet tal-bniedem f’pajjiżi oħra;
18.Jikkundanna l-mewġa ta’ oppożizzjoni f’diversi partijiet tad-dinja għall-ugwaljanza bejn il-ġeneri u d-drittijiet tan-nisa u tal-persuni LGBTIQ+; jisħaq li dawn ix-xejriet huma ta’ theddida għall-prinċipji fundamentali minquxa fit-Trattat dwar l-Unjoni Ewropea;
19.Jikkundanna bl-aktar mod qawwi l-attakki dejjem aktar fuq is-saħħa sesswali u riproduttiva u d-drittijiet relatati madwar id-dinja; jafferma mill-ġdid li ċ-ċaħda ta’ servizzi tas-saħħa sesswali u riproduttiva komprensivi ta’ kwalità, inkluż l-abort sikur u legali, tikkostitwixxi forma ta’ vjolenza abbażi tal-ġeneru;
20.Itenni t-tħassib tiegħu dwar il-ksur tad-dritt għal-libertà tal-ħsieb, tal-kuxjenza, tar-reliġjon u tat-twemmin, u ż-żieda globali fl-intolleranza lejn atturi u komunitajiet reliġjużi lokali; jiddeplora l-istrumentalizzazzjoni politika tal-identitajiet reliġjużi u l-esklużjoni tal-minoranzi reliġjużi, inkluż mill-parteċipazzjoni politika, kif ukoll l-attakki fuq siti kulturali u storiċi; jisħaq li l-libertà li wieħed jagħżel ir-reliġjon jew it-twemmin tiegħu hija dritt tal-bniedem li ma jistax jiġi kkastigat; jikkundanna, għalhekk, l-eżistenza u l-implimentazzjoni tal-hekk imsejħa liġijiet tal-apostażija u l-liġijiet tal-blasfemija li jwasslu għal pieni ħorox, trattament degradanti u, f’xi każijiet, saħansitra għal kundanni għall-mewt;
21.Jikkundanna l-prattika tal-maternità surrogata kummerċjali, li tista’ tinvolvi l-isfruttament riproduttiv u l-użu tal-ġisem tan-nisa għal gwadann finanzjarju jew gwadann ieħor, b’mod partikolari fil-każ ta’ nisa partikolarment vulnerabbli f’pajjiżi mhux tal-UE; jistieden lill-Kummissjoni tieħu miżuri biex tappoġġja l-indirizzar tal-prattika tal-maternità surrogata kummerċjali;
Il-multilateraliżmu 22.Jesprimi tħassib serju dwar il-kriżi globali persistenti tal-obbligu ta’ rendikont u jenfasizza l-ġlieda kontinwa biex tintemm l-impunità għall-ksur tad-drittijiet internazzjonali u fundamentali tal-bniedem u tad-dritt umanitarju internazzjonali fil-kunflitti madwar id-dinja; jafferma mill-ġdid in-newtralità essenzjali u r-rwol vitali tal-għajnuna umanitarja fis-sitwazzjonijiet kollha ta’ kunflitt u ta’ kriżi; jenfasizza r-riperkussjonijiet gravi meta l-organizzazzjonijiet multilaterali, inklużi n-NU, jiġu mminati u attakati, u dan joħloq riskju li jrawwem kultura ta’ impunità u jdgħajjef kemm il-fiduċja fis-sistema tan-NU kif ukoll l-effettività tagħha; jappella lill-UE biex tiddefendi l-qafas legali internazzjonali u timplimenta miżuri robusti biex tiżgura l-aderenza ma’ dawn il-liġijiet; jinsab imħasseb ħafna dwar il-fatt li l-ħidma tal-istituzzjonijiet multilaterali dwar id-drittijiet tal-bniedem u l-ordni multilaterali bbażat fuq ir-regoli qed tiffaċċja theddid u attakki bħal qatt qabel; jiddeplora bil-qawwa d-deċiżjoni meħuda minn xi pajjiżi li jirtiraw mill-Kunsill tad-Drittijiet tal-Bniedem tan-NU u t-tħabbiriet tagħhom li ma kinux se jipparteċipaw fl-Eżami Perjodiku Universali; jikkundanna t-tentattivi kostanti biex jiġu mminati u skreditati n-NU, is-Segretarju Ġenerali tagħhom, ir-Rapporteurs Speċjali tagħhom, u l-aġenziji tagħhom inklużi dawk li qegħdin jipprovdu għajnuna umanitarja, kif ukoll l-attakki fuq il-missjonijiet tagħhom għaż-żamma tal-paċi;
23.Itenni l-ħtieġa li l-UE u l-Istati Membri tagħha jitkellmu b’vuċi waħda fin-NU u f’fora multilaterali oħra sabiex jindirizzaw b’mod effettiv l-isfidi globali għad-drittijiet tal-bniedem u għad-demokrazija f’dawn il-fora u jappoġġjaw l-aktar lingwaġġ qawwi possibbli f’konformità mal-istandards internazzjonali tad-drittijiet tal-bniedem; jisħaq li l-ordni multilaterali attwali jeħtieġ li jinkorpora bis-sħiħ fl-arkitettura tiegħu l-atturi globali li jiffukaw fuq id-demokrazija u d-drittijiet tal-bniedem bħall-UE; jappella għalhekk lill-UE u lill-Istati Membri tagħha biex jaħdmu u jiżguraw siġġu permanenti għall-UE fil-fora multilaterali, b’mod partikolari fil-Kunsill tas-Sigurtà tan-Nazzjonijiet Uniti, flimkien mas-siġġijiet eżistenti tal-Istati Membri;
24.Jesprimi tħassib serju dwar l-attakki li qed jeskalaw fuq l-ordni internazzjonali bbażata fuq ir-regoli minn reġimi awtoritarji, totalitarji u illiberali, b’mod partikolari permezz tal-aggressjoni mhux provokata u mhux ġustifikata tagħhom kontra pajjiżi ġirien paċifiċi, kif ukoll permezz ta’ azzjonijiet immirati biex jimminaw il-funzjonament effettiv tal-korpi tan-Nazzjonijiet Uniti, inkluż l-użu ħażin tas-setgħa tal-veto fil-Kunsill tas-Sigurtà tan-NU;
25.Jistieden lill-Istati Membri u lis-sħab tal-istess fehma jiżviluppaw strateġija robusta, jintensifikaw l-isforzi tagħhom biex ireġġgħu lura din l-eskalazzjoni allarmanti u jibagħtu messaġġ ta’ appoġġ magħqud u qawwi lil dawk l-organizzazzjonijiet meta jiġu attakkati jew mhedda; iqis li n-NU, il-korpi kostitwenti tagħhom u organizzazzjonijiet multilaterali oħra jirrikjedu riforma biex jirreaġixxu b’mod effettiv għal dawn l-isfidi u t-theddid dejjem akbar;
26.Jinnota li din id-devjazzjoni minn approċċ multilaterali għall-ordni globali ma toħloqx biss theddida għar-riżoluzzjoni effettiva tal-kriżijiet attwali, iżda wkoll tagħmel it-tifqigħa ta’ kriżijiet ġodda aktar probabbli; jissottolinja li s-sistema multilaterali, bin-NU u fora multilaterali oħra fil-qalba tagħha, tibqa’ l-aktar mod effettiv biex jiġu avvanzati l-isforzi għall-paċi u s-sigurtà, ir-rispett għad-drittijiet tal-bniedem u biex jiġu indirizzati l-isfidi globali b’mod ġust, sostenibbli u bbażat fuq il-prinċipji; ifaħħar ir-rwol tan-NU fir-rigward tal-promozzjoni tad-drittijiet tal-bniedem, ir-riżoluzzjoni tal-kunflitti u l-governanza globali, b’mod partikolari fiż-żoni ta’ kunflitt;
27.Jenfasizza li d-diżrispett dejjem akbar għad-dritt internazzjonali u l-politiċizzazzjoni tad-dibattiti li jikkonċernaw l-istituzzjonijiet tal-ġustizzja internazzjonali, bħall-QIĠ u l-QKI, joħolqu theddida eżistenzjali għall-ordni globali bbażat fuq ir-regoli; jesprimi t-tħassib serju tiegħu dwar iż-żieda fid-diżrispett għad-dritt umanitarju internazzjonali u għad-dritt internazzjonali dwar id-drittijiet tal-bniedem u l-polarizzazzjoni madwarhom; jiddeplora t-theddid bħal qatt qabel iffaċċjat mill-QKI, b’mod partikolari minħabba l-impożizzjoni ta’ sanzjonijiet fuq l-imħallfin u l-persunal tagħha; ifakkar li d-dritt internazzjonali u l-awtoritajiet legali indipendenti kompetenti huma essenzjali biex tiġi rispettata l-ġustizzja internazzjonali, jiġi żgurat l-obbligu ta’ rendikont u l-ġlieda kontra l-impunità, li huma prekundizzjonijiet meħtieġa ta’ kwalunkwe proċess ta’ rikonċiljazzjoni u paċi sostnuta;
28.Jissottolinja li l-Istati Membri kollha tal-UE, bħala partijiet tal-Istatut ta’ Ruma, huma legalment obbligati jinfurzaw il-mandati ta’ arrest tal-QKI; billi kwalunkwe deċiżjoni li tinjora dawn l-obbligi jew li tirtira mill-QKI tikser l-acquis tal-UE u timmina l-ordni internazzjonali bbażata fuq ir-regoli;
29.Itenni l-appoġġ qawwi tal-UE għall-Qorti Ewropea tad-Drittijiet tal-Bniedem; iħeġġeġ lill-Istati firmatarji kollha għall-Konvenzjoni Ewropea dwar id-Drittijiet tal-Bniedem jirrispettaw bis-sħiħ id-deċiżjonijiet tal-Qorti;
30.Jinnota bi tħassib li xi pajjiżi ripetutament ippruvaw jinkorporaw terminoloġiji u kunċetti fil-Kunsill tad-Drittijiet tal-Bniedem li fl-aħħar mill-aħħar iwasslu għar-relativizzazzjoni tal-obbligu ta’ rendikont; jappella lill-UE u lill-Istati Membri tagħha biex jiżguraw li joġġezzjonaw b’mod sistematiku għal tali frażijiet;
31.Jesprimi tħassib serju dwar is-sitwazzjoni tad-drittijiet tal-bniedem f’territorji okkupati illegalment, inkluż fit-territorju tal-UE, u f’każijiet ta’ kunflitti fit-tul u kunflitti ffriżati u inviżibbli multipli, u jappella għal miżuri effettivi bl-għan li jiġu pprevenuti abbużi gravi tad-drittijiet tal-bniedem fuq il-post;
Rakkomandazzjonijiet55.Jappella biex l-UE tuża l-għodod għad-dispożizzjoni tagħha biex tiġġieled l-isfidi dejjem akbar għall-multilateraliżmu bl-għan li tiżgura li l-ħidma tal-istituzzjonijiet internazzjonali tkompli tiġi rispettata; jappella lill-UE u lill-Istati Membri tagħha jżidu l-appoġġ tagħhom għall-ħidma tan-NU u tal-aġenziji kollha tagħhom, kemm politikament kif ukoll finanzjarjament, inkluż fir-riforma tagħhom, biex jiżguraw li tkun adattata għall-iskop tagħha, jikkumbattu l-influwenza tar-reġimi awtoritarji u totalitarji u jiżguraw il-kontinwazzjoni tal-multilateraliżmu bħala l-bażi tal-governanza globali; jappella lill-UE biex tespandi l-appoġġ u l-isforzi ta’ finanzjament tagħha stess bħala kontrobilanċ għall-pressjoni politikament motivata u bħala salvagwardja għal proċeduri indipendenti; itenni l-ħtieġa li l-UE u l-Istati Membri tagħha jitkellmu b’vuċi waħda fil-fora multilaterali; jappella biex id-delegazzjonijiet tal-UE jkollhom rwol aktar qawwi fil-fora multilaterali, li għalihom għandu jkollhom riżorsi xierqa;
56.Jappella biex il-ħidma tar-RSUE tiġi appoġġjata b’aktar riżorsi u koordinazzjoni aħjar mad-delegazzjonijiet tal-UE madwar id-dinja, u jenfasizza li t-trasparenza u l-viżibbiltà limitati – bħan-nuqqas ta’ rapportar pubbliku dwar iż-żjarat fil-pajjiżi, il-programm ta’ ħidma u l-prijoritajiet, jew in-nuqqas ta’ sit web iddedikat – jistgħu jxekklu l-iskrutinju u l-obbligu ta’ rendikont; jiddeplora, minkejja talbiet kontinwi, l-esklużjoni tal-Parlament mill-proċess tal-għażla tar-RSUE u jappella biex din il-prattika tiġi riveduta;
57.Jistieden lill-Kummissjoni tiżgura l-ħatra f’waqtha tal-Mibgħut Speċjali tal-UE għal-Libertà tar-Reliġjon jew tat-Twemmin; jissottolinja l-importanza li l-Mibgħut Speċjali jingħata kontinwità, riżorsi u viżibbiltà adegwati biex jippromwovi b’mod effettiv il-libertà tar-reliġjon jew tat-twemmin madwar id-dinja; jisħaq li r-rapportar regolari lill-Parlament Ewropew ikompli jsaħħaħ it-trasparenza u l-kooperazzjoni f’dan il-qasam;
58.Jappella għall-abolizzjoni tal-liġijiet tal-apostażija u tal-liġijiet tal-blasfemija; jappella lill-UE u lill-Istati Membri tagħha biex jintensifikaw l-isforzi bil-għan li jipproteġu l-libertà tal-ħsieb, tal-kuxjenza, tar-reliġjon jew tat-twemmin, iqajmu l-kwistjoni fil-fora tan-NU, u jikkonsolidaw ir-rapporti mid-delegazzjonijiet tal-UE dwar il-kwistjoni; jistieden lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lis-SEAE u lill-Kummissjoni iqajmu b’mod sistematiku l-każ tal-persekuzzjoni tal-minoranzi reliġjużi fid-djalogi politiċi u dwar id-drittijiet tal-bniedem u jiżguraw rispett sħiħ għal-libertà tal-ħsieb, tal-kuxjenza, tar-reliġjon jew tat-twemmin; jistieden lill-Kunsill jagħmel użu mir-Reġim Globali ta’ Sanzjonijiet tal-UE b’rabta mad-Drittijiet tal-Bniedem kontra individwi u entitajiet responsabbli għall-ksur serju tal-libertà tar-reliġjon jew tat-twemmin; jitlob li s-SEAE jidentifika l-pajjiżi prijoritarji għal azzjoni tal-UE dwar il-libertà tar-reliġjon jew tat-twemmin u kull sena jirrapporta lill-Parlament dwar il-progress;
59.Iħeġġeġ lill-Istati Membri kollha tal-UE, bħala Stati Partijiet għall-Karta tan-NU, l-Istatut ta’ Ruma u l-Konvenzjoni Ewropea dwar id-Drittijiet tal-Bniedem, biex jirrispettaw bis-sħiħ id-deċiżjonijiet tal-qrati internazzjonali kompetenti, inkluża l-QEDB; jappella lill-UE tħeġġeġ lill-pajjiżi mhux tal-UE, inklużi s-sħab ewlenin tagħha u l-pajjiżi kandidati u l-pajjiżi kandidati potenzjali, biex jissieħbu mal-Istatut ta’ Ruma; jappella lill-UE u lill-Istati Membri tagħha biex ikomplu l-appoġġ tagħhom għall-QKI u jintensifikawh bil-mezzi meħtieġa, inklużi riżorsi u appoġġ politiku; iħeġġeġ lill-Istati Membri kollha jirrispettaw u jiddefendu l-azzjonijiet u d-deċiżjonijiet tal-organi kollha tal-QKI, inkluż billi jinfurzaw il-mandati ta’ arrest tal-QKI; jesiġi l-protezzjoni tal-QKI, tal-uffiċjali tagħha u ta’ dawk li jikkooperaw magħha mit-theddid u mill-attakki u f’dak is-sens itenni t-talba tiegħu lill-Kummissjoni biex tattiva b’mod urġenti l-istatut ta’ mblukkar bl-għan li tipproteġi lill-QKI mill-konsegwenzi tas-sanzjonijiet u tippermetti l-operat kontinwu tagħha b’indipendenza sħiħa; jistieden lill-Istati Membri japplikaw ġuriżdizzjoni universali fil-ġlieda kontra l-impunità;
60.Jistieden lill-Kummissjoni u lis-SEAE jadottaw Pjan ta’ Azzjoni ġdid dwar l-Ugwaljanza bejn il-Ġeneri wara l-2027 li se jindirizza l-ħtieġa ta’ aktar appoġġ għall-ugwaljanza bejn il-ġeneri u għad-drittijiet tan-nisa u li se jindirizza speċifikament il-vjolenza abbażi tal-ġeneru u l-ħtieġa ta’ approċċ sensittiv għall-ġeneru għall-għajnuna umanitarja;
61.Jappella lill-UE u lill-Istati Membri tagħha biex jipproponu l-inklużjoni tal-“apartheid tal-ġeneru” bħala delitt kontra l-umanità sabiex dawk responsabbli jerfgħu r-responsabbiltà għal għemilhom; jappella għal appoġġ qawwi għad-definizzjoni tal-apartheid tal-ġeneru proposta mill-grupp ta’ ħidma tan-NU dwar id-diskriminazzjoni kontra n-nisa u l-bniet;
62.Jappella għall-protezzjoni taċ-ċivili f’kull mument waqt kunflitti armati u għall-ħolqien ta’ kurituri umanitarji, meta jkun meħtieġ, sabiex iċ-ċivili jkunu jistgħu jaħarbu mill-kunflitti, u jikkundanna bil-qawwa kwalunkwe attakk fuqhom; jappella għal protezzjoni aktar effettiva tal-ġurnalisti u tad-difensuri tad-drittijiet tal-bniedem waqt kunflitti armati, peress li huma partikolarment fil-mira minħabba l-ħidma tagħhom fejn jiddokumentaw l-abbużi tad-drittijiet tal-bniedem; jenfasizza li l-ommijiet u t-tfal jinsabu f’riskju akbar ta’ tbatija tal-ġuħ u tal-malnutrizzjoni;
63.Jappella biex il-parteċipazzjoni tan-nisa u tal-irġiel b’diżabbiltà titqies fit-tfassil ta’ infrastruttura sikura u aċċessibbli matul il-proċessi ta’ rikostruzzjoni wara kunflitti armati jew diżastri naturali;
64.Jistieden lill-Kummissjoni u lis-SEAE jistabbilixxu indikaturi u skedi ta’ żmien ċari fil-pjan ta’ azzjoni tal-UE għal wara l-2027 dwar id-drittijiet tal-bniedem u d-demokrazija biex jitkejjel is-suċċess, tissaħħaħ il-koerenza bejn l-azzjonijiet interni u esterni tal-UE u jiġu speċifikati konnessjonijiet aħjar bejn il-prijoritajiet kif iddikjarat fil-pjan ta’ azzjoni u parametri referenzjarji aktar stretti;
65.Jistieden lill-Kummissjoni u lis-SEAE jinvolvu lis-soċjetà ċivili b’mod aktar inklużiv u jqisu aħjar ir-riżultati tal-konsultazzjonijiet meta jiżviluppaw u jimplimentaw il-politika esterna tagħha dwar id-drittijiet tal-bniedem, inklużi l-konsultazzjonijiet ma’ atturi lokali li jkunu l-eqreb għall-livell ta’ implimentazzjoni;
66.Jappella għal baġit allokat b’mod ċar għad-drittijiet tal-bniedem, id-demokrazija u l-istat tad-dritt fil-QFP futur, b’miri ċari għall-ugwaljanza bejn il-ġeneri li jkollhom appoġġ ta’ finanzjament adegwat għall-iżvilupp ta’ strutturi demokratiċi u għat-tkabbir tal-media ħielsa, inkluż f’pajjiżi ġirien; jisħaq li l-baġit tal-UE jeħtieġ ukoll li jiġi protett fid-dimensjoni esterna tiegħu minħabba li jipprovdi ingranaġġ importanti biex tinkiseb konformità akbar mad-drittijiet tal-bniedem u mal-istandards demokratiċi mill-pajjiżi sħab; jappella, għalhekk, għal klawżoli infurzabbli dwar id-drittijiet tal-bniedem u għal klawżoli robusti dwar id-demokrazija biex jiġu introdotti fl-istrument il-ġdid Ewropa Globali għall-finanzjament ta’ pajjiżi sħab mhux tal-UE; jappella għal qafas ta’ kundizzjonalità operazzjonali li japplika, fost l-oħrajn, għall-assistenza makrofinanzjarja, għall-preferenzi kummerċjali u għall-faċilitazzjoni tal-viżi, b’parametri referenzjarji ċari u mekkaniżmi legali infurzabbli biex tiġi żgurata l-konformità, inklużi klawżoli ta’ sospensjoni f’każijiet ta’ ksur persistenti;
67.Jinsisti li l-pajjiżi mhux tal-UE li jirċievu appoġġ mill-UE fl-oqsma tad-drittijiet tal-bniedem, tal-istat tad-dritt, jew tal-iżvilupp tas-soċjetà ċivili jeħtiġilhom jistabbilixxu istituzzjonijiet nazzjonali indipendenti tad-drittijiet tal-bniedem, bħall-uffiċċji tal-ombudspersons, f’konformità mal-Prinċipji ta’ Pariġi; jisħaq li l-preżenza ta’ tali istituzzjonijiet għandha tkun prerekwiżit għall-eliġibbiltà għall-finanzjament;
68.Jistieden lis-sħab istituzzjonali tal-UE tiegħu jesploraw toroq ġodda biex itejbu t-teħid ta’ deċiżjonijiet, inkluża l-votazzjoni b’maġġoranza kwalifikata, u, meta jintużaw approċċi aktar flessibbli, bħall-approċċ ta’ Tim Ewropa, jiżguraw li d-drittijiet tal-bniedem ikunu garantiti biżżejjed;
69.Jappella biex jiġu rinfurzati d-djalogi dwar id-drittijiet tal-bniedem permezz ta’ parametri referenzjarji u riżultati ċari sabiex il-progress ikun jista’ jitfassal u jiġi vvalutat b’mod ċar matul kull ċiklu rispettiv ta’ djalogu; jappella għall-involviment sistematiku u sinifikattiv tal-atturi tas-soċjetà ċivili fi djalogi dwar id-drittijiet tal-bniedem u s-segwitu għalihom;
70.Jappella biex tiżdied il-viżibbiltà ta’ dawn id-djalogi u l-eżiti tagħhom, inkluż il-pubblikazzjoni ta’ dikjarazzjonijiet konġunti għall-istampa, u li dawn id-djalogi jkunu orjentati lejn ir-riżultati jew ibbażati fuq parametri referenzjarji ċari li jippermettu l-monitoraġġ effettiv, inkluża konsultazzjoni ex ante u ex post ma’ organizzazzjonijiet ġenwini tas-soċjetà ċivili;
71.Jappella għal kollaborazzjoni msaħħa mal-Parlament fil-proċess ta’ deliberazzjoni li jwassal għad-djalogi; jisħaq, barra minn hekk, fuq il-ħtieġa li l-UE tkompli tapplika pressjoni biex id-djalogi jinżammu fil-kwartieri ġenerali tal-UE; iqis li s-soċjetà ċivili u l-istituzzjonijiet nazzjonali tad-drittijiet tal-bniedem għandu jkollhom rwol distint fil-monitoraġġ tal-progress tal-implimentazzjoni ta’ dawn il-miri;
72.Jappella lill-UE biex issegwi l-istabbiliment ta’ strumenti Ewropej u internazzjonali bil-għan li tiggarantixxi aċċess għall-ġustizzja u rimedji effettivi għall-persuni affettwati minn abbużi tad-drittijiet tal-bniedem mill-korporazzjonijiet; jappella għall-implimentazzjoni effettiva u bir-reqqa tar-regoli attwali tal-UE dwar imġiba korporattiva responsabbli fir-rigward tad-drittijiet tal-bniedem, tax-xogħol u tal-ambjent bħal-leġiżlazzjoni tal-UE dwar id-diliġenza dovuta; jisħaq fuq il-ħtieġa li jiġu stabbiliti politiki u mekkaniżmi tal-UE li huma kapaċi jirrikkonċiljaw b’mod effettiv ir-rekwiżiti tat-tranżizzjoni sostenibbli mar-rispett għall-għajxien tal-komunitajiet lokali; jappella lill-UE biex tippromwovi u tipproteġi l-komunitajiet lokali u d-drittijiet tal-popli indiġeni fil-politika barranija tagħha;
73.Jappella lill-UE biex timpenja ruħha b’mod sod għall-implimentazzjoni tal-Ftehim ta’ Pariġi u ssaħħaħ il-kooperazzjoni internazzjonali dwar il-klima; jisħaq fuq l-importanza li jiġu indirizzati l-implikazzjonijiet tat-tibdil fil-klima għall-paċi u s-sigurtà fl-ogħla livell;
74.Jappella lill-UE biex tivvaluta l-effettività tas-sett ta’ għodod bil-għan li jiġu indirizzati l-kampanji ta’ diżinformazzjoni kontra l-UE, b’mod partikolari f’pajjiżi li jirċievu mill-UE assistenza sinifikanti umanitarja u għall-iżvilupp u f’pajjiżi kandidati għas-sħubija fl-UE; jappella b’mod urġenti lill-UE biex tappoġġja organi tax-xandir u tal-informazzjoni affidabbli li jippromwovu l-obbligu ta’ rendikont tal-awtoritajiet u jappoġġjaw tranżizzjonijiet demokratiċi, filwaqt li jisħaq fuq il-ħtieġa li jitħarsu l-prinċipji tal-pluraliżmu, tat-trasparenza u tal-indipendenza;
75.Jilqa’ d-direttiva mfassla biex tipproteġi lill-ġurnalisti u lid-DDB minn azzjonijiet legali abbużivi u SLAPPs; iħeġġeġ lil min ifassal il-liġi fil-pajjiżi mhux tal-UE biex jiżviluppa leġiżlazzjoni bl-istess għan, bħala parti minn sforzi usa’ għall-promozzjoni u l-protezzjoni tal-libertà u l-pluraliżmu tal-media; jitlob li l-attakki fuq il-libertà tal-media, kif ukoll it-tnawwir persistenti u sistematiku tad-dritt għall-informazzjoni, jitqiesu fil-monitoraġġ mill-UE tal-konformità tal-ftehimiet internazzjonali;
76.Jissottolinja l-importanza li jiġu indirizzati d-diżinformazzjoni dwar il-ġeneri u l-fastidju online immirati lejn in-nisa attivi fil-politika, fil-ġurnaliżmu u fis-soċjetà ċivili, li għandhom l-għan li jsikktu d-dissens, jimminaw il-parteċipazzjoni demokratika u jxerrdu narrattivi kontra l-UE; jisħaq li l-istrument għandu jinkludi obbligi vinkolanti għall-prevenzjoni, għall-mitigazzjoni u għar-rimedju tal-impatti speċifiċi għall-ġeneru fuq id-drittijiet tal-bniedem; jappella għal kontromiżuri proporzjonati u effettivi u għodod ta’ monitoraġġ imtejba biex jipprevjenu, jesponu u jirreaġixxu għal tali fenomeni, filwaqt li jissalvagwardjaw id-drittijiet fundamentali u l-libertà tal-espressjoni; jappella għal miżuri ta’ appoġġ u protezzjoni ddedikati biex tiġi żgurata s-sikurezza tal-ġurnalisti, l-attivisti u l-politiċi nisa online u offline;
77.Jappella għall-promozzjoni tal-libertà akkademika bħala komponent ewlieni ta’ soċjetajiet miftuħa u demokratiċi;
78.Jistieden lill-Kummissjoni u lill-Istati Membri jirrikonoxxu r-repressjoni tranżnazzjonali bħala theddida speċifika għad-drittijiet tal-bniedem, jistabbilixxu sistemi biex jintraċċawha, jiddokumentawha u jindirizzawha, jipprovdu taħriġ u riżorsi għall-infurzar tal-liġi, u jiżguraw li l-awturi jinżammu responsabbli għal għemilhom, inklużi l-uffiċjali u l-aġenti ta’ pajjiżi mhux tal-UE u l-faċilitaturi lokali; jisħaq li r-reazzjonijiet tal-UE għandhom jintegraw dawn ix-xejriet fil-linji gwida dwar id-drittijiet tal-bniedem u l-kooperazzjoni internazzjonali;
79.Jappoġġja lill-UE u lill-Istati Membri tagħha jkomplu u jsaħħu l-appoġġ tagħhom għad-difensuri tad-drittijiet tal-bniedem u jadottaw salvagwardji regolatorji adegwati fl-UE biex jiġġieldu r-repressjoni tranżnazzjonali;
80.Ifakkar li l-pożizzjoni ewlenija tal-UE fir-rigward tal-IA u tad-diplomazija diġitali hija kruċjali biex jiġu promossi mudelli li jiżguraw standards għoljin tad-drittijiet tal-bniedem, kif ukoll għar-rilevanza u r-reżiljenza tagħha; jistieden, f’dan ir-rigward, lill-UE żżid id-diplomazija diġitali u tal-IA tagħha, tinforza l-Att dwar is-Servizzi Diġitali Ir-Regolament (UE) 2022/2065 tal-Parlament Ewropew u tal-Kunsill tad-19 ta’ Ottubru 2022 dwar Suq Uniku għas-Servizzi Diġitali u li jemenda d-Direttiva 2000/31/KE (l-Att dwar is-Servizzi Diġitali) (ĠU L 277, 27.10.2022, p. 1, ELI: http://data.europa.eu/eli/reg/2022/2065/oj). u tiżgura li l-kumpaniji tat-teknoloġija u l-pjattaformi tal-media soċjali jikkonformaw mal-obbligi tad-drittijiet tal-bniedem u jindirizzaw ir-repressjoni tranżnazzjonali, inkluż kontra d-DDB; jappella lill-UE u lill-Istati Membri tagħha biex jiżguraw li l-atturi li qed jippermettu r-repressjoni diġitali tranżnazzjonali, b’mod partikolari fis-settur tat-teknoloġija, jinżammu responsabbli;
81.Itenni l-importanza tal-Missjonijiet ta’ Osservazzjoni Elettorali tal-UE għall-evalwazzjoni indipendenti u imparzjali tal-proċessi elettorali li jimmonitorjaw, minħabba dejjem akbar indħil minn xi stati fl-elezzjonijiet ta’ pajjiżi oħra permezz ta’ tattiċi ibridi inkluż l-użu tal-intelliġenza artifiċjali; jistieden lis-SEAE u lill-Kummissjoni janalizzaw l-inizjattivi tagħhom u jirrapportaw dwarhom lill-Parlament biex jindirizzaw l-isfidi maħluqa mill-IA fil-proċessi elettorali; jappella għall-protezzjoni tal-osservaturi elettorali internazzjonali; jappella għal segwitu għall-adozzjoni u għall-implimentazzjoni tar-rakkomandazzjonijiet ta’ dawn il-missjonijiet ta’ osservazzjoni elettorali f’pajjiżi mhux tal-UE, u li dawn jiġu inklużi bħala element ewlieni fil-qafas tar-relazzjonijiet bejn l-UE u l-pajjiż mhux tal-UE inkwistjoni; jenfasizza l-kontribut tal-Parlament għal dawn il-missjonijiet bħala dimensjoni essenzjali tal-azzjoni esterna tiegħu, kif ukoll għall-iżvilupp u t-tisħiħ tal-metodoloġija tagħhom; jinnota li l-pajjiżi qed jirrifjutaw dejjem aktar li jistiednu lill-UE biex tosserva l-elezzjonijiet tagħhom u jistieden lis-SEAE jindirizza din is-sitwazzjoni; jilqa’ l-ħidma tal-Fond Ewropew għad-Demokrazija u jtenni l-ħtieġa li jkomplu jissaħħu l-ħidma u r-riżorsi tiegħu; jappella għal aktar appoġġ finanzjarju mill-UE biex jiġu organizzati l-missjonijiet elettorali;
82.Jappella biex jissaħħu l-isforzi u tiġi garantita l-parteċipazzjoni pubblika tal-minoranzi, kif ukoll biex tiżdied ir-rappreżentanza tan-nisa u taż-żgħażagħ fil-proċessi elettorali;
83.Itenni l-kundanna tiegħu tal-forom kollha ta’ razziżmu, intolleranza, antisemitiżmu, Iżlamofobija, persekuzzjoni tal-Insara, ksenofobija u diskriminazzjoni abbażi tar-razza, l-etniċità, in-nazzjonalità, il-klassi soċjali, id-diżabbiltà, il-kasta, ir-reliġjon, it-twemmin, l-età, l-orjentazzjoni sesswali jew l-identità tal-ġeneru; jappella biex jiġu adottati jew biex jissaħħu l-mekkaniżmi għar-rapportar ta’ mġiba diskriminatorja, kif ukoll biex jiġu aċċessati rimedji legali effettivi, sabiex tintemm l-impunità ta’ dawk li jkunu involuti f’tali atti;
84.Jiddispjaċih li, filwaqt li l-Kristjaneżmu għadu r-reliġjon l-aktar ippersegwitata fid-dinja llum, b’aktar minn 380 miljun persuna milquta, ma hemm l-ebda koordinatur Ewropew responsabbli għall-ġlieda kontra l-Kristjanofobija, minkejja li nħatar koordinatur għall-ġlieda kontra l-Iżlamofobija;
85.Itenni l-istedina tiegħu lill-Kunsill biex jadotta mandat ambizzjuż mill-aktar fis possibbli biex l-UE tinvolvi ruħha fin-negozjati li għaddejjin dwar strument legalment vinkolanti tan-NU li jżomm lill-kumpaniji responsabbli għall-ksur tagħhom tad-drittijiet tal-bniedem; jappella lill-UE tiżgura l-allinjament tal-leġiżlazzjoni tal-UE u dik nazzjonali mal-istandards internazzjonali tad-drittijiet tal-bniedem u ssaħħaħ il-kollaborazzjoni ma’ reġjuni u organizzazzjonijiet globali oħra;
86.Jappella għall-implimentazzjoni sistematika tal-valutazzjonijiet ex ante u ex post tad-drittijiet tal-bniedem u għall-inklużjoni ta’ klawżoli robusti u infurzabbli dwar id-drittijiet tal-bniedem fi ftehimiet bejn l-UE u pajjiżi mhux tal-UE, liema klawżoli jkunu appoġġjati minn sett ċar ta’ parametri referenzjarji u proċeduri li għandhom jiġu segwiti f’każ ta’ ksur; jistieden lill-Kummissjoni u lis-SEAE jiżguraw li l-klawżoli dwar id-drittijiet tal-bniedem fil-ftehimiet internazzjonali attwali jiġu mmonitorjati b’mod attiv u infurzati b’mod effettiv, inkluż bis-sospensjoni, u li jtejbu l-komunikazzjoni tagħhom mal-Parlament dwar kunsiderazzjonijiet u deċiżjonijiet rigward dan l-infurzar; itenni li f’każ ta’ ksur persistenti tal-klawżoli tad-drittijiet tal-bniedem mill-pajjiżi sħab tal-UE, inkluż dawk fl-iskema tal-SĠP+, l-UE għandha tieħu azzjoni malajr u b’mod deċiżiv, anke billi tissospendi l-ftehimiet ikkonċernati jekk għażliet oħra jirriżultaw ineffettivi;
87.Jappella għall-ħolqien ta’ portal biex jiġu trattati l-ilmenti, fil-qafas tal-istrumenti kummerċjali u finanzjarji tal-UE, possibbilment permezz tal-adattament tal-Punt Uniku ta’ Servizz tal-Kummissjoni biex jippermetti li l-ilmenti rigward in-nuqqasijiet ta’ konformità mal-klawżoli tad-drittijiet tal-bniedem jiġu ppreżentati; jisħaq li dan il-portal għandu jkun aċċessibbli, faċli għaċ-ċittadini u trasparenti, u miftuħ għaċ-ċittadini tal-pajjiżi mhux tal-UE;
88.Jinkoraġġixxi l-monitoraġġ u l-valutazzjoni bir-reqqa tal-kapaċità tad-delegazzjonijiet tal-UE li jiżguraw li kollha kemm huma għandhom punt ta’ kuntatt deżinjat għal każijiet ta’ ksur tad-drittijiet tal-bniedem, b’riżorsi suffiċjenti biex jippermetti rispons effettiv u f’waqtu; jirrakkomanda wkoll li l-persunal tad-delegazzjoni tal-UE jitħarreġ regolarment dwar il-linji gwida eżistenti tal-UE relatati ma’ kwistjonijiet speċifiċi tad-drittijiet tal-bniedem; jesiġi li l-ambaxxati tal-Istati Membri jinvolvu ruħhom biex jiddefendu u jippromwovu d-drittijiet tal-bniedem billi jsemmgħu l-vuċi tagħhom f’pajjiżi mhux tal-UE, filwaqt li jappoġġjaw b’mod attiv ir-rwol tad-delegazzjonijiet tal-UE;
89.Jenfasizza li, f’ħafna reġjuni tad-dinja, l-intrapriżi mikro, żgħar u medji (MSMEs) spiss huma l-forza mexxejja tal-ekonomiji lokali, u qed jiżdied l-għadd ta’ nisa li jmexxuhom; jissottolinja li l-MSMEs jirrappreżentaw 90 % tan-negozji, 60 % sa 70 % tal-impjiegi u 50 % tal-prodott domestiku gross madwar id-dinja; jenfasizza l-importanza tal-MSMEs biex jikkontribwixxu għall-Aġenda 2030 u jiksbu l-Għanijiet ta’ Żvilupp Sostenibbli, jiġifieri dawk dwar il-qerda tal-faqar u l-kundizzjonijiet tax-xogħol deċenti għal kulħadd;
90.Itenni t-talba tiegħu biex tingħata prijorità lill-ġlieda kontra l-korruzzjoni bħala fattur li jiffaċilita l-attakki fuq id-drittijiet tal-bniedem u d-demokrazija; iħeġġeġ lill-Kunsill biex finalment jadotta reġim ta’ sanzjonijiet kontra l-korruzzjoni, u dan ilu prijorità tal-Parlament għal żmien twil;
91.Jappella lill-UE biex tintensifika l-impenn diplomatiku ma’ pajjiżi li għadhom jipprattikaw il-piena tal-mewt, li hija inkompatibbli mad-dritt għall-ħajja u mal-projbizzjoni tat-tortura, filwaqt li tħeġġeġ id-djalogu u l-kooperazzjoni dwar kwistjonijiet tad-drittijiet tal-bniedem u tipprovdi appoġġ għall-iżvilupp ta’ riformi ġudizzjarji li jistgħu jwasslu għall-abolizzjoni tagħha;
92.Jappella lill-UE taġġorna l-kamp ta’ applikazzjoni tar-Regolament Kontra t-Tortura Ir-Regolament (UE) 2019/125 tal-Parlament Ewropew u tal-Kunsill tas-16 ta’ Jannar 2019 dwar il-kummerċ ta’ ċerti oġġetti li jistgħu jintużaw għall-piena kapitali, it-tortura jew trattament jew pieni krudili, inumani jew degradanti oħra (ĠU L 30, 31.1.2019, p. 1). http://data.europa.eu/eli/reg/2019/125/oj). biex jirrifletti l-bidliet fis-suq tas-sigurtà internazzjonali, il-bidliet fl-użu u l-użu ħażin tat-tagħmir tal-infurzar tal-liġi, kif ukoll l-isfidi emerġenti, b’mod partikolari t-tortura mhux relatata mal-kustodja u t-trattament ħażin waqt ir-repressjoni ta’ protesti paċifiċi; jappella lill-UE biex tippromwovi l-konformità mal-Konvenzjoni ta’ Ġinevra dwar il-Priġunieri tal-Gwerra;
93.Jappella biex jiġu rinfurzati l-inizjattivi tal-UE bil-għan li tiġġieled kontra t-traffikar tal-bnedmin b’enfasi fuq l-identifikazzjoni bikrija, il-protezzjoni ċċentrata fuq il-vittmi (inklużi t-tfal), u t-tfixkil finanzjarju tan-networks;
94.Jissottolinja li biex jiġi sfruttat il-potenzjal sħiħ tal-Linji Gwida tal-UE dwar id-DDB hija meħtieġa implimentazzjoni rigoruża, kif ukoll reviżjoni komprensiva biex jiġi indirizzat il-livell dejjem aktar ta’ sofistikazzjoni fil-persekuzzjoni u l-fastidju tad-DDB, inklużi t-theddid diġitali u r-repressjoni tranżnazzjonali;
95.Jappella għall-użu estiż tal-Reġim Globali ta’ Sanzjonijiet b’rabta mad-Drittijiet tal-Bniedem tal-UE – l-Att Magnitsky tal-UE biex jiġu ssanzjonati individwi li jippersegwitaw jew jagħtu fastidju lid-DDB, inklużi d-difensuri tad-drittijiet tal-ambjent u tal-art;
°
° °
96.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lir-Rappreżentant Speċjali tal-Unjoni Ewropea għad-Drittijiet tal-Bniedem, lill-gvernijiet u lill-parlamenti tal-Istati Membri, lill-Kunsill tas-Sigurtà tan-Nazzjonijiet Uniti, lis-Segretarju Ġenerali tan-Nazzjonijiet Uniti, lill-President tat-80 sessjoni tal-Assemblea Ġenerali tan-Nazzjonijiet Uniti, lill-President tal-Kunsill tad-Drittijiet tal-Bniedem tan-Nazzjonijiet Uniti, lill-Kummissarju Għoli tan-Nazzjonijiet Uniti għad-Drittijiet tal-Bniedem u lill-Kapijiet tad-Delegazzjonijiet tal-Unjoni Ewropea.