1.Itenni l-appoġġ tiegħu għar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) bħala għodda indispensabbli tal-politika barranija għat-titjib tad-drittijiet tal-bniedem madwar id-dinja u għat-tisħiħ tas-sett ta’ għodod tal-UE dwar id-drittijiet tal-bniedem, b’mod partikolari minħabba l-kapaċità tagħha li tikkontribwixxi għat-tibdil fl-imġiba ta’ persuni u entitajiet fil-mira u għall-isforzi biex l-awturi diretti, il-faċilitaturi, l-instigaturi u s-sostenituri indiretti ta’ ksur serju tad-drittijiet tal-bniedem jinżammu responsabbli, kif ukoll dawk li jibbenefikaw direttament jew indirettament minn tali ksur, inklużi l-membri immedjati tal-familja tagħhom; jenfasizza li l-istrument huwa mfassal b’tali mod li ma jaffettwax it-tgawdija tad-drittijiet tal-bniedem mill-popolazzjoni;

2.Jafferma mill-ġdid l-impenn sod tiegħu li jiġġieled l-impunità għal ksur u abbużi serji tad-drittijiet tal-bniedem madwar id-dinja permezz tal-użu effettiv ta’ strumenti u għodod ta’ sanzjonijiet eżistenti tal-UE, inkluż ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE); jafferma mill-ġdid l-impenn sod tiegħu għas-sistema ġudizzjarja internazzjonali, li qed tiffaċċja sfidi bla preċedent, inklużi sanzjonijiet bla bażi kontra l-imħallfin u l-persunal tal-Qorti Kriminali Internazzjonali, li wħud minnhom huma ċittadini tal-UE; iħeġġeġ lill-UE, f’dak ir-rigward, tattiva l-Istatut ta’ Mblukkar Ir-Regolament tal-Kunsill (KE) Nru 2271/96 tat-22 ta’ Novembru 1996 li jipproteġi kontra l-effetti tal-applikazzjoni estraterritorjali tal-leġiżlazzjoni adottata minn pajjiż terz, u l-azzjonijiet ibbażati fuqha jew li jirriżultaw minnha (ĠU L 309, 29.11.1996, p. 1, ELI: http://data.europa.eu/eli/reg/1996/2271/oj). tagħha biex trażżan l-impatt ta’ dawk is-sanzjonijiet;

3.Jitlob valutazzjoni tal-impatt komprensiva tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) u l-interazzjonijiet tiegħu mas-sanzjonijiet speċifiċi għall-pajjiż tal-UE u l-miżuri restrittivi orizzontali l-oħra tal-UE sabiex tiġi evalwata l-koerenza, il-proporzjonalità u l-effettività tiegħu, inkluż fit-tibdil tal-imġiba ta’ dawk inklużi, biex jiġu identifikati lakuni operazzjonali u biex tiġi żgurata applikazzjoni konsistenti u strateġika madwar id-dinja, u jitlob li r-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) jiġi rieżaminat f’konformità mas-sejbiet ta’ din il-valutazzjoni tal-impatt;

4.Jitlob li l-inklużjoni fil-lista mfassla skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) tiġi rieżaminata kontinwament u sistematikament, mill-anqas darba kull 12-il xahar, sabiex jiġu żgurati l-konsistenza, il-proporzjonalità u l-konformità tagħha mal-aħħar informazzjoni u deċiżjonijiet ġudizzjarji;

5.Iqis li aktar informazzjoni dwar il-kriterji ta’ tneħħija mil-lista għandha tkun disponibbli sabiex jissaħħu ċ-ċarezza legali, il-proċess dovut, it-trasparenza u l-obbligu ta’ rendikont;

6.Itenni li huwa importanti li r-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) ikun konsistenti mal-miżuri restrittivi speċifiċi għall-pajjiż u orizzontali tal-UE, il-miżuri settorjali u l-embargos fuq l-armi, kif ukoll l-oqfsa ta’ sanzjonijiet internazzjonali eżistenti, u jikkomplementahom;

7.Iħeġġeġ lill-Kunsill ifittex li jallinja l-inklużjonijiet fil-lista taħt ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) mal-listi tas-sanzjonijiet ta’ sħab tal-istess fehma, b’mod partikolari dawk fil-G7, u tal-Kunsill tas-Sigurtà tan-NU, fejn politikament u legalment fattibbli, sabiex jissaħħu l-leġittimità u l-effettività globali;

8.Jistieden lill-Kummissjoni u lill-Istati Membri jsaħħu s-sinerġiji bejn ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) u l-mekkaniżmi internazzjonali ta’ responsabbiltà, bħan-NU, il-Qorti Kriminali Internazzjonali u l-qrati reġjonali tad-drittijiet tal-bniedem, biex itejbu l-effettività tal-azzjonijiet tal-UE kontra ksur serju tad-drittijiet tal-bniedem;

9.Jissottolinja li huwa importanti li l-pajjiżi kandidati tal-UE u l-pajjiżi kandidati potenzjali jallinjaw ruħhom mar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE), f’konformità mal-allinjament usa’ tagħhom mal-politika estera u ta’ sigurtà komuni tal-UE;

10.Jappoġġja bis-sħiħ l-impożizzjoni ta’ sanzjonijiet immirati kontra l-korruzzjoni fi ħdan il-qafas tal-UE, li ilha prijorità tal-Parlament, kemm jekk permezz tal-inklużjoni tagħha fir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) jew fl-ambitu ta’ reġim differenti; jirrakkomanda li l-kamp ta’ applikazzjoni tar-reġim jiġi estiż biex ikopri każijiet ta’ korruzzjoni fuq skala kbira u abbuż ta’ kuntratti ta’ akkwist statali li jsostnu direttament reġimi awtoritarji, u b’hekk l-abbużi tad-drittijiet tal-bniedem jintrabtu ma’ prattiki kleptokratiċi; jisħaq, barra minn hekk, li s-sanzjonijiet kontra l-korruzzjoni għandhom iqisu l-kuntest sistemiku usa’ u jkunu marbuta mill-qrib ma’ strateġiji komprensivi lejn l-atturi rispettivi; jilqa’ l-fatt li l-Kummissjoni ressqet proposta għal reġim ta’ sanzjonijiet kontra l-korruzzjoni; jiddispjaċih li l-fajl ġie mblukkat fil-Kunsill minn xi Stati Membri;

11.Jisħaq li r-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) għandu jindirizza wkoll il-ksur tad-drittijiet tal-bniedem permess permezz ta’ sorveljanza diġitali, esportazzjonijiet ta’ software ta’ spjunaġġ u teknoloġiji oħra użati għar-repressjoni, u atti intenzjonati ta’ qerda ambjentali b’intenzjoni ċara li ssir ħsara lill-popolazzjoni ċivili; jappella għal inklużjoni espliċita fil-lista ta’ individwi involuti f’tali abbużi;

12.Jilqa’ l-użu reċenti tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) kontra atturi responsabbli għar-repressjoni tranżnazzjonali tad-dissidenti u d-difensuri tad-drittijiet tal-bniedem, u jappella għal aktar inklużjoni fil-listi biex tiġi riflessa din ix-xejra globali li qed tikber u biex jiġu vvalutati b’mod sistematiku l-atti ta’ repressjoni tranżnazzjonali, inklużi s-sorveljanza diġitali, il-fastidju tal-eżiljati, u l-intimidazzjoni transfruntiera, id-diżinformazzjoni u l-abbuż legali; jistieden lill-Kunsill jadotta definizzjoni operattiva ta’ repressjoni tranżnazzjonali biex jiżgura sanzjonar konsistenti, inkluż ta’ prokuri mhux statali bħal kumpaniji tas-sigurtà privati u organizzazzjonijiet tad-dijaspora; jistieden lill-UE żżid l-applikazzjoni tas-sanzjonijiet kontra individwi u entitajiet iddokumentati b’mod kredibbli bħala responsabbli għal atti ta’ repressjoni tranżnazzjonali kontra d-difensuri tad-drittijiet tal-bniedem, inkluż il-fastidju ta’ qraba, l-attakki diġitali u l-intimidazzjoni barra mill-pajjiż;

13.Iħeġġeġ lill-Istati Membri jżommu lura minn azzjonijiet politiċi jew diplomatiċi bilaterali li jimminaw l-impenn tagħhom għall-mekkaniżmi tal-ġustizzja kriminali internazzjonali, inkluż l-Istatut ta’ Ruma, u d-difiża tad-drittijiet tal-bniedem, jew li jikkontradixxu l-pożizzjoni unifikata tal-UE dwar is-sanzjonijiet; jagħti istruzzjonijiet lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, jekk din ir-rakkomandazzjoni ma titqiesx, biex tistieden lill-Istati Membri kkonċernati jallinjaw l-azzjonijiet tagħhom u jżommu l-unità tal-UE; jistieden lill-Istati Membri jsaħħu l-koordinazzjoni u jagħmlu użu mill-istrumenti tagħhom stess, bħall-ġuriżdizzjoni universali u s-sanzjonijiet nazzjonali, dment li dawn jiġu applikati b’mod koordinat b’appoġġ għall-objettivi komuni tal-UE, sabiex iġibu bidla sinifikanti u jgħinu biex jintlaħqu l-objettivi tas-sanzjonijiet tal-UE;

14.Jikkundanna l-fatt li xi Stati Membri naqsu milli jikkonformaw mas-sanzjonijiet tal-UE billi ħallew lil individwi sanzjonati jidħlu fit-territorju tal-UE u b’hekk affettwaw b’mod negattiv il-kredibbiltà u l-effettività tas-sanzjonijiet; iħeġġeġ lill-Istati Membri kollha tal-UE jikkonformaw bis-sħiħ u mingħajr kundizzjonijiet mas-sanzjonijiet tal-UE; jitlob lill-Kummissjoni, bħala l-gwardjan tat-Trattati, tiżgura li l-Istati Membri tal-UE jikkonformaw mas-sanzjonijiet u tindirizza b’mod rigoruż u mingħajr diskriminazzjoni kwalunkwe każ ta’ nuqqas ta’ konformità mill-Istati Membri;

15.Jisħaq li l-miżuri restrittivi tal-UE jistgħu jkunu effettivi bis-sħiħ biss jekk jiġu interpretati, infurzati u implimentati b’mod konsistenti, rapidu u uniformi mill-Istati Membri kollha; jinnota d-differenzi bejn l-Istati Membri f’termini ta’ oqfsa legali, strutturi amministrattivi u riżorsi operattivi għall-implimentazzjoni tas-sanzjonijiet; jistieden, għalhekk, lill-Kummissjoni u lill-Istati Membri jieħdu l-passi meħtieġa biex jiżguraw applikazzjoni aktar armonizzata u koordinata, inkluż billi jsaħħu l-kapaċità għall-iffriżar tal-assi, itejbu l-iskambju ta’ informazzjoni u jiżviluppaw mekkaniżmi komuni ta’ monitoraġġ u infurzar fil-livell tal-UE;

16.Iħeġġeġ lill-SEAE jiddefinixxi perkorsi legali għall-mobilizzazzjoni tal-imgħax akkumulat mill-assi ffriżati ta’ individwi sanzjonati skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) sabiex ikun jista’ jintuża għall-benefiċċju tal-vittmi tal-ksur serju tad-drittijiet tal-bniedem li għalih huma responsabbli l-individwi sanzjonati; iħeġġeġ lill-UE, barra minn hekk, tesplora l-possibbiltà li tistabbilixxi proċedura speċifika rigward qligħ illeċitu;

17.Jilqa’ bil-qawwa l-adozzjoni mill-Kunsill ta’ pakketti ta’ sanzjonijiet tematiċi skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE); iħeġġeġ lill-Kunsill jadotta b’mod sistematiku u proattiv miżuri mmirati simili biex jindirizza ksur speċifiku u serju ieħor tad-drittijiet tal-bniedem, inklużi t-tortura, l-għajbien furzat, id-detenzjoni arbitrarja, u r-repressjoni tad-difensuri tas-soċjetà ċivili u tad-drittijiet tal-bniedem;

18.Itenni t-talba tiegħu lill-Kunsill biex gradwalment jaqleb għal votazzjoni b’maġġoranza kwalifikata għal deċiżjonijiet fl-oqsma tal-politika estera u ta’ sigurtà komuni li ma għandhomx implikazzjonijiet militari jew ta’ difiża, bħal sanzjonijiet;

19.Jitlob li r-reġim ta’ sanzjonijiet tal-UE jkun konsistenti mad-dritt kriminali internazzjonali, mad-dritt umanitarju internazzjonali, u mal-politiki tal-UE relatati mal-istat tad-dritt u l-libertajiet fundamentali, u jikkomplementahom, bl-għan li tissaħħaħ il-ġlieda kontra l-impunità madwar id-dinja;

20.Iħeġġeġ lill-UE tallinja b’mod strateġiku l-inklużjoni fil-lista tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) mal-isforzi nazzjonali u internazzjonali tal-ġustizzja kriminali, inkluż billi tinkludi individwi akkużati minn qrati internazzjonali, bħall-Qorti Kriminali Internazzjonali, u awturi ta’ delitti internazzjonali l-aktar serji u atturi oħra li jiffrustraw tali proċessi ta’ obbligu ta’ rendikont;

21.Jissottolinja li s-sanzjonijiet għandhom iservu wkoll l-għan li jiżguraw li l-awturi ta’ ksur serju tad-drittijiet tal-bniedem u korruzzjoni ma jibqgħux anonimi, u b’hekk jesponu lil dawk responsabbli;

22.Iħeġġeġ lill-Kunsill jiżgura li r-reġjuni kollha tad-dinja jiġu ttrattati bi skrutinju u impenn ugwali, u jikkoreġi l-iżbilanċi ġeografiċi u tematiċi attwali fl-inklużjoni fil-lista tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) billi jestendi l-inklużjonijiet fil-lista lil hinn mill-konċentrazzjoni ġeografika attwali għall-persuni u l-entitajiet kollha responsabbli għal ksur serju tad-drittijiet tal-bniedem, irrispettivament mill-pajjiż ta’ oriġini tagħhom;

23.Iħeġġeġ lill-Kunsill jagħti attenzjoni partikolari lill-ksur bħall-vjolenza sesswali u abbażi tal-ġeneru, il-politiki diskriminatorji, u l-persekuzzjoni tal-mexxejja, tal-ġurnalisti u tal-attivisti nisa, sabiex dawn il-kategoriji jiġu riflessi b’mod adegwat fl-inklużjoni futura fil-lista;

24.Jinnota li, s’issa, proporzjon sinifikanti ta’ individwi sanzjonati skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) kienu involuti fl-apparat repressiv tal-istat, iżda ma ħadux deċiżjonijiet, filwaqt li minoranza biss ta’ dawk inklużi fil-lista għandhom pożizzjonijiet ta’ tmexxija politika jew militari; iħeġġeġ lill-Kunsill jestendi d-deżinjazzjonijiet lil hinn mid-deżinjazzjonijiet ta’ livell baxx biex jinkludu mexxejja politiċi u militari, filwaqt li jissanzjona lil dawk responsabbli għat-teħid ta’ deċiżjonijiet li wasslu għal ksur serju tad-drittijiet tal-bniedem;

25.Jappella għal komunikazzjoni akbar u aktar effettiva dwar is-sanzjonijiet imposti biex tiġi mtennija l-pożizzjoni globali tal-UE dwar id-drittijiet tal-bniedem u l-ġlieda kontra l-impunità, peress li f’xi każijiet, individwi sanzjonati qed jintwerew bħala eroj mill-propaganda nazzjonali u saħansitra jiġu ppremjati minn reġimi repressivi; jinnota li l-element ta’ deterrent tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) jaħdem bl-aktar mod effettiv kontra individwi u entitajiet bi proprjetà fl-UE, jew b’mezzi biex jivvjaġġaw lejha;

26.Jikkundanna kwalunkwe kontrosanzjoni imposta fuq l-UE jew l-istituzzjonijiet, l-Istati Membri, il-korpi jew iċ-ċittadini tagħha unikament għall-promozzjoni u r-rispett tad-drittijiet tal-bniedem, id-demokrazija u l-istat tad-dritt permezz tar-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE);

27.Jirrakkomanda trasparenza msaħħa u linji gwida ċari fil-proċess tas-sanzjonijiet, filwaqt li jiġu rispettati d-drittijiet tal-individwi inklużi fil-lista għal rieżami ġudizzjarju effettiv;

28.Jirrakkomanda li tibdil fl-imġiba sostnut, li jista’ jintwera, reali u dejjiemi minn individwi u entitajiet inklużi fil-lista, bħall-kooperazzjoni kontinwa mal-mekkaniżmi tal-ġustizzja internazzjonali, jiġi rikonoxxut formalment bħala kriterju ta’ tneħħija mil-lista biex jiġu inċentivati l-obbligu ta’ rendikont u l-konformità;

29.Jipproponi li jiġi stabbilit mekkaniżmu ta’ konsultazzjoni strutturat u trasparenti għar-rapportar u l-involviment tas-soċjetà ċivili fil-proċess tas-sanzjonijiet, b’miżuri protettivi għall-informaturi, inkluż l-istabbiliment ta’ punt ta’ kuntatt iddedikat tal-SEAE; jirrakkomanda li tiġi introdotta tieqa baġitarja biex tissaħħaħ il-kapaċità tal-SEAE li jivvaluta, jinvestiga, jirreaġixxi għal u jipproċessa b’mod sistematiku l-informazzjoni u l-proposti mis-soċjetà ċivili;

30.Jistieden lill-Kunsill u lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà jipprevedu rwol komplementari għall-Parlament fil-ġbir u l-proposta ta’ każijiet ta’ ksur serju tad-drittijiet tal-bniedem li għandhom jiġu kkunsidrati skont ir-reġim ta’ sanzjonijiet, u jipprovdu lill-Parlament rapporti annwali dwar deċiżjonijiet dwar sanzjonijiet skont ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE), inkluż fiċ-ċirkomvenzjoni tas-sanzjonijiet; jitlob li r-rakkomandazzjonijiet għall-inklużjoni fil-lista li jinsabu fir-riżoluzzjonijiet tal-Parlament jiġu kkunsidrati bir-reqqa mill-Kunsill;

31.Jitlob li r-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) jiġi rieżaminat biex tiġi evitata ċ-ċirkomvenzjoni tas-sanzjonijiet billi tinħareġ gwida espliċita u aġġornata dwar il-projbizzjoni li jiġu pprovduti riżorsi ekonomiċi u appoġġ tekniku u materjali lil individwi u entitajiet inklużi fil-lista, filwaqt li jiġi ċċarat li l-projbizzjoni fuq l-għoti ta’ appoġġ tekniku u materjali tinkludi assistenza mhux finanzjarja bħall-infrastruttura tal-ICT, is-software, il-faċilitazzjoni legali u l-għodod ċibernetiċi użati għar-repressjoni; jenfasizza l-ħtieġa li jissaħħaħ ir-reġim ta’ sanzjonijiet tal-UE billi jitwessa’ u jiġi diversifikat l-użu ta’ sanzjonijiet sekondarji bil-ħsieb li jiġu mmirati uffiċjali tal-gvern, entitajiet, negozji u individwi involuti fil-faċilitazzjoni tal-ksur jew iċ-ċirkomvenzjoni tas-sanzjonijiet, li jippermetti lir-reġimi awtoritarji jkomplu l-ksur serju tagħhom tad-drittijiet tal-bniedem;

32.Jistieden lill-Kummissjoni ssaħħaħ il-kooperazzjoni mal-Awtorità Bankarja Ewropea, l-Awtorità Ewropea tat-Titoli u s-Swieq, l-Awtorità għall-Ġlieda Kontra l-Ħasil tal-Flus u l-unitajiet nazzjonali tal-intelligence finanzjarja sabiex tidentifika b’mod sistematiku jekk humiex qed jintużaw prodotti finanzjarji, kriptoassi u strutturi offshore opaki biex jiġu evitati s-sanzjonijiet;

33.Iħeġġeġ li entitajiet jiġu inklużi kemm taħt ir-Reġim Globali ta’ Sanzjonijiet tal-UE b’rabta mad-Drittijiet tal-Bniedem (l-Att Magnitsky tal-UE) kif ukoll taħt ir-reġimi ta’ sanzjonijiet ġeografiċi fejn xieraq;

34.Jistieden lill-Kunsill jirrevedi l-klawżoli ta’ deroga biex jiżgura li l-kuntratti konklużi qabel ma persuna tiġi inkluża fil-lista ma jkunux ta’ benefiċċju għall-membri tal-familja jew għall-assoċjati tagħhom, jew għal kwalunkwe entità kkontrollata mill-persuna sanzjonata;

35.Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni u lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà.