1.ag aontú leis an gCoimisiún go bhfuil na coinníollacha a leagtar amach i Rialachán CED agus go háirithe in Airteagal 4(2), pointe (a) de, comhlíonta agus go bhfuil an Bheilg i dteideal EUR 7 527 625 de ranníocaíocht airgeadais a fháil faoin Rialachán sin, arb ionann í agus 85 % den chostas iomlán EUR 8 856 030, a chuimsíonn EUR 8 738 968 de chaiteachas ar sheirbhísí pearsantaithe agus EUR 117 062 de chaiteachas ar ghníomhaíochtaí ullmhúcháin, bainistíochta, faisnéise agus poiblíochta, rialaithe agus tuairiscithe;

2.ag tabhairt dá haire gur thíolaic údaráis na Beilge an t-iarratas an 18 Meán Fómhair 2025, agus, tar éis faisnéis bhreise a fháil ón mBeilg, gur chuir an Coimisiún bailchríoch ar a mheasúnú an 9 Eanáir 2026 agus gur thug sé fógra don Pharlaimint faoi an lá céanna; á chur i bhfáth a thábhachtaí atá sé an t-am a ghiorrú idir iarratas ar chúnamh CED a thíolacadh agus an cinneadh maoiniúcháin, agus cearta na Parlaiminte mar bhrainse amháin den údarás buiséadach á gcosaint go hiomlán ag an am céanna;

3.ag tabhairt dá haire go mbaineann an t-iarratas le hoibrithe a bhfuil deireadh tagtha lena ngníomhaíocht in Audi agus i gcúig sholáthróir agus tháirgeoir iartheachtacha agus gur tairbhithe spriocdhírithe a bheidh iontu go léir;

4.ag tabhairt dá haire go bhfuil méadú suntasach tagtha ar an ráta dífhostaíochta i roinnt réigiún sa Bheilg mar gheall ar an incrimint i bhféimheachtaí le dhá bhliain anuas, go háirithe sa Bhruiséil agus in Hainaut (an Vallúin); ag cur béim ar an bhfíoras go bhfuil an riosca dífhostaíochta i gcomhchoibhneas leis an leibhéal oideachais agus go bhfuil riosca dífhostaíochta níos airde roimh dhuine amháin as gach beirt a bhfuil oideachas íseal acu agus duine amháin as gach triúr a bhfuil meánoideachas acu, agus gurb ionann na grúpaí sin agus 83 % d’oibrithe iomarcacha; á chur in iúl gur oth léi go gcuirfidh na hiomarcaíochtaí sin leis an staid tuilleadh; á iarraidh ar údaráis na Beilge bearta a dhéanamh chun féimheachtaí a laghdú chun meath struchtúrach agus réigiúnach a chosc, agus aghaidh á tabhairt ag an am céanna ar éagothromaíochtaí sóisialta as a n-eascraíonn eisiamh an lucht saothair, amhail neamhionannais inscne agus leibhéal íseal oideachais;

5.ag tabhairt dá haire go bhfuil iomaíocht dhomhanda atá ag éirí níos iomaíche ina saintréith den mhargadh domhanda do tháirgeadh agus díol gluaisteán, go háirithe gluaisteáin leictreacha; á thabhairt chun suntais go bhfuil méadú ag teacht ar na dúshláin atá roimh mhonaróirí gluaisteán na hEorpa maidir le samhlacha nuálacha agus inacmhainne a thabhairt chuig an margadh i ndeighleoga atá dírithe ar an todhchaí amhail feithiclí ceallra-leictreacha; á chur in iúl gur oth léi gur scoir Audi de ghníomhaíochtaí sa Bheilg in ainneoin go raibh sé fós brabúsach, agus go n-aistreofar an táirgeadh go dtí an tSín agus go Meicsiceo, agus gur cuireadh 3 414 oibrí ar iomarcaíocht mar thoradh air; ag tabhairt dá haire, agus é ina ábhar imní di, gur chuir dálaí táirgthe dúshlánacha, lena n-áirítear rochtain neamhleor ar fhoinsí fuinnimh ghlain níos saoire agus imscaradh na bhfoinsí sin, le hathlonnú shaoráidí Audi lasmuigh den Aontas;

6.ag cur béim ar an bhfíoras go léiríonn dúnadh an ghléasra tar éis níos mó ná 70 bliain oibríochta, d’ainneoin a tháirgthe feithiclí leictreacha, gur dúshláin de chineál struchtúrach iad na dúshláin atá roimh thionscal na hEorpa, agus nach dúshláin theicneolaíocha amháin iad;

7.á chur i bhfáth a thábhachtaí atá sé teacht ar réiteach inbhuanaithe chun athrú cuspóra a dhéanamh ar an monarcha dhúnta chun poist ardcháilíochta a chruthú sa réigiún; ag tathant ar údaráis na Beilge na bearta is gá a dhéanamh chun oscailt láithreáin monaraíochta nua ag iar-mhonarcha Audi a éascú;

8.ag cur béim ar an bhfíoras go bhfuil cáilíochtaí agus scileanna na n-oibrithe a leagadh as a bpost ríthábhachtach i gcónaí do gheilleagar Eorpach a sheasfaidh an aimsir agus a bhainfidh an t-aistriú glas amach agus bonn tionsclaíoch láidir á choinneáil ag an am céanna; á mheas, dá bhrí sin, gur gá slógadh CED a leabú i bhfreagairt bheartais níos mó ar gach leibhéal polaitiúil chun a áirithiú go bhfaighidh na hoibrithe a ndéantar difear dóibh deiseanna leormhaithe i gcomhréir lena gcáilíochtaí agus lena scileanna;

9.á mheabhrú, i gcomhaontú leis na ceardchumainn agus na comhpháirtithe sóisialta, gurb iad na bearta seo a leanas atá sna seirbhísí pearsantaithe atá le soláthar do na hoibrithe: seirbhísí comhairleoireachta, faisnéise agus socrúcháin; oiliúint, lena n-áirítear scileanna TF; lá fostaíochta; rannchuidiú le gnólachtaí nuathionscanta, dreasachtaí le haghaidh rannpháirtíocht i ngníomhaíochtaí cuardaigh poist; ag cur béim ar a thábhachtaí atá sé poist ardcháilíochta atá dírithe ar an todhchaí a chothú chun athléimneacht fhadtéarmach eacnamaíoch agus shóisialta a áirithiú;

10.á chur i bhfáth go n-áiritheoidh údaráis na Beilge infheictheacht an chistithe ón Aontas agus go leagfaidh siad béim ar a bhreisluach trí fhaisnéis éifeachtach agus spriocdhírithe a chur ar fáil do thairbhithe, d’údaráis réigiúnacha agus áitiúla, do chomhpháirtithe sóisialta agus don phobal i gcoitinne;

11.á iarraidh go ndéanfaí meastóireachtaí críochnaitheacha críochnúla ar na bearta a cuireadh chun feidhme, lena n-áirítear faisnéis shoiléir maidir leis an gcaoi ar úsáideadh na cistí agus faisnéis i dtaobh ar baineadh amach i ndáiríre na cuspóirí ar cruthaíodh CED ina leith leo, lena n-áirítear sonraí agus amlínte maidir le líon na n-oibrithe a ath-imeascadh go rathúil san fhostaíocht agus na poist a bhfuair siad rochtain orthu, agus maidir leis na hoibrithe a bhfuil bearta oiliúna agus uas-scilithe curtha i gcrích acu chomh maith leis na hamlínte ábhartha;

12.ag tabhairt dá haire gur thosaigh an Bheilg ar sheirbhísí pearsantaithe a sholáthar do na tairbhithe spriocdhírithe an 17 Feabhra 2025 agus, dá bhrí sin, gurb ón dáta sin go dtí 24 mhí tar éis theacht i bhfeidhm an chinnidh maoiniúcháin a bheidh tréimhse na hincháilitheachta le haghaidh ranníocaíocht airgeadais ó CED;

13.ag tabhairt dá haire gur thosaigh an Bheilg ag tabhú caiteachas riaracháin chun CED a chur chun feidhme an 9 Iúil 2024 agus, dá bhrí sin, go mbeidh an caiteachas sin incháilithe le haghaidh ranníocaíocht airgeadais ó CED ón dáta sin go dtí 31 mhí tar éis theacht i bhfeidhm an chinnidh maoiniúcháin;

14.ag tabhairt dá haire gur thug údaráis na Beilge dearbhú go n-urramófar prionsabail na córa comhionainne agus an neamh-idirdhealaithe sa rochtain ar na gníomhaíochtaí atá beartaithe agus ina gcur chun feidhme, agus go gcoiscfear aon mhaoiniú dúbailte;

15.á athdhearbhú nach ceadmhach cúnamh ó CED a chur in ionad gníomhaíochtaí atá mar fhreagracht ar chuideachtaí, de bhua an dlí náisiúnta nó comhaontuithe comhchoiteanna;

16.á mheabhrú gur ionstraim dlúthpháirtíochta agus aistrithe chóir é CED agus cé go gcuireann sé tacaíocht ar fáil tar éis poist a chailleadh, nach féidir leis teacht in ionad beartas tionsclaíoch réamhghníomhach comhleanúnach agus comhordaithe de chuid an Aontais chun bonn fostaíochta tionsclaíoch agus slándáil shóisialta na hEorpa, agus athléimneacht fhadtéarmach eacnamaíoch agus shóisialta, a choimirciú agus chun meath struchtúrach réigiúnach a chosc; á chur i bhfáth nach mór é a bheith ina phríomhchúram ag an Aontas cosc a chur ar dhúnadh den sórt sin ar an gcéad dul síos trí na dálaí a chruthú le haghaidh fuinneamh inacmhainne, glan agus iontaofa chun táirgeadh tionsclaíoch a choinneáil iomaíoch, agus ag an am céanna infheistíocht a dhéanamh i scileanna d’oibrithe ardcháilithe agus d’oibrithe tionsclaíocha araon; á chur i bhfáth, thairis sin, go bhfuil géarghá le hiarrachtaí comhleanúnacha agus comhordaithe iomaíochais ón Aontas, arna bhforbairt i ndlúthchomhar leis na Ballstáit, chun bonn fostaíochta tionsclaíoch agus slándáil shóisialta na hEorpa a chosaint agus á chur i bhfios go láidir nach féidir ach le geilleagar Eorpach atá láidir agus athléimneach iomarcaíochtaí ar mhórscála a chosc go héifeachtach, agus ar an gcaoi sin an gá atá le hidirghabháil CED a laghdú;

17.ag formheas an chinnidh atá i gceangal leis an rún seo;

18.á threorú dá hUachtarán an cinneadh seo a shíniú le hUachtarán na Comhairle agus a shocrú go ndéanfar é a fhoilsiú in Iris Oifigiúil an Aontais Eorpaigh;

19.á threorú dá hUachtarán an rún seo, mar aon leis an Iarscríbhinn a ghabhann leis, a chur ar aghaidh chuig an gComhairle agus chuig an gCoimisiún.